მწერალი ბორის აკუნინი (გრიგოლ ჩხარტიშვილი) რუსეთში ჯერ ტერორისტების სიაში შეიყვანეს, ახლა კი უცხოელ აგენტად გამოაცხადეს.
რუსული მედიის ცნობით, რუსეთის ფედერაციის იუსტიციის სამინისტრომ 12 იანვარს განაახლა „უცხოური აგენტების“ რეესტრი და აგენტების სიაში, აკუნინის გარდა, შეიყვანეს: გამოცემა „ხოლოდი“, ტელეგრამის არხის ავტორი ანდრეი კურშინი, „ნოვაია გაზეტას“ ჟურნალისტი ალექსანდრე მინკინი და ყოფილი მუნიციპალური დეპუტატი ანტონ სოკოლოვი.
რუსეთის იუსტიციის სამინისტროს განცხადებაში აღნიშნულია, რომ ყველა მათგანი ეწინააღმდეგებოდა უკრაინაში „სპეციალური სამხედრო ოპერაციის“ განხორციელებას, როგორც რუსეთის ხელისუფლება უწოდებს ომს უკრაინაში.
ბოლის აკუნინთან დაკავშირებით რუსეთის იუსტიციის სამინისტრომ ასევე განაცხადა, რომ მწერალმა მონაწილეობა მიიღო უკრაინის შეიარაღებული ძალების მხარდასაჭერად თანხების შეგროვებაში.
აგენტად გამოცხადებამდე დაახლოებით ერთი თვით ადრე, 2023 წლის დეკემბერში, რუსეთის ხელისუფლებამ აკუნინი „ტერორისტების და ექსტრემისტების“ სიაში შეყვანა და საგამოძიებო კომიტეტმა გამოაცხადა, რომ მწერლის წინააღმდეგ აღიძრა სისხლის სამართლის საქმე რუსეთის შეიარაღებული ძალების შესახებ „ყალბი ამბების“ და ტერორიზმის საჯარო გამართლების მუხლით.
„წერენ, რომ დღეს უცხოელ აგენტად გამომაცხადეს. ეს მე, ტერორისტი და ექსტრემისტი? თავს ბინ ლადენად ვგრძნობ, რომელსაც არასწორი პარკირების ჯარიმა გამოუწერეს“ – ასე გამოეხმაურა ბორის აკუნინი ტელეგრამზე ინფორმაციას მისი აგენტად გამოცხადების შესახებ.
მწერალმა 2013 წელს დატოვა რუსეთი და სხვადასხვა ქვეყანაში ცხოვრობს.
ამავე თემაზე:
