უკრაინაში მებრძოლი ჯარისკაცი, ბათუმელი ავთანდილ სურმანიძე საქართველოში ცოტა ხნის წინ დაბრუნდა. ის უკრაინაში ბრძოლის დროს დაიჭრა, რის გამოც რეაბილიტაციის კურსს გადიოდა, შემდეგ კი ოჯახური პრობლემების გამო საქართველოში მოუწია დარჩენა.
დღეს, 25 ივლისს, 12:00 საათზე მას სახელმწიფო უსაფრთხოების სამსახურის [სუს] უწყება ჩააბარეს, რომლის მიხედვითაც გამოკითხვაზე დაიბარეს თბილისში, სუს-ის შენობაში.
უწყებაში მითითებული ინფორმაციით, ის მოწმის სახით, გამოკითხვის მიზნით არის დაბარებული გამომძიებელ ირაკლი ჯანყარაშვილთან.
ავთანდილ სურმანიძის ინფორმაციით, მან სახელმწიფო უსაფრთხოების სამსახურს უკვე შეატყობინა, რომ თბილისში გამოკითხვაზე ვერ ჩავა და მოითხოვა ბათუმში გამოჰკითხონ.
„ხვალ ადვოკატთან ერთად ვაპირებ გამოკითხვაზე მისვლას“, – უთხრა ავთანდილმა „ბათუმელებს“.
ავთანდილ სურმანიძე ვარაუდობს, რომ კითხვები უსაფრთხოების სამსახურს უკრაინაში ბრძოლასთან დაკავშირებით ექნება:
„როცა ჩამოვედი, მაშინაც გამომკითხეს, ძირითადად მეკითხებოდნენ სად ვმსახურობდი, რატომ წავედი, რატომ დავბრუნდი. ეს ყველაფერი არის დადგმული ფარსი, რომ ხალხზე მოახდინონ გავლენა. სხვა შემთხვევაში ჩემი გამოკითხვის საფუძველი არ გააჩნიათ. ერთადერთი – უკრაინასთან მიმართებაში დამისვამენ კითხვებს“.
სახელმწიფო უსაფრთხოების სამსახურში დაიბარეს უკრაინაში მებრძოლი ნადიმ ხმალაძე და ასევე სხვა მებრძოლებიც. როგორც ნადიმ ხმალაძემ „ბათუმელებს“ უთხრა, მას დაკითხვაზე ტერორიზმის ხელშეწყობისა და სახელმწიფო გადატრიალების მუხლით იბარებდნენ.
გუშინ, 24 ივლისს, სახელმწიფო უსაფრთხოების სამსახურმა გაავრცელა განცხადება, რომ ბიძინა ივანიშვილის მკვლელობის მომზადების ფაქტებს იძიებენ.
სუს-მა განცხადება მას შემდეგ გაავრცელა, რაც აღნიშნულის შესახებ ბოლო დღეებია „ქართული ოცნების“ წევრები და სახელისუფლებო არხები საუბრობდნენ.
სუს-ის განცხადებით, გამოძიება მიმდინარეობს ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე, დანაშაული გათვალისწინებული საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით.
_____
„სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით საქართველოში დანაშაულებრივი ქმედებების, მათ შორის, პარტია „ქართული ოცნების“ საპატიო თავმჯდომარის, ბიძინა ივანიშვილის მკვლელობის მომზადების ფაქტებს.
ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.
სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით“, – ნათქვამია სუს-ის განცხადებაში.
ამასთან, რამდენიმე დღეა სუს-ში გამოკითხვაზე იბარებენ უკრაინაში მებრძოლ ქართველებს, მათ შორის არიან: ნადიმ ხმალაძე, გელა კახაბრიშვილი, ლაშა ჭიღლაძე, ვაჟა ცეცაძე, ლაშა რუხაია, კონსტანტინე ჯღამაია.
„ქართული ოცნების” ხელისუფლება სახელმწიფო გადატრიალების შეთქმულებებზე 2014 წლიდან საუბრობს აქტიურად, როდესაც შს მინისტრი ალექსანდრე ჭიკაიძე იყო. ჭიკაიძემ 2014 წელს განაცხადა, რომ ენმ „ევრომაიდნის სცენარზე” მუშაობს და დაწყებული იყო საბურავების მომარაგება.
სახელმწიფო უსაფრთხოების სამსახურს „დესტრუქციულ ძალების“ მხრიდან მოსალოდნელ რევოლუციურ სცენარებსა და ხელისუფლების ძალადობრივი გზით დამხობის შესახებ აქამდეც არაერთხელ განუცხადებია და გამოძიებაც დაუწყია.
