ქობულეთში, ზღვის პირას მდებარე 11 235 კვადრატული მეტრი ფართობის მიწის ნაკვეთის გასაყიდად აუქციონი აჭარის ფინანსთა და ეკონომიკის სამინისტრომ უკვე მეათედ გამოაცხადა, ამჯერად 20-პროცენტიანი ფასდაკლებით.
მთავარი პირობა მყიდველის მიერ ხუთ წელში არანაკლებ 20 მილონი ლარის ინვესტიციის ჩადება და 100-ნომრიანი სასტუმროს ამოქმედებაა.
ქონების საწყისი გასაყიდი ფასი ამჯერად 4 მილიონ 360 ათასი ლარია. ვაჭრობის ბიჯი: 100 ათასი ლარი, ხოლო, საგარანტიო თანხა: 1 მილიონ 90 ათასი ლარი.
ელექტრონული აუქციონი დაწყებულია და ის 2023 წლის 20 თებერვალს დასრულდება.
ქობულეთი, ფიჭვნარი / ფოტო აუქციონიდან
ფიჭვნარის პლაჟთან მდებარე ეს ნაკვეთი აუქციონზე პირველად, 2019 წელს გამოიტანეს. წინა 9 აუქციონიდან უმეტესობა არ შედგა, ერთ აუქციონზე კი, ნაკვეთი ფასდაკლებით გაიყიდა, თუმცა გამარჯვებულმა კომპანიამ ხელშეკრულებას ხელი არ მოაწერა.
მონიშნულია ტერიტორია, რომელიც აუქციონზე იყიდება / ქობულეთი, ფიჭვნარი
გასაყიდად გამოტანილი არასასოფლო-სამეურნეო დანიშნულების მიწის ნაკვეთი აჭარის ავტონომიური რესპუბლიკის საკუთრებაშია და ქობულეთში, დავით აღმაშენებლის N379-ის მიმდებარედაა.
მყიდველს საბოლოო საპრივატიზებო საფასურის გადახდა აუქციონის დასრულებიდან სამ ეტაპად მოუწევს, კერძოდ:
2023 წლის 1-ელ დეკემბრამდე – საბოლოო საპრივატიზებო საფასურის არანაკლებ 25%-ის გადახდა;
2024 წლის 1-ელ ივნისამდე – საბოლოო საპრივატიზებო საფასურის არანაკლებ 25%-ის გადახდა;
2024 წლის 1-ელ დეკემბრამდე – დარჩენილი საპრივატიზებო საფასურის გადახდა.
აუქციონის პირობის მიხედვით, მყიდველს ასევე ევალება:
- შესაბამისი ნასყიდობის ხელშეკრულების გაფორმებიდან არაუგვიანეს 2 თვის ვადაში არანაკლებ ქონების საწყისი საპრივატიზებო ღირებულების 1%-ის უპირობო და გამოუხმობი საბანკო გარანტიის სამინისტროში წარდგენა, რომლის ვადაც არანაკლებ 2 თვით უნდა აღემატებოდეს საინვესტიციო ვალდებულების შესრულების ვადას;
- ხელშეკრულების გაფორმებიდან 6 თვის ვადაში საპროექტო ობიექტის ვიზუალური ესკიზის (4 მხრიდან ხედი მოცულობაში, საპროექტო ობიექტის გაბარიტები ფასადის მოსაპირკეთებელი მასალების ჩვენებით), მათ შორის ზღვაზე გადასასვლელი ბილიკის სამინისტროში შესათანხმებლად წარდგენა (3 ეგზემპლარად);
- ხელშეკრულების გაფორმებიდან 12 (ათი) თვის ვადაში საკუთრებაში გადაცემული მიწის ნაკვეთზე განსათავსებელი მრავალფუნქციური შენობა-ნაგებობ(ებ)ის მშენებლობის ნებართვის მიღება, სადაც მრავალფუნქციური შენობა-ნაგებობა უნდა შეიცავდეს არანაკლებ 100 ნომრიან სასტუმროს, სპორტულ-გამაჯანსაღებელ ან/და სარეაბილიტაციო ცენტრს, არანაკლებ 60 ავტომანქანაზე გათვლილ ავტოსადგომს, სკვერს;
- ხელშეკრულების გაფორმებიდან 36 თვის ვადაში მრავალფუნქციური შენობანაგებობ(ებ)ის ნულოვანი ნიშნულის დასრულება;
- ხელშეკრულების გაფორმებიდან 48 თვის ვადაში მრავალფუნქციური შენობა-ნაგებობ(ებ)ის მზიდი კონსტრუქციის (კარკასი) მშენებლობის დასრულება;
- ხელშეკრულების გაფორმებიდან 60 თვის ვადაში შენობა-ნაგებობ(ებ)ის, (რომელიც უნდა მოიცავდეს არანაკლებ 100 ნომრიან სასტუმროს, სპორტულ-გამაჯანსაღებელ ან/და სარეაბილიტაციო ცენტრს, არანაკლებ 60 ავტომანქანაზე გათვლილ ავტოსადგომს, სკვერს) ამოქმედება და არანაკლებ 20 წლის განმავლობაში პროფილის შენარჩუნება, სადაც დასაქმებულთა არანაკლებ 90% უნდა შეადგენდეს საქართველოს მოქალაქეებს;
- ხელშეკრულების გაფორმებიდან 60 თვის ვადაში აღნიშნულ პროექტში არანაკლებ 20 მილონი ლარის ინვესტიციის განხორციელება.
ამავე თემაზე:
