კულტურული მემკვიდრეობის ძეგლს შესაძლოა ერთი სართული და მანსარდა დაემატოს

ბათუმში, გორგილაძის ქუჩაზე მდებარე შენობას, რომელიც კულტურული მემკვიდრეობის ძეგლია, შესაძლოა ერთი სართული და მანსარდა დაემატოს. ამასთან, ეზოში აშენდება ოთხსართულიანი სასწავლო კორპუსი და სასწავლო თეატრი.

ორსართულიან [ყოფილი კოლეჯის] შენობაში, სადაც დღეს ბათუმის პირველი საჯარო სკოლის ფილიალია, ბათუმის ხელოვნების სასწავლო უნივერსიტეტი უნდა განთავსდეს.

„სსიპ „ბათუმის ხელოვნების სასწავლო უნივერსიტეტის“ განთავსებისათვის, ბათუმში, ზ. გორგილაძის/ვაჟა-ფშაველას ქ. N19/32 მდებარე შენობა-ნაგებობის რეაბილიტაცია/რეკონსტრუქცია/მშენებლობის სამუშაოების საპროექტო-სახარჯთაღრიცხვო დოკუმენტაციის მომზადებაზე“ ტენდერი ხელოვნების უნივერსიტეტმა უკვე გამოაცხადა. დოკუმენტაციის მომზადებაში უნივერსიტეტი მაქსიმუმ 45 ათასი ლარის გადახდას აპირებს.

სატენდერო დოკუმენტების მიხედვით: „საპროექტო-სახარჯთაღრიცხვო დოკუმენტაციის მომზადებისას გათვალისიწინებული უნდა იქნას, რომ არსებული შენობა არის ორსართულიანი. კონსტრუქციული კვლევის საფუძველზე მას უნდა დაემატოს დამატებით ერთი სართული და ქუჩის მხრიდან ოთხი მეტრით შეწეული მანსარდი. ეზოში უნდა აშენდეს ოთხსართულიანი სასწავლო კორპუსი და სასწავლო თეატრი [დეტალები ზუსტდება შემსყიდველთან]. არქიტექტურული და კონსტრუქციული ნაწილების გარდა მუშა პროექტი უნდა შეიცავდეს:  შიგა ელექტროსამონტაჟო სამუშაოების, გათბობის, გაგრილების, წყალკანალიზაციის პროექტს; ხარჯთაღრიცხვას; მშენებლობის ორგანიზების პროექტს. ასევე, „კულტურული მემკვიდრეობის შესახებ“ საქართველოს კანონით გათვალისიწნებულ შესაბამის დოკუმენტებსა და ინფორმაციას.“

აჭარის კულტურული მემკვიდრეობის დაცვის სააგენტოს ხელმძღვანელის, მირანდა ჩარკვიანის განცხადებით, სააგენტოსთვის აღნიშნულ შენობასთან დაკავშირებით, ჯერჯერობით არავის მიუმართავს.

 

ამ შენობას, რომელიც კულტურული მემკვიდრეობის ძეგლია, ერთ სართულს და მანსარდას დააშენებენ / ბათუმი, გორგილაძისა და ვაჯა-ფშაველას კვეთა
ამ შენობას, რომელიც კულტურული მემკვიდრეობის ძეგლია, შესაძლოა ერთი სართული და მანსარდა დააშენონ / ბათუმი, გორგილაძისა და ვაჟა-ფშაველას ქუჩების კვეთა

რატომ არ ინტერესდებიან ინვესტორები ქობულეთით

„ბოლო წლების განმავლობაში ქობულეთში არც ერთი მსხვილი ინვესტიცია არ განხორციელებულა,“ – განაცხადეს დღეს „ნაციონალური მოძრაობის“ წევრებმა ქობულეთში გამართულ ბრიფინგზე.

„მაშინ, როცა მივლინებებში სოლიდური თანხა იხარჯება და ამას გამგებელი ინვესტიციების მოზიდვით ამართლებს, მუნიციპალიტეტში არც ერთი ახალი, მსხვილი ინვესტიცია არ განხორციელებულა. გამგეობა ინვესტიციად ასახელებს კერძო სახლების მშენებლობას და იმ ობიექტებს, სადაც ინვესტიცია 2012 წელს ჩაიდო,“ – აცხადებს რეზო ხარაზი, „ერთიანი ნაციონალური მოძრაობის“ წევრი.

პარტიამ ინვესტიციების შესახებ საჯარო ინფორმაცია ქობულეთის მუნიციპალიტეტის გამგეობიდან გამოითხოვა. რეზო ხარაზის თქმით, ქობულეთში რამდენიმე საინვესტიციო პროექტი შეჩერებულია. ამის მაგალითად ხარაზი გელაურის თხილის საწარმოს ასახელებს, რომელიც ამ დროისთვის არ მუშაობს, ასევე ბაზართან ახლოს სავაჭრო ცენტრის მშენებლობას. „ბიზნესმენი ათაბაძე აპირებდა აქ მასშტაბური პროექტის განხორციელებას, სავაჭრო ცენტრისა  და ავტოპარკინგის მოწყობას, მაგრამ არაფერი გაკეთებულა,“ – განაცხადა რეზო ხარაზმა.

savachro centri
ადგილი ქობულეთის ცენტრში, სადაც სავაჭრო ცენტრი უნდა აშენებულიყო

„ათაბაძეს ჯერ კიდევ რომ არ დაუსრულებია სავაჭრო ცენტრის მშენებლობა, ეს „ნაციონალების“ ბრალია,“ – ამბობს ქობულეთის მუნიციპალიტეტის გამგებელი, სულხან ევგენიძე. მისი განმარტებით, ამ ინვესტორს ხელშეკრულება წინა ხელისუფლების დროს გაუფორმდა და ერთადერთ ვალდებულებად მაშინ მხოლოდ 100 ათასი დოლარის ინვესტიციის ჩადება განისაზღვრა: „გარდა ამისა, იქ იყო ელექტროტრანსფორმატორის პრობლემა. ჩვენ გამოვუყავით მიწის ნაკვეთი ამ ბიზნესმენს, ტრანსფორმატორი უკვე გადატანილია და მალე აშენდება სავაჭრო ცენტრი. რაც შეეხება გელაურის თხილის საწარმოს, იქ დანადგარებს ელოდებიან და ამ ზაფხულს ამოქმედდება“.

„ინვესტორებს ძირითადად ინტერესი აქვთ ზღვისპირა ზოლში, სადაც თავისუფალი მიწის ნაკვეთი თითქმის ყველა „ნაციონალურმა მოძრაობამ“ ისე გაასხვისა, რომ მათი მესაკუთრე ფიზიკური პირები თუ კომპანიები აღარ იძებნებიან. რეალურად თავისუფალია მიწები, სადაც არაფერი კეთდება. ჩვენ ამ პირებს არაერთხელ მივწერეთ, მაგრამ პასუხი არ მიგვიღია. ეს საკითხი დასმულია აჭარის მთავრობის დონეზე და ვნახოთ, იქნებ რამე სამართლებრივი ფორმა მოიძებნოს, რომ ეს მიწები დაბრუნდეს, ან იქ რამე მოეწყოს.  იყო შემთხვევა, როცა წინა ხელისუფლების დროს, მიწა გაყიდეს ვალდებულებებით, მერე მესაკუთრემ აიღო ბანკისგან სესხი და ქონება იპოთეკით დატვირთა და გაუჩინარდა. ბანკმა ეს მიწა გაყიდა და სხვაა მესაკუთრე. ბევრია ასეთი შემთხვევა,“ – განაცხადა „ბათუმელებთან“ სულხან ევგენიძემ.

ქობულეთის მუნიციპალიტეტის გამგებელი არ მალავს, რომ ინვესტორებს ერთგვარი შიშიც აქვთ: „მაინც შიშობენ ქობულეთში დიდი ფულის ჩადებას. წელს ველოდებით უკრაინულ და ყაზახურ ინვესტიციებს, მაგალითად, ბობოყვათში იგეგმება სასტუმრო კომლექსის აშენება, ეს ინვესტორი 10 ათასი კვადრატული მეტრის შესყიდვას აპირებს. ასევე საუბარია ქობულეთში ასფალტის ქარხნის მოწყობაზე. თუ ეს ინვესტიციები განხორციელდება, ქობულეთის მიმართ ინტერესიც გაიზრდება,“ – აცხადებს სულხან ევგენიძე.

ფულადი წახალისება ტუბერკულოზით დაავადებული პაციენტებისთვის

საქართველოს მთავრობამ „ტუბერკულოზის საწინააღმდეგო მკურნალობის რეჟიმის დაცვისათვის საქართველოს მოქალაქე პაციენტის ფულადი წახალისების ოდენობა და გაცემის წესი“ დაამტკიცა. ფულადი წახალისების გაცემა განხორციელდება  უნაღდო ანგარიშსწორებით, პირად საბანკო ანგარიშზე [18 წლამდე ასაკის პირის შემთხვევაში, კანონიერი წარმომადგენლის ანგარიშზე] ჩარიცხვის გზით, რეგულარული ფორმის ტუბერკულოზის დიაგნოზის მქონე და  რეზისტენტული ფორმის ტუბერკულოზის დიაგნოზის მქონე პაციენტებისათვის. მთავრობის დადგენილება ძალაში 2017 წლის პირველი იანვრიდან შევა.

ფულადი წახალისება გაიცემა ორ ეტაპად

პირველ ეტაპზე თანხა გაიცემა იმ პაციენტებზე, რომლებიც მკურნალობის ინტენსიური ფაზის [დიაგნოზის დადგენისა და მკურნალობაში ჩართვიდან არანაკლებ 60 კალენდარული დღე] დასრულებიდან ამბულატორიულ მკურნალობაზე ყოფნის პირველი 28 კალენდარული დღის განმავლობაში გამოიჩენენ სრულ დამყოლობას მკურნალობისადმი;

მე-2 ეტაპზე თანხა გაიცემა  იმ პაციენტებზე, რომლებსაც მკურნალობის პირველი ეტაპის დასრულებიდან მკურნალობის სრული კურსის დასრულებამდე არ ექნებათ გაცდენილი ხუთ კალენდარულ დღეზე მეტი [მათ შორის, გაცდენები არ უნდა იყოს მიყოლებით 5 დღე];

იმ შემთხვევაში, თუ პაციენტი ინტენსიური ფაზის დასრულებიდან პირველი 28 დღის განმავლობაში მკურნალობას გადის ჰოსპიტალში, მასზე პირველი ეტაპის დაფინანსება არ გაიცემა.

რეზისტენტული ფორმის ტუბერკულოზის დიაგნოზის მქონე პაციენტებისათვის ფულადი წახალისება გაიცემა თვეში ერთხელ,  ამბულატორიულ მკურნალობაზე ყოფნის პერიოდში სრული დამყოლი კვირისათვის.

პაციენტის ფულადი წახალისების ოდენობა

ფულადი წახალისება, მკურნალობის ერთ ციკლზე, რეგულარული ტუბერკულოზით დაავადებულ პაციენტს მიეცემა არაუმეტეს 6 თვის განმავლობაში, ხოლო რეზისტენტული ტუბერკულოზით დაავადებულ პაციენტს – არაუმეტეს 20 თვის განმავლობაში.  რეგულარული ფორმის ტუბერკულოზის ნაცვლად, რეზისტენტული ფორმის ტუბერკულოზის მკურნალობის რეჟიმზე პაციენტის გადაყვანა განიხილება როგორც მკურნალობის ახალი ციკლი და ფინანსდება ამ წესის შესაბამისად.

ფულადი წახალისების ოდენობა, მედიკამენტების რეგულარულად მიღებისათვის, რეგულარული ფორმის ტუბერკულოზით დაავადებული პაციენტებისათვის შეადგენს პირველი ეტაპის სრულად შესრულებისათვის 60 ლარს [ხელზე ასაღებ თანხას], ხოლო მე-2 ეტაპის სრულად შესრულებისათვის, მიუხედავად მკურნალობის გამოსავლისა – 100 ლარს [ხელზე ასაღებ თანხას]. რეზისტენტული პაციენტებისათვის ფულადი წახალისების რაოდენობა შეადგენს 100 ლარს [ხელზე ასაღებ თანხას] თვეში.

მთავრობის დადგენილების მიხედვით, ფულადი წახალისების ანაზღაურების საფუძველს წარმოადგენს ტუბერკულოზის ამბულატორიული მკურნალობის მიმწოდებელებისგან  წარდგენილი მკურნალობის მონიტორინგის მონაცემები და ტუბერკულოზით დაავადებული  პაციენტის ან 18 წლამდე ასაკის პაციენტის შემთხვევაში, მისი კანონიერი წარმომადგენლის ხელმოწერით დადასტურებული თანხმობა ფულადი წახალისების სქემაში მონაწილეობაზე;

ფულადი წახალისების ანგარიშგება/ანაზღაურების მექანიზმები, ანგარიშგებისათვის აუცილებელი ფორმები და მათი შევსების წესი განისაზღვრება სსიპ – ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის  მიერ, საქართველოს შრომის, ჯანმრთელობისა და სოციალური დაცვის სამინისტროსთან შეთანხმებით;

პაციენტი ან მისი კანონიერი წარმომადგენელი, ზემოაღნიშნულ ფულად წახალისებას მიიღებს სოციალური დახმარების სახით, დაფინანსების წყაროს მიუხედავად.

„მსოფლიოში ყოველწლიურად 9 მილიონი ადამიანი ავადდება ტუბერკულოზით და 1,5 მილიონზე მეტი იღუპება“

ექსპერტიზის დასკვნა ხელვაჩაურში ქალის მკვლელობის საქმეზე

ექსპერტიზის დასკვნის მიხედვით, პირი, ვისაც ხელვაჩაურში, ერთ-ერთ სუპერმარკეტში 39 წლის ქალის მკვლელობა ედება ბრალად, შეურაცხადია. სასამართლოს მორიგ სხდომაზე პროკურორმა რამაზ შავაძემ ეს მტკიცებულება სადავოდ მიიჩნია და იმ სამი ექსპერტის დაკითხვა მოითხოვა, რომლებიც დასკვნას ხელს აწერენ. ამავე დასკვნის მიხედვით, ბრალდებული დანაშაულის ჩადენის დროს ჯანმრთელი იყო.

თუკი ექსპერტიზის დასკვნა უდავოდ იქნება მიჩნეული, სასჯელს მ.მ. სამედიცინო-ფსიქიატრიულ დაწესებულებაში მოიხდის გამოჯანმრთელებამდე. მ.მ.-ს 109-ე მუხლის დარღვევას ედავებიან, რაც გულისხმობს განზრახ მკვლელობას დამამძიმებელ გარემოებაში. ბრალის დამტკიცების შემთხვევაში, მას 20 წლამდე პატიმრობა ან უვადოდ თავისუფლების აღკვეთა ემუქრება.
„ბრალდებულის დასწრება სასამართლო პროცესზე მიზანშეწონილი არ არის“, – მოსამართლის ვიოლეტა ფორჩხიძის ამ გადაწყვეტილების შემდეგ, ბრალდებული მ.მ. სასამართლო დარბაზიდან გაიყვანეს. მანამდე ბრალდებული სასამართლო დარბაზის გისოსებში ბადრაგთან ერთად იყო და სკამზე თავის შეკავებას ძლივს ახერხებდა.

ამავე სხდომაზე, დაცვის მხარის ადვოკატმა შუამდგომლობა დასვა: „ხომ არ გვემსჯელა იმაზე, რომ ბრალდებული ახლაც სამედიცინო დაწესებულებაში განთავსდეს“. მოთხოვნას პროკურორი არ დაეთანხმა. რამაზ შავაძის აზრით, მიუღებელია დადგენილ ფაქტად იმის მიჩნევა, რომ ბრალდებული ფსიქიკურად დაავადებულია. შუამდგომლობას არც მოსამართლე დაეთანხმა. „ამის საჭიროებას თავად სასჯელაღსრულების სამინისტრო განსაზღვრავს“, – თქვა ვიოლეტა ფორჩხიძემ.

მკვლელობა ხელვაჩაურის გზატკეცილზე გასული წლის 2 სექტემბერს მოხდა. საქმის მასალების მიხედვით, ბრალდებულმა ქალს მრავლობითი ჭრილობები იმიტომ მიაყენა, რომ ორი ბოთლი ლუდის ნისიად გაცემაზე მიიღო უარი. სასამართლომ უკვე დაკითხა მოწმის სახით ა.კ, რომელიც ამავე ბრალდებულმა დანით დაჭრა, როცა ის მკვლელობის დროს სუპერმარკეტში აღმოჩნდა. ის ამ საქმის ერთადერთი თვითმხილველი იყო. მოკლულს სამი ჭრილობა მარტო გულის არეში, რვა კი კისერში ჰქონდა მიყენებული.

მოკლულ ქალს 300 დოლარის ღირებულების ოქროს ყელსაბამი მოგლიჯა ბრალდებულმა და სახლში წავიდა. ადგილზე გამოძახებულ სასწრაფო-სამედიცინო დახმარების სამსახურს ქალი უკვე გარდაცვლილი დახვდა.

47852

ახალი პოლიტიკური ბალანსი ბათუმის საკრებულოში

მას შემდეგ, რაც „რესპუბლიკელებმა“ მომავალ საპარლამენტო არჩევნებში კოალიციისგან დამოუკიდებლად მონაწილეობის გადაწყვეტილებაზე განაცხადეს, ბათუმის საკრებულოში ოპოზიციურ ფრაქციებს იმედი მიეცათ, რომ მათი ოცნებაც შეიძლება ახდეს. ისინი ვარაუდობენ, რომ კონკრეტულ საკითხებზე კენჭიყრისას შესაძლოა დაფიქსირდეს კონფიგურაცია: 14 ხმა („რესპუბლიკელების“ ჩათვლით) 11 ხმის წინააღმდეგ – ზუსტად ამდენი წევრი ჰყავს სახელისუფლებო გუნდს საკრებულოში.

მივდივართ, მაგრამ ვრჩებით, – დაახლოებით ასეთი იყო „რესპუბლიკელების“ პათოსი მას შემდეგ, რაც მათ მომავალ საპარლამენტო არჩევნებში კოალიციის გარეშე მონაწილეობაზე განაცხადეს. პერემიერ გიორგი კვირიკაშვილთან შეხვედრის შემდეგ კი პარლამენტის თავმჯდომარემ და „რესპუბლიკელების“ ერთ-ერთმა ლიდერმა დავით უსუფაშვილმა განმარტა, რომ პარტია აცნობიერებს ამორჩეველთან პასუხისმგებლობას, რის გამოც ის არჩევნებამდე კოალიციურ რეჟიმში გააგრძელებს მუშაობას; რესპუბლიკელი მინისტრები, სხვა რესპუბლიკელ თანამდებობის პირებთან ერთად, პოსტებზე დარჩებიან: „არჩევნებამდე ერთად მივალთ“. დავით უსუფაშვილმა ისიც დასძინა, რომ „ქართული ოცნება“ და „რესპუბლიკელები“ „კოალიციურ და კონკურენტულ“ გარემოში გააგრძელებენ მუშაობას.

ძალების მსგავსი გადანაწილების შემდეგ, „ქართული ოცნების“ უმრავლესობა, თვითმმართველობების საკრებულოებშიც შესაძლოა უმცირესობაში აღმოჩნდეს. ასეა ბათუმის საკრებულოშიც, სადაც გადაწყვეტილებებს ამ დრომდე კოალიცია „ქართული ოცნება“ იღებდა: 25-წევრიან საკრებულოში პარტია „ქართულ ოცნებას“ 11 წევრი ჰყავს, მათგან ორი „კონსერვატორი“. გასულ კვირამდე კოალიციის რიგებში სამი „რესპუბლიკელიც“ იყო.

აქამდე სამი ოპოზიციური ფრაქციის წევრებს ბათუმის საკრებულოში (ფრაქციების სულ ცხრა წევრი და ორი დამოუკიდებელი წევრი ჰყავდთ „პატრიოტთა ალიანსიდან“) გადაწყვეტილების მიღების შანსი არ ჰქონდათ. ახლა იმედი გაუჩნდათ, რომ შესაძლოა ეს რეალობა შეიცვალოს.

`ბევრი გადაწყვეტილება იყო ბათუმის საკრებულოში, რასაც რესპუბლიკელები არ ეთანხმებოდნენ, ეს გადაწყვეტილებები მათთვის პრინციპულად მიუღებელი იყო, თუმცა კოალიციის რეჟიმიდან გამომდინარე უწევდათ კენჭისყრაში მონაწილეობა და ქართული ოცნების პოზიციის მხარდაჭერა. ახლა ისინი კოალიციის რეჟიმში რჩებიან, თუმცა მათთვის პრიორიტეტი იქნება პარტიული გადაწყვეტილებები. ფრაქცია რესპუბლიკელები ბათუმის საკრებულოში პარტიული პრინციპების მომხრედ დარჩებიან და აღარ დაუჭერენ მხარს მათთვის მიუღებელ პოზიციას კოალიციის შენარჩუნების გამო. ეს მათ აღარ დასჭირდებათ. რაც შეეხება ძალთა გადანაწილებას, დღეს საკრებულოში „ქართულმა ოცნებამ” უმრავლესობა დაკარგა. შესაბამისად, ყველა გადაწყვეტილება, რომელიც დადგება დღის წესრიგში, იქნება მხარდაჭერილი ფრაქციებს შორის პრინციპული შეთანხმების შემთხვევაში, რადგან ეს იქნება 14 ხმა – 11 ხმის წინააღმდეგ“, – ამბობს კობა ჩხეიძე, ბათუმის საკრებულოში „თავისუფალი დემოკრატების“ ფრაქციის თავმჯდომარე.

კოლეგის მსგავსად ახალ პოლიტიკურ რეალობას იმედიანად ვერ ხვდებიან საკრებულოს სხვა ოპოზიციურ ფრაქციაში. „ნაციონალური მოძრაობის“ ფრაქციის თავმჯდომარე გიორგი კირთაძე ეჭვობს, რომ პრინციპული გადაწყვეტილების მიღებისას „ქართული ოცნება“ დამატებით ორ ხმას „პატრიოტთა ალიანსის“ ორი წევრისგან მიიღებს. ამ შემთხვევაში „ქართული ოცნების“ 11 ხმას კიდევ ორი ხმა დაემატება და ოპოზიციას ერთი ხმით მოუგებს.

როგორია მათი ხედვა ახალ პოლიტიკურ რეალობაში? – ამ კითხვაზე „პატრიოტთა ალიანსის“ წევრების პოზიცია უცნობია, მათთან დაკავშირება „ბათუმელებმა“ ვერ მოახერხა.

ფრაქცია ქართულ ოცნებაში ორი კონსერვატორია – დიმა დარჩია და თემურ ორაგველიძე. პრემიერმა გიორგი კვირიკაშვილმა, რომელიც, ჯერჯერობით, არ აურჩევიათ ამ პარტიის თავმჯდომარედ, განაცხადა, რომ „ქართული ოცნება“ მომავალ არჩევნებზე დამოუკიდებლად გავა. შესაბამისად, კოალიციაში ჯერ კიდევ შემავალ „კონსერვატორებსა“ და „მრეწველებს“ მოუწევთ თავად გადაწყვიტონ, როგორ მოიქცევიან მომავალში.

„როდესაც ხარ პარტია, უნდა იცოდე, რომ კოალიცია შესაძლებელია ნებისმიერ დროს დაიშალოს. ყველამ მისი გადაწყვეტილება მიიღო და ამაში ცუდი არაფერია. რაც შეეხება ახალ ბალანსს საკრებულოში, მინდა გითხრათ, რომ რესპუბლიკურ პარტიას არ უთქვამს, რომ ოპოზიციაში მიდის, ფაქტია ისიც, რომ რაღაც საკითხებზე მათ ან დაუჭერიათ მხარი, ან არა… შესაძლებელია ეს გაგრძელდეს, ისევ დაუჭირონ მხარი ან არ დაუჭირონ. ჩვენ, კონსერვატორები, ჯერჯერობით, ფრაქცია „ქართულ ოცნებაში“ ვრჩებით“ – ამბობს დიმა დარჩია.

საკრებულოში კიდევ ერთი ფრაქციაა, რომელსაც ნინო ბურჯანაძის პარტიის წევრი გიორგი ცინცქილაძე ხელმძღვანელობს. მას ვერ დავუკავშირდით. ამ ფრაქციის წევრი გიორგი კაკაბაძე კი „ბათუმელებთან“ აცხადებს, რომ პოლიტიკური ვაჭრობა მათ ფრაქციასა და „ქართულ ოცნებას“ შორის ვერ შედგება და „ქართულ ოცნებას“ მათი იმედი ვერასდროს ექნება“.

სინამდვილეში რას შეცვლიან რესპუბლიკელები, უახლოეს სხდომაზე გამოჩნდება. პირველი პრინციპული საკითხი, რომლის კენჭისყრის ეტაპზე ადეკვატურ რეაქციას „კოალიციური დისციპლინისგან“ გათავისუფლებული „რესპუბლიკელებისგან“ ოპოზიცია ელის, 2015 წლის ბიუჯეტის ანგარიშია. „არა მგონია, მისი შესრულებით ვინმე აღფრთოვანებული იყოს, მათ შორის რესპუბლიკელები“, – ამბობს კობა ჩხეიძე.

„რა თქმა უნდა, ვექვემდებარებოდით კოალიციურ პრინციპებს, თუმცა საკრებულოში უფრო პრინციპულები ვიყავით“, – ასეთია საკრებულოს წევრის, ზაურ ახვლედიანის პასუხი, რომელიც ამ პარტიის რეგიონული ორგანიზაციის ხელმძღვანელია.

შეხვედრა არასამთავრობოებთან კულტურული მემკვიდრეობის დაცვის სააგენტოში

აჭარის კულტურული მემკვიდრეობის დაცვის სააგენტოს ხელმძღვანელი მირანდა ჩარკვიანი 5 აპრილს არასამთავრობო ორგანიზაციებს შეხვდა. სააგენტოს ხელმძღვანელმა არასამთავრობოებს საბჭოს დაკომპლექტების ახალი წესის პროექტი [სამუშაო დოკუმენტი] გააცნო.

სააგენტოს ხელმძღვანელის ინფორმაციით, განიხილება თვითმმართველობების თითო, არქიტექტურული საბჭოს ორი და ფინანსთა და ეკონომიკის სამინისტროს ერთი წევრის ძეგლთა დაცვის საბჭოში შეყვანის საკითხი. სააგენტო მუშაობს ასევე კრიტერიუმების დადგენაზე, რომლის მიხედვითაც საბჭოს დააკომპლექტებენ.

არასამთავრობო ორგანიზაციები ფინანსთა და ეკონომიკის სამინისტროს წარმომადგენლის საბჭოში შეყვანის წინააღმდეგი არიან. მათი თქმით, სამინისტროს კულტურული მემკვიდრეობის გამოყენება სურს ინვესტიციის მოსაზიდად და ის ძეგლების დაცვის მიმართულებით ვერ იმუშავებს.

შეხვედრაზე რამდენჯერმე ახსენეს მოქმედი საბჭოს წევრი შოთა გუჯაბიძე. არასამთავრობო ორგანიზაციების წარმომადგენლებს აქვთ ეჭვი, რომ ცვლილებები მისი საბჭოდან გაშვების ინტერესებს უკავშირდება.
„ზუსტად ვიცოდი, რომ როგორც კი ამ თემაზე ხმას ამოივიღებდი, ეს მიებმებოდა კონკრეტულ პერსონალებს. ეს მიებმებოდა რაღაც სუბიექტურ მოტივაციებს… ჩემთვის ბევრად უფრო კომფორტული იქნებოდა საერთოდ არ დამეწყო ამაზე ლაპარაკი, მეთქვა არ არსებობს კონპლექტაციის წესი. არაუშავს, იყოს როგორც არი. ამ თემამ, რეალურად, პირველ რიგში დამარტყა მე. მიუხედავად ამისა, ვიღებ პასუხისმგებლობას, რომ ამ თემაზე უნდა ვიმუშაო.“ – აღნიშნა შეხვედრაზე მირანდა ჩარკვიანმა.

არასამთავრობო ორგანიზაციების წარმომადგენლების თქმით, ცვლილებების პროექტზე შეფასებებს მას შემდეგ გააკეთებენ, რაც დოკუმენტს გაეცნობიან.

ქობულეთის მუსლიმთა პანსიონის საქმე

„თურქი ხარ, თათრის შვილიო. ამოვიღე პასპორტი და ვაჩვენე, წერია თუ არა აქ, რომ ქართველი ვარ-მეთქი. არაო, მასე საქართველოს პასპორტი ბევრს აქვსო“, – თქვა მოწმე დავით ცეცხლაძემ, რომელიც მუსლიმთა თემის წარმომადგენელია და იქვე, სასამართლო დარბაზში მყოფ პირებზეც მიუთითა სასამართლოს – ესენი გვავიწროვებდნენო. მოწმე დღევანდელ სხდომაზე დეტალურად მოუყვა მოსამართლე ხათუნა ბოლქვაძეს 2014 წლის სექტემბრის დღეებზე, როცა დაპირისპირების შემდეგ მუსლიმთა პანსიონზე ღორის თავი მიაჭედეს.

„პანსიონთან ბარიკადები მოაწყვეს, საბურავები და რაღაც სამშენებლო მასალები იყო. მორიგეობაც დააწესეს: დღისით ქალები მორიგეობდნენ, ღამე – კაცები. პირობა ასეთი იყო, სამი კაცის მეტი შენობაში არ უნდა გაჩერებულიყო. მათი თქმით, ბავშვები არ უნდა შეგვეპარებია შენობაში, ვისთვისაც ეს პანსიონი გაკეთდა. შენობიდან მარტო მე გამოვდიოდი, რომ საკვები მიმეტანა დანარჩენებისთვის. ერთ საღამოს, როცა კარები გამოვიხურე, ვიღაც უკან გამომყვა. მაღაზიაში რომ შევედი, მხარზე ხელი დამკრა და მითხრა, „თქვენ, თურქებს, აქ საერთოდ არაფრის ყიდვის უფლება არ გაქვთო“. არაფერი მიპასუხია, მოვერიდე სიტუაციის გართულებას. მეორე მაღაზიაში ვიყიდე საჭმელი და ის კაცი ისევ მიმყვა პანსიონთან, „თქვენ აქ სამზე მეტნი ხართო“. ვუთხარი, შემოდი და ნახეთ-მეთქი. როცა დარწმუნდა, რომ მართლა სამი ვიყავით, გავიდა“.

მოწმის ჩვენების მიხედვით, პოლიცია ამ პროცესს შორიდან ადევნებდა თვალს, მათ შორის, ბარიკადების მოწყობას და მორიგეობასაც. „პოლიცია ყოველთვის იყო, მაგრამ მოშორებით იდგნენ, ახლოს არასდროს მოსულან. ვინც მორიგეობდა და ჩვენ გვაკონტროლებდა, იმათ ელაპარაკებოდნენ პოლიციელები, მათთან ერთად ჭამდნენ, ხან ლუდს სვამდნენ. პოლიცია არც მაშინ მოსულა, როცა ხელით მიბიძგეს და თათარი ხარო, მეძახდნენ“, – ამბობს დავით ცეცხლაძე.

მოწმის ამ ნაწილს შინაგან საქმეთა სამინისტროს ინტერესების დამცველი გამოეხმაურა: „თქვენ აღნიშნეთ, რომ პოლიცია მოშორებით იყო, თან იმდენად, რომ თქვენ ვერ გაარჩიეთ, რამდენი პოლიციელი იმყოფებოდა. იქნებოდა პოლიციისთვის ასეთი მანძილიდან აღსაქმელი დაპირისპირება?“  შეკითხვას დავით ცეცხლაძემ  კითხვითვე უპასუხა: „რისთვის იყო აბა პოლიცია იქ?“

ამ საქმეზე „ქართველ მუსლიმთა ერთობა“ ქობულეთში მცხოვრები სამი ფიზიკური პირის გარდა, შინაგან საქმეთა სამინისტროსაც ედავება. სარჩელის მოთხოვნა დისკრიმინაციული ქმედების აღმოფხვრა და მორალური ზიანის ანაზღაურებაა. მუსლიმი მოსწავლეების პანსიონის ინტერესებს სასამართლოში „ადამიანის უფლებების სწავლებისა და მონიტორინგის ცენტრი“ იცავს.

დღევანდელ სხდომაზე მოწმემ ასევე თქვა, რომ ისინი დღმდე ვერ ახერხებენ პანსიონის ამოქმედებას და დაპირისპირებას ერიდებიან: „2014 წლის 15 სექტემბერს უნდა გახსნილიყო ეს პანსიონი. ქობულეთში კიდევ არის ერთი პანსიონი, რომელიც 10 ბავშვზეა გათვლილი და იქ 30 მოსწავლე რჩება. ეს პანსიონი რომ ამოქმედებულიყო, 50 სკოლის მოსწავლის მიღებას მოვახერხებდით. სიტუაცია მაშინ დაიძაბა, როცა გაიგეს, რომ ჩვენ პანსიონს ბავშვების მისაღებად ვამზადებდით. მაშინვე გვითხრეს, სისხლს დავღვრით და აქ პანსიონს ვერ გახსნითო“.

საქმის განხილვა ივნისამდე იმ მიზეზით გადაიდო, რომ მოპასუხე მხარეებს შორის ერთ-ერთმა, შინაგან საქმეთა სამინისტროს წარმომადგენელმა მოუცლელობა მოიმიზეზა. მორიგ სხდომაზე სასამართლოს ჩვენება ქობულეთის მუნიციპალიტეტის გამგებელმა სულხან ევგენიძემ უნდა მისცეს, რომელიც დღეს ასევე მოუცლელობის მიზეზით ვერ გამოცხადდა.

რა დარღვევები დააფიქსირა შიდა აუდიტმა „აჭარის ტელევიზიაში“

ტენდერის გამოცხადება სამართლებრივი საფუძვლის გარეშე; ტენდერის მოგება გამოცდილების დამადასტურებელი დოკუმენტის წარდგენის გარეშე, როცა ეს აუცილებელი მოთხოვნაა; ხელშეკრულების გაფორმება ტენდერში გამარჯვებულ კომპანიასთან გარანტიის წარმოდგენის გარეშე – ეს და სხვა დარღვევები სსიპ „საზოგადოებრივი მაუწყებლის აჭარის ტელევიზია და რადიოს“ შიდა აუდიტორულ ანგარიშშია დაფიქსირებული. ანგარიში 2015 წელს სრულად ასახავს. ტენდერები სხვადასხვა სატელევიზიო ტექნიკის, ასევე გადაცემის შესყიდვას შეეხება.

„ყველა იმ სამსახურზე, ვინც იყო ჩართული ტენდერის პროცედურებში, მიცემული მაქვს ერთთვიანი ვადა. ამ დროში მათ უნდა წარმოადგინონ განმარტებები იმ დარღვევებზე, რაც აუდიტმა დააფიქსირა“ – უთხრა „ბათუმელებს“ სოსო სტურუამ, „აჭარის ტელევიზიის“ დირექტორმა. ის ერთ-ერთია პასუხისმგებელ პირებს შორის, ვინც სატენდერო დოკუმენტაციას ხელს აწერს. მისი თქმით, დარღვევებზე რეაგირებას შემსრულებელი სამსახურების კონკრეტული პასუხები განსაზღვრავს.

სოსო სტურუას განმარტებები არ მოუთხოვია მარკეტინგის სამსახურისთვის იმის მიუხედავად, რომ აუდიტის დასკვნაში ხაზგასმულია ამ სამსახურის არაეფექტური მუშაობის შესახებ.

„ამ ნაწილში ვერ დავეთანხმები აუდიტს, რომ თითქოს გასულ წელს რეკლამისთვის არ ვიმუშავეთ და ამ კუთხით არც ერთი ხელშეკრულება გაფორმდა. საქმე ისაა, რომ აჭარის ტელევიზია რეკლამებში შეზღუდულია და რის საშუალებაც გვაქვს, იმაზე ფასდაკლებებია დაწესებული. ნებისმიერ საშუამავლო კომპანიას არავინ ზღუდავს ამ სისტემით ისარგებლოს და მოიტანოს რეკლამა,“ – აცხადებს სოსო სტურუა.

„აჭარის ტელევიზიის“ შიდა აუდიტმა დააფიქსირა ისიც, რომ კადრების სტაბილურობისთვის ტელევიზიაში შესაბამისი გარემო არ არის, რადგან არ არის განსაზღვრული თანამშრომელთან ხელშეკრულების შეწყვეტის კონკრეტული პირობა.

„მრჩეველთა საბჭოს მიერ ზემოხსენებული უფლების რეალიზება მნიშვნელოვანია იმდენად, რამდენადაც დასაქმებულთან შრომითი ხელშეკრულების მოშლისათვის კანონისმიერი საფუძვლის გამოყენება მართლზომიერი უნდა იყოს და ამასთან, ნაკარნახევი უნდა იყოს ობიექტური აუცილებლობით, რაც თავის მხრივ, დაკავშირებულია დაწესებულების განვითარების ერთ-ერთ მნიშვნელოვან ფაქტორთან – კადრების სტაბილურობასთან,“ – წერია აუდიტის დასკვნაში.

ხელშეკრულების პირობებზე ტელევიზიის მრჩეველთა საბჭოს უნდა ემუშავა. საბჭოს თავმჯდომარის მოადგილე, ნატა იმედაიშვილი „ბათუმელებთან“ ამბობს, რომ მენეჯმენტს უკვე მიაწოდეს  ზოგადი ჩარჩო და ძირითადი მოთხოვნები, ხოლო საბოლოო ფორმა საბჭოსთან შესათანხმებლად ჯერ არ შესულა: „ჯერ კიდევ 2014 წელს დამტკიცდა ტიპიური ფორმის ხელშეკრულება, მაგრამ პრაქტიკაში დავინახეთ, რომ დასაქმებულთა მოთხოვნებს ის ვერ პასუხობდა. გასულ წელს, დიდი მოლაპარაკებების შედეგად შევიმუშავეთ ზოგადი პრინციპები, რასაც კონკრეტული სახე მენეჯმენტმა უნდა მისცეს და შეგვითანხმოს“ .

აუდიტის დასკვნაში, მრჩეველთა საბჭოს ნაწილში, კიდევ ერთ ხარვეზზეა საუბარი -აჭარის რადიოს პროგრამული პრიორიტეტები განსაზღვრული ისევ არ არის: „მოსახლეობასთან შეხვედრებიც გვქონდა ამ კუთხით, მაგრამ რადიო ჯერ ტექნიკურად არ არის მზად იმისთვის, რასაც საზოგადოება მოითხოვს. შესაბამისად, უფრო დიდი ხარვეზი იქნებოდა, რომ დაგვედო პრიორიტეტები, რომლებიც ვერ განხორციელდებოდა,“ – ამბობს ნატა იმედაიშვილი.

რაც შეეხება დასკვნაში დაფიქსირებულ სხვა დარღვევებს, იმავე ტენდერების კუთხით, ნატა იმედაიშვილი 22 აპრილს ელოდება, როცა ტელევიზიის სამსახურებმა დარღვევებზე პასუხი უნდა წარმოადგინოს: „რეაგირება სიმწვავეზე იქნება დამოკიდებული. ჩემი აზრით, ზოგიერთ ნაწილში არის დაფიქსირებული მნიშვნელოვანი დარღვევები. ჯერჯერობით, შეფასებებს ვერ გავაკეთებ.“

ნატა იმედაიშვილი არ ფიქრობს, რომ შიდა აუდიტის კრიტიკული დასკვნა ვინმეს ინტერესს შეიძლება ემსახურებოდეს: „ეს დამოკიდებულია პროცესზე. 2014 წელს ჩვენ გარე აუდიტი მოვიწვიეთ, მათ მიერ მომზადებული დასკვნა დადებითი იყო“.

შიდა აუდიტის სამსახური „აჭარის ტელევიზიაში“ მიმდინარე წლის პირველ თებერვალს შეიქმნა. მანამდე ამ კუთხით ტელევიზიაში მხოლოდ ერთი აუდიტორი მუშაობდა. აუდიტის სამსახურის უფროსი ზვიად ბერიძეა, რომელმაც გვითხრა, რომ მას კომენტარის გაკეთების უფლება არ აქვს.

2015 წელს „საზოგადოებრივი მაუწყებლის აჭარის ტელევიზია და რადიოს“ ბიუჯეტი 6 მილიონ 473 ათასი ლარი იყო.

ლატვიური ქორეოგრაფიული ანსამბლი ქედაში

ქედის კულტურის ცენტრთან არსებულმა ანსამბლებმა: „ელესამ“, „ბეთლემმა“, „იაგუნდმა“, „ფესვებმა“ და ლატვიაში, ქალაქ დაუგავპილსში მოქმედმა ქორეოგრაფიულმა ანსამბლმა „ამიზიერისმა“ ქედაში ერთობლივი კონცერტი გამართეს. ღონისძიებაზე, რომელიც ქედის კულტურის ცენტრში გაიმართა, წარმოდგენილი იყო ქართული და ლატვიური ფოლკლორული ცეკვები და სიმღერები.

კონცერტის დასასრულს „ელესამ“ და ლატვიურმა ანსამბლმა ქართული სიმღერა „ჩაღმა ჩაყრილო ვენახო“ შეასრულა; ღონისძიება „ბეთლემისა“ და „ამიზიერისის“ ცეკვით დასრულდა.

„პირველად ვიმყოფები საქართველოში. ძალიან კარგი კონცერტი გამოგვივიდა ერთობლივად. ჩემთვის ეს დიდი გამოცდილებაა, მოვიხიბლე მაყურებლით, გარემოთი, ვფიქრობ აუცილებლად ჩამოვალ კიდევ საქართველოში,“ – ამბობს ანსამბლ „ამიზიერისის“ მოცეკვავე ლინდ გრანდი.

„კულტურული ღონისძიებები ქვეყნებსა და თაობებს შორის მეგობრობის საფუძველია… ხუთი წლის წინ დაწყებული მეგობრობა ბათუმსა და დავუგავპილსს შორის აჭარის მთიანეთზეც გავრცელდა – გასულ წელს ჩვენი ანსამბლი „ელესა“ იმყოფებოდა დავუგავპილსში და ხუთი დღის განმავლობაში მართავდა კონცერტებს. წელს კი ლატვიელი მეგობრები ჩამოვიდნენ,“ – ამბობს ქედის გამგებელი დავით დუმბაძე.

12901056_993017370793969_8290575816767880718_oლატვიაში გამართულ საერთაშორისო ფესტივალში 20 ქვეყანას შორის საქართველოს სწორედ ქედის „ელესა“ ბენდთან ერთად წარმოადგენდა.

„ანსამბლისთვის ძალიან მნიშვნელოვანია გასტროლები სხვა ქვეყნებში, კვალიფიკაციას იმაღლებ, გამოცდილებას იღებ, ეს კი ერთგვარად აისახება შედეგზე,“ – ამბობს „ელესას“ წევრი ნოდარ გორგილაძე.

ქედაში ტურნეთი მყოფ ლატვიურ ანსამბლს ქედის გამგებელმა ადგილობრივი თვითმმართველობის გერბი გადასცა საჩუქრად.

ლატვიური ანსამბლი ქედაში
ლატვიური ანსამბლი ქედაში

 

ბათუმის „დედათა და ბავშვთა ცენტრიდან“ 30 თანამშრომელი გაათავისუფლეს

სამედიცინო კორპორაცია „ევექსის“ საზოგადოებასთან ურთიერთობის ხელმძღვანელი გიორგი ნიორაძე „ბათუმელებთან“ საუბარში აცხადებს, რომ ბათუმში, „დედათა და ბავშვთა ჯანმრთელობის დაცვის რესპუბლიკურ ცენტრში“ თანამშრომლების შემცირება რეორგანიზაციის საფუძველზე მოხდა. მისი განცხადებით, შემცირება შეეხო როგორც სამედიცინო, ასევე არასამედიცინო პერსონალს.

„ამ კონკრეტულ დაწესებულებაში 30 ადამიანს შეეხო რეორგანიზაციის პროცესი. კორპორაციის მხრიდან ყველა მათგანთან იყო დროული კომუნიკაცია და ყველა იურიდიული მხარე იყო დაცული“.

გიორგი ნიორაძის თქმით, კადრების განახლება საზოგადოების დაკვეთაა, „რადგან მას უფრო კვალიფიციური კადრები სჭირდება. კორპორაციაც დაინტერესებულია იმით, რომ კვალიფიციური კადრები ჰყავდეს. კერძო სექტორი თვითონ არეგულირებს კადრების საჭიროებებს“.

გიორგი ნიორაძის თქმით, კორპორაცია „ევექსმა“ 2015 წელს მთლიან ქსელში 1900 ახალი თანამშრომელი აიყვანა, მიმდინარე წელს კი 400 ახალი თანამშრომელი: „აქედან,70 ახალი სამუშაო ადგილი აჭარაში შევქმენით“.

16 წლის ქეთას ოპერაციას გაუკეთებენ

16 წლის ქეთას ბათუმის საზღვაო ჰოსპიტალში მას შემდეგ მკურნალობენ, რაც გაზეთ „ბათუმელებში“ მისი მძიმე დამწვრობის შესახებ გამოქვეყნდა სტატია38403. ქეთა მაშინ საზოგადიოებას დახმარების თხოვნით მიმართავდა.

7 წლის ასაკში ქეთამ სამზარეულოში დაგროვილი ბუნებრივი აირის აფეთქების შედეგად მძიმე ხარისხის დამწვრობა მიიღო.

კლინიკის სპეციალისტების ინფორმაციით, გასული წლის აპრილიდან საზღვაო ჰოსპიტალისა და კუზანოვის კლინიკის ერთობლივი ინიციატივით ქეთას ნაწიბურის საწინააღმდეგო გამწოვი თერაპიის სამკურნალო კურსი დაენიშნა. ეს ერთი წლის განმავლობაში გრძელდებოდა. პროცესს ჰოსპიტლის პლასტიკური ქირურგი ქეთი ფირცხალაშვილი აკვირდებოდა.

სპეციალისტების თქმით, სამკურნალო პროცესმა დადებითი დინამიკა აჩვენა. ამჟამად კი იგეგმება ოპერაცია დარჩენილი მქაჩავი ნაწიბურების კორექციისთვის. ოპერაციას პროფესორი ივა კუზანოვი ჩაატარებს. ამის შესახებ ინფორმაცია „ბათუმელებს“ კლინიკის დირექტორმა თამარ ქაჩლიშვილმა დაუდასტურა.
ქეთა ხულოს მუნიციპალიტეტის სოფელ დიდაჭარაში ცხოვრობს.

ხულოში სტიქიის დროს დაღუპულთა ხსოვნა და სუფრა სტუმრებისთვის

18-19 აპრილს ხულოს მუნიციპალიტეტის ტერიტორიაზე სტიქიური უბედურების დროს დაღუპულთა ხსოვნისადმი მიძღვნილი ღონისძიებებისა და ასევე, 13-15 მაისს ქ. ბათუმში მე-9 საერთაშორისო ტურისტული გამოფენის „exspo-batumi 2016“-ის ღონისძიების ორგანიზების მომსახურებაში ხულოს მუნიციპალიტეტი ჯამში 4 ათას 18 ლარის დახარჯვას გეგმავს.

აქედან:

18-19 აპრილს მუნიციპალიტეტის ტერიტორიაზე სტიქიური უბედურების დროს დაღუპულთა ხსოვნისადმი მიძღვნილი ღონისძიებების ორგანიზებისთვის მაქსიმუმ 1977 ლარია განსაზღვრული:

სატენდერო დოკუმენტაციიდან
სატენდერო დოკუმენტაციიდან

2016 წლის 13-15 მაისს ქ. ბათუმში საერთაშორისო ტურისტული გამოფენა „expo-batumi 2016“-ის ღონისძიების ორგანიზებისთვის კი ხულოს მუნიციპალიტეტს 2131 ლარი აქვს გათვლილი:

სატენდერო დოკუმენტაციიდან
სატენდერო დოკუმენტაციიდან

ზემოაღნიშნულ ღონისძიებებს მუნიციპალიტეტი გამარტივებული ელექტრონული ტენდერით შეისყიდის, რომელიც მიმდინარე წლის 8 აპრილს დასრულდება.

სატენდერო პირობების თანახმად, მომსახურების მიწოდება უნდა განხორციელდეს წინასწარ განსაზღვრული ღონისძიებების თარიღების შესაბამისად. მომსახურების საჭიროებას მიმწოდებელს მუნიციპალიტეტი შეატყობინებს ერთი დღით ადრე ელფოსტის ან ტელეფონის მეშვეობით;

მომსახურების მიღება-ჩაბარებას განახორციელებს ხულოს მუნიციპალიტეტის გამგეობის განათლების, კულტურის, სპორტის, ტურიზმისა და ახალგაზრდულ საქმეთა სამსახური.

სოფელ წაბლანაში 1989 წელს განვითარებულმა მეწყერმა 23 ადამიანის სიცოცხლე იმსხვერპლა.

კატაპულტები 41 ათას ლარად გონიოს ციხისთვის

კატაპულტააჭარის კულტურული მემკვიდრეობის დაცვის სააგენტო საალყო მანქანების – კატაპულტების [სამი ცალი] დამზადებაში მაქსიმუმ 41 400 ლარს გადაიხდის. სატენდერო პირობების თანახმად, უნდა დამზადდეს არამოქმედი პატარა, დიდი და მოქმედი პატარა კატაპულტები. კატაპულტები უკვე არსებული სარეკონსტრუქციო პროექტის მიხედვით დამზადდება.

სატენდერო დოკუმენტაციიდან
სატენდერო დოკუმენტაციიდან

გონიო-აფსაროსის მუზეუმ ნაკძალში განსათავსებელი საინჟინრო [საალყო] მანქანების დამზადებისა და მონტაჟის სამუშაოების შესყიდვაზე სააგენტოს მიერ გამოცხადებულ გამარტივებულ ელექტრონულ ტენდერში წინადადებების მიღება მიმდინარე წლის 20 აპრილს დაიწყება და 25 აპრილს დასრულდება.

სატენდერო დოკუმენტაციიდან
სატენდერო დოკუმენტაციიდან

ტენდერში გამარჯვებულმა სამუშაოები ხელშეკრულების გაფორმებიდან არაუმეტეს 90 დღეში უნდა განახორციელოს.

სატენდერო დოკუმენტაციიდან
სატენდერო დოკუმენტაციიდან

ბათუმის მერიისა და ხულოს გამგეობის მაღალჩინოსნების საქმე გრძელდება

შპს „გზამშენპროექტის“ ტექნიკურმა დირექტორმა ნუგზარ ნირიმანოვმა დღეს, 4 აპრილს, სასამართლოს ჩვენება მისცა. ეს კომპანია დღემდე ბათუმში, ჟილინის არხის სარეაბილიტაციო სამუშაოების ხარისხის კონტროლს ახორციელებს. გამოძიება ამ საქმეზე მერიის საფინანსო-ეკონომიკური სამსახურის უფროსის მოადგილეს, არჩილ ვანაძეს და ხულოს გამგებლის მოადგილეს, ლაშა ბოლქვაძეს ედავება (ბოლქვაძე 2013 წელს, როცა ტენდერით გათვალისწინებული პირობები ვერ შესრულდა, ბათუმის მერიის საფინანსო სამსახურის ბუღალტრული აღრიცხვის განყოფილებას ხელმძღვანელობდა). მაღალჩინოსნებს სამსახურებრივ გულგრილობას და დაკისრებული მოვალეობის არაჯეროვნად შესრულებას ედავებიან. დავის საგანი კომპანია „ტონი და კომპანიისთვის“ ავანსად გადახდილი 1 289 972 ლარია. თანხის მიღების შემდეგ, კომპანიამ არაჯეროვნად შეასრულა სამუშაოები და მერიას მხოლოდ 254 265 ლარის ღირებულების სამუშაო ჩააბარა.

კომპანია „გზამშენპროექტის“ ტექნიკურმა დირექტორმა სასამართლოს უთხრა, რომ მისი წარმომადგენლები რეგულარულად ამოწმებდნენ მიმდინარე სამუშაოების ხარისხს. „ჩვენ თანხებთან შეხება არ გვქონია,“ -ამის გამეორება არაერთხელ მოუწია მოწმეს, თუმცა მან ასევე დაადასტურა, რომ „გზამშენპროექტი“ ავსებდა დოკუმენტაციას, რომლის საფუძველზეც მერიამ შემსრულებელ კომპანიას მორიგი ეტაპის თანხა ჩაურიცხა.

„ბოლო შესრულებიდან 10 დღის შემდეგ, თქვენ მოგვწერეთ, რომ პროექტი უნდა შეჩერებულიყო, მანამდე როგორ არ გამოჩნდა ეს? – მერიის ყოფილი მაღალჩინოსნის, ლაშა ბოლქვაძის ამ შეკითხვას მოწმემ უპასუხა, რომ ეს შეიძლება ნებისმიერ დროს გამოჩენილიყო. მოწმემ ასევე თქვა, რომ მერიის კეთილმოწყობის სამსახურსაც უნდა შეემოწმებინა შესრულებული საქმე, ვიდრე მომდევნო ეტაპის თანხას გადარიცხავდა.

ნუგზარ ნირიმანოვს დაცვის მხარის ადვოკატებმა შეახსენეს, რომ მის კომპანიას ბათუმის მერიამ იმიტომ გაუფორმა კონტრაქტი და გადაუხადა 61 ათასი ლარი, რომ ეკონტროლებინა არა მხოლოდ შესრულებული სამუშაოს ტექნიკური ხარისხი, არამედ გადახდის სერტიფიკატში დაედგინა სამუშაოს ღირებულება. „რა ღირებულების სამუშაო შესრულდება, ამის კონტროლი თქვენი ვალდებულება იყო, რაც თქვენთან გაფორმებულ ხელშეკრულებაში წერია,“ – უთხრა მოწმეს დაცვის მხარის ადვოკატმა მირდატ ქამადაძემ.

ბათუმის მერიასა და შპს „ტონი და კომპანიას“ შორის ხელშეკრულება 2013 წლის 22 მარტს გაფორმდა ჟილინის არხის სარეაბილიტაციო სამუშაოების განსახორციელებლად. პროექტის ჯამური ღირებულება 6 მილიონ 108 ათასი ლარით განისაზღვრა. ხელშეკრულებით შეუსრულებელი ვალდებულებების შემდეგ, მერიამ ტენდერი ხელახლა გამოაცხადა, ამჯერად გამარჯვებული შპს „ჰიდრო“ გახდა, რომელმაც ასევე ვერ შეასრულა ხელშეკრულებით გათვალისწინებული ვალდებულებები. წინა შემთხვევისგან განსხვავებით, აქ უკვე მერიას წინასწარ არ ჰქონდა გადახდილი თანხა და პირიქით, „ჰიდრო“ 250 ათასი ლარით დაჯარიმდა. ამჯერად ჟილინის არხზე შპს „მშენებელი 80“ მუშაობს. ეს კომპანია მერიამ ელექტრონული ტენდერის გარეშე, გამარტივებული შესყიდვის გზით შეარჩია.

 

 

 

შსს მონაცემებით, საქართველოში ერთ თვეში 82 609 ტურისტი შემოვიდა

შინაგან საქმეთა სამინისტროს საინფორმაციო-ანალიტიკური დეპარტამენტის მიერ მომზადებული მასალების მიხედვით, საქართველოს სახელმწიფო საზღვარზე გადაადგილებულ ვიზიტორთა სტატისტიკური მონაცემების მიხედვით, წინა წლის ამავე პერიოდის მაჩვენებელთან შედარებით, ტურისტთა რაოდენობა გაზრდილია.

სამინისტროს ინფორმაციით, 2016 წლის მარტის თვეში ვიზიტორთა რაოდენობა 450 875 განისაზღვრა და 2015 წლის იგივე პერიოდის მაჩვენებელზე 16,7 %-ით მეტია.

აქედან,  170 281 პირი ტურისტის სტატუსით შემოვიდა, რაც სამინისტროს ინფორმაციით, რაც საერთო რაოდენობის 37,8%-ია და წინა წლის ანალოგიურ მაჩვენებელთან 24,8 პროცენტით მეტია.

ტრანზიტი – 82 609 ვიზიტი (საერთო რაოდენობის 18,3%, კლება წინა წლის ანალოგიურ მაჩვენებელთან -6,3%);

სხვა – 197 985 ვიზიტი (საერთო რაოდენობის 43,9%, მატება წინა წლის ანალოგიურ მაჩვენებელთან 22,5%).

რაც შეეხება იანვარ-მარტის ინტერვალს, ქვეყანაში უკვე 1 134 436 ვიზიტი განხორციელდა, რაც 14,7 %-ით მეტია 2015 წლის ანალოგიური საანგარიშო პერიოდის მაჩვენებელზე.

შს სამინისტროს მონაცემებით, 2016 წლის მარტშიც ყველაზე მეტი ვიზიტი კვლავ აზერბაიჯანიდან (+19%), თურქეთიდან (+6,7%), სომხეთიდან (+4,2%), რუსეთიდან (+15,7%), უკრაინიდან (+26,9%) და ირანიდან (+1065,8%) განხორციელდა.

„ასევე, პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-მარტშიც გამოირჩევიან ლატვია, იტალია, საფრანგეთი და დიდი ბრიტანეთი (შესაბამისად 48%, 27%, 23% და 13%), შუა აზიის ქვეყნებიდან – ყაზახეთი (27%) და უზბეკეთი (80%). აღმოსავლეთ ევროპის ქვეყნებიდან – ბელორუსია (37%) და მოლდოვა (39%), ახლო აღმოსავლეთიდან – ისრაელი (81%), ხოლო აზიის ქვეყნებიდან – არაბთა გაერთიანებული საემიროები 348%-იანი მატებით. აქვე აღსანიშნავია ამერიკის შეერთებული შტატების მოქალაქეების 10%-იანი ზრდა.

თურქული სამხედრო გემი ბათუმის ნავსადგურში

დღეს 4 აპრილს, ბათუმის ნავსადგურში თურქული სამხედრო გემი TCG Yavuz (F-240) შემოვიდა. თურქულ ფრეგატზე ოფიციალურ მიღებას საქართველოს თავდაცვის მინისტრი თინა ხიდაშელი და აჭარის მთავრობის წარმომადგენლებიც ესწრებოდნენ.

აჭარის მთავრობის ინფორმაციით, მთავრობის თავმჯდომარე არჩილ ხაბაძე თურქული სამხედრო გემის მეთაურს ვიცე-პოლკოვნიკ ოზგურ ოზთურქის და ეკიპაჟის სხვა ხელმძღვანელ პირებს შეხვდა.

 

დ

 

„სამხედრო ფრეგატი TCG Yavuz (F-240) ბათუმის პორტში ორდღიანი მეგობრული ვიზიტითაა შემოსული. საქართველოს გარდა მსგავს ვიზიტებს ფრეგატა ბულგარეთში, რუმინეთსა და უკრაინაში განახორციელებს. შეხვედრაზე რეგიონის მეთაურმა სტუმარს აჭარის შესახებ ესაუბრა, გააცნო მისი პოლიტიკურ-ეკონომიკური მდგომარეობა და საინვესტიციო ტურისტული პოტენციალი. დღესვე ეკიპაჟის წევრები შეხვედრას გამართავენ ქ. ბათუმის მერთან გიორგი ერმაკოვთან“ –  ნათქვამია აჭარის მთავრობის განცხადებაში.

პირველი მოწმე, ვინც პროკურატურამ მოსამართლის თანდასწრებით დაკითხა

მოწმე ბ.ბ. პროკურატურამ მოსამართლე დავით მამისეიშვილის თანდასწრებით სასამართლოში დაკითხა. ეს პირველი შემთხვევაა ბათუმში, როცა საგამოძიებო ეტაპზე პროკურატურის საგამოძიებო ნაწილმა მოწმის დასაკითხად ახალი წესი გამოიყენა – მოწმის თანხმობის გარეშე, საგამოძიებო ორგანოს აღარ აქვს უფლება დაკითხოს მოწმე. მოწმეთა დაკითხვის ახალი წესი ითვალისწინებს შემთხვევასაც, როცა პროკურატურა მოწმის დაკითხვას აუცილებლად მიიჩნევს. ამ შემთხვევაში პროკურატურა შუამდგომლობით მიმართავს მოსამართლეს. მოსამართლის თანხმობის შემთხვევაში, მოწმე პროკურატურის ნაცვლად, სასამართლოში, მოსამართლის თანდასწრებით დაიკითხება დახურულ სხდომაზე.

მოწმეთა დაკითხვის ახალი წესი 20 თებერვლიდან მოქმედებს, თუმცა ამ შემთხვევამდე, მოსამართლის თანდასწრებით არავინ დაკითხულა. მოწმე ბ.ბ.-ს ადვოკატი არ ჰყოლია. ის სისხლის სამართლის კოდექსის 180-ე მუხლით დაწყებულ საქმეზე დაკითხეს, რაც გულისხმობს თაღლითობას, რამაც მნიშვნელოვანი ზიანი გამოიწვია.

მეწარმეობა და ინოვაციურობა – ბენჟამენ ზიფის Webchat-ი „ამერიკულ კუთხეში“

ხვალ 5 აპრილს, ბათუმის „ამერიკულ კუთხეში“ აშშ-ის სახელმწიფო მდივნის მოადგილე ბენჟამენ ზიფის Webchat -ი იგეგმება თემაზე – „მეწარმეობა და ინოვაციურობა“.

„იგი განსაკუთრებით საინტერესო იქნება ახალგაზრდა მეწარმეებისათვის, რომლებსაც სურთ ბიზნესის დაწყება და აქვთ საინტერესო, ინოვაციური იდეები.  ასევე, ბიზნესით დაინტერესებული და ინოვატორი სტუდენტებისათვის“ – ნათქვამია „ამერიკული კუთხეს“ ადმინისტრაციის განცხადებაში.

მათივე ინფორმაციით, Webchat-ის   დროს 20-30 ახალგაზრდა ქართველი მეწარმე და ინოვატორი, ისაუბრებს თავიანთი პროექტების, წამოწყებებისა და გამოწვევების შესახებ. სამუშაო ენა ინგლისური იქნება.

6 აპრილს კი, „ამერიკელი კუთხე“  ამერიკელ დიპლომატს უმასპინძლებს. საჯარო ლექციის თემაა  სირიის კრიზისი, ISIS და ტერორიზმი.

საჯარო ლექციების კონკურსის ოთხი გამარჯვებული

საჯარო ლექციების დაფინანსების კონკურსში 4 გამარჯვებული გამოვლინდა. ინფორმაციას აჭარის განათლებისა და კულტურის სამინისტრო ავრცელებს.  საჯარო ლექციებისთვის სამინისტროსგან დაფინანსებას მიიღებენ შემდეგი პირები:   ჯოანა შერშუნოვიჩი, რომელიც წაიკითხავს ლექციას თემაზე – „საჯარო საუბრის ხელოვნება, აკადემიური ტექსტი და მისი სპეციფიკა“ და „კულტურათაშორისი კომუნიკაცია – მნიშვნელოვანი განსხვავებები“.

შემდეგი გამარჯვებულია ჯემალ ხუბუა. მისი საჯარო ლექცია შეეხება მიკროსამყაროს ფიზიკას. თემა – „თანამედროვე ფიზიკის ყველაზე კვლევადი ნაწილი“.

კონკურსის გამარჯვებულია ქეთევან მუხიგულიც. მისი საჯარო ლექციის თემაა „ადამიანის უფლებები, თავისუფლება და მოვალეობა დემოკრატიულ და არადემოკრატიულ რეჟიმებში“.

მეოთხე გამარჯვებულია კორნელი კაკაჩია, საჯარო ლექციით, „უმაღლესი განათლება საქართველოში. მიღწევები, გამოწვევები, პერსპექტივები“.

განათლების სამინისტრო აღნიშნულ პროექტს „უმაღლესი განათლების ხელშეწყობის“ პროგრამის ფარგლებში ახორციელებს. სამინისტროს ინფორმაციით, კონკურსში სულ ათი საჯარო ლექციის განაცხადი შევიდა.

საკონკურსო პირობების მიხედვით, ერთი საჯარო ლექცია არ უნდა აღემატებოდეს 2 500 ლარს.

ბათუმის დელფინარიუმი სამი კვირით დაიხურა

ბათუმის მერიის ინფორმაციით,  ბათუმის დელფინარიუმი მუშაობას დროებით წყვეტს:

„ტურისტული სეზონისთვის მზადებასთან დაკავშირებით, ბათუმის დელფინარიუმში სარემონტო სამუშაოები მიმდინარეობს, რის გამოც სამი კვირის განმავლობაში დელფინარიუმი დახურული იქნება,“- ნათქვამია მერიის მიერ გავრცელებულ ინფორმაციაში.

დელფინარიუმის დირექტორის დავით ლეკვეიშვილის თქმით, დაგეგმილია შენობის ფასადის შეღებვა და აუზის მიმდებარე იატაკების დამუშავება. დელფინების შოუ სამუშაოების დასრულებისთანავე განახლდება.

კარდიოქირურგები ბათუმის საუნივერსიტეტო ჰოსპიტლიდან

„ჩვენს ჰოსპიტალში კარდიოქირურგიული ოპერაციები კეთდება ისეთივე ხარისხითა და ტექნიკით, როგორც ნებისმიერ განვითარებულ ქვეყანაში“

საერთაშორისო, საუნივერსიტეტო ჰოსპიტალი IUHB-ი ბათუმში ერთი თვეა ფუნქციონირებს, თუმცა ახალი ჰოსპიტლის ჰოლი უკვე სავსეა პაციენტებითა და მათი თანმხლები პირებით. უახლესი სამედიცინო ტექნოლოგიებით აღჭურვილი ჰოსპიტალი, რომელიც აჭარაში სამედიცინო მომსახურების უმაღლესი სტანდარტის დანერგვაზეა ორიენტირებული, კარდიოქირურგიაში უმაღლესი ხარისხის მომსახურებას სთავაზობს პაციენტებს.

ბათუმის საუნივერსიტეტო ჰოსპიტალში კარდიოქირურგიის მიმართულებას შაჰინ ბოზოკი ხელმძღვანელობს, თურქეთიდან მოწვეული კარდიოქირურგი, თურქეთის კარდიოქირურგთა ასოციაციის მმართველი გუნდის წევრი, რომელსაც ათასზე მეტი კარდიოქირურგიული ოპერაცია აქვს გაკეთებული.

„დაახლოებით ერთი თვეა აქ ვმუშაობ. ამ ხნის მანძილზე 30-მდე ოპერაცია ჩავატარეთ და კიდევ ბევრი პაციენტი ელოდება რიგს. ახალგახსნილი კლინიკისთვის ეს, ჩემი აზრით, ძალიან კარგი მაჩვენებელია.

შაჰინ ბოზოკი და მახირ ბალაქიშიევი
შაჰინ ბოზოკი და მახირ ბალაქიშიევი

ჩვენს ჰოსპიტალში გვაქვს საშუალება და პირობები იმისათვის, რომ პაციენტებს არ დასჭირდეთ ბათუმიდან სხვა ქალაქში წასვლა. წარმატებული გუნდი ჩამოვაყალიბეთ. ძალიან მძიმე, ასაკოვანი პაციენტები გვყავდა, რომელთაც გულის სარქვლის ორმაგი გადანერგვა გავუკეთეთ, ხშირად ვაკეთებთ კორონარულ შუნტირებას, სარქვლის პროთეზირებას. ჩვენ მიერ ჩატარებული ყველა ოპერაცია წარმატებით დასრულდა. კარდიოქირურგიაში, რა თქმა უნდა, რისკფაქტორები არსებობს, რაც მთელ მსოფლიოში ერთი და იგივეა, მაგრამ შეგვიძლია ვთქვათ, რომ ჩვენს ჰოსპიტალში კარდიოქირურგიული ოპერაციები კეთდება ისეთივე ხარისხითა და ტექნიკით, როგორც თურქეთში, ამერიკის შეერთებულ შტატებსა და ნებისმიერ განვითარებულ ქვეყანაში. ჩვენი ჰოსპიტალი მაღალ სტანდარტს შეესაბამება. იმედია, აჭარის და მთელი საქართველოს მოსახლეობას კარგ სამედიცინო მომსახურებას გავუწევთ, ჩვენ კვირაში 7 დღე, დღე-ღამეში 24 საათის მანძილზე მზად ვართ, პაციენტებს დავეხმაროთ“,  –  ამბობს შაჰინ ბოზოკი, რომელიც ბათუმში ჩამოსვლამდე რიზეში, რეჯებ ტაიპ ერდოღანის სახელობის კლინიკაში ხელძღვანელობდა კარდიოქირურგიულ განყოფილებას. იგი ასამდე სამეცნიერო წერილის ავტორია და ათასზე მეტი კარდიოქირურგიული ოპერაცია აქვს ჩატარებული.

საუნივერსიტეტო ჰოსპიტლის კარდიოქირურგიული მიმართულების გუნდის წევრია მახირ ბალაქიშიევი, საქართველოს მოქალაქე, რომელმაც მარნეულში დაამთავრა სკოლა, შემდეგ კი – თბილისის სამედიცინო უნივერსიტეტი. მახირი სტუდენტი იყო, როცა 2008 წელს აგვისტოს ომში რეზერვისტად გაიწვიეს და ბრძოლაში დაიჭრა. საქართველოში სწავლის დასრულების შემდეგ მახირი თურქეთში გაემგზავრა და ეგეოსის უნივერსიტეტის სამედიცინო ფაკულტეტი დაამთავრა. მახირს ორი ლიცენზია აქვს, ანგიოქირურგისა და კარდიოქირურგის.

იგი ამბობს, რომ პაციენტთა ნდობის დასტურია ის ფაქტი, რომ საუნივერსიტეტო ჰოსპიტალს უამრავი პაციენტი მიმართავს.

„გახსნის დღესვე ექვსი სააოპერაციო პაციენტი მიიღო ჩვენმა განყოფილებამ. პირველივე დღეს 6 „ფორმა 100“ გავეცით პაციენტების დასაფინანსებლად. ყველაზე ხშირად მოგვმართავენ ის პაციენტები, რომელთაც აორტოკორონალური შუნტირება ესაჭიროებათ, ასევე პაციენტები, რომელთაც ესაჭიროებათ გულის სარქვლების შეცვლა. ჩვენ უმაღლესი ხარისხის სამედიცინო მომსახურებას ვუწევთ მათ“, – ამბობს მახირ ბალაქიშიევი.

IMG_2306ბათუმის საერთაშორისო, საუნივერსიტეტო ჰოსპიტალი ჩართულია საქართველოსა და აჭარის ჯანდაცვის პროგრამებში. ჰოსპიტალში მოქმედებს როგორც ინდივიდუალური, ასევე კორპორაციული და საყოველთაო დაზღვევა.

კარდიოქირურგიაზე საუბრისას შაჰინ ბოზოკი საქართველოში გულ-სისხლძარღვთა დაავადებების მქონე ახალგაზრდების სიმრავლეს უსვამს ხაზს:

„მაგალითად, ერთ-ერთი ბოლო პაციენტი, რომელსაც ჩვენ ოპერაცია გავუკეთეთ, 39 წლის იყო. სამწუხაროდ, თურქეთთან შედარებით საქართველოში ბევრად უფრო ახალგაზრდა პაციენტები გვხვდება. გულ-სისხლძარღვთა დაავადებების ზრდა ხშირად სიგარეტის მოწევას, ალკოჰოლის ჭარბ მოხმარებასა და არასწორ კვების რეჟიმს უკავშირდება. ჩვენ, რა თქმა უნდა, ყველაფერს გავაკეთებთ პაციენტთა სამკურნალოდ, მაგრამ, ჩემი აზრით, სახელმწიფოს მასშტაბითაა საჭირო ჯანსაღი ცხოვრების პროპაგანდა“.

ბათუმის საუნივერსიტეტო საერთაშორისო ჰოსპიტალში ტარდება: სარქვლის პლასტიკა; სარქვლის პროტეზირება; ერთი ან ორი სარქვლის (მექანიკური, ბიოლოგიური) პროტეზირება; კორონარული შუნტირება: ხელოვნური სისხლის მიმოქცევის პირობებში ან – მომუშავე გულზე. კორონარული შუნტირება შესაძლებელია იზოლირებულად ან სარქვლის პროტეზირებასთან [პლასტიკასთან] ერთად. ანევრიზმის რეზექცია/პლიკაცია; პარკუჭთაშუა ძგიდის დეფექტის აღდგენა; აღმავალი აორტის პლასტიკა/პროტეზირება; აორტის რკალის პროტეზირება; გულის სიმსივნის [მიქსომა] ამოკვეთა; პერიკარდიოტომია; ბენტალის პროცედურა: აორტალური სარქვლის, აღმავალი აორტის და აორტის სარქვლის პროტეზირება. იაკუბის პროცედურა: აღმავალი აორტის პროტეზირება და გულის თანდაყოლილი პათოლოგიების ოპერაციები.

ბათუმის საერთაშორისო საუნივერსიტეტო ჰოსპიტლის კარდიოქირურგიული განყოფილების გუნდი
ბათუმის საერთაშორისო საუნივერსიტეტო ჰოსპიტლის კარდიოქირურგიული განყოფილების გუნდი

 

IUHB-JPG-GEOმისამართი: ბათუმი, გენერალ ასლან აბაშიძის ქუჩა #14
ტელეფონი: 0422 21 33 33

 

ჯარისკაცი თხილის პლანტაციაში ოჯახის სარჩენად, ათწლიანი სამსახურისა და ოთხი ომის შემდეგ

სერჟანტი რამაზ ბერიძე თავდაცვის სამინისტროს სასამართლოში უჩივის. თავდაცვის სამინისტრომ ჯარისკაცთან ხელშეკრულება მას შემდეგ შეწყვიტა, როცა რამაზ ბერიძის ჯანმრთელობა დაზიანდა. ავღანეთში, ISAF-ს სამშვიდობო მისიის შესრულების დროს რამაზი ნაღმზე ორჯერ აფეთქდა და მარჯვენა ყურში სმენა სრულიად დაკარგა. 2013 წელს რამაზ ბერიძე NATO-ს მაშინდელმა გენერალურმა მდივანმა, ანდერს ფოგ რასმუსენმა, საპატიო მედლით დააჯილდოვა – სამშვიდობო მისიაში შეტანილი ფასდაუდებელი წვლილისთვის. ოთხი ომის მონაწილეს და 10-წლიანი სამხედრო გამოცდილების მქონე ვეტერანს, თავდაცვის სამინისტრო ისე დაემშვიდობა, რომ ერთჯერადი კომპენსაცია – 7 ათასი ლარიც კი არ გადაუხადა.

„გადაადგილების დროს, დაახლოებით 20 საათსა და 15 წუთზე, ჯავშანმანქანა „ემრაფი“, რომელშიც იმყოფებოდა რამაზ ბერიძე, აფეთქდა თალიბთა ტერორისტული დაჯგუფების წევრთა მიერ სამშვიდობო მისიაში მონაწილე სამხედრო მოსამსახურეთა წინააღმდეგ დადებულ თვითნაკეთ ნაღმზე, ე.წ. „აიდი“-ზე, რის შედეგადაც ჯავშანმანქანაში მყოფმა რამაზ ბერიძემ ჯანმრთელობის დაზიანება მიიღო ბაროტრავმის სახით“, – ასე აღწერს სერჟანტის ნაღმზე აფეთქებას ოფიციალურ წერილში შეიარაღებული ძალების გენერალური შტაბის სამხედრო პოლიციის დეპარტამენტის უფროსი, პოლკოვნიკი კახაბერ ჩიხრაძე.

ეს ამბავი 2013 წლის 15 ნოემბერს მოხდა ავღანეთის ისლამურ რესპუბლიკაში. ორი დღის შემდეგ, რამაზ ბერიძე ისევ აფეთქდა ნაღმზე – ის ჰელმანდის პროვინციაში გადაჰყავდათ, სამხედრო ბაზა „ფაიზელში“, სამედიცინო გამოკვლევების ჩასატარებლად.

„მახსოვს, საშინელი ქარი იყო და მტვერი, ვერაფერს ვხედავდი. სამი მანქანით გამოვედით სამედიცინო ცენტრიდან, სადაც ტკივილგამაყუჩებელი გამიკეთეს, რომ დამძინებოდა. მანქანას 5 კმ-ზე მეტი სიჩქარით მოძრაობის უფლება არ ჰქონდა… გზაზე ერთი ხევი იყო, სადაც წყალი მხოლოდ წვიმის დროს ჩამოდიოდა. იმ დღეს წყლის ხმა გავიგონე. თურმე მართვადი ნაღმი იყო წყლის ქვეშ დადებული. გაიარა ერთმა მანქანამ, მეორემ და მესამეზე აფეთქდა. იმ მანქანაში ვიწექი მე.

ყველაზე მეტად დავშავდი, რადგან განმეორებით ავფეთქდი. მეთაური მეუბნებოდა, გაგივლის, არ შეგეშინდესო, მაგრამ წივილის ხმა მესმოდა სულ“ – იხსენებს რამაზი.

დაშავებულ სერჟანტს ავღანეთში მდებარე ბრიტანულ სამხედრო ჰოსპიტალში უმკურნალეს, თუმცა დაკარგული სმენა რამაზს აღარ დაბრუნებია. „ფასდაუდებელი წვლილისთვის“ დაჯილდოვებულ ჯარისკაცს გორის სამხედრო ჰოსპიტალში უთხრეს, რომ ყურში არსებული ნერვი უკვე მკვდარია. 2014 წლის 18 აგვისტოდან თავდაცვის სამინისტრომ რამაზ ბერიძესთან დადებული ხელშეკრულება ვადაზე ადრე შეწყვიტა – ავადმყოფობის გამო.

რამაზ ბერიძე
რამაზ ბერიძე

„მითხრეს, იძულებული ვართ, ხელშეკრულება უნდა გავწყვიტოთო, – გვიყვება რამაზ ბერიძე, – ვთხოვე, იქნებ სადმე სხვაგან მიპოვოთ სამსახური, მე სხვა არაფერი ვიცი-მეთქი. არც პენსია მოუციათ და არც კომპენსაცია. მას შემდეგ ვეძებ სამსახურს, მაგრამ პროფესია მე არ მაქვს და ვინ მამუშავებს? ავღანეთში მეტყვიამფრქვევე ვიყავი. მანამდე ერაყსა და კოსოვოს ომში ვიბრძოდი. აგვისტოს ომშიც ბოლო დღეებამდე ვიყავი…“

ბოლო წერილი რამაზ ბერიძემ თავდაცვის სამინისტროსგან რამდენიმე დღის წინ მიიღო. სამინისტრომ მის მატერიალურ დახმარებაზე კიდევ ერთხელ თქვა უარი. თავდაცვის მინისტრის 2007 წლის 26 სექტემბრის #560 ბრძანების 38-ე მუხლი სამხედრო მოსამსახურისთვის ერთჯერადად კომპენსაციის გაცემას მხოლოდ ორ შემთხვევაში ითვალისწინებს – „დასახიჩრება“ და „დაჭრა“. სამინისტრო 2014 წლის 14 თებერვლით დათარიღებულ სამხარაულის ექსპერტიზის დასკვნას დაეყრდნო, სადაც წერია, რომ „რამაზ ბერიძეს სხეულზე ფიზიკური დაზიანების ობიექტური ნიშნები არ აღენიშნება“. ამ დასკვნიდან რამდენიმე თვეში რამაზ ბერიძეს თავდაცვის სამინისტრომ კონტრაქტი ვადაზე ადრე შეუწყვიტა – ავადმყოფობის გამო.

„ამ საქმეს როცა თბილისის საქალაქო სასამართლო განიხილავდა, თავდაცვის სამინისტრო ადასტურებდა, რომ სმენა რამაზს ნამდვილად დაუქვეითდა, მაგრამ ეს არ ემთხვევა მინისტრის ბრძანებით გათვალისწინებულ „დასახიჩრებას“ და „დაჭრას“. ჩვენი შეფასებით ეს ჯარისკაცის შეურაცხყოფაა. არ შეიძლება კანონმდებლობა ასე ვიწროდ განმარტო“ – ამბობს „ახალგაზრდა იურისტთა ასოციაციის“ იურისტი ანა მდინარაძე, რომელიც სასამართლოში რამაზ ბერიძის საქმეს ხელახლა შეიტანს. წინა პროცესზე სასამართლოს ადმინისტრაციულმა კოლეგიამ სამედიცინო ექსპერტიზის ჩატარება მოითხოვა, რაც ჯანმრთელობისთვის მიყენებული ზიანის ხარისხს შეაფასებდა. „ამის ჩატარება საკმაოდ ძვირია და რამაზს მისი დაფინანსების საშუალება არ ჰქონდა“, – გვითხრა ანა მდინარაძემ.

თავდაცვის მინისტრის ბრძანების მიხედვით, სამხედრო ვალდებულებების შესრულების დროს, პირმა შესაძლოა ერთჯერადი კომპენსაცია მიიღოს: მძიმე დაზიანების დროს – 7 ათასი ლარი, ნაკლებად მძიმედ დაზიანებულმა – 3 ათასი, ხოლო მსუბუქად დაზიანებულმა – 2 ათასი ლარი. ნაღმზე აფეთქებული ჯარისკაცი ვერც ერთ კატეგორიაში მოხვდა. „ახალგაზრდა იურისტთა ასოციაციაში“ მიიჩნევენ, რომ თავდაცვის სამინისტრომ აუცილებლად უნდა გადახედოს როგორც კომპენსაციის ფინანსური ნაწილს, ასევე კატეგორიების ჩამონათვალს, რომლითაც განისაზღვრება ჯანმრთელობისთვის მიყენებული ზიანი არის თუ არა „დასახიჩრება“.

აპირებს თუ არა თავდაცვის სამინისტრო გადახედოს ბრძანებას, რომელიც დაზარალებული სამხედრო მოსამსახურეების კომპენსირებას ითვალისწინებს? რატომ არ ჩათვალა სამინისტრომ „დასახიჩრებად~ ნაღმზე აფეთქება და სმენის დაკარგვა? რას სთავაზობს სახელმწიფო ოთხი ომის მონაწილეს, უმუშევრად დარჩენილ, სმენადაქვეითებულ ვეტერანს? – ამ კითხვებით „ბათუმელებმა“ თავდაცვის სამინისტროს მიმართა. უწყების პრესსამსახური თავდაპირველად პასუხს დაგვპირდა, თუმცა სამუშაო დღის ბოლოს გვითხრეს, რომ „თავდაცვის სამინისტრო დიდი უწყებაა და პასუხს რადმენიმე დღე უნდა დაველოდოთ“.

რამაზ ბერიძის ჯილდოები
რამაზ ბერიძის ჯილდოები

„ახალგაზრდა იურისტთა ასოციაციაში“ მიიჩნევენ, რომ სახელმწიფო და კონკრეტულად თავდაცვის სამინისტრო თავს არიდებს პასუხისმგებლობას. „მთავარი პრობლემა არის დამოკიდებულება, რომელსაც თავდაცვის სამინისტრო ავლენს ომში დაზარალებული სამხედრო მოსამსახურის მიმართ. ასე ილახება სახელმწიფოს იმიჯი და იკარგება პატრიოტიზმის განცდა. ამ დამოკიდებულებით საზოგადოება კარგავს პატივისცემას სახელმწიფო ინსტიტუტების მიმართ და ის ვალდებულება, რომელიც ჩვენ გვეკისრება ქვეყნის წინაშე, ქრება“, – ამბობს „ბათუმელებთან“ საია-ს აჭარის ფილიალის ხელმძღვანელი გიორგი ხიმშიაშვილი.

სამართლის დადგენის მოლოდინი აღარ აქვს რამაზ ბერიძეს. ის საკუთარი ოჯახის (ცოლის და ორი შვილის) ფიზიკური არსებობისთვის თურქეთში გადადის და ხან თხილის პლანტაციაში მუშაობს, ხან სხვა სეზონურ სამუშაოს ეძებს. რამაზ ბერიძემ „ბათუმელებს“ ათობით მედალი და მადლობის წერილი აჩვენა. გვითხრა ისიც, რომ ბავშვობაში კაპიტნობაზე ოცნებობდა. „საზღვაო აკადემიაში ერთი წელი ვისწავლე, მერე ოჯახს ფულის გადახდის საშუალება არ ჰქონდა და შევწყვიტე. მას მერე საკონტრაქტო სამხედრო მოსამსახურე ვიყავი.“

რამაზი ომიდან გამოყოლილ სამხედრო ფორმასაც ინახავს. ამბობს, რომ იშვიათად იცვამს, მხოლოდ მაშინ, როცა მარტო რჩება, ან ბუნებაში გადის: „ადამიანებთან აღარ მინდა ასე გამოჩენა“.

რამაზ ბერიძე
რამაზ ბერიძე

ვისთვის არის დაუძლეველი პედაგოგთა საგნობრივი გამოცდა

პედაგოგთა ბოლო საგნობრივ გამოცდაზე დაწესებული ბარიერი 6 477 პედაგოგიდან 5 376-მა ვერ გადალახა. პედაგოგები მათ მიმართ კრიტიკას სოციალურ ქსელებში გამოეხმაურნენ, სადაც ისინი ტესტების სირთულეზე წერენ. არის თუ არა პედაგოგთა საგნობრივი გამოცდის ტესტები დაუძლეველი, როგორც ამას პედაგოგთა ერთი ჯგუფი მიიჩნევს, თუ პრობლემა დროის მენეჯმენტშია?

პედაგოგთა საგნობრივი გამოცდების ტესტების ნიმუშები განთავსებულია შეფასებისა და გამოცდების ეროვნული ცენტრის ვებგვერდზეც. ტესტების პასუხები სხვადასხვა ქულით ფასდება. ავიღოთ დაწყებითი კლასის მასწავლებლის გამოცდის ტესტის ერთ-ერთი ნიმუში, სადაც უმაღლესი ქულა არის 3. მოცემულ დავალებაში პედაგოგმა უნდა აჩვენოს „მწყობრი და დამაჯერებელი მსჯელობა“. მაგალითად, მასწავლებელმა მგელთან დაკავშირებულ სტერეოტიპებზე უნდა შეძლოს დამაჯერებლად მოიყვანოს ადეკვატური მაგალითები ზღაპრებიდან, სადაც მგელი დადებითი პერსონაჟია და მეოთხე კლასის მოსწავლეებისთვის გასაგებ ენაზე ახსნას, რატომ არის საჭირო მგლის შესახებ სტერეოტიპული წარმოდგენებისგან გათავისუფლება. თუ ამ მოთხოვნებს პედაგოგი სწორ პასუხს გასცემს, ამ დავალებაში ყველაზე მაღალ, ანუ სამ ქულას აიღებს. პედაგოგს პასუხში ნული ქულა დაეწერება იმ შემთხვევაში, თუ მგელთან დაკავშირებულ სტერეოტიპებზე იმსჯელებს ზედაპირულად, დაასახელებს მხოლოდ ნაწარმოებს, სადაც მგელი დადებითი პერსონაჟია ან წარმოდგენილი მსჯელობა იქნება არასწორი.

დაწყებითი საფეხურის ერთ-ერთმა პედაგოგმა ნანა ჯანაშვილმა სოციალურ ქსელში „ბათუმელებს“ მოსწერა: „გადახედეთ ტესტებს, თითქმის 9 კლასის დონეზე სთხოვენ მასწავლებლებს. ეს მათ არაფერში სჭირდებათ. ტესტები ისეა შედგენილი, რომ პედაგოგების უმრავლესობა ვერ მოასწრებს დაწერას, რომც იცოდნენ“.

პედაგოგის აზრით, ამას განათლების სამინისტრო გამიზნულად აკეთებს, „რადგან სერტიფიცირებული მასწავლებელი ხელფასის გარდა იღებს დანამატს, ეს კი ბიუჯეტიდან დამატებითი თანხის გადინებას უწყობს ხელს. თუ ვინმე ხმას ამოიღებს, სამსახურს დაკარგავს, ამიტომ ჩუმდებიან“.

ნათელა ნაკუბაიძის აზრით, რომელიც პედაგოგთა გამოცდებს ასევე სოციალურ ქსელში ეხმიანება, წერს: „მასწავლებელი უნდა შეფასდეს იმით, თუ რა შედეგი მიიღო და არა იმით, თუ რას აკეთებს ამ შედეგისთვის“.

„განა ვერ გაიხსენებს პედაგოგი იმ ყველაფერს, მაგრამ იქაც ჩახლართულია საკითხები. მათი ენით რომ გითხრათ, ფეხწამოსაკრავი საკითხები ბევრია, რასაც დაფიქრება და დრო სჭირდება. 5 საათში ძნელია ყველაფრის მოსწრება“, – გვწერს ნანა ჯანაშვილი, რომელიც დროის სიმცირეზეც საუბრობს: „წელს პირველად ტექსტის გააზრებით დავიწყე და არც ერთი შეცდომა არ მქონდა, მაგრამ დიდი დრო წამართვა, მერე თემის დაწერა დავიწყე და მათემატიკისთვის აღარ დამრჩა დრო. სიჩქარის გამო შეცდომები დავუშვი. განა მთელი მათემატიკა აზროვნებას არ მოითხოვს? ასევეა ზედა საფეხურის ტესტებიც. იქ მოცემული რთული საკითხები მასწავლებელს პრაქტიკაში არ სჭირდება. მოკლედ, ტესტი უნდა იყოს მასწავლებლის საჭიროებებზე მორგებული“.

შეფასებისა და გამოცდების ეროვნული ცენტრის დირექტორის მოადგილე ივა მინდაძე ცალკეული პედაგოგების პრეტენზიებს არ ეთანხმება და ამბობს, რომ ტესტები განსაზღვრულ დროში მოსწრებადია და ის მასწავლებლის პროფესიულ სტანდარტს ეყრდნობა.

„არა მგონია რეალურად არსებობდეს დროის პრობლემა. ტესტები აპრობირებულია და ხუთი საათი ამ დავალებების შესასრულებლად, რაც ტესტებშია მოცემული, სავსებით საკმარისია. ეს გამოცდები რამდენიმე წელია ტარდება და ამ ხნის განმავლობაში ათასამდე ადამიანმა წარმატებით გაართვა თავი. თუ მასწავლებელი ამბობს, რომ დრო არ ეყო, ესე იგი, მას დროის განაწილების პრობლემა აქვს“.

ივა მინდაძე პედაგოგების მოსაზრებას, თითქოს განზრახ არის ტესტები ჩახლართული, არ ეთანხმება. „განზრახ არაფერი არ იხლართება. ნებისმიერ მსურველს შეუძლია ნახოს ეს ტესტები და ვნახავთ, რომ კრიტიკა რეალობას არ შეესაბამება“.

ივა მინდაძის თქმით, პედაგოგთა საგამოცდო ტესტები მასწავლებლის პროფესიულ სტანდარტსა და ეროვნულ სასწავლო გეგმას ეყრდნობა.

„საერთაშორისო კვლევები, რომლებიც პერიოდულად ტარდება, აჩვენებს როგორც სკოლაში არსებულ ხარისხს, ასევე ქვეყნის პროგრესს მსოფლიოს ქვეყნებთან შედარებით და ვითარება ნამდვილად არ არის სახარბიელო. სკოლაში ხარისხის პრობლემა მწვავედ დგას, რასაც რამდენიმე ფაქტორი განაპირობებს, მათ შორის პედაგოგთა კვალიფიკაცია“.

რაც შეეხება ტექნიკურ დეტალებს. პედაგოგების თქმით, ზამთარში ჩატარებული გამოცდების დროს არ იყო გათბობა ჩართული, რის გამოც პედაგოგებს რთულ პირობებში მოუხდათ მუშაობა.

ივა მინდაძის თქმით, პედაგოგთა ტესტირება იმ სკოლებში ტარდება, სადაც ინფრასტრუქტურა მეტ-ნაკლებად მოწესრიგებულია: „მე როგორც ვიცი, გათბობა ამ სკოლებში გამოცდებამდე რამდენიმე დღით ადრე ჩაირთო. ვეთანხმები იმას, რომ სასკოლო ინფრასტრუქტურა საჭიროებს დახვეწას, მაგრამ ეს ბევრად უფრო საგანგაშო მგონი მოსწავლეებისთვის არის და არა მასწავლებლებისთვის“.

მასწავლებელთა პროფესიული განვითარების ეროვნული ცენტრის ინფორმაციით, პედაგოგებს ცენტრის ხელშეწყობით საგნობრივი ტრენინგები უტარდებათ, მაგრამ „როგორ უნდა იმუშაონ ტესტზე, ამ მიმართულებით მათ ტრენინგები არ ჩატარებიათ“.

 

 

ქვეყნის მთავრობის უფლებამოსილება აჭარის მთავრობას ერთი წლით

„სახელმწიფო შესყიდვების შესახებ“ საქართველოს კანონით ქვეყნის მთავრობისთვის მინიჭებული უფლებით, მომდევნო ერთი წლის განმავლობაში, აჭარის მთავრობაც ისარგებლებს. პრემიერ გიორგი კვირიკაშვილის მიერ ხელმოწერილი შესაბამისი განკარგულება მიმდინარე წლის პირველ აპრილს გამოქვეყნდა.

ამ განკარგულებით, „სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადაში შეუფერხებლად ჩატარების მიზნით“, აჭარის მთავრობის სამართლებრივი აქტით შესაძლებელია ერთი საბიუჯეტო წლის განმავლობაში დადგინდეს 200 ათასი ლარის ან მეტი ღირებულების შესყიდვის ერთგვაროვანი ობიექტების გამარტივებული ელექტრონული ტენდერის მეშვეობით შესყიდვის განხორციელება.

აღნიშნული უფლებით აჭარის მთავრობას შეუძლია ისარგებლოს „აჭარის ავტონომიური რესპუბლიკისა და მის ტერიტორიაზე არსებული თვითმმართველი ერთეულების სახსრებით, აგრეთვე აჭარის ავტონომიური რესპუბლიკისა და შესაბამისი თვითმმართველი ერთეულების ბიუჯეტების დაფინანსებაზე მყოფი ორგანიზაციებისა და დაწესებულებების სახსრებით განხორციელებულ სახელმწიფო შესყიდვებთან მიმართებაში“.

„სახელმწიფო შესყიდვების შესახებ“ საქართველოს კანონით აღნიშნული უფლებამოსილება [გამარტივებული ტენდერის ჩატარებაზე თანხმობის მიცემა] მხოლოდ ქვეყნის პრეზიდენტს და მთავრობას აქვს. აჭარის მთავრობას კი ანალოგიურ უფლებამოსილებას პერიოდულად, ადრეც ანიჭებდნენ.

გაზეთი “ბათუმელები” #10 [ანონსი]

4 მარტიდან გაზეთ „ბათუმელების“ მეათე ნომერში წაიკითხავთ:

ადამიანის უფლებები: “ჯარისკაცი თხილის პლანტაციაში ოჯახის სარჩენად, ათწლიანი სამსახურისა და ოთხი ომის შემდეგ” – სერჟანტი, რომელიც ავღანეთში, ISAF-ს სამშვიდობო მისიის შესრულების დროს ნაღმზე ორჯერ აფეთქდა და მარჯვენა ყურში სმენა სრულიად დაკარგა, თავდაცვის სამინისტროს სასამართლოში უჩივის. სერჟანტს, რომელიც 2013 წელს NATO-ს გენერალურმა მდივანმა საპატიო მედლით დააჯილდოვა, თავდაცვის სამინისტრო ისე დაემშვიდობა, რომ ერთჯერადი კომპენსაცია – 7 ათასი ლარიც არ გადაუხადა.

მთავარი თემა: “შეეგუეთ რეალობას – ბიზნესმენი სუს-ის თანამშრომლისგან ზეწოლაზე საუბრობს” – ბიზნესმენმა თემელ ლომაძემ აჭარის ხელისუფლების პირველ პირს – არჩილ ხაბაძესა და სუს-ის პირველ პირს აჭარაში, ირაკლი ერისთავს წერილობით აცნობა, რომ ის ერთ-ერთი პროექტიდან სუს-ის მაღალი თანამდებობის პირის მონაწილეობით ახლახან გააძევეს. თემელ ლომაძის თქმით, მის ჩანაცვლებას გეგმავს კომპანია “რეალ მშენი”, რომლის ერთ-ერთ დამფუძნებელს წილები ასევე აქვს იმ კომპანიაში, რომელსაც არჩილ ხაბაძემ ერთი წლის “ანბანის კოშკი”, 20 წლის ვადით, 1 ლარად გადასცა.

პოლიტიკა: “მოახლოებული არჩევნები ამერიკის შეერთებულ შტატებსა და საქართველოში” – ამერიკის შეერთებულ შტატებში საპრეზიდენტო არჩევნები ახლოვდება. როგორია საპრეზიდენტო რბოლას შემორჩენილი ლიდერების საგარეო პოლიტიკური პრიორიტეტები რუსეთთან, ნატოს გაფართოებაზე და რას უნდა ელოდოს მათგან საქართველო? “ბათუმელების” შეკითხვებს ფილადელფიის საგარეო პოლიტიკის კვლევის ინსტიტუტის ანალიტიკოსმა მაიკლ ჩეჩირემ უპასუხა.

ეკონომიკა: “რას ედავება მთავრობა ინვესტორებს” – ყოველი წლის ბოლოს და ზოგჯერ კვარტალურადაც კი, მთავრობა რეგიონში ინვესტიციის გაზრდაზე საუბრობს და შესაბამის სტატისტიკასაც აქვეყნებს. ამას მოყვება ხელის ჩამორთმევის ან საძირკვლის ჩაყრის სატელევიზიო კადრები მთავრობის მონაწილეობით. “ბათუმელებმა” შეისწავლა, თუ როგორ გრძელდება ამბავი პომპეზური დასაწყისის შემდეგ, რაზეც უმეტეს შემთხვევაში არ საუბრობენ და არც ინფორმაციას აქვეყნებენ.

საზოგადოება: “მხოლოდ 6 დირექტორი ქალი 49 სკოლაში” – გენდერული დისბალანსი მაღალმთიან აჭარაში ყველაზე თვალსაჩინოდ სკოლაში იგრძნობა, სადაც მასწავლებლების უმრავლესობა ქალია, თუმცა სკოლაში დირექტორის სავარძელი კაცს უჭირავს.

განათლება: “ბავშვის სისასტიკის მიზეზი საზოგადოებაში უნდა ვეძებოთ” – ბათუმში 14 წლის მოზარდი ანრი გოგიტიძე გარდაიცვალა. გარდაცვლილის დეიდის თქმით, ის თანატოლებმა მოკლეს. თუმცა დანაშაულის გამომწვევი ოფიციალური ვერსია გამოძიებას არ გაუვრცელებია. რა მიზეზები განაპირობებს მოზარდთა სისასტიკეს და რატომ ვერ უზრუნველყოფს სკოლა ან ოჯახი მოზარდთა დანაშაულის პრევენციას?

კულტურული მეხსიერება: “ბათომის ცხოვრების” სევდიანი ამბავი” – “1921 წლის 2 იანვარი. ბათუმში, „შმაევსკის” თეატრში ერთმანეთის მიყოლებით ითამაშეს „ლეგენდა კოშკში” და „დარისპანის გასაჭირი”. 4 იანვარს საქართველოში სტუმრად მყოფმა კარლ კაუცკიმ გემ „ფრანც-ფერდინანდით” დატოვა საქართველო… ამ ამბების გარდა 1921 წლის იანვრის დასაწყისში ბათუმში კიდევ ერთი საინტერესო მოვლენა მოხდა, ახალი გაზეთის – „ბათომის ცხოვრება” – გამოცემა დაიწყეს…” – სულხან სალაძის საავტორო გვერდი.

ეს და სხვა თემები წაიკითხეთ გაზეთ „ბათუმელების“ ახალ ნომერში.

გამოიწერეთ გაზეთი „ბათუმელები“ და ყოველ ორშაბათს გაზეთს მიიღებთ თქვენთვის სასურველ მისამართზე.
Screen shot 2016-04-03 at 11.06.58 PM

გამომცემლობა „რადარამი“ ახალი წიგნით ბათუმში

3 აპრილს ბათუმში, ლიტერატურულ კაფეში, გამომცემლობამ „რადარამი“ ტომ ვანდერბილთის წიგნის „საგზაო მოძრაობა: რატომ ვატარებთ მანქანას ისე, როგორც ვატარებთ [და რას ამბობს ეს ჩვენ შესახებ]“ თარგმნის პრეზენტაცია გამართა.

წიგნის ქართული საზოგადოებისთვის აქტუალობასა და მნიშვნელობაზე ედო მჟავანაძემ და „რადარამის“ წარმომადგენელმა მარიამ ადუაშვილმა ისაუბრეს.

გამომცემლობამ პრეზენტაციის დამსწრეებს წიგნი საჩუქრად გადასცა.

„ორგანიზაცია წიგნების გავრცელებას საქართველოს ყველა რეგიონში აპირებს ისეთ ფასად, რომელიც ხელმისაწვდომი იქნება ნებისმიერი მსურველისთვის“, – აღნიშნულია პრესრელიზში.

ტომ ვანდერბილთის ეს წიგნი 2008 წელს გამოიცა და უკვე ოცზე მეტ ენაზე ითარგმნა, ის დღემდე “New York Times”- ის, „Washington Post“-ისა და „Amazon“-ის ყველაზე მოთხოვნადი წიგნების სიაშია.

ბათუმში ველომარათონი გაიმართება

6 აპრილს, 17:00 საათზე, ბათუმში, მერიის სპორტულ-ახალგაზრდული ცენტრის ორგანიზებით, ველომარათონი გაიმართება.

მარათონი სტარტს აიღებს ბათუმის საერთაშორისო აეროპორტის ტერიტორიიდან, ხოლო ფინიში საოცრებათა პარკში [Miracle Park] იქნება.

ველომარათონში ნებისმიერ მსურველს შეეძლება მონაწილეობის მიღება.

ბათუმის მერიის სპორტულ-ახალგაზრდული ცენტრის მიერ, სოციალურ ქსელ „ფეისბუქში“ გავრცელებული ღონისძიების აღწერაში ვკითხულობთ, რომ ტურნირის პირველ-მეორე ადგილზე გასულ და ყველაზე უხუცესსა და ყველაზე ახალგაზრდა მონაწილეს გადაეცემათ სპორტული მაღაზიის ვაუჩერები:
პრიზები: პირველი ადგილი: 700 ლარიანი ვაუჩერი
მეორე ადგილი: 500 ლარიანი ვაუჩერი
მესამე ადგილი: 300 ლარიანი ვაუჩერი
ყველაზე უხუცესი მონაწილე 150 ლარიანი ვაუჩერი!
ყველაზე ახალგაზრდა მონაწილე 150 ლარიანი ვაუჩერი. 

მარათონში მონაწილეობისათვის მსურველებმა ელექტრონულ ფოსტაზე [batumisport.youth@gmail.com] უნდა გააგზავნონ პირადი  მონაცემები [სახელი; გვარი; პირადი ნომერი; საკონტაქტო ტელეფონი]. 

 

 

13 წლის ზურაბ კინწურაშვილის წარმატება ტაეკვონდოში

13 წლის ბათუმელმა სპორტსმენმა ზურაბ კინწურაშვილმა ამერიკის მსოფლიო ტაეკვონდოს ღია ჩემპიონტში [US World Open Taekwondo Championships] გაიმარჯვა. მან ფინალურ ბრძოლაში მექსიკელი სპორტსმენი დაამარცხა.

აჭარის ტაეკვონდოს ფედერაციის პრეზიდენტის ირაკლი ცენტერაძის თქმით, ზურაბ კინწურაშვილმა გასულ წელს 5 საერთაშორისო მედალი მოიგო. იგი ამ ეტაპზე კადეტებში თამაშობს, ხოლო მომავალ წელს გადადის იუნიონების კატეგორიაში.

12670675_221857648173419_9176038444022318130_n

13 წლის ჩემპიონი საქართველოს ევროპის ჩემპიონატზეც წარადგენს, რომელიც ოქტომბერში გაიმართება.

ზურაბ კინწურაშვილი და მისი პირადი მწვრთნელი აკაკი ცენტერაძე საქართველოში 7 აპრილს დაბრუნდებიან.

 

მასალის სათაური ჩასწორებულია.

რა უნდა იცოდნენ აჭარაში მეღვინეებმა

როგორ შეიძლება საოჯახო პირობებში ხარისხიანი ღვინის დაყენება, რას კრძალავს ვაზისა და ღვინის წარმოების შესახებ არსებული ტექნიკური რეგლამენტი და რა უნდა გაითვალისწინონ ფერმერებმა ღვინის დაყენებისას? – ამ საკითხებზე „ბათუმელები“ მეღვინეს, მებაღეობა-მევენახეობისა და ღვინის სამეცნიერო ინსტიტუტის დამფუძნებელს, დავით თამარაშვილს ესაუბრა.

ბატონო დავით, რა პრობლემებს ხედავთ ღვინისა და ყურძნის წარმოებაში აჭარის რეგიონში და როგორ შეიძლება ამ პრობლემების მოგვარება?

აჭარის მეღვინეობაში ყველაზე დიდი პრობლემა ჰიბრიდული ვაზის ჯიშებია, რომლებიც რეგიონში ფართოდაა გავრცელებული. ამ ჯიშის ვაზი იმ სტანდარტებს არ შეესაბამება, რაც ხარისხიანი ღვინის წარმოებისთვის არის საჭირო. აუცილებელია ჯიშთა იდენტიფიკაცია და ჰიბრიდული ჯიშების ჩანაცვლება კულტურული ვაზის ჯიშებით. აგროსერვისცენტრთან ერთად შემოდგომაზე დაგეგმილი გვაქვს ექსპედიცია, რა დროსაც მოხდება ჯიშების აპრობაცია, ჩამოვივლით ვენახებს და მოვნიშნავთ ყველა ჰიბრიდული ვაზის ჯიშს, რომლისგანაც ღვინო არ უნდა დააყენონ. მებაღეობა-მევენახეობის სამეცნიერო ინსტიტუტი ამას იმისთვის აკეთებს, რომ აჭარაში დავიცვათ ყველა ის სტანდარტი, რასაც ხარისხიანი ღვინის წარმოება ითხოვს. ჰიბრიდული ვაზისგან არ შეიძლება ხარისხიანი ღვინო დაიწუროს. ამ ღვინოს სპეციფიკური გემო აქვს.

ყველაზე მეტად რომელი ჰიბრიდული ჯიშია გავრცელებული აჭარაში?

მაგალითად, ჭეიშვილი. თიქმის ყველა ოჯახს აქვს ყურძნის ეს ჯიში გაშენებული. ჰიბრიდულია იზაბელა, ე.წ „ადესა“, რომელიც ოდესიდან არის შემოტანილი. არის სხვა ჰიბრიდული ჯიშებიც, მაგრამ კონკრეტულად რომელ ლოკალურ ადგილში რა ჰიბრიდული ჯიშია გაშენებული, ამის ზუსტი მონაცემები მაშინ გვექნება, როდესაც აპრობაციას გავივლით, ანუ ჯიშების გავარჩევთ.

ღვინის წარმოების შესახებ მოქმედი რეგლამენტი რას კრძალავს?

რეგლამენტი ჰიბრიდული ვაზის ჯიშიდან ღვინის წარმოებას კრძალავს. ვაზისა და ღვინის შესახებ კანონში და ტექნოლოგიურ რეგლამენტში გაწერილია, რომ ღვინო კულტურული ვაზის ჯიშებით უნდა იწარმოებოდეს და არაჰიბრიდული ყურძნით. რეგლამენტში არსებობს ჩამონათვალი კულტურული ვაზის ჯიშების, რომელთაგანაც შეიძლება ღვინის დაყენება, შესაბამისად, ეს უნდა იცოდნენ ღვინის მწარმოებლებმა.

აჭარაში გავრცელებული ვაზის ჯიშებიდან, რომელია საუკეთესო თვისებების მქონე ღვინის დასაყენებლად?

აჭარაში გავრცელებული ვაზის ჯიშები კახეთსა და იმირეთში გავრცელებულ ვაზის ჯიშებს არ ჩამოუვარდება. ასეთია, მაგალითად, საწური, ჩხავერი, ცოლიკაური, ციცქა…. აჭარაში გავრცელებული ვაზის ჯიშების კოლექცია აგროსერვისცენტრის საკოლექციო ნაკვეთზეა თავმოყრილი: აჭარელ მევენახეებს აქვთ საშუალება აგროსერვის ცენტრში შეიძინონ ნერგები და საკარმიდამო თუ სამრეწველო ბაღებში გააშენონ ვაზი ხარისხიანი ღვინის საწარმოებლად. მევენახეებმა ფოკუსირება უნდა გააკეთონ იმ ჯიშებზე, რომლებიც იძლევა ხარისხიან ღვინოს.

საოჯახო პირობებში ღვინის დასაწურად რამდენად მნიშვნელოვანია ტექნოლოგიური ჭურჭლის სწორად შერჩევა, მაგალითად, აჭარაში, ძირითადად, პლასტმასის ჭურჭელს იყენებენ. შეიძლება მისი გამოყენება?

აქ მნიშვნელოვანი ის არის, როგორი პლასტმასია. თუ ის კვების ინდუსტრიის მარკით არის, შესაძლებელია მისი გამოყენება, მაგრამ თუ ამ ხაზით არ არის გაკეთებული _ არ შეიძლება, გემოს აძლევს ღვინოს. მნიშვნელოვანია არა მარტო ის, თუ რომელ ტექნოლოგიურ ჭურჭელს გამოიყენებ და რა ტექნოლოგიურ დანადგარებს, არამედ ისიც, თუ როგორ მოუვლი ვაზს. მეღვინეობაში ღვინის დაყენების დროს ხარისხის ძირითადი ნაწილი ყურძნის ხარისხზე მოდის _ თუ ყურძენი ხარისხიანია, ღვინოც ხარისხიანი იქნება.

როგორ შეიძლება ხარისხიანი ყურძნის წარმოება – ღვინის დაყენება?

პირველი: ჰიბრიდული ჯიში უნდა გაიმიჯნოს კულტურულისგან და მეორე – რაც ძალიან მნიშვნელოვანია: ვაზის მოვლა, გასხვლა სწორი ტექნოლოგიური სქემით. სისტემური, თუ კონტაქტური პრეპარატები, სასუქები და პესტიციდები უნდა გამოიყენოს მევენახემ იმ დოზით, რაც არ გააფუჭებს ყურძენს. მევენახეებმა აუცილებლად უნდა მიმართონ სპეციალიზებულ მაღაზიებს, სადაც კვალიფიციური სპეციალისტები მუშაობენ და მათი რეკომენდაციებით შეიძინონ პრეპარატები. ფალსიფიცირებული პრეპარატების გამოყენებით ვაზის დაზიანება გარდაუვალია.

ფალსიფიცირებული შხამქიმიკატების პრევენციის ღონისძიებები დღეს არსებობს, მაგრამ აღსრულების მექანიზმი მოუქნელია, რის გამოც ბაზარზე უხარისხო პროდუქცია ხვდება. მევენახე დაზღვეული რომ იყოს რისკებისგან, აუცილებლად სპეციალიზებულ მაღაზიებს უნდა მიმართოს, მასთან დადოს ხელშეკრულება – თუ ვენახი დაზიანდება პრეპარატის გამოყენებით, მაშინ პასუხი იმან უნდა აგოს, ვინც მევენახეს ეს პრეპარატი მიაწოდა.

ყურძნის გემო-თვისებაზე გავლენას ახდენს თუ არა ფალსიფიცირებული პრეპარატი?

აქამდე საქმე აღარ მიდის – ვენახი, ნაყოფი ნადგურდება.

როგორია სახელმწიფოს როლს ღვინის წარმოებაში?

აუცილებელია ადგილობრივ ბაზარზე ხარისხის კონტროლი. თუ ხარისხის კონტროლი ეფექტური იქნება, მევენახეობა-მეღვინეობა განვითარდება.

აჭარაში ღვინის ტურიზმის განვითარების შესაძლებლობას თუ ხედავთ?

ღვინის ტურიზმს დიდი პოტენციალი აქვს, მაგრამ, რაც უნდა აწარმოოს აჭარაში მეღვინემ, მევენახემ თუ ფერმერმა, ყველაფერი ხარისხიანი უნდა იყოს.

ფოტოზე: რთველი 2015 აჭარის აგროსერვისცენტრში.

37 სტუდენტი ინდოეთიდან ბათუმში

აშიშ გულია და ვაიბჰავ ბაბელი ბათუმის შოთა რუსთაველის სახელმწიფო უნივერსიტეტის სამედიცინო ფაკულტეტის პირველი კურსის სტუდენტები არიან, ინდოეთიდან. მათ კურსზე სულ 37 ინდოელი სტუდენტი სწავლობს. ისინი ბათუმში დაახლოებით ერთი თვის წინ ჩამოვიდნენ. „ბათუმელები“ დაინტერესდა, თუ რატომ აირჩიეს ეს უნივერსიტეტი ინდოელმა ახალგაზრდებმა.

აშიშმა და ვაიბჰავმა ინფორმაცია ბათუმის შოთა რუსთაველის სახელმწიფო უნივერსიტეტის შესახებ მეგობრისგან მიიღეს, რომელიც უკვე აქ სწავლობდა. მათ მეგობარმა უთხრა, რომ ბსუ-ში ჩაბარება გაცილებით მარტივად და სწრაფად იყო შესაძლებელი და გარდა ამისა, გადასახადი ინდოეთის სახელმწიფო უნივერსიტეტების გადასახადებთან შედარებით მცირედით, მაგრამ მაინც დაბალი იყო. თუმცა, ბიჭები ამბობენ, რომ არჩევანი ფასის გამო არ გაუკეთებიათ.

„ინდოეთში სახელმწიფო უნივერსიტეტები ბევრად ხელმისაწვდომია ფინანსურად, მაგრამ სამედიცინო ფაკულტეტზე ჩარიცხვა ძალიან რთულია, კონკურსი ძალიან მაღალია და ჩაბარებას მხოლოდ გამორჩეულები ახერხებენ. შეიძლება ნიჭიერი იყო, მაგრამ მაინც გარეთ დარჩე. გამოცდები უამრავ ასპექტს მოიცავს, მოუმზადებლად ვერ ჩააბარებ, სკოლის მომზადება საკმარისი არ არის, ისე კი, ძალიან დიდ თანხასთანაა დაკავშირებული“, – ყვება ვაიბჰავი. მისი თქმით, ამავე მიზეზის გამო მან არ აირჩია გერმანიის ან სხვა განვითარებული ქვეყნის უნივერსიტეტები: „ზოგადად, ეს ფაკულტეტი არის ძალიან რთული, განვითარებული ქვეყნების უნივერსიტეტები, როგორიცაა გერმანია, მთელ რიგ გამოცდებს ითხოვენ, გამოცდა, გამოცდა, ინტერვიუ… ამისთვის მომზადებაც ძვირი ჯდება. ან სკოლიდან უნდა გქონდეს გადაწყვეტილი და მიზნად დასახული“, – ამბობს ვაიბჰავი, მას აშიშიც ეთანხმება.

„ბათუმელები“ დაინტერესდა, თუ რა პროცედურები გაიარეს მათ ბსუ-ში მოსახვედრად და რა დროში მოახერხეს ეს.
„ფაქტობრივად, გამოცდებზე დიდი დრო არ დაგვიხარჯავს. ჩვენ გვყავს იქ, საზღვარგარეთ სწავლის აგენტი. ვუთხარით მას, რომ გვინდოდა წამოსვლა ამ უნივერსიტეტში, რაც შეიძლებოდა მოკლე დროში. ერთ თვეში მოხერხდა. ჩვენ სკოლის სერტიფიკატი წარმოვადგინეთ და აპლიკაცია. სკოლის ნიშნებზე იყო ბარიერი, უნდა ყოფილიყო მინიმუმ 65% თუ 70%“, – იხსენებენ სტუდენტები.

ქალაქის არჩევისას აშიში და ვაიბჰავი ცდილობდნენ პატარა, მშვიდი ქალაქი შეერჩიათ. ბათუმმა ამ მხრივ მათი მოლოდინი გაამართლა.

„როცა ინტერნეტში ინფორმაციას ვეძებდი, წავიკითხე, რომ ბათუმი წვიმის ქალაქია. სიმართლე გითხრათ, აღმოვაჩინე, რომ სულ არაა ასე, წვიმს, მაგრამ მოლოდინი, რომ წვიმა შემაწუხებდა, საბედნიეროდ, არ გამართლდა. მომწონს, რომ პოპულაციის დაბალი მაჩვენებელია ჩვენს ქალაქებთან შედარებით. იქ ქუჩებში მუდამ ხალხი ირევა, ყველა სადღაც გარბის, აქ ამ მხრივ სიმშვიდეა“, – ამბობს აშიში. ახალჩამოსულები იყვნენ, რომ უნივერისტეტის პირველკურსელთა დასახვედრი წვეულება გაიმართა სასტუმრო „ლეოგრანდში“, რომელსაც ყველაზე სასიამოვნოდ იხსენებენ.

„ძალიან კარგი იყო, მუსიკა, გართობა, ერთმანეთიც გავიცანით. მას შემდეგ იმის გამო, რომ ჩვენ გარკვეული მასალის სწრაფად გავლა გვიწევს, დატვირთული ცხრილი გვაქვს, თან ენის ბარიერია და აქაურ სტუდენტებთან დაახლოების საშუალება არ მოგვეცა“, – ყვებიან ბიჭები.

პირველი რამდენიმე თვის განმავლობაში, ვაიბჰავი და აშიში უნივერსიტეტში ქართულ ენას სწავლობდნენ. მათ ქართულად წერა-კითხვა ელემენტარულ დონეზე უკვე შეუძლიათ, თუმცა სასწავლო კურსს ინგლისურ ენაზე გადიან.

ვაიბჰავი და აშიში, სხვა 35 თანამოქალაქე კურსელთან ერთად, ბათუმის ერთ-ერთ სასტუმროში ცხოვრობენ და თვეში 25 დოლარს იხდიან. გეგმები არ აქვთ, რადგან, როგორც ამბობენ, სამედიცინოს პირველი საფეხური საკმაოდ ხანგრძლივია და არავინ იცის რა მოხდება. პროფესიული მიმართულებაც არ აურჩევიათ: „ქირურგია და კარდიოლოგია კარგია, მაგრამ ძალიან რთულია, კარგად უნდა განვსაზღვრო, შევძლებ თუ ვერა“, – ამბობს ვაიბჰავი.

კულტურა, გარემო, უნივერსიტეტი და სასწავლო პროცესი მოსწონთ, მაგრამ აშიში ამბობს, რომ ისურვებდა სწავლის გარე აქტივობებში ჩართვის შესაძლებლობა ჰქონოდათ. ვაიბჰავი ამბობს, რომ ამ ეტაპამდე გადატვირთული იყო სასწავლო განრიგი, რადგან დაგვიანების გამო, გარკვეული მასალა მოკლე დროში დაჩქარებულ რეჟიმში გაიარეს, მაგრამ იმედოვნებს, რომ ამის შემდეგ სხვა აქტივობებში ჩართვასაც შეძლებს.

ინდოელი სტუდენტები
ინდოელი სტუდენტები

რატომ არის რთული პედაგოგთა საგნობრივი გამოცდის ტესტები

პედაგოგთა ბოლო საგნობრივ გამოცდაზე დაწესებული ბარიერი 6 477 პედაგოგიდან 5 376-მა ვერ გადალახა. პედაგოგები მათ მიმართ კრიტიკას სოციალურ ქსელებში გამოეხმაურნენ, სადაც ისინი ტესტების სირთულეზე წერენ. არის თუ არა პედაგოგთა საგნობრივი გამოცდის ტესტები დაუძლეველი, როგორც ამას პედაგოგთა ერთი ჯგუფი მიიჩნევს, თუ პრობლემა დროის მენეჯმენტშია?

პედაგოგთა საგნობრივი გამოცდების ტესტების ნიმუშები განთავსებულია შეფასებისა და გამოცდების ეროვნული ცენტრის ვებგვერდზეც. ტესტების პასუხები სხვადასხვა ქულით ფასდება. ავიღოთ დაწყებითი კლასის მასწავლებლის გამოცდის ტესტის ერთ-ერთი ნიმუში, სადაც უმაღლესი ქულა არის 3. მოცემულ დავალებაში პედაგოგმა უნდა აჩვენოს “მწყობრი და დამაჯერებელი მსჯელობა“.

მაგალითად, მასწავლებელმა მგელთან დაკავშირებულ სტერეოტიპებზე უნდა შეძლოს დამაჯერებლად მოიყვანოს ადეკვატური მაგალითები ზღაპრებიდან, სადაც მგელი დადებითი პერსონაჟია და მეოთხე კლასის მოსწავლეებისთვის გასაგებ ენაზე ახსნას, რატომ არის საჭირო მგლის შესახებ სტერეოტიპული წარმოდგენებისგან გათავისუფლება. თუ ამ მოთხოვნებს პედაგოგი სწორ პასუხს გასცემს, ამ დავალებაში ყველაზე მაღალ, ანუ სამ ქულას აიღებს. პედაგოგს პასუხში ნული ქულა დაეწერება იმ შემთხვევაში, თუ მგელთან დაკავშირებულ სტერეოტიპებზე იმსჯელებს ზედაპირულად, დაასახელებს მხოლოდ ნაწარმოებს, სადაც მგელი დადებითი პერსონაჟია ან წარმოდგენილი მსჯელობა იქნება არასწორი.

დაწყებითი საფეხურის ერთ-ერთმა პედაგოგმა ნანა ჯანაშვილმა ფეისბუქზე „ბათუმელებს“ მოსწერა: “გადახედეთ ტესტებს, თითქმის 9 კლასის დონეზე სთხოვენ მასწავლებლებს. ეს მათ არაფერში სჭირდებათ. ტესტები ისეა შედგენილი, რომ პედაგოგების უმრავლესობა ვერ მოასწრებს დაწერას, რომც იცოდნენ“.

პედაგოგის აზრით, ამას განათლების სამინისტრო გამიზნულად აკეთებს, „რადგან სერტიფიცირებული მასწავლებელი ხელფასის გარდა იღებს დანამატს, ეს კი ბიუჯეტიდან დამატებითი თანხის გადინებას უწყობს ხელს. თუ ვინმე ხმას ამოიღებს, სამსახურს დაკარგავს, ამიტომ ჩუმდებიან“.

ნათელა ნაკუბაიძის აზრით, რომელიც პედაგოგთა გამოცდებს ასევე სოციალურ ქსელში ეხმიანება, წერს:„მასწავლებელი უნდა შეფასდეს იმით, თუ რა შედეგი მიიღო და არა იმით, თუ რას აკეთებს ამ შედეგისთვის“.

„განა ვერ გაიხსენებს პედაგოგი იმ ყველაფერს, მაგრამ იქაც ჩახლართულია საკითხები. მათი ენით რომ გითხრათ, ფეხწამოსაკრავი საკითხები ბევრია, რასაც დაფიქრება და დრო სჭირდება. 5 საათში ძნელია ყველაფრის მოსწრება“, – გვწერს ნანა ჯანაშვილი, რომელიც დროის სიმცირეზეც საუბრობს: „წელს პირველად ტექსტის გააზრებით დავიწყე და არც ერთი შეცდომა არ მქონდა, მაგრამ დიდი დრო წამართვა, მერე თემის დაწერა დავიწყე და მათემატიკისთვის აღარ დამრჩა დრო. სიჩქარის გამო შეცდომები დავუშვი. განა მთელი მათემატიკა აზროვნებას არ მოითხოვს? ასევეა ზედა საფეხურის ტესტებიც. იქ მოცემული რთული საკითხები მასწავლებელს პრაქტიკაში არ სჭირდება. მოკლედ, ტესტი უნდა იყოს მასწავლებლის საჭიროებებზე მორგებული“.

შეფასებისა და გამოცდების ეროვნული ცენტრის დირექტორის მოადგილე ივა მინდაძე ცალკეული პედაგოგების პრეტენზიებს არ ეთანხმება და ამბობს, რომ ტესტები განსაზღვრულ დროში მოსწრებადია და ის მასწავლებლის პროფესიულ სტანდარტს ეყრდნობა.

„არა მგონია რეალურად არსებობდეს დროის პრობლემა. ტესტები აპრობირებულია და ხუთი საათი ამ დავალებების შესასრულებლად, რაც ტესტებშია მოცემული, სავსებით საკმარისია. ეს გამოცდები რამდენიმე წელია ტარდება და ამ ხნის განმავლობაში ათასამდე ადამიანმა წარმატებით გაართვა თავი. თუ მასწავლებელი ამბობს, რომ დრო არ ეყო, ესე იგი, მას დროის განაწილების პრობლემა აქვს“.

ივა მინდაძე პედაგოგების მოსაზრებას, თითქოს განზრახ არის ტესტები ჩახლართული, არ ეთანხმება. „განზრახ არაფერი არ იხლართება. ნებისმიერ მსურველს შეუძლია ნახოს ეს ტესტები და ვნახავთ, რომ კრიტიკა რეალობას არ შეესაბამება“.

ივა მინდაძის თქმით, პედაგოგთა საგამოცდო ტესტები მასწავლებლის პროფესიულ სტანდარტსა და ეროვნულ სასწავლო გეგმას ეყრდნობა.

„საერთაშორისო კვლევები, რომლებიც პერიოდულად ტარდება, აჩვენებს როგორც სკოლაში არსებულ ხარისხს, ასევე ქვეყნის პროგრესს მსოფლიოს ქვეყნებთან შედარებით და ვითარება ნამდვილად არ არის სახარბიელო. სკოლაში ხარისხის პრობლემა მწვავედ დგას, რასაც რამდენიმე ფაქტორი განაპირობებს, მათ შორის პედაგოგთა კვალიფიკაცია“.

რაც შეეხება ტექნიკურ დეტალებს. პედაგოგების თქმით, ზამთარში ჩატარებული გამოცდების დროს არ იყო გათბობა ჩართული, რის გამოც პედაგოგებს რთულ პირობებში მოუხდათ მუშაობა.

ივა მინდაძის თქმით, პედაგოგთა ტესტირება იმ სკოლებში ტარდება, სადაც ინფრასტრუქტურა მეტ-ნაკლებად მოწესრიგებულია: „მე როგორც ვიცი, გათბობა ამ სკოლებში გამოცდებამდე რამდენიმე დღით ადრე ჩაირთო. ვეთანხმები იმას, რომ სასკოლო ინფრასტრუქტურა საჭიროებს დახვეწას, მაგრამ ეს ბევრად უფრო საგანგაშო მგონი მოსწავლეებისთვის არის და არა მასწავლებლებისთვის“.

მასწავლებელთა პროფესიული განვითარების ეროვნული ცენტრის ინფორმაციით, პედაგოგებს ცენტრის ხელშეწყობით საგნობრივი ტრენინგები უტარდებათ, მაგრამ „როგორ უნდა იმუშაონ ტესტზე, ამ მიმართულებით მათ ტრენინგები არ ჩატარებიათ“.

ბათუმში აუტიზმის შესახებ ინფორმაციის გავრცელების საერთაშორისო დღე აღნიშნეს

2 აპრილს, აუტიზმის შესახებ ინფორმაციის გავრცელების საერთაშორისო დღესთან დაკავშირებით, ბათუმის დემოკრატიული ჩართულობის ცენტრში საინფორმაციო შეხვედრა გაიმართა. შეხვედრას ორგანიზებას უწევდა არასამთავრობო ორგანიზაცია „ცვლილებები თანაბარი უფლებებისათვის“.

„შეხვედრა ინფორმაციული ხასიათის იყო. გვინდა საზოგადოება აუტიზმთან დაკავშირებული სტიგმებისა და სტერეოტიპებისაგან გათავისუფლდეს. ასევე, სახელმწიფოს აკისრია დიდი როლი აუტისტური სპექტრის მქონე პირებისათვის შესაბამისი პროგრამების შექმნაზე, რაც მათ ცხოვრებას გაამარტივებდა“, – ამბობს არასამთავრობო ორგანიზაცია „ცვლილებები თანაბარი უფლებებისათვის“ ხელმძღვანელი თომა კაკაბაძე. მისი ინფორმაციით,  აჭარაში აუტიზმის მქონე მხოლოდ 25 პირი სარგებლობს ჯანდაცვის პროგრამებით, რაც ძალიან მცირე რიცხვია და არ ასახავს აჭარაში აუტიზმის მქონე პირთა საერთო რაოდენობას.

შეხვედრაზე იმყოფებოდნენ ადამიანები, რომელთა ახლობლები აუტიზმის მქონენი არიან. ერთ-ერთი მომხსენებელი აუტისტური სპექტრის მქონე პირის მშობელი იყო, რომელმაც იმ პრობლემებზე ისაუბრა, რასაც საზოგადოებაში აწყდება და იმ საჭიროებებზე, რომლებიც აუტისტური სპექტრის მქონე ადამიანებსა და მათი ოჯახის წევრებს აქვთ.

მოხსენებების შემდეგ აუტიზმის თემატიკაზე მომზადებული ვიდეორგოლები აჩვენეს: „ვეცადეთ, უფრო მარტივად გვეჩვენებინა საკითხი, რომ ახალგაზრდები მიხვდნენ აუტიზმის მქონე პირთა შესახებ დამკვიდრებული სტერეოტიპების აბსურდულობას“, – ამბობს თომა კაკაბაძე.

“სახიფათოა იყო მართალი, როცა მთავრობა ცდება”

სათაურში მითითებული ციტატა ეკუთვნის ფრანგ ფილოსოფოსს ფრანსუა მარი არუეს.

გიორგი თავაძე, ეკონომიკის მეცნიერებათა აკადემიური დოქტორი, ენერგეტიკის აკადემიის ნამდვილი წევრი

ერთ სულ მოსახლეზე მთლიანი შიგა პროდუქტის რაოდენობის მიხედვით სახელმწიფოები განვითარებულ და განვითარებად ქვეყნებად იყოფიან. თუკი ევროპაში ერთ სულზე წელიწადში 13000 აშშ დოლარის მშპ ითვლება ზღვრად, რომლის აქეთ სიღარიბე იწყება, სამხრეთ ამერიკაში (არგენტინა) ის 8760 დოლარია, სამხრეთ აფრიკაში 740$, ხოლო ჩინეთში სულ 185. საქართველო გაეროს წევრი 186 ქვეყნიდან იმ 132 ქვეყანას შორის აღმოჩნდება, რომელთაც არც თუ საამაყო ტერმინით – განვითარებად ქვეყნებად იხსენიებენ. ამ დელიკატური ტერმინის ქვეშ, უფრო ხშირად, ღარიბი ქვეყნები მოიაზრებიან, რომელთა შორის, ერთ სულზე 3720 დოლარით, „საპატიო“ 116-ე ადგილი უკავია საქართველოს.

ვისი და რისი ბრალია, რომ ქვეყნების ერთი ნაწილი სიღარიბეში იხრჩობა?

განვითარებული ქვეყნების უმეტესობა ევროპას ეკუთვნის, მაგრამ მარტო ევროპელობა რომ სიმდიდრის გარანტიას არ იძლევა, კარგად ჩანს რიგი ქვეყნების მაგალითზე (ბულგარეთი – 6580$ მშპ ერთ სულზე; უკრაინა – 2110$; მოლდავეთი – 1740$). როგორც მდიდარ, ისე ღარიბ ქვეყნებს სახელმწიფო მოწყობის ფორმები და ეკონომიკური მოდელებიც ხშირად მსგავსი აქვთ. ამდენად, პოლიტიკური მოწყობის ფორმას ან ეკონომიკურ მოდელებს დავაბრალოთ სიმდიდრე თუ სიღარიბე, მართებული არ იქნება. ერთი რამ მაინც თვალშისაცემია: განვითარებული ქვეყნების უმრავლესობა თავისუფალი საბაზრო ურთიერთობების დემოკრატიული ქვეყნებია, თუმცა, ნაკლები დემოკრატიის ისეთი ქვეყნებიც არსებობენ (სინგაპური, იაპონია, ტაივანი, სამხრეთ კორეა…), სადაც მშპ-ც მაღალია და ცხოვრების დონეც.

სიღარიბეს მრავალი მიზეზი აქვს და ამას ეკონომისტები შვიდ ფაქტორად აჯგუფებენ:

1. ეკონომიკური (უმუშევრობა, დაბალი ანაზღაურება, დაბალი შრომისნაყოფიერება).
2. სოციალურ-სამედიცინო (შშმ, სიბერე, ავადმყოფობა),
3. დემოგრაფიული (არასრული ოჯახები, უმუშევრების სიმრავლე ოჯახში).
4. კვალიფიკაციური (განათლების დაბალი დონე, პროფესიონალიზმი).
5. პოლიტიკური (ომები, კონფლიქტები, იძულებითი მიგრაციები).
6. რეგიონალურ-გეოგრაფიული (რეგიონების არათანაბარი განვითარება, ბუნებრივი რესურსების სიმწირე).
7. რელიგიურ-ფილოსოფიური და ფსიქოლოგიური (ასკეტიზმი).

ჩამოთვლილ ფაქტორთაგან ზოგი სახელმწიფო მასშტაბისაა, ზოგიც პიროვნული დონის. ცხადია, რაც სახელმწიფო მასშტაბისაა, მისი წარმოშობა ყოფილი ხელისუფლებების ბრალია და მათი მოგვარება (ხელისუფლების მემკვიდრეობითობის პრინციპიდან გამომდინარე) მოქმედი ხელისუფლების მოვალეობაა, მაგრამ სწორედ აქ ვაწყდებით სერიოზულ პრობლემას, რომელმაც ეკონომიკური პარანოიას სახე მიიღო.

მიუხედავად არც თუ ხელშესახები ეკონომიკური წარმატებებისა, ხელისუფლება ჯიუტად აგრძელებს ბენდუქიძის ნაანდერძევს _ ეკონომიკაში მთავრობის ჩაურევლობის ლიბერტარიანულ პოლიტიკას და შეუზღუდავი კონკურენციისთვის აქვს მინდობილი ისეთი მაკროეკონომიკური ფაქტორების კონტროლი, როგორიცაა: ინფლაცია, უმუშევრობა, მოთხოვნა-მიწოდების საბაზრო წონასწორობის დაცვა.

არავინ დავობს, რომ ეფექტიანობის მხრივ თავისუფალ კონკურენციას კონკურენტი არ ჰყავს, მაგრამ ეკონომიკისა და შრომის სწორი ორგანიზებისას განსხვავებული ეკონომიკური სისტემების პირობებშიც არის წარმატებების მიღწევა შესაძლებელი.

კითხვაზე – სახელმწიფოს მხრიდან ჩარევის შემთხვევაში უკეთ მუშაობს ეკონომიკა, თუ ასეთი ჩარევის გარეშე, ცალსახა პასუხის გაცემა რთულია. თუ აშშ-ის მაგალითზე ვიმსჯელებთ, სახელმწიფო არ უნდა ჩაერიოს ეკონომიკის მართვაში, რადგან „წმინდა“, საწარმოო კაპიტალიზმმა, ეკონომიკაში ჩაურევლობამ, უზრუნველყო მსოფლიოს ყველაზე განვითარებული ეკონომიკის შექმნა.

თუ სოციალური და კოლექტიური კაპიტალიზმის ქვეყნების (გერმანია, ნორვეგია, შვედეთი, იაპონია, სამხრეთ კორეა…) მაგალითზე ვიმსჯელებთ, სახელმწიფოს მხრიდან ეკონომიკაში ჩარევას კარგის მეტი არაფერი მოუტანია და მოსახლეობის სოციალური საკითხებიც გაცილებით უკეთაა მოგვარებული, ვიდრე აშშ-ში.

ჩვენი აზრით, ეკონომიკაში ჩარევაც და არჩარევაც ეკონომიკაზე ზემოქმედების ხერხებია და ვინც სწორად იყენებს მათ, წარმატებასაც ის აღწევს. ყველაფერი მთავრობის კომპეტენტურობაზეა დამოკიდებული, რომლის მოვალეობაა სწორად განსაზღვროს რა დროს რომელი მეთოდი გამოიყენოს და პარანოიდულად არ აიკვიატოს რომელიმე ერთის უპირატესობა.

თავისუფალ კონკურენციას მაშინ მოაქვს სიკეთე, როცა თავისუფალ ბაზარზე ერთმანეთთან კონკურენციაში კონკურენტუნარიანი სუბიექტები შედიან. ჩვენთან კი, სადაც ეროვნული ვალუტის კურსი ქართველი ბეიბისიტერების გამოგზავნილ ას-ას დოლარზეა დამოკიდებული, ვინ ვისთან უნდა შევიდეს კონკურენციაში? ვინ უნდა ააშენოს ახალი სამრეწველო საწარმოები?

ის, რომ ჩვენი ფერდებჩაცვენილი ეკონომიკა ჭაობში ჩავარდნილ ბარონ მიუნჰაუზენივით თავისთავს ამოათრევს ჭანჭრობიდან, თავის მოტყუებაა.

თუ მთავრობა დროულად არ ჩაერევა ეკონომიკაში და არ შექმნის პირობებს თავისუფალ კონკურენციაზე გადასასვლელად, დიდი დრო გავა, სანამ ქართველი გლეხი ფერმერად, ხოლო დამწყები მეწარმე შეძლებულ ბიზნესმენად ჩამოყალიბდება.

ფრანსუა მარი არუეს სათაურად გამოყენებული შეგონების თანახმად არამარტო პიროვნებისთვის, ქვეყნისთვისაც სახიფათოა, როცა მთავრობა ცდება, რადგან მთავრობის თუნდაც უნებლიე შეცდომები ძვირი უჯდება ხალხს.

ტენდერები, გამქრალი კომპანია და გადათხრილი უბანი ქობულეთში

ორჯერ გამოცხადებული ტენდერის მიუხედავად, ქობულეთის გამგეობა ჯავახიშვილის უბნის კეთილმოწყობის დასასრულებლად 700 ათას ლარს გამარტივებული შესყიდვით დახარჯავს. გამგეობამ შესყიდვების სააგენტოს თანხმობა უკვე მიიღო და ახლა აჭარის მთავრობის თავმჯდომარის განკარგულებას ელოდება.

ქობულეთის გამგეობაში აცხადებენ, რომ ჯავახიშვილის უბნის მოსახლეობამ, ინფრასტრუქტურის მოუწესრიგებლობის გამო, გასულ ტურისტულ სეზონზე სარგებელი ვერ ნახა. თუმცა ასობით ოჯახი ანალოგიური ვითარების წინაშეა ერთი წლის შემდეგაც.

ჯავახიშვილის უბანი ერთ-ერთი ცენტრალური უბანია, სადაც გამგეობის ინფორმაციით, ცხოვრობს დაახლოებით 300-მდე ოჯახი, განთავსებულია კერძო საოჯახო ტიპის სასტუმროები, კომერციული და გასართობი ობიექტები.

ამ უბნის კეთილმოწყობაზე ტენდერი ქობულეთის გამგეობამ 2015 წლის მარტში გამოაცხადა [1 287 200 ლარი]. მონაწილეობა ორმა კომპანიამ მიიღო – შპს „ნიუ სთეიჯ“ და შპს „გზა XXI“ [ბოლო შეთავაზება – 1 148 000 ლარი]. სატენდერო კომისიამ „გზა XXI“-ს 10 სამუშაო დღეში საბანკო გარანტიის წარდგენა მოსთხოვა; ბოლო ვადა 12 ივნისი იყო, თუმცა გარანტია წარდგენილ იქნა 15 ივნისს, რის გამოც კომისიამ კომპანიას დისკვალიფიკაცია მისცა.

კანონის მიხედვით, კომისიას ხელშეკრულების გაფორმება მეორე პრეტენდენტისთვის – შპს „ნიუ სთეიჯისთვის“ უნდა შეეთავაზებინა, თუმცა კომისიის ოქმში ვკითხულობთ, რომ „ამ კომპანიის მოწვევა ვერ იქნება მართებული, ვინაიდან მასთან გამგეობას ქუჩების კეთილმოწყობაზე ცალკე აქვს გაფორმებული ხელშეკრულება და კომპანია გეგმა-გრაფიკით ვერ ახერხებს სამუშაოს შესრულებას“. შესაბამისად, დამატებითი სამუშაოს გაჩენა კომპანიისთვის კიდევ უფრო გაართულებდა სიტუაციას, ამასთან იყო ტურისტული სეზონი, რის გამოც სატენდერო კომისიამ გადაწყვიტა გამარტივებული ტენდერი გამოეცხადებინა.

გამარტივებულ ტენდერში ოთხი კომპანია მონაწილეობდა, გამარჯვებულთან, ანუ შპს „ეფექტისთან“ 2015 წლის 24 ივლისს გაფორმდა ხელშეკრულება. კომპანიას 1 მილიონი ლარის ღირებულების სამუშაოები უნდა შეესრულებინა და ჯავახიშვილის უბანში ინფრასტრუქტურა მოეწესრიგებინა – მაქსიმუმ 120 დღეში, შესაბამისი ნებართვის მიღებიდან. თუმცა, ამ კომპანიასთან გამგეობამ 2016 წლის 18 იანვარს ხელშეკრულება გააუქმა, ვინაიდან ის „არ ასრულებდა ნაკისრ ვალდებულებას“.

ქობულეთის მინიციპალიტეტის გამგებლის, სულხან ევგენიძის განცხადებით, “კომპანიამ თავიდან კარგი ტემპით დაიწყო მუშაობა, ჰყოლია ქვეკონტრაქტორი, რომელმაც შემოიყვანა მუშები და ასრულებდა სამუშაოებს. პირველი ეტაპის სამუშაოები რომ შესრულდა, „ეფექტს“ ჩავურიცხეთ 244 ათასი ლარი, მაგრამ ჩემი ინფორმაციით, ქვეკონტრაქტორს აღარ გადაუხადა ფული [მუშების ხელფასები და ა.შ.] და მიატოვა, ფაქტობრივად, საქმე [ქვეკონტრაქტორმა უჩივლა და ნაწილი ამოიღო თანხის, სასამართლო დავა მიმდინარეობს მგონი]“.

ჯავახიშვილის ქუჩა ქობულეთში. თორნიკე თავაძის ფოტო
ჯავახიშვილის ქუჩა ქობულეთში. თორნიკე თავაძის ფოტო

გამგეობამ კომპანია ვადაგადაცილებისთვის დააჯარიმა 46 ათასამდე ლარით, რომელიც საგარანტიოთი ამოიღო. რაც შეეხება იმას, არის თუ არა კომპანიის მიერ შესრულებული სამუშაოები იმ ღირებულების, რაც მას გამგეობამ გადაუხადა? – გამგებლის თქმით – კი. თუმცა, სამხარაულის ექსპერტიზის ბიუროს შესაბამისი დასკვნები თავად კომპანიამ გააკეთებინა. „ესეც გასაკვირია, რომ გააკეთეს, თორემ ჩვენ უნდა გაგვეკეთებინა და ბიუჯეტიდან გადაგვეხადა ფული, შემდეგ დავაკისრებდით კომპანიას და უნდა გვედავა ამოღებაზე“, – აცხადებს სულხან ევგენიძე.

გამგებელი არც იმას გამორიცხავს, რომ იმ კომპანიის წარმომადგენლები, რომლებიც ვალდებულებებს ჯეროვნად ვერ ასრულებენ, ახალ ტენდერებში სხვა ფორმით – ახალი კომპანიებით მონაწილეობენ. ანუ, კომპანია იგებს ტენდერს, აჰყავს ქვეკონტრაქტორი, რომელიც უშუალოდ ასრულებს სამუშაოებს; გარკვეულ ეტაპზე კი, როცა თანხის ნაწილი ტენდერში გამარჯვებული კომპანიის ანგარიშზე გადაირიცხება, ეს კომპანია „ქრება“, ხოლო ქვეკონტრაქტორიც და დამკვეთიც შემდეგ მას ედავება. ამასთან, ხან პოულობენ ამ „კომპანიას“ და ხან ვერა.

„ეფექტისთან“ ხელშეკრულების შეწყვეტის შემდეგ ქობულეთის გამგეობამ დარჩენილი თანხის – 771 ათას 648 ლარის დახარჯვა, ტენდერისა და კონკურსის გარეშე, პირდაპირი შესყიდვის წესით გადაწყვიტა და თანხმობისთვის შესყიდვების ეროვნულ სააგენტოს მიმართა. გამგეობა ამის აუცილებლობას ამჯერადაც მოახლოებული ტურისტული სეზონით ხსნის:

„დღეის მდგომარეობით, ჯავახიშვილის უბანში საკმაოდ მძიმე მდგომარეობაა, გზები გადათხრილია, უბნის მოსახლეობა კატეგორიულად მოითხოვს სამუშაოების დასრულებას ტურისტული სეზონის დადგომამდე, წინააღმდეგ შემთხვევაში არსებობს რისკი იმისა, რომ შესაძლოა ზედიზედ მეორედ ჩავარდეს ტურისტული სეზონი. ეს კი გამოიწვევს ჯავახიშვილის უბნის მოსახლეობისთვის სოციალური სიდუხჭირის ზრდას, მათ მიერ აღებული საბანკო ვალდებულებების შეუსრულებლობას და მიაყენებს მათ დიდ ზარალს. ტურისტული სეზონი ჯავახიშვილის უბნის მოსახლეობის შემოსავლის მიღების ერთ-ერთ მნიშვნელოვან წყაროს წარმოადგენს. აღნიშნულმა გარემოებამ გამოიწვია მოსახლეობის არაერთი საჯარო ხასიათის პროტესტი და აღშფოთება“.

ქობულეთის გამგებლის ინფორმაციით, მათ უკვე შეარჩიეს სამი კომპანია და გადაუგზავნეს წერილები, რომ აქვთ გარკვეული თანხა და შესასრულებელია სამუშაოები.

„დახურული კონვერტები უკვე მოვიდა ამ კომპანიებიდან და განკარგულება როცა მოვა არჩილ ხაბაძის, შეიკრიბება კომისია და გავხსნით – ვინც დაბალ ფასს შემოგვთავაზებს, იმათთან დავდებთ ხელშეკრულებას“, – აცხადებს სულხან ევგენიძე.

გამგებლის თქმით, სხვა პრობლემური უბნები ქობულეთში არ აქვთ: „ისეთი კომპანიებია შემოსული, რომ მგონია ყველაფერს გააკეთებენ, კარგი პირი უჩანთ ჯერ… ღმერთმა დაიცვას, რამე მოხდეს სეზონისთვის. სეზონს მომზადებული დავხვდებით _ კეთდება ეზოები, ტროტუარები, სკვერი სადგურთან, მიმდინარეობს გამყოფი ზოლების მოწესრიგება და, ზოგადად, ძალიან ბევრი პროექტია ქალაქშიც და სოფლადაც“.

რაც შეეხება ჯავახიშვილის უბანს, ამ კვირაში ალბათ გაფორმდება ხელშეკრულება, გამგებელი კი სამუშაოების დასრულებას უბანში მაისის ბოლოს ვარაუდობს.

დავით სერგეენკო: პაციენტებს მალე ექნებათ ელექტრონული ბარათი

„სამედიცინო ჩანაწერების ელექტრონულ ფორმატში გადატანაზე ვმუშაობთ უკვე მეოთხე წელია. პაციენტს მალე ექნება ელექტრონული ბარათი, სადაც მისი სამედიცინო ისტორია სრულად იქნება ასახული. ნებისმიერ კლინიკაში შეეძლებათ პაციენტზე გაწეული სამედიცინო მომსახურების შესახებ ამ ბარათით გაიგონ. ეს ასევე იქნება უმძლავრესი მექანიზმი სამედიცინო ხარისხის კონტროლის,“ – განაცხადა შრომის, ჯანმრთელობისა და სოციალური დაცვის მინისტრმა დავით სერგეენკომ 2 აპრილს ბათუმის სახელმწიფო უნივერსიტეტში, სადაც ის ექიმებს შეხვდა.

„რა ფუნქცია უნდა დაეკისროს ბათუმის რესპუბლიკურ საავადმყოფოს, რომელიც ახლა შენდება, როგორია თქვენი ხედვა?“ – ეს შეკითხვა მინისტრს ამ კლინიკის ექიმმა, აკაკი ბერიძემ დაუსვა. „რესპუბლიკური საავადმყოფოს რა ისტორიული მისიაც ჰქონდა, ის უნდა შეასრულოს ისევ. ვფიქრობ, რომ ისევ მრავალპროფილური უნდა იყოს და თანაბარ პირობებში იყოს სხვა კლინიკებთან. ჯანსაღი კონკურენცია არის მთავარი პირობა, დანარჩენი თავად თქვენ, ამ კლინიკაში მომუშავე ადამიანებმა უნდა განსაზღვროთ,“ – განაცხადა მინისტრმა.

ბათუმის საკრებულოს წევრმა, რამაზ სურმანიძემ მინისტრს შეკითხვა კომუნალურ ჰიგიენაზე დაუსვა: „სანიტარული ზედამხედველობის დარგში სუსტი ვართ. ხედავთ თუ არა ამ კუთხით გაძლიერების საჭიროებას?“ ამას გარდა, რამაზ სურმანიძე დაინტერესდა, რა უნდა ისწავლონ ბავშვებმა ჯანმრთელობის დაცვის კუთხით, რადგან ამაზე დღეს არავინ საუბრობს. მინისტრი მიიჩნევს, რომ „ამ მხრივ დიდი ნაბიჯებია გადადგმული“ და „საზოგადოებრივი ჯანდაცვის ცენტრების კიდევ უფრო გაძლიერებით მივიღებთ უკეთეს შედეგს.“

ექიმებმა კითხვები დასვეს სერტიფიცირებაზე, ასევე ექიმთა კვალიფიკაციის ამაღლებაზე. დავით სერგეენკომ აღნიშნა, რომ იმპერატიულ ცვლილებებს არ გეგმავს, თუმცა „რეფორმა საჭიროებს მეტ განათლებას.“ მას არ უთქვამს კონკრეტულად როგორ და რა ფორმით, მაგრამ მინისტრმა ასევე თქვა: „ექიმების კვალიფიკაციის ამაღლების კურსები არ უნდა ჩავაბაროთ ისტორიას, ეს კარგი ტრადიცია იყო“.

შეხვედრის დასრულების შემდეგ „ბათუმელებმა“ დავით სერგეენკოს შეკითხვა დაუსვა ბათუმის დედათა და ბავშვთა რესპუბლიკური ცენტრზე, სადაც 4 თვის ბავშვი გარდაიცვალა და ამ კლინიკის პირველადი, გადაუდებელი სამედიცინო დახმარების განყოფილების, ე.წ. „ემერჯენსის“ ექიმი ბათუმის საქალაქო სასამართლომ უკანონო სამედიცინო საქმიანობისთვის დააჯარიმა [დაჯარიმებული ექიმის ინფორმაციით, „ემერჯენსში“ 12 ექიმი მუშაობს და არც ერთ მათგანს არ აქვს შესაბამისი მიმართულების სერტიფიკატი. თავად კლინიკის ხელმძღვანელობამ ასევე ჯანდაცვის რეგულირების სააგენტომ ამ ამბის გაშუქების დროს კითხვებს არ უპასუხეს].

„ჯანდაცვის სამინისტრო ვალდებულია შეისწავლოს ყველა ასეთი შემთხვევა და ამას ჩვენ დადგენილი წესით ვაკეთებთ. ამ კონკრეტულ კლინიკაში უნებართვო სამედიცინო საქმიანობაზე მე ინფორმაცია არ მაქვს, თუ ეს დადასტურდა, იქნება შესაბამისი ზომები გატარებული. გადაუდებელი მედიცინა შედარებით ახალია, ბოლო ორი-სამი წელია მიმდინარეობს ამის დახვეწა“ – გვიპასუხა დავით სერგეენკომ.

მინისტრს ასევე ვკითხეთ, რატომ ვერ მუშაობს მის მიერ 2014 წლის 11 სექტემბერს მიღებული ბრძანება, რომელიც სამედიცინო დაწესებულებებს ათავისუფლებს სამართალდამცველებისთვის ინფორმაციის მიწოდების ვალდებულებისგან, თუკი პაციენტი ნარკოტიკული ნივთიერების მოხმარების ზედოზირების ქვეშაა.

„პაციენტის ინფორმაცია არის კონფიდენციალური. სამედიცინო დაწესებულება აღარ არის ვალდებული შეატყობინოს ინფორმაცია იმ პაციენტებზე,რომლებიც შემოდიან ნარკოტიკული მოხმარების ზედოზირების გამო, თუმცა თუკი სამართალდამცავი უწყებები მოითხოვენ ამას, მიაწვდიან,“ – გვითხრა დავით სერგეენკომ.

„თუკი პოლიციელები მაინც იგებენ ინფორმაციას ამ შემთხვევებზე და შესაბამისად, სტატისტიკურად არც ნარკოტიკების მომხმარებელთა მიმართვიანობა არ გაზრდილა ბოლო პერიოდში, მაშინ რა ინტერესს ემსახურებოდა თქვენი ბრძანება?“ – „ბათუმელების“ ამ შეკითხვას მინისტრმა აღარ უპასუხა: „ამ ბრძანებით რისკები შემცირდა. ინტერვიუ დამთავრებულია.“

 

ახალი პარკი განსხვავებული კონცეფციით ბათუმში

ბათუმში, ლერმონტოვის ქუჩის ბოლოში, ახალი გასართობი პარკი აპრილის დასაწყისში გაიხსნება. პარკი ოთხ ჰექტარზეა გაშენებული და ბათუმში არსებული პარკებისგან განსხვავებული კონცეფციითაა გაკეთებული. პირველად დაიდგა პარკში ადაპტირებული ატრაქციონები და საპირფარეშოები. პარკი 7 000 კვ/მეტრზე უნდა გამწვანდეს. ახალი პარკის მშენებლობაზე ერთი მილიონ 927 ათასი ლარი დაიხარჯა.

ხე-მცენარეები ჯერ შეტანილი არ არის, თუმცა როგორც მერიის კეთილმოწყობის სამსახურში გვეუბნებიან, პარკის დიდი ნაწილი სწორედ გამწვანებას დაეთმობა. პარკში 150 მაყურებელზე გათვლილი სტადიონიც არის, რომელიც ოთხი პროჟექტორით განათდება. აქ ბავშვებს ფეხბურთის გარდა კალათბურთისა და ხელბურთის თამაშიც შეეძლებათ.

“პარკში განთავსდა 90 საბაღე სკამი, რომელიც ბილიკებშია ჩადგმული. მოეწყო გაზონები, სადაც მერიის გამწვანების სამსახური შეიტანს ხე-მცენარეებს. სულ შვიდი ათასი კვადრატული მეტრი უნდა გამწვანდეს”, – ამბობს მერიის კეთილმოწყობის სამსახურის ტექნიკური ზედამხედველი, თამაზ ველიაძე.

მისივე განმარტებით, პარკში 50 გარეგანათებაა დამონტაჟებული. “ეს პირველი პარკია ბათუმში, სადაც კომპლექსური, პანდუსებიანი ტუალეტია გაკეთებული. პარკში გართობას შეზღუდული შესაძლებლობის მქონე ბავშვებიც შეძლებენ, რადგან ატრაქციონებიც ადაპტირებულია.”

გასართობ სკვერში სასმელი წყლის ფანტანებიც დგას. პარკი მთლიანად დეკორატიული ფილებითაა მოპირკეთებული.
როგორც კეთილმოწყობის სამსახურში ამბობენ, ახალ პარკში ტრენაჟორები არ იქნება. თამაზ ველიაძის თქმით, ტრენაჟორების დადგმა საცხოვრებელი სახლების შიდა ეზოებშია გათვალისწინებული. ახალ პარკში ან მის მიმდებარედ არც ველოპარკის მოწყობა იგეგმება. “ეს საკითხი ბათუმის ავტოტრანსპორტის გადასაწყვეტია, ჩვენ ვერ გავაკეთებთ, თუმცა პარკის პროექტში ველოპარკი გათვალისწინებული არ არის”.

პარკში ჯერჯერობით არც ერთი ვიდეოთვალი არ არის დამონტაჟებული. თამაზ ველიაძე ამბობს, რომ ეს პროექტით გათვალისწინებული არ იყო, მაგრამ საჭიროებიდან გამომდინარე შესაძლებელია ვიდეოთვალებიც დაამონტაჟონ.

თამაზ ველიაძე: “როცა პარკში კაპიტალური სამუშაოები მთლიანად დასრულდება და მერია ჩაიბარებს, პარკს მერიის შესაბამისი სამსახურები გააკონტროლებენ. გამწვანებაზე პასუხისმგებელი იქნება გამწვანების სამსახური, სხვა დეტალებზე კი, პროფილის მიხედვით, მერიის სამსახურები იზრუნებენ”.

თამაზ ველიაძის თქმით, ახალი პარკი ევროსტანდარტებითაა გაკეთებული და ატრაქციონებისა და განათებების გარდა თითქმის ყველა მასალა ქართული წარმოებისაა.

პარკის კეთილმოწყობას შპს “მონოლითი 2005” აწარმოებდა.

პარკის პროექტი
პარკის პროექტი
Exit mobile version