Batumelebi | ვინ აშენებს სასტუმროს საპატრიარქოს რეზიდენციასთან, ძეგლის დაცვის ზონაში  ვინ აშენებს სასტუმროს საპატრიარქოს რეზიდენციასთან, ძეგლის დაცვის ზონაში  – Batumelebi
RU | GE  

ვინ აშენებს სასტუმროს საპატრიარქოს რეზიდენციასთან, ძეგლის დაცვის ზონაში 

ქობულეთში, პეტრას ციხის დაცვის ზონაში, 1 ჰექტარ ფართობზე, რომელიც სახელმწიფომ 3,8 მილიონ ლარად ოფშორულ კომპანიას 2019 წლის აგვისტოში მიჰყიდა, სასტუმრო აშენდება. სასტუმროს კი „რედკო“ ააშენებს, რომელიც ბათუმი თაუერს [ყოფილი ტექნოლოგიური უნივერსიტეტის შენობას] ფლობს.

დოკუმენტების მიხედვით, მიწის ნაკვეთის მესაკუთრე ოფშორული კომპანია „კ ენდ ლ ინვესტმენტი“ იყო. შეძენიდან 8 თვეში კი მესაკუთრე კომპანია „რედ-კო“ გახდა. „რედ-კო“-ში „ბათუმელებს“ უთხრეს, რომ „კ ენდ ლ ინვესტმენტი“, რომელმაც სახელმწიფოსგან ეს ნაკვეთი შეისყიდა, მათ ჯგუფთან დაკავშირებული კომპანიაა.

ეს ნაკვეთი დღეს შპს „რედ-კო ციხისძირის“ საკუთრებაშია. „რედ-კოს“ და „რედ-კო ციხისძირის“ 100 პროცენტი წილის მფლობელი კი არის შპს „ფირსთ ინვესთმენთ ქომფანი“, რომელიც ესტონეთშია რეგისტრირებული.

აღნიშნულ ნაკვეთზე, აჭარის მთავრობის ინფორმაციით, „70 მლნ ლარის ღირებულების ახალი საინვესტიციო პროექტი იწყება. ციხისძირში საერთაშორისო ბრენდ Marriott International-ის Alof’-ის სასტუმრო დაიწყებს ფუნქციონირებას. Bamboo Beach Tsikhisdziri-ს დეველოპერული კომპანია „რედკო“ უცხოელი არქიტექტორების ჩართულობით ახორციელებს“.

მიწის ნაკვეთის გასხვისების გამო, გასულ წელს მაღალი თანამდებობის პირებს მიმართა საზოგადოება „ბათომმა“. ორგანიზაციას აინტერესებდა, რას უპირებდა ახალი მესაკუთრე ციხისძირში, „პეტრას“ ციხის მიმდებარე მიწის ნაკვეთს. წერილში აღნიშნული იყო, რომ „გაყიდული ტერიტორია მოიცავს არქეოლოგიური დაცვის ზონას, რომელსაც ძალიან მაღალი სამეცნიერო, კულტურული და საგანმანათლებლო პოტენციალი აქვს“.

აჭარის კულტურული მემკვიდრეობის დაცვის სააგენტოში „ბათუმელებს“ უთხრეს, რომ „საძირკვლის ჩაყრის დროს სამუშაოებს აკონტროლებდნენ როგორც სააგენტოს წარმომადგენლები, ასევე კომპანიის მიერ თბილისიდან მოწვეული სპეციალისტები, თუმცა რაიმე არტეფაქტები აღმოჩენილი არ ყოფილა. ტერიტორია ამ კუთხით დღემდე კონტროლდება“.

ამ თემაზე:

ოფშორში დარეგისტრირებული კომპანია ქობულეთის პლაჟთან მასშტაბურ მშენებლობას გეგმავს

მთავარი ფოტო: რენდერი – სასტუმრო ქობულეთში, ძეგლის დაცვის ზონაში / წყარო: აჭარის მთავრობა

 

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com