„არ ვიცი, რა გააკეთეს ჩემი უსაფრთხოებისთვის… 10 ადამიანზე მივაწოდე ინფორმაცია, ვინც მემუქრება და არავინ გამოუკითხავთ. მე რეალურ საფრთხეს ვხედავ“, – ამბობს სამირა ბაირამოვა, სამოქალაქო აქტივისტი მარნეულიდან. მან 14 მარტს მარნეულში პრორუსული „ალტ-ინფოს“ პოლიტიკური პარტიის – „კონსერვატიული მოძრაობის“ ოფისის ფანჯრებზე პროტესტის ნიშნად უკრაინისა და ევროკავშირის დროშები დახატა.
სამირა ბაირამოვამ ფეისბუქის მესინჯერში შეურაცხმყოფელი და მუქარის შინაარსის შემცველი შეტყობინებები მიიღო, მაგალითად: „დროა აღადგინო „ალტ ინფოს“ ოფისი, თორემ გეტირება დედა შე…“, „ესე ითხრი სამარეს“, „როგორ გაბედე შენ ჯვრის გადაღებვა და შეურაცხყოფა ჩვენი ქრისტიანული სიწმინდის“.
„კონსერვატიული მოძრაობის“ წევრები სამირა ბაირამოვს ღიადაც დაემუქრნენ – „ნაციონალური მოძრაობის“ მარნეულის ოფისთან შეიკრიბნენ და ერთობლივი მიმართვა გაავრცელეს, მიმართვის ვიდეო კი, ფეისბუქგვერდებზე გააზიარეს. პარტიის წევრების აზრით, ჯვრის გადაღებვა მათი რელიგიური გრძნობის შეურაცხყოფაა, იმის მიუხედავად, რომ ჯვარი ამ შემთხვევაში პოლიტიკური სიმბოლიკის ნაწილია და არა რელიგიური სიმბოლო.
„…ამოვედით გასაფრთხილებლად, ამ ქალს გააგებინეთ, ამით შეიძლება გაღვივდეს რელიგიურ და ეთნიკურ ნიადაგზე შუღლი. ორდღიანი ვადა მივცეთ მაგ ქალს… დააბრუნონ ოფისი პირვანდელ მდგომარეობაში, წინააღმდეგ შემთხვევაში, ორ დღეში ამოვდივართ და აი, ამ საქათმეს, „ნაციონალური მოძრაობის“ საქათმეს ისეთ დღეში ჩავაგდებთ, აი, იქეთ „ევროპულ საქართველოს“, რასაც დაიმსახურებენ. ამიტომაც, ბევრ ლაპარაკს არ ვაპირებთ, კეთილგონიერება გამოიჩინონ“, – ამბობს ვიდეო მიმართვაში „კონსერვატიული მოძრაობის“ ერთ-ერთი წევრი.
„ამ დროს მე მხოლოდ აქტივისტი ვარ, მე არ წარმოვადგენ არც ერთ პოლიტიკურ ძალას,“ – აღნიშნავს სამიარა ბაირამოვა.
სამირა ბაირამოვა ყურადღებას ამახვილებს იმაზეც, რომ „კონსერვატიული მოძრაობა“ და „ალტ-ინფო“ ის ჯგუფია, რომელიც გასული წლის 5 ივლისის მოვლენების წინა დღეებშიც აანონსებდა ღიად, სატელევიზიო ეთერებიდან ძალადობას, იძალადეს ადამიანებზე, მათ შორის, ჟურნალისტებზე და ძალადობის ორგანიზებისთვის ისინი ამ დრომდე არავის დაუსჯია.
„კონსერვატიული მოძრაობის“ წევრების და მასთან დაკავშირებული პირების წინააღმდეგ პროკურატურას მიმართეს ოზურგეთშიც. აქ აქტივისტებმა მუქარის დასადასტურებლად განცხადებას ფეისბუქიდან ეს სქრინიც დაურთეს:
„გაატაროს სათანადო ზომები სამირა ბაირამოვას უსაფრთხოების დასაცავად,“ – ამ მოთხოვნით სამირა ბაირამოვას შესახებ შინაგან საქმეთა სამინისტროს „ახალგაზრდა იურისტთა ასოციაციამ“ გუშინ, 17 მარტს მიმართა. საია სამირა ბაირამოვას ინტერესებს იცავს.
„კარგი იქნებოდა რამე შემოეთავაზებინათ, მაგრამ ამ თემაზე საუბარი საერთოდ არ გვქონია,“ – გვიყვება სამირა ბაირამოვა და დასძენს, რომ ბოლო დღეებში ის საჯარო სივრცეებს თავს არიდებს, არ მინდა პროვოკაციის, ან აგრესიის სამიზნე გავხდეო.
„უსაფრთხოებისთვის ყველაზე კარგი იქნება ის, რომ კონკრეტული ადამიანები, ვინც იმუქრება, დააკავონ, მაგრამ არაფერი იცვლება. მე უკვე ორჯერ გამომკითხეს, გუშინ დამატებით მივეცი ჩვენება გამოძიებას მას შემდეგ, როცა უკვე ვიდეოც გავრცელდა და ორი დღის ვადა მომცეს,“ – აღნიშნავს სამირა ბაირამოვა.
აქტივისტის თქმით, მუქარის შესახებ ბოლო გზავნილი მან გუშინ დილით მიიღო.
„შეიძლება ისევ მწერენ და მემუქრებიან, არ ვიცი, ბევრი მიგზავნიდა მესინჯერში შეტყობინებას და დავბლოკე,“ – დასძინა „ბათუმელებთან“ სამირა ბაირამოვამ.
რატომ არ რეაგირებს შსს მოძალადე ჯგუფების მხრიდან მუქარის შემთხვევაზე – კითხვა ერთდროულად რამდენიმე დეპუტატმა დაუსვა გუშინ, 14 მარტს შს მინისტრს, ვახტანგ გომელაურს, რომელიც პარლამენტის წინაშე წარსდგა.
„151-ე მუხლით არის აღძრული სისხლის სამართლის საქმე სამირა ბაირამოვაზე და მასზე გამოძიება მიმდინარეობს და მივყვებით, ჩვენებები მოგვცა, გამოვკითხეთ და ამას მივყვებით ბოლომდე,“ – განაცხადა შინაგან საქმეთა მინისტრმა, ვახტანგ გომელაურმა.
„მინისტრის ამ განცხადების შემდეგ ახალი არაფერია,“ – გვითხრეს დღეს, 18 მარტს შინაგან საქმეთა სამინისტროს პრესცენტრში, სადაც ვიკითხეთ: რა სიახლეა „სამირა ბაირამოვას საქმეზე“ და რა ნაბიჯები გადადგა შსს-მ აქტივისტის უსაფრთხოებისთვის?
ამასობაში, შესაძლოა სამირა ბაირამოვა აქეთ დააჯარიმონ. მას უკვე ჩააბარეს ოქმი ადმინისტრაციული სამართალდარღვევების შესახებ, რომლის მიხედვითაც სამირა „იერ-სახის დამახინჯებისთვის“ უნდა დაჯარიმდეს 50 ლარით.
„ხელი არ მოვაწერე ოქმს, 23 მარტს იქნება სასამართლო პროცესი მარნეულის მაგისტრ სასამართლოში,“ – გვითხრა სამირა ბაირამოვამ.
—————
პრორუსული „ალტ-ინფოს“ პარტიას „კონსერვატიული მოძრაობა“ პარტიული ოფისები დაატოვებინეს ხულოსა და შუახევშიც „კონსერვატიული მოძრაობის“ ოფისის დახურვის მოთხოვნით საპროტესტო აქციები იმართება ქობულეთში, ოზურგეთში, მესტიაში და სხვა ქალაქებში.
მედიასაშუალება „ალტ-ინფო“, რომელიც თავს უწოდებს ალტერნატიული ინფორმაციის წყაროს, მედიამონიტორების შეფასებით, „ანტილიბერალურ, ანტისაიმიგრაციო, ლგბტქი თემის საწინააღმდეგო და ანტიდასავლურ პროპაგანდას ეწევა“.
პარტიაში ამბობენ, რომ მზად არიან რუსეთთან „პარტნიორული ურთიერთობებისთვის“. 14 მარტს კი “კონსერვატიული მოძრაობის” ერთ-ერთმა ლიდერმა “ნეტგაზეთს” უთხრა, რომ პარტია სრული შემადგენლობით გეგმავს რუსეთში ვიზიტს.
ამ თემაზე:
„ალტ-ინფო ეწევა იგივე პროპაგანდას, რასაც რუსული სახელმწიფო მედია“ – ინტერვიუ
