ბათუმში კორონავირუსის 12 ახალი შემთხვევა დაფიქსირდა, მათ შორის, რვა დაინფიცირებულის წყარო ამ ეტაპზე უცნობია. გამოვლენილი ახალი შემთხვევებიდან 4 „დონას“ კლასტერს უკავშირდება.
აჭარის საზოგადოებრივი ჯანდაცვის ცენტრის დირექტორის, რუსუდან შავიშვილის ინფორმაციით, ამ დრომდე აჭარის ტელევიზიაში ჩატარებული კვლევის შედეგები უარყოფითია, თუმცა ჯერ ნიმუშების კვლევა არ დასრულებულა.
რუსუდან შავიშვილის თქმით, 8 ახალი შემთხვევა პოლიკლინიკებში, ასევე კარვებში ჩატარებული ტესტირების შედეგად გამოვლინდა. „ესენი ყველა თვითდინებით არიან მისული. ჯერჯერობით სანამ ეპიდკვლევა არ დასრულდება საწყის ეტაპზე, განიხილება, როგორც უცნობი წყარო,“ – აღნიშნა რუსუდან შავიშვილმა.
ამ დროისთვის ბათუმის რესპუბლიკურ საავადმყოფოში კორონავირუსზე 74 პაციენტი მკურნალობს.
„ინფიცირებულების ჯანმრთელობის მდგომარეობა დამაკმაყოფილებელია, მართვით სუნთქვაზე არც ერთი არ გახლავთ. პნევმონია 18 პირს უფიქსირდება”,- უთხრა რუსუდან შავიშვილმა ჟურნალისტებს.
6 სექტემბერს საქართველოში ახალი კორონავირუსის 29 შემთხვევა დაფიქსირდა. ჯამში დადასტურებული შემთხვევების რაოდენობა არის 1650.
stopcov.ge-ის მონაცემებით, ამ დროისთვის გამოჯანმრთელებულია – 1310, გარდაიცვალა – 19, კარანტინშია – 6020.
