მთავარი,სიახლეები

რა ვითარებაა ბათუმის შემოვლით გზაზე, რომელიც „რამდენიმე კვირაში“ უნდა გახსნან

03.08.2024 •
რა ვითარებაა ბათუმის შემოვლით გზაზე, რომელიც „რამდენიმე კვირაში“ უნდა გახსნან

აჭარის მთავრობის თავმჯდომარის განცხადებით, ბათუმის შემოვლითი გზა „რამდენიმე კვირაში“ გაიხსნება. საქართველოს საავტომობილო გზების დეპარტამენტში კი, ვისი დაკვეთითაც ეს გზა შენდება, ვერ დაგვიკონკრეტეს ამ „რამდენიმე კვირის“ ბოლო დაახლოებით რომელ თვეში დადგება.

ბათუმის შემოვლითი გზის მშენებლობის დასრულების კონკრეტული თარიღი ადრე ვერც ინფრასტრუქტურის მინისტრმა დაასახელა.

ბათუმის შემოვლითი და ბათუმი-ქობულეთის გზების დაერთება მახინჯაურის გვირაბთან / ფოტო: ივლისი, 2024 წ.

ბათუმის შემოვლითი გზის მშენებლობა მახინჯაურში / ფოტო: ივლისი, 2024 წ.

ბათუმის შემოვლითი გზის მშენებლობა, ხელისუფლების თავდაპირველი გათვლებით, 2020 წელს უნდა დასრულებულიყო. ამის შემდეგ მშენებლობის დასრულების თარიღი რამდენჯერმე გადაავადეს – მოგვიანებით 2023 წელი დაასახელეს, ბოლოს კი – 2024 წელი.

„ბათუმის შემოვლითი გზის მშენებლობა წელს დასრულდება“, – ეს განცხადება რეგიონული განვითარებისა და ინფრასტრუქტურის მინისტრმა ირაკლი ქარსელაძემ 2024 წლის მარტში გააკეთა.

„საცობებმა შექმნა დისკომფორტი, რომელიც რამდენიმე კვირაში შემოვლითი გზის გახსნით მინიმუმამდე იქნება დაყვანილი“, – ეს განცხადება აჭარის მთავრობის თავმჯდომარე თორნიკე რიჟვაძემ მთავრობის სხდომაზე 31 ივლისს გააკეთა, როცა ბათუმში არსებულ საცობების პრობლემაზე საუბრობდა.

„ბათუმელებმა“ საქართველოს საავტომობილო გზების დეპარტამენტს ჰკითხა, კონკრეტულად რომელ თვეშია დაგეგმილი ბათუმის შემოვლითი გზის გახსნა, თუმცა დეპარტამენტში ეს თვე ვერ დაგვისახელეს.

„მიმდინარე წელს არის დაგეგმილი სამუშაოების დასრულება. კონკრეტული თარიღის შესახებ ინფორმაციის გაზიარება გაგვიჭირდება“, – მოგვწერეს 2024 წლის პირველ აგვისტოს გზების დეპარტამენტიდან.

ბათუმის შემოვლითი გზის მშენებარე საგზაო კვანძი / აქ შემოვლითი გზა ფრიდონ ხალვაშის გამზირზე გადადის / ფოტო: ივლისი, 2024 წ.

ბათუმის მშენებარე შემოვლითი გზა და საგზაო კვანძი, საიდანაც ახალი გზა ჭოროხი-სარფის მიმართულებით უნდა გაგრძელდეს [უკან ფონზე ჭოროხის დელტა] / ფოტო: ივლისი, 2024 წ.

მთავრობა ყველანაირ ხერხს მიმართავს, რომ წინასაარჩევნოდ დროში გაწელილი და დაუმთავრებელი მსხვილი ინფრასტრუქტურული პროექტები ასე თუ ისე დაასრულოს.

აჭარის შემთხვევაში ასეთი 2 პროექტია – ხულო-ზარზმის და ბათუმის შემოვლითი გზების პროექტები.

ხულო-ზარზმის გზის შემთხვევაში მთავრობამ აჭარის და სხვა რეგიონებისთვის გამოცხადებულ ტენდერებში გამარჯვებულ კომპანიებს ხულო-გოდერძის გზის მონაკვეთის დასრულება დაავალა.

გოდერძიზე გზის შეკეთებისთვის საჭირო ინერტული მასალების ამოღება კი, მწვანე ტბის მიმდებარედ დაიწყეს, რითაც ამ უნიკალურ ადგილს საფრთხე შეუქმნეს.

ვრცლად: ხულოში, მწვანე ტბასთან ინერტულ მასალებს მოიპოვებენ – მთავრობაში არ ამბობენ, ვინ გასცა ლიცენზია

რაც შეეხება ბათუმის შემოვლით გზას.

ბათუმის მშენებარე შემოვლითი გზა ფრიდონ ხალვაშის გამზირიდან მახინჯაურის მიმართულებით / ფოტო: ივლისი, 2024 წ.

საქართველოს მთავრობამ 2024 წლის პირველ აგვისტოს ახალი განკარგულებაც გამოსცა, რომლითაც აჭარის ფინანსთა და ეკონომიკის სამინისტროს აძლევს თანხმობას – ქედის სოფელ წონიარისის მიმდებარედ მდინარე აჭარისწყლის კალაპოტში ქვიშა-ხრეშის მოპოვების ლიცენზიის გაცემისათვის განსაზღვროს დამატებითი სალიცენზიო პირობა.

მთავრობის განკარგულების მიხედვით, ლიცენზიის მოქმედების ვადა 5 წელი იქნება, მოსაპოვებელი ქვიშა-ხრეშის მოცულობა კი, ჯამში 108 870 კუბ.მეტრი.

დამატებითი პირობის თანახმად, „ლიცენზიის მფლობელი ვალდებული იქნება, ლიცენზიის ძალაში შესვლიდან 6 თვის ვადაში არ გაასხვისოს მოსაპოვებელი სასარგებლო წიაღისეულის 50% და საჭიროების შემთხვევაში, საქართველოს საავტომობილო გზების დეპარტამენტის მიმართვის საფუძველზე უზრუნველყოს მისი გადაცემა [განსაზღვრული ფასის შესაბამისად] დეპარტამენტის კონტრაქტორი ორგანიზაციებისათვის, რომლებიც ახორციელებენ განსაკუთრებული მნიშვნელობის საგზაო და ნაპირდაცვის ინფრასტრუქტურულ პროექტებს, მათ შორის, ბათუმის შემოვლითი გზის მიმდინარე პროექტსა და ხულო-ზარზმის სარეაბილიტაციო-სარეკონსტრუქციო პროექტს“, – აღნიშნულია მთავრობის განკარგულებაში.

ბათუმის შემოვლითი გზა სოფელ მახვილაურთან / ივლისი, 2024 წ.

ბათუმის შემოვლითი გზა სოფელ მახვილაურთან / ივლისი, 2024 წ.

აჭარაში, „ოცნების“ ადრინდელი დაპირების მიუხედავად, კიდევ ერთი მსხვილი პროექტია განუხორციელებელი. ბათუმი-სარფის ავტობანი, რომლის მშენებლობაზე ჯერ ტენდერიც არ არის გამოცხადებული.

ამ თემაზე:

ბათუმი-სარფის ავტობანი 112 კერძო მიწაზე გაივლის და სარფის პლაჟს არ შეეხება – პროექტის გზშ მზადაა

გადაბეჭდვის წესი


ასევე: