ბათუმის რესპუბლიკურ საავადმყოფოში დღეს, 9 სექტემბერს, კორონავირუსით ინფიცირებული 104 პაციენტია. ეს კორონავირუსით ინფიცირებულთა რეკორდული რაოდენობაა აჭარაში.
კორონავირუსის სტატისტიკის ზრდა აჭარაში პირველ სექტემბერს დაიწყო, როცა საკონდიტრო „დონას“ თანამშრომელს კორონავირუსი დაუდასტურდა. პირველი სექტემბრიდან 8 სექტემბრის ჩათვლით აჭარაში კორონავირუსის 117 შემთხვევა დადასტურდა.
კორონავირუსის შემთხვევები ბათუმში დაფიქსირდა: საკონდიტროში, ბაზრობაზე, ტელევიზიაში, სკოლაში, ბანკში, იუსტიციის სახლში, გარემოსდაცვით დეპარტამენტში და საზოგადოებრივ ტრანსპორტში.
სტატისტიკა დღეების მიხედვით ასე გამოიყურება:
- 1 სექტემბერი – 6 ახალი შემთხვევა
- 2 სექტემბერი – 26 ახალი შემთხვევა
- 3 სექტემბერი – 6 ახალი შემთხვევა
- 4 სექტემბერი – 13 ახალი შემთხვევა
- 5 სექტემბერი – 13 ახალი შემთხვევა
- 6 სექტემბერი – 12 ახალი შემთხვევა
- 7 სექტემბერი – 20 ახალი შემთხვევა
- 8 სექტემბერი – 21 ახალი შემთხვევა
დღეს, 8 სექტემბერს, თბილისის ინფექციური საავადმყოფოს სამედიცინო დირექტორმა, მარინა ეზუგბაიამ ბრიფინგზე განსაკუთრებული ყურადღება გაამახვილა აჭარაზე. მან თქვა, რომ აჭარაში მდგომარეობა სერიოზულია: „ინციდენტობის მაჩვენებელი 42.4-ია. ეს ნიშნავს, რომ აჭარა წითელი ზონაა“.
მთავრობის ინფორმაციით, არ განიხილება ბათუმის ჩაკეტვის საკითხი, თუმცა ბათუმსა და ქობულეთში სწავლა სკოლებსა და უმაღლეს სასწავლებლებში 15 სექტემბერს არ დაიწყება, ამ ქალაქებში სწავლება პირველ ოქტომბრამდე დისტანციურად შედგება.
