უკრაინის შეიარაღებული ძალების ყოფილმა მთავარსარდალმა, ამჟამად უკრაინის ელჩმა დიდ ბრიტანეთში ვალერი ზალუჟნიმ სამეფო გაერთიანებული სერვისების ინსტიტუტის (RUSI) კონფერენციაზე ლონდონში განაცხადა, რომ რუსეთ-უკრაინის ომში ტექნოლოგიები გადამწყვეტ როლს შეასრულებს. ზალუჟნის კომენტარს „ბიბისი“ ავრცელებს.
ყოფილი მთავარსარდლის თქმით, ომი, რომელიც 2022 წელს დაიწყო, „სრულიად განსხვავდება“ ომისაგან, რომელშიც იგი იბრძოდა 2014 წლიდან და მთავარი განსხვავება უახლესი ტექნოლოგიების გამოყენების ახალი ფორმებია.
„დღეს ჩვენ უკვე გამოვიგონეთ გზა 21-ე საუკუნის უძლიერესი არმიების საბრძოლველად და მათ დასამარცხებლად. ცხადია, რომ სწორედ ტექნოლოგიამ უნდა უზრუნველყოს უკრაინელი ერის სტაბილურობა“, – განაცხადა ზალუჟნიმ და დასძინა, რომ რუსეთ-უკრაინის ომი „ჯერ არ არის მომავლის ომი“, ეს არის „გარდამავალი პერიოდის ომი“.
„დღეს, როგორც არასდროს, უკრაინაში პოულობენ გადარჩენის გზებს და ქმნიან ტექნოლოგიებს. მაგრამ გასაგები მიზეზების გამო მათ არ შეუძლიათ უფრო დიდ მასშტაბზე გასვლა. მეორე მხრივ, ჩვენს პარტნიორებს აქვთ რესურსები, მაგრამ არ არსებობს მათი გამოყენების ველი. მხოლოდ ერთად შევძლებთ რესურსის ეფექტურად გამოყენებას, რადგან დრო ჩვენს მხარეზე აღარ არის“, – თქვა ზალუჟნიმ.
მან დასძინა, რომ სავსებით ლოგიკურია, რუსეთ-უკრაინის ომის ბრძოლის ველზე გამოგონილი ეს ცვლილებები, დიდი ალბათობით, განსაზღვრავს ომის ხელოვნებას 21-ე საუკუნეში.
