გერმანიაში, უკრაინის აღდგენის კონფერენციაზე, გერმანიის კანცლერმა ოლაფ შოლცმა კონფერენციის მონაწილეებს მოუწოდა მხარი დაუჭირონ უკრაინის საჰაერო თავდაცვის გაძლიერებას და კიევს დაჰპირდა „პატრიოტის“ საჰაერო თავდაცვის სისტემის მიწოდებას უახლოეს მომავალში.
ეს იქნება „პატრიოტის“ მესამე სისტემა, რომელსაც გერმანია უკრაინას გადასცემს.
„მომდევნო კვირებისა და თვეების განმავლობაში ჩვენ უკრაინას მივაწვდით „პატრიოტის“ მესამე საჰაერო თავდაცვის სისტემას, IRIS-T-ს, „გეპარდებს“, რაკეტებსა და საბრძოლო მასალას“, – შოლცის ციტატას უკრაინული მედია ავრცელებს.
დღეს, 11 ივნისს, ბერლინში გაიხსნა ორდღიანი კონფერენცია, რომლის მთავარი თემა უკრაინის დახმარებაა.
გერმანიაში იმყოფება უკრაინის პრეზიდენტი ვლადიმერ ზელენსკი, რომელიც მოლაპარაკებებს გამართავს კანცლერ შოლცთან, გერმანიის პრეზიდენტ შტაინმაიერთან და ბუნდესტაგში გამოვა სიტყვით.
კონფერენციაზე იმყოფება საქართველოს პრემიერ-მინისტრი, ირაკლი კობახიძეც.
