Batumelebi

დღეს, 13 იანვარს, ბათუმის მინიციპალიტეტის რიგ ქუჩებზე გაზი გაითიშა.

„სოკარის“ ცნობით, მიზეზი გაზსადენზე მომხდარი ავარიაა და გაზმომარაგების აღდგენა დაიწყება დღეს, 13 იანვარს, 18 საათიდან, ეტაპობრივად.

„გთხოვთ, გაზის დანადგარები იქონიოთ ჩაკეტილ მდგომარეობაში“ – ნათქვამია კომპანიის შეწყობინებაში.

„ბათუმელები“ კომპანია „სოკარში“ აზუსტებს ინფორმაციას, თუ რა გახდა გაზის გათიშვის მიზეზი და რამდენ აბონენტს არ მიეწოდება გაზი დღეს ბათუმში.

აჭარაში მცხოვრებ ორ ქალს ნაქიფე დავითაძესა და ფატყუმე დიასამიძეს 110 წელი შეუსრულდათ.

35 მოქალაქემ კი, ვინც აჭარაში ცხოვრობს 100 წელს გადააბიჯა. აჭარის ჯანდაცვის სამინისტროს ინფორმაციით, მათ შორის 5 კაცი და 30 ქალია.

ჯანდაცვის სამინისტროს ცნობით, „100 წელს გადაცილებული მოქალაქეების ერთჯერადი დახმარების” პროგრამის ფარგლებში, აჭარის რეგიონში მცხოვრებ 100 წელს გადაცილებულ 35 მოქალაქეს 1000 – 1000 ლარი გამოეყო. აქედან ერთ მათგანს 100 წელი 2024 წლის 7 იანვარს შეუსრულდა“.

აჭარის ჯანდაცვის სამინისტროს ინფორმაციით, 2024 წლის ბოლომდე აჭარაში მცხოვრებ კიდევ 12 მოქალაქეს შეუსრულდება 100 წელი და ისინი ერთჯერად ფულად დახმარებას „საიუბილეო თარიღებთან დაკავშირებით მიიღებენ“.

მთავარი ფოტო: Maria Che

წუხელ, გვიან ღამით, ბათუმში სასწრაფო სამედიცინო სამსახურის მანქანას, მსუბუქი ავტომანქანა შეეჯახა.

შეჯახების შედეგად სასწრაფო ადგილზე გადაყირავდა.

ავარიის შედეგად სხვადასხვა სახის დაზიანება და მოტეხილობა მიიღო სასწრაფოს პერსონალმა.

ყველა მათგანი გადაყვანილია კლინიკაში.

შს სამინისტროს პრესცენტრის ინფორმაციით, დაშავდა სამი პირი, გამოძიება კი სისხლის სამართლის კოდექსის 276-ე მუხლით დაიწყო.

საქართველოს კულტურული მემკვიდრეობის დაცვის სააგენტო გერგეტის სამების რეაბილიტაციას გეგმავს. სამუშაოები ჩატარდება როგორც ტაძარზე, ასევე სამრეკლოზე. შესაბამისი პროექტები მზადაა და სამუშაოებისთვის 679 ათასი ლარია გამოყოფილი.

სააგენტომ მომსახურების შესყიდვაზე ტენდერი უკვე გამოაცხადა. სატენდერო თანხა 679 ათას 58 ლარია.

ტექნიკური დავალების მიხედვით, ჩასატარებელი ძირითადი სამუშაოებია:

• „მთავარ ტაძარზე არსებული ფურცლოვანი სპილენძის საფარის შეცვლა წინასწარ დაჟანგული სპილენძის საფარით, ნაშვერებისა და საცრემლეების მოწყობით;
• სამრეკლოს გუმბათზე არსებული ლორფინის ძველი სახურავის რეაბილიტაცია და მასზე ახალი ფურცლოვანი სპილენძის სახურავის მოწყობა;
• ლორფინებს შორის არსებული ნაკერების ამოსუფთავება-ამოგოზვა;
• სამრეკლოს მეორე სართულის გარე ჰორიზონტალურ პერიმეტრზე ფურცლოვანი სპილენძის გადახურვის მოწყობა;
• ექსტერიერში და ინტერიერში კედლის ქვის წყობის კონსერვაცია, საპირე ქვებს შორის არსებული ნაკერების ამოგოზვა და ინტერიერში კამარების რესტავრირება;
• ეკლესიის სამხრეთ-დასავლეთ ნაწილში, მეორე სართულზე, არსებული სამალავის ჩამოშლილი კამარების ნანგრევებისგან გაწმენდა და ახალი გადახურვის მოწყობა;
• ეკლესიის სამხრეთ-დასავლეთ ნაწილში ფასადის არსებული ცოკოლის ლილვის თავზე დაძრული ქვების კონსერვაცია;
• ეკლესიის ცოკოლის მთელ პერიმეტრზე ლილვის და ქვებს შორის ნაკერების დამუშავება და ამოგოზვა;
• მეხამრიდის მოწყობა;
• ეზოში, ტაძრის პერიმეტრიდან ბუნებრივი ნალექების გადაყვანის მოწესრიგების მიზნით, ეკლესიის ჩრდილოეთი კედლის მთელ სიგრძეზე არსებული გასასვლელისა და ეკლესიის სამხრეთ-დასავლეთი მონაკვეთის არსებული ფიქალი ქვების მოხსნა და პროექტის მიხედვით დადგენილი ნიშნულების პარამეტრების დაცვა.“

„გერგეტის სამების ხუროთმოძღვრული კომპლექსი მდებარეობს ყაზბეგის მუნიციპალიტეტში. გალავნით შემოზღუდულ კომპლექსში შედის სამების გუმბათოვანი ტაძარი [XIV საუკუნის 30-იანი წლები], სამრეკლო [XIV საუკუნის II ნახევარი] და საბჭეო [XV საუკუნე]. გერგეტის სამება წარმოადგენს ეროვნული მნიშვნელობის კატეგორიის კულტურული მემკვიდრეობის უძრავ ძეგლს.“

სააგენტოს მიერ გამოცხადებულ ტენდერში წინადადებების მიღება 2024 წლის 26 იანვარს დაიწყება და 31 იანვარს დასრულდება.

პირობის მიხედვით, პროექტით გათვალისწინებული სამუშაოები ხელშეკრულების გაფორმებიდან 9 თვეში უნდა დასრულდეს.

რაც შეეხება შესრულებული სამუშაოს საგარანტიო ვადას, ტენდერში აღნიშნულია, რომ „სამუშაოების დასრულების შემდეგ [საბოლოო მიღება-ჩაბარების აქტის გაფორმების თარიღიდან] 5 წლის განმავლობაში რაიმე წუნის [დეფექტი, ნაკლოვანებები] აღმოჩენის შემთხვევაში, თუ დადგინდება, რომ აღნიშნული წუნი გამოწვეულია მიმწოდებლის მიზეზით, მიმწოდებელი ვალდებულია აღმოფხვრას უხარისხოდ შესრულებული სამუშაოები საკუთარი ხარჯებით.“

ამასთან, „პრეტენდენტი ტენდერში მონაწილეობით ავტომატურად აცხადებს თანხმობას სამუშაოს საგარანტიო ვადებთან და პირობებთან დაკავშირებით, რომელიც შემდგომში წარმოადგენს ხელშეკრულების განუყოფელ ნაწილს“.

ამავე თემაზე:

რიკოთის უღელტეხილზე, ავტომაგისტრალის მიმდებარედ, პოტენციური მეწყრული ფერდის გამაგრებაზე გამოცხადებული ტენდერის გამო საქართველოს საავტომობილო გზების დეპარტამენტის სატენდერო კომისიას დავების საბჭოში უჩივიან.

„თბილისი-სენაკი-ლესელიძის საავტომობილო გზის 149-ე კილომეტრის მიმდებარედ პოტენციური მეწყრული ფერდის სტაბილიზაციის ღონისძიებების“ ჩატარებაზე ტენდერი გზების დეპარტამენტს 63 908 792 ლარით აქვს გამოცხადებული.

სატენდერო კომისიამ ტექნიკური დოკუმენტაციის გამო დისკვალიფიკაცია მისცა შპს „ენერგონის“, რომელიც დეპარტამენტს მომსახურებას 58 786 564 ლარად სთავაზობს.

კომპანია არ ეთანხმება კომისიის გადაწყვეტილებას და მას შესყიდვების სააგენტოს დავების საბჭოში უჩივლა.

კომპანია მიიჩნევს, რომ „მის მიერ წარმოდგენილი დოკუმენტაციათა ერთობლიობა ადასტურებს, როგორც სატენდერო დოკუმენტაციით მოთხოვნილ გამოცდილებას, აგრეთვე სრულიად შეესაბამება სატენდერო დოკუმენტაციით დადგენილ მოთხოვნებს, შესაბამისად, გასაჩივრებულ დისკვალიფიკაციის ოქმში, კომისიის მსჯელობა არის მცდარი და არაარგუმენტირებული.“

საჩივარში კომპანიას მოჰყავს თავისი არგუმენტები და ასკვნის, რომ გზების დეპარტამენტის „სატენდერო კომისიამ მხედველობაში არ მიიღო მათ მიერ წარდგენილი ტექნიკური დოკუმენტაცია მისი სრული შინაარსით, რის შედეგადაც კომპანიას მიენიჭა უკანონო დისკვალიფიკაცია.“

„ენერგონი“ დავების საბჭოსგან მოითხოვს „გაუქმდეს საქართველოს საავტომობილო გზების დეპარტამენტის სატენდერო კომისიის 2023 წლის 27 დეკემბრის სხდომის ოქმი #3 და შემსყიდველის მიერ მიღებულ იქნას ახალი გადაწყვეტილება, რომელიც შესაბამისობაში იქნება კანონმდებლობასა და პრეტენდენტის ქმედებებთან.“

დავების საბჭოში კომპანიის საჩივრის განხილვის დროდ 2024 წლის 16 იანვარია მითითებული.

„ენერგონის“ საჩივარი საბჭოში 5 იანვარსაა დარეგისტრირებული, იმავე დღით დათარიღებული ოქმით კი, სატენდერო კომისიამ გამარჯვებულად მეორე პრეტენდენტი შპს „ცეკური“ გამოავლინა და მას გარკვეული დოკუმენტების წარდგენა მოსთხოვა.

„ცეკური“ გზების დეპარტამენტს მომსახურებას 62 077 052 ლარად სთავაზობს. ანუ, 3,2 მილიონი ლარით ძვირად, ვიდრე „ენერგონი“.

დამატებით წარდგენილი დოკუმენტების განხილვის შემდეგ მიიღებს სატენდერო კომისია გადაწყვეტილებას გააფორმებს თუ არა ხელშეკრულებას „ცეკურთან“.

ტენდერის ბედი დამოკიდებული იქნება ასევე დავების საბჭოს გადაწყვეტილებაზე „ენერგონის“ საჩივართან დაკავშირებით. აქედან გამომდინარე კი, შესაძლოა სატენდერო პროცედურები დროში გაიწელოს.

მთავარი ფოტო: რიკოთი/„ბათუმელების“ არქივიდან

ტენდერის ფარგლებში რა სამუშაოებია გათვალისწინებული რიკოთზე, დეტალურად ნახეთ ამ ბმულზე:

საქართველოს სახალხო დამცველი „ლიბერთი ბანკს“ საპენსიო სესხებთან დაკავშირებულ კიდევ ერთ პრობლემაზე მიმართავს – პენსიონერებს 2023 წლამდე აღებულ სესხებში ისევ მაღალი პროცენტის გადახდა უწევთ.

სახალხო დამცველის შეფასებით, დგას „არათანაბარი ინფორმირების პრობლემა“.

შესაბამისად, სახალხო დამცველი მოითხოვს „პენსიონერთა მიერ ოვერდრაფტის ხელშეკრულებების 2023 წლიდან მოქმედი ახალი დაბალი პროცენტით ავტომატურად გადაანგარიშების მიზნით, მიიღონ ყველა ზომა, რათა მაქსიმალურად იქნეს თავიდან აცილებული ხანდაზმულთა საკუთრების უფლებების დარღვევის ფაქტები“.

ოვერდრაფტის სესხებთან დაკავშირებით სახალხო დამცველი თავისი წინადადებას „ლიბერთი ბანკისადმი“ ასე აყალიბებს:

„მნიშვნელოვან გამოწვევას წარმოადგენს სს „ლიბერთი ბანკის“ მიერ პენსიონერებისათვის შეთავაზებული ოვერდრაფტის სესხები.

2023 წლიდან სესხების წლიური საპროცენტო განაკვეთის ზედა ზღვარი განისაზღვრა, თუმცა, 2023 წლამდე აღნიშნული პროცენტი პენსიონერებისათვის შეუსაბამოდ მაღალი იყო.

შესაბამისად, ახალი რეგულაციის ამოქმედებამდე აღებული სესხები გადაანგარიშებდება ახალი პირობებით და ახალი დაბალი პროცენტით, მხოლოდ პენსიონერების მიმართვის საფუძველზე და ამ შემთხვევაშიც დგას არათანაბარი ინფორმირების პრობლემა.“

საქართველოს სახალხო დამცველმა საქართველოს ეროვნულ ბანკს წინადადებით მიმართა და პენსიონერთა ვალდებულებების რესტრუქტურიზაციის მიზნით, საშეღავათო პერიოდით მოსარგებლე დაზარალებულ მომხმარებელთა დასაცავად შესაბამისი დადგენილების/მითითების შემუშავება მოითხოვა, რომლითაც „ლიბერთი ბანკი“ მოახდენს ბენეფიციარი პენსიონერების ფულადი ვალდებულების რეფინანსირება/რესტრუქტურიზაციას და შესაძლებელი იქნება პენსიონერების მიერ გადავადებამდე არსებულ პირობებზე და გადახდის ძველ გრაფიკზე დაბრუნება“…

____

2023 წლამდე პენსიონერები აღებულ სესხში 30%-ზე მეტს იხდიდნენ. 2023 წლიდან კი განისაზღვრა მაქსიმალური ზღვარი და 26% დაწესდა.

კომპანია „სამი ძმა“ აცხადებს, რომ შეწყვიტეს ორი დასახელების ბუშტის იმპორტი და რეალიზაცია, ვინაიდან ამ პროდუქციაში მავნე ნივთიერებების რაოდენობა დასაშვებ ნორმას აჭარბებდა. უკვე გაყიდულ ბუშტებს კი კომპანია უკან იბრუნებს.

„ჩვენი პროდუქციიდან ორი დასახელების ბუშტის იმპორტირება და რეალიზაცია შეწყდა. ლაბორატორიულმა კვლევებმა უარყო ამ ორი პროდუქტის უვნებლობა, რის საფუძველზეც გადაწყდა მათი რეალიზაციიდან ამოღება და ასევე, უკვე რეალიზებული პროდუქციის უკან გამოთხოვა.

თუ თქვენ შეიძინეთ აღნიშნული ბუშტები [იხილეთ ფოტო] გთხოვთ, დაგვიბრუნოთ „სამი ძმის“ ნებისმიერ ფილიალში 60 დღის ვადაში. პროდუქციის უკან დაბრუნება შესაძლებელია 2024 წლის 9 მარტამდე.

საუბარია ბუშტზე, სერია/მარკა AUF-20 და ბუშტი XIONG FENG“ – აცხადებს კომპანია.

„ბათუმელები“ დაუკავშირდა კომპანიას, სადაც გვითხრეს, რომ საუბარია ბუშტების მხოლოდ იმ შეკვრაზე, რომელშიც სხვადასხვა ფერის ბუშტებია მოთავსებული [როგორც ფოტოზე ჩანს], „რაც შეეხება ისეთ შეკვრას, რომელშიც მხოლოდ ერთი ფერის ბუშტებია მოთავსებული [მაგალითად, ვთქვათ მხოლოდ წითელი, ლურჯი და ა.შ.] ისინი ყველა უსაფრთხოა, რაც ლაბორატორიულადაც დადასტურებულია“.

რაც შეეხება შეკვრას, რომელშიც სხვადასხვა ფერის ბუშტებია, ამ შემთხვევაში „ნიტროზამინის მიგრაცია ელასტომერში აღემატება დასაშვებ ნორმას (<0,05მგ/კგ). ბუშტები (სერია/მარკა AUF-20,მწარმოებელი: შპს სამი ძმა) ნიტროზამინის (NDMA,GAშ NO 62-75-9) მიგრაცია ელასტომერში შეადგენს 0,08მგ/კგ, რაც 1,6-ჯერ აღემატება დასაშვებ ნორმას (<0,05მგ/კგ), ბუშტებში (მწარმოებელი XIONG FENG) ნიტროზამინის (NDELA,ჩAშ NO 1116-54-7) მიგრაცია ელასტომერში შეადგენს 0,18მგ/კგ, რაც 3,6-ჯერ აღემატება დასაშვებ ნორმას(<0,05 მგ/კგ).

ნიტროზამინები წარმოადგენს კანცეროგენულ, მუტაგენურ ან რეპროდუქციისთვის ტოქსიკურ CMR ნივთიერებას, მასთან ხშირმა კონტაქტმა შესაძლოა გამოიწვიოს ბავშვის ორგანიზმის გამოუსწორებელი დაზიანება, როგორიცაა სიმსივნე, მუტაცია ან რეპროდუქციული მოწამვლა“, – აღნიშნულია განცხადებაში, რომელსაც კომპანია ავრცელებს.

კომპანიის ვებგვერდის მიხედვით „სამი ძმა“ 2010 წელს დაარსდა, ის დღემდე, სადღესასწაულო აქსესუარების და საკონდიტრო მასალების [სადღესასწაულო აქსესუარები, საკონდიტრო მასალები, ფეიერვერკები, სააღდგომო ატრიბუტები, საახალწლო პროდუქცია, სათამაშოები] ერთ-ერთი მსხვილი იმპორტიორია საქართველოში.

აჭარის კულტურული მემკვიდრეობის დაცვის სააგენტოს დირექტორის მოადგილედ სოფიო სანიკიძე დაინიშნეს – ამის შესახებ ინფორმაციას თავად სააგენტო აქვეყნებს.

სააგენტოს ცნობით, 2022 წლიდან ის ქ.ბათუმის ქალაქგანვითარებისა და ურბანული პოლიტიკის სამსახურის ისტორიული განაშენიანების ზონის განვითარების განყოფილების უფროსად მუშაობდა.

იგივე წყაროს ცნობით, სოფიო სანიკიძე სხვადასხვა დროს მუშაობდა: აჭარის ხელოვნების მუზეუმში; რუსთაველის სახელმწიფო უნივერსიტეტში; პროფესიული პროგრამების მართვისა და უწყვეტი განათლების ცენტრში; ხელოვნების სახელმწიფო სასწავლო უნივერსიტეტში; წმ. ანდრია პირველწოდებულის სახელობის სკოლაში (დღემდე).

კულტურული მემკვიდრეობის სააგენტოს ბოლო პერიოდში არც დირექტორი ჰყავს, ამ პოზიციაზე მოვალეობას ასრულებს აჭარის განათლების მინისტრის მოადგილე, ზაურ ახვლედიანი.

კორონავირუსის პანდემიის დროს „ლიბერთი ბანკმა“, მთავრობის რეკომენდაციით, პენსიონერებს სესხები რამდენიმე თვით ისე გადაუვადა, რომ ხანდაზმული ჯგუფისთვის არაფერი უკითხავთ. შედეგად, პენსიონერებს სესხის ვადა გაუხანგრძლივდათ, რამაც მათზე დარიცხული პროცენტის გაზრდა გამოიწვია.

ერთ-ერთი მათგანის, 79 წლის პენსიონერის – შალვა ჩაჩავას შესახებ „ბათუმელები“ გასული წლის ივლისში წერდა. მაშინ შალვა ჩაჩავა ჰყვებოდა, რომ „ლიბერთი ბანკისგან“ ისესხა 4650 ლარი, უნდა დაეფარა ჯამში 7525 ლარი და ეს სესხი 2023 წლის  იანვარში უსრულდებოდა. პენსიონერი სესხს იხდიდა უპრობლემოდ, მაგრამ მასთან შეთანხმების გარეშე, ბანკმა სესხის ვადა გაუხანგრძლივა 2025 წლამდე. სწორედ ამის შედეგად პენსიონერს გადასახდელი თანხა 11 285 ლარამდე გაეზარდა.

შალვა ჩაჩავა „ლიბერთი ბანკის“ წინააღმდეგ სასამართლოში სარჩელის შეტანას აპირებდა, რათა ცალმხრივად შეცვლილი ხელშეკრულების ბათილად ცნობა მოეთხოვა.

დღეს, 9 იანვარს, სწორედ ამ საკითხზე საქართველოს სახალხო დამცველმა წინადადებით მიმართა საპენსიო სესხის გამცემ „ლიბერთი ბანკს“, რომელშიც ის წერს:

„საქართველოს ეროვნული ბანკის განმარტებით, კომერციული ბანკების, მიკროსაფინანსო ორგანიზაციებისა და სესხის გამცემი სუბიექტების მიერ ახალი კორონავირუსით გამოწვეული პანდემიის გამო ე.წ. „საშეღავათო პერიოდის“ გააქტიურებით მოსარგებლე მომხმარებელს უფლება აქვს მოითხოვოს გადავადებამდე არსებულ პირობებზე, მათ შორის, გადახდის ძველ გრაფიკზე დაბრუნება, რისთვისაც უნდა დაფაროს გადავადებული თვეების შესაბამისი შენატანები.

აღნიშნული უფლებით სარგებლობისთვის მომხმარებელმა უნდა მიმართოს შესაბამის, მომსახურე კომერციულ ბანკს, მიკროსაფინანსო ორგანიზაციასა და სესხის გამცემ სუბიექტს.

აღსანიშნავია, რომ ხანდაზმულთა ნაწილს შესაძლოა არ მიუწვდებოდეთ ხელი ინფორმაციაზე, რის გამოც ვერ ახერხებენ „ლიბერთი ბანკისადმი“ მიმართვას.

ძველ გრაფიკზე დაბრუნების და ვალდებულებების რეფინანსირების მოთხოვნა, საჭიროებს შესაბამის ცოდნას და ხშირად, პენსიონერები ამ საკითხებში გარკვეულნი არ არიან. იმ პენსიონერებს, რომლებმაც შესაბამისი პირის/ორგანიზაციის დახმარებით, ინდივიდუალურად მიმართეს ბანკს და მოითხოვეს სესხის გადახდის ახალი გრაფიკის შედგენა, მნიშვნელოვნად შეუმცირდათ სესხის ვადა და თანხა“.

___

ამავე თემაზე:

საქართველოს კონკურენციის და მომხმარებლის დაცვის სააგენტოს განცხადებით, კინოთეატრების ბილეთების ონლაინ რეალიზაციის ბაზარზე მოკვლევის შედეგად „კონკურენციის შესახებ“ საქართველოს კანონის [კონკურენციის საწინააღმდეგო შეთანხმება] დარღვევა დაადგინეს.

სააგენტოს გადაწყვეტილებით, როგორც მომჩივან ასევე მოპასუხე მხარეებს –  3 კომპანიას, ჯამურად, 1,6 მილიონ ლარზე მეტი ოდენობით სანქცია დაეკისრათ.

კერძოდ:

• ერთიან ეკონომიკურ სუბიექტს – „სადისტრიბუციო კომპანიას“ („სადისტრიბუციო კომპანია“, შპს „კავეა საბურთალო“ შპს „კავეა გალერეა“, შპს „კავეა თბილისი მოლი“, შპს „რუსთაველი ჰოლდინგ სინემა“, შპს „ამირანი“, შპს „აპოლო ბათუმი“) – 1 120 562 ლარი
• შპს „თინეთს“ (100% წილის მფლობელი TBC Bank Group PLC) – 544 328 ლარი
• შპს „ელ.ბილეთებს“ (მომჩივანი) – 5 368 ლარი

„მოკვლევის შედეგად, კონკურენციის კანონმდებლობის დარღვევად იქნა შეფასებული შპს „სადისტრიბუციო კომპანიას“ და შპს „თინეთს“ შორის  ექსკლუზივის პირობით გაფორმებული ხელშეკრულება, რომელიც კინოთეატრების ბილეთების რეალიზების უფლებას მხოლოდ თინეთის მფლობელობაში მყოფ პორტალ tkt.ge-ს აძლევდა. გარიგების მონაწილედ იქნა მიჩნეული მომჩივანი შპს „ელ ბილეთები“, რომელიც თავის მხრივ ცდილობდა ექსკლუზისვის მოპოვებას მის მფლობელობაში მყოფ პორტალზე biletebi.ge.

სააგენტოს გადაწყვეტილებით, კანონდარღვევის აღმოფხვრის მიზნით, მოპასუხე კომპანიებს შპს „სადისტრიბუციო კომპანიასა“ და შპს „თინეთს“ დაევალათ – შპს „სადისტრიბუციო კომპანიასა“ და შპს „ონლაინ თიქეთსს“ (სამართალმემკვიდრე შპს „თინეთი“) შორის დადებული ხელშეკრულების მე-6 მუხლისა („ექსკლუზივი“) და მასთან დაკავშირებული  უფლება-მოვალეობების ამოღება და ხელშეკრულების კონკურენციის კანონმდებლობასთან შესაბამისობაში მოყვანა…

სანქცირებულ კომპანიებს უფლება აქვთ სააგენტოს გადაწყვეტილება გაასაჩივრონ თბილისის საქალაქო სასამართლოში.“ – აღნიშნულია სააგენტოს მიერ გავრცელებულ ინფორმაციაში.