უკრაინის პრეზიდენტმა ვლადიმერ ზელენსკიმ განაცხადა, რომ რუსეთის საჰაერო თავდასხმებისგან უკრაინის ტერიტორიის სრულად დასაფარად საჭიროა 25 საზენიტო-სარაკეტო სისტემა „პატრიოტი“.
„არ გეტყვით რამდენი პატრიოტის სისტემა გვაქვს. გეტყვით – იმისათვის, რომ უკრაინის ცა მთლიანად დაიხუროს, მომავალში სასურველია უკრაინას ჰქონდეს 25 „პატრიოტის“ სისტემა, თითოში 6-8 ბატარეით“, – განაცხადა ზელენსკიმ 6 აპრილს, საღამოს სატელევიზიო მარათონის ეთერში.
ზელენსკიმ უპასუხა შეკითხვებს იმის შესახებ, აქვს თუ არა უკრაინას საჰაერო თავდაცვის რაკეტების რეზერვები და არის თუ არა ენერგეტიკული სისტემის სრულად განადგურების რისკი.
„ჩვენ შევძელით მრავალი ენერგეტიკული ობიექტის დაცვა საჰაერო თავდაცვისა და სხვა საშუალებებით, მაგრამ არის რაკეტები, რომელთა წინააღმდეგ ეს დამცავი სისტემები არ მუშაობს, სამწუხაროდ. აქ მხოლოდ „პატრიოტის“ სისტემა ან ანალოგი შეიძლება მუშაობდეს. და აქ ჩვენ უნდა ავირჩიოთ რომელი ობიექტი დავიცვათ, რომელ ქალაქში, რა დროს.
…დღეს გვაქვს საჰაერო თავდაცვის რეზერვები, მაგრამ მე მჯერა, რომ უნდა ვიფიქროთ იმაზე, რა იქნება ხვალ. ხვალ შეიძლება ისეთი ინტენსივობა იყოს, რომ არ გვეყოს. თუ ისინი ყოველ დღე დაგვარტყამენ, ისე, როგორც გასული თვის განმავლობაში, ჩვენ შეიძლება არ გვქონდეს საკმარისი რაკეტები და ეს ჩვენმა პარტნიორებმა იციან“, – განაცხადა ზელენსკიმ.
