შაბათს, 6 აპრილს, გამთენიისას, რუსეთის დარტყმის შედეგად უკრაინაში, ქალაქ ხარკოვში ექვსი ადამიანი დაიღუპა და ათი დაიჭრა.
ამის შესახებ ხარკოვის მერი, იგორ ტერეხოვი წერს სოციალურ ქსელებში.
მისი განცხადების თანახმად, შეტევა „შაჰედებით“ მოხდა საცხოვრებელ უბნებში. დაზიანდა მინიმუმ 9 მაღალსართულიანი კორპუსი, სამი საერთო საცხოვრებელი, რამდენიმე ადმინისტრაციული შენობა, მაღაზია, ბენზინგასამართი სადგური, ავტოგასამართი სადგური და ავტომობილები.
უკრაინის შეიარაღებული ძალების საჰაერო ძალების სარდლობის განცხადებით, გასულ ღამეს რუსეთმა 32 უპილოტო საფრენი აპარატი გამოიყენა უკრაინაზე თავდასხმისთვის. მათგან 28 დრონი უკრაინის საჰაერო თავდაცვამ ჩამოაგდო.
გარდა ამისა, 6 აპრილს, გამთენიისას, რუსეთის შეიარაღებულმა ძალებმა უკრაინის მასშტაბით გაუშვა ექვსი სხვადასხვა ტიპის რაკეტა: სამი S-300 ბელგოროდის რეგიონიდან, ორი X-101/X-555 – სარატოვის რეგიონიდან და ერთი კალიბრის რაკეტა – შავი ზღვიდან.
ბოლო დღეებია რუსეთი განსაკუთრებით უტევს ქალაქ ხარკოვს. 5 აპრილს ხარკოვში რუსეთის თავდასხმის შედეგად 4 ადამიანი დაიღუპა.
_____________
ფოტოზე: ხარკოვი, 6 აპრილი. ფოტო: უკრაინის პოლიცია
