Batumelebi

მშენებლობაზე ზედამხედველობის სამსახურების პასუხიმგებლობა შენობის ექსპლუატაციაში მიღების შემდეგ წყდებოდა. ეს წესი იცვლება. საქართველოს მთავრობის დადგენილებით კონტროლის ახალი ვადები დაწესდა. გარდა ამისა, დადგენილება მშენებელს სამ და მეტსართულიან შენობაში მეორე ალტერნატიული კიბის მოწყობას ავალდებულებს, რომელიც დერეფანზე მიბმული არ იქნება. კონკრეტულ შემთხვევებში რეგულაცია კვამლაღმომჩენების დამონტაჟებასაც მოითხოვს.
სამშენებლო რეგულაციებზე საუბრისას ბოლო პერიოდში სპეციალისტები საქართველოს მთავრობის 41-ე დადგენილებას, იგივე ტექნიკური უსაფრთხოების რეგლამენტს, ხშირად ახსნებენ.  კიდევ რას ითვალისწინებს ახალი დადგენილება?- ამ თემაზე „ბათუმელებს“ არქიტექტორი ბექა თოიძე ესაუბრა.

 ბექა, რას შეცვლის ეს დოკუმენტი უსაფრთხოების წესების დაცვის თვალსაზრისით?

ეს დოკუმენტი, შენობის უსაფრთხოების წესები, ჩვენ ასე ვეძახით მას, საკმაოდ ვრცელი დოკუმენტია, რაც მოიცავს არამარტო შენობის რაღაც ნაწილების უსაფრთხოების წესებთან შესაბამისობას, არამედ მთლიანად შენობის მოყვანას იმ სტანდარტებთან რაც არის ამერიკის შეერთებულ შტატებში. ეს დოკუმენტი იქედანაა გადმოტანილი.

პირდაპირი ასლია?

ძირითადი ნაწილი დაკოპირებულია, თუმცა არის რაღაც ცვლილებები. გასული წლის ნოემბერში მცირედი ცვლილება შევიდა და უფრო მორგებული გახდა ჩვენს რეალობაზე. პირველი ვარიანტი მკაცრად მოითხოვდა შენობის საცხოვრებლის უსაფრთხოების სტანდარტებს. ცვლილებამ უფრო გააიოლა მაგრამ, უსაფრთხოების მხრივ ცუდი შედეგი ნამდვილად არ გამოიწვია, პირიქით, დააბალანსა ქართულ რეალობასთან. დოკუმენტი, რაც ჩვენ მუშაობის დროს უნდა გამოვიყენოთ, ძირითადად  შენობის გასასვლელებს ეხება, თუ როგორ უნდა მოეწყოს შენობიდან გასასვლელი. ეს ეხება კიბეს, დერეფნებს, კარებს და ყველა ამ ნაწილში შემავალ სტრუქტურულ ელემენტს, იგივე ფანჯრებს, ლიფტებს და ლიფტის კარებს.

უფრო კონკრეტულად, რა არის ახალი, რაც მანამდე არ იყო?

ყველაზე მთავარი ისაა, რომ სავალდებულო მოთხოვნაა გასასვლელი ყოველი სართულისთვის. არის გამონაკლისები, მაგრამ ძირითადი პრინციპები არის ისეთი რომ, ორ სართულზე მაღალი შენობისთვის უნდა მოეწყოს ორი გასავლელი კიბე. მაგალითად, თუ აშენებთ  სამსართულიან კომერციულ შენობას, ან სასტუმროს, ან ნებისმიერი ტიპის შენობას, უნდა გქონდეს ალტერნატიული მეორე გასასვლელიც.

ორი გასავლელი აუცულებლად ორ კიბეს გულისხმობს?

კიბე რომ ჩაითვალოს სახანძრო უსაფრთხოებისათვის გასასვლელ საშუალებად, ეს კიბე უნდა იყოს დაცული. რა კრიტერიუმებით უნდა იყოს დაცული, ამას უკვე განსაზღვრავს შენობის ტიპი, გაბარიტები და ფუნქციები. საცხოვრებელს სხვა დატვირთვები აქვს, სასტუმროს,  სავაჭრო მოლს, კინოთეატრს ან სხვა ტიპის თავშეყრის ადგილს – სხვა.

ძველ კორპუსებში არის დერეფანი და კიბესთან დასაკავშირებლად სივრცე არაა გამოყოფილი, პირდაპირ დერეფნიდან ადიხარ კიბეებზე. უსაფრთხოების ახალი წესები კი გულისხმობს, რომ კიბე იყოს დახურული, დაცული სივრცე. რომელიმე სართულზე, ბინაში ან დერეფანში თუ მოხდება დაკვამლიანება, ეს არ უნდა გავრცელდეს ისეთ ნაწილზე, რომელიც არის საევაკუაციო გასავლელი. კიბე თუ დაკვამლიანდა, მესამე სართულზე გაჩენილი ხანძრის გამო მეთორმეტემდე დაკვამლიანდება და მეთერთმეტე სართულიდან ადამიანის ევაკუაცია უკვე შეუძლებელი გახდება, ამიტომ კიბე და ლიფტები უნდა იყოს დაცული.

შენობის ტიპის მიხედვით, დგება მონაცემები, რომლის მიხედვითაც მუშავდება პროექტი. არქიტექტურული ნაწილი ითვალისწინებს ასევე ანალიზსს, რომელიც არის დატანილი გეგმებზე და არის ტექსტური ნაწილი. ეს არის შაბლონები, რომელსაც ავსებენ არქიტექტორები, ამის საფუძველზე უკვე ხდება საექსპერტო შეფასება, რომელიც აუცილებელია. ისე არცერთი სახელმწიფო ორგანო, არ გასცემს ნებართვას. არც შეთანხმების ბრძანებას.

დადგენილებაში საევაკუაციო კიბეებზე შენობის გარედან, როგორებიც ჰქონდა შენობებს ძველ ბათუმში, არის საუბარი?

დიახ. საცხოვრებლის შემთხვევაში ჩვენ შეგვიძლია გახსნილი გარე კიბე გავაკეთოთ რვა სართულის ჩათვლით. ზემოთ უკვე უსაფრთხო აღარ არის. ეს ძირითადად ამერიკიდან შემოვიდა. ეს არ შეიძლება უფრო მაღლივ შენობებზე მოეწყოს, რადგან ადამიანების დიდი ნაკადი რომ წამოვიდეს, ის თვითონ გახდება უკვე სახიფათო. ჩვენი რეგულაცია ამბობს, რომ რვა სართულამდე შეიძლება გაკეთდეს გარე კიბე, ხოლო რვა სართულის შემდეგ უნდა იყოს დახურული სივრცე აუცილებლად, აივნებიც მერვე სართულამდე ითვლება ერთერთ გასასვლელ კომპონენტად, იმის გამო რომ დასაშვებია სახანძრო ავტომანქანა მიადგეს.

მანამდე ასე არ იყო?

მანამდე არ იყო, თუმცა, ყველაფერი კანონის ფარგლებში ხდება. რასაც კანონი არ ავალდებულებს კომპანიას ან კერძო დამკვეთს, კონკრეტული მერი ან განყოფილების უფროსი ამას ვერ მოითხოვს. 2017 წლის პირველ იანვრამდე, ყველა სახელმწიფო ორგანო მოქმედებდა არსებული რეგულაციებით. ცნობილი ფაქტია რაც მოხდა „ლეოგრანდში“, სამწუხარო ფაქტი გამოიწვია უსაფრთხოების სტანდარტების გაუმართაობამ. მსგავსი ტიპის დაწესებულებებისთვის კანონი 2017 წლამდეც ითხოვდა გარკვეულ სტანდარტებს. ისეთ ბრენდებს როგორიცაა „ჰილტონი“ ან „შერატონი“ აქვს თავისი საერთაშორისო სტანდარტები და ისინი, მიუხედავად იმისა, არსებობს თუ არა ქვეყანაში შესაბამისი მოთხოვნა, მაინც უზრუნველყოფენ უსაფრთხოების წესების დაცვას.

მეორე კიბის გარდა რა ხანძარსაწინააღმდეგო საშუალებებზეა საუბარი?

შენობა თავისი მახასიათებლებით იყოფა რამდენიმე კატეგორიად – 23 მეტრი, 37 და 130 მეტრი. ძირითადი სტრუქტურული ელემენტები რაც არის შენობის, კოლონები, გადახურვის ფილები უნდა მოეწყოს სამსაათიანი ხანძარმდეგი მასალებით, ეს ყველაფერი ლაბორატორიულად მოწმდება. ეს იმას ნიშნავს, რომ სამი საათის განმავლობაში არ ჩამოიშლება და არ მიიღებს დეფორმაციას. საშუალო სიმაღლის შემთხვევაში 37 მეტრიდან 130 მეტრამდე გათვალისწინებულია ორსაათიანი ხანძარმდეგი კონსტრუქციები. ახლა მიდის ტენდენცია იქითკენ, რომ შენობებში და საცხოვრებლებში, აირის გაჟონვის შემთხვევაში უნდა ჩაირთოს საგანგაშო სიგნალი, 41- ე დადგენილება არ ითვალისწინებს ამას, მაგრამ გარკვეული კატეგორიის შენობებში ითვალისწინებს კვამლაღმომჩენებს, მაგალითად, რვასართულიან საცხოვრებელ სახლს მოეთხოვება გარკვეული ტიპის ხანძარსაწინააღმდეგო ღონისძიებების გატარება.

მინდა გკითხოთ ასევე მოსაზღვრედ მშენებლობის პარამეტრებზე, დაშორებებზე და ღიობებზე.

ამასთან დაკავშირებით ადრეც არსებობდა საქართველოს მთავრობის 59-ე დადგენილება, რომელიც დღესაც მოქმედია. ეს გულისხმობს შენობის განთავსებას კონკრეტულ საკადასტრო ნაკვეთზე, დაშორებებს მეზობელი ნაკვეთისადმი, ან საზოგადოებრივი სივრცისადმი. 41-ე დადგენილებით გარკვეული გამკაცრება მოჰყვა ამას. სამეზობლო ნაკვეთის მხარეს 2017 წლამდე მეზობლის თანხმობით შესაძლებელი იყო დაახლოებით ერთ მეტრში გაგვეკეთებინა ღიობები, 41-ე დადგენილებით საერთოდ აკრძალულია, თანხმობითაც დაუშვებელია. დაშორებებიც დაყოფილია კატეგორიებად, რაც უფრო მოშორებულია ფასადის საორიენტაციო სიბრტყე მეზობელი ნაკვეთიდან, უფრო მეტი ღიობის გაკეთების საშუალებას გვაძლევს ფასადზე.

ბათუმში დღეს, 17 მარტს, სასტუმრო „შერატონში“ ვაჟთა შორის ჭადრაკში ევროპის ინდივიდუალური ჩემპიონატი გაიხსნა. ტურნირში მსოფლიოს 34 ქვეყნის 311 მოჭადრაკე მონაწილეობს.

ჩემპიონატზე მსოფლიო თასის საგზურისთვის საქართველოს სახელით 32 მოჭადრაკე იბრძოლებს. ევროპის ჩემპიონატის საპრიზო ფონდი 100 ათასი ევროა.

ტურნირის გახსნის ღონისძიებას, აჭარის მთავრობის პრესსამსახურის ინფორმაციით, მთავრობის თავმჯდომარე ზურაბ პატარაძე, ასევე  ევროპის საჭადრაკო კავშირის პრეზიდენი ზურაბ აზმაიფარაშვილი, ჭადრაკის საერთაშორისო ფედერაცია „ფიდეს“ დირექტორთა საბჭოს წევრი ჯერსი ბორგი და სხვა მოწვეული სტუმრები ესწრებოდნენ.

ბათუმი მეორედ მასპინძლობს ჩემპიონატს, პირველად მსგავსი შეჯიბრი 2002 წელს გაიმართა.

ევროპის რიგით მე-19 ჩემპიონატი ჭადრაკში ვაჟთა შორის, 28 მარტამდე გაგრძელდება.

მთავარი ფოტო: ევროპის მე-19 ჩემპიონატი ჭადრაკში ვაჟთა შორის / ბათუმი / ფოტო: მთავრობის პრესსამსახური

ამერიკის შეერთებული შტატების მე-6 ფლოტის ხომალდი  USS Oak Hill (LSD 51] რეგულარული დისლოკაციის ფარგლებში ბათუმს საპორტო ვიზიტით ესტუმრა.  ეს ხომალდის პირველი ვიზიტია საქართველოში.  მისი შავ ზღვაში ყოფნის პერიოდში შედგება საპორტო ვიზიტები და ორმხრივი წვრთნები ამერიკის შეერთებული შტატების მოკავშირეებსა და პარტნიორ ფლოტებთან.

საქართველოში აშშ-ის საელჩოს ინფორმაციით ხომალდის ოპერაციების მიზანია ნატოს მოკავშირეებსა და პარტნიორებს შორის საზღვაო უსაფრთხოებისა და სტაბილურობის, მზადყოფნისა და საზღვაო ბრძოლისუნარიანობის გაძლიერება. ბათუმში საპორტო ვიზიტი ემსახურება კავშირების გამყარებას, რაც ადასტურებს საქართველოსა და ამერიკას შორის არსებული ნაკისრი ვალდებულებებისადმი ერთგულებას რეგიონში სტაბილურობის ხელშესაწყობად.

ადგილობრივი წარმომადგენლების ოფიციალურ მიღებასთან ერთად გაიმართება ტური ხომალდზე და საფეხბურთო-საკალათბურთო ამხანაგური მატჩები ამერიკის მეზღვაურებსა და ქართველ სანაპირო დაცვის თანამშრომლებს შორის. აგრეთვე ჩატარდება რამდენიმე ერთობლივი წვრთნა. „ოუკ ჰილის“ საპორტო ვიზიტი ამერიკელ მეზღვაურებს საშუალებას მისცემს მოინახულონ ისტორიული ადგილები და გააღრმავონ გრძელვადიანი პარტნიორობა ქართველ კოლეგებთან.

Oak Hill– ის შავ ზღვაში შემოსვლის მიზანია აჩვენოს ამერიკის მხირდან ნაკისრი ვალდებულებებისადმი ერთგულება, რაც ნატოს მოკავშირეებისა და პარტნიორების კოლექტიურ თავდაცვას გულისხმობს. საზღვაო ოპერაცია Atlantic Resolve–ის ფარგლებში მიმდინარეობს და მხარს უჭერს ნატოს მოკავშირეებს აღმოსავლეთ ევროპაში.

აშშ-ს ფლოტი რეგულარულად მუშაობს შავი ზღვის სივრცეში, რაც თანხვედრაში მოდის მონტრეს კონვენციასა და საერთაშორისო სამართალთან. ამერიკის მე-6 ფლოტი, რომლის სამმართველოც ნეაპოლში, იტალიაში მდებარეობს, მოკავშირე და უწყებათაშორის პარტნიორებთან ახორციელებს ერთობლივი და საზღვაო ოპერაციების სრულ სპექტრს, რათა, ამერიკის ეროვნული ინტერესების გაძლიერებასთან ერთად, უზრუნველყოს უსაფრთხოება და სტაბილურობა ევროპასა და აფრიკაში. ამერიკის ხომალდის ,,ოუკ ჰილის“ მეთაურია ფილიპ ნაითი, რომლის ეკიპაჟშიც 22 ოფიცერი და 400 პერსონალი შედის.

აშშ-ს მე-6 ფლოტის ხომალდის კაპიტანი ფილიპ ნაითი და ხომალდის ხელმძღვანელი პირები აჭარის მთავრობის ადმინისტრაციას სტუმრობდნენ. სტუმრებს აჭარის მთავრობის თავმჯდომარემ ზურაბ პატარაძემ და ქალაქ ბათუმის მერმა ლაშა კომახიძემ უმასპინძლეს. ზურაბ პატარაძე ამერიკელ სამხედროებს აჭარის მზარდ ტურისტულ და ეკონომიკურ განვითარებაზე ესაუბრა და რეგიონში მიმდინარე მსხვილი პროექტებისა და საერთაშორისო დონის ღონისძიებების შესახებ მიაწოდა ინფორმაცია. აჭარის მთავრობის თავმდჯომარემ ხაზი გაუსვა ამერიკა-საქართველოს თანამშრომლობის მნიშვნელობას ქვეყნის თავდაცვისა და უსაფრთხოების სფეროში. მისი თქმით, ნატოს ეგიდით სამხედრო ხომალდების რეგულარული საპორტო ვიზიტები არის მტკიცე მხარდაჭერის გამოხატვა საქართველოს მიმართ.

73 755 ლარი აქვს გათვალისწინებული ბათუმის ბოტანიკურ ბაღს ერთი ავტომობილის შესაძენად. სპეციალიზებული კლასის – პიკაპის ტიპის ავტოსატრანსპორტო საშუალება [ე.წ „კანოპით“ – ბორტის სახურავი და საბარგულის ჩასაფენით] უნდა იყოს ახალი, არანაკლებ 2017 წლის გამოშვების და ექსპლუატაციაში არმყოფი. ფერი შეთანხმებით.

ბოტანიკური ბაღის მიერ ავტომობილის შესაძენად გამოცხადებულ ტენდერში წინადადებების მიღება უკვე დაწყებულია და ის 20 მარტს დასრულდება. ავტომობილის მიწოდება უნდა განხორციელდეს ხელშეკრულების გაფორმებიდან 40 სამუშაო დღის ვადაში.

ბათუმის ბოტანიკურ ბაღს კიდევ ერთი ტენდერი აქვს გამოცხადებული გოდერძის ალპურ ბაღში [ხულოს მუნიციპალიტეტის ტერიტორიაზე] შიდა გზებისა და ბილიკების მოწყობისთვის, რისთვისაც 322 ათასი ლარია გამოყოფილი. სამუშაოები, ხელშეკრულების გაფორმებიდან 90 დღეში უნდა დასრულდეს. დღეების ათვლა დაიწყება 2018 წლის 20 მაისიდან და გაგრძელდება 17 აგვისტოს ჩათვლით პერიოდში.

აჭარის სოფლის მეურნეობის სამინისტროს აგროპროექტების მართვის ცენტრი 48 ტონა „ლუბაშა“-ს ჯიშის ნიორის სათესლე [სარგავი] მასალის შეძენას გეგმავს. ნივრის შესაძენად აჭარის ბიუჯეტში წელს 528 ათას 812 ლარია გათვალისწინებული.

ნივრის შესასყიდად გამოცხადებულ ტენდერში, წინადადებების მიღება 2018 წლის 23 მარტს დაიწყება და 26 მარტს დასრულდება. გამარჯვებულის გამოვლენის შემთხვევაში კი სამინისტროს ნიორი, 2018 წლის პირველი სექტემბრიდან ამავე წლის 25 დეკემბრამდე პერიოდში უნდა მიაწოდონ.

ნივრის სათესლე მასალას ფერმერებს თანადაფინანსების წესით გადასცემენ. ფერმერი, ნივრის ფასს, სავარაუდოდ, ტენდერით გათვალისწინებული სახელშეკრულებო ღირებულების 30%-ის ოდენობით გადაიხდის.

სამინისტროს „ნიორის პროგრამა“ გასულ წელს ჩაუვარდა. ნივრის შესასყიდი თანხა კი, როგორც სამინისტროში განაცხადეს, სხვა პროგრამებზე გადაანაწილეს.

პროგრამის ჩავარდნის მიზეზად „აგროპროექტების მართვის ცენტრმა“ არშემდგარი და შეწყვეტილი ტენდერები დაასახელა. 48 ტონა ნივრის სათესლე მასალის შესაძენად, შარშან 624 ათასი ლარი იყო გამოყოფილი.

ამავე თემაზე:

ხულოში, ართმელაძეების ოჯახის მიერ გამოყვანილი ნიორი, ევროპის ბაზარზეც გაიყიდა.

„სირცხვილია, როდესაც კოლექტიურ „კორკოტას“ დახურულ კარს მიღმა ხვდებიან ქალაქ ბათუმის მერი და საკრებულოს თავმჯდომარე ისე, რომ საზოგადოებამ არ იცის, რაზე გარიგდა ეს ორი მხარე ამ შეხვედრაზე,“ – აცხადებს ბათუმის საკრებულოს ფრაქცია „ერთიანი ნაციონალური მოძრაობის“ თავმჯდომარე, მირდატ ქამადაძე. ბრიფინგზე გაკეთებული განცხადებით მირდატ ქამადაძემ ლაშა კომახიძეს და სულიკო თებიძეს მოუწოდა, გაემიჯნონ „ქართულ მარშს,“ ასევე საზოგადოებას დეტალურად გააცნონ, თუ რაზე ისაუბრეს დახურულ კარს მიღმა.

„ამ შეხვედრის შემდეგ „ქართული მარშის“ წევრებმა ძველ ბათუმში მსვლელობა მოაწყვეს. მინდა, იცოდეს ბათუმის მერმაც და საკრებულოს თავმჯდომარემაც, ამ ქალაქში დაიდგმება დავით აღმაშენებლის, გენერალ მაზნიაშვილის, გიორგი ანწუხელიძის თუ სხვა ჩვენი ქვეყნისთვის თავდადებული ადამიანის ძეგლი, ეს არის მხოლოდ და მხოლოდ ბათუმელების გადასაწყვეტი, საჯარო და გამჭვირვალე შეხვედრებისას და არა კოლექტიური „კორკოტასი“. მოვუწოდებ ქალაქ ბათუმის მერს და საკრებულოს თავმჯდომარეს, გამოიჩინონ მაღალი მოქალაქეობრივი ღირსება, გაემიჯნონ ქართული მარშის აქციას ბათუმში და საზოგადოებას დეტალურად გააცნონ იმ გარიგების შინაარსი, რაზეც ისაუბრეს დახურულ კარს მიღმა,“ – აღნიშნავს მირდატ ქამადაძე.

დღეს, 16 მარტს, ბათუმის საკრებულოს სხდომაზე დასასწრებად ბათუმში ჩამოვიდნენ მოძრაობა „ქართული მარშის“ წევრები. ისინი საკრებულოს სხდომაზე არ დაუშვეს, დარბაზში ადგილების სიმცირის გამო. მათ ბათუმის მერი, ლაშა კომახიძე და საკრებულოს თავმჯდომარე, სულიკო თებიძე დახურულ კარს მიღმა შეხვდნენ. 

დღეს აჭარის ავტონომიური რესპუბლიკის უმაღლესმა საბჭომ საზოგადოებრივი მაუწყებლის სამეურვეო საბჭოს წევრობის კანდიდატად აჭარის კვოტით ბესიკ ლილუაშვილი დაასახელა.

უმაღლესმა საბჭომ ბესიკ ლილუაშვილი, პლენარულ სხდომაზე, ფარული კენჭისყრით, 13 ხმით აირჩია საქართველოს პარლამენტისთვის წარსადგენად. კენჭისყრაში მონაწილეობა არ მიუღია ოპოზიციას, 2 ბიულეტენი კი ბათილად გამოცხადდა.

აჭარის კვოტით საზოგადოებრივი მაუწყებლის ბორდის წევრის პოზიციის დასაკავებლად კონკურსში კიდევ ერთი კანდიდატი – ნათია სირაბიძე მონაწილეობდა.

უმაღლესმა საბჭომ გუშინ, 15 მარტს, საზოგადოებრივი მაუწყებლის სამეურვეო საბჭოს წევრობის კანდიდატებთან გასაუბრება ჩაატარა. გასაუბრებაზე 12 კანდიდატიდან მხოლოდ 6 იყო მისული, სამი კანდიდატი კი სკაიპის მეშვეობით ჩაერთო.

ავტორი: ესმა გუმბერიძე

ჭიათურაში მანგანუმის მოიპოვებაზე ლიცენზია კომპანია „ჯორჯიან მანგანეზს“ 40 წლით აქვს. ლიცენზია მოპოვების ექსკლუზიურ უფლებას იძლევა ჭიათურის მიდამოებში. ეს ნიშნავს, რომ ვერც ერთი სხვა კომპანია თუ კერძო პირი, თუნდაც ჭიათურის რიგითი მცხოვრები, ვერ დაიწყებს იქ მანგანუმის მოპოვებას კომპანიის ნებართვის გარეშე, სულ რომ თავისი საცხოვრებელი სახლის ტერიტორიაზე აღმოაჩინოს „შავ ქვად“ წოდებული სასარგებლო წიაღისეული.

ჭიათურაში უფრო და უფრო მეტ ტერიტორიაზე მოიპოვებენ მანგანუმს ღია კარიერული წესით ანუ მიწის აფეთქებით – ადგილობრივებისგანაც ყიდულობენ ნაკვეთებს, სადაც მანგანუმი ეგულებათ. რომც უთხრა უარი, არ მიყიდო, აზრი არ აქვს: ვერაფერს ვეღარ მოიყვან იქ. თუ აიჩემეს შენი ნაკვეთი, მის ირგვლივ შეიძენენ ყველაფერს, დაიწყებენ მოპოვებას, ნაკვეთის გარშემო მიწას დაგიფეთქავენ, გამოგიცლიან ნოყიერ ნიადაგს და იძულებული იქნები, ან მიყიდო, ან მიატოვო. ასეთი პრაქტიკაც ყოფილა.

თავად კომპანია ხშირად აფუძნებს უფრო წვრილ საწარმოებს, აძლევს იქ წილს ორიოდე ადგილობრივ ბიზნესმენს, შემდეგ კი ვითომ კონტრაქტორებად აქცევს და ასე საქმიანობენ. ეს იმიტომ, რომ მცირე ფინანსური ბრუნვის მქონე ბიზნესებს მეტი შეღავათი აქვთ, როგორც გადასახადების, ისე სხვადასხვა ნორმის, სტანდარტისა და რეგულაციის მხრივ. საგადასახადო ან საჯარიმო დავალიანება რომ დაუგროვდებათ, „ჯორჯიან მანგანეზი“ მათ აკოტრებინებს და ლიკვიდაციას უკეთებს. იმ კომპანიებს იმდენად მცირე ბიუჯეტი აქვთ, რომ სახელმწიფოს, ამ შირმა კომპანიების გაკოტრება-ლიკვიდაციის შემდეგაც, მათ მიერ დაგროვილი დავალიანებების ამოღება არ შეუძლია.

„ჯორჯიან მანგანეზი“ დაფუძნებულია Georgian-American Aloyees -ის მიერ. ამ კორპორაციის ერთ-ერთი მეწილე, გავრცელებული ხმებით, არის კოლომოისკი – უკრაინაში დნეპროპეტროვსკის ოლქის ყოფილი გუბერნატორი, საყოველთაოდ ცნობილი კორუფციონერი და მოქმედი მილიარდერ-ოლიგარქი. თუმცა კომპანია ე.წ „ოფშორულ“ ზონაშია რეგისტრირებული და მისი მფლობელების დანამდვილებით დასახელება რთულია.

Georgian-American aloyees-ს საქართველოს სახელმწიფოს  500 მილიონი ლარის დავალიანება აქვს. ეს დავალიანება გარემოსდაცვითი და სანიტარული ნორმების დარღვევის გამო დაკისრებული ჯარიმები და საურავებია. თუმცა კომპანია არ ჩქარობს მათ გადახდას.

საქართველოში არჩევნები (საპარლამენტო, საპრეზიდენტო თუ ადგილობრივი თვითმმართველობის) ხშირად ტარდება, 2 წელიწადში ერთხელ მაინც. ყოველი არჩევნების წინ კომპანია აცხადებს, რომ საკმარისად აქვს მანგანუმის მარაგი დაგროვილი, ამიტომ მუშაობის განსაკუთრებულ რეჟიმზე უნდა გადავიდეს და მუშები ან საერთოდ დაითხოვო,ს რამდენიმე თვით უხელფასოდ ან ნახევარ განაკვეთზე და განახევრებულ ხელფასებზე ამუშავოს. ეს 3 ათასზე მეტი დასაქმებულისთვის შიმშილს და, ზოგ შემთხვევაში, გადაუხდელი ბანკის ვალის გამო სახლ-კარის დაკარგვას ნიშნავს.

დასაქმებულები ამომრჩევლები არიან, რომელთა ხმებიც მმართველ ელიტას სჭირდება. შესაბამისად, ისინი იწყებენ ვაჭრობას კომპანიასთან: ოღონდ ხალხი არ დაითხოვოთ და შეგიძლიათ, რამდენიმე წელი გადასახადები არ გადაიხადოთ; უსაფრთხოების ნორმების დარღვევებზე თვალს დავხუჭავთ; საჯარიმო დავალიანებას ჩამოგაწერთ. მუშებს კი მმართველი ელიტაც და დამსაქმებელიც ეუბნებიან: ხელისუფლებას უმადლოდეთ, რომ მუშაობთ. არჩევნებზე მოდით, ხმა მოგვეცით, თორემ სხვამ რომ გაიმარჯვოს, ამ სამუშაო ადგილებს დაკარგავთ. ვერ მოელაპარაკებიან ისინი კომპანიას და გაგიშვებთ ის შვებულებაში, ის მცირე, მაგრამ სტაბილური შემოსავალიც აღარ გექნებათ.

ასე არ იხდის ნახევარმილიარდიან დავალიანებას ბიუჯეტში, არც გარემოს უფრთხილდება და არც დასაქმებულების უსაფრთხოებაზე ზრუნავს. სამაგიეროდ ხელისუფლებაში მყოფ პარტიას ხან 7 მილიონით დაუფინანსებს საარჩევნო კამპანიას, ხან – თბილისში საახალწლო 3-მილიონიან განათებას (ამასაც დავუკვირდეთ, რომ იმ რეგიონს, რომელიც ყველაზე მეტად ზარალდება მათი საქმიანობით, ამხელა თანხებს არ წირავენ).

Georgian-American Aloyees-ი ამბობს, რომ ნახევარმილიარდიანი დავალიანების გასტუმრება არ შეუძლია. სახელმწიფოს, რა თქმა უნდა, თეორიულად შეუძლია მის წინააღმდეგ იძულებითი აღსრულების პროცესის დაწყება. თუ ამოსაღები თანხა არ აღმოაჩნდება, სახელმწიფოს შეუძლია განახორციელოს სეკვესტრი, ანუ დაუნიშნოს თავისი მმართველი, რომელმაც უნდა ამუშავოს კომპანია ისე, რომ შესაძლებელი იყოს ბიუჯეტში იმ დავალიანებული თანხების შეტანა.

სეკვესტრის მცდელობას მართლაც ჰქონდა ადგილი ზესტაფონის ფეროშენადნობთა ქარხანაში, რომელიც ასევე Georgian-American Alloyees-ის ხელშია. თუმცა კომპანიას იმდენად ძლიერი ლობისტები აღმოაჩნდნენ აშშ-ის დედაქალაქში, რომ აშშ-ის სახელმწიფო დეპარტამენტმა ამ სეკვესტრის დაწყებიდან მალევე თავის ანგარიშში აღნიშნა, რომ საქართველოში მიმდინარეობს ამერიკელი ბიზნესმენების დევნა, მათზე ზეწოლა და შევიწროება; რომ ეს საფრთხეს უქმნის ჯანსაღ ბიზნესგარემოს. არადა, აშშ-საქართველოს შორის თავისუფალი ვაჭრობის შეთანხმების პროექტის განხილვისას აშშ-ის ერთ-ერთი მოთხოვნაა, რომ საქართველოში შეიქმნას და დაცული იყოს შრომითი, გარემოსდაცვითი და სანიტარული სტანდარტები, გაძლიერდეს პროფკავშირები, აღიკვეთოს მათი დევნა-ზეწოლა და განვითარდეს დასაქმებულთა უფლებების დამცველი სხვა მექანიზმები.

აშშ-ის სახელმწიფო დეპარტამენტის შეშფოთება-აღშფოთება საქართველოს საერთაშორისო იმიჯისთვის შესაძლოა სერიოზული დარტყმა ყოფილიყო. ქართულ მმართველ ელიტას ამის შეეშინდა და უკან დაიხია.

ავტორის შესახებ:

ესმა გუმბერიძე არის 23 წლის აქტივისტი, პლატფორმა „ახალი შესაძლებლობებისთვის“ თანადამფუძნებელი და სახალხო დამცველთან არსებული გაეროს 2006 წლის შშმ პირთა უფლებების კონვენციის პოპულარიზაციის, დაცვისა და იმპლემენტაციის მონიტორინგის საბჭოს მოწვეული წევრი.

ესმა გუმბერიძემ დაამთავრა უსინათლოთა სკოლა, ფლექსის პროგრამით ამერიკის შეერთებულ შტატებში სწავლობდა ერთი წლის განმავლობაში. შემდეგ განათლების მიღება გააგრძელა თავისუფალ უნივერსიტეტსა და თსუ-ში.

ამავე თემაზე:

დღეს, 16 მარტს, ბათუმის საკრებულოს სხდომაზე ფრაქცია „ნაციონალური მოძრაობის“ წევრებმა საკრებულოს თავმჯდომარეს სთხოვეს, დღის წესრიგში შეეტანათ საკითხი, რომლითაც უნდა მიემართათ საქართველოს ადგილობრივ თვითმმართველობათა ეროვნული ასოციაციისთვის, რომ რუსულ ოკუპაციასთან და არჩილ ტატუნაშვილის ცხედრის გადმოცემასთან დაკავშირებით პოლიტიკური განცხადებები გაკეთებულიყო.

ენმ-ის ფრაქციის თავმჯდომარის, მირდატ ქამადაძის თქმით, ბათუმის საკრებულო არის ამ ასოციაციის წევრი, ამიტომ  მათ უფლება აქვთ მიმართონ, რათა საერთაშორისო დონეზე  კიდევ ერთხელ გაიჟღეროს ოკუპაციის თემამ.

„დღეს ჩვენ გვაქვს ის პოლიტიკური მოცემულობა ქვეყანაში, რომ ნებისმიერი პოლიტიკური ტრიბუნა უნდა გამოვიყენოთ რუსეთის აგრესიის შესაჩერებლად. ამიტომ, მოვითხოვთ, რომ საკრებულომ ეს საკითხი დღის წესრიგში შეიტანოს, მიმართვის ფორმაზე კი შემდეგ ვიმსჯელოთ“, – განაცხადა მირდატ ქამადაძემ.

ენმ-ის ინიციატივასთან დაკავშირებით, საკრებულოს თავმჯდომარემ, სულიკო თებიძემ, განაცხადა, რომ საკრებულოს არ აქვს პოლიტიკური განცხადებების გაკეთების უფლება და ეს მათი კომპეტენცია არ არის.

„ჩვენ არ გვაქვს უფლება, საერთაშორისო ურთიერთობის პოლიტიკა განვსაზღვროთ. თუმცა საკითხს კენჭისყრაზე მაინც დავაყენებ,“ – განაცხადა საკრებულოს თავმჯდომარემ.

საკრებულოს წევრებმა ენმ-ის ინიციატივის დღის წესრიგში შეტანას მხარი არ დაუჭირეს, რის გამოც საკრებულოს წევრებმა „ნაციონალური მოძრაობიდან“ სხდომა დატოვეს.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, უახლოეს დღეებში აჭარის დაბლობში ძირითადად უნალექო ამინდია მოსალოდნელი.

„დღეს, ღამით, ზოგან დროგამოშვებით იწვიმებს, ხვალ კი, დღისით, უმეტესად უნალექო ამინდი იქნება. იქროლებს ცვალებადი მიმართულების ქარი 10-15 მეტრი წამში.

ჰაერის ტემპერატურა სანაპირო რაიონებში დღისით 12-17 გრადუსი იქნება, ღამით – 5-10 გრადუსი.

მთიან რაიონებში დღისით მოსალოდნელია 7-12 გრადუსი სითბო, ღამით – 0-5 გრადუსი.

მომდევნო ორ დღეს მოსალოდნელია უნალექო ამინდი,“ – უთხრეს „ბათუმელებს“ აჭარის რეგიონალურ ჰიდრომეტეოროლოგიურ ობსერვატორიაში.

ბოლო მონაცემებით, აჭარაში პირველი იანვრიდან 16 მარტამდე წითელას 237 შემთხვევა დაფიქსირდა, მათგან ორი შემთხვევა დადასტურდა გუშინ, 15 მარტს.

აჭარის საზოგადოებრივი ჯანდაცვის ცენტრში ამბობენ, რომ აღინიშნება წითელას შემთხვევების კლების ტენდენცია, თუმცა ეს არ ნიშნავს, რომ მოსახლეობამ ყურადღება უნდა მოადუნოს, კვლავ მოქმედებს ბავშვებისა და 40 წლამდე ასაკის მოსახლეობის ვაქცინაციის პროგრამა. 40 წლამდე მოსახლეობის აცრა, უბნის მიხედვით, პოლიკლინიკაში, უფასოა.

მთელი ქვეყნის მასშტაბით, 2018 წლის პირველი იანვრიდან 14 მარტამდე წითელას 409 შემთხვევა დაფიქსირდა. ეპიდაფეთქების ეპიცენტრი აჭარა იყო. აჭარის მასშტაბით წითელას ყველაზე მეტი შემთხვევა ბათუმში დადასტურდა.

წითელა ჰაერ-წვეთოვანი გზით, დაინფიცირებული პირისგან ცემინებისა და ხველების დროს ვრცელდება. ვირუსი ორი საათის განმავლობაში ცოცხლობს ჰაერში და იწვევს გარშემომყოფი პირების დაინფიცირებას ჰაერის ან დაბინძურებულ საგნებთან შეხების საშუალებით.

დაინფიცირებული პირი სიმპტომების გამოვლენამდე ოთხი დღის და გამოვლენის შემდეგ კიდევ ოთხი დღის განმავლობაში შესაძლებელია იყოს ვირუსის გამავრცელებელი.

მედიკოსები მოსახლეობას ვაქცინაციის აუცილებლობაზე მიუთითებენ. წითელას საწინააღმდეგო ვაქცინის გაკეთება პოლიკლინიკებშია შესაძლებელი.

წაიკითხეთ ამ თემაზე: რატომ არ უნდა გეშინოდეთ აცრის

_______________________

მთავარ ფოტოზე: ბათუმი. ფოტოეფექტი. მანანა ქველიაშვილის ფოტო. 

ხულოს მუნიციპალიტეტში, სხალთის თემში, ღვთისმშობლის ეკლესია გაქურდეს. ადგილობრივები ამბობენ, რომ ეკლესია წუხელ, 15 მარტს, გაქურდეს – წაღებულია ხატები.

სხალთის თემში მერიის წარმომადგენლის დროებითი მოვალეობის შემსრულებელი, გენადი ბილვანიძე ამბობს, რომ ქურდობის შესახებ დღეს დილით, სამსახურში მისულმა შეიტყო:

„დღეს დილით, როდესაც სამსახურში მივედი, მაშინ გავიგე ტაძრის ძარცვის შესახებ. შემთხვევის ადგილზე ახლა პოლიცია მუშაობს. იქ მე არავინ შემიშვებს, სოფელში კი მოსახლეობა ამბობს, რომ ძარცვა გუშინ საღამოს, დაბნელებამდე მოხდა, სავარაუდოდ მძარცველებმა მხოლოდ ხატები წაიღესო, დაწვრილებით ვერაფერს გეტყვით“, – თქვა სატელეფონო საუბარში გენადი ბილვანიძემ.

სხალთის თემის რწმუნებულმა, იზოლდა სურმანიძემ კი, თქვა, რომ ქურდობის შესახებ ინფორმაცია „ბათუმელებისგან“ შეიტყო.

შს სამინისტროს ინფორმაციით, გამოძიება სისხლის სამართლის კოდექსის 177-ე მუხლით დაიწყო – ქურდობა, ისჯება ჯარიმით ან თავისუფლების შეზღუდვით ვადით ერთიდან სამ წლამდე, ანდა თავისუფლების აღკვეთით იმავე ვადით.

რუსეთის პრეზიდენტის, ვლადიმირ პუტინის მხარდამჭერი მომღერალი, დიმა ბილანი დღეს, 15 მარტს, ბათუმში, სასტუმრო „შერატონში“ დაგეგმილ კორპორატიულ საღამოზე იმღერებს. „ბათუმელების“ ინფორმაციით, კორპორატიულ საღამოს შპს “ჯონსონ ენდ ჯონსონის” წარმომადგენლობა მართავს.

“ჯონსონ ენდ ჯონსონი” საქართველოში დაფუძნებული აქვს რუსეთში დარეგისტრირებულ იგივე სახელწოდების კომპანიას. „ბათუმელების“ ინფორმაციით, საღამოს ესწრებიან კომპანიის ოფისების წარმომადგენლები რუსეთიდან, უკრაინიდან, საქართველოდან და სხვა ქვეყნებიდან.

“ბათუმში მივფრინავ, სადაც მამაჩემი საზღვაო სასწავლებელში მსახურობდა”, – დაწერა დღეს დიმა ბილანმა თავის ინსტაგრამის ოფიციალურ გვერდზე.

დიმა ბილანი ცნობილია, როგორც რუსეთის პრეზიდენტის მხარდამჭერი მომღერალი. ვლადიმირ პუტინის მხარდამჭერ კლიპში, რომელიც 7 მარტს გავრცელდა, ის სხვა რუს მომღერლებთან ერთად მონაწილეობდა. კლიპი წინასაარჩევნო კამპანიის ფარგლებში გავრცელდა [რუსეთში 18 მარტს საპრეზიდენტო არჩევნები ტარდება]. ამავე კლიპში მღერის ქეთა თოფურიაც. გასულ წელს ბილანმა პუტინს დაბადების დღე საგანგებო ვიდეომიმართვით მიულოცა.

დღეს აჭარაში ენმ-მ გაავრცელა ინფორმაცია, რომ კორპორატიულ საღამოზე აჭარის მთავრობაც იყო მიწვეული. აჭარის მთავრობის პრესსამსახურმა აღნიშნული ინფორმაცია კატეგორიულად უარყო და განაცხადა, რომ ეს ინფორმაცია ტყუილია.

„ასეთი ცილისწამება უკვე ყველანაირ ზღვარს სცდება – კერძო კორპორატიულ შეკრებაზე მომღერლის მოწვევა არანაირ კავშირში არ არის მთავრობასთან და არც რაიმე სახის მოსაწვევი მოსულა აღნიშნულ ღონისძიებასთან დაკავშირებით,” – განაცხადეს აჭარის მთავრობის პრესსამსახურში.