18 მქარგველი ქალი ფეისბუქიდან საგამოფენო სივრცეში

დღეს, 8 ნოემბერს, ბათუმის ხელოვნების მუზეუმში ნაქარგების გამოფენა გაიხსნა. გამოფენაზე საქართველოს სხვადასხვა კუთხეში მცხოვრები 18 ქალის ნაქარგები იყო წარმოდგენილი.

მქარგველი ქალები სხვადასხვა ქალაქიდან ფეისბუქჯგუფმა – „ქარგვა ხელოვნებაა“ გააერთიანა. ჯგუფში ქალები ერთმანეთს საკუთარ ნამუშევრებს უზიარებდნენ, მოგვიანებით კი გაჩნდა გამოფენის იდეა. პირველი გამოფენა თელავში ჰქონდათ, მეორე კი დღეს ბათუმში გაიხსნა.

ნაქარგების გამოფენა ბათუმში

გამოფენაზე ბათუმში მცხოვრები ნანა კარგიშვილის ნამუშევრებიც იყო წარმოდგენილი. ნანა ამბობს, რომ ფეისბუქზე შემთხვევით ნაპოვნმა ჯგუფმა მის ცხოვრებაში მნიშვნელოვანი სიახლეები შეიტანა, გაიცნო ახალი ადამიანები და საკუთარი ნამუშევრები ფართო აუდიტორიამდე მიიტანა.

„დღეს გამოფენაზე ჩემი ორი ნამუშევარია – ერთი ცხენი, რომელზეც შვიდი თვე ვმუშაობდი, იმდენად რთული საქარგი იყო და მეორე – ხატი. საეკლესიო ხატებსაც ვქარგავ,“ – ამბობს ნანა.

„ფეისბუქჯგუფი – „ქარგვა ხელოვნებაა“ 2013 წელს ნინო მდინარაძემ შექმნა. ეს გამოფენა ჩვენი ჯგუფის მიერ ჩატარებული მეორე გამოფენაა, სამომავლოდაც, დიდი გეგმები გვაქვს სხვადასხვა ქალაქში. ბევრი არ მისდევს ქარგვას, ხატვა უფრო ფასობს. გვინდა პოპულარიზაცია გავუწიოთ ხელოვნების ამ მივიწყებულ დარგს,“ – ამბობს გამოფენის ერთ-ერთი ორგანიზატორი, მაია არაყიშვილი.

ნაქარგების გამოფენა ხელოვნების მუზეუმის გალერეაში 11 ნოემბრამდე გაგრძელდება.

ნაქარგების გამოფენა ბათუმში

ნაქარგების გამოფენა ბათუმში

ნაქარგების გამოფენა ბათუმში

ნაქარგების გამოფენა ბათუმში

ნეტგაზეთის მასალების სხვა გამოცემებში გადაბეჭდვის წესი


ავტორი