ომის კვლევის ამერიკული ინსტიტუტი – ISW, რუსეთ-უკრაინის ომის ყოველდღიურ მიმოხილვაში ადასტურებს უკრაინული ჯარების წინსვლას 10 კილომეტრამდე სიღრმეში რუსეთში, კურსკის რეგიონში.
„დადასტურდა, რომ 7 აგვისტოს უკრაინის ძალები 10 კილომეტრამდე დაწინაურდნენ რუსეთის კურსკის ოლქში მექანიზებული შეტევითი ოპერაციების ფონზე“ – წერენ ISW-ის ექსპერტები.
მიმოხილვაში აღნიშნულია, რომ 6 და 7 აგვისტოს გამოქვეყნებული გეოლოკაციის კადრები მიუთითებს იმაზე, რომ უკრაინულმა ჯავშანმანქანებმა სავარაუდოდ მიაღწიეს პოზიციებს 38K-030 გზატკეცილის გასწვრივ, საერთაშორისო საზღვრიდან დაახლოებით 10 კილომეტრში.
კურსკის რეგიონში უკრაინის წინსვლის ამჟამად დადასტურებული მასშტაბები და მდებარეობა მიუთითებს, რომ უკრაინელმა ჯარებმა სავარაუდოდ შეაღწიეს რუსეთის მინიმუმ ორ თავდაცვით ხაზში.
„კრემლის რეაქცია უკრაინის თავდასხმებზე კურსკის რეგიონში ამ დრომდე წინააღმდეგობრივი იყო, რადგან რუსეთის ოფიციალური პირები ცდილობენ იპოვონ ბალანსი უკრაინის მხრიდან ძალისხმევის ესკალაციად წარმოჩენას, პოტენციური შედეგების გაზვიადების თავიდან აცილებასა და შიდა უკმაყოფილების საფრთხეს შორის.
ISW-ი წერს, რომ ზოგიერთმა რუსმა სამხედრო ბლოგერმა მკვეთრად გააკრიტიკა რუსული სამხედრო სარდლობა კურსკის რეგიონში მიმდინარე მოვლენების გამო.
ასევე, გავრცელებული ინფორმაციით, უკრაინელმა ჯარებმა გამოიყენეს FPV დრონი კურსკში რუსული ვერტმფრენის, Mi-28ის ჩამოსაგდებად, რაც მიუთითებს იმაზე, რომ უკრაინული ძალები აგრძელებენ ამ დრონის წარმატებით ადაპტაციას.
მიმოხილვაში ასევე აღნიშნულია, რომ უკრაინის სამხედრო დაზვერვის მთავარი სამმართველოს ხელმძღვანელმა კირილ ბუდანოვმა განაცხადა, რომ რუსეთის შეტევითი შესაძლებლობები პიკს მიაღწევს დაახლოებით ორ თვეში, რაც ემთხვევა ISW-ის შეფასებას რუსეთის ამჟამინდელი შეტევითი შესაძლებლობების შესახებ.
უკვე მესამე დღეა, რუსეთის ტერიტორიაზე, უკრაინის მოსაზღვრე კურსკის ოლქში, ბრძოლები მიმდინარეობს. გავრცელებული ინფორმაციით, 6 აგვისტოს დილით იქ უკრაინული სამხედრო შენაერთები შევიდნენ.
მოსკოვმა თავდაპირველად შეტევის წარმატებით მოგერიებაზე განაცხადა, მაგრამ მოგვიანებით ეს ცნობა რუსეთის თავდაცვის სამინისტროს ოფიციალური განცხადებიდან წაშალეს.
ამავე თემაზე: ათეულობით ტყვე და პუტინის თათბირი – ბოლო ცნობები კურსკის ოლქიდან
_____________
ფოტო არქივიდან
