უკრაინელი რეჟისორის, ოლეგ სენცოვის ფილმს სახელწოდებით – „რეალური“ [Real], კარლოვი ვარის კინოფესტივალზე აჩვენებენ. ამის შესახებ გერმანული გამოცემა, „დოიჩე ველე“ წერს, რომელმაც სენცოვთან ჩაწერა ინტერვიუ.
სენცოვი უკრაინის დასაცავად იბრძვის. ფილმი, რომელსაც რეჟისორი არა დოკუმენტურს, არამედ „დოკუმენტს“ უწოდებს, ომში ყოფნის საათ-ნახევარს ასახავს და იგი, რეჟისორის თქმით, შემთხვევით გადაიღო ჩაფხუტის კამერით.
ფილმში ასახულია გასული ზაფხულის ერთი დღე, როდესაც უკრაინის კონტრშეტევა მიმდინარეობდა.
სენცოვის ქვედანაყოფი მტრის ტერიტორიაზე გააგზავნეს, მათ ჯავშანტრანსპორტიორს კი ყუმბარა მოხვდა. სენცოვი რამდენიმე თანამებრძოლთან ერთად თხრილში აღმოჩნდა, ალყა შემოარტყეს დანარჩენ დანაყოფებს. მათ საბრძოლო მასალა ამოეწურათ.
„ისინი თითქმის მთლიანად გარშემორტყმული იყვნენ [მტრით]. მე ვიყავი ერთადერთი, ვისაც მათთან კავშირი ჰქონდა და შეეძლო სარდლობისთვის მოხსენება. სწორედ ეს მონაკვეთია ფილში ასახული“.
რეჟისორის თქმით, მას ნამდვილად არ სურდა გადაღება – კამერა ტექნიკის შემოწმებისას შემთხვევით ჩაირთო. კადრები მან მეხსიერების ბარათზე რამდენიმე კვირის შემდეგ აღმოაჩინა და წაშლას აპირებდა. „თუმცა, შემდეგ დავიწყე მასალის დათვალიერება და მივხვდი: ღმერთო ჩემო, ეს ხომ ძალიან ტრაგიკული მოვლენის ნაწილია, როდესაც ამდენი ხალხი თხრილშია, მოწყვეტილი და რუსებით გარშემორტყმული“, – იხსენებს რეჟისორი.
ფილმი ჭრის გარეშეა, საათ-ნახევარი ერთ კადრში. მაყურებელს ესმის, თუ როგორ რეკავს სენცოვი განყოფილებებსა და შტაბებში, ცდილობს დაეხმაროს ჯარისკაცებს. მაყურებელი ხედავს, თუ რა ხდება ფრონტზე სენცოვის თვალით, უფრო სწორედ, მის დამცავ ჩაფხუტში არსებული კამერის ობიექტივიდან. ფილმში არ არის გამოყენებული მუსიკა და დამატებითი ეფექტები, არაფერია ახსნილი გარდა იმისა, რასაც რეალურ დროში ვხედავთ და გვესმის ეკრანზე.
სენცოვი „დოიჩე ველესთან“ ამბობს, რომ ფილმში არაფერია გმირული და შესაძლოა, სიმართლემ, რომელიც აჩვენა ფილმში, ბევრ ადამიანს ატკინოს გული, განსაკუთრებით უკრაინაში, მაგრამ უმჯობესია სიმართლის დანახვა, რაც არ უნდა მტკივნეული იყოს ის.
„ეს არის ვიდეო დოკუმენტი, რომელიც იძლევა შესაძლებლობას ძალიან ცოტა რამ გავიგოთ ომის შესახებ. კამერაზე აღბეჭდილი დოკუმენტი გვაჩვენებს, რამდენად სასტიკი, რამდენად სულელური და… არ მყოფნის სიტყვები აღვწერო, თუ რა უაზრობაა ომი… ომის შესახებ სულ სხვა წარმოდგენა გაქვს, თუ მას მხოლოდ ომის შესახებ ფილმებიდან ან დოკუმენტური ფილმებიდან იცნობ, რომლებიც დამონტაჟებულია, რომ უფრო პრეზენტაბელური იყოს. ნამდვილი ომი – ეს სულ, სულ სხვაა“, – ამბობს სენცოვი.
კინოფესტივალი კარლოვი ვარში დღეს, 28 ივნისს დაიწყო.
____________
ფოტოზე: ოლეგ სენცოვი/facebook
ამავე თემაზე:
უკრაინელი რეჟისორი კინოზე, რუსულ იმპერიალიზმსა და ციხეში გატარებულ წლებზე
