89 წლის ასაკში გარდაიცვალა ურუგვაის ყოფილი ლიდერი ხოსე მუხიკა, რომელსაც მსოფლიოში ყველაზე ღარიბ პრეზიდენტს უწოდებდნენ მოკრძალებული ცხოვრების წესის გამო.
ხოსე მუხიკა ურუგვაის პრეზიდენტად 2009 წელს აირჩიეს, ის ქვეყანას 2015 წლამდე ხელმძღვანელობდა.
ახალგაზრდობაში, 1960-იან და 1970-იან წლებში, ის იბრძოდა მემარცხენე რადიკალურ მოძრაობაში, რომელიც კუბის რევოლუციის იდეებით იყო შთაგონებული და ხელისუფლებასთან საბრძოლველად პარტიზანულ მეთოდებს იყენებდა.
მუხიკამ 14 წელი გაატარა ციხეში. სასჯელის უმეტესი ნაწილის განმავლობაში იგი სამარტოო საკანში იმყოფებოდა. ის გაათავისუფლეს 1985 წელს, როდესაც ურუგვაიში დემოკრატია დაბრუნდა.
„ბიბისი“ წერს, რომ მუხიკას და მის მეუღლეს ყვავილები მოჰყავდათ და ჰყიდდნენ. პრეზიდენტობის დროს იგი ხელფასის დაახლოებით 90%-ს ქველმოქმედებას ახმარდა და ფერმის გარდა, მისი ერთადერთი ქონება 1987 წელს გამოშვებული „ფოლკსვაგენი“ იყო.
ხოსე მუხიკას გარდაცვალების მიზეზი საყლაპავის კიბო გახდა, რომელიც სხვა ორგანოებზეც გავრცელდა და ყოფილმა პრეზიდენტმა მკურნალობაზე უარი თქვა.
_______________
ფოტო: ევროპის პრესფოტო სააგენტო. EPA-EFE/Gaston Britos
