სახელმწიფოსგან 1 ლარად ნაყიდი მიწა ბათუმში 4 მილიონ დოლარად გაიყიდა

შპს „ADOG-GEORGIA“-ს ბათუმში, გოგებაშვილის #6-ში სასტუმრო უნდა აეშენებინა. სწორედ ამ პირობით გადასცეს ბათუმის ცენტრში, ზღვასთან ახლოს მდებარე 1621 კვ/მეტრი მიწის ნაკვეთი და მასზე დამაგრებული ქონება პირდაპირი წესით და სიმბოლურ ფასად 2011 წელს.

კომპანიამ სახელმწიფოსთან ნაკისრი ვალდებულება ვერ შეასრულა. მთელი ამ წლების განმავლობაში მშენებლობა რამდენიმეჯერ განაახლეს, თუმცა უშედეგოდ. ეს განახლებები საძირკველს ვერასდროს გასცდა.შპს „ADOG-GEORGIA“-ს 100-ვე პროცენტი და მასთან დაკავშირებული ქონება მისმა მფლობელმა -„კუბიკ თაუერს“ 4 მილიონ დოლარად მიჰყიდა. თავის დროზე სწორედ ეს ქონება მიიღო სახელმწიფოსგან 1 ლარად „ADOG-GEORGIA“-მ. კომპანიის მფლობელი იყო აზერბაიჯანის მოქალაქე მუსა სულეიმანოვი, ხოლო დირექტორი მიხეილ ძოძუაშვილი.

საბოლოო შეთანხმება „ADOG-GEORGIA“-ს მფლობელმა მუსა სულეიმანოვმა და შპს „კუბიკ თაუარის“ მფლობელებმა 2022 წელს გააფორმეს. კომპანია ასივე პროცენტით „კუბიკ თაუერის“ საკუთრებაში გადავიდა.

ბათუმი, გოგებაშვილის ქუჩა, ადგილი სადაც კუბთაუერი უნდა აშენებულიყო / 16.02.2019

საჯარო რეესტრის მონაცემებით ირკვევა, რომ მოლაპარაკებები ქონების შესყიდვასთან დაკავშირებით კომპანიებს შორის 2019 წელს დაიწყო. ამ დროს შედგა პირველი შეთანხმებაც. მხარეები შეთანხმდნენ კონკრეტული ხარჯისა და კომპანიის საკუთრებაში არსებული დავალიანების დაფარვაზე, ასევე ყადაღადადებული ქონების ვალდებულებებისგან გათავისუფლებაზე. შეთანხმების საგანი იყო სრული თანხის გადახდის გრაფიკი და პირობებიც.

შპს „კუბიკ თაუერის“ 90 პროცენტს  შპს „მარდი კორპორაცია“ ფლობს, 10 პროცენტი კი რამინ ბალაძის საკუთრებაა.

„მარდი კორპორაციას“ 50 პროცენტს „მარდის“ დამფუძნებელი ირაკლი თურმანიძე, 50 პროცენტს კი მიხეილ ძოძუაშვილი ფლობს, რომელიც კომპანიის გაყიდვამდე „ADOG-GEORGIA“-ს დირექტორი იყო.

მიხელ ძოძუაშვილი ბათუმის მერის მოადგილის, სოფო ხალვაშის მეუღლეა.

გოგებაშვილის #6-ში მშენებლობა ჯერ ისევ არ გაუახლებიათ. გასულ კვირას ერთ-ერთმა არქიტექტურულმა კომპანიამ გაავრცელა რენდერი, რომელიც მდებარეობის მიხედვით ტოვებდა განცდას, რომ პროექტის მშენებლობა სწორედ გოგებაშვილის #6-შია დაგეგმილი. რენდერს ჰქონდა ასევე დასათაურება – „კუბიკ თაუერი“.

შპს „კუბიკ თაუერის“ დირექტორის, ნუგზარ ბერიშვილის ინფორმაციით, გავრცელებული რენდერის მიხედვით კომპანია მშენებლობას არ გეგმავს და პროექტი კონკურსის წესით, „ბათუმელების ჩართულობით“ უნდა შეირჩეს.

„ჯერ კიდევ პანდემიამდე ვთხოვეთ კომპანიას ჩვენთვის მოემზადებინა სავარაუდო ვერსია და იქვე შეგვიქმნეს ესკიზი ფანქრით. პროექტზე არ უმუშავიათ. ახლა აიღეს და გამოაქვეყნეს ეს ესკიზი. ჩვენ ამას არ განვიხილავთ. პროექტთან დაკავშირებით ბევრი დეტალია განსახილველი და მთავრობასთან ერთად ვმუშაობთ ადგილის განვითარების კონცეფციაზე. ზუსტ დროს, როდის გვექნება შედეგები ახლა ვერ დაგისახელებთ“, – აცხადებს ნუგზარ ბერიშვილი.

ბათუმის მერია ადასტურებს, რომ ამ დროისთვის გოგებაშვილის #6-ში მშენებლობის ნებართვა გაცემული არ არის და არც ახალი განაცხადია შესული.

2011 წელს დადებული შეთანხმებით, შპს „ADOG-GEORGIA“-ს 22-სართულიანი სასტუმრო კომპლექსი „კუბთაუერი“ ბათუმში 40 თვეში უნდა აეშენებინა. სასტუმროს ექსპლუატაციაში შესვლის შემდეგ კი მინიმუმ 100 ადამიანი უნდა დაესაქმებინა.

კომპანიამ ეს ვადები დაარღვია.

ახალი შეთანხმებით, 2016-2017 წლებში, კომპანიას უნდა დაესრულებინა ნულოვანი ნიშნულის, მზიდი და არამზიდი კონსტრუქციების მშენებლობა.

2018 წლის 1 თებერვლამდე კი, ბათუმის მერიასთან შეთანხმებული პროექტის შესაბამისად, უნდა  დაესრულებინა და ექსპლუატაციაში შეეყვანა არანაკლებ 22-სართულიანი შენობა, ხოლო 2018 წლის 11 თებერვლამდე ამ შენობაში არანაკლებ 180-ნომრიანი სასტუმრო და კაზინო უნდა აემოქმედებინა.

ამ ყველაფერში კომპანიას 30 მილიონი აშშ დოლარის ინვესტიცია უნდა განეხორციელებინა; სასტუმროს ექსპლუატაციაში შესვლიდან 6 თვის ვადაში უნდა შეექმნა არანაკლებ 100 სამუშაო ადგილი.

ამის პარალელურად სამშენებლო მოედანზე გამოჩნდა ახალი ბანერი, რომლითაც ირკვეოდა, რომ კომპანიას მშენებლობის ვადა კიდევ ერთხელ, 2017 წლის ბოლომდე გაუგრძელეს.

კომპანიამ ვალდებულება ისევ ვერ შეასრულა.

2019 წელს ე.წ. „კუბთაუერის“ მშენებლობაზე კერძო კომპანიასთან გაფორმებული ხელშეკრულება აჭარის ფინანსთა და ეკონომიკის სამინისტრომ ცალმხრივად გააუქმა. თუმცა 1 ლარად გაყიდული ქონება საკუთრებაში ვერ დაიბრუნა.

ამაზე ვრცლად წაიკითხეთ აქ:

რატომ ვერ აშენდა კუბთაუერი ბათუმში – სამინისტრომ ხელშეკრულება გააუქმა, მიწას კი ვერ იბრუნებს