აჭარის უმაღლესი საბჭოს ადმინისტრაციულ შენობაში მოქალაქეთა ჩართულობის ცენტრი და სახელმწიფო სიმბოლოების განსათავსებლად სპეციალური სივრცე მოეწყობა. სამუშაოებისთვის უმაღლესი საბჭოს ბიუჯეტში 105 ათასი ლარია გამოყოფილი.
„ორიგინალი დროშის და გერბის განთავსების“, ასევე „მოქალაქეთა ჩართულობის ცენტრის“ დიზაინი უმაღლეს საბჭოში მზად აქვთ. სამუშაოები ამ დიზაინის მიხედვით უნდა შესრულდეს.
სამუშაოების შესყიდვაზე ელექტრონული ტენდერი აჭარის უმაღლესმა საბჭომ 13 ოქტომბერს 105 ათასი ლარით გამოაცხადა.
წინადადებების მიღება 22 ოქტომბერს დაიწყება და სამ დღეში, 25 ოქტომბერს დასრულდება. სამუშაოები ტენდერში გამარჯვებულმა ხელშეკრულების გაფორმებიდან 35 დღეში უნდა შეასრულოს.
ორიგინალი დროშისა და გერბის განთავსების სივრცის დიზაინი / „კედელი მოწყობილია ხის ფაქტურის მდფ-ის პანელებით, დამონტაჟდება სანათები, ორიგინალი გერბი და დროშა განთავსდება ყუთებში, რომლებიც განათდება. დიზაინის მიხედვით აქვე მოეწყობა ტრიბუნა“ / ფოტო ტენდერიდან
მოქალაქეთა ჩართულობის ცენტრის დიზაინი / „შეხვედრის მაგიდა გრანიტის ზედაპირით, ღია ხისფერი MDF პანელები, ქრომირებული ოქროსფერი ფირფიტა; საოფისე მაგიდა, ზედაპირი ღია ხის ფერი MDF, მაგიდის ფეხი ოქროსფერი MDF; საოფისე სკამის ფეხები უნდა იყოს პრიალა ოქროსფერი, ტექსტილი – ლურჯი ალკანტარას ნაჭერი. რაოდენობა 3 ცალი. შეხვედრის მაგიდის სკამის ფეხები უნდა იყოს პრიალა შავი ოქროსფერი დაბოლოებით. ტექსტილი – ლურჯი ხავერდის ნაჭერი. რაოდენობა 6 ცალი. ცენტრში განთავსდება ბანერი შშმ პირთათვის ბრაილის შრიფტით და სხვ.“ / ფოტო ტენდერიდან.
—
შენობის რემონტისთვის, რომელშიც დღეს აჭარის უმაღლესი საბჭოა განთავსებული, თავის დროზე 6,4 მილიონი ლარი დაიხარჯა, თუმცა, რამდენიმე წელში მისი ხელახლა გარემონტება გახდა აუცილებელი:
ამ თემაზე ასევე ნახეთ:
უმაღლესი საბჭო ახალი შენობის რემონტისთვის 133 000 ლარს ტენდერის გარეშე დახარჯავს
