„რუსეთის ფედერაციას სურს ხერსონი „სიკვდილის ქალაქად“ აქციოს“, – წერს უკრაინის პრეზიდენტის მრჩეველი, მიხაილო პოდოლიაკი. მისი თქმით, რუსული არმია ქალაქ ხერსონს დატოვებამდე ნაღმავს.
„რუსეთის ფედერაციას სურს ხერსონი „სიკვდილის ქალაქად“ აქციოს. რუსი სამხედროები ნაღმავენ ყველაფერს, რის დანაღმვაც შეუძლიათ: ბინებს, კანალიზაციას. მარცხენა სანაპიროზე მდებარე არტილერია ქალაქის ნანგრევებად გადაქცევას გეგმავს. ასე გამოიყურება „რუსული სამყარო“: მოვიდა, გაძარცვა, იზეიმა, მოკლა „მოწმეები“, დატოვა ნანგრევები და წავიდა“ , – აცხადებს მიხაილო პოდოლიაკი.
RF wants to turn Kherson into a “city of death”. Ru-military mines everything they can: apartments, sewers. Artillery on the left bank plans to turn the city into ruins. This is what “Russian world” looks like: came, robbed, celebrated, killed “witnesses”, left ruins and left.
— Михайло Подоляк (@Podolyak_M) November 10, 2022
რუსეთის თავდაცვის მინისტრმა, სერგეი შოიგუმ, ხერსონის დასავლეთ ნაწილიდან ჯარების გაყვანის ბრძანება 9 ნოემბერს გასცა. მინისტრმა ეს გადაწყვეტილება უკრაინაში რუსეთის ძალების მეთაურის, სერგეი სუროვიკინის მოხსენების მოსმენის შემდეგ გამოაცხადა.
გაერთიანებული სამეფოს დაზვერვის მონაცემებში, რომელიც 10 ნოემბერს გამოქვეყნდა, აღნიშნულია, რომ რუსეთის არმიის ხერსონის დასავლეთ ნაწილში დარჩენა რუსეთის ლოგისტიკურ კვანძებზე უკრაინელთა თავდასხმებმა გახადა შეუძლებელი.
„გენერალმა სერგეი სუროვიკინმა, უკრაინაში რუსეთის ძალების მთავარსარდალმა, დაადასტურა, რომ არმია მდინარე დნეპრის მარცხენა სანაპიროზე თავდაცვით პოზიციებზე გადავა და გადაწყვეტილების მთავარ მიზეზად მომარაგების პრობლემები დაასახელა,“ – აღნიშნავს დაზვერვა.
უწყების ცნობით, გასვლისას რუსეთის ძალებმა რამდენიმე ხიდი დააზიანეს და, სავარაუდოდ, ტერიტორიაც დანაღმეს.
შოიგუს ბრძანებიდან მალევე უკრაინის პრეზიდენტის მრჩეველმა მიხაილო პოდოლიაკმა და სხვა თანამდებობის პირებმა რუსეთის გადაწყვეტილების მიზნებში ეჭვები გამოთქვეს და უკრაინის საზოგადოებას მოუწოდეს, არ გაავრცელონ ინფორმაცია შეიარაღებული ძალების მოქმედებებთან დაკავშირებით.
ხერსონიდან რუსეთის ჯარების გაყვანის ბრძანებას 9 ნოემბრის საღამოს ვიდეომიმართვაში გამოეხმაურა ვოლოდიმირ ზელენსკი და უკრაინელებს მოუწოდა, იყვნენ თავშეკავებულები, რადგან რუსეთი უკრაინას საჩუქრებს არ ჩუქნის.
