მთავარი,მთიანი აჭარა

ხულოში ექვსსულიანი ოჯახის საცხოვრებელი სახლი დაიწვა

17.03.2018 • 1827
ხულოში ექვსსულიანი ოჯახის საცხოვრებელი სახლი დაიწვა

17 მარტს, ხულოში, სხალთის თემის სოფელ წაბლიანში დავითაძეების ექვსსულიან ოჯახს საცხოვრებელი სახლი მთლიანად დაეწვა. სახლთან ერთად დაიწვა მიკროავტობუსიც, რომელიც ოჯახის საკუთრება იყო.

ხანძრის შედეგად არავინ დაზარალებულა.

ხულოს მერის მოადგილის, ლაშა ბოლქვაძის ინფორმაციით, ხულოს მერია დაზარალებულ ოჯახს პირველ ეტაპზე საცხოვრებელ ფართს დაუქირავებს.

„სახლის გადარჩენა ვერ მოხერხდა, მთლიანად დაიწვა ნახევრად კაპიტალური შენობა. დაიწვა ეზოში მდგარი მიკროავტობუსიც, ხანძრის დროს სახლში არავინ იმყოფებოდა, ოჯახმა საყოფაცხოვრებო ნივთების გადარჩენაც კი ვერ შეძლო, ყველაფერი განადგურდა. ხანძრით დაზარალებულ ოჯახი ღამეს ნათესავთან გაატარებს, ხვალიდან ფართს დავუქირავებთ, შემდეგში ვიმსჯელებთ, თუ რა სახის დახმარება გაეწევათ“ – ამბობს მერის მოადგილე.

ლაშა ბოლქვაძის თქმით, სახანძრო ადგილზე გამოძახებიდან დაახლოებით 35-40 წუთში მივიდა:

„სოფელი წაბლიანი სხალთის ცენტრალური გზიდან დაახლოებით ნახევარი საათს სავალზეა, გზა ვიწრო და დახრილია, რთული იყო ავტომობილის დროულად მისვლა, ამიტომ სახანძროს გამოძახების ადგილზე მისვლას 35-40 წუთი დასჭირდა“ – აღნიშნა ლაშა ბოლქვაძემ.

___________

მთავარ ფოტოზე: ხანძარი ხულოში. ფოტო “ბათუმელების” არქივიდან.

 

გადაბეჭდვის წესი


ასევე: