ზურაბ პატარაძე: შეთანხმებული ვართ, რომ მეჩეთი უნდა აშენდეს


დღეს, 15 ივნისს, რამადან ბაირამის ლოცვა ბათუმში მცხოვრებმა მუსლიმებმა ისევ ღია ცის ქვეშ ჩაატარეს. ბათუმის ძველი მეჩეთი მლოცველებს ვერ იტევს, ახალი მეჩეთის აშენების ნებართვას კი, ხელისუფლება მუსლიმებს ამ დრომდე არ აძლევს.

ბათუმის ძველ მეჩეთში რამადანი დღეს მუსლიმებს აჭარის მთავრობის თავმჯდომარემ მიულოცა. ისე, როგორც გასულ წელს, ზურაბ პატარაძეს”ბათუმელებმა” ჰკითხა, აპირებდა თუ არა ახალ მეჩეთში მისვლას და იქ შეკრებილი მუსლიმებისთვის დღესასწაულის მილოცვას. აჭარის მთავრობის თავმჯდომარემ ჩვენს შეკითხვას ასე უპასუხა:

“ძირითად საკითხზე ჩვენ შეთანხმებული ვართ, რომ უნდა აშენდეს მეჩეთი. ეს გადაწყვეტილება მიღებულია. ახლა არის ტექნიკური დეტალები. ჩვენ სამუფთო სამმართველოსთან ერთად ვმუშაობთ ამ საკითხზე. უახლოეს პერიოდში გვექნება მორიგი შეხვედრა, სადაც შევთანხმდებით საბოლოო მოცულობაზე და ტექნიკურ დეტალებზე, რაც უშუალოდ მეჩეთთან არის დაკავშირებული. სამუფტო სამმართველო უშუალოდ ჩართულია. ჩვენ მზად ვართ, ყველა ჯგუფთან ერთად, არ აქვს მნიშვნელობა საინიციატივო ჯგუფი იქნება თუ ნებისმიერი მრევლი, ყველამ თითო-თითო აგური უნდა დავდოთ იმისათვის, რომ ეს პროექტი იყოს მისაღები ქალაქისთვის, იყოს მისაღები ჩვენი მრევლისთვის, მოსახლეობისთვის, ამიტომ ჩვენ ძალიან მალე ამ კონსესუსს მივაღწევთ”.

“ბათუმელების” კითხვას, თუ როდის იქნება “მალე”, პატარაძემ  ასე უპასუხა:

“როგორც კი შევჯერდებით ტექნიკურ საკითხებზე, ჩვენ მივიღებთ ამ გადაწყვეტილებას. მე დღეს მრევლსაც ვუთხარი ეს. თქვენ ალბათ კითხვას სვამთ, შარშან ამ დროსაც, ბაირამობას იყო საუბარი. წელს ჩვენ საგრძნობლად  წინ წავიწიეთ. ფაქტობრივად, ძირითადი საკითხები გავლილი გვაქვს. გვრჩება რიგი ტექნიკური საკითხები, რომლებსაც ჩვენ დავხვეწავთ მრევლთან, სამუფთოსთან და ყველა იმ ადამიანთან ერთად, ვინც დაინტერესებულია, აშენდეს მეჩეთი”.


ნახეთ რა თქვა ზურაბ პატარაძემ გასულ წელს მეჩეთის მშენებლობასთან დაკავშირებით, როდესაც ის ბაირამის მისალოცად ამავე მეჩეთს ესტუმრა:

აჭარის მთავრობის თავმჯდომარე: ახალ მეჩეთზე კონსულტაციები მიმდინარეობს

ამავე თემაზე:

რა შესთავაზა მერმა მუსლიმებს ბათუმში მეჩეთის მშენებლობის ნებართვის სანაცვლოდ

ნეტგაზეთის მასალების სხვა გამოცემებში გადაბეჭდვის წესი
ავტორი