ინკლუზიური განათლების ხარისხი აჭარის სკოლებში

აჭარის განათლების მინისტრის მოადგილემ სულიკო თებიძემ, დღეს 22 თებერვალს ბათუმში „დემოკრატიული ჩართულობის ცენტრში“, საჯარო სკოლებში შეზღუდული შესაძლებლობის მქონე ბავშვების განათლების ხელმისაწვდომობის ანგარიში წარმოადგინა. მინისტრის მოადგილის განცხადებით, რეაბილიტირებულ ან ახალაშენებულ სკოლებში ყველა პირობაა შექმნილი შშმ ბავშვებისთვის ხარისხიანი   განათლების მისაღებად. თუმცა, პრობლემად რჩება  სპეცმასწავლებელთა კვალიფიკაცია.

„სპეცმასწავლებლის შტატი ყველა სკოლაშია. ამჟამად ბათუმში გვყავს 33 სპეცმასწავლებელი.  4 ინკლუზიური განათლების კოორდინატორი და 4 ფსიქოლოგი.

ქობულეთში – 42 სპეცმასწავლებელი, ხელვაჩაურში – 25, ქედაში – 16, შუახევში – 10 და ხულოში -17.“

მინისტრის მოადგილის თქმით, აჭარის განათლების სამინისტრო ყოველწლიურად  ახორციელებს სკოლების ინფრასტრუქტურის გაუმჯობესებას.

„მე-6 საჯარო სკოლაში არსებობდა შშმ პირებისთვის კლასები რომელიც არ შეესაბამებოდა ნორმებს, ამიტომ გასულ წელს შევიმუშავეთ სპეციალური პროგრამა,  და ერთ-ერი სკოლის პირველი სართული მთლიანად ავითვისეთ და ჩავატარეთ მისი რეაბილიტაცია“. აღნიშნული სკოლის გახსნა სულიკო თებიძის თქმით, მარტის პირველ ნახევარში იგეგმება.

სკოლაში, როგორც მინისტრის მოადგილე ამბობს, ფუნქციონირებს სამი სახელოსნო, სადაც მოსწავლეები გაკვეთილების შემდეგ თიხაზე, ბატიკაზე მუშაობას ისწავლიან. შეისწავლება ასევე კერვა, ქარგვა და ქსოვა. სკოლის რეაბილიტაციისთვის 151 ათასი ლარი დაიხარჯა.

სულიკო თებიძის თქმით, სკოლაში 33 შშმ ბავშვი ინტეგრირებულ კლასებში სწავლობს. „ხოლო ის ბავშვები რომლებსაც ინტეგრირებულად სწავლა არ შეუძლიათ, ცალკე შესაბამის კლასში გადიან სწავლებას. ასეთი სულ 14 ბავშვია. ამ ბავშვებისთვის შექმნილია სპეციალური სწავლების პროგრამა, დღის პირველ ნახევარში ხდება აკადემიური უნარების განვითარება, მეორე ნახევარში კი სახელოვნებო სწავლება. ამ ბავშვებისთვის გათვალისწინებულია ორჯერადი კვებაც, რადგან დღის მეორე ნახევარშიც სკოლაში რჩებიან. ბავშვების ტრანსპორტირებას ვუზრუნველჰყოფს სამინისტრო“.

მინისტრის მოადგილე ამბობს, რომ ადაპტირებული ტრანსპორტი ძალიან ხშირად ფუჭდება, ამიტომ ახალი ტრანსპორტის შესაძენად სკოლას გამოეყო თანხები და გამოცხადებულია ტენდერი.

მინისტრის მოადგილის ანგარიშს შეზღუდული შესაძლებლობის მქონე პირები და მათი უფლებების დამცველი ორგანიზაციების წარმომადგენლები ესწრებოდნენ. მათი მხრიდან იყო შენიშვნები იმასთან დაკავშირებით, რომ მუნიციპალიტეტებში შშმ ბავშვები ვერ დადიან სკოლაში და მათ არასრულფასოვანი გაკვეთილები უტარდებათ. ბევრ სკოლაში არ არის ადაპტირებული გარემო.

სულიკო თებიძის თქმით, ამ შემთხვევაში მშობლემის პრობლემასთან გვაქვს საქმე, „რადგან ხშირად მშობლები უშლიან ხელს თავიანტი შვილების განვითარებას, არ ატარებენ სკოლაში და ჰყავთ სახლში“-განაცხადა მან.

ორგაზაციების წარმომადგენელთა განცხადებით, ასეთ შემთხვევაში უნდა გამკაცრდეს მონიტორინგი და სკოლა უფრო აქტიურად უნდა ჩაერთოს.

ასევე იყო საუბარი იმაზე, რომ შეზღუდული შესაძლებლობის მქონე ბავშვებისთვის სახელმწიფო მხოლოდ პროფესიული განათლების ხელმისაწვდომობაზე საუბრობს და არ განიხილავს უმაღლესი განათლების ხელმისაწვდომობას.

სულიკო თებიძის თქმით, გასულ წლის ზაფხულში სამინისტროს ორმა უსინათლო ბავშვმა მიმართა და მათთვისაც გადამზადდა სპეცმასწავლებელი.

„ამჟამად მესამე საჯარო სკოლაში გვყავს ორი უსინათლო მოსწავლე, რომლებიც აგრძელებენ სწავლებას.  მე-4 საჯარო სკოლაში კი ოთხი სმენადაქვეითებული მოსწავლე სწავლობს, ფინანსდება ორი ლოგოპედი, რომელიც ამ კატეგორიის ბავშვებისთვის უფასო მომსახურებას ახორციელებენ“.

მინისტრის მოადგილეს თქმით, ზოგიერთ სპეცმასწავლებელს კვალიფიკაცია არ ჰყოფნის და აუცილებელია მათი გადამზადება.

ჩვენ მივაღწიეთ მოლაპარაკებას მასწავლებელთა სახლთან თბილისში. ხუთი სახის მოდული არსებობს და მათგან ორი უკვე წამოვიღეთ ბათუმის მასწავლებელთა სახლში, გუშინ იყო გამოცხადებული ტრენერის შესარჩევი კონკურსი, რომელსაც მასწავლებელთა სახლი გადაამზადებს.

ამავე შეხვედრაზე ითქვა რომ შშმ ბავშვებისთვის პროფესიული სკოლა ფუნქციონირებს  ქობულეთში სადაც ბავშვები ხის მხატვრულ დამუშავებას, მზარეულის პროფესიას და  კომპიუტერული სისტემების ოპერატორის სპეციალობას ეუფლებიან.

„ცენტრი ადაპტირებულია, მოწესრიგებულია პანდუსები და სველი წერტილები, ამჯამად   ლიფტის მშენებლობა მიმდინარეობს“.

ამ დროისთვის პროფესიულ ცენტრში   ათი მოსწავლე სწავლობს.

 

 

2016 წელს კომპანია “აჭარისწყალი ჯორჯია” 70-ზე მეტ სოციალურ პროექტს დააფინანსებს

დღეს, 22 თებერვალს, კომპანია აჭარისწყალი ჯორჯიას (AGL) აღმასრულებელმა დირექტორმა რონი სოლბერგიმ სიტყვით მიმართა, მედიის და ბიზნეს სექტორის წარმომადგენლებს Radisson Blu Iveria-ში, კომპანიების სოციალური პასუხისმგებლობის თემაზე გამართულ კონფერენციაზე. კომპანიის ხელმძღვანელმა  განხორციელებულ პროექტებზე და სოციალური პასუხისმგებლობის როლზე ისაუბრა ქვეყნის და საზოგადოების განვითარების პროცესში.

,,სოციალური პასუხისმგებლობა თანამედროვე ბიზნესის განუყოფელი ნაწილია. კომპანია მხოლოდ მაშინ შეიძლება ჩაითვალოს წარმატებულად, როცა თვისი წვლილი შეაქვს საზოგადოების განვითარების პროცესში. ყველა სოციალური პროექტის მიზანი, რომელსაც აჭარაში, შუახევიჰესის მშენებლობის პარალელურად ვახორციელებთ, რეგიონის გრძელვადიანი განვითარებაა“, – განაცხადა რონი სოლბერგმა.

აჭარის რეგიონის გრძელვადიანი განვითარება კომპანიის გაცხადებული პრიორიტეტია და ამ მიზნით 70-ზე მეტ სოციალურ პროექტს აფინანსებს. ადგილობრივი თემების განვითარება, მცირე ბიზნესის მხარდაჭერა და დაფინანსება, განათლების და ცნობიერების ამაღლება, სოფლის მეურნეობის დარგების მხარდაჭერა, ინფრასტრუქტურის განვითარება მცირე ჩამონათვალია იმ პროექტებისა, რასაც კომპანია შუახევიჰესის მშენებლობის არეალში აფინანსებს.

კომპანია AGL (აჭარისწყალი ჯორჯია) 416 მილიონი დოლარის ინვესტიციას ახორციელებს საქართველოში, უმსხვილეს საინვესტიციო ინფრასტრუქტურულ პროექტს – შუახევიჰესის კასკადს აშენებს აჭარაში. პროექტის ფარგლებში, ჰესის მშენებლობაზე და სოციალურ პროექტებში, ჯამურად 730 საქართველოს მოქალაქეა დასაქმებული.

პროექტი ერთ წელიწადში დასრულდება და საქართველოს 187 მეგავატი დადგმული სიმძლავრის მქონე სუფთა ენერგიის მწარმოებელი ჰიდროელექტროსადგური შეემატება.

ციხისძირის აქციის მონაწილე „ნაციონალები“ სასამართლომ არ დააჯარიმა

22 თებერვალს, ბათუმის საქალაქო სასამართლომ  ციხისძირში ხეების გადატანის წინააღმდეგ აქციაზე დაკავებულ „ნაციონალური მოძრაობის“ ორ წევრს: ოლეგ ბროლაძესა და ბონდო თედორაძეს  გაფრთხილება მისცა და ჯარიმა არ შეუფარდა.

ამავე აქციაზე პოლიციამ  „ნაციონალური მოძრაობის“ კიდევ რამდენიმე წევრი,  ქობულეთის საკრებულოს დეპუტატი ელგუჯა ბაგრატიონი, ბათუმის საკრებულოს წევრი ნოდარ დუმბაძე და რეზო ხარაზი დააკავა.  მათთან ერთად დააკავეს „პარტიზანული მებაღეობის“ სამი წევრიც.

აღნიშნულ პირებთან დაკავშირებით სასამართლო ხვალინდელ სხდომაზე იმსჯელებს.

255 ათასი ლარი დაზიანებული ქვაფენილისა და ბოძკინტების აღსადგენად ბათუმში

ტენდერში გამარჯვებული კომპანია „მონოლითი 2005“ ვალდებულია მიმდინარე წლის ბოლომდე ბათუმში დაზიანებული ქვაფენილები, ბოძკინტები და ტროტუარის ფილები განაახლოს და მოუაროს. ამისთვის ბათუმის ბიუჯეტიდან 255 ათასი ლარია გამოყოფილი. მთლიანობაში კომპანიას წლის განმავლობაში ათი ათასი კვადრატული მეტრის შეკეთების ვალდებულება აქვს აღებული. სატენდერო პირობების მიხედვით, გარდა ამოყრილი ქვაფენილების მოწესრიგებისა, კომპანიამ უნდა შეაკეთოს 300 ცალი ე.წ. ბოძკინტი, 200 კი სრულიად ახალი დაამონტაჟოს. ასევე დაგეგმილია 1000 მეტრამდე სიგრძის ბორდიურის შეკეთება.

ბათუმის მერიის კეთილმოწყობის სამსახურის ტექნიკური ზედამხედველობის განყოფილების წამყვანი სპეციალისტის გიორგი ბერიძის განმარტებით, დაგეგმილია თოვლისგან დაზიანებული ადგილების აღწერა და შესაბამისი ფოტომასალის შეგროვება:
„აღვწერთ ზოგადად ქუჩებს, თუ სად რა დაზიანებაა და თავისი ფოტომასალით ამ ინფორმაციას მივაწვდით „მონოლითს“, აღნიშნული სამუშაოები რომ შეასრულოს. კომპანია ვალდებულია აღდგენითი სამუშაოები ამ ინფორმაციის მიღებიდან ათ დღეში დაიწყოს“.

„ბათუმელების“ კითხვაზე, როგორ განისაზღვრა სატენდერო თანხა, თუკი ჯერ არ იყო აღწერილობითი სამუშაოები დასრულებული? – გიორგი ბერიძე პასუხობს:

„თანხა არის განსაზღვრული პირობითად. მსგავს სამუშაოებს აწარმოებდა ბათუმის პარკინგის სამსახური. დაახლოებითი მონაცემები ამ სამსახურის მუშაობიდან გამომდინარე ავიღეთ“.

გიორგი ბერიძის თქმით, ქვაფენილების მოსაწესრიგებელი სამუშაოების პირველი ეტაპი 22 იანვარს ათ ქუჩაზე დასრულდა. მეორე ეტაპის სამუშაოები კი მიმდინარე კვირისთვის უნდა დასრულდეს.

„ამ წუთებში ქვაფენილის აღდგენითი სამუშაოები მიმდინარეობს გორგასლის ქუჩაზე, სადაც ხრეშია მიმოფანტული. მეორე ჯგუფი კი მუშაობს `მაგნოლიის~ წინ, სადაც ამოყრილ ქვაფენილებს ალაგებენ. გარკვეული სამუშაოები ფილებთან დაკავშირებით დასრულდა რუსთაველზე, გრიბოედოვის ქუჩების კვეთაში კი სამუშაოები მიმდინარეობს“.

ზოგიერთ ქუჩაზე დაგებული ქვაფენილი უსწორმასწოროა და ფილებს შორისაც დიდი მანძილია დატოვებული. გიორგი ბერიძის თქმით, ამ ეტაპზე თოვლისგან დაზიანებულ მონაკვეთებს არემონტებენ. მოძრაობა რომ არ შეფერხდეს, ქუჩის სარეკონსტრუქციო სამუშაოებს მარტის თვიდან გეგმავენ:

„ის ქუჩები, სადაც ზედაპირი უსწორმასწოროა, თავიდან არის დასაგები. ამას სჭირდება მშრალი ნიადაგი, უნდა შეიცვალოს გრუნტი, დაიტკეპნოს და იგივე ფილები თავიდან ჩალაგდეს“.

გიორგი ბერიძის ინფორმაციით, ამ დროისთვის პირველი თოვლის შემდეგ 960 კვადრატული მეტრი დაზიანებული მონაკვეთია შეკეთებული. მისივე ინფორმაციით, „დიდთოვლობამ დააზიანა 60-ზე მეტი პატარა ბოძი, აქედან 20 ბოძი დასაწყობებულია, რადგან აღდგენას არ ექვემდებარება“.

ბათუმის საკათედრო ტაძრის ფრესკები აღდგენის მოლოდინში

ბათუმის ღვთისმშობლის შობის საკათედრო ტაძარში დაზიანებული ფრესკების აღდგენა ჯერჯერობით არ იგეგმება – ამის შესახებ „ბათუმელებს” საქართველოს კულტურული მემკვიდრეობის დაცვის სააგენტოში უთხრეს. მიუხედავად იმისა, რომ ბათუმის ერთ-ერთ ღირსშესანიშნაობად მიჩნეულ, მე-20 საუკუნის დასაწყისში აგებულ ტაძარში ფრესკები რამდენიმე წელია დაზიანებულია, მის შესაკეთებლად თანხა ამ დრომდე ვერ გამოიძებნა. შენობა კულტურული მემკვიდრეობის ძეგლია.

„ჩვენთან შემოდის ბევრ, მნიშვნელოვანი ძეგლის დაზიანებებზე ინფორმაცია, მათი იდენტიფიკაცია ხდება ეტაპობრივად. ამ ეტაპზე ბათუმში ეკლესიის ფრესკების საკითხი არ არის დაგეგმილი ბიუჯეტის სიმცირის გამო. წლის შუა პერიოდში ჩვენ ველოდებით დამატებით თანხების მობილიზებას და აუცილებლად იქნება ბათუმის ღვთისმშობლის ტაძარი პრიორიტეტებში ჩასმული. ბათუმში იყვნენ ჩამოსული ჩვენი თანამშრომლები სამხატვრო აკადემიის სპეციალურ დეპარტამენტთან ერთად, არსებობს დასკვნაც,“ – განაცხადა „ბათუმელებთან“ ნიკა ანთიძემ, საქართველოს კულტურული მემკვიდრეობის დაცვის სააგენტოს ხელმძღვანელმა.

ბათუმის ღვთისმშობლის შობის სახელობის ეკლესიაში ფრესკების დაზიანება რამდენიმე წელია გრძელდება. ამ დროის მანძილზე რეგიონში არა ერთი ეკლესია აიგო, ბოლო წლების მანძილზე კი ბათუმისა და ლაზეთის ეპარქიაში კულტურული მემკვიდრეობის ორი ძეგლი იქნა ხელყოფილი, მათ შორის სხალთაში, რომელიც ეროვნული მნიშვნელობის კულტურული მემკვიდრეობის ძეგლია. იქ უკანონოდ, კულტურული მემკვიდრეობის ეროვნული სააგენტოს თანხმობის გარეშე, აშენდა მცირე ეკლესია და გალავანი. ასევე ბათუმში, ადგილობრივი მნიშვნელობის კულტურული მემკვიდრეობის ძეგლმა, წმ. ბარბარეს ეკლესიამ რეკონსტრუქციის შედეგად სრულად იცვალა სახე – რეკონსტრუქციაზე თანხმობა კულტურული მემკვიდრეობის ეროვნულ სააგენტოს არც ამ შემთხვევაში გაუცია. მეტიც, საზოგადოება „ბათომის“ ერთ-ერთი დამფუძნებლის, შოთა გუჯაბიძის შეტყობინებაზე პოლიციაში, რომ ძეგლზე მუშაობა უკანონოდ მიმდინარეობდა, ორი წლის შემდეგაც ისევ მოკვლევა მიმდინარეობს.

ბათუმის ღვთისმშობლის შობის საკათედრო ეკლესია 1897-1902 წლებში ააგეს ბათუმში. ამ ეკლესიის აგება, პირველ რიგში, ქართველი მეცენატის, სტეფანე ზუბალაშვილის სახელს უკავშირდება. სწორედ მას მიმართეს დახმარებისთვის ბათუმელმა კათოლიკეებმა, რადგან კათოლიკე მრევლის შეგროვებული თანხა – ოჯახიდან სამი მანეთი, საკმარისი მხოლოდ საძირკვლის ჩასაყრელად და ჭაობის დასაშრობად აღმოჩნდა, რომელიც იმ ადგილას იყო, სადაც ახლა ტაძარი მდებარეობს.
სტეფანე ზუბალაშვილს ეკლესიის ასაგებად 15 ათასი მანეთი გამოუგზავნია ბათუმში, მშენებლობაზე იტალიელი არქიტექტორები და მხატვრები მუშაობდნენ.

სამი გუმბათითა და ჩუქურთმებით შემკული გოტიკური სტილის ეკლესია 1903 წელს ეპისკოპოსმა როპმა აკურთხა. საბჭოთა წლებში ეკლესია დაიხურა, მასში სხვადასხვა დროს არქივი და მაღალი ძაბვის ლაბორატორიაც იყო განთავსებული.
რესტავრაცია, რომლის დროსაც კედლების მოხატულობა პირვანდელი სახით აღდგა, ტაძარში 80-იანი წლების ბოლოს ჩატარდა.

იმ შემთხვევაში, თუ რესტავრაცია დროულად არ მოხდება, ფრესკები კიდევ უფრო დაზიანდება, მისი რესტავრაცია უფრო დიდ ხარჯებსაც მოითხოვს, ხოლო რესტავრაციის გარეშე ტაძარში კედლის მხატვრობა წაიშლება.

აჭარას ახალი პროკურორი ჰყავს

საქართველოს მთავრი პროკურატურა ავრცელებს განცხადებას, რომლის თანახმადაც რამდენიმე საოლქო და რაიონული პროკურორი გამოცვალა. ცვლილება შეეხო აჭარის პროკურატურასაც – აჭარის პროკურორობიდან გათავისუფლდა შოთა ტყეშელაშვილი, ხოლო მის ნაცვლად დაინიშნა 35 წლის ლევან პაქსაშვილი.

ლევან პაქსაშვილი 2014-2015 წლებში სამცხე-ჯავახეთის საოლქო პროკურორი იყო, ხოლო მანამდე თბილისის პროკურატურაში მუშაობდა სხვადასხვა თანამდებობაზე. მან თავის დროზე სამცხე-ჯავახეთის პროკურორის თანამდებობაზე გიორგი პაპუაშვილი შეცვალა. მაშინ სამცხე-ჯავახეთიდან გიორგი პაპუაშვილიც გადმოიყვანეს – სუს-ის უფროსად.

მთავარი პროკურატურის ინფორმაციით, გარდა აჭარისა ასევე შეიცვალა რამდენიმე ოლქის და რაიონული პროკურორი და მოადგილეები: „აჭარის ავტონომიური რესპუბლიკის პროკურორად ლევან პაქსაშვილი, დასავლეთ საქართველოს საოლქო პროკურორად ავთანდილ კოჭლამაზაშვილი,  ქვემო ქართლის საოლქო პროკურორად ლევან გეგეჭკორი,  შიდა ქართლისა და მცხეთა-მთიანეთის საოლქო პროკურორად შოთა ტყეშელაშვილი,  სამეგრელო-ზემო სვანეთის საოლქო პროკურორად ილია ჯალაღანია დაინიშნა“.

მთავარი პროკურატურის ცნობით, ცვლილებები მოხდა თბილისის პროკურატურას და  სხვა რაიონულ პროკურატურებშიც. „შიდა საკადრო გადაადგილებების შედეგად თბილისის პროკურორის მოადგილედ-საგამოძიებო ნაწილის უფროსად მერაბ ჯერანაშვილი, ექვსი პირი  სხვადასხვა რაიონულ პროკურორად, ხოლო ორი რაიონული პროკურორის მოადგილედ დაინიშნა.

საკადრო ცვლილებები ასევე საქართველოს მთავარ პროკურატურასაც შეეხო. გადაადგილებები განხორციელდა რამდენიმე დეპარტამენტში, კერძოდ კი შეიცვალნენ უფროსები და მოადგილები“, – აღნიშნულია მთავარი პროკურატურის განცხადებაში.

იგივე წყაროს ინფორმაციით, ამ ცვლილებების შედეგად საერთო ჯამში 30 პირი დაინიშნა. მთავარი პროკურატურის მიერ გავრცელებულ ინფორმაციაშია კონკრეტულად არაფერია ნათქვამი იმის შესახებ, თუ რითი იყო ეს ცვლილებები გამოწვეული.

სასწრაფოდ იყიდება ბინა [შავი კარკასი] ბათუმში, „აკვაპარკის“ მოპირდაპირედ

სასწრაფოდ იყიდება ბინა (შავი კარკასი) ბათუმში,  კობალაძის ქუჩაზე, „აკვაპარკის“ მოპირდაპირედ. ზღვის ხედით. აქვს ავტომანქანის გასაჩერებელი ადგილი. იატაკი დასხმულია.

samaklero.ge

2

იყიდება ბინა, ბათუმში, კობალაძის ქუჩაზე, ზღვის ხედით

იყიდება ბინა, ბათუმში, კობალაძის ქუჩაზე, მე-17 სართულზე, 31 კვ.მ ბინა, შავი კარკასი, ზღვის ხედით. ფასი: 16 000 აშშ დოლარი.
1

 

პოლიტიკური პარტია „ახალი“ ბათუმში

ვინ არიან პოლიტიკური პარტია „ახალის“ დამფუძნებლები, რა ღირებულებებს ეფუძნება პარტია და როგორ აპირებს საპარლამენტო არჩევნებში გამარჯვებას? ამ თემაზე „ბათუმელებს“  პარტიის ერთ-ერთი  დამფუძნებელი გიგა ლემონჯავა ესაუბრა. პარტიის წარმომადგენლებმა დღეს, 22 თებერვალს, ბათუმში „დემოკრატიული ჩართულობის ცენტრში“ ახალი პარტიის პრეზენტაცია გამართეს.

 

ბატონო გიგა, როდის დაფუძნდა და რა მიმართულების არის თქვენი პოლიტიკური პარტია?   

პარტიის, როგორც პოლიტიკური ორგანიზაციის პრეზენტაცია   თბილისში, „ექსპრო ჯორჯიაში“ 27 დეკემბერს  გაიმართა. მარტის ბოლოს კი ორგანიზაცია გაფორმდება რეესტრში როგორც პოლიტიკური პარტია. იდეა გვეკუთვნის ადამიანების ჯგუფს, რომლებსაც გვაქვს პროტესტი არსებული მოცემულობის მიმართ და გვინდა ეს მოცემულობა შევცვალოთ. დამოუკიდებლობის აღდგენის დღიდან  25 წელია ქვეყანა ტრიალებს ერთსა და იმავე ჩაკეტილ წრეზე, ეს არის დიდი მოლოდინის, დიდი იმედგაცრუების, პროტესტისა და შურისძიების წრე. ჩვენ ვფიქრობთ, რომ ეს წრე უნდა გაარღვიონ ახალმა ადამიანებმა, ახალმა სახეებმა, სწორედ ამიტომ დავაფუძნეთ პოლიტიკური ორგანიზაცია „ახალი“, რომელიც მიიღებს მონაწილეობას 2016 წლის საპარლამენტო არჩევნებში და რომლის მიზანიც იქნება პოლიტიკური პროცესების გამოცოცხლება და გაჯანსაღება საქართველოში. ვფიქრობთ, რომ ის პოლიტიკური მიდგომები, რაც ქვეყანაში არსებობს, პარტიებსა და მოსახლეობას შორის, ან სხვადასხვა პარტიას შორის, არ არის მისაღები, ვფიქრობთ, რომ ხალხის აზრს დღეს პოლიტიკოსები არ ითვალისწინებენ.

 

რა მიმართულების პოლიტიკური პარტია ხართ, რა არის თქვენი მთავარი ღირებულებები?

ჩვენ ვფიქრობთ, რომ სახელმწიფოს განვითარებისთვის არ არის მნიშვნელოვანი ავირჩიოთ მკაცრად მემარჯვენე ან მემარცხენე პოლიტიკური იდეოლოგია. ჩვენი ეკონომიკური მოდელი არის ჰიბრიდული, ჩვენ გამოვდივართ სახელმწიფო საჭიროებებიდან და არა ჩვენი სუბიექტური პოლიტიკური გემოვნებიდან. ამიტომ ეკონომიკურ მოდელსაც საზოგადოებას ვთავაზობთ ჰიბრიდულს. ვიცით რა პრობლემებია სახელმწიფოში და როგორ უნდა გადაიჭრას. ამიტომ ზოგან მემარჯვენე მიდგომები გვჭირდება, ზოგან მემარცხენე.

რაც შეეხება ღირებულებებს, ეს არის დასავლური ღირებულებების მატარებელი ორგანიზაცია,  რაც გამოიხატება პირველ რიგში ორგანიზაციული მოწყობით და ჩვენ ვქმნით პარტიული დემოკრატიის მაგალითს ქვეყანაში, შესაბამისად მომავალში ჩვენი საგარეო პოლიტიკური მიმართულება იქნება ევროპულ და ევროატლანტიკურ სტრუქტურებში ინტეგრაცია.

 

რეგიონალური ოფისები ყველგან გახსნილი გაქვთ, თუ რა ეტაპზეა ეს პროცესი?

ჩვენ ვართ ორგანიზაციული სტრუქტურების ფორმირების ეტაპზე მთელი ქვეყნის მასშტაბით. რა თქმა უნდა, აჭარა არის ერთ-ერთი ცენტრალური და მნიშვნელოვანი რეგიონი და აქაც ვაფუძნებთ ორგანიზაციულ სტრუქტურას.

 

„ახალი“-ს პრეზენტაცია

 

უკვე გყავთ კონკრეტული პოლიტიკური სახეები გამოკვეთილი, ვინც თქვენს პარტიას წარმოადგენს ბათუმში?

ესენი  იქნებიან ადამიანები, რომლებიც ჯერ პოლიტიკაში არ ყოფილან, თუმცა გააჩნიათ შესაბამისი უნარები და მგონია, რომ ეს არის სწორი მიდგომა.

 

როგორ ფიქრობთ, რითი გაუწევთ კონკურენციას აქამდე მოქმედ სხვა პოლიტიკურ პარტიებს?

ჩვენ მიგვაჩნია, რომ იდეა არის ძალიან კონკურენტუნარიანი, რადგან საქართველოს მოსახლეობის უდიდესი ნაწილი ელოდება სიახლეს და ის პოლიტიკური პროდუქტი, რომელსაც მოსახლეობას ვთავაზობთ, არის ძალიან დროული.

 

რას სთავაზობთ ახალს მოსახლეობას?

პირველი, რასაც მოსახლეობას ვთავაზობთ, არის სიახლე, რადგან საზოგადოებამ დაკარგა ნდობა პოლიტიკური პარტიებისა და პოლიტიკის მიმართ და პოლიტიკურ ელიტას ხალხი ზურგს არ უმაგრებს.

არჩევნებში ძალიან მნიშვნელოვანია ფინანსური რესურსი. თქვენ რა რესურსი გაქვთ ან როგორ აპირებთ მის მოძიებას?

ფინანსური რესურსი მართლაც ძალიან მნიშვნელოვანია, ჩვენ არ ვართ ურთიერთობაში არც ერთ პოლიტიკურ ძალასთან არც ქვეყნის შიგნით და არც ქვეყნის გარეთ, ჩვენ ვქმნით საზოგადოებრივი დაფინანსების მოდელს, რომელიც არის კარგად აპრობირებული აშშ-ი და დასავლეთ ევროპაში. ასევე ფეხს იკიდებს აღმოსავლეთ ევროპაში და ვფიქრობთ, რომ ნებისმიერი ინსტიტუტი, რომელსაც საზოგადოება უჭერს მხარს, თავად საზოგადოების მხრიდან უნდა ფინანსდებოდეს.

 

როგორ ფიქრობთ, ეს მოდელი საქართველოში გაამართლებს? მით უმეტეს მაშინ, როცა ჯერ არ იცით საზოგადოება დაგიჭერთ თუ არა მხარს?

 

 

საზოგადოება მხარს დაგვიჭერს იმ შემთხვევაში, თუ ჩვენი იდეები იქნება მისაღები და ამ შემთხვევაში საზოგადოებრივი დაფინანსების სისტემა იმუშავებს ეფექტურად.

 

პარტიაში გაწევრიანების დროს მსურველების პოლიტიკურ ბეგრაუნდს ყურადღებას აქცევთ, საიდან მოდიან, რომელ პარტიაში იყვნენ გაწევრიანებული თქვენამდე და ა.შ?  

 ჩვენი მიდგომა არის ასეთი, პარტიის კარი ღიაა ყველა ადამიანისთვის, ვინც იზიარებს იმ ღირებულებებს რა ღირებულებებზეც ორგანიზაცია დგას. ჩვენ არ გვაქვს პრობლემა არც ერთ პოლიტიკურ ორგანიზაციასთან თემატური თანამშრომლობის სახელმწიფოებრივ საკითხებზე, ვფიქრობთ, რომ პოლიტიკური ნიშნით ადამიანების სეგრეგაცია უნდა დასრულდეს.

 

ძირითადად რა განათლება გაქვთ პარტიის დამფუძნებლებს?

 პარტიაში არიან აშშ-სა და ევროკავშირის წამყვან უნივერსიტეტებში განათლებამიღებული ადამიანები. მე თვითონ ვარ ბერლინის ჰუმბოლდტის უნივერსიტეტის საერთაშორისო უსაფრთხოების მაგისტრი და მშიდობისა და უსაფრთხოების სწავლებების დოქტორანტი. ჩვენთან არიან ადამიანები, რომლებსაც აქვთ საკმაოდ მდიდარი სამეცნიერო-ანალიტიკური გამოცდილება და გვგონია, რომ გვაქვს ჩამოყალიბებული ხედვები ყველა იმ პრობლემაზე და ძირითად მიმართულებაზე, რაც დღეს სახელმწიფოში არსებობს.

 

 

ბათუმში, ხიმშიაშვილის ქუჩაზე ახალაშენებულ სახლში იყიდება 140 კვ.მ ბინა

ბათუმში, ხიმშიაშვილის ქუჩაზე [ყოფილი ნინოშვილი], ახალაშენებულ სახლში იყიდება 140 კვ.მ ბინა, თეთრი კარკასი. ფასი: 65 ათასი დოლარი. მობ.: 591 95 63 39.

სამინისტროს კვლევა ხელოვნებისა და კულტურის საჭიროებებზე

დღეს 22 თებერვალს, აჭარის განათლებისა და კულტურის სამინისტრომ კულტურის სფეროს პირველი მასშტაბური კვლევა წარმოადგინა. სამინისტროს ინფორმაციით, კვლევაში 2 508 რესპონდენტი მონაწილეობდა. კვლევის საგანი იყო აჭარის რეგიონში ხელოვნებისა და კულტურის რესურსებისა და საჭიროებათა ანალიზი.

კვლება  ბათუმის მუსიკალურ ცენტრში, კვლევის ხელმძღვანელმა ლევან ხეთაგურმა წარმოადგინა. კვლევის შედეგების მიხედვით გამოვლინდა, რომ ძირითად პრობლემას წარმოადგენს ინფორმაციის ნაკლებობა ღონისძიებების შესახებ, რაზეც სამინისტრო უკვე მუშაობს და მოხდება ერთიანი საკომუნიკაციო სტრატეგიის და ღონისძიებათა კალენდრის შექმნა.

პრეზენტაციას   აჭარის განათლების, კულტურისა და სპორტის მინისტრის მოადგილე ნათია სირაბიძე და ევროპის კულტურის პარლამენტის გენერალური მდივანი კარლ ერიკ ნორმანიც ესწრებოდნენ.

კვლევის და რეკომენდაციების დოკუმენტი აჭარის  განათლების, კულტურისა და სპორტის სამინისტროს მიზნობრივი პროგრამის „კულტურული ცხოვრების გააქტიურება და პოპულარიზაცია“ ქვეპროგრამის „კულტურული ცხოვრების ხელშეწყობა სოფლად“ ფარგლებში შეიქმნა.

 

აჭარის ჯანდაცვის სამინისტრო 200 შშმ პირს ეტლებს გადასცემს

შეზღუდული შესაძლებლობის მქონე პირთა და ხანდაზმულთა დამხმარე საშუალებებით უზრუნველყოფის პროგრამისფარგლებში აჭარის ჯანმრთელობისა და სოციალური დაცვის სამინისტრო 2016 წელს ეტლს 200 შშმ პირს და ხანდაზმულს  გადასცემს.

პროგრამის მიზანია შეზღუდული შესაძლებლობის მქონე და ხანდაზმულ პირთა ცხოვრების ხარისხის და სოციალური ინტეგრაციის გაუმჯობესება.

სამინისტროს ინფორმაციით, პროგრამა ითვალისწინებს ბენეფიციარებზე ეტლების გაცემას, მორგებას, გამოყენებასთან დაკავშირებული სარეკომენდაციო-საკონსულტაციო და ტექნიკური მომსახურების გაწევას, საგარანტიო მომსახურებას.

პრორგამა უკვე მესამე წელია სოციალური ვაუჩერის მეშვებით ხორციელდება, რაც ბენეფიციარს მისთვის სასურველი ეტლის არჩევის საშუალებას აძლევს. პროგრამის ბიუჯეტი 60 000 ლარს შეადგენს.

პროგრამის ფარგლებში სამინისტროს მიერ უკვე გცემულია 26 ვაუჩერი. ამავე პროგრამის ფარგლებში სამინისტრომ 2015 წელს სავარძელ-ეტლი 220 შეზღუდული შესაძლებლობის მქონე და ხანდაზმულ პირს გადასცა.

სალიბაურში ახალი ადაპტირებული სკოლა გაიხსნა

დღეს 22 თებერვალს, ხელვაჩაურის მუნიციპალიტეტის  სოფელ სალიბაურში პირველი საჯარო სკოლა გაიხსნა. სამინისტროს ინფორმაციით, პირველი საჯარო სკოლა განთავსებული იყო არატიპიურ  შენობაში, რომელიც  მე- 20 საუკუნის დასაწყისში იყო აშენებული. შენობა წლების განმავლობაში იყო ავარიულ მდგომარეობაში.

ახალი სკოლის მშენებლობა 2015 წელს დაიწყო. სამინისტროს ინფორმაციით, ახალი სკოლა თანამედროვე სტანდარტებს შეესაბამება.

„პროექტის მიხედვით აშენდა  სამ სართულიანი კორპუსი, დაკავშირებული ცალკე არსებულ სპორტულ დარბაზთან. კეთილმოეწყო  საკალსო ოთახები, სველი წერტილები და გათბობის სისტემა.შენობა ადაპტირებულია შშმ პირთათვის, კერძოდ, მოეწყო პანდუსი და შესაბამისი სველი წერტილები. ასევე, სკოლა აღიჭურვა  ახალი სასკოლო ინვენტარით, კეთილ მოეწყო ბიბლიოთეკა, კომპიუტერული ტექნიკის ოთახი და ფიზიკა-ქიმიის ლაბორატორია“-ნათქვამია სამინისტროს განცხადებაში.

შენობის მშენებლობისა და მოწყობის ღირებულება  930 000 ლარია.

სალიბაურის პირველ საჯარო სკოლაში 293 მოსწავლე სწავლობს.

ბათუმის ბაზარში ყველი მხოლოდ მაცივრებიდან გაიყიდება

ბათუმში, სავაჭრო ცენტრ „ბონში“, მეორე სართულზე, ყველის სექცია მოეწყობა. ის იზოლირებული იქნება და იქ მხოლოდ რძე და რძის პროდუქტები გაიყიდება. სექციას მოემსახურება ცალკე ლიფტი. ყველი და რძის სხვა პროდუქტები სექციაში მხოლოდ ამ გზით მოხვდება. სარემონტო სამუშაოები დაწყებულია.

სავაჭრო ცენტრის წარმომადგენლის განცხადებით, მოეწყობა თანამედროვე ლაბორატორია, შემოტანილია მაცივრები და თითო მოვაჭრისთვის თითო მაცივარია გათვალისწინებული. ადმინისტრაციაში აცხადებენ, რომ სექციის ევროსტანდარტების დონეზე მოწყობა მოვაჭრეებს გადასახადს არ გაუძვირებს.

მიმდინარე სამუშაოების გამო კი ამ წლის 15 მარტიდან ყველი დროებით ხილის სექციაში გაიყიდება.

seqcia

macivari -=-=-

რატომ დაიბეჭდა საქართველოს პირველი კონსტიტუცია ბათუმში

ზუსტად 95 წლის წინ, 21 თებერვალს „საქართველოს კონსტიტუცია“ დემოკრატიული რესპუბლიკის დამფუძნებელთა კრებამ მიიღო. „წითელი არმია“ უკვე თბილისის მისადგომებთან  იდგა. რამდენიმე დღეში ქვეყნის პირველი კონსტიტუცია ბათუმში დაიბეჭდა.

„კონსტიტუცია ძალაში რომ შესულიყო, ის უნდა გამოქვეყნებულიყო. დამფუძნებელთა საბჭოს წევრების დიდი ნაწილი დასავლეთ საქართველოში წავიდა. კონსტიტუციის გამოცემის ზუსტი თარიღი უცნობია, მაგრამ ის სადღაც 1921 წლის თებერვლის ბოლოს უნდა იყოს გამოცემული,“ – ამბობს პროფესორი მალხაზ მაცაბერიძე. ის მუშაობდა თემაზე  – „1921 წლის 21 თებერვლის კონსტიტუციის შემუშავება და მიღება“

იმ დროისთვის ბათუმში ათამდე სტამბა ყოფილა. კონსტიტუციის დასაბეჭდად მაშინდელ მთავრობას ნესტორ ხვინგიას სტამბა შეურჩევია, რომელიც დღევანდელი კოსტავას 13 ნომერში მდებარეობდა. „ცნობილია, რომ ხვინგია დაახლოვებული იყო „სოციალ-დემოკრატებთან“, კონკრეტულად კი ისიდორე რამიშვილთან, კარლო ჩხეიძესთან. რომელიმე პარტიის წევრი ოფიციალურად არ ყოფილა. ცნობილია, რომ კონსტიტუცია ხვინგიამ უფასოდ დაბეჭდა დაახლოებით 100 ცალი,“ – გვიყვება ისტორიკოსი, პროფესორი ოთარ გოგოლიშვილი. ისტორიკოსის მონაცემებით, ხელაძის სტამბა ბათუმში დაახლოებით 1890-იან წლებიდან მუშაობდა და იქ დაბეჭდილა პირველად ქართულ ენაზე ჰიუგოს „პარიზის ღვთისმშობლის ტაძარი“, ასევე რუსულად პუშკინის „რუსლანი და ლუდმილა“.

konstitucia

„საქართველოს კონსტიტუციის“ მიღებაზე მუშაობა დამფუძნებელთა კრებას 1920 წლის 24 ნოემბერს დაუწყია. „ძალიან გაწელილა თურმე დრო, რადგან ნებისმიერ გამომსვლელს  დიდი დრო ეთმობოდა და აშკარად ჩანდა სურვილი, რომ თითოეული მუხლი დაწვრილებით განეხილათ. კონსტიტუციის მიღება კრებას 12 მარტისთვის ჰქონდა დაგეგმილი, რის შემდეგაც სექტემბრის ბოლოს უნდა ჩატარებულიყო პარლამენტის არჩევნები. პირველ კონსტიტუციაში განსაზღვრული იყო პარლამენტის პირველი შეკრების თარიღიც – ნოემბრის პირველი კვირა დღე. ეს 1921 წლის 6 ნოემბერი გამოდიდოდა,“ – ამბობს „ბათუმელებთან“ პოლიტიკის მეცნიერებათა დოქტორი მალხაზ მაცაბერიძე.

მაგრამ „წითელი არმიის“ გამოჩენამ დამფუძნებელთა კრება აიძულა კონსტიტუცია დაჩქარებული წესით მიეღო. ამის შემდეგ კრება ქუთაისში ჩაუტარებიათ 17 თებერვალს, ხოლო უკანასკნელად კრების სხდომა 1921 წლის 12 მარტს ბათუმში გამართულა. „კრებას დეპუტატების ნაწილი ვეღარ დაესწრო, მაგრამ მაინც მოხერხდა გადაწყვეტილების მიღება და იმდროინდელ მთავრობას მიენიჭა უფლებამოსილება, რომ საქართველო წარმოედგინა და მისი ინტერესები დაეცვა. ბათუმში სხდომა დიდხანს გაგრძელებულა – ოპოზიცია მთავრობას აკრიტიკებდა იმის გამო, რომ მან ჯარის მობილიზება ვერ შეძლო,“  – გვიყვება მალხაზ მაცაბერიძე.

ამ მოცემულობაში დაბეჭდილა ბათუმში პირველი კონსტიტუცია, რომელიც შემდეგ ე.წ. „პერესტროიკის“ დროს, 1989 წელს, დაბეჭდა ქართულმა პრესამ, როცა გორბაჩოვი სიტყვის თავისუფლებაზე ალაპარაკდა.

შეღავათები მეწარმეს მაღალმთიან დასახლებაში

მაღალმთიან დასახლებაში მეწარმე პირები და საწარმოები, ე.წ. „მთის კანონით“ 10 წლის ვადით თავისუფლდებიან საშემოსავლო, ქონებისა და მოგების გადასახადისგან. აღნიშნული შეღავათით სარგებლობა შეუძლიათ მხოლოდ იმ მეწარმეებს, რომლებსაც მინიჭებული აქვთ მაღალმთიანი დასახლების საწარმოს სტატუსი. ასეთი სტატუსის მინიჭებისას კი, საქმიანობის სფეროების მიხედვით, კანონით გარკვეული შეზღუდვებია დაწესებული.

მაღალმთიანი დასახლების საწარმოს სტატუსი შესაძლოა მიენიჭოს როგორც ფიზიკურ პირს/ინდმეწარმეს, ასევე საწარმოს. თუმცა სტატუსს ვერ მიიღებს მეწარმე, ასევე დიდი თუ მცირე საწარმო, რომელიც ახორციელებს: ლიცენზირებისადმი, ასევე  ნებართვის გაცემისადმი დაქვემდებარებულ საქმიანობას; მომსახურების გაწევას [რომელიც არ არის წარმოების სფერო]; საქონლით ვაჭრობას [გარდა იმ შემთხვევისა, როდესაც ხორციელდება საქონლის გადამუშვება და მიწოდება].

ზემოთ აღნიშნული საქმიანობების გარდა სტატუსის მინიჭება ნებისმიერი საქმიანობის შემთხვევაშია შესაძლებელი.

საქართველოს მთავრობა უფლებამოსილია განსაზღვროს ეკონომიკური საქმიანობის ის სახეები [გამონაკლისის სახით], რომლებზედაც აგრეთვე გავრცელდება „მთის კანონით“ გათვალისწინებული საგადასახადო შეღავათი, თუმცა მთავრობას ეს ჯერჯერობით არ გაუკეთებია. ამასთან, სტატუსის მაძიებელი აუცილებლად რეგისტრირებული უნდა იყოს და საქმიანობას ეწეოდეს იმ მაღალმთიან დასახლებაში, სადაც ითხოვს სტატუსს – და ასევე უნდა გააგრძელოს საქმიანობა იქ, სადაც სტატუსი მიიღო. ქონების გადასახადისგანაც თავისუფლდება ის ქონება, რომელიც საწარმოს საკუთრებაშია და მდებარეობს იმავე მაღალმთიან დასახლებაში, სადაც მიენიჭა სტატუსი.

აჭარის მაღალმთიან დასახლებებში ისეთი საწარმოები, როგორიცაა, მაგალითად, ჰესები, აღნიშნული შეღავათით ვერ ისარგებლებენ, ვინაიდან ელექტროენერგიის  წარმოება ლიცენზირებას დაქვემდებარებული საქმიანობაა [ასევეა დისტრიბუცია და განაწილებაც].

საქართველოს კანონმდებლობით ლიცენზიას დაქვემდებარებულია ათობით  საქმიანობა სხვადასხვა სფეროში, მათ შორისაა: ჯანდაცვა, სათემო მაუწყებლობა, საგანმანათლებლო და სააღმზრდელო საქმიანობა, დაზღვევა, საბანკო, არასაბანკო-სადეპოზიტო-საკრედიტო საქმიანობა, ასევე სასარგებლო წიაღისეულის მოპოვება, ტყით სარგებლობა, ხე-ტყის დამზადება, თევზჭერა და სხვა.

ანალოგიურადაა საქმე ნებართვების შემთხვევაშიც. თუ საწარმოს საქმიანობა საჭიროებს ნებართვას, ან საწარმო საქმიანობს უკვე გაცემული ნებართვის საფუძველზე, ის სტატუსს ვერ მიიღებს.

ნებართვას კი ქვეყნის კანონმდებლობით ასევე არაერთი საქმიანობა საჭიროებს.   ნებართვა სჭირდება ტირის, სასროლეთისა და სასროლო-სანადირო სტენდის მოწყობას, მშენებლობას, ადგილობრივ საქალაქო რეგულარულ სამგზავრო გადაყვანას, სამორინეს, სათამაშო აპარატების სალონის, ტოტალიზატორის, ლოტოს, ბინგოს, ასევე წამახალისებელი გათამაშების მოწყობას, სპეციალურ კონტროლს დაქვემდებარებული სამკურნალო საშუალებების იმპორტს ან ექსპორტს,  ფარმაცევტულ წარმოებას, ავტორიზებულ აფთიაქს, გარე რეკლამის განთავსებას, სტაციონარული დაწესებულების გახსნას და სხვა.

რაც შეეხება ვაჭრობას, ეკონომისტი ვაჟა ვერულიძე განმარტავს, რომ, მართალია, „ვაჭრობის სფეროზე არ ვრცელდება შეღავათები, თუმცა აქ არის გამონაკლისი – თუ პირი სოფლის მეურნეობის პროდუქციას გადაამუშავებს და ისე მიაწვდის მომხმარებელს, ანუ პროდუქციას შეუცლის სახეს, კოდს, აქ შეღავათები გავრცელდება. მაგალითად, თუ მეწარმე რძისგან ამზადებს ყველს, ან ხილისგან ჯემს, ის მიიღებს სტატუსს. მაგრამ თუ ნებისმიერ საქონელს იყიდის და გაყიდის იმავე სახით, რა სახითაც იყიდა – ეს საქმიანობა სტატუსს ვერ მიიღებს, შესაბამისად, შეღავათებითაც ვერ ისარგებლებს“.

მეწარმე სუბიექტს მაღალმთიანი დასახლების საწარმოს სტატუსს საქართველოს ფინანსთა სამინისტროს  წარდგინებით ანიჭებს საქართველოს მთავრობა.

მაღალმთიანი დასახლების საწარმოს სტატუსის მისაღებად დაინტერესებულმა  პირმა განცხადებით [წერილობითი ან ელექტრონული ფორმით] უნდა მიმართოს შემოსავლების სამსახურს.

„მაღალმთიანი დასახლების საწარმოს სტატუსის მინიჭების, შეჩერებისა და შეწყვეტის  წესის“ მიხედვით, მეწარმე, რომელსაც მინიჭებული აქვს მაღალმთიანი დასახლების საწარმოს სტატუსი, „საქართველოს საგადასახადო კოდექსით განსაზღვრული ვადითა და წესით თავისუფლდება გადასახადებისაგან“.

ვაჟა ვერულიძის თქმით, „აქ არის ერთი საინტერესო მომენტი. საქმე იმაშია, რომ იბადება კითხვა – ზოგადად, ყველა გადასახადისგან თავისუფლდება თუ არა მაღალმთიანი დასახლების საწარმო? – პასუხი არის არა.

მაგალითად, არის დამატებული ღირებულების გადასახადი [დღგ], რომლის გადახდისგანაც სოფლის მეურნეობის პროდუქცია ისედაც გათავისუფლებულია, ოღონდ გათავისუფლებულია სასაქონლო კოდის შეცვლამდე. ანუ, თუ მაღალმთიან დასახლებაში პირმა მოიყვანა სოფლის მეურნეობის პროდუქცია და გაყიდა, ის დღგ-სგან თავისუფლდება, მაგრამ თუ სოფლის მეურნეობის პროდუქცია გადაამუშავა [კოდი შეუცვალა] და ისე გაყიდა, ის უკვე აღარ თავისუფლდება ამ გადასახადისგან. ანუ, ამ ნაწილში მაღალმთიან საწარმოს გადასახადის გადახდა მოუწევს. ეს შესაძლოა ნაკლი იყოს ერთგვარი, მაგრამ კანონში, ჯერჯერობით, ასეა“.

მაგალითისთვის, ვთქვათ, მეწარმეს კარტოფილი ან ხილი მოჰყავს და ყიდის, ამ შემთხვევაში სტატუსს არ მიანიჭებენ, თუმცა გათავისუფლებულია დღგ-ს გადახდისგან. მაგრამ, თუ ამ კარტოფილისგან აწარმოებს ჩიფსებს ან/და ხილისგან, ვთქვათ, ჩირს და გაყიდის, მაშინ მიანიჭებენ მაღალმთიანი დასახლების საწარმოს სტატუსს, ისარგებლებს შეღავათით [არ გადაიხდის ქონების, საშემოსავლო და მოგების გადასახადს], თუმცა, მოუწევს დღგ-ს გადახდა.

რაც შეეხება მოსახლეობას, ვინც მაღალმთიან დასახლებაში მუდმივად მცხოვრების სტატუსი მიიღო ან მიიღებს, „მაღალმთიანი რეგიონების განვითარების შესახებ“ კანონით [„მთის კანონით“], გარკვეული შეღავათებით უკვე სარგებლობს ან ისარგებლებს. ნაწილი შეღავათებისა, რასაც „მთის კანონი“ ითვალისწინებს, წელს იანვრიდან ამოქმედდა, დანარჩენი კი ეტაპობრივად – 2016 წლის პირველი სექტემბრიდან და 2017 წლის იანვრიდან ამოქმედდება.

შსს: პროსტიტუციისთვის ადგილის გადაცემის ფაქტები ბათუმსა და გონიოში

შინაგან საქმეთა სამინისტროს ინფორმაციით, „აჭარის ა/რ-ის პოლიციის დეპარტამენტის დეტექტივებისა და უბნის ინსპექტორების სამმართველოების, ბათუმის საქალაქო სამმართველოს და ხელვაჩაურის რაიონული სამმართველოს თანამშრომლებმა, ჩატარებული ოპერატიულ-საგამოძიებო ღონისძიებების შედეგად, პროსტიტუციისთვის ადგილის გადაცემის ფაქტებზე 4 პირი – 1969 წელს დაბადებული კადირ ა., 1971 წელს დაბადებული ჯემალ თ., 1972 წელს დაბადებული თარიქ ა. და 1974 წელს დაბადებული ქეთევან ბ. ამხილეს.

გამოძიებამ დაადგინა, რომ მხილებული პირები, გარკვეული თანხის სანაცვლოდ, ბათუმსა და გონიოში, თავიანთ მფლობელობაში არსებულ სასტუმროებსა და ნაქირავებ ბინაში ქალბატონებს პროსტიტუციისთვის ფართს უთმობდნენ“.

სამინისტროს ინფორმაციით, სამართალდამცველებმა სასტუმროების მომსახურე პერსონალი და ქალბატონები მოწმის სახით დაკითხეს. მხილებულები აღიარებენ ჩადენილ დანაშაულს.

გამოძიება პროსტიტუციისთვის ადგილის გადაცემის ფაქტებზე მიმდინარეობს (საქართველოს სსკ-ის 254-ე მუხლით).

იანვარში საქართველოდან 10 მილიონი დოლარის თხილი გავიდა

2016 წლის იანვარში საექსპორტო ათეულში პირველი ადგილი სპილენძის მადნებმა და კონცენტრატებმა დაიკავა, რამაც 25 მლნ. აშშ დოლარი და მთელი ექსპორტის 20 პროცენტი შეადგინა.

საქართველოდან მსუბუქი ავტომობილების ექსპორტი 12 მლნ. აშშ დოლარს და შესაბამისად, მთლიანი ექსპორტის 10 პროცენტს უდრიდა.

მესამე ადგილზე თხილისა და კაკლის სხვა  ჯგუფი იმყოფებოდა. ამ სასაქონლო ჯგუფის საქართველოდან ექსპორტმა 10 მლნ. აშშ დოლარი და მთელი ექსპორტის 8 პროცენტი შეადგინა.

eqsporti

რაც შეეხება იმპორტს, უმსხვილესი საიმპორტო სასაქონლო ჯგუფი 2016 წლის იანვარში ნავთობის აირები და აირისებრი ნახშირწყალბადები იყო, რომლის იმპორტმა 53 მლნ. აშშ დოლარი და მთელი იმპორტის 13 პროცენტი შეადგინა.

მეორე ადგილზე იყო ნავთობი და ნავთობპროდუქტების სასაქონლო ჯგუფი 32 მლნ. აშშ დოლარით, რაც იმპორტის 8 პროცენტია.

მესამე ადგილზე მსუბუქი ავტომობილების სასაქონლო ჯგუფი დაფიქსირდა 28 მლნ. აშშ დოლარით (იმპორტის 7 პროცენტი).

import

მიმდინარე წლის იანვრის თვის ექსპორტ-იმპორტის წინასწარი მონაცემები საქართველოს სტატისტიკის ეროვნულმა სამსახურმა გამოაქვეყნა.

თურქეთი, რუსეთი, აზერბაიჯანი – საქართველოს უმსხვილესი სავაჭრო პარტნიორები

სტატისტიკის ეროვნული სამსახურის ინფორმაციით, 2016 წლის იანვარში ათი უმსხვილესი სავაჭრო პარტნიორის წილმა საქართველოს მთლიან საგარეო სავაჭრო ბრუნვაში 66 პროცენტი შეადგინა.

უმსხვილესი სავაჭრო პარტნიორები არიან: თურქეთი [83 მლნ. აშშ დოლარი], რუსეთი [54 მლნ. აშშ დოლარი] და აზერბაიჯანი [53 მლნ. აშშ დოლარი].

qveynebi

qveyana 2

„აჭარის ტელევიზიის“ მრჩეველთა საბჭოს წევრების ანაზღაურება გაორმაგდება

პარლამენტმა მესამე მოსმენით დაამტკიცა ცვლილება კანონში „მაუწყებლობის შესახებ“,  რაც „აჭარის ტელევიზიის“ მრჩეველთა საბჭოს დაფინანსების გაზრდას ითვალისწინებს. აქამდე მრჩეველთა საბჭოს დაფინანსება „საზოგადოებრივი მაუწყებლის – აჭარის ტელევიზიის და რადიოს“ მთლიანი ბიუჯეტის 1.5 პროცენტს შეადგენდა. „აჭარის ტელევიზიის“ მრჩევლები ჰონორარის გაზრდას აპირებენ.

მრჩეველთა საბჭოს წევრის ხელფასი თვეში 900 ლარს შეადგენს, დირექტორის და მისი მოადგილის – 1000-1000 ლარს (ხელზე ასაღები თანხა). ცვლილება კანონში მრჩეველთა საბჭოს ამ თანხის გაორმაგების საშუალებას აძლევს.

„სამშაბათს გვექნება სხდომა და მივიღებთ გადაწყვეტილებას. მომხრე ვარ, გაიზარდოს ჩვენი ჰონორარი, რადგან ამ ტელევიზიაში ყველაზე დაბალი ხელფასი მძღოლების შემდეგ მრჩევლებს გვაქვს. გავაორმაგებთ თუ არა, ჯერ ზუსტად არ ვიცი“, – უთხრა „ბათუმელებს“ ბეჟან გობაძემ, „აჭარის ტელევიზიის“ მრჩეველთა საბჭოს წევრმა.

ჰონორარების გაზრდის მომხრეა მრჩეველთა საბჭოს კიდევ ერთი წევრი – გიორგი ირემაძე: „უნდა გაიზარდოს ჰონორარი. ჩვენ ვიმოქმედებთ კანონის შესაბამისად, თუმცა ამაზე კოლექტიური გადაწყვეტილება უნდა მივიღოთ.“

„საზოგადოებრივი მაუწყებლის აჭარის ტელევიზიის და რადიოს“ საკადრო ბაზის განვითარების სამსახურის უფროსი გია ქარცივაძე ამბობს, რომ მრჩევლებს შეუძლიათ არ გაზარდონ ჰონორარი და გაზრდილი ბიუჯეტი სხვა მიმართულებით დახარჯონ: „დღემდე მრჩეველთა საბჭოს დაფინანსება წლიურად დაახლოებით 100 000 ლარია, აქედან 66 150 უშუალოდ მრჩევლების ჰონორარებისთვის იხარჯება. დანარჩენი თანხა ძირითადად აპარატის შენახვას ხმარდება. ეს ცვლილება ითვალისწინებს მრჩეველთა საბჭოსთვის განკუთვნილი 1.5 პროცენტის 3 პროცენტამდე გაზრდას, ანუ გაორმაგებას. ამ სამი პროცენტიდან 2 პროცენტი შესაძლებელია  ხელფასებს მოხმარდეს, თუმცა მრჩევლების გადასაწყვეტია, რას მიანიჭებენ უპირატესობას – ხელფასის გაზრდას, თუ საბჭოს სხვა აქტივობებს“.

მრჩეველთა საბჭოს წევრები დაფინანსების მატებას, ჰონორარების გაზრდის გარდა, კვლევების ჩატარების აუცილებლობით ხსნიან: „არაერთხელ გვინდოდა კვლევების და გამოკითხვების ჩატარება, მაგრამ ამისთვის საკმარისი თანხა არ გვქონდა. გაზრდილი ბიუჯეტით ასევე ვაპირებთ ჟურნალისტებს ტრენინგები ჩაუტარდეს და  დაწესდეს პრემიებიც – კარგი ჟურნალისტური ნამუშევრებისთვის“, – ამბობს ბეჟან გობაძე.

მრჩეველთა საბჭოს თაავმჯდომარე – ზაზა ხალვაში ამჟამად მივლინებით საზღვარგარეთ იმყოფება. საკანონმდებლო ცვლილება კანონში „მაუწყებლობის შესახებ“ მას შემდეგ ამოქმედდება, როცა პრეზიდენტი პარლამენტის მიერ მიღებულ ცვლილებას ხელს მოაწერს. „აჭარის ტელევიზიის“ მრჩეველთა საბჭოსთვის დაფინანსების გაზრდის ინიციატივა პარლამენტის წევრს – ფრიდონ საყვარელიძეს (“რესპუბლიკური პარტია”) ეკუთვნის.

აჭარის ტელევიზიის მრჩეველთა საბჭოში ხუთი წევრია.

 

 

ბულვარში გაუქმებული ბილიკის აღდგენა დაიწყება

„ბულვარში გაუქმებული ბილიკის აღდგენა მალე დაიწყება. სამუშაოებს კომპანია „ლიტომი“ ახორციელებს. არსებულ პროექტში ცვლილებები შედის და რამდენიმე დღეში დაიწყება ალეას აღდგენითი სამუშაოები“ – უთხრა „ბათუმელებს“ გია ვარშანიძემ, „ბათუმის ბულვარის“ დირექტორის მოვალეობის შემსრულებელმა.

ბულვარში ბილიკის აღდგენის შესახებ რეკომენდაციით ბულვარის ადმინისტრაციას აჭარის მთავრობამ მიმართა. რეკომენდაციები ბულვართან დაკავშირებით შექნილმა საზოგადოებრივმა კომისიამ შეიმუშავა. ეს კომისია ბულვარში მთავრობის მიერ დაგეგმილი ცვლილებების საპროტესტო აქციების შემდეგ შეიქმნა.

როდის ეყოლება „ბათუმის ბულვარს“ახალი დირექტორი, ჯერ უცნობია. ყოფილი დირექტორის, არჩილ კახიძის მოთხოვნა თანამდებობიდან გათავისუფლების შესახებ აჭარის მთავრობამ უკვე დააკმაყოფილა. ეს ინფორმაცია „ბათუმელებს“ თავად არჩილ კახიძემ დაუდასტურა. „ბათუმის ბულვარის“ დირექტორის მოვალეობის შემსრულებელი გია ვარშანიძე აქამდე დირექტორის მოადგილედ მუშაობდა.

C ჰეპატიტის მკურნალობის თანადაფინანსება მეორე ეტაპზეც გაგრძელდება

აჭარის რეგიონში C ჰეპატიტის პროგრამას ბათუმის ინფექციური საავადმყოფო ახორციელებს. საავადმყოფოს დირექტორის, ჯემალ დუმბაძის ინფორმაციით, ამ დროისთვის მკურნალობის კურსში 550 ბენეფიციარი არის ჩართული და მათი უმრავლესობისთვის მკურნალობა წარმატებული აღმოჩნდა.

დიაგნოსტირების დადგენის, ასევე მკურნალობის თანადაფინანსებას ბათუმში მცხოვრები ადამიანებისთვის ბათუმის მუნიციპალიტეტის მერია ახდენს, ხოლო მუნიციპალიტეტების შემთხვევაში – აჭარის საზოგადოებრივი ჯანდაცვის ცენტრი. თანადაფინასება პროგრამის მეორე ეტაპსაც ითვალისწინებს. ჯანდაცვის მინისტრის, დავით სერგეენკოს თქმით, პროგრამა გაგრძელდება, ვიდრე ამის საჭიროება იქნება.  „ეროვნული პროგრამით ქვეყნის მასშტაბით 30 პროცენტით ფინანსდება, როგორც C ჰეპატიტის დიაგნოსტირება, ასევე მკურნალობა. დანარჩენ 60 პროცენტს მუნიციპალიტეტების შემთხვევაში, ჩვენ ვაფინანსებთ. დარჩენილ 10 პროცენტს თავად პაციენტი იხდის. პროგრამა სრულად ფარავს ყველა მომსახურების ხარჯს, თუკი ბენეფიციარი სოციალურად დაუცველია და მას 70 ათასზე ნაკლები სარეიტინგო ქულა აქვს“ – უთხრა „ბათუმელებს“ აჭარის საზოგადოებრივი ჯანდაცვის ცენტრის ბათუმის განყოფილების უფროსმა ნონა ეფაძემ.

C ჰეპატიტის დიაგნოსტირებისთვის ლაბორატორიული კვლევები დაახლოებით 480 ლარი ჯდება. დაავადების დადგენის შემთხვევაში, მკურნალობის ეტაპი რეგულარული მონიტორინგის გარდა, სხვადასხვა კვლევების ჩატარებას გულისხმობს. საზოგადოებრივი ჯანდაცვის ცენტრის ინფორმაციით, თითოეული კვლევის საფასური დაახლოებით 170 ლარია.

C ჰეპატიტის მკურნალობა ახალი თაობის მედიკამენტით „ჰარვონით“ გაგრძელდება. ბათუმის ინფექციური საავადმყოფოს დირექტორის, ჯემალ დუმბაძის ცნობით, პრეპარატი უკვე მიიღეს და რამდენიმე დღეში მის გამოყენებას დაიწყებენ. პროგრამის ფარგლებში მედიკამენტი პაციენტებისთვის უფასოა.

C ჰეპატიტის პროგრამის პირველ ეტაპს ამერიკის შეერთებული შტატების ელჩი იან კელი წარმატებულად აფასებს. საქართველოს ჯანდაცვის სამინისტროს ეროვნულ სასწავლო ცენტრში ელჩი ჯანმრთელობის და სოციალური დაცვის მინისტრს, დავით სერგეენკოს შეხვდა. სამინისტროს მონაცემებით, პროგრამაში სულ 6571 ადამიანია ჩართული, აქედან 3200 მკურნალობის კურსს წარმატებით ასრულებს.

მზადება ბათუმში პროფესორთა ატესტაციისთვის

„უმაღლესი განათლების შესახებ” საქართველოს კანონში ცვლილება შევიდა – 2016 წლის შემდეგ უმაღლეს საგანმანათლებლო დაწესებულებებში სრული პროფესორები და მთავარი მეცნიერ-თანამშრომლები აირჩევიან უვადოდ და ყოველ ხუთ წელიწადში ერთხელ დაექვემდებარებიან ატესტაციას. ემზადებიან თუ არა აჭარაში უმაღლესი სასწავლებლები პროფესორთა ატესტაციისთვის?

ამ ეტაპზე უმაღლესმა საგანმანათლებლო დაწესებულებებმა წესდებაში ცვლილებები უნდა გაატარონ და ის კრიტერიუმები თუ პირობები უნდა შეიმუშაონ, რომელთა მიხედვითაც სრული პროფესორები და მთავარი მეცნიერ-თანამშრომლები უვადოდ აირჩევიან, შემდეგ კი განსაზღვრონ მათი ატესტაციის წესი და ფორმა. კანონის თანახმად უმაღლესმა სასწავლებლებმა მთავარი მეცნიერ-თანამშრომლების არჩევისა და ატესტაციის საკითხის დასრულება წლის ბოლომდე უნდა შეძლონ, თუმცა ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებლის მერაბ ხალვაშის ინფორმაციით, პირველ თებერვალს, საქართელოს განათლებისა და მეცნიერების სამინისტროს ინიცირებით გამართულ კონფერენციაზე, განიხილეს კანონში შესული ცვლილებების იმპლემენტაციის ვადების საკითხი და ამ პროცესების დასრულება 2017 წლის პირველ ნახევარში უნდა მოხდეს:

„სამეცნიერო კვლევით ინსტიტუტებში ატესტაციის წესები უნივერსიტეტებმა უნდა დაამტკიცონ 2016 წლის ბოლოსთვის, ხოლო 2017 წლის პირველ ნახევარში უნდა ჩატარდეს ატესტაცია“, – ამბობს მერაბ ხალვაში.

რამდენად არიან მზად უმაღლესი სასწავლებლები ამ ცვლილებებისთვის და რა ეტაპზე არიან ისინი მუშაობის პროცესში? – ამ კითხვით „ბათუმელებმა“ ბათუმის სამ უმაღლეს საგანმანათლებლო დაწესებულებას მიმართა, სადაც ყველაზე მეტი სტუდენტი სწავლობს.

ბათუმის საზღვაო აკადემიის რექტორი, ირაკლი შარაბიძე აღნიშნავს, რომ რადგან საზღვაო აკადემია სპეციფიკურად მუშაობს – აკადემიის მარეგულირებელი ორგანო საზღვაო ტრანსპორტის სააგენტოა, მათ ერთობლივად მოუწევთ ცვლილებებზე მუშაობა.

„ჩვენ ვმუშაობთ საზღვაო ტრანსპორტის სააგენტოსთან ერთად. დაახლოებით ერთ თვეში მზად ვიქნებით ცვლილებების შესატანად. ზოგადად კი, ჩვენი პროფესია განსხვავდება სხვა უმაღლესი სასწავლებლებისგან: ჩვენთან პროფესორის არჩევისას სავალდებულო არ არის პირი მაინცადამაინც დოქტორი იყოს. შეიძლება კაპიტანი, „სტარპომი“, უფროსი მექანიკოსი ან მეორე მექანიკოსი იყო და მაინც შეძლო არჩევნებში მონაწილეობა, ანუ ის პროფესიული ნიშნით იქნება არჩეული“, – ამბობს ირაკლი შარაბიძე.

საზღვაო აკადემიაში დღეისათვის 15 სრული პროფესორი მუშაობს.

ბათუმის ხელოვნების სასწავლო უნივერსიტეტში პროფესორის უვადოდ არჩევის საკითხზე მუშაობა არ დაუწყიათ. ამბობენ, რომ უნივერსიტეტი ჯერ მზად არ არის ამ პროცესისთვის. თუმცა, საწესდებო ცვლილებების დამუშავება უკვე დაწყებული აქვთ:

„ატესტაციის ფორმა და წესი, ჯერჯერობით, არ შეგვიმუშავებია. ახლა ვამზადებთ წესდებაში ცვლილებებს. რაც შეეხება პროფესორის თანამდებობაზე არჩევასა და მუდმივ სტატუსზე გადაყვანს – ამ საკითხზე მოსამზადებელი გვაქვს ცალკე წესი, მაგრამ ჯერ არაფერი გაგვიკეთებია, რადგან ეს სერიოზულ მუშაობას მოითხოვს. ჯერჯერობით მზად არ ვართ ამისთვის“, – ამბობს ბათუმის ხელოვნების სასწავლო უნივერსიტეტის რექტორი ერმილე მესხია.

ბათუმის რუსთაველის სახელმწიფო უნივერსიტეტის რექტორის მოვალეობის შემსრულებლის მერაბ ხალვაშის თქმით, დაგეგმილი ცვლილებები ითვალისწინებს მუდმივი პროფესორის აკადემიურ თანამდებობას. ამ თანამდებობაზე პროფესორებს ჯერ აირჩევენ და მათი ატესტაციის საკითხი მხოლოდ ამის შემდეგ დადგება დღის წესრიგში. ამ ეტაპზე სამეცნიერო-კვლევითმა დაწესებულებებმა უნდა აირჩიონ მეცნიერები და მათი ატესტაცია დაამტკიცონ.

საწესდებო ცვლილებებზე სამუშაოდ ბსუ-ში კომისია უკვე შექმნილია.

„ჩვენ ცვლილებები გავაცანით აკადემიურ საბჭოს, კვლევითი ინსტიტუტის წარმომადგენლებს, დირექტორებს, სამეცნიერო საბჭოს თავმჯდომარეებს. უკვე შექმნილია კომისია, რომელშიც ჩართულია უნივერსიტეტის ადმინისტრაცია, რექტორის მოადგილე სამეცნიერო დარგში, უნივერსიტეტის კანცლერი, ასევე იურიდიული სამსახურის ხელმძღვანელი. აუცილებელია, კანონში გატარებული ცვლილებების შესაბამისად შევიდეს ცვლილებები წესდებაში. აი, ამის შემდეგ დავიწყებთ ყველა იმ ცვლილების იმპლემენტაციას, რაც კანონში შევიდა“, – ამბობს მერაბ ხალვაში და აღნიშნავს, რომ უნივერსიტეტს შემდეგ ავტორიზაციამდე არჩეული უნდა ჰყავდეს მუდმივი პროფესორის რანგის პროფესორები.

შემდეგი ავტორიზაცია ბსუ-ს 2017-2018 სასწავლო წელს ექნება გასავლელი. აქ მუდმივი პროფესორები სწორედ ამ დრომდე უნდა აირჩიონ. ბსუ-ში ამ ეტაპზე 64 პროფესორი და 6 მთავარი მეცნიერ-თანამშრომელი მუშაობს. მათ შეუძლიათ მონაწილეობა მიიღონ უვადო პროფესორად არჩევაში.
ბსუ-ს ფიტოპათოლოგიისა და ბიომრავალფეროვნების ინსტიტუტის მთავარი მეცნიერ-თანამშრომელი, ზოია სიხარულიძე აღნიშნავს, რომ ცვლილებები მისასალმებელია, თუმცა გააჩნია, როგორ განისაზღვრება ატესტაციის წესები.

„ამაზე უნდა იმსჯელოს უნივერსიტეტმა და უნდა შეირჩეს ისეთი კომისია, წევრებმა შესაფასებელზე ცოტა მეტი მაინც რომ იცოდნენ. შედეგი იმის მიხედვით დადგება, თუ რამდენად იქნება ობიექტურობა დაცული“, – ამბობს ზოია სიხარულიძე.

ბსუ-ს აკადემიური საბჭოს წევრი მალხაზ ნაკაშიძეც ობიექტური კრიტერიუმების აუცილებლობაზე საუბრობს. მისი აზრით, უნივერსიტეტები ჯერ მზად არ არიან მსგავსი ცვლილებებისთვის.

„თუ პროცესი იქნება ობიექტური, ბევრი პირი ვერ დაიკავებს ამ თანამდებობას. ეს უნივერსიტეტის გამოწვევაა: უნივერსიტეტს შეუძლია სტანდარტები მოარგოს თავის პროფესორებს და, შესაბამისად, ამ პროცესს ყველა წარმატებით გაივლის, მაგრამ თუ საერთაშორისო სტანდარტებს აიღებს, მაშინ ბევრის თანამდებობა შეიძლება საფრთხის ქვეშ დადგეს, ამიტომ ეს უნივერსიტეტმა უნდა გადაწყვიტოს. თუ ისევ მიკერძოებული ვიქნებით, როგორც წარსულში ვიყავით კონკურსებსა თუ ზოგიერთი პროფესორის არჩევისას, ეს იქნება არაობიექტური პროცესი… მზად ალბათ არ ვართ, არ ვიცი, როგორ მოიქცევა უნივერსიტეტი“, – აღნიშნავს მალხაზ ნაკაშიძე.

რატომ გახდა ეს ცვლილებები აუცილებელი? – საქართველოს განათლებისა და მეცნიერების სამინისტროს პრესსამსახურის მიერ მოწოდებული ინფორმაციით, ცვლილებები გამოწვეულია იმით, რომ უმაღლეს საგანმანათლებლო დაწესებულებებში სამეცნიერო-კვლევითი დაწესებულებების შეერთების შემდეგ კანონში წარმოქმნილი უზუსტობების გამო ზოგიერთი მეცნიერი თავს დაუცველად გრძნობდა. ასევე დაბალი იყო სამეცნიერო პერსონალის მონაწილეობა საგანმანათლებლო პროცესებში, რის გამოც არ ხდებოდა ქვეყნის სამეცნიერო პოტენციალის ეფექტური გამოყენება მომავალი სამეცნიერო კადრების მომზადების პროცესში.

ცხრა თვე შემწეობისა და უფასო სადილის გარეშე

ოჯახი, რომლის სახელზეც არანაირი კერძო საკუთრება არ რეგისტრირდება, სოციალური დახმარების გარეშე დარჩა – ფარტენაძეების ხუთსულიან ოჯახს სოციალური შემწეობა ცხრა თვის წინ შეუწყვიტეს. ჯემალ ფარტენაძე შეზღუდული შესაძლებლობის მქონე პირია, აქვს გულის პრობლემებიც, რის გამოც მუშაობა არ შეუძლია. ჰყავს მეუღლე და სამი შვილი, მათგან ორი არასრულწლოვანია. მუშაობა არც ჯემალის მეუღლეს შეუძლია, რადგან რამდენიმე ოპერაცია აქვს გადატანილი.

ჯემალ ფარტენაძის ოჯახი სახელმწიფო შემწეობას 2005 წლიდან იღებდა. სოციალური დახმარება, რომელიც ჯემალის მეუღლის, ხათუნა ღომიძის სახელზე იყო რეგისტრირებული, 2015 წლის ივნისში შეუწყვიტეს. ხუთსულიანი ოჯახი ამ დროისთვის ჯემალ ფარტენაძის 100-ლარიანი პენსიით ცხოვრობს

„ჩვენს სახელზე არანაირი ქონება არ არის რეგისტრირებული. ჩემი ძმა და მე ვცხოვრობთ ამ სახლში. სახლი ჩემი ძმის, რამაზ ფარტენაძის სახელზეა რეგისტრირებული. ჩვენ რამდენიმე ოთახში ვართ. არ მაქვს შესაძლებლობა, რომ სახლის ნაწილი ჩემს სახელზე ოფიციალურად დავირეგისტრირო. შარშან ჩემმა ძმამ მისი საკუთარი მიწის ნაკვეთი გაყიდა და ეს თანხა სოციალურმა მუშაკმა როგორც ჩვენი შემოსავალი, ისე დააფიქსირა~.
ჯემალ ფარტენაძის ძმა, რამაზ ფარტენაძე `ბათუმელებთან~ ადასტურებს, რომ მიწის ნაკვეთი ნამდვილად მისი საკუთრება იყო და არა მისი ძმის.
`ამ ვითარებაში მყოფ ოჯახს დახმარებას ვინმე შეუწყვეტდა? ნახეთ რა მდგომარეობაშია სახლი, ხან ვის გამოვართვი სამშენებლო მასალა, ხან ვის, ცოტა მე ვიყიდე და კიბე ამოვაყვანინე, მაგრამ ცუდად გააკეთეს და ესეც ჩამოიშალა,“ – ამბობს რამაზ ფარტენაძე.

ხათუნა ღომიძე ამბობს, რომ გასულ წელს მძიმე სოციალური პირობების გამო სახლის ერთი ოთახი 70 ლარად გააქირავა, სოციალურმა მუშაკმა ეს ფაქტიც დააფიქსირა.

„სახელმწიფო დახმარება ცოტაა, სამ შვილთან არ მყოფნიდა, რა მექნა? ერთი ძროხა მყავს, რომელიც დღეში ორ ლიტრს იწველის და ისე დააფიქსირა ოქმში, თითქოს 15 ლიტრს იწველიდეს. ამის გამო მომემატა ქულები. ჩემი მეუღლისთვის რძის ნაწარმი აუცილებელია, ეს რძე მას ძლივს ჰყოფნის, ბავშვებსაც ხომ სჭირდებათ ნორმალური კვება?“

ჯემალ ფარტენაძის ოჯახი სოციალური დახმარების შეწყვეტის შემდეგ ვერც მუნიციპალური სასადილოთი სარგებლობს.

„მეცხრე თვეა რაც შემწეობა შეგვიწყდა. რამდენჯერმე ვთხოვე ბათუმის მერიას, სასადილოთი სარგებლობის უფლება მაინც მოეცათ, მაგრამ სიაში არ ჩაგვსვეს. რამდენიმე დღის წინ კიდევ ვიყავი მისული მერიაში და მითხრეს დამატებით სიაში ჩაგსვამთო. მე ძირითადად სიაში მინდა ვიყო, რადგან დამატებით სიაში მონარჩენი საჭმლის წამოღება მოგვიწევს და არც სხვა დახმარება არ გავრცელდება ჩვენზე.

ჯემალ ფარტენაძე
ჯემალ ფარტენაძე

წელს შეშა სოციალური შემწეობის ფარგლებში სტატუსის შეჩერებამდე ცოტა ხნით ადრე მომცა მერიამ, რომ არ მომესწრო, არ ვიცი რა გვეშველებოდა. ჩემი ოჯახისთვის ეს დახმარება ძალიან მნიშვნელოვანია, ამიტომ მინდა, რომ სოციალურმა მუშაკმა გულისხმიერად იმუშაოს, სწორად დააფიქსიროს ოჯახის მონაცემები, შემდეგ ასეთ მდგომარეობაში რომ არ აღმოვჩნდეთ ოჯახები, რომლებიც მთლიანად სოციალურ შემწეობაზე ვართ დამოკიდებული,“ – ამბობს ჯემალ ფარტენაძე.

სოციალური მდგომარეობის ბოლო გადამოწმების მიხედვით, ფარტენაძეების ოჯახის სოციალური ქულა 69 120-მდე გაიზარდა. ოჯახი ამ მონაცემებს არ ეთანხმება და სოციალურ მუშაკს ოჯახის მდგომარეობის ხელმეორედ შეფასებს სთხოვს.

მოქმედი კანონის მიხედვით, ოჯახის სოციალური მდგომარეობა ორ-სამ თვეში ერთხელ მოწმდება. ამ ვადების შეცვლა, როგორც სოციალური მომსახურების სააგენტოში ამბობენ, არ შეიძლება. იმ შემთხვევაში, თუკი კონკრეტული ოჯახს სოციალური მდგომარეობა გართულდება, ოჯახმა განცხადებით უნდა მიმართოს სააგენტოს და კომისია განცხადებას დაჩქარებული წესით განიხილავს.

ხათუნა ღომიძე ამბობს, რომ სააგენტოში ვადებთან დაკავშირებით მას სხვა რამე უთხრეს: „ახალი წლის წინა დღეებში აჭარის სოციალური მომსახურების სააგენტოში ვიყავი და იქ მითხრეს, რომ 2016 წლის პირველ ოქტომბრამდე არ მოხდებოდა ჩვენი ოჯახის გადამოწმება“.

ბათუმის მერიის სოციალური სერვისების სააგენტოს ხელმძღვანელის, ბადრი გოგიძის განმარტებით, მუნიციპალური სასადილოთი მხოლოდ ის სოციალურად დაუცველი ოჯახები სარგებლობენ, რომელთა სარეიტინგო ქულა 57 ათასამდეა.

„უფრო მაღალი ქულების შემთხვევაში მოქალაქე, რომელიც საჭიროებს უფასო სასადილოთი სარგებლობას, მხოლოდ დამატებით სიაში შეგვიძლია ჩავსვათ. ამისთვის მოქალაქემ მერის სახელზე უნდა დაწეროს განცხადება და კომისია განიხილავს“.

ბადრი გოგიძის ინფორმაციით, ამ დროისთვის მუნიციპალური სასადილოთი 3 500-ზე მეტი ადამიანი სარგებლობს.

„ამდენი ბენეფიციარიდან, ბუნებრივია, ყოველდღე ყველა არ მოდის. ჩვენ ვალდებული ვართ მათთვის განკუთვნილი საჭმელი გავანადგუროთ, ამიტომ დამატებით სიაში ვინც არის, მათზე ვანაწილებთ“ – ამბობს ის.

ქალაქის თითოეული სასადილოს დამატებით სიაში ამ დროისთვის 50-50 მოქალაქეა რეგისტრირებული.

რა უნდა ვიცოდეთ გენერიკულ წამლებზე

რით განსხვავდება გენერიკული პრეპარატები ორიგინალებისგან, რა განაპირობებს მათ დაბალ ფასს და რამდენად ეფექტურია მისი გამოყენება? – ამ საკითხებზე „ბათუმელები“ საქართველოს ფარმაცევტთა ასოციაციის პრეზიდენტს, თბილისის სახელმწიფო სამედიციინო უნივერსიტეტის პროფესორს, ალიოშა ბაკურიძეს ესაუბრა.

ბატონო ალიოშა, რა არის გენერიკული მედიკამენტები და რით განსხვავდება გენერიკები ორიგინალი მედიკამენტებისგან?

გენერიკული პრეპარატები ფაქტობრივად არის ასლი ორიგინალური პრეპარატებისა, რომლებსაც არა აქვთ საპატენტო დაცვა და სწორედ ამ მიზეზით ისინი ხელმისაწვდომია ნებისმიერი მწარმოებლისათვის. სხვაგვარად რომ ვთქვათ, ეს არის საერთაშორისო, არაპატენტირებული, კვლავწარმოებული ფარმაცევტული პროდუქტი.

გარკვეულ შემთხვევაში სწორედ დაბალი ფასი იწვევს მოსახლეობის ეჭვს ხარისხთან დაკავშირებით – რატომ ღირს უფრო იაფი, თუ ეს წამლები კარგი ხარისხისაა?

ორიგანალი სამკურნალო საშუალებების შემუშავებას სჭირდება საშუალოდ 10-12 წელი. ორიგინალი პრეპარატის ღირებულება, მოლეკულიდან – წამლის ფორმამდე და სერიულ წარმოებამდე, შეადგენს დიდ თანხას, დაახლოებით 500-700 ამერიკულ დოლარს. ბუნებრივია, ეს დანახარჯები ამოღებული უნდა იქნას რეალიზებული პროდუქციის ხარჯზე. ამას ფარმაცევტული კომპანიები უზრუნველყოფენ იმით, რომ წარმოებული პრეპარატი ეკუთვნის შემმუშავებელს, მას აქვს ექსკლუზიური უფლება, რომ მხოლოდ მან აწარმოოს პრეპარატი. იმავე პრეპარატს ვერ აწარმოებს სხვა, იმიტომ, რომ მას იცავს პატენტი. მას შემდეგ რაც გადის პატენტის მოქმედების ვადა, 20 წელი, პრეპარატი ხდება ე.წ. „საყოველთაო მოხმარების პროდუქტი“ და სხვა მწარმოებლებიც იწყებენ მის წარმოებას. ამ დროს სამკურნალო საშუალებაზე გაწეული დანახარჯები სავარაუდოდ უკვე ამოღებულია.

სწორედ ეს გარემოება განსაზღვრავს გენერიკული პრეპარატების დაბალ ფასს. აქვე უნდა აღინიშნოს ისიც, რომ 20 წლის შემდეგ პირდაპირ რომ დავიწყოთ ორიგინალი პრეპარატის ასლის, ანუ გენერიკულის გამოშვება – ეს ასე მარტივად არ ხდება. ნებისმიერმა მწარმოებელმა უნდა დაამტკიცოს გენერიკული პრეპარატის ორიგინალთან ექვივალენტობა. თუ ის ორიგინალის ექვივალენტური არ არის, მის წარმოებაზე ნებართვა, ბუნებრივია, არ გაიცემა. ჩვენს ქვეყანაში მიღებულია მოთხოვნა ბიოექვივალენტობაზე, რაც ნიშნავს იმას, რომ გენერიკული პრეპარატი იმავე დოზით, იმავე ფორმაში უნდა იძლეოდეს იმავე თერაპევტულ ეფექტურობას, რასაც იძლევა ორიგინალი პრეპარატი.

ამერიკელებს აქვთ მაგალითად კოდირებული გენერიკული პრეპარატები. ისინი გენერიკულ პრეპარატებს ორ ჯგუფად ჰყოფენ: არის A და B კოდის პრეპარატები. A კოდის გენერიკული პრეპარატი გახლავთ ისინი, რომლებმაც გაიარეს კლინიკური გამოცდა თერაპევტულ ექვივალენტობაზე და ბიოექვივალენტობაში სხვაობა არის არაუმეტეს 3-4 პროცენტისა. B კოდის პრეპარატებს კი არ გაუვლიათ გამოცდა თერაპევტულ ექვივალენტობაზე, მათ გაიარეს მხოლოდ ბიოექვივალენტობაში ტესტირება და ასეთი პრეპარატები არ მიიჩნევიან ორიგინალი პრეპარატების ალტერნატივად.

ანუ არჩევანი გენერიკებზე არ ნიშნავს იმას, რომ პაციენტი იყიდის მისი ჯანმრთელობის მდგომარეობის გასაუმჯობესებლად ნაკლებ ეფექტურ წამალს?

ადამიანი როდესაც იღებს გენერიკს, ეს არ ნიშნავს, რომ ის იღებს ნაკლებ ეფექტურ პრეპარატს. ეს იქნება ორიგინალის იდენტური მოქმედების სამკურნალო საშუალება, თუ რეგისტრაციის პროცესში დაცულია ყველა პროცედურა და ასევე დაცულია შენახვის, ტრანსპორტირების და სხვა მოთხოვნები. ზოგადად, წამლის ეფექტურობა დამოკიდებული არ არის მხოლოდ მასში შემავალ აქტიურ ფარმაცევტულ ინგრედიენტზე, არამედ დამხმარე ნივთიერებებზეც. მოქმედების ეფექტურობა ასევე დამოკიდებულია მათ თანაფარდობებზე, მომზადების ტექნოლოგიებზე, შენახვის, ტრანსპორტირების პირობების დაცვაზე და ასე შემდეგ. მაგალითად, რომ ავიღოთ პარაცეტამოლი, იგი შეიძლება მზადდებოდეს 30 ტექნოლოგიით და ყველა მათგანი აკმაყოფილებდეს სტანდარტის მოთხოვნებს. მაგრამ იმისდა მიხედვით, თუ რომელი გამხსნელიდან მოხდა მისი გამოკრისტალება, ის უკვე შეიძლება იყოს სხვადასხვა სიწმინდის. ამიტომაც არა იმდენად ეფექტი, რამდენადაც გვერდითი მოქმედება იქნება განსხვავებული. და მაინც, რომ დავაზუსტოთ, მაინც უნდა აღვნიშნოთ: ჩვენ არ შეგვიძლია ვთქვათ, რომ გენერიკი იგივეა ასი პროცენტით, რაც ორიგინალი. ამერიკელები მიიჩნევენ, რომ 3-4 პროცენტი განსხვავება დასაშვებია. გენერიკი 95-97 პროცენტით არის ორიგინალთან მიახლოებული სამკურნალო საშუალება.

როგორ უნდა გააკეთოს პაციენტმა არჩევანი გენერიკულ პრეპარატზე? ვინ წყვეტს ამას, ექიმი თუ თავად პაციენტი?

არჩევანის საკითხი დამოკიდებულია ეკონომიკურ ხელმისაწვდომობაზე. გენერიკი უფრო იაფია. თუ გენერიკი უკვე სააფთიაქო ქსელშია, ანუ მისი შესაბამისობა ორიგინალთან დადასტურებულია, მაშინ ჩვენ მისგან არანაირ საფრთხეს არ უნდა ველოდოთ. არჩევანი კი უნდა გააკეთოს ექიმმა. ჩვენ დიდ განსხვავებას არ უნდა ველოდოთ სამკურნალო საშუალების ხარისხთან დაკავშირებით.

რამდენად მართალია მოსაზრება, რომ გენერიკების შემთხვევაში ფალსიფიცირების ალბათობა იზრდება?

ფალსიფიცირების პრობლემა არის მსოფლიო პრობლემა და არა მხოლოდ ჩვენი ქვეყნის. მთავარია, ჩვენს ქვეყანაში წამლისა და ფარმაციის მიმართ დამოკიდებულება შეიცვალოს. ჩვენ ვერ უარვყოფთ, რომ წამალი კომერციული პროდუქციაა, მაგრამ იგი პირველ რიგში უნდა განვიხილოთ, როგორც სასიცოცხლოდ აუცილებელი პროდუქტი, ამიტომ მასთან დაკავშირებული ნებისმიერი ქმედება უნდა იყოს დარეგულირებული შესაბამისად. ჩვენს ქვეყანაში უნდა ჩამოყალიბდეს წამლის ხარისხის უზრუნველყოფის სისტემა. წამლის ქსელიდან ამოღება და შემოწმება აუცილებელია, მაგრამ ამით წამლის ხარისხი ვერ გაუმჯობესდება. ასე მხოლოდ დასკვნა, ანგარიში შედგება და მეტი არაფერი. ფალსიფიცირებისგან რომ დავიცვათ თავი, ორი რამ უნდა გაკეთდეს ქვეყანაში: უნდა დარეგულირდეს წამლის პრემარკეტ კონტროლი, რომელიც მოიცავს რეგისტრაციის რეჟიმს და ნებართვების გაცემას საქმიანობაზე და მეორე – პოსტმარკეტ კონტროლი. დღეს ჩვენს ქვეყანაში 4000-ზე მეტი აფთიაქია, მარეგულირებელში დასაქმებულთა რაოდენობა კი, სამწუხაროდ – ცოტა.

დავით ბერძენიშვილი მომავალ არჩევნებში ბათუმის მაჟორიტარობის კანდიდატზე

ნაწყვეტი დავით ბერძენიშვილის ინტერვიუდან, რომელიც გაზეთ „ბათუმელების“ ორშაბათის ნომერში გამოქვეყნდება („რესპუბლიკური“ პარტიის ერთ-ერთ ლიდერთან ინტერვიუ ნეტგაზეთმა ჩაიწერა).

ბატონო დავით, ბათუმში ვრცელდება ინფორმაცია, რომ საპარლამენტო არჩევნებზე კოალიციის მაჟორიტარობის კანდიდატი იქნება გიორგი მასალკინი. რამდენად შეესაბამება ეს სიმართლეს?

ბათუმში საარჩევნო კოდექსით სამი მაჟორიტარული ოლქი არის განსაზღვრული. ამ სამი ოლქიდან “რესპუბლიკელებს” ერთ ოლქზე პრეტენზია რომ გვექნება, ეს არავისთვის არის მოულოდნელი და ვინ იქნება ჩვენი კანდიდატი, ამაზე ჯერ ვერაფერს ვიტყვი. თუ ბათუმში “რესპუბლიკელებს” ექნებათ მაჟორიტარული ოლქი, ჩვენ განვიხილავთ რამდენიმე შესაძლო კონკურენტუნარიან კანდიდატს.

როგორ აფასებს პარტიის ბათუმის ოფისის მუშაობას და ამ მხრივ რაიმე ცვლილებებს ხომ არ გეგმავს რესპუბლიკური პარტია?

“რესპუბლიკური პარტია” ბათუმში ტრადიციულად ძლიერია, ან არაუშავს. სპეციფიკა ასეთია – ბათუმში მიღებული შედეგები ყოველთვის უფრო მაღალი იყო, ვიდრე საშუალოდ ქვეყანაში. რესპუბლიკური პარტიისთვის ბათუმი ძალიან მნიშვნელოვანი ქალაქია. საარჩევნო ასპარეზზე ყველაზე დიდი წარმატება რაც მოიპოვა “რესპუბლიკურმა პარტიამ”, ეს იყო 1990 წელს საქართველოს უზენაესი საბჭოს არჩევნები, სადაც ორივე მაჟორიტარული ოლქი მოვიგეთ. ეს იმ დროს, როცა ან “მრგვალი მაგიდა” იგებდა და ან კომუნისტური პარტია. მოვიგეთ იმიტომაც, რომ ბათუმი კვალიფიციური ამომრჩევლებით დასახლებული ქალაქია და ჩვენც ძალიან ძლიერი ორგანიზაცია გვქონდა.

ყოფილა უფრო რთული პერიოდებიც, ასლან აბაშიძის 13-წლიანი მმართველობის დროს არ ყოფილა არც ერთი დღე, წუთი და წამი “რესპუბლიკელებს” რომ შეეწყვიტათ არსებობა. ანტიასლანური ორიენტირი ყოველთვის იყო “რესპუბლიკელების” სახით, იგივე მასალკინის სახით, ირაკლი ჩავლეიშვილის სახით და უამრავი სხვა რესპუბლიკელის სახით.

თქვენ, რომ გაიხსენოთ 2004 წლის არჩევნებში რა სია ჰქონდა სააკაშვილს და რა სია “რესპუბლიკურ” პარტიას, ნახავთ, რომ ჩვენ პარტიას ჰქონდა აჭარის რევოლუციის სახეებით დაკომპლექტებული სია, იმ სიაში ვინც კაი იყო, ისინი ახლა ჩვენთან არიან.

სოფელ თიკერში ეკალ-ბარდები იწვის

ქობულეთში, სოფელ თიკერში, 100 ჰექტარ მიწის ფართობზე, ბამბუკებსა და ეკალ-ბარდებს ხანძარი გაუჩნდა. საგანგებო სიტუაციების მართვის სააგენტოს აჭარის ორგანიზაციის ხელმძღვანელის ზვიად ჯაფარიძის ინფორმაციით, „ეს არ არის ტყის მასივი, როგორც ახლახან მედიამ გაავრცელა ინფორმაცია – იწვის ეკალ-ბარდები და ბამბუკის დაბალი ხეები. ხანძარი ლოკალიზებულია, მაგრამ ლიკვიდირებული ჯერ არ არის”.

ბათუმის სახანძრო დაცვისა და საგანგებო სიტუაციათა სამსახურის უფროსის ხუსეინ სირაბიძის თქმით, ადგილზე მობილიზებულია 5 სახანძრო ავტოცისტერნა – “მაგრამ გასათვალისწინებელია, რომ ეს ჭაობია და ყველა მანქანა ვერ შედის ადგილზე. ეს არ არის ტყის მასივი, ხეზე საერთოდ არ ყოფილა ცეცხლი. გვიმრებია ძირითადად და დაახლოებით 1000 კვადრატზე პატარა ბამბუკის ბუჩქები. ხანძარი ლოკალიზებულია და რამდენიმე წუთში სულ ჩავაქრობთ.”

ხანძრის მიზეზი ჯერჯერობით არ სახელდება.ზვიად ჯაფარიძის თქმით, მას გამოძიება დაადგენს.

 

 

2016-02-19 დღის სტატისტიკა – ბათუმში პარკირების წესების დარღვევაზე


სატრანსპორტო ინფრასტრუქტურის მართვის სააგენტოს ბოლო მონაცემებით, დღეს ბათუმში პარკირების წესების დარღვევაზე 384 ადამიანი დაჯარიმდა.

მათ შორის ყველაზე მეტი, 296 – პარკირების საფასურის გადახდის გარეშე დგომის გამო, 11 -დგომის მეთოდის დარღვევისთვის, 57 – ნიშანში დგომის გამო, 14 ტროტუარზე დგომისთვის და 6 – დგომა-გაჩერების წესის დარღვევისთვის.
ფოტოები გადაღებულია ბოლო რამდენიმე დღის განმავლობაში.

ბათუმში მშენებარე ობიექტზე კოშკურა-ამწე წაიქცა

დღეს გამთენიისას, კაჩინსკების ქუჩაზე, 39-სართულიანი შენობის მშენებლობის ობიექტზე კოშკურა-ამწე წაიქცა. როგორც “ბათუმელებს” ადგილზე განუცხადეს, არავინ დაშავებულა. შემთხვევის შედეგად ახალი ბულვარის ტერიტორიაზე დაზიანდა ქვაფენილისა და აუზის ნაწილი, რომლის აღდგენითი სამუშაოები რამდენიმე დღეში დაიწყება.

სამშენებლო სამუშაოებს “ორბი ჯგუფის” ხელოსნები ახორციელებენ, კოშკურა-ამწესთან დაკავშირებულ სამუშაოებს კი “ორბი ჯგუფის” ქვეკონტრაქტორი ორგანიზაცია – შპს “მირაჟი”. ქვეკონტრაქტორი ორგანიზაციის დირექტორის, ომარ ბერიძის განმარტებით, კოშკურა-ამწის უსაფრთხო ექსპლუატაციაზე სწორედ ისინი არიან პასუხისმგებელნი. “სამუშაოები მიმდინარეობდა ჩვეულ რეჟიმში და მოულოდნელად, ჯერჯერობით დაუდგენელი მიზეზების გამო, წაიქცა ამწე. ეს მოხდა დაახლოებით დილის შვიდ საათზე. ვაპირებდით ამ ამწის დაშლას და ახლის დამონტაჟებას, ნაწილები უკვე ჩამოსული იყო. ამწე არ იყო ძელი, არც მისი რესურსი, ჩვეულებრივ მუშა მდგომარეობაში იყო და ტექნიკურად გამართული იყო. შემთხვევისას არავინ დაშავებულა,”  – ამბობს ომარ ბერიძე.

[ვიდეო]

 

 

მძღოლებმა გორგილაძის ქუჩა გადაკეტეს

ამ წუთებში გორგილაძის ქუჩა [მერიის წინ] გადაკეტილია. საქალაქთაშორისო სამარშრუტო ტაქსების მძღოლები ბათუმის მერთან, გიორგი ერმაკოვთან შეხვედრას ითხოვენ.

მძღოლები  ქალაქის ტერიტორიაზე სხვადასხვა არაფორმალური ავტოსადგურის არსებობას რამდენიმე დღის წინაც აპროტესტებდნენ. დღეს ისინი კონკრეტულ მოთხოვნებზე კომენტარს არ აკეთებენ. ამბობენ, რომ მათ ნორმალური მუშაობის საშუალება არ ეძლევათ და ამ ეტაპზე მათი მთავარი მოთხოვნა ბათუმის მერთან შეხვედრაა.

Jpeg

სასამართლო გადაწყვეტს, მიიღებს თუ არა დევნილის სტატუსს ომარ როდონაია

14 მარტს ქუთაისის საქალაქო სასამართლოში პროცესია ჩანიშნული, რომლის შედეგად უნდა გადაწყდეს, მიანიჭებს თუ არა სასამართლო შშმ პირს, ომარ როდონაიას დევნილის სტატუსს. მის ინტერესებს სასამართლოში ახალგაზრდა იურისტთა ასოციაციის ადვოკატი, ნიკა დუმბაძე იცავს.

სტატია ომარ როდონაიას შესახებ – ”ისეთი შეგრძნება მაქვს, თითქოს ადამიანი აღარ ვარ” – გაზეთ „ბათუმელებში“ 2015 წლის ბოლოს გამოქვეყნდა და საზოგადოების გამოხმაურება მოჰყვა. ომარ როდონაია ბათუმში მარტო ცხოვრობს. მას საკუთრება არ გააჩნია. იმ შემთხვევაში, თუ გალში დაბადებული ომარ როდონაია დევნილის სტატუსს მიიღებს, სახელმწიფო ვალდებულია მის საცხოვრებელ ფართობზეც იზრუნოს.

ინკლუზიური განათლება კეთილსინდისიერი მასწავლებლის იმედად

„ის არის“, – თითით მიმანიშნა პატარა ნიკაზე მასწავლებელმა, რომელსაც ვთხოვე ინკლუზიურ კლასში შევეყვანე, რომ საგაკვეთილო პროცესს დავსწრებოდი. ნიკა ბათუმის #26 სკოლის მეორე კლასის მოსწავლეა. ის წინა მერხთან მარტო ზის, მისი მაგიდა კი ცარიელია, მიუხედავად იმისა, რომ გაკვეთილი დაახლოებით 15-20 წუთის დაწყებულია. ნიკას თანატოლები დავალების წერის პროცესში არიან. ჩემი თანმხლები მასწავლებელი მასთან მივიდა და სახატავი რვეული და ფანქრები ამოაღებინა ჩანთიდან. გახარებულმა ნიკამ მასწავლებელს უთხრა, რომ მაკრატელი და ფერადი ფურცლებიც ჰქონდა ჩანთაში.

#26 სკოლაში ახლახან გაიხსნა სპეციალური სწავლების ცენტრი, სადაც 44 მოსწავლეა, მათგან 30 სპეცჯგუფებში სწავლობს, ხოლო 14 მოსწავლე გადანაწილებულია ამავე სკოლის სხვადასხვა კლასში.

პანდუსი ბათუმის #26 სკოლაში
პანდუსი ბათუმის #26 სკოლაში

2006 წლიდან ინკლუზიური განათლება საქართველოს განათლების ერთ-ერთი პრიორიტეტული მიმართულებაა, ხოლო ამ მოდელით სწავლება – ზოგადსაგანმანათლებლო საფეხურზე შესაბამისი საგანმანათლებლო დაწესებულების მოვალეობა. კვლევის – „მშობელთა უნივერსიტეტი ინკლუზიური განათლებისთვის“ – მონაცემებით, 2014-2015 სასწავლო წელს ბათუმის 27 საჯარო სკოლაში სულ 204 სპეციალური საგანმანათლებლო საჭიროების მქონე (სსსმ) მოსწავლე სწავლობდა.

საქართველოს კანონი „ზოგადი განათლების შესახებ“ ინკლუზიურ განათლებას განმარტავს, როგორც სპეციალური საგანმანათლებლო საჭიროების მქონე მოსწავლის ჩართვას ზოგადსაგანმანათლებლო პროცესში თანატოლებთან ერთად. ამავე კანონის თანახმად, განათლების სამინისტროში არსებულმა მულტიდისციპლინურმა გუნდმა უნდა შეაფასოს მოსწავლე მშობლის ან მასწავლებლის მიმართვის შემდეგ. შეფასების საფუძველზე უნდა დადგინდეს, არის თუ არა მოსწავლე სპეციალური საგანმანათლებლო საჭიროების მქონე – თანატოლებთან შედარებით უჭირს სწავლა და საჭიროა მისთვის ეროვნული სასწავლო გეგმის მორგება (მოდიფიცირება ან/და სასწავლო გარემოსთან ადაპტაცია ან/და ინდივიდუალური სასწავლო გეგმის შედგენა). შემდეგ ეს მოსწავლე ასაკის შესაბამის ან მაქსიმუმ ორი წლით დაბალ სასწავლო საფეხურზე ირიცხება მშობლის მიერ შერჩეულ უახლოეს სკოლაში. თავის მხრივ მასწავლებლები ვალდებულნი არიან, შეიმუშავონ ინდივიდუალური სასწავლო გეგმა და ამ გეგმით ასწავლონ, შეაფასონ მოსწავლე.

საქართველოს განათლებისა და მეცნიერების სამინისტროს მულტიდისციპლინური გუნდისთვის აჭარაში სამი შტატი აქვს გამოყოფილი. როგორც გუნდის ხელმძღვანელი ციალა ტუღუში ამბობს, მათი ერთი თანამშრომელი აღარ მუშაობს და გუნდი პრაქტიკულად ორი თანამშრომლისგან შედგება, რის გამოც ვერ ახდენენ სკოლებში მიმდინარე პროცესების მონიტორინგს და არც იმაზე შეუძლია პასუხი, რამდენად სრულდება ის ინდივიდუალური გეგმები, რომლებიც წლის დასაწყისში იწერება:

„თითქმის ყველა სკოლა ჩართულია ინკლუზიური სწავლების პროცესში, ჩვენ მოვახერხეთ, რომ მათთვის უზრუნველგვეყო სპეცმასწავლებლები, რომელთა ფუნქციაც სხვა მასწავლებლების დახმარებაა. ყველა მასწავლებელი, რომელიც ასწავლის სსსმ მოსწავლეს, კანონით ვალდებულია შეიმუშაოს ინდივიდუალური სასწავლო გეგმა, რომლის მიხედვითაც უნდა ასწავლოს და შეაფასოს ეს მოსწავლე. თავიდან გვქონდა პრობლემები, დღეს მეტწილად მოწესრიგდა ამ გეგმების შემუშავების საკითხი.
თუმცა, რამდენად მუშაობენ მასწავლებლები ამ გეგმით და რამდენად ხარისხიანია ეს პროცესი, ჯერჯერობით მასწავლებლის კეთილსინდისიერებაზეა დამოკიდებული. ჩვენ ფიზიკურად ვერ ვახერხებთ ამის შემოწმებას. ფაქტობრივად დღეს მხოლოდ ორი ადამიანი ვმუშაობთ, სკოლები კი უამრავია, ბათუმის გარდა რეგიონებშიც, თითქმის მთელ აჭარაში მოგვიწევს სკოლების შემოწმება. ამიტომ ამ ეტაპზე მხოლოდ ის მოხერხდა, რომ სკოლებისთვის თვითშეფასების კითხვარი შევიმუშავეთ“, – ამბობს ციალა ტუღუში.

ლელა ჯინჭარაძე ქართული ენის სერტიფიცირებული მასწავლებელია ბათუმის #4 საჯარო სკოლაში. როგორც ის ამბობს, წელს პირველად შევიდა ინკლუზიურ კლასში. მეხუთე კლასში ორი სსსმ მოსწავლე ჰყავს. მათთან ინდივიდუალური სასწავლო გეგმით მუშაობს. ის ამბობს, რომ არსებობს რიგი სირთულეები, თუმცა ტრენინგების გავლის შემდეგ ახერხებს ეფექტურად იმუშაოს მთელ კლასთან.

„ამ ბავშვების ინტეგრირება აუცილებელია, თუმცა დიდ სირთულეებს ვაწყდებით… მასწავლებელი ცდილობს სსსმ ბავშვების დონის შესაბამისი დავალება ან ტესტი მისცეს მოსწავლეებს, დაასაქმოს გაკვეთილზე აქტივობებით, რომლებიც მათი განვითარების ზონას შეეფარდება. მათ ვერ მოვთხოვთ იმას, რასაც სხვა ბავშვებს ვთხოვთ. ბუნებრივია, შეფასებას ვაძლევთ“, – ამბობს ლელა ჯინჭარაძე და დასძენს, რომ `სკოლებში მწირია მასალები აქტივობებისთვის და თვალსაჩინოებები, რომლებიც გაკვეთილზე გამოიყენება… თუმცა, სკოლებში არსებულ „რესურსოთახში“ „სპეცმასწავლებელი“ მხოლოდ სსსმ ბავშვებისთვის ატარებს გაკვეთილებს ყველა შესაბამისი თვალსაჩინოების დახმარებით“.

სპეციალური განათლების ცენტრის ბათუმის 26-ე საჯარო სკოლის ბაზაზე გადასვლის შემდეგ, ერთ-ერთმა მოსწავლემ ინკლუზიური კლასის (სადაც ის სწავლობდა მეექვსე სკოლაში) ნაცვლად სპეციალურ კლასში განაგრძო სწავლა. სპეცკლასის მასწავლებლის, მანანა მაჩალაძის განმარტებით, ამის მიზეზი ის გახდა, რომ მან სასწავლო პროგრამა ვერ დაძლია:
„მასწავლებელი კი ცდილობდა, მაგრამ, რადგან ჩვეულებრივი პროგრამისგან ძალიან შორს იყო ბავშვი, მშობელთან შეთანხმებით ვარჩიეთ, რომ სპეციალურ კლასში სწავლა აჯობებდა მისთვის. კლასი არაფერ შუაშია“.

ციალა ტუღუში ამბობს, რომ შესაძლოა კარგად არ იცნობს ამ საკითხს, მაგრამ, რადგან თითოეული მოსწავლისთვის იქმნება ინდივიდუალური სასწავლო გეგმა, შეუძლებელია, მუშაობის შემთხვევაში, მოსწავლემ ვერ შეძლოს მისი დაძლევა:
„მგონი ასაკობრივი უფრო იყო ის, რომ ბავშვი ცენტრში უფრო კომფორტულად გრძნობდა თავს. თუმცა ვერ გეტყვით, რამდენად იყო საგაკვეთილო პროცესებში ჩართული. ვიცი, რომ კლასელებთან კარგი ურთიერთობა ჰქონდა“.

რამდენად ეფექტურია დღეს არსებული ინკლუზიური განათლება და რამდენად ახერხებენ სსსმ მოსწავლეები სკოლებში იმ ცოდნის მიღებას, რაც გათვალისწინებულია ინდივიდუალური სასწავლო გეგმით? – ამ კითხვას ციალა ტუღუში ვერ პასუხობს, რადგან საკითხის შესამოწმებლად შესაბამისი მონიტორინგის, შეფასების სისტემა არ არსებობს:

„პროგრესი გვაქვს, ადრე თუ პრობლემები მოსწავლეების მშობლებთანაც გვექმნებოდა, დღეს ეს შესამჩნევად შემცირდა, თავად იმ მშობლებმაც კი, რომლებიც საკუთარ შვილებს მალავდნენ, უფრო აქტიურად დაიწყეს ბავშვების სკოლაში შეყვანა. თუმცა, კიდევ ვიმეორებ, სწავლის პროცესში აღწევს თუ ვერა შედეგს მოსწავლე, ეს, ჯერჯერობით, მხოლოდ მასწავლებლის კეთილსინდისიერებაზეა დამოკიდებული. რა თქმა უნდა, იქნება მაგალითები, სადაც ყველაფერი ისე არ არის, როგორც უნდა იყოს, მაგრამ ამის გაკონტროლება მხოლოდ ოჯახსა და სკოლის დირექციას შეუძლია“.

მარიხუანას მოხმარებაზე სასამართლოები გადაწყვეტილებას ვერ იღებენ – პარლამენტის უმოქმედობა

მარიხუანას შეძენა-შენახვასა თუ მოხმარებაზე საქმეებს სასამართლოები ვერ იხილავენ. პრობლემა კანონია, რომელიც არ არსებობს. კანონმდებლობით მარიხუანას მოხმარება დანაშაულად რჩება, მაგრამ არ არსებობს სამართლებრივი ნორმა, რითაც შეიძლება დამნაშავეს სასამართლომ სასჯელი მიუსაჯოს. საკონსტიტუციო სასამართლომ გასული წლის 24 ოქტომბერს ბექა წიქარიშვილის გახმაურებულ საქმეზე მარიხუანას მოხმარებისთვის თავისუფლების აღკვეთის გამოყენება აკრძალა და იგი წამების ტოლფასად მიიჩნია. პარლამენტი გადაწყვეტილებას ვერ იღებს.

ბათუმის საქალაქო სასამართლოს თაროებზე ამჟამად 35 საქმეა, რომლებიც მარიხუანას შეძენა-მოხმარებას ეხება. ბრალდებულები გირაოთი გაათავისუფლეს. მოსამართლეები საქმეების განხილვას ვერ იწყებენ, რადგან 24 ოქტომბრიდან დღემდე პარლამენტმა მარიხუანას მოხმარებაზე სისხლის სამართლის კოდექსში სანქციის შეტანა ვერ მოახერხა. „გვაქვს პრეცედენტი: არსებობს დანაშაული, მაგრამ არ არსებობს სასჯელი. 70 გრამამდე მშრალ მარიხუანაზე პირს არაფერი ემუქრება, რადგან სანქცია ბუნებაში არ არსებობს“, – უთხრა „ბათუმელებს“ ბათუმის საქალაქო სასამართლოს მოსამართლემ, დავით მამისეიშვილმა. მან ცოტა ხნის წინ გამოიტანა გამამტყუნებელი განაჩენი მარიხუანას შეძენა-შენახვაზე, ანუ დანაშაულის არსებობა დააფიქსირა, მაგრამ სასჯელი ვერ მიუსაჯა:

„უცხო ქვეყნის მოქალაქე იყო და უნდა დაბრუნებულიყო საკუთარ ქვეყანაში. ამიტომ გახდა აუცილებელი ამ საქმეზე გადაწყვეტილების მიღება. ერთადერთი გამოსავალი ამ სიტუაციაში იყო კანონის ანალოგის გამოყენება. როცა კანონში არსებობს ხარვეზი, სისხლის სამართლის საპროცესო კოდექსი ითვალისწინებს ანალოგის გამოყენებას, თუკი ამით არ ირღვევა ბრალდებულის უფლებები. სისხლის სამართლის საპროცესო კოდექსის 269-ე მუხლი ადგენს სასჯელის დანიშვნას და მისი მოხდისგან გათავისუფლებას, თუკი განაჩენის გამოტანის დროისთვის ახალმა კანონმა გააუქმა ქმედების დანაშაულებრიობა“, – ამბობს მოსამართლე დავით მამისეიშვილი.

საკონსტიტუციო სასამართლო აცხადებს გადაწყვეტილებას საქმეზე - „ბექა წიქარიშვილი საქართველოს პარლამენტის წინააღმდეგ". ფოტო "ბათუმელების" არქივიდან
საკონსტიტუციო სასამართლო აცხადებს გადაწყვეტილებას საქმეზე – „ბექა წიქარიშვილი საქართველოს პარლამენტის წინააღმდეგ”. ფოტო “ბათუმელების” არქივიდან

ადვოკატი რამინ პაპიძე ამ გადაწყვეტილებას უკანონოდ მიიჩნევს და პასუხისმგებლობას პარლამენტს აკისრებს: „მოსამართლის გადაწყვეტილება ვერ იქნება კანონიერი, რადგან საკონსტიტუციო სასამართლოს გადაწყვეტილება არ არის კანონი. სისხლის სამართლის საპროცესო კოდექსი განსაზღვრავს, რომ განაჩენი უნდა იყოს კანონიერი, სამართლიანი და დასაბუთებული. მოსამართლეებს არ აქვთ დღეს უფლება მიიღონ ამ კუთხით გადაწყვეტილებები“.

კონსტიტუციონალისტი ვახუშტი მენაბდე მოსამართლის ამ გადაწყვეტილებაში პრობლემას ვერ ხედავს: „სხვაგვარად ვერ მოიქცეოდა მოსამართლე, რადგან თავისუფლების აღკვეთას სასჯელად ვეღარ განსაზღვრავდა. პრობლემა არსებობს და გამოსავალი არის ის, რომ პარლამენტში უნდა შედგეს კონსესუსი. საგაზაფხულო სესიაზეც თუ ვერ მოახერხებენ ამას, კიდევ უფრო გაიწელება პროცესი, რადგან მაშინ ახალი მოწვევის პარლამენტს უნდა დაველოდოთ“.

პარლამენტი მომავალ სასესიო კვირაში განიხილავს გოგა ხაჩიძის საკანონმდებლო ცვლილებების პაკეტს „სისხლის სამართლის კოდექსში“, რომელიც მცირე ოდენობით მარიხუანას შეძენა/შენახვისთვის სისხლის სამართლებრივი პასუხისმგებლობისგან გათავისუფლებას ითვალისწინებს. „თუკი ამ კანონპროექტში არაფერი შეიცვალა, მხარდაჭერას არ ვაპირებ“, – უთხრა „ბათუმელებს“ პარლამენტის იურიდიული კომიტეტის თავმჯდომარემ, ვახტანგ ხმალაძემ. კანონპროექტისთვის მხარდაჭერას არ აპირებს საპარლამენტო უმრავლესობის კიდევ ერთი წევრი გიგა ბუკია: „მე არ ვუჭერ მხარს ამ კანონპროექტს. „კონსერვატორებმა“ დავაფიქსირეთ ჩვენი პოზიცია. ეს მიდგომა, რასაც ჩვენ გვთავაზობენ, არაა რელევანტური ჩვენი ქვეყნისთვის. დიდი ოდენობის ნარკოტიკების შენახვა ან მოხმარება მკაცრად უნდა იყოს დასჯილი და ეს არის სისხლის სამართლის დანაშაული“.

გოგა ხაჩიძის მიერ ინიცირებული კანონპროექტი მარიხუანას მოხმარებისთვის ჯარიმას _ 100 ლარს ითვალისწინებს, ხოლო განმეორების შემთხვევაში – 300 ლარამდე დაჯარიმებას. მოქმედი კანონმდებლობით, მარიხუანას მოხმარება 500 ლარით ჯარიმდება, განმეორების შემთხვევაში – 1000 ლარით.

საპარლამენტო უმრავლესობა იუსტიციის სამინისტროსთან ერთად ალტერნატიულ კანონპროექტზე მუშაობს. რას ითვალისწინებს ეს კანონპროექტი, ამაზე საუბარი კანონპროექტის ავტორებს არ სურთ. იურიდიული კომიტეტის თავმჯდომარემ, ვახტანგ ხმალაძემ „ბათუმელებს“ დაუდასტურა, რომ თანხმობა უმრავლესობაში ამ საკითხზე მიღწეული არ არის: „ამდენ დეპუტატში ამის მიღწევა მარტივი გგონიათ? ვიდრე არ გვექნება თანხმობა, ვერც სამართლებრივ ნორმას დავაწესებთ. არ ვიცი, რამდენ ხანს გაგრძელდება ეს პროცესი, ნათელმხილველი არ ვარ“.

იმის გამო, რომ კანონმდებლებმა საკონსტიტუციო სასამართლოს გადაწყვეტილების შემდეგ კანონი არ დააზუსტეს, თბილისის სააპელაციო სასამართლომ პატიმრობაც შეუფარდა მარიხუანას მოხმარებისთვის კონკრეტულ პირებს. ეს ის შემთხვევები იყო, როცა ბრალდებულებს ნედლი მარიხუანას მოხმარება დაუდგინდათ. საკონსტიტუციო სასამართლოს გადაწყვეტილება კი მარიხუანას მშრალ ოდენობას ეხებოდა.

რა გამოსავალს სთავაზობს საპარლამენტო უმრავლესობა სასამართლოს? კოალიცია „ქართული ოცნების“ წევრი, გიგა ბუკია გამოსავალზე არ ფიქრობს, რადგან მისი აზრით, მოსამართლეებს ისევ შეუძლიათ პატიმრობა გამოიყენონ, თუკი ისინი ამის აუცილებლობას ხედავენ: „საკონსტიტუციო სასამართლოს გადაწყვეტილება შეეხო მხოლოდ 260-ე მუხლს, მაგრამ ის არ შეხებია 273-ე მუხლს, რომელიც ჯარიმებსაც ითვალისწინებს და პატიმრობასაც. თუ რომელიმე მოსამართლე არასწორად კითხულობს საკონსტიტუციო სასამართლოს გადაწყვეტილებას, ეგ არ ვიცი“.

„გიგა ბუკიას აქვს უფლება, ჰქონდეს კონსტიტუციის საწინააღმდეგო პოზიცია. სამწუხაროა, რომ კანონმდებელი საკონსტიტუციო სასამართლოს გადაწყვეტილების ასეთ ინტერპრეტაციას ახდენს“, – ამბობს კონსტიტუციონალისტი ვახუშტი მენაბდე. მისი განმარტებით, საკონსტიტუციო სასამართლოს გადაწყვეტილებით ცალსახად აიკრძალა თავისუფლების აღკვეთის გამოყენება მარიხუანას შეძენა, შენახვა, მოხმარებაზე – საუბარია 70 გრამამდე, ხოლო 273-ე მუხლი, პირიქით, მარიხუანის მცირე ოდენობის მოხმარებაზეა და პატიმრობის გამოყენება გამორიცხულია.

„ბათუმელების“ ინფორმაციით, საპარლამენტო უმრავლესობის წევრი გიგა ბუკია წინააღმდეგია იმ კანონპროექტის, რომელზეც მისივე პოლიტიკური გუნდი მუშაობს: „მე არ ვიცი, რა კანონპროექტზე მუშაობენ. წინააღმდეგი ვარ, მარიხუანას მოხმარებაზე სისხლის სამართლებრივი პასუხისმგებლობა გამოირიცხოს. თუ მოსამართლე ხედავს, რომ ადამიანი გამოუსწორებელი ნარკომანია და სხვასაც უბიძგებს ამისკენ, მან პატიმრობა უნდა გამოიყენოს“, – უთხრა „ბათუმელებს“ გიგა ბუკიამ. გრძნობს თუ არა პასუხისმგებლობას და რა გამოსავალს ხედავს კანონმდებელი, როცა კანონში სამართლებრივი ნორმის დაწესებას პარლამენტი ვერ ახერხებს? – ამ შეკითხვას გიგა ბუკიამ აღარ უპასუხა: „მეტი არ მცალია, სხდომაზე შევდივარ“.

მუნიციპალურ ავტობუსს ავტომანქანა დაეჯახა

დღეს, 18 თებერვალს, აეროპორტის გზატკეცილზე ბათუმის # 10 მუნიციპალურ ავტობუსს მსუბუქი ავტომანქანა დაეჯახა.

ავტოსაგზაო შემთხვევას მსხვერპლი არ მოჰყოლია. შპს „ბათუმის ავტოტრანსპორტის“ დირექტორის პაატა დუმბაძის ინფორმაციით, ავტობუსის მძღოლი და ერთი მგზავრი, ასევე მსუბუქი ავტომანქანის მძღოლი, საავადმყოფოში არიან გადაყვანილნი.

შემთხვევის შედეგად ცეცხლი გაუჩნდა მსუბუქ ავტომობილს, რის გამოც ადგილზე მისული იყო სახანძრო სამსახური. „გამოძიების დასრულებამდე გადაყვანილი იქნება ავტობუსიც და მსუბუქი მანქანაც საჯარიმო სადგომზე. ჯერ არ ვიცით, რა ხარისხის ზიანი მიადგა ავტობუსს ამ ავტოსაგზაო შემთხვევის შედეგად,“  – უთხრა „ბათუმელებს“ პაატა დუმბაძემ.

შინაგან საქმეთა სამინისტროს ინფორმაციით, გამოძიება დაწყებულია სისხლი სამართლის კოდექსის 276-ე მუხლით, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

ცირა ელისაშვილი: ჩვენ ვაშენებთ თვითმკვლელ ქალაქებს

18 თებერვალს „საერთაშორისო გამჭვირვალობა – საქართველოს“ მიერ ორგანიზებულ დისკუსიაზე – „ბათუმის ბულვარი – კულტურული მემკვიდრეობის ძეგლი და არსებული გამოწვევები“ – „ტფილისის ჰამქარის“ წევრმა, კულტუროლოგმა ცირა ელისაშვილმა კულტურული მემკვიდრეობის მართვის პრობლემებზე, სახელმწიფო პოლიტიკასა და საზოგადოების ჩართულობაზე ისაუბრა. „ბათუმელები“ გთავაზობთ ცირა ელისაშვილის მოხსენების შემოკლებულ, სტენოგრამულ ვერსიას.

ცირა ელისაშვილი

„ვფიქრობდი, როგორი უნდა ყოფილიყო ეს წარდგენა. ვფიქრობ, ეს არ არის ის სეგმენტი, რომელსაც შეიძლება ლექცია წაუკითხო კულტურული მემკვიდრეობის საჭიროების შესახებ. თქვენი აქტივობით თქვენ უკვე დაადასტურეთ, რომ ეს ინფორმაცია თქვენთვის მოძველებულია და ეს მისასალმებელია ჩემთვის, რადგან იყო ბათუმში პერიოდი, როცა ამ ქალაქს უჭირდა, სჭირდებოდა სამოქალაქო აქტიურობა, მაგრამ ეს აქტიურობა, სამწუხაროდ, არ იყო. ამიტომ ვისაუბრებ ჩემს დამოკიდებულებაზე ბათუმის მიმართ.

ყველა ქალაქს აქვს თავისი სიმბოლო. ბათუმში ეს ჩემთვის არის რამდენიმე ობიექტი, რომელიც პირდაპირ ასოციაციას იწვევს სიტყვა ბათუმის ხსენებისას. ეს არის: „ინტურისტის“ შენობა; ფოსტა; წიგნების მაღაზია, რომელიც ახლა სახეცვლილია; სუპერმარკეტი [მაღაზია აბაშიძისა და გამსახურდიას ქუჩების კვეთაში, ეროვნული ბანკის შენობის ქვეშ], რომელიც იყო სრულიად ეკლექტიკური ნიმუში და შესაძლოა, ხელოვნების მწვერვალი არ იყო, მაგრამ იდენტიფიცირების თვალსაზრისით, ქალაქთან მიმართებაში, ერთ-ერთი სიმბოლური მახასიათებელია.

რა დაგვრჩა? რა სახე აქვს დღეს ამ ჩამონათვალს? რა მივიღეთ იმ ობიექტებისაგან, რომელიც, ჩემი აზრით, არის ბათუმის ის სიმბოლოები, რომლებიც უნდა დარჩენილიყო, უნდა გადაცემოდა თაობიდან თაობას?

ნებისმიერ ქალაქს აქვს შენებისა და ნგრევის ფაზები, მაგრამ ნგრევას არასოდეს არ ჰქვია ეს სახელი, მას უწოდებენ რეაბილიტაციას, მაგრამ საბოლოო ჯამში ჩვენ მივდივართ იმასთან, რასაც ჰქვია შენება ძველის ნგრევის ხარჯზე და ეს ძველი, როგორც წესი, არის ისტორიული ქალაქი. ეს ხდება ბათუმში, ეს ხდება თბილისში, ეს მოხდა ყველა ქალაქში, რომლის რეაბილიტაციის პროცესიც წინა ხელისუფლების დროს მოხდა და დღევანდელი ხელისუფლების მხრიდანაც „წარმატებით“ გრძელდება.

ასეთ დროს, ჩვენ, გარდა კონკრეტული შენობებისა, ქალაქის ძველ, ურბანულ მახასიათებლებს ვკარგავთ.

ის, რაც ბათუმმა დაკარგა, მაგრამ მაინც, კუნძულების სახით არის შემორჩენილი და მე იმედი მაქვს, რომ ეს კუნძულები შენარჩუნდება – არის ერთსართულიანი ბათუმი, რომელიც იყო ამ ქალაქის ერთ-ერთი, მნიშვნელოვანი განმსაზღვრელი. განსაკუთრებით მნიშვნელოვანია ეს საზღვაო ქალაქისათვის. სამწუხაროდ, თუ დააკვირდებით ქუჩებს, დაინახავთ, რომ მრავალსართულიანი შენობები კეტავს სივრცეს და ეს პროცესი გრძელდება დღემდე.

მკვდარი ჩრდილების ქალაქი – ლაშა ფალავანდიშვილის ფოტოპროექტი
მკვდარი ჩრდილების ქალაქი – ლაშა ფალავანდიშვილის ფოტოპროექტი

ბათუმის კიდევ ერთი მახასიათებელია ქუჩაზე გადასასვლელები [სანიაღვრე არხებზე], რაც სხვა ქალაქში არ შემხვედრია. შეიძლება იფიქროთ: ეს ხომ დეტალია? დიახ, მაგრამ ქალაქი სწორედ ასეთ დეტალებშია და არა მხოლოდ ურბანულ სივრცეში, არა მხოლოდ ქუჩათა ქსელში.

ხშირად მესმის რიტორიკული შეკითხვა: „ჩვენ ხომ ვაშენებთ, ხომ არ ვანგრევთ?“ ანუ კულტურული მემკვიდრეობა ვიღაცას მოსწონს და ვიღაცას – არა. მაგრამ საქმე ის არის, რომ კულტურული მემკვიდრეობა არ არის გემოვნების საგანი, მასზე დავა არ შეიძლება, ის არის ფაქტი. დავა შეიძლება ხელოვნებაზე, კონკრეტული ადამიანის შემოქმედებაზე, მაგრამ დავა – მოგვწონს თუ არა კულტურული მემკვიდრეობა – სრულიად მიუღებელია.

ქალაქის განვითარების სტადიაში, როცა ქალაქის მართვის პოლიტიკა მიმართულია არა – ურბანული პრობლემების მოსაწესრიგებლად, არა – კულტურული მემკვიდრეობის შესანარჩუნებლად, ჩვენ მივდივართ ტერმინამდე – ურბოციდი, ურბანული გენოციდი. ჩვენ ვაშენებთ თვითმკვლელ ქალაქებს, ვაშენებთ ქალაქს ისტორიული ქალაქის, ისტორიული შენობების ნგრევის ხარჯზე. თუ ეს არის სახელმწიფო პოლიტიკა, აქ უკვე ძალიან ძნელია მოქმედება, თუმცა არა – წარმოუდგენელი, იმიტომ, რომ ბრძოლას ქალაქისთვის ყოველთვის აქვს შედეგი, მაშინაც კი, როდესაც წინასწარ შეიძლება დარწმუნებული იყო, რომ აქედან არაფერი გამოვა. თუნდაც იმიტომ, რომ ეს მაგალითი იყოს სხვისთვის.

ურბანიზაციის მეორე ეტაპი იწყება მაშინ, როცა ცენტრალური ტერიტორიები გაჯერდება შენობებით, კომერციული შინაარსის ფუნქციით და ადგილი არაფრისთვის არ რჩება. მაშინ მიდის განაშენიანების ტენდენცია ცენტრიდან – პერიფერიისკენ. ეს პროცესი უკვე დაიწყო და ამ შემთხვევაში ძალიან სწორი შეფასებაა საჭირო იმისათვის, რომ ჩვენ ვაშენოთ, განვაახლოთ ეს ქალაქი, განვავითაროთ, შევქმნათ ახალი ტერიტორიები და იქ გავაშენოთ თანამედროვე, ისეთი ბათუმი, რომლის სანახავადაც ძველი ბათუმის ნახვის შემდეგ ტურისტი წავა და ახალ ქალაქსაც ისეთივე ინტერესით დაათვალიერებს, როგორც ძველს.

როცა ძველი ბულვარის განვითარება მოხდა ახალი ბულვარის მიმართულებით, ეს იყო სწორი ურბანული ტენდენცია. სხვა საკითხია ხარისხთან მიმართებაში როგორი იყო ახალი ბულვარი, მაგრამ მთავარი ტენდენცია ნამდვილად იყო სწორი.

რაც შეეხება ქაოტურ გეგმარებას: ქალაქს აქვს ერთი მახასიათებელი. მაგალითად, შეიძლება წიგნის კითხვა დავიწყოთ, არ მოგვეწონოს და დავხუროთ, შეიძლება კინო არ მოგვეწონოს და და გადავრთოთ, მაგრამ თუ ქალაქში ისეთი რამ შენდება, რაც არ მოგვწონს, მას უბრალოდ ვერ ავცდებით, ის მაინც თქვენს თვალსაწიერში ხვდება. ამ თვალსაზრისით, ვფიქრობ, რომ ბათუმი არის ქაოტური ურბანიზაციის ძალიან ცუდი მაგალითი. ჩარევის თვალსზრისით ბათუმში უფრო მეტია ჩარევა, ვიდრე თბილისში. ანუ ბათუმმა უფრო მეტი დაკარგა ამ თვალსაზრისით, ვიდრე თბილისმა და ის რაც ჩვენ მივიღეთ ამ ურბანულ გარემოში, სრულიად გაუგებარი დეტალები… ჩვენ მდარე ხარისხის არქიტექტურა შემოვიტანეთ ქალაქში, რომლის არქიტექტურა იყო მაღალი ხარისხის, როგორც შესრულების, ასევე არქიტექტურული ხასიათიდან გამომდინარე.

ძალიან მნიშვნელოვანია ბათუმისთვის ბულვარის თემა, ეს ქალაქის ერთ-ერთი მთავარი მაიდენტიფიცირებელი ადგილია, მე ვფიქრობ, რომ მას თუ რაიმე ტიპის ჩარევა სჭირდება, ეს უნდა იყოს დენდროლოგიური პროექტი.

მისასალმებელია, რომ დღეს შეხვედრას ესწრება ქალაქის მერი და ძალიან სამწუხაროა, რომ შეხვედრას არ ესწრება კულტურული მემკვიდრეობის დაცვის სააგენტოს წარმომადგენელი. პირადად მე ძალიან ბევრი კითხვა მაქვს და გამოვიყენებდი ამ შესაძლებლობას.

კულტურული მემკვიდრეობის დაცვის სააგენტო არის ის ინსტიტუცია, რომელიც პირდაპირ მოწოდებულია კულტურული მემკვიდრეობის დაცვისათვის. მისი დღევანდელი ხელმძღვანელის პოზიცია ჩემთვის შეიძლება იყოს პოზიცია, რომელიც უნდა ჰქონდეს ინვესტორს, მაგრამ არავითარ შემთხვევაში კულტურული მემკვიდრეობის დაცვის სააგენტოს ხელმძღვანელს. ეს არის პრობლემა ქალაქისთვის.

არ იფიქროთ, რომ ამ თვალსაზრისით ბათუმი გამონაკლისია, თბილისშიც იგივე პრობლემა გვაქვს, მაგრამ ჩვენ ვეწინააღმდეგებით მათ და ეს წინააღმდეგობა არის სრულიად უკომპრომისო. შესაძლებელია რაღაც კონსესუსამდე მივიდეთ სხვა საჯარო მოხელეებთან, მაგრამ არა – კულტურული მემკვიდრეობის სააგენტოსთან.

ბოლოს, რაზეც მინდა ყურადღება გავამახვილო – ეს არის „ცენტრალ პარკის“ მაგალითი ნიუ იორკში.

ცენტრალური პარკი ნიუ იორკში
ცენტრალური პარკი ნიუ იორკში

ვინმემ რომ მითხრას ნიუ იორკის მხოლოდ ერთი მაიდენტიფიცირებელი სიმბოლო დავასახელო – ეს იქნება „ცენტრალ პარკი“. არა მხოლოდ იმ გაგებით, რაც ყველამ ვიცით, თუ რა მნიშვნელობა აქვს ამ პარკს ნიუ იორკელებისათვის, არამედ იმ მკვეთრი ხაზის გამო, რომელსაც ფოტოზე ხედავთ. ეს ხაზი არის მორალის ნაწილი და არა მხოლოდ ხაზი, რომელიც ყოფს ლანდშაფტსა და ურბანიზაციას. ეს ხაზი არის სინდისის ხაზი, რომელიც არ შეიცვლება ნიუ იორკში, ვინც არ უნდა მართოს ნიუ იორკი. ამას უბრალოდ არ დაანებებს მოსახლეობა, რომელიც იქ ცხოვრობს. ეს არის ხაზი, რომელიც გადის სწორ დაგეგმვაზე, ქალაქის მართვის სწორ პოლიტიკაზე, სწორ მენეჯმენტსა და სინდისზე – როგორც გითხარით. მხოლოდ პროფესიონალიზმი არ არის საკმარისი ფაქტორი, რომელმაც შეიძლება კარგი ქალაქი აგვიშენოს. თუ ეს პროფესიონალიზმი სინდისის ხაზზე არ გადის, არ არის მოქცეული მორალის ჩარჩოში, მაშინ ასეთი პროფესიონალიზმი ძალიან საშიშია.

მე კიდევ ერთხელ მინდა დაგიდასტუროთ, რომ ამ ბრძოლაში, რომელსაც თქვენ აწარმოებთ, მარტონი არა ხართ. თუ ჩვენი მხრიდან საჭირო იქნება რაიმე სახის მხარდაჭერა, ჩვენ მზად ვართ, ორგანიზაციული, პროფესიული რესურსის თვალსაზრისით, რომ ჩავებათ ამ პროცესში. ერთადერთი, რაც მინდა გთხოვოთ, რომ არ გაჩერდეთ, არ მოტყუვდეთ, არ ჩავარდეთ ხიბლში და არ გეგონოთ, რომ გაიმარჯვეთ.“

ბათუმიდან გამქრალი „ზებრები”

ბათუმში, ცენტრალური ქუჩებში, ფეხითმოსიარულეთა გადასასვლელები, ეგრეთ წოდებული „ზებრები” თითქმის წაშლილია. იმავე მდგომარეობაშია ღერძულა ხაზებიც, რაც, განსაკუთრებით ღამის საათებში უქმნის მძღოლებს პრობლემას.

ქუჩების დახაზვა, ბორდიურებისა და ველობილიკების შეღებვა, მერიის სამსახურის – “სატრანსპორტო ინფრასტრუქტურის სააგენტოს“ ფუნქციებში შედის. სამსახურის უფროსის, გიორგი ჩხეიძის თქმით, ქუჩებში საგზაო მოძრაობის ნიშნების გადაღებვა, სავარაუდოდ, მაისამდე ვერ მოხდება.

„ველოდებით, როდის მოგვცემს კლიმატური პირობები ამის საშუალებას, იმიტომ, რომ შეღებვას თავისი სტანდარტი აქვს ტენიანობის, ასფალტის ტემპერატურის. წლის შესაბამისი პერიოდი უნდა იყოს. პირველი მაისიდან აუცილებლად უნდა დავიწყოთ, როგორც კი ამინდი ამის საშუალებას მოგცემს. კაპიტალურად ერთხელ იღებება წელიწადში, ორჯერ ფიზიკურადაც ვერ ვიზამთ კლიმატური პირობების გამო, ექვსი თვე მიდის სამღებრო სამუშაოები. წელს საღებავებისთვის 200 ათასი ლარია გათვალისწინებული, მაგრამ ჯერ ტენდერები არ ჩაგვიტარებია და რა ციფრზე გავალთ, ჯერ არ ვიცი. ეს ძირითადად საღებავის თანხაა,“ – ამბობს გიორგი ჩხეიძე.

„ზებრა" პლაზასთან
„ზებრა” პლაზასთან
გორგილაძის ქუჩა
გორგილაძის ქუჩა
წაშლილი "ზებრა"
წაშლილი “ზებრა”
მემედ აბაშიძის ქუჩა
მემედ აბაშიძის ქუჩა

5

ჭავჭავაძის ქუჩა
ჭავჭავაძის ქუჩა
წაშლილი "ზებრა"
წაშლილი “ზებრა”
Exit mobile version