უმაღლესი საბჭოს ფრაქცია „ერთიან ნაციონალურ მოძრაობაში“ აცხადებენ, რომ მათ მიერ არაერთხელ იქნა წარდგენილი წინადადება „ოცნების დასახლების“ პრობლემების მოგვარებასთან დაკავშირებით, თუმცა ადგილობრივი ხელისუფლებისგან დღემდე პასუხი არ მიუღიათ. აჭარის მთავრობის მიერ წარმოდგენილი შესაბამისი პროგრამა კი, როგორც ოპოზიცია აცხადებს, კითხვით ნიშნებს აჩენს.
საუბარია სოციალური და სტიქიის შედეგად დაზარალებული ოჯახებისათვის საცხოვრებელი პირობებით უზრუნველყოფის პროგრამაზე, რომლისთვისაც 2019 წელს გათვალისწინებული იყო 3,7 მილიონი ლარი, ხოლო 2020 წელს გათვალისწინებულია 16 მილიონი ლარი. ამ პროგრამით უნდა განხორციელდეს ე.წ. „ოცნების ქალაქის“ ტერიტორიაზე მრავალბინიანი საცხოვრებელის სახლების მშენებლობა. პროგრამა ამჯერად 2020-23 წლებზეა გათვლილი, დაფინანსება კი ჯამში 73 მილიონი ლარია.
„წარმოდგენილ პროგრამაში არ არის გაწერილი კრიტერიუმები, თუ ვის უნდა გადაეცეს ბინა, ასევე დაუზუსტებელია, რა ოდენობის ფართობი გადაეცემა თითოეულ ოჯახს და როგორ მდგომარეობაში, არ არის წარმოდგენილი ოცნების ქალაქში მცხოვრები ოჯახების დასაქმების გეგმა, დღემდე დაუზუსტებელია პროგრამაში ასახული ციფრები, რაც აჩენს უფრო მეტ კითხვებს“, – აცხადებენ ოპოზიციურ ფრაქციაში.
პროგრამასთან დაკავშირებით ფრაქციის შენიშვნები:
[crosslist]
- „აჭარის მთავრობამ განაცხადა, რომ ოცნების ქალაქში ცხოვრობს 1700 ოჯახზე მეტი, პროგრამა გაწერილია 1550 ოჯახზე, მაშინ როცა ჯერ კიდევ არც კრიტერიუმებია დადგენილი და არც მიღებულა გადაწყვეტილება, რომელიმე ოჯახის ამორიცხვასთან დაკავშირებით;
- 2019-2022 წლების პროგრამით [სადაც განსხვავებული ციფრები იყო] გამოდიოდა, რომ ხელისუფლება გეგმავდა თითოეულ ოჯახზე, საშუალოდ, 26 კვ.მ ფართობის გადაცემას, ხოლო 2020-2023 წლების პროგრამით [გაზრდილი დაფინანსებით] გამოდის, რომ იგეგმება ერთ ოჯახზე საშუალოდ 39 კვ.მ ფართობის ბინის გადაცემა, მაშინ როცა იქ მცხოვრები ოჯახების დიდი ნაწილი შედგება 5-6-სულიანი ოჯახებისაგან და შეუძლებელია მათი განთავსება მსგავს მცირეფართიან ბინაში;
- არ არის განმარტებული ბინა გადაეცემათ თუ არა იმ ოჯახებს, ვინც მიიღო 25 000-ლარიანი დახმარების პროგრამის დაფინანსება;
- უცნობია, რა ღონისძიებების გატარებას გეგმავს ხელისუფლება „ოცნების ქალაქში“ მცხოვრები ოჯახების დასაქმების მიზნით;
- პროგრამაში არ არის გაწერილი 1500 ოჯახზე მეტი დასახლებისათვის საჭირო ინფრასტრუქტურის განვითარება, მაგალითად სკოლის, საბავშვო ბაღის და სხვა დაწესებულებების მშენებლობის ხარჯები, რაიმე წინადადებაც არ არის წარმოდგენილი აღნიშნულთან დაკავშირებით;
- მსგავსი ტიპის დასახლების შექმნის შემდგომ მოსახლეობის სოციალიზაციის მიზნით განსახორციელებელ ღონისძიებებთან დაკავშირებით არ არის წარმოდგენილი წინადადებები და სხვა.“
[/crosslist]
„სწორედ ზემოაღნიშნული პასუხგაუცემელი კითხვები აჩენს ეჭვებს, ხომ არ გეგმავს ხელისუფლება 2020 წლის არჩევნებისთვის აღნიშნული პროგრამის გამოყენებას და შემდგომ მოსახლეობის მოტყუებას – აცხადებს ოპოზიციური ფრაქცია. – კიდევ ერთხელ მოვითხოვთ ფართო დისკუსიის საფუძველზე მოხდეს ზემოაღნიშნული საკითხის განხილვა, სადაც ჩართული იქნებიან ოცნების ქალაქის დასახლების წარმომადგენლები, კვალიფიციური არასამთავრობო ორგანიზაციები და უმაღლეს საბჭოში წარმოდგენილი დეპუტაცია, მათ შორის ოპოზიცია“.
ოპოზიცია იწუნებს ეკომიგრანტი ოჯახების საცხოვრებლით უზრუნველყოფის პროგრამასაც, რომლის მიხედვითაც 2020 წელს დაგეგმილია 109 ოჯახზე კომპენსაციის – 25 000 ლარის გაცემა. ენმ თვლის, რომ „პროგრამა არაეფექტურია, რადგან დღეს შეუძლებელია 25 000 ლარად შეიძინო საცხოვრებელი ბინა“.
„პროგრამა ვერ მოაგვარებს არსებულ პრობლემებს. შედეგი იქნება ის, რომ ეკომიგრანტი ვერ შეიძენს ბინას, იძულებული იქნება დაიქირავოს საცხოვრებელი ან აიღოს საბანკო სესხი, რომ შეიძინოს ბინა, ხოლო გარკვეული პერიოდის შემდეგ ვეღარ გადაიხდიან ქირას და დარჩებიან საცხოვრებლის გარეშე, ან შესაძლოა ვეღარ გადაიხადოს სესხი და ისევ გარეთ დარჩენის რისკები გაიზარდოს. სწორედ აღნიშნული არასწორი მიდგომის შედეგად ჩვენ მივიღებთ ახალ „ოცნების დასახლებებს“. ამიტომ, მიზანშეწონილად მიგვაჩნია განხორციელდეს სოციალური სახლების მშენებლობა და როგორც ეკომიგრანტებს, ე.წ „ოცნების დასახლება“-ში, ბარაკებსა და ავარიულ სახლებში მცხოვრებ მოსახლეობას გადაეცეს საცხოვრებელი ბინა უსასყიდლოდ“, – აცხადებს ენმ.
ოპოზიციის შენიშვნები აჭარის მთავრობამ ბიუჯეტის პროექტთან ერთად მიიღო. დოკუმენტი, საერთო შენიშვნებით, უმაღლესმა საბჭომ მთავრობას უკვე გადაუგზავნა.
რეგიონის საკანონმდებლო ორგანოში გადამუშავებული პროექტის წარდგენისას კი მთავრობამ, როგორც ოპოზიციის, ისე უმრავლესობის მიერ გამოთქმული შენიშვნები ან უნდა გაითვალისწინოს, ან დააფიქსიროს საკუთარი არგუმენტები.
– – –
აჭარის ფინანსთა და ეკონომიკის სამინისტრომ ქალაქ ბათუმში, მეჯინისწყლის დასახლებაში მდებარე მიწის ნაკვეთზე [ფართობი: 9327 კვ.მ] მრავალბინიანი საცხოვრებელი კომპლექსის სამშენებლო სამუშაოების შესყიდვაზე ტენდერი უკვე გამოაცხადა. სატენდერო თანხა 41 468 000 ლარია.
მშენებლობა ხელშეკრულების გაფორმებიდან 18 თვეში უნდა დასრულდეს. ტენდერში წინადადებების მიღება კი 2019 წლის 8 დეკემბერს დაიწყება და 13 დეკემბერს დასრულდება.
ამ თემაზე:
ოცნების ქალაქის მცხოვრებლები აჭარის მთავრობასთან საპროტესტო აქციას გამართავენ
მთავარი ფოტო: „ოცნების ქალაქში“ ასაშენებელი საცხოვრებელი კომპლექსი / რენდერი სატენდერო დოკუმენტებიდან
