მთავარი,სიახლეები

გერმანია პირველად გადასცემს უკრაინას სამხედრო ვერტმფრენებს

24.01.2024 • 2139
გერმანია პირველად გადასცემს უკრაინას სამხედრო ვერტმფრენებს

უკრაინის შეიარაღებული ძალები მიიღებენ 6 მრავალფუნქციურ Sea King Mk41 – სამხედრო ვერტმფრენებს, მათთვის საჭირო აღჭურვილობას და სათადარიგო ნაწილებს – ამის შესახებ „დოიჩე ველე“ წერს გერმანიის თავდაცვის სამინისტროზე დაყრდნობით.

გარდა ამისა, უკრაინელი სამხედრო მოსამსახურეები გაივლიან აუცილებელ წვრთნას თვითმფრინავების ექსპლუატაციისთვის.

გერმანიის თავდაცვის მინისტრის, ბორის პისტორიუსის თქმით, Sea King Mk41 არის „საიმედო ვერტმფრენი, რომელიც დაეხმარება უკრაინელებს ბევრ სფეროში: შავი ზღვის დაზვერვიდან ჯარისკაცების გადაყვანამდე“.

„ეს არის პირველი ასეთი მიწოდება გერმანიიდან“, – ხაზგასმით აღნიშნა პისტორიუსმა.

Sea King Mk41 ამერიკული წარმოების ვერტმფრენია. ამერიკის არმიამ მისი გამოყენება 1961 წელს დაიწყო.

როგორც ბუნდესვერის ვებგვერდზეა მითითებული, ამ მოდელის ვერტმფრენებს გერმანელი სამხედროები 1970-იანი წლების შუა ხანებიდან იყენებენ.

გერმანიაში ამ ვერტმფრენებს ძირითადად სამძებრო-სამაშველო საქმიანობისთვის იყენებენ. ვერტმფრენს შეუძლია დაფაროს 1500 კმ-ზე მეტი, აღჭურვილია რადარითა და ინფრაწითელი კამერით, განსაკუთრებით გამძლეა და შეუძლია ფრენა ყველაზე ცუდ ამინდის პირობებშიც კი. მისი კიდევ ერთი უპირატესობაა „ამფიბიური დიზაინი“, რაც საჭიროების შემთხვევაში წყალზე ავარიული დაშვების საშუალებას იძლევა.

გადაბეჭდვის წესი


ასევე: