პუტინს „სურს მეტი ადამიანი ჩააგდოს ომის ცეცხლში, რომლის მოგების შანსი არ აქვს“, – ასე გამოეხმაურა უკრაინის საგარეო საქმეთა მინისტრი, დმიტრო კულება რუსეთში ნაწილობრივი მობილიზაციის გამოცხადებას.
„პუტინმა სრული უპატივცემულობა გამოავლინა ჩინეთის, ინდოეთის, მექსიკის, თურქეთის, აზიის, აფრიკის, ახლო აღმოსავლეთის, ლათინური ამერიკის სხვა ქვეყნების მიმართ, რომლებიც დიპლომატიისკენ და უკრაინაში რუსეთის ომის დასრულებისკენ მოუწოდებდნენ. მას სურს მეტი ადამიანი ჩააგდოს ომის ცეცხლში, რომლის მოგების შანსი არ აქვს.“, – წერს დმიტრო კულება.
Putin has shown utter disrespect to China, India, Mexico, Turkey, other Asian, African, Middle Eastern, Latin American nations which have called for diplomacy and an end to Russia’s war on Ukraine. He wants to throw more men into the flames of the war he has no chance of wining.
— Dmytro Kuleba (@DmytroKuleba) September 21, 2022
გუშინ, 20 სექტემბერს, რუსეთის დუმამ მიიღო ცვლილებები რუსეთის სისხლის სამართლის კოდექსში, რომლითაც კოდექსს დაემატა ახალი ტერმინები – „მობილიზაცია, სამხედრო მდგომარეობა და ომის დრო“. ამ კანონით გამკაცრდა და მრავალწლიანი პატიმრობით დაისჯება სამხედრო სამსახურისთვის თავის არიდება, ისევე როგორც ნებაყოფლობით ტყვედ ჩაბარება.
გუშინვე, უკრაინის აღმოსავლეთსა და სამხრეთში რუსეთის მიერ ოკუპირებული რეგიონების დე ფაქტო ხელმძღვანელებმა რუსეთთან შეერთების შესახებ რეფერენდუმების ჩატარებაზე განაცხადეს.
ასევე, გასულ კვირას მედიაში გავრცელდა ვიდეო, რომელზეც ასახულია, თუ როგორ ცდილობს სამხედრო ფორმაში გამოწყობილი პირი, რომელიც სავარაუდოდ „ვაგნერის“ ხელმძღვანელი ევგენი პრიგოჟინია, საპატიმრო დაწესებულებაში პატიმრები დაარწმუნოს, რომ ვაგნერში 6 თვიანი მსახურების შემთხვევაში ისინი ციხეში აღარ დაბრუნდებიან.
პრიგოჟინს არ დაუდასტურებია, რომ თავადაა ვიდეოზე, თუმცა განაცხადა, რომ მხარს უჭერს პატიმრების რეკრუტირებას და „ვისაც არ სურს ომში პატიმრების გაგზავნა, საკუთარი შვილები უნდა გაგზავნოს“.
ვიდეოს ნამდვილობა BBC-მ დაადასტურა, ხოლო 20 სექტემბერს the Guardian-მა გაავრცელა სტატია, რომელშიც რუსეთის ერთ-ერთი ციხის 4 პატიმარსა და მათ მშობლებთან ინტერვიუებზე დაყრდნობით დასტურდება, რომ მათაც შესთავაზეს „ვაგნერში“ გაწევრიანება ციხიდან გათავისუფლებისა და თვეში 100 ათასი რუბლი ხელფასის სანაცვლოდ.
არსებობს მოსაზრება, რომ შესაძლოა რუსეთი ამ ნაბიჯებით ცდილობდეს უპასუხოს უკრაინის წარმატებული კონტრშეტევას.
დღეს, 21 სექტემბერს, პიტინი ნატოს ბირთვული იარაღითაც დაემუქრა და განაცხადა, რომ „ეს ბლეფი არაა“.
