ზუნდაგის ბაგა-ბაღისა და მახუნცეთის თემის ადმინისტრაციული შენობის სარეაბილიტაციოდ ნახევარ მილიონზე მეტი ლარი დაიხარჯება.
თემის ადმინისტრაციული შენობის, სადაც ზუნდაგის საბავშვო ბაღი, თემის ადმინისტრაციული ოფისი, სოფლის სამედიცინო პუნქტი და სასოფლო კლუბი ფუნქციონირებს, რეაბილიტაცია წელს დაიწყება და 2018 წელს დასრულდება.
ქედის მუნიციპალიტეტის გამგეობამ პროექტის განსახორციელებლად ადგილობრივი ბიუჯეტიდან 791 270 ლარი გაწერა, რეაბილიტაციისთვის წელს 400 000, ხოლო 2018 წელს – 391 270 ლარი გაიხარჯება. შესაბამისად, სარეაბილიტაციო სამუშაოები გამგეობის მიერ გაწერილი გეგმა-გრაფიკით 2017-2018 წლებში უნდა შესრულდეს.
სარეაბილიტაციო სამუშაოებზე ტენდერი ქედის გამგეობამ გუშინ, 26 ივნისს გამოაცხადა. საბავშვო ბაღისა და თემის ადმინისტრაციული შენობის რეაბილიტაციაზე გამოცხადებული ტენდერი 17 ივლისს დასრულდება.
შესყიდვების სახელმწიფო ვებგვერდზე გამოქვეყნებული ინფორმაციით, ხელშეკრულებას ქედის გამგეობა მხოლოდ იმ კომპანიას გაუფორმებს, რომელსაც 2015 წლის 1-ელი იანვრიდან აღნიშნული ტენდერის გამოცხადებამდე, მინიმუმ 2 500 000 ლარის სამუშაოები აქვს შესრულებული.
ზუნდაგის საბავშვო ბაღისა და მახუნცეთის თემის ადმინისტრაციული შენობის რეაბილიტაცია შპს „საბას“ მიერ დამუშავებული პროექტით განხორციელდება.
როგორც ქედის გამგეობაში აცხადებენ, საბავშვო ბაღი ევროსტანდარტების შესაბამისად მოეწყობა, არსებული ფართობი გაფართოვდება, რითაც იქნება შესაძლებლობა სკოლამდელი განათლება აქ გაცილებით მეტმა ბავშვმა მიიღოს.
![ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]](https://batumelebi.netgazeti.ge/wp-content/uploads/2026/06/11.png "ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]")
