მთიანი აჭარა,სიახლეები

ხულოს მერია ცენტრალური მეჩეთის სარეკონსტრუქციო პროექტს იყიდის

25.03.2024 • 5366
ხულოს მერია ცენტრალური მეჩეთის სარეკონსტრუქციო პროექტს იყიდის

„უკეთესი ვიზუალური გარემოს შექმნის თვალსაზრისით შესაძლებელია განხილულ იქნას შენობის რელიგიური საკულტო არქიტექტურის და ატრიბუტიკის ელემენტებთან ერთად ქართული კულტურის, ისტორიული მემკვიდრეობის და არქიტექტურული ელემენტებით გამდიდრების საკითხი.“ – აღნიშნულია ხულოს ცენტრალურ მეჩეთთან დაკავშირებით ტენდერში, რომელიც ხულოს მერიამ გამოაცხადა.

ხულოს ცენტრალური მეჩეთის სარეკონსტრუქციო-სამშენებლო სამუშაოების პროექტის შესასყიდად მუნიციპალიტეტმა ტენდერი 23 728 ლარით გამოაცხადა.

პირობის მიხედვით, პროექტი ისე უნდა შედგეს, რომ მთლიანობაში სამუშაოების ხარჯთაღრიცხვა 800 ათასი ლარის ფარგლებში იყოს [ახლანდელი მონაცემებით, ეს იქნება მაქსიმუმი თანხის, რაც შემდგომში მეჩეთის რეკონსტრუქციაზე უნდა დაიხარჯოს].

„სოფელ დეკანაშვილებში არსებულ მიწის ნაკვეთზე, რომლის ფართობი 2 678 კვადრატული მეტრია, განთავსებულია ხულოს მუნიციპალიტეტის ცენტრალური მეჩეთი და სხვადასხვა დამხმარე შენობები და ნაგებობები.

მეჩეთის მშენებლობა დაწყებულა გასული საუკუნის ოცდაათიან წლების დასაწყისში და დასრულებულა 1937 წელს. წლების განმავლობაში შენობამ გარკვეული ცვლილებები განიცადა, თუმცა შენარჩუნებულია მისი არქიტექტურული სახე. შენობის ფასადები ხასიათდება ნალესში გამოყვანილი დეკორაციული მორთულობით.

შენობის სარეკონსტრუქციო-სარემონტო სამუშაოები ბოლოს განხორციელდა გასული საუკუნის ოთხმოცდაათიან წლებში“, – აღნიშნულია სატენდერო განაცხადში.

ხულოს ცენტრალური მეჩეთი / ქართველ მუსლიმთა კავშირის ფოტო

ტენდერში გაწერილია ასევე მონახაზი, თუ როგორ ხედავს ხულოს მერია ცენტრალური მეჩეთის შენობის რეკონსტრუქციას.

განაცხადში აღნიშნულია, რომ „შენობის ფუნქციური დატვირთვიდან გამომდინარე უნდა დამუშავდეს რეაბილიტაციის ისეთი პროექტი, რომელიც მიმზიდველი იქნება ყველა ასაკის ადამიანისათვის და უზრუნველყოფს შექმნას კომფორტული და უსაფრთხო გარემო ბავშვებისათვის, ახალგაზრდებისათვის და ხანში შესულებისთვის“.

ხულოს ცენტრალური მეჩეთი / ქართველ მუსლიმთა კავშირის ფოტო

ტენდერის პირობის მიხედვით, პროექტირებისას:

  • „მაქსიმალურად შენარჩუნებული უნდა იქნას შენობის არსებული არქიტექტურულ-კომპოზიციური გადაწყვეტა.
  • თუმცა უკეთესი ვიზუალური გარემოს შექმნის თვალსაზრისით შესაძლებელია განხილულ იქნას შენობის რელიგიური საკულტო არქიტექტურის და ატრიბუტიკის ელემენტებთან ერთად ქართული კულტურის, ისტორიული მემკვიდრეობის და არქიტექტურული ელემენტებით გამდიდრების საკითხი.
  • პროექტირებით განხილული უნდა იქნას არსებულ შენობაზე სართულის დამატების; ნულოვან ნიშნულზე, სართულშუა გადახურვის ნაწილზე [ანტრესოლი] და ჭერის გადახურვაზე ბეტონის ფილების მოწყობის, გუმბათოვანი სახურავის მოწყობის, არსებული მინარის სრული დემონტაჟის და ახლის მოწყობის შესაძლებლობის საკითხი, შესაბამისი დასკვნების საფუძველზე.
  • პროექტში გათვალისწინებული უნდა იქნას ასევე გათბობის, გაგრილების, ელექტრო გაყვანილობის, სუსტი დენების, სახანძრო უსაფრთხოების, ეზოს კეთილმოწყობის, საყრდენი კედლის მოწყობის საკითხები.
  • ყველა საპროექტო გადაწყვეტილება წინასწარ უნდა შეთანხმდეს მერიასთან. მათ შორის: სამშენებლო ობიექტის და სხვადასხვა ფართობების მოცულობა, განლაგება, ვიზუალური მხარე, ესკიზური პროექტი, გამოყენებული მასალები და სხვა დეტალები.
  • სხვადასხვა მიზეზების გამო, საჭირო შემთხვევებში, მიმწოდებელთან შეთანხმებით, შემსყიდველი იტოვებს უფლებას შეიტანოს ცვლილებები შეთანხმებულ საწყის გეგმაში: გაზარდოს ან შეამციროს მომსახურების მოცულობა ცალკეულ პუნქტებში.“

ტენდერში წინადადებების მიღება 2024 წლის 30 მარტს დაიწყება და პირველ აპრილს დასრულდება.

პროექტი ხულოს მერიას ტენდერში გამარჯვებულმა, ხელშეკრულების გაფორმებიდან არაუგვიანეს 60 დღეში უნდა ჩააბაროს.

რაც შეეხება ტენდერში მონაწილეობის მსურველს, მას „2021 წლის პირველი იანვრიდან ტენდერის გამოცხადებამდე პერიოდში შესრულებული უნდა ჰქონდეს საპროექტო-სახარჯთაღრიცხვო დოკუმენტაციის შედგენის მომსახურების გამოცდილება საერთო ღირებულებით არანაკლებ 85 000 ლარის ოდენობით.“

ტერიტორია სოფელ დეკანაშვილებში, სადაც მეჩეთი დგას სახელმწიფოს საკუთრებაშია და საჯარო რეესტრის მიხედვით ის სარგებლობაშია გადაცემული სსიპ „სრულიად საქართველოს მუსლიმთა სამმართველოზე“, მისი არსებობის ვადით.

ხულოს მერიიდან „ბათუმელებს“ მოგვწერეს, რომ „აღნიშნულ საკითხზე [დაგეგმილი სამუშაოებზე] ყველა შესაბამისი ორგანო ინფორმირებულია“.

ამავე თემაზე:

აჭარაში, ზვარესა და ძენწმანის მეჩეთები, რომლებიც კულტურული მემკვიდრეობის ძეგლებია, დღეს სავალალო მდგომარეობაშია.

მათ რეაბილიტაციაზე ტენდერი აჭარის კულტურული მემკვიდრეობის დაცვის სააგენტომ რამდენჯერმე გამოაცხადა, ჯამში 370 ათას 500 ლარით, თუმცა, ეს ტენდერები არ შედგა.

შემდეგ სააგენტომ თანხა 129 ათას 500 ლარით გაზარდა და ორივე მეჩეთის რეაბილიტაციაზე ტენდერი 500 ათასი ლარით გამოაცხადა, თუმცა არც ეს ტენდერი შედგა.

ვრცლად: ზვარესა და ძენწმანის მეჩეთების სარეაბილიტაციო თანხა 500 ათასამდე გაიზარდა

ქედის მუნიციპალიტეტში მდებარე ამ მეჩეთების რეაბილიტაციაზე მორიგი ტენდერი აჭარის კულტურული მემკვიდრეობის დაცვის სააგენტოს ჯერ არ გამოუცხადებია.

გადაბეჭდვის წესი


ასევე: