დღეს, 4 ნოემბერს, შენობაში, სადაც ტელეკომპანია „ფორმულაა“ განთავსებული, ხანძარი გაჩნდა, რის გამოც მაუწყებლობა შეწყდა.
„ფორმულას დღის“ წამყვანმა ირაკლი კიკნაველიძემ შენობაში დაკვამლიანების გამო პირდაპირი ეთერი შეწყვიტა.
„მეგობრებო, ვერ გპასუხობთ ყველას. 22 ადამიანი ვართ 17-ე სართულზე თავმოყრილი ერთად ნიუსრუმში. მეხანძრეები მოვიდნენ და გვითხრეს რომ ჯერ ვერ გაგვიყვანენ, რადგან ძლიერი კვამლია ქვედა სართულებზე. ველოდებით დამატებით ძალებს“, – დაწერა ირაკლი კიკნაველიძემ სოციალურ ქსელში, ეთერიდან გასვლის შემდეგ.
ხანძარი იმ შენობის მე-12 სართულზე გაჩნდა, რომელშიც „ფორმულა“ მდებარეობს. თავად „ფორმულა“ აღნიშნული შენობის მე-17 და მე-18 სართულზეა განთავსებული და ამჟამად ტელეკომპანიის თანამშრომლები შენობის დატოვებას ვერ ახერხებენ, რადგან კიბეები ძლიერადაა დაკვამლიანებული.
ჟურნალისტ ნინო ჟიჟილაშვილის მიერ გამოქვეყნებულ მოკლე ვიდეოში ისმის, როგორც ეუბნება მეხანძრე ტელეკომპანიის თანამშრომლებს, რომ ჯერჯერობით უსაფრთხოდ არიან.
განახლებული ინფორმაცია: დაახლოებით 17 საათზე ცნობილი გახდა, რომ ტელეკომპანიის ყველა თანამშრომელმა შენობა დატოვა. „ფორმულას“ ცნობით ხანძარი ლიკვიდრებულია.
