მთავარი,სიახლეები

რა ხდება, როცა რემონტი გაგიფუჭეს – კიდევ რა საქმეები განიხილება წლობით ბათუმის სასამართლოში 

14.02.2022 • 1638
რა ხდება, როცა რემონტი გაგიფუჭეს – კიდევ რა საქმეები განიხილება წლობით ბათუმის სასამართლოში 

„ჩემი ნერვიულობა და შფოთვა მას შემდეგ დაიწყო, როცა ბინა ვიყიდე და რემონტი დავიწყე,“ – ამბობს ბათუმში მცხოვრები ირინა სოსელია. მე-4 წელია იგი სასამართლოში საქმის განხილვის დაწყებას ელის და ზიანის ანაზღაურებას კაცისგან, რომელმაც ახალნაყიდი ბინა გაურემონტა. მოქალაქე მიიჩნევს, რომ ის ხელოსნებმა დააზარალეს, რადგან რემონტი უხარისხოდ გაუკეთეს. სასამართლოსთვის მიმართვიდან 4 წლის შემდეგ მოქალაქის სარჩელზე სასამართლო პროცესი ჯერ არც კი დაწყებულა.

ირინა სოსელია არ არის ერთადერთი, რომელიც სასამართლოსგან საქმის დროულად განხილვას ითხოვს. ადვოკატები ამბობენ, რომ ბოლო დროს განსაკუთრებით გაჭიანურდა საქმეების არათუ განხილვა, არამედ განხილვის დაწყებაც კი. სასამართლო ხშირად რეზონანსული და განსაკუთრებით მნიშვნელოვანი საქმეების დროულად განხილვასაც ვერ ახერხებს.

სამოქალაქო და ადმინისტრაციული საქმეების განხილვის ვადა 2-დან 5 თვემდეა საქმის წარმოებაში მიღებიდან.

„ბინის რემონტის საქმე“ 

„…განმიცხადა, რომ ის იყო კვალიფიციური ხელოსანი და ჰყავდა კვალიფიციური ჯგუფი, რომელიც ბინას გამირემონტებდა. შევთანხმდით, რომ ის შეასრულებდა ყველა სამუშაოს. მე მას თანხა გადავუხადე და დაიწყო ჩემი ნერვიულობა. ვხედავდი, რომ აკეთებდა უხარისხოდ,“ – წერს მოქალაქე ირინა სოსელია სარჩელში, რომლითაც მან ბათუმის საქალაქო სასამართლოს მიმართა.

ნანა სოსელიას საცხოვრებელი ბინა ბათუმში, პუშკინის ქუჩაზე, 2017 წელს უყიდია, სულ 41.20 კვბადრატული მეტრი. ნანა რემონტის ჩატარების შემდეგ პატარა ბინაში მცირეწლოვან შვილთან ერთად აპირებდა ცხოვრებას.

ბინა რემონტის შემდეგ. ფოტო გადაღებულია სასამართლოში საქმის შეტანამდე

„ადგილ-ადგილ კედლებიც სხვა ფერის იყო, კედლების და ჭერის დამუშავება უსწორმასწორო… სველ წერტილებში კერამიკული ფილებიც ასევე არასათანადოდ იყო მოწყობილი,“ – აღნიშნავს სარჩელში მოქალაქე.

მას შემდეგ, რაც ხელოსანი მესაკუთრეს არ დაეთანხმა, ნანა სოსელიამ ექსპერტიზის ეროვნულ ბიუროს მიმართა.

„ჩატარებული სარემონტო სამუშაოების ხარისხი არადამაკმაყოფილებელია… საორიენტაციო სახარჯთაღრიცხვო ღირებულება დღგ-ს და სხვა ნორმალიტიული ხარჯების გათვალისწინებით შეადგენს 3 830 ლარს,“ – წერია ექსპერტიზის დასკვნაში, რომელიც 2018 წლის პირველ თებერვალსაა ხელმოწერილი.

ექსპერტიზის ამ დასკვნის შემდეგ ნანა სოსელია სასამართლოში წასულა.

„საქმე მოსამართლე ხათუნა ბოლქვაძეს დააწერეს, თუმცა ამ დრომდე სხდომა არ ჩანიშნულა… მოქალაქემ, რომელიც ითხოვდა ზიანის ანაზღაურებას, საბოლოოდ არჩია ბინის გაყიდვა. ბუნებრივია, მან ბინა გაყიდა უფრო დაბალ ფასად, ვიდრე გარემონტებული ბინა შეიძლება გაყიდო. მოქალაქე კიდევ უფრო დაზარალდა,“ – ამბობს ადვოკატი ლელა ბჟალავა, რომელიც ირინა სოსელიას ინტერესებს იცავს.

გასული წლის აპრილში ირინა სოსელიამ ბინა, სადაც ჩატარებული რემონტი სადავო გახდა, გაყიდა.

ბინა რემონტის შემდეგ. ფოტო გადაღებულია სასამართლოში საქმის შეტანამდე

უკანონო კორპუსები შუა ქალაქში, გოგოლის ქუჩაზე 

ბათუმის საქალაქო სასამართლოს ამ დრომდე არ დაუწყია შუა ბათუმში უკანონო კორპუსების მშენებლობის საქმის განხილვაც. სარჩელი ბათუმის სასამართლოში გასული წლის 16 აგვისტოს შევიდა. შესაბამისად, ბათუმში კორპუსების უკანონოდ მშენებლობა ისე გრძელდება, რომ მას ვერც [არც] ბათუმის მერია აჩერებს და ვერც [არც] სასამართლო.

ბათუმის საქალაქო სასამართლოში მოსამართლე ალექსანდრე გოგუაძემ მხოლოდ განჩინება გამოსცა, რაც ეხება სარჩელის უზრუნვეყოფის ღონისძიებას – კომპანია „მეტრო ტერმინალი“ სასამართლოში ითხოვს, რომ მუნიციპალური ინსპექციის მიერ გამოცემული დადგენილებები [ჯარიმები, მშენებლობის შეჩერება] სასამართლომ უკანონოდ მიიჩნიოს. ვიდრე სასამართლო ამას დაადგენს, კომპანიამ სასამართლოში ითხოვა, საბოლოო გადაწყვეტილების მიღებამდე მერიის მიერ გამოცემული დადგენილები შეჩერდეს.

შესაბამისად, ამ ნაწილზე იმსჯელა მხოლოდ მოსამართლე ალექსანდრე გოგუაძემ, დააკმაყოფილა კომპანიის შუამდგომლობა და მშენებლობას ხელი აღარ შეუშალა.

საია-ს შეფასებით, სასამართლოს კონკრეტულ მისამართზე – გოგოლის 11-ში უკანონო მშენებლობის შეჩერება მაინც შეეძლო, ვიდრე ის საქმის განხილვას შეუდგება.

სარჩელის უზრუნევლყოფის ღონისძიებაზე განსხვავებული გადაწყვეტილება მიიღო გასული წლის ბოლოს ქუთაისის სააპელაციო სასამართლომ. აქ მიიჩნიეს, რომ საბოლოო გადაწყვეტილების მიღებამდე მშენებლობა გოგოლის ქუჩაზე უნდა შეჩერდეს.

საქმე ამ ეტაპზე აღსრულების ეტაპზეა. საქმის მასალები გადასცეს პროკურატურასაც, თუმცა ამ დრომდე გამოძიება არ დაწყებულა.

ვიდრე აღმასრულებელი მშენებლობის შეჩერებას შეძლებს, გოგოლის ქუჩაზე კორპუსები უნებართვოდ ისევ შენდება. უცნობია თარიღი, როდის ჩანიშნავს ამ საქმის განხილვისთვის პირველ სხდომას მოსამართლე ალექსანდრე გოგუაძე.

უკანონო მშენებლობები ბათუმში, გოგოლის ქუჩაზე

უკანონო, ყაზარმული ტიპის კორპუსების შენების შესახებ ინფორმაცია პირველად 2021 წლის 15 სექტემბერს გასაჯაროვდა.

აჭარის ტელევიზიის“ ჟურნალისტების საქმე 

პარასკევ საღამოობით ჟურნალისტების დათხოვნა ტრადიცია ხდება აჭარის ტელევიზიაში. ჟურნალისტი თეონა ბაკურიძე, რომელიც საზოგადოებრივი მაუწყებლის დამოუკიდებელი სარედაქციო პოლიტიკის შეცვლის წინააღმდეგ ხმამაღლა გამოდის, ახლახანს გაუშვეს სამსახურიდან. „რეპორტიორები საზღვრებს გარეშე“ მოუწოდებს ხელისუფლებას, შეწყვიტონ პოლიტიკური ზეწოლა…“ – ეს დაახლოებით 2 წლის წინ, 2020 წლის 14 მარტს დაწერა ავტოირიტეტულმა საერთაშორისო გამოცემამ „რეპორტიორები საზღვრებს გარეშე“. მაშინ აჭარის ტელევიზიის წამყვანი – თეონა ბაკურიძე გაუშვეს ტელევიზიიდან.

ბათუმის საქალაქო სასამართლოს, მაგალითად, ამ დრომდე არ დაუწყია თეონა ბაკურიძის სარჩელის განხილვა.

2019 წლის აპრილიდან, ანუ მას აქეთ, როცა საზოგადოებრივი მაუწყებლის აჭარის ტელევიზიის დირექტორი – ნათია კაპანაძე იმპიჩმენტის წესით გადააყანეს, ბათუმის საქალაქო სასამართლოში 9 სარჩელი შევიდა, რაც ჟურნალისტების უკანონოდ გათავისუფლებას, ასევე სარედაქციო დამოუკიდებლობას პირდაპირ ეხებოდა. ამ დრომდე მხოლოდ ერთი – მაია მერკვილაძის საქმის განხილვა მოხერხდა. ბათუმის საქალაქო სასამართლოს არ დაუნახავს უკანონობა იმაში, რომ ის მთავარი საინფორმაციო გამოშვების რედაქტორი იყო და რადიოში გადაიყვანეს

მიუხედავად იმისა, რომ საქმე ეხებოდა ჟურნალისტებს, საზოგადოებრივი მაუწყებლის იდეას, გათავისუფლებას ჰქონდა სისტემური ხასიათი და არამხოლოდ ადგილობრივი, არამედ საერთაშორისო ორგანიზაციებიც ხედავდნენ, რომ ეს იყო პოლიტიკური ზეწოლა, ბათუმის საქალაქო სასამართლოს არ დაუსრულებია, როგორც ჟურნალისტების, ასევე იმპიჩმენტის წესით გაშვებული დირექტორის – ნათია კაპანაძის საქმის განხილვა. უცნობია მორიგი სასამართლო სხდომის თარიღი. მალე 3 წელი გავა, რაც ის აჭარის ტელევიზიიდან გაუშვეს.

ბათუმის საქალაქო სასამართლოს ადმინისტრაციიდან მიღებული ინფორმაციის მიხედვით, ამ ეტაპზე ერთ საქმედ განიხილება თეონა ხარაბაძის, მაია მერკვილაძის და ცირა სურანიძის საქმე, ასევე ჩანიშნულია შორენა ღლონტის საქმის განხილვა. სხვა სარჩელებზე კი, ჯერჯერობით სხდომის თარიღი ჩანიშნული არ არის.

ალექსანდრე მილორავა, შიმშილობის აქცია აჭარის ტელევიზიასთან – ფოტო „ბათუმელების“ არქივიდან.

სასამართლოში საქმეების გაჭიანურების მთავარ მიზეზად სახელდება მოსამართლეთა რაოდენობის სიმცირე და საქმეების სიმრავლე. დღევანდელი მდგომარეობით ბათუმის საქალაქო სასამართლოში სულ 10 მოსამართლე მუშაობს, მათგან 3 სისხლის სამართლის საქმეებს განიხილავს.

ვადების დარღვევის გამო შესაძლოა უჩივლო მოსამართლეს იუსტიციის უმაღლეს საბჭოში და ეს მოსამართლის დისციპლინური პასუხისმგებლობის საფუძველი გახდეს, თუმცა ამ დრომდე პრაქტიკაში ადვოკატებს ასეთი საქმე არ ახსენდებათ, როცა მოსამართლეს უჩივლეს და ამით შედეგი მიიღეს.

გადაბეჭდვის წესი


ასევე: