მთავარი,სიახლეები

როგორ ყიდულობენ რუსები სოფლებში მიწებს  – „ბათუმელების“ 20 პოპულარული სტატია 2023 წელს

28.12.2023 •
როგორ ყიდულობენ რუსები სოფლებში მიწებს  – „ბათუმელების“ 20 პოპულარული სტატია 2023 წელს

რას კითხულობდნენ 2023 წელს ყველაზე ხშირად „ბათუმელებზე“? – წლის ბოლოს ტრადიციულად წარმოგიდგენთ წლის ყველაზე რეიტინგულ სტატიებს, რომლებიც batumelebi.ge-ზე გამოქვეყნდა.

ემიგრაცია, შოვის ტრაგედია, მუნიციპალური პრობლემები, სიღარიბე, დაუცველი ჯგუფები, რუსეთ-უკრაინის ომი და მოახლოებული 2024 წლის არჩევნები – სტატისტიკა აჩვენებს, რომ 2023 წელს ყველაზე მეტი მკითხველი „ბათუმელებს“ ამ თემების გაშუქებისას ჰყავდა.

[red_box]რუსული კანონი[/red_box]

2023 წლის გაზაფხულზე საქართველოში დაიწყო „უცხოელი აგენტების შესახებ კანონის“, იგივე რუსული კანონის განხილვა. „ბათუმელებზე“ მკითხველის დიდი გამოხმაურება მოჰყვა ამ საკითხის გაშუქებას.

„ბათუმელები“ არ შემოიფარგლა მხოლოდ პოლიტიკური შეფასებებით და ცალკეული მოქალაქეების მაგალითზე დაიწყო იმის ჩვენება მკითხველისთვის, თუ როგორ აისახებოდა ეს კანონი თითოეულ მოქალაქეზე. ამ თემაზე მომზადებული ყველაზე პოპულარული სტატია, სწორედ ასეთ მაგალითებს შეეხებოდა. სტატია აჭარის მთებში მცხოვრებ ორი მეურნის შესახებ და მათ პოზიციას უამბობს მკითხველს. 

სტატიას დიდი გამოხმაურება ჰქონდა – ცხადად აჩვენა ის აბსურდული სიტუაცია, რაშიც აღმოჩნდებოდა ქვეყანა და გრანტის მიმღები ათი ათასობით ადამიანი რუსული კანონის მიღების შემთხვევაში. 

ამ თემაზე მომზადებული სტატიებიდან მკითხველის დიდი ინტერესი მოჰყვა სტატიას „უცხოელი გავლენის აგენტების“ კანონპროექტის ერთ-ერთი ავტორის, პარლამენტარ მიხეილ ყაველაშვილის ქონებრივი დეკლარაციის შესახებ.

სტატია ააშკარავებს, რომ პარლამენტარ ყაველაშვილს, რომელიც „აგენტებზე“ კანონის მიღებას ითხოვდა გამჭვირვალობის მოტივით, თავად გაუმჭვირვალედ და თან კანონდარღვევით ჰქონდა დეკლარირებული ქონება.

[red_box]ემიგრანტი ქალები [/red_box]

2023 წელს „ბათუმელები“ შეეცადა ახლო ხედით ეჩვენებინა ქართველი ემიგრანტების ცხოვრება უცხოეთში და მათი პრობლემები. ამ რუბრიკაში მომზადებულ სტატიებს „ბათუმელებზე“ წელს ყველაზე მეტი მნახველი ჰყავდა. მათ შორის ყველაზე რეიტინგული იყო შემდეგი სტატიები:

ამ სტატიის გმირი 1999 წლიდან ემიგრაციაში იმყოფება. ემიგრაციაში მიიღო გადაწყვეტილება, დაშორებოდა ქმარს, რომელიც, მისივე თქმით, არ იყო მზად ეშრომა ოჯახისთვის. 

კიდევ ერთი რეიტინგული სტატია ამ სერიიდან, ეხებოდა 33 წლის ქართველი ემიგრანტი ქალის ნაამბობი იმის შესახებ, თუ რა გზა გაიარა აშშ-ში ჩასასვლელად 5 წლის შვილთან ერთად.

ემიგრანტები ქალების ერთ-ერთი ყველაზე დიდი გულისტკივილი შვილებთან ურთიერთობას უკავშირდება.

წლების განმავლობაში ქალები ინტერნეტით ან ტელეფონით „ზრდიან“ შვილებს, რაც საბოლოო ჯამში გაუცხოების მიზეზიც შეიძლება გახდეს. სწორედ ამ თემას გაუსვა ხაზი „ბათუმელებთან“ ემიგრაციიდან დაბრუნებულმა ქალმა.

[red_box]შოვის ტრაგედია [/red_box]

შოვის ტრაგედიაზე მომზადებული მასალებიდან ყველაზე მეტი მკითხველი ჰყავდა შოვის სტიქიის თვითმხილველის, დავით ჯელაძის ნაამბობს, რომელმაც სტიქიის ზონიდან ზურგით გამოიყვანა თავისი მცირეწლოვანი დისშვილი.

2023 წლის 3 აგვისტოს რაჭაში, კურორტ შოვში განვითარებულ დამანგრეველ მეწყერს 33 ადამიანის სიცოცხლე ემსხვერპლა.

[red_box]დასაქმება წინასაარჩევნოდ – სტატიების სერია [/red_box]

„ბათუმელები“ აჭარის მაგალითზე დაინტერესდა, როგორ მუშაობს მთავრობის დასაქმების პროგრამა და დაადგინა, რომ სოციალურად დაუცველი ადამიანების დასაქმების პროგრამას მმართველი პარტია „ქართული ოცნება“ წინასაარჩევნოდ იყენებს ხმების შესაგროვებლად.

ამ თემაზე მომზადებული სტატიისთვის „ბათუმელების“ ჟურნალისტმა ჯაბა ანანიძემ ჟურნალისტური პრემია „შუქი“ მიიღო.

[red_box]სასამართლო სისტემა [/red_box]

„ბათუმელები“ წლების განმავლობაში სისტემატურად წერს სასამართლო სისტემაზე. 2023 წელს ამ რუბრიკაში მომზადებულ სტატიებს შორის მკითხველის ყველაზე მეტი გამოხმაურება და ინტერესი მოჰყვა სტატიას, რომელიც სასამართლოში განხილულ პედოფილიის საქმეს ეხებოდა.

2023 „ბათუმელებმა“ რამდენიმე ვრცელი სტატია მოამზადა სასამართლო სისტემის შესახებ. ამ სერიაში მომზადებულ სტატიებს შორის მკითხველის ყველაზე მეტი ინტერესი მოჰყვა სტატიას, რომელშიც განხილულია, რატომ ცვლის იშვიათად უზენაესი სასამართლო გამამართლებელ განაჩენებს, როცა საქმე ოჯახში ძალადობას ეხება.

ასევე, „ბათუმელების“ ყველაზე ხშირად წაკითხულ სტატიებს შორისაა მასალა აშშ-ის მიერ სანქცირებულ მოსამართლეზე.

ამ მოსამართლის ოჯახის გამდიდრების ისტორია 2011 წლიდან იწყება, როცა იგი თბილისის სააპელაციო სასამართლოს თავმჯდომარე იყო.

[red_box]რუსეთის მოქალაქეები საქართველოში [/red_box]

საქართველოში რუსეთის მოქალაქეების მასობრივი შემოსვლა 2022 წელს, რუსეთის უკრაინაზე თავდასხმის შემდეგ დაიწყო და დღემდე გრძელდება. რა გავლენა აქვს ამას საქართველოში ეკონომიკასა და საზოგადოებრივ ცხოვრებაზე? – ამ სერიაში მომზადებულ სტატიებს შორის მკითხველის ყველაზე დიდი ინტერესი გამოიწვია სტატიამ, თუ როგორ ყიდულობენ რუსეთის მოქალაქეები სასოფლო-სამეურნეო მიწებს საქართველოში.

ასევე, მკითხველების ინტერესი მოჰყვა „ბათუმელების“ სტატიას, იმის შესახებ, თუ რა ხდება ბარებში, რომლებიც ქართულ ენაზე არ მოგემსახურებიან.

სტატისტიკა აჩვენებს, რომ „ბათუმელების“ მკითხველების ინტერესი ამ თემის მიმართ კვლავ მაღალია.

[red_box]მუნიციპალური პრობლემები [/red_box]

batumelebi.ge-ს მკითხველი ყველაზე მეტად ინტერესდება ბათუმის და აჭარის სხვა მუნიციპალიტეტებში არსებული საკითხებით, რომელიც უკავშირდება საზოგადოებრივ სივრცეებს, მშენებლობებსა და გზებისა და პარკინგის პრობლემებს. 2023 წელს ამ რუბრიკაში მომზადებული სტატიებიდან მკითხველების ყველაზე დიდი ინტერესი მოჰყვა სტატიას, როგორ გადაყიდა კომპანიამ სახელმწიფოსგან 1 ლარად ნაყიდი მიწა.

ბათუმში სამშენებლო ბიზნესის მუშაობა და მასთან დაკავშირებული საკითხები წლებია „ბათუმელების“ ფოკუსშია. 2023 წელს განსაკუთრებით ბევრი მკითხველი ჰყავდა სტატიას, რომელიც კაზუსს შეეხებოდა.

ბათუმში სამშენებლო ბუმის პარალელურად გრძელდება მოქალაქეების ბრძოლა ამ პროცესში შელახული უფლებებისა და საზოგადოებრივი სივრცეების შესანარჩუნებლად. მოქალაქეები ხშირად უპირისპირდებიან კომპანიებს და ამ ბრძოლაში იშვიათად, მაგრამ გამარჯვების მაგალითები მაინც არის. სწორედ ერთ ასეთ შემთხვევაზეა 2023 წელს „ბათუმელების“ მიერ მომზადებული მასალა.

[red_box]ქალთა უფლებები [/red_box]

ქალთა უფლებების, გენდერული თანასწორობისა და ქალთა სხვადასხვა დაუცველი ჯგუფების შესახებ „ბათუმელებმა“ წელს არაერთი მასალა მოამზადა. ამ სტატიებს შორის ყველაზე მეტი მკითხველი ჰყავდა სტატიას ნაადრევ ქორწინებაზე.

16 წლის მეხოშ გუსეინოვას ნახატმა შსს-ს მიერ გამოცხადებულ კონკურსში ნაადრევი ქორწინების თემაზე პირველი საპრიზო ადგილი მოიპოვა. „ბათუმელებს“ 16 წლის მოზარდი ნაადრევი ქორწინების პრობლემაზე ესაუბრა.

ამ სერიაში მომზადებულ სტატიებს შორის ასევე ბევრი მკითხველი ჰყავდა სტატიას, რომელიც სექსმუშაკების ცხოვრებას ეხებოდა.

ამ სტატიისთვის „ბათუმელების“ ჟურნალისტმა ია ფრანგიშვილმა ორგანიზაციის – „ქალები საერთო მომავლისთვის“ – ჯილდო მიიღო კატეგორიაში – „საუკეთესო რეგიონული მედია პროდუქტი“.

[red_box]სოციალური პრობლემები [/red_box]

სოციალურ პრობლემებზე მომზადებულ სტატიებს „ბათუმელებზე, ტრადიციულად, ძალიან ბევრი მკითხველი ჰყავს. წელს ამ თემაზე მომზადებულ სტატიებს შორის ყველაზე მეტი მკითხველი ჰყავდა სტატიას პენსიონერზე, რომელმაც პენსიის შეგროვების ნაცვლად 4 წლის პენსია დაკარგა. იგი სასამართლოში უჩივის „ლიბერთი ბანკს“.

ასევე, ბევრი მკითხველი ჰყავდა სტატიას ოჯახზე, რომელიც ახალი სასწავლო წლის დასაწყისში თურქეთში გადავიდა სასკოლოდ საჭირო ტანსაცმელი და ნივთები რომ იაფად შეეძინათ.

თურქეთში იაფად სავაჭროდ აჭარიდან და საქართველოს სხვა რეგიონებიდან ყოველდღიურად ათასობით ადამიანი გადადის.

[red_box]რუსეთ-უკრაინის ომი [/red_box]

2022-2023 წლებში ვებგვერდის მკითხველთა დიდი ნაწილი ყოველდღიურად ინტერესდება უკრაინაში მიმდინარე მოვლენებით. 2023 წელს ამ რუბრიკაში მომზადებული ყველაზე პოპულარული სტატია, ინტერვიუ პოლკოვნიკ ლაშა ბერიძესთან, სამხედრო ჯგუფ „ვაგნერის“ ხელმძღვანელის, ევგენი პრიგოჟინის მკვლელობას უკავშირდება.

თითქმის 2 წელი გავიდა მას შემდეგ, რაც რუსეთი უკრაინას დაესხა თავს. batumelebi.ge-ზე ამ თემის მიმართ ინტერესი არ შემცირებულა.

გადაბეჭდვის წესი


ასევე: