მთავრობის სხვადასხვა უწყებას ხეების გადატანაზე წინადადებას „ერთიანი ნაციონალური მოძრაობა“ სთავაზობს. უმაღლესი საბჭოს წევრმა, გია აბულაძემ, სპეციალური ბრიფინგით მთავრობას მიმართა, რომ პარტია გამოისყიდის ხეებს, რომლებსაც ბიძინა ივანიშვილი დენდროლოგიური პარკისთვის ყიდულობს. პარტიამ მთავრობას წერილიც გაუგზავნა.
„აჭარის რეგიონიდან ბიძინა ივანიშვილის მიერ ხეების გადატანის გამო გაიჩეხა ათასობით ხე, ეროზირებულია მიწის ნაკვეთები, დაზიანებულია ინფრასტრუქტურა, რაზეც არც ერთი საჯარო დაწესებულება რეაგირებას არ ახდენს, პირიქით აჭარის მთავრობის ჩათვლით ყველა საჯარო დაწესებულება იღებს ისეთ გადაწყვეტილებებს, რომლებიც შეიცავს დანაშაულის ნიშნებს… ჩვენ მზად ვართ, გამოვისყიდოთ ის ხეები, რომელთა შესყიდვასაც გეგმავს ბიძინა ივანიშვილი, მზად ვართ გადავიხადოთ იმაზე მეტი თანხა, ვიდრე გადაიხდის ბიძინა ივანიშვილი, რათა გადავარჩინოთ უნიკალური ბუნება და ტყე დავუბრუნოთ ხალხს. შესაბამის საჯარო დაწესებულებას ვთხოვთ, გვაცნობოს ნებისმიერი ხის მოსალოდნელი გასხვისება, რათა შევძლოთ მისი გამოსყიდვა“, – ნათქვამია წერილში, რომლითაც აჭარის უმაღლესი საბჭოს დეპუტატი გია აბულაძე ხელისუფლებას მიმართავს.
აჭარის მთავრობის მიერ პრივატიზებული/გაყიდული ხეებიდან ერთი შემთხვევა [ციხისძირი] არის ტიტას ხე და კიდევ 2 ჭაობის კიპარისი, რომელიც შპს „ზიმოს“ 6200 ლარად გადაეცა საკუთრებაში აჭარის მთავრობის ყოფილი თავმჯდომარის, არჩილ ხაბაძის 2015 წლის 31 დეკემბრის ბრძანებით; ხოლო მეორე შემთხვევაში [ჩაქვი] აჭარის საკუთრებაში არსებული მრავალწლოვანი ცრუ ქაფურის 6 ხე 19 500 ლარად კომპანია „ზიმოს“ აჭარის მთავრობის თავმჯდომარემ, ზურაბ პატარაძემ მას შემდეგ მიჰყიდა, როცა ეს ხეები უკვე ამოღებული იყო.
აჭარაში ხეები ბიძინა ივანიშვილს საქართველოს მთავრობამაც მიჰყიდა. სახელმწიფოს მიერ 13 ათას ლარად აუქციონზე გატანილი სამი ძირი ხე 2017 წლის 6 მარტს გაიყიდა. სახელმწიფო ქონების ეროვნული სააგენტოს ინფორმაციით, ხეები შპს „ანაგმა“ 13 500 ლარად შეიძინა.
ბიძინა ივანიშვილი ხეებს მოსახლეობისგანაც ყიდულობს. ხშირ შემთხვევაში კი, მიწის ნაკვეთები აჭარის ზღვისპირა ზოლში, აჭარისა და საქართველოს მთავრობებმა გაასხვისეს კერძო კომპანიებზე, ამ მიწის ნაკვეთებიდან კი მრავალწლოვანი ხეები ბიძინა ივანიშვილის პარკში გადასატანად ამოთხარეს:
- მახინჯაურში, ზღვისპირას მდებარე მიწის ოთხი ნაკვეთი, მათ შორის ის ადგილი, სადაც ხეებს იღებენ და შეკვეთილში გადასატანად ამზადებენ, საქართველოს მთავრობამ პირდაპირი მიყიდვის ფორმით, 660 ათას ლარად „აჭარის კურორტებს“ [ფაქტობრივად სილქ როუდ ჯგუფს] გადასცა.
- ბათუმში, მწვანე კონცხის დასახლებაში მდებარე 20 366 კვ/მ არასასოფლო-სამეურნეო დანიშნულების მიწის ნაკვეთი საქართველოს მთავრობამ პირდაპირი მიყიდვის ფორმით, 931 ათას ლარად, საკუთრებაში გადასცა კომპანიას, რომელიც კერძო პირმა ქონების გადაცემამდე რამდენიმე დღით ადრე დაარეგისტრირა. ბიძინა ივანიშვილის პარკში გადასატანად ხეებს ამ ტერიტორიაზეც თხრიან.
- ხეები მახინჯაურში, თამარ მეფის გამზირის მიმდებარედ, ყოფილ სანატორიუმ „კოლხიდას“ ტერიტორიაზეც ამოიღეს.
- ხეებთან მისასვლელი გზის მოსაწყობად კი ყოფილ სანატორიუმ „მზიურის“ ტერიტორიას იყენებდნენ. ამ სამუშაოებისთვის აქ რამდენიმე ძირი მრავალწლოვანი ნაძვი და მაგნოლია მოჭრეს. ეს ტერიტორიები კი აჭარის მთავრობამ გაასხვისა.
- მრავალწლოვანი ხეები ე.წ. დენდროლოგიურ პარკში გადასატანად ამოიღეს ჩაქვშიც, პლაჟის მიმდებარე მიწის ნაკვეთებზე, რომლებიც, სახელმწიფომ უპირობო აუქციონითა და პირდაპირი მიყიდვის წესით გაასხვისა.
- სახელმწიფო ქონების ეროვნულმა სააგენტომ და აჭარის ფინანსთა და ეკონომიკის სამინისტრომ ქობულეთში, სოფელ ციხისძირში, ჯამში 18 136 კვ/მ მიწის ნაკვეთები, აუქციონზე ყოველგვარი პირობის გარეშე გაყიდეს. უძრავი ქონება სახელმწიფოსგან ბიძინა ივანიშვილის კომპანიამ „ბიზნეს დეველოპმენტმა“ 1 მილიონ 99 ათას ლარად, ანუ 1 კვ/მ მიწის ნაკვეთი – 60 ლარად და 60 თეთრად შეიძინა. „ბიზნეს დეველოპმენტის“ მიერ შესყიდული ტერიტორიიდან ბიძინა ივანიშვილის კუთვნილი პარკისთვის რამდენიმე მრავალწლოვანი ხე იქამდე გადაიტანეს, ვიდრე ამ ნაკვეთებს სახელმწიფო გაყიდდა. აუქციონზე გაყიდულ ტერიტორიასთან ახლოსაა ასევე ის ადგილი, საიდანაც ბიძინა ივანიშვილმა პირველად გაიტანა მრავალწლოვანი ტიტას ხე.
