„რუსული კანონის მიღების მცდელობა საქართველოში, მე ვფიქრობ, რომ ჩემი და ამ ქვეყნის სხვა მოქალაქეების შეურაცხყოფაა.
ვერ ვხვდები, რატომ უნდა მიიღონ რუსული კანონი საქართველოში? მე, მაგალითად, ამას არ დავუშვებ”, – ამბობს “ბათუმელებთან” საუბრისას 34 წლის მარტოხელა დედა, ნათია მელაძე ხულოდან.
ნათიას ორი შშმ პირი შვილი ჰყავს:
„უკვე 11 წელია, რაც მარტოხელა დედა ვარ, თუმცა სტატუსის გარეშე, რადგან ჩემი შვილები მამის გვარს ატარებენ, მარტოხელა დედის სტატუსი არ მომანიჭეს. მამა ბავშვებს საერთოდ არ ნახულობს და არც ალიმენტს იხდის სრულად.
ჩემი შემოსავლის წყარო ხელსაქმეა. ვქსოვ, ვქარგავ, ვკერავ და ამით მაქვს შემოსავალიც. სხვადასხვა ღონისძიებებზე ვაკეთებ ჩემი ხელნაკეთების გამოფენასა და გაყიდვას.
ამ კანონს თუ მიიღებენ, აღარ მექნება შემოსავლის წყარო. ბევრი ღონისძიება, სადაც ჩემს ნაკეთობებს ვფენ, არასამთავრობო ორგანიზაციების ორგანიზებულია. რასაც ამ გამოფენებზე ერთი დღის განმავლობაში ვყიდი, იმას ერთ თვეში ვერ გავყიდი სახლიდან.
აღარ გვექნება შემოსავალი ამ კანონის მიღების შემთხვევაში, მაგრამ მე მირჩევნია, ჩაი დავლიო, ვიდრე რუსული კანონი და რუსები შემოვიდნენ საქართველოში”, – გვითხრა ნათიამ.
ნათია მის ირგვლივ მყოფ ხულოელთა განწყობაზეც გვიყვება და ამბობს, რომ ქვეყანაში რუსული კანონის მიღებას მხარს არავინ არ უჭერს. ქალი თვლის, რომ ამ კანონის მიღების შემთხვევაში, მათ შორის ძალიან დაზარალდებიან გლეხები.
„მე არ მინდა რუსეთი, არ მინდა რუსული კანონი და არ მინდა ჩემმა შვილებმა იცხოვრონ გარუსებულ საქართველოში. გაჭირვებულ ადამიანებზე ვინ მოჰყვება, თუ არ იქნება კრიტიკული მედია?“
- რა ხდება
მმართველმა პარტიამ მიცემული პირობა დაარღვია და ე.წ. რუსულ კანონის ჩაგდებიდან ერთი წლის შემდეგ კანონპროექტი ისევ დააბრუნა.
„ქართული ოცნების“ მიერ 3 აპრილს დარეგისტრირებულ კანონპროექტში „უცხოური გავლენის გამჭვირვალობის შესახებ“, გასულ წელს „ხალხის ძალის“ მიერ ინიციირებული და საპარლამენტო უმრავლესობის 76 დეპუტატის მხარდაჭერილი კანონისგან განსხვავებით, ტერმინი „უცხოური გავლენის აგენტი“ ჩანაცვლებულია „უცხოური ძალის ინტერესების გამტარებლით“.
კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის“ სტატუსს მიანიჭებს.
საქართველოს საერთაშორისო პარტნიორებმა, აშშ-ის, ევროკავშირისა და ევროპის საბჭოს ჩათვლით, შეშფოთება გამოთქვეს საქართველოს ხელისუფლების მიერ შარშან „უპირობოდ“ გაწვეული კანონპროექტის ხელახალი ინიციირების გამო. დასავლელი პარტნიორები საქართველოს მოუწოდებენ, უარი თქვას აღნიშნული კანონის მიღებაზე, რადგან ის ხელს შეუშლის საქართველოს ევროპულ პერსპექტივას.
მსგავსი კანონის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედიასაშუალებები. დროთა განმავლობაში რუსეთი აღნიშნულ კანონს სულ უფრო ამკაცრებდა და ის ამჟამად ვრცელდება ფიზიკურ პირებსა და ნებისმიერ ადამიანზე, რომელიც რაიმე ფორმით იღებს ფულს დასავლური ორგანიზაციებიდან.
