„ასეთი მარტივი „ჩორტაობა“, რა თქმა უნდა, შედეგს [არ მოიტანს]“ – ასე უპასუხა ირაკლი კობახიძემ დღეს, 7 სექტემბერს, „ტვ პირველის“ კითხვას, ხომ არ ცვლის ივანიშვილი კობახიძეს ზურაბ პატარაძით პრემიერ-მინისტრის პოსტზე.
არაოფიციალური საუბარი, რომ ბიძინა ივანიშვილი აპირებს „ქართული ოცნების“ პრემიერ-მინისტრად ირაკლი კობახიძის ნაცვლად აჭარის მთავრობის თავმჯდომარე ზურაბ პატარაძე დანიშნოს, რამდენიმე კვირა აქტუალურია.
ირაკლი კობახიძის მიერ თანამდებობის დატოვების საკითხი განსაკუთრებით გააქტიურდა მას შემდეგ, რაც პოსტიდან და პოლიტიკიდან წავიდა მამუკა მდინარაძე, რასაც წინ უძღოდა ყოფილი პრემიერ-მინისტრის, ირაკლი ღარიბაშვილის წერილები ციხიდან.
თანამდებობის შესაძლო დატოვების შესახებ დღეს პირველად გააკეთა ირაკლი კობახიძემ კომენტარი.
„სამ თვეში ერთხელ ისმება ხოლმე ეს კითხვა. ველოდები, რომ სამ თვეში კიდევ დასვამთ ამ შეკითხვას,“ – თქვა ირაკლი კობახიძემ.
მან შემცვლელად აჭარის მთავრობის თავმჯდომარის განხილვის შესახებ თქვა, რომ „ასეთი მარტივი „ჩორტაობა“ შედეგს [არ მოიტანს]…“.
ირაკლი კობახიძე პრემიერ-მინისტრის პოსტზე 2024 წლის 8 თებერვალს დანიშნეს.
