სლოვაკეთში კორონავირუსის ახალი შემთხვევების ზრდის გამო ქვეყნის მთავრობამ 90-დღიანი საგანგებო მდგომარეობა და 2-კვირიანი ლოკდაუნი გამოაცხადა.
ქვეყანაში იკეტება ყველა მაღაზია, გარდა სასურსათო მაღაზიებისა, ბარები და რესტორნები. ორი კვირის განმავლობაში მოსახლეობას შეუძლია დატოვოს სახლი მხოლოდ სამსახურში, სასწავლებელში ან ასაცრელად წასვლისას.
იკრძალება 6 ადამიანზე მეტის შეკრება 90 დღის განმავლობაში, გარდა იმ ადამიანებისა, რომლებიც ერთ სახლში ცხოვრობენ.
„ევრონიუსის“ ცნობით, სლოვაკეთში მოსახლეობის 45 პროცენტია აცრილი კოვიდზე, რაც ერთ-ერთი ყველაზე დაბალი მაჩვენებელია ევროკავშირის ქვეყნებში.
5,5-მილიონიან სლოვაკეთში ამ დროისთვის კოვიდით ინფიცირებული ჰოსპიტალიზებული პაციენტების რიცხვმა 3200 მიაღწია, რაც ქვეყნის ჯანდაცვის სამინისტროს განცხადებით, კრიტიკულია. იმ პაციენტების 83 პროცენტი, რომელთაც ჰოსპიტლებში მკურნალობენ, არ არის ვაქცინირებული კოვიდზე.
სლოვაკეთის პრეზიდენტმა ზუზანა ჩაპუტოვამ სამშაბათს მიმართა მოქალაქეებს და განაცხადა, რომ „სლოვაკეთი აგებს ბრძოლას კოვიდთან“.
სლოვაკეთი მეორე ქვეყანაა ევროპაში, რომელმაც საგანგებო ზომებს მიმართა კოვიდის ახალი ტალღის გამო. ევროპის პირველი ქვეყანა, რომელმაც ლოკდაუნი დაიწყო 22 ნოემბერს, ავსტრიაა.
ჯონს ჰოპკინსის უნივერსიტეტის მონაცემების თანახმად, ბოლო 28 დღის განმავლობაში სლოვაკეთში კოვიდით 1099 ადამიანი გარდაიცვალა, დადასტურდა ინფიცირების 231 154 ახალი შემთხვევა.
________________
ფოტო: Visit Bratislava/FB
