ვინ მიიღებს დაფინანსებას ევროკავშირიდან ქედასა და ხულოში – პროექტების მისაღები ვადა იწურება


ხულოსა და ქედაში ევროკავშირი 2-2 მილიონ ევროს დახარჯავს 4 წლის განმავლობაში. პროექტების მიღება დაწყებულია. „ბათუმელები“ დაინტერესდა, გამოხატავენ თუ არა ფერმერები ინტერესს გრანტის მისაღებად და მიაწოდეს თუ არა მათ სათანადო ინფორმაცია.

ევროკავშირისგან გრანტის მისაღებად ხულოში 429 ადამიანს უკვე გამოუხატავს ინტერესი. აქედან მეორე ეტაპზე 180 პროექტი გადავიდა. მეორე ეტაპზე პროექტის ავტორებმა სრული პროექტები უნდა წარადგინონ 20 ნოემბრამდე. ვინ მიიღებს თანადაფინანსების წესით გრანტს ევროკავშირიდან ხულოში – ჯერ უცნობია. საბოლოო გადაწყვეტილება ადგილობრივ ჯგუფებთან ერთად მოწვეულმა ექსპერტებმა უნდა მიიღონ.

ინტერესის გამოხატვა, ანუ კონკურსის პირველი ეტაპი არ დასრულებულა ქედაში. აქ ფერმერებს იდეებით 20 ოქტომბრამდე ელიან, თუმცა ინტერნეტგვერდზე მითითებულ საკონტაქტო პირებთან დაკავშირება შეუძლებელია. საიტზე მოცემული ოთხი ტელეფონის ნომრიდან ორი გამორთულია, ორს – არავინ პასუხობს.

კონკურსის პირველი ეტაპი მხოლოდ ინტერესის გამოხატვას, ანუ იდეების წარმოდგენას გულისხმობს. იდეების გაგზავნა ფერმერებს ინტერნეტის საშუალებით შეუძლიათ.

ქედაში ევროკავშირის მიერ დაფინანსებულ სოფლის განვითარების პროექტს ორგანიზაცია CENN ახორციელებს. ორგანიზაციის სათავო ოფისში გვითხრეს, რომ პასუხისმგებელი პირები ავსტრიაში იმყოფებიან.

ვინ უნდა გაუწიოს კონსულტაცია ფერმერს, თანაც პროექტების მიღების დასრულებამდე 3 დღე დარჩა? – „ბათუმელების“ ამ კითხვაზე CENN-ის ცხელ ხაზზე გვითხრეს, რომ კითხვებს პროექტის თანაშემწე, ნატა დავლიანიძე უპასუხებდა.

“გუნდი იმყოფება სასწავლო ვიზიტით ავსტრიაში, თუმცა ერთი თანამშრომელი იმყოფება ქედის ოფისში და მას შეუძლია კონსულტაციის გაწევა,” – გვითხრა ნატა დავლიანიძემ.

მისივე თქმით, პროექტის განმარციელებმა გუნდმა ინფორმაცია გრანტების შესახებ მოსახლეობას ყველა სოფელში მიაწოდა.

იგივეს ამბობს ხულოს პროექტების მენეჯერი, გიორგი მურვანიძე.

„ძირითადად ინტერესის გამოხატვაზე წინადადებები შემოვიდა ოჯახური ტიპის სასტუმროს მოწყობაზე, ასევე არის პროექტები სოფლის მეურნეობაზე, შემოვიდა სოციალური პროექტებიც, რომლებიც მოგებაზე არაა ორიენტირებული. პროექტის პირობების თანახმად, ფერმერმა პროექტის ღირებულების 30 პროცენტი თავად უნდა დაფაროს,“ – გვიყვება გიორგი მურვანიძე პროექტის მენეჯერი ხულოში. მისი თქმით, დამწყებმა ბიზნესმენებმაც შეიტანეს განაცხადი, თუმცა ინოვაციური პროექტი ნაკლებია.

თითოეული პროექტის ღირებულება 10 ათასიდან 100 ათას ლარამდე შეიძლება იყოს.

ევროკავშირი სოფლის განვითარების მიმართულებით პროექტებს აჭარის ორ მუნიციპალიტეტში – ხულოსა და ქედაში აფინანსებს. პროექტი თავდაპირველად ადგილობრივი სამოქმედო ჯგუფების – ე.წ. ლაგების ჩამოყალიბებას ითვალისწინებდა. ჯგუფებმა სოფლის განვითარების სტრატეგიები უკვე ჩამოაყალიბეს და ბათუმში სტუმრად მყოფ ევროკავშირის ელჩს გასულ კვირას გააცნეს. ამ სტრატეგიული განვითარების დოკუმენტებით ხულოსა და ქედაში პრიორიტეტული მიმართულებები განისაზღვრა, რაზეც შესაძლებელია გრანტის მიღება.

ამ თემაზე:

2 მილიონი ევრო ქედას – ევროკავშირის გრანტი  

2 მილიონი ევრო ხულოს – ევროკავშირის გრანტი  

 

ნეტგაზეთის მასალების სხვა გამოცემებში გადაბეჭდვის წესი
ავტორი