შეერთებულ შტატებს სურს დაინახოს უკრაინის უფრო მკაფიო გეგმა რუსეთის ფედერაციის წინააღმდეგ ომის წარმოებისას. ეს თემა მომავალ კვირას დავოსში პრეზიდენტ ვლადიმერ ზელენსკისთან ერთად განხილვის საგანი იქნება.
Bloomberg-ი საკუთარ წყაროებზე დაყრდნობით იუწყება, რომ ამ თემაზე ზელენსკისთან ისაუბრებს აშშ-ის პრეზიდენტის მრჩეველი ეროვნული უსაფრთხოების საკითხებში, ჯეიკ სალივანი. აშშ-ის ოფიციალური პირები ამ საკითხს უახლოეს კვირებში გაამახვილებენ ყურადღებას.
„ვაშინგტონის ოფიციალური პირები შეშფოთებული არიან, რომ ზელენსკისა და მისი არმიის მეთაურს, ვალერი ზალუჟნის შორის არსებული უთანხმოება აფერხებს ახალი სტრატეგიის შემუშავების შესაძლებლობას“, – წერს გამოცემა.
უკრაინელი სამხედროები ახლა ამუშავებენ გეგმას 2024 წლისთვის და განიხილავენ ვარიანტებს მრავალი სპექტრით. შეერთებულ შტატებს სურს განსაზღვროს, რა კუთხით მიმართოს თავისი მხარდაჭერა, რათა დაეხმაროს უკრაინას მომავალი წელს საკუთარი თავი დაიცვას.
კიევის პარტნიორები ამბობენ, რომ გადამწყვეტი მნიშვნელობა ენიჭება მკაფიო სამხედრო სტრატეგიის შემუშავებას ამჟამინდელი პოზიციების დასაცავად და შემდგომში რუსული ხაზების გარღვევას.
___
დღეს კი ლატვიაში მყოფმა ზელენსკი იმაზე ისაუბრა, რომ ფრონტზე რთული მდგომარეობაა, რადგან „ჩვენ არ გვაქვს საკმარისი იარაღი. ამასთან, რუსები არ თმობენ საკუთარ მიზნებს“. მან ასევე განმარტა, რომ მტერი ჯერ კიდევ აკონტროლებს უკრაინის ცას, ამიტომ თავდაცვის ძალებს „განიერი ნაბიჯები წინ ვერ მიიწევენ“.
ზელენსკიმ ასევე განაცხადა, რომ რუსეთში 2024 წლის მარტში დაგეგმილი საპრეზიდენტო არჩევნების წინ, რუსული არმია ეცდება წინ წაიწიოს.
რაც შეეხება რუსეთს და მის ეკონომიკას, უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა, კირილო ბუდანოვმა Le Monde-სთვის მიცემულ ინტერვიუში განაცხადა, რომ მისი ეკონომიკა არმიაზე ძლიერი აღმოჩნდა, თუმცა ადრე ყველა პირიქით ფიქრობდა. და რუსეთი დღეს „არავითარ შემთხვევაში არ შიმშილობს“.
ბუდანოვის პროგნოზი ასეთია: „ამ ტემპით მას (რუსეთის ფედერაციას) შეუძლია საკმაოდ დიდ ხანს გაძლოს“.
„დასავლეთის ამჟამინდელი სანქციები საკმარისი არ არის. ისინი უნდა შეხებოდა რუსეთის ეკონომიკის ძირითად სექტორებს: ენერგეტიკას, მეტალურგიას და მთლიანად ფინანსურ სისტემას“, – განაცხადა ბუდანოვმა.
