სად ნახავს აჭარის მთავრობა 10 მილიონს „ოცნების ქალაქში“ კორპუსის ასაშენებელად


რა თანხით აშენებს აჭარის მთავრობა საცხოვრებელ კორპუსს „ოცნების ქალაქში“, როცა ბიუჯეტში ეს ფული გათვალისწინებული არ არის? – აჭარის ფინანსთა და ეკონომიკის სამინისტროში განმარტავენ, რომ მშენებლობისთვის საჭირო თანხა დაახლოებით 10 მილიონი ლარი სახელმწიფო ბიუჯეტიდან გამოიყოფა და ამ კუთხით ცენტრალურ და ადგილობრივ მთავრობებს შორის შეთანხმება უკვე არსებობს.

„საპროექტო თანხა გამოიყოფა აჭარის ავტონომიური რესპუბლიკის ბიუჯეტიდან და ეს იქნება დაახლოებით ნახევარ მილიონამდე ლარი. მიმდინარეობს ბაზრის შესწავლა და ტენდერი უახლოეს პერიოდში გამოცხადდება,“ – გვითხრა არჩილ ვანაძემ, აჭარის ფინანსთა და ეკონომიკის მინისტრის მოადგილემ.

არჩილ ვანაძე ასევე ამბობს, რომ ტენდერი პროექტის შესყიდვაზე „ოცნების ქალაქში“ 8400 კვადრატულ მეტრ მიწის ნაკვეთზე გამოცხადდება. სადაც შენობა-ნაგებობები განთავსებული არ არის. მინისტრის მოადგილის თქმით, მომავალი წლისთვის მორიგი საცხოვრებელი კორპუსის ასაშენებელად თანხა შესაძლოა აჭარის ბიუჯეტიდან გამოიყოს.

„ოცნების ქალაქში“ საცხოვრებელი კორპუსების აშენების შესახებ დღეს, 6 თებერვალს აჭარის მთავრობის თავმჯდომარემ, თორნიკე რიჟვაძემ ბრიფინგზე ისაუბრა. ამავე ბრიფინგზე აჭარის მთავრობის თავმჯდომარემ თქვა, რომ პირველ ეტაპზე საცხოვრებელი კორპუსების ასაშენებელად 10 მილიონი ლარი გამოიყოფა.

ამ თემაზე:

რა რისკებს შეიცავს „ოცნების ქალაქში“ კორპუსების აშენება – შეფასება

ნეტგაზეთის მასალების სხვა გამოცემებში გადაბეჭდვის წესი
ავტორი