მთავარი,სიახლეები

ხერსონიდან გასვლისას რუსები ხიდებს აფეთქებენ და ტერიტორიას ნაღმავენ – ბრიტანეთის დაზვერვა

10.11.2022 • 1050
ხერსონიდან გასვლისას რუსები ხიდებს აფეთქებენ და ტერიტორიას ნაღმავენ – ბრიტანეთის დაზვერვა

დიდი ბრიტანეთის დაზვერვის შეფასებით, ხერსონის დასავლეთი ნაწილის „დაკარგვა“ რუსეთს ძალიან შეუშლის ხელს თავისი ერთ-ერთი სტრატეგიული მიზნის მიღწევაში – შექმნას სახმელეთო ხიდი ოდესამდე.

უწყება დღევანდელ რელიზში თავდაცვის მინისტრის, სერგეი შოიგუს გუშინდელ გადაწყვეტილებას აფასებს და მიიჩნევს, რომ რუსეთის არმიის ხერსონის დასავლეთ ნაწილში დარჩენა რუსეთის ლოგისტიკურ კვანძებზე უკრაინელთა თავდასხმებმა გახადა შეუძლებელი.

„გენერალმა სერგეი სუროვიკინმა, უკრაინაში რუსეთის ძალების მთავარსარდალმა, დაადასტურა, რომ არმია მდინარე დნეპრის მარცხენა სანაპიროზე თავდაცვით პოზიციებზე გადავა და გადაწყვეტილების მთავარ მიზეზად მომარაგების პრობლემები დაასახელა,“ – აღნიშნავს დაზვერვა.

უწყების ცნობით, გასვლისას, რუსეთის ძალებმა რამდენიმე ხიდი დააზიანეს და, სავარაუდოდ, ტერიტორიაც დანაღმეს.

„შეზღუდული რაოდენობის გადასასვლელების გამო, დნეპრის გადალახვისას, რუსეთის ძალები დაუცველები აღმოჩნდებიან. სრულიად შესაძლებელია, რომ გასვლა რამდენიმე დღეს გაგრძელდება და უკანდახეული ძალების დაცვას რუსეთი თავდაცვითი პოზიციებიდან საარტილერიო ცეცხლით ეცდება,“ – ვარაუდობს დაზვერვა.

რუსეთის თავდაცვის მინისტრმა სერგეი შოიგუმ ხერსონის დასავლეთ ნაწილიდან ჯარების გაყვანის ბრძანება 9 ნოემბერს გასცა. მინისტრმა ეს გადაწყვეტილება უკრაინაში რუსეთის ძალების მეთაურის, სერგეი სუროვიკინის მოხსენების მოსმენის შემდეგ გამოაცხადა.

შოიგუს ბრძანებიდან მალევე, უკრაინის პრეზიდენტის მრჩეველმა მიხაილო პოდოლიაკმა და სხვა თანამდებობის პირებმა რუსეთის გადაწყვეტილების მიზნებზე ეჭვები გამოთქვეს და უკრაინის საზოგადოებას მოუწოდეს, არ გაავრცელონ ინფორმაცია შეიარაღებული ძალების მოქმედებებთან დაკავშირებით.

გადაბეჭდვის წესი


ასევე: