ნეტგაზეთი • RU

რა უქმდება და რა იქმნება ბათუმის მერიაში

ბათუმის მერს, ლაშა კომახიძეს, ბათუმის საკრებულომ ორი ა(ა)იპ-ის ლიკვიდაციისა და ორი ახალი მუნიციპალური ორგანიზაციის დაფუძნებაზე თანხმობა მისცა. შესაბამისი  განკარგულების პროექტი დღეს, 16 მარტს, საკრებულოს სხდომაზე დაამტკიცეს. გარდა ამისა, მერი გეგმავს მერიის აპარატის გაუქმებას, სამაგიეროდ კი, ქმნის ადმინისტრაციას. შესაბამისად, უქმდება აპარატის უფროსის თანამდებობა, მერიას ეყოლება ადმინისტრაციის ხელმძღვანელი, რომლის ხელფასიც 2900 ლარი იქნება.

მერი ა(ა)იპ-ების: „ბათუმის კორპუსისა“ და  „ტურისტული ობიექტების მართვის სააგენტოს“ ლიკვიდაციასა და ორი ახალი ა(ა)იპ-ის: „მუნიციპალური სერვისების სააგენტოსა“ და „საქალაქო ინფრასტრუქტურის კეთილმოწყობის სამმართველოს“ დაფუძნებას გეგმავს.

მერიის ინფორმაციით, ორი ა(ა)იპ-ის ლიკვიდაცია მილიონ 550 000 ლარს გამოათავისუფლებს. ამ თანხიდან ნაწილი ახალ ორგანიზაციებში დასაქმებულების შრომის ანაზღაურების დასაფინანსებლად მიიმართება.

ბათუმის მერიის ინფორმაციით, რესტრუქტურიზაციის შედეგად მერიაში შტატით და ხელშეკრულებით დასაქმებულთა რაოდენობა 93- ით მცირდება, შესაბამისად შრომის ანაზღაურებისთვის გათვალისწინებული თანხა ბიუჯეტში 878 000 ლარით შემცირდება.

ნეტგაზეთის მასალების სხვა გამოცემებში გადაბეჭდვის წესი
ავტორი