Batumelebi

სოფლად მცხოვრები მოსახლეობისთვის სახელმწიფო სერვისების ხელმისაწვდომობის უზრუნველსაყოფად, იქ,სადაც საზოგადოებრივი ცენტრები არ არის, სახელმწიფო კიდევ უფრო ახლოს მიდის მოქალაქეებთან და ზრუნავს ადგილობრივი მოსახლეობისთვის კომფორტული გარემოს შექმნაზე; საჯარო და კერძო სექტორის წარმატებული თანამშრომლობის შედეგად გაჩნდა ექსპრეს საზოგადოებრივი ცენტრების პროექტი. სააგენტოსთან ერთად პროექტში ჩართულია „ლიბერთი ბანკი“.

პროექტის ფარგლებში 70-მდე ექსპრეს საზოგადოებრივი ცენტრის ფილიალი ყოველთვიურად 1100-ზე მეტ სოფელს ემსახურება.

საქართველოს მასშტაბით სოფლად მცხოვრებ მოსახლეობას ადგილიდან გაუსვლელად შეუძლია ისარგებლოს როგორც სახელმწიფო სერვისების განვითარების სააგენტოს, ისე საჯარო რეესტრის ეროვნული სააგენტოს, სოციალური მომსახურების სააგენტოს, საქართველოს ეროვნული არქივისა და შპს „მექანიზატორის“  მომსახურებით.

პროექტს იუსტიციის სამინისტროს მმართველობის სფეროში მოქმედი სსიპ „სახელმწიფო სერვისების განვითარების სააგენტო“ ახორციელებს „ლიბერთი ბანკთან“ თანამშრომლობით.

პროექტი 2015 წლის 27 ივნისიდან ამოქმედდა და არსებობის თითქმის ერთი წლის განმავლობაში 1100-ზე მეტ სოფლის მოსახლეს გაუწია მომსახურება.

როგორც სააგენტოში განმარტავენ, „ექსპრეს საზოგადოებრივი ცენტრების“ მობილური ფილიალების მეშვეობით, მომხმარებელს შეუძლია მიიღოს შემდეგი მომსახურება: პასპორტი და პირადობის ელექტრონული მოწმობა, მიწის რეგისტრაცია, უძრავი ქონების გადაფორმება, საკუთრებასთან დაკავშირებული განაცხადის მიღება, სულადობის ცნობა, საკადასტრო გეგმის მომსახურება, საარქივო მომსახურება და სხვა. ასევე შესაძლებელია სხვადასხვა სახის საბანკო მომსახურება: პენსიისა და სოციალური დახმარების აღება, ფულადი გზავნილის მიღება ან გაგზავნა, ანგარიშის გახსნა, სესხის აღება, კომუნალური და სხვა გადასახადების გადახდა და სხვა. ჯამში, ექსპრეს საზოგადოებრივი ცენტრების მეშვეობით, ადგილობრივ მოსახლეობას სოფლიდან გაუსვლელად შეუძლია 200-ზე მეტი სახელმწიფო სერვისი მიიღოს.

სახელმწიფო სერვისების ხელმისაწვდომობა უზრუნველყოფილია ყველა იმ სოფელში, სადაც „ლიბერთი ბანკი“ მომხმარებელს „ლიბერთი ექსპრესის“ მობილური ფილიალებით ემსახურება.

ექსპრეს საზოგადოებრივი ცენტრები აჭარის მასშტაბით ხუთი მუნიციპალიტეტის მოსახლეობას ემსახურება.

ექსპრეს ცენტრების მომსახურებით მოსახლეობა კმაყოფილია – ეს იმიტომ, რომ სხვადასხვა დოკუმენტის მისაღებად მათ ქალაქში ჩასვლა და ზედმეტი ხარჯის გაღება აღარ სჭირდებათ.

პროექტის ფარგლებში ხელმისაწვდომი სერვისებიდან ყველაზე მოთხოვნადია პირადობის ელექტრონული მოწმობა და საინფორმაციო ბარათი.

სახელმწიფო სერვისების განვითარების სააგენტოს სტატისტიკური მონაცემების თანახმად, ექსპრეს საზოგადოებრივი ცენტრებით ყველაზე მეტმა მოქალაქემ ახალციხის, გორის, დმანისის, საჩხერისა და ქობულეთის ცენტრებში ისარგებლა.

აღსანიშნავია ისიც, რომ სახელმწიფო სერვისების განვითარების სააგენტოს პროექტისთვის – „სახელმწიფო სერვისების ხელმისაწვდომობის უზრუნველყოფა სოფლად მცხოვრები მოსახლეობისთვის“, რაც ექსპრეს საზოგადოებრივი ცენტრების გახსნას ეხებოდა, ინფორმაციული ტექნოლოგიებისა და კიბერუსაფრთხოების მერვე რეგიონალურ კონფერენციაზე სპეციალური ჯილდო გადაეცა ნომინაციაში – „ფართოდ გამოყენებული ელექტრონული სერვისი“.

საზოგადოებრივი ცენტრების კონცეფცია იუსტიციის სამინისტროს სსიპ – სახელმწიფო სერვისების განვითარების სააგენტომ შეიმუშავა. პროექტი ევროკავშირის ფინანსური მხარდაჭერით ხორციელდება.

საზოგადოებრივი ცენტრის ოფიციალური ვებგვერდია:
www.centri.gov.ge

ბოლო რამდენიმე წლის განმავლობაში ორჯერ გაიზარდა იმ მეწარმეების რიცხვი, რომლებმაც ბიოსერტიფიკატისთვის კომპანია „კავკასსერტს“ მიმართეს. ნუკრი ქურდაძე უკვე სამი წელია „კავკასსერტის“ აღრიცხვაზეა, სულ მალე ბიოსერტიფიკატსაც მიიღებს. ქურდაძეს ახალშენში 10 ჰექტარზე ვენახი აქვს და ბიოღვინოს წარმოებას გეგმავს. უკვე გადაწყვეტილი აქვს, რომ ეკოლოგიურად სუფთა ღვინოს ევროპაში გაიტანს, მოლაპარაკებებს საფრანგეთთან და ბულგარეთთან აწარმოებს.

მოთხოვნა პროდუქტზე, რომელსაც აწერია – „ბიო“, მსოფლიოში სულ უფრო იზრდება. ევროპაში უკვე იციან იმ საკვების ფასი, რომლის წარმოებისას შხამქიმიკატები და ჯანმრთელობისთვის მავნე კონსერვანტები არ გამოიყენება. დღეს ბიოპროდუქტი დიდი პოპულარობით სარგებლობს, თუმცა მიწოდება მოთხოვნას ვერ აკმაყოფილებს. ევროკავშირის ბაზარზე ეს  ნიშა თავისუფალია.  სპეციალისტების შეფასებით, საქართველოს ეკოლოგიურად სუფთა პროდუქტის ექსპორტირების  უნიკალური შესაძლებლობა აქვს. ბიოპროდუქტისადმი დიდი ინტერესი კი საქართველოში უკვე შეინიშნება.

„წელიწადნახევარია, რაც საქართველოში დავბრუნდი. ერთ-ერთი დასავლური კომპანიის აღმოსავლეთ ევროპის ფილიალში ვმუშაობდი, დაახლოებით 5-6 ქვეყნის ღვინოების ამბასადორი ვიყავი, შესაბამისად, ბოლო 15 წლის განმავლობაში შეხება მქონდა დასავლურ ღვინოებთან. შემიყვარდა ეს საქმე, გეგმაში მქონდა საწარმოს გაკეთება საქართველოში. ქართული ღვინის პოტენციალი ძველი ტრადიციების თანამედროვვე ტექნოლოგიებთან შერწყმაშია. სხვანაირად ქართული ღვინო ვერ აჯობებს ევროპულს.  როდესაც საქართველოს საექსპორტო პოტენციალს  ერთი ავსტრალიური ღვინის ბრენდის მოცულობა აჭარბებს, ძნელია, კონკურენცია გაუწიო. შენი სტილი უნდა ნახო, რომელიც გამოგარჩევს სხვა ქვეყნის ღვინოებისგან“, –  ამბობს ნუკრი ქურდაძე.

შპს „კავკასსერტი“ ბიოსერტიფიცირების პირველი ადგილობრივი ორგანოა. კომპანიის მიზანი ბიოლოგიური პროდუქციის ინსპექტირება და სერტიფიცირებაა. შპს „კავკასსერტი“ გერმანიის აკრედიტაციის ორგანოს DAkkS-ის მიერ 2008 წლიდან ISO-17065-ის მიხედვით არის აკრედიტებული. კომპანიის დირექტორი დავით ბედოშვილი ჩვენთან ინტერვიუში ამბობს, რომ ბიოსერტიფიკატის მისაღებად „კავკასსერტს“ ბევრი ადამიანი მიმართავს, დაინტერესებული პირების რაოდენობა ბოლო 2-3 წლის განმავლობაში განსაკუთრებით გაიზარდა. ამჟამად „კავკასსერტი“ 40 მეწარმესთან მუშაობს.

„ბევრმა არ იცის, რომ ბიოსერტიფიკატის მიღებას სჭირდება გარდამავალი პერიოდი, ერთწლიან კულტურებში – 2, მრავალწლიან კულტურებში 3 წელი. საჭიროა სტანდარტის დაცვა, რაც ნიშნავს, რომ რაღაცის გამოყენება შეიძლება, რაღაცის – არა. ბევრს ჰგონია, რომ ჩვენ ვართ ლაბორატორია, სადაც მოიტანენ პროდუქტს, გავსინჯავთ და თუ დაბინძურებული არ არის, ბიოსერტიფიკატს მივცემთ, მაგრამ ასე არ არის. ბიოსერტიფიცირება ნიშნავს წარმოების მეთოდზე დაკვირვებას.

ყველაზე ხშირად მოგვმართავენ ღვინოზე, მაგრამ ყველაზე წარმატებული ევროკავშირში ექსპორტის თვალსაზრისით ველური ხილია: ძირტკბილა, მოცვი,  ჭინჭარი, ველური ვაშლი, რისგანაც ჩირს აკეთებენ, გირჩები“, – ამბობს დავით ბედოშვილი.

„კავკასსერტისთვის“ ბიოსერტიფიკატის მისაღებად უახლოეს მომავალში მიმართვას გეგმავს 25 წლის ბექა ფოფხაძეც, რომელსაც ალაზნის მარჯვენა ველზე ჰექტარნახევარზე ვენახი აქვს. ჩვენთან ინტერვიუში ბექა ამბობს, რომ მისი ვენახის მახლობლად ბიომეურნეობა არავის აქვს, უფრო მეტიც, ხშირად არც არაფერი სმენიათ ბიოპროდუქტების შესახებ, მან კი უკვე წინასწარ იცის, რომ რამდენიმე წელიწადში ნატურალურ ქართულ ღვინოს ევროპის ბაზარზე გაყიდის.

„შხამქიმიკატებს იმდენად ცუდი შემცველობა აქვს, რომ ღვინო არ იწმინდება,  მუდმივად აქვს ლექი.  რა რესურსიც  ყურძენს აქვს, იმის შესაბამის ღვინოს ვერ იღებ. უნდა ეცადო, რომ ყურძენმა საკუთარი პოტენციალი ბუნებრივად გამოამჟღავნოს და ამაში არ უნდა ჩაერიო, მით უმეტეს უარყოფითი გავლენა არ უნდა მოახდინო, ღვინოც უფრო ნატურალური  და სუფთა გამოვა. მომავალში  ბიოწარმოების გაფართოებას ვგეგმავ, მინისაწარმო მექნება. ჩემი მიზანია,  ბიოღვინო არაქართულ ბაზარზე გავყიდო, ექსპორტზე გავიტან ევროკავშირში,“ – ამბობს ფოფხაძე.

რატომ ბიომეურნეობა? ორგანული სოფლის მეურნეობის კონსულტანტი ნუკრი მემარნიშვილი ჩვენთან ინტერვიუში იმ მიზეზებზე საუბრობს, რატომაც ბიომეურნეობაზე გადასვლა, არათუ საჭირო, არამედ აუცილებელიცაა.

„ნიადაგის ნაყოფიერების ამაღლების თვალსაზრისით ძალიან მნიშვნელოვანია ორგანული სოფლის მეურნეობა, ანუ ბიო. მეორე, ქიმიური სასუქები და შხამქიმიკატები  აბინძურებს ჰაერს, წყალს, მერე ხვდება წყალში. ბიო კი პირიქით, აჯანსაღებს. მესამე, ორგანული წარმოება ნიშნავს, რომ ვუფრთხილდებით ნებისმიერი ცოცხალი ორგანიზმის ჯანმრთელობას, ქიმიური სასუქი ზედმეტი თუ მოგივიდა, ამან შეიძლება, ძალიან დააზარალოს ადამიანი, იწვევს სხვადასხვა დაავადებას,“ – ამბობს მემარნიშვილი.

გარდა ამისა, გასათვალისწინებელია კიდევ ერთ ფაქტორი –  საქართველო მცირემიწიანი ქვეყანაა, პროდუქტის წარმოება კი ძვირი უჯდება.

„ვერ ვაჯობებთ თუნდაც ჩვენს მეზობელ თურქეთს, ის ქიმიურ სასუქებს თავად აწარმოებს, იაფი უჯდება პროდუქტის წარმოება, მეტი მოსავალი აქვს, ნაკვეთებიც უფრო დიდია, ჩვენთვის გამოსავალი ერთადერთია, სადაც მოთხოვნა აჭარბებს მიწოდებას, ეს არის ბიოპროდუქცია. ეს ნიშა თავისუფალია, მარტივად შეგვიშვებენ, ჩვენი კლიმატური პირობებიც ხელს უწყობს ამას. საჭიროა შესაბამისი პროგრამები, რომელიც იქნება გათვლილი რამდენიმე წელზე. ფერმერს სჭირდება სტიმულირება, როგორც უცხოეთში ხდება. რაღაც მოძრაობები არის, არსებობს იდეა, რომ გაიხსნას სასწავლებელი, სადაც ფერმერებს გადაამზადებენ, თუმცა ბიოწარმოების ხელშეწყობა სახელმწიფო დონეზე არ არის დაძრული“,  – ამბობს მემარნიშვილი eugeorgia.info-სთან ინტერვიუში.

რა სახის დახმარებას სთავაზობს სახელმწიფო ფერმერს, რომელიც ბიომეურნეობაზე გადასვლას გადაწყვეტს? – სოფლის მეურნეობის სამინისტროში გვიპასუხეს, რომ იგეგმება  მასერტიფიცირებელი ორგანოს შექმნა.

„ბიოპროდუქტს სერტიფიკატი თუ არ მოჰყვება, აზრი არა აქვს, მასერტიფიცირებელი ორგანო კი მხოლოდ ერთია, მონოპოლისტი – „კავკასსერტი“. ინსპექტირებისა და სერტიფიკატის გადასახადი ძალიან მაღალია, ამიტომ საშუალო მეწარმეებს  ხშირად არ უღირთ, იმდენად ძვირია. ჩვენი მიზანია, შეიქმნას შესაბამისი ორგანო, რომელიც სახელმწიფო უწყების დაქვემდებარების ქვეშ იქნება და გასცემს სერტიფიკატებს, პირველ ეტაპზე სიმბოლური ფასი უნდა  გადაიხადონ ფერმერებმა, რომ წელში გაიმართონ, სტიმული მიეცეთ. ასევე,  მნიშვნელოვანია, რომ ბიოპრეპარატებს ჩვენს საცდელ ნაკვეთზე ვცდით, გასულ წელს შესანიშნავი შედეგები მივიღეთ, წელსაც 7 ბიოპრეპარატი უნდა გამოვცადოთ, რის საფუძველზეც ფერმერებს რეკომენდაციებს ვაძლევთ,“ – ამბობს სოფლის მეურნეობის სამინისტროს ბიოაგროწარმოების სამსახურის მთავარი სპეციალისტი რუსუდან ბარკალაია.

სოფლის მეურნეობის სამინისტროს ინიციატივას  მასერტიფიცირებელი ორგანოს შექმნის შესახებ „კავკასსერტშიც“ ეხმაურებიან.

„ამის საწინააღმდეგო არაფერი გვაქვს. ჩვენ არ ვართ ერთადერთი ორგანო, კიდევ რამდენიმე უცხოური კომპანიაა დარეგისტრირებული, რომლებსაც  სხვადასხვა პროექტი აქვთ, თუმცა ბევრი კლიენტი არ ჰყავთ. იქ შედარებით მაღალი ფასებია, რადგან ჩვენს ინსპექტორს ევროკავშირიდან ჩამოყვანა არ სჭირდება. მოლოდინი არ მაქვს, რომ ისინი უფრო იაფად გააკეთებენ სერტიფიცირებას, თუ, რა თქმა უნდა, სუბსიდირებული არ იქნებიან, ასეთ შემთხვევაში უფრო იაფად გასცემენ სერტიფიკატს, მაგრამ ჩვენ კონკურენციის გაწევა გაგვიჭირდება“, – ამბობს ბედოშვილი.

არაერთი საერთაშორისო კვლევის თანახმად, მსოფლიოში ბიოპროდუქტებზე მოთხოვნა ძალიან სწრაფად იზრდება. საერთაშორისო ორგანიზაციების პროგნოზით, ბიოპროდუქტების გლობალური ბაზარი 2018 წლისთვის 700,7 მილიარდ დოლარს მიაღწევს.

ხატია შამანაური

რა არის დისკრიმინაცია?

დისკრიმინაცია (ლათ. Discriminatio – განსხვავება) – ნიშნავს რაიმე ნიშნით განსხვავებული პირის ან პირთა ჯგუფის მიმართ უთანასწორო მოპყრობას ან უპირატესობის მინიჭებას. დისკრიმინაციად ითვლება როგორც არსებითად თანასწორ პირთა მიმართ უთანასწორო მოპყრობა, ასევე პირიქით, არსებითად უთანასწორო პირთა მიმართ თანასწორი მოპყრობა. დისკრიმინაცია შეიძლება იყოს რასობრივი, რელიგიური, ეთნიკური, ეროვნული, გენდერული, სექსუალური ორიენტაციის, სოციალური კუთვნილების, ოჯახური მდგომარეობის, შეზღუდული შესაძლებლობის, პოლიტიკური ან სხვა შეხედულების ან სხვა ნიშნის გამო.

დისკრიმინაცია შესაძლებელია გათვალისწინებული იყოს კანონით (დე იურე – სამართლებრივი დისკრიმინაცია), ან მხოლოდ და მხოლოდ გაბატონებულ მორალურ ნორმებს ეფუძნებოდეს – დე ფაქტო.

აკრძალულია თუ არა დისკრიმინაცია საქართველოში?

საქართველოს კონსტიტუციის მე-14 მუხლი განმარტავს, რომ ყველა ადამიანი დაბადებით თავისუფალია და კანონის წინაშე თანასწორია განურჩევლად რასისა, კანის ფერისა, ენისა, სქესისა, რელიგიისა, პოლიტიკური და სხვა შეხედულებებისა, ეროვნული, ეთნიკური და სოციალური კუთვნილებისა, წარმოშობისა, ქონებრივი და წოდებრივი მდგომარეობისა, საცხოვრებელი ადგილისა.

კონსტიტუციის მე-14 მუხლში დისკრიმინაციის კონკრეტული ნიშნებია მითითებული, მიუხედავად ამისა,  საქართველოს საკონსტიტუციო სასამართლომ განმარტა, რომ კონსტიტუცია კრძალავს და იცავს ადამიანებს ნებისმიერი საფუძვლით დისკრიმინაციისაგან და მე-14 მუხლში  ჩამოთვლილი ნიშნები არ არის ამომწურავი.

მაგალითად, დისკრიმინაციად შესაძლებელია განვიხილოთ მოქალაქეობის, შეზღუდული შესაძლებლობების, აზრის და სხვა ნიშნით პირთა მიმართ უთანასწორო, უსამართლო მოპყრობა.

კონსტიტუციისგან განსხვავებით დისკრიმინაციის ნიშნებს ფართოდ განმარტავს 2015 წლის 2 მაისს საქართველოს პარლამენტის მიერ მიღებული კანონი „დისკრიმინაციის ყველა ფორმის აღმოფხვრის შესახებ“. კანონის მიზანია დისკრიმინაციის ყველა ფორმის აღმოფხვრა და ნებისმიერი ფიზიკური და იურიდიული პირისათვის საქართველოს კანონმდებლობით დადგენილი უფლებებით თანასწორად სარგებლობის უზრუნველყოფა.

დისკრიმინაციისთვის საქართველოს კანონმდებლობა პასუხისმგებლობის უკიდურეს ზომას – სისხლისსამართლებრივ პასუხისმგებლობასაც ითვალისწინებს. სისხლის სამართლის კოდექსის 142-ე მუხლით სისხლის სამართლებრივი წესით ისჯება დისკრიმინაციის რაიმე ნიშნის მიხედვით „ადამიანთა თანასწორუფლებიანობის დარღვევა“. ამავე კოდექსის 1421 მუხლი კი უფრო მკაცრ სისხლისსამართლებრივ პასუხისმგებლობას აწესებს „რასობრივი დისკრიმინაციისთვის“. თუმცა, დისკრიმინაცია რომ სისხლის სამართლის წესით დაისაჯოს, ორივე შემთხვევაში ქმედებამ უნდა გამოიწვიოს უფლების არსებითი ხელყოფა.

ვინ შეიძლება განახორციელოს დისკრიმინაცია?

დისკრიმინაციის წყარო შესაძლებელია იყოს სახელმწიფო თავისი დისკრიმინაციული კანონმდებლობით. ასევე, სახელმწიფო მმართველობის თუ თვითმმართველობის დაწესებულებები.

დისკრიმინაცია შესაძლებელია განახორციელოს ნებისმიერმა კერძო სამართლის სუბიექტმა/დაწესებულებამ და ფიზიკურმა პირმა.

ვინ შეიძლება გახდეს დისკრიმინაციის მსხვერპლი?

საქართველოს კონსტიტუციის მე-14 მუხლის სუბიექტია „ყველა ადამიანი“. ამასთანავე, კონსტიტუციის 45-ე მუხლი განმარტავს, რომ კონსტიტუციაში მითითებული ძირითადი უფლებანი და თავისუფლებანი, მათი შინაარსის გათვალისწინებით, ვრცელდება აგრეთვე იურიდიულ პირებზე. შესაბამისად, იურიდიული პირიც შეიძლება გახდეს დისკრიმინაციის მსხვერპლი რაიმე ნიშნის მიხედვით მისდამი განსხვავებული მოპყრობის გამო.

მაგალითად, რელიგიური ორგანიზაციები, რომლებიც თავისი შეხედულებისამებრ რეგისტრირდებიან საჯარო სამართლის (სსიპ) ან არასამეწარმეო არაკომერციულ  იურიდიულ პირებად (ააიპ) რეგისტრირდებიან სახელმწიფოს მხრიდან მათდამი განსხვავებული რეგულაციის დაწესებით შესაძლოა განხილულ იქნეს დისკრიმინაციად.

რა ფორმით შეიძლება მოხდეს პირის დისკრიმინაცია?

პირის დისკრიმინაცია შესაძლებელია განხორციელდეს როგორც სახელმწიფოს/საჯარო დაწესებულებების წარმომადგენლების, ასევე სხვა კერძო პირების მიერ. არსებობს დისკრიმინაციის ორი ფორმა – პირდაპირი და ირიბი.

პირდაპირი დისკრიმინაცია არის ისეთი მოპყრობა ან პირობების შექმნა, რომელიც პირს დადგენილი უფლებებით სარგებლობისას დისკრიმინაციის რომელიმე ნიშნის გამო არახელსაყრელ მდგომარეობაში აყენებს ანალოგიურ პირობებში მყოფ სხვა პირებთან შედარებით.

მაგალითად, პირდაპირია დისკრიმინაცია თუ კანონი პირდაპირ და გაუმართლებლად ზღუდავს რასის, კანისფერის, სქესის, ეროვნული თუ ეთნიკური წარმომავლობის და სხვა ნიშნით პირთა მონაწილეობას პოლიტიკურ თუ საზოგადოებრივ ცხოვრებაში. აგრეთვე, თუ იზღუდება უცხო ქვენის მოქალაქეთა და მოქალაქეობის არმქონე პირების სოციალურ-პოლიტიკური და კულტურული უფლებები.

ირიბი დისკრიმინაცია არის ისეთი მდგომარეობა, როდესაც ფორმით ნეიტრალური და არსით დისკრიმინაციული დებულება, კრიტერიუმი ან პრაქტიკა პირს რომელიმე ნიშნის გამო არახელსაყრელ მდგომარეობაში აყენებს ანალოგიურ პირობებში მყოფ სხვა პირებთან შედარებით.

რუბრიკის მომზადება შესაძლებელი გახდა ამერიკელი ხალხის გულუხვი დახმარების წყალობით, რომელიც აშშ-ს საერთაშორისო განვითარების სააგენტოს (USAID) მეშვეობით იქნა გაწეული. შინაარსზე პასუხისმგებელია „საქართველოს დემოკრატიული ინიციატივა“, ის შეიძლება არ ასახავდეს აღმოსავლეთ-დასავლეთის მართვის ინსტიტუტის, USAID ან აშშ-ის მთავრობის შეხედულებებს.

რჩევების სერია საზოგადოებას, როგორ ამოვიცნოთ პროპაგანდისტული ტექსტი მედიასაშუალებებში?

ტექნოლოგიურმა განვითარებამ კიდევ უფრო გაზარდა ადამიანის ინფორმაციაზე დამოკიდებულების ხარისხი. დღეს უკვე არავის უჩნდება შეკითხვა, რაში სჭირდება სწორი და გადამოწმებული ინფორმაცია, რადგან ყველამ ვიცით, რომ ინფორმაციის სიზუსტე მნიშვნელოვანია, როგორც გლობალური გადაწყვეტილებების მიღებისას, ასევე, ნებისმიერი საყოფაცხოვრებო საქმიანობის წარმართვის პროცესში.

მაქსიმალური ზიანის მოყენება შეუძლია უცხო ქვეყნის შესაბამისი სტრუქტურების მიერ წარმოებულ პროპაგანდისტულ საქმიანობას, რომლის წინააღმდეგ თითოეული ბრძოლა, თითოეული ჩვენგანისთვის დადებითი შედეგების მომტანია. პროპაგანდასთან დაპირისპირების ყველაზე საუკეთესო მეთოდს კი, მოსახლეობის ინფორმირება წარმოადგენს. იბადება კითხვა, როგორ გავარჩიოთ, როდის გვაქვს საქმე პროპაგანდასთან და როდის ხდება ჩვენი ინფორმირება პროპაგანდისგან დასაცავად?

სანდო და ანონიმური წყაროები

გადაამოწმეთ სანდო წყაროსთან – აღნიშნული ხერხი გულისხმობს მოსმენილი ან წაკითხული ინფორმაციის დაზუსტებას  სანდო, შესაბამისი ცოდნისა და განათლების მქონე ადამიანებთან. რაც მეტ წყაროსთან გადაამოწმებთ ინფორმაციას, მით მეტად იქნებით დაცული. თუ თქვენ წაიკითხავთ, რომ პენსია ან ხელფასი იზრდება ამის საუკეთესო გადამოწმების გზა სოციალური დახმარების ან ხელფასის გამცემი ორგანოს თანამშრომელია, რომელიც არ მოგცემთ ცრუ დაპირებას და შეეცდება არ შეგიყვანოთ შეცდომაში.

არ ენდოთ ანონიმურ წყაროებს – პროპაგანდისტთა ერთ-ერთ საყვარელ მეთოდს წარმოადგენს ინფორმაციის იმგვარი გავრცელება, როცა მოცემული ფაქტების და ცნობების დასადასტურებლად იყენებენ ეგრეთწოდებულ ავტორიტეტულ წყაროებს, მაგალითად: „მეცნიერებმა კვლევების საფუძველზე დაადგინეს, რომ…„ავტორიტეტულმა ექსპერტებმა განაცხადეს… მთავრობასთან დაახლოებულმა წყარომ გვაცნობა…“ და ა.შ.  თუმცა, შემდეგ სტატიის კითხვისას აღმოვაჩენთ, რომ არსად არის მითითებული თუ ვინ არიან ეს „მეცნიერები“ ან როდის და რომელი ორგანიზაციის დაკვეთით ჩაატარეს „კვლევა, არ ჩანს თუ ვინ არის ავტორიტეტული „ექსპერტი“ და აქვს თუ არა მას ის კვალიფიკაცია და ცოდნა, რაც კონკრეტულ სფეროში მიმდინარე პროცესების შეფასებას ესაჭიროება. მოკლედ, ბევრი რომ არ გავაგრძელოთ, ანონიმურ წყაროებზე დაყრდნობით გავრცელებული ინფორმაციის 98% სწორედ პროპაგანდის ნიმუშია და ასეთი ინფორმაციის საფუძველზე მიღებული გადაწყვეტილება კარგს არაფერს მოგვიტანს.

დავით ძიძიშვილი
თავდაცვის დაგეგმვისა და
პოლიტიკის დეპარტამენტი

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

„ჩემთვის ძალიან მნიშვნელოვანია, რაც შეიძლება მეტად დავუდგეთ გვერდით ქართველ სამხედრო მოსამსახურეებს, რაც შეიძლება მეტი მხარდაჭერა გამოვხატოთ. ეს მხარდაჭერა იყოს ქმედითი, ეფექტიანი. ჩვენი სამხედროები უნდა გრძნობდნენ ყოველდღიურ ცხოვრებაში, რომ ქართველი საზოგადოების ყველა სეგმენტი მათ გვერდით დგას. ქართული ჯარი არ არის მხოლოდ საქართველოს ხელისუფლების საზრუნავი, მასზე უნდა ზრუნავდეს მთელი საზოგადოება. ამიტომ, განსაკუთრებული მადლობა მინდა გადავუხადო „საქართველოს ბანკს, ყველა იმ კომპანიას, რომელმაც მხარდაჭერა გამოხატა თავდაცვის სამინისტროს მიერ წამოწყებული კამპანიის მიმართ. ჩვენ ე.წ. „ჯარის ბარათები“ – ARMY CARD  შევქმენით, რომლითაც სამხედრო მოსამსახურეებს ვეუბნებით – „მადლობა სამსახურისთვის. მადლობა სამსახურისთვის გამოიხატება კონკრეტულ შეღავათებში, ფასდაკლებებში. ამ კამპანიაში უკვე 25 კომპანია ჩაერთო კუთვნილ ბიზნესსაწარმოებში შეღავათების დაწესებით. დიდი იმედი მაქვს, რომ კიდევ უფრო მეტი ქართველი ბიზნესმენი შემოუერთდება ამ ინიციატივას. არ არსებობს არც ერთი ბრძოლა დედამიწის ზურგზე, რომელიც ჯარს მარტოს მოუგია, საზოგადოების მხარდაჭერა, სოლიდარობა არის ყოველთვის დიდი მოტივაცია ჯარისკაცებისთვის. ასეთი კამპანიები, ბუნებრივია, მათ ეხმარებათ იმაში, რომ მშვიდად ჰყავდეთ ოჯახები, თავად კი ემსახურონ ქვეყანას, – განაცხადა თინათინ ხიდაშელმა თავდაცვის სამინისტროს ახალ პროექტზე, რომელიც საქართველოს შეიარაღებული ძალების წარმომადგენლებისთვის ახალი უნიკალური სახელფასო ბარათის შექმნას გულისხმობს.

პროექტში უკვე ჩართულმა ბიზნესკომპანიებმა კიდევ ერთხელ დაადასტურეს, რომ მათ ზუსტად ესმით სამხედრო-სამოქალაქო თანამშრომლობის მნიშვნელობა, რომ ჯარი და საზოგადოება ერთმანეთის განუყოფელი ნაწილია. თითოეული ორგანიზაცია თუნდაც მოკრძალებული წვლილით ამტკიცებს, რომ ქვეყნის თავდაცვა თითოეული მოქალაქის საპატიო ვალია. პროექტში მათი მონაწილეობა არის მოტივაცია და სტიმული ჩვენი ჯარისკაცებისთვის. მტკიცე დასტური იმისა, რომ საზოგადოება სათანადოდ აფასებს მათ უმნიშვნელოვანეს წვლილს ქვეყნის უსაფრთხოების საქმეში.

საქართველოს ბანკმა თავდაცვის სამინისტროს, მისი სტრუქტურული ერთეულების, საჯარო სამართლის იურიდიული პირების თანამშრომლებისა და მათი მეუღლეებისთვის სადებეტო სპეციალური ბარათი – ARMY CARD – ექსკლუზიური ფასდაკლებებითა და პირობებით შექმნა: ფასდაკლებები სხვადასხვა სავაჭრო ობიექტში, მათ შორის კვების, სააფთიაქო და ბენზინგასამართ სადგურებზე, საყოფაცხოვრებო ტექნიკის მაღაზიებში, სპორტულ-გამაჯანსაღებელ, კულტურულ და საგანმანათლებლო დაწესებულებებში, ამასთან, ბარათით შესაძლებელია საზოგადოებრივ ტრანსპორტში მგზავრობის საფასურის გადახდა.  მნიშვნელოვანია, რომ ARMY CARD-ით გადახდისას (ყოველი გადახდისას კი გარკვეული თანხა ე.წ. Cash Back-ის სახით უკან დაუბრუნდებათ) თავდაცვის სამინისტროს თანამშრომლები და მათი მეუღლეები საქართველოს ბანკისგან თანხის დაბრუნების შესახებ შეტყობინებას  გადახდის მომენტისას მიიღებენ,  ასევე, ყოველი თვის ბოლოს დანაზოგის სრული ოდენობის შესახებ ეცნობებათ. ვინაიდან ბარათი ექსკლუზიურად სამხედრო თემატიკაზე შეიქმნა, ARMY CARD გამოირჩევა უნიკალური დიზაინით. ბარათის მოქმედების ვადა 4 წელია და ის თავდაცვის სამინისტროს თანამშრომლებს და მათ მეუღლეებს უფასოდ გადაეცემათ.

თავდაცვის სამინისტრო მადლობას უხდის თითოეულ ორგანიზაციას, რომელიც უკვე ჩაერთო ან, მომავალში ჩაერთვება ამ მნიშვნელოვან პროექტში. ძლიერი შეიარაღებული ძალებისა და გაცილებით მაღალი თავდაცვისუნარიანობის მქონე სახელმწიფოს შენებაში მათი წვლილი ფასდაუდებელია.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

საქართველოს ტერიტორიული მთლიანობისთვის გამართულ ბრძოლებსა და საერთაშორისო ოპერაციებში დაჭრილმა სამხედრო მოსამსახურეებმა აშშ-ში, ქალაქ ორლანდოში, გაერთიანებული სამეფოს პრინცის, მისი აღმატებულება პრინც ჰარის პატრონაჟით გამართულ „ძლიერთა თამაშებში“ (Invic­tus Games 2016) მიიღეს მონაწილეობა და გამარჯვებულები დაბრუნდნენ.  საერთაშორისო შეჯიბრება 8-12 მაისს უოლტ დისნეის ESPN  სპორტულ კომპლექსში გაიმართა.

ქართველი მებრძოლებისგან დაკომპლექტებულმა ნაკრებმა საერთაშორისო შეჯიბრება – „ძლიერთა თამაშებში“ გუნდური მესამე ადგილი დაიკავა. 100-მეტრიან დისტანციაზე სირბილში ვერცხლის მედალი სერჟანტმა გიორგი ბოჭორიშვილმა აიღო. მჯდომარე ფრენბურთში კი, საქართველოს თავდაცვის სამინისტროს დაჭრილ და დაშავებულ სამხედრო მოსამსახურეთა გუნდმა ბრინჯაოს მედალი მოიპოვა.

გარდა ამისა, სპონსორმა კომპანიებმა LAND ROVER-ის ჯილდო, The Land Rov­er Above and Beyond Award, საქართველოს თავდაცვის სამინისტროს მჯდომარე ფრენბურთის გუნდს გადასცეს. როგორც საერთაშორისო თამაშების ორგანიზატორებმა და სპონსორებმა აღნიშნეს, იმის დასტურად, რომ ქართველთა ასპარეზობამ გაუტეხელი ხასიათი, მებრძოლი სული და ურთიერთთანადგომა მთელს მსოფლიოს დაანახვა. რაც „ძლიერთა თამაშების“ სულისკვეთებას ზუსტად გამოხატავს.

ამ თამაშებზე ჩვენმა ბიჭებმა დაამტკიცეს, რომ არ არსებობს შეზღუდული შესაძლებლობები, არ არსებობს მიზანი, რომელსაც ვერ მიაღწევ, მთავარია მოინდომო, მთავარია ძალიან გინდოდეს და მთავარია მოემზადო ამ მიზნისთვის. დიდი მადლობა ამ გამძლეობისთვის, დიდი მადლობა გამარჯვების ჟინისთვის, რომელიც აჩვენეთ, და ის სამაგალითოა მთელი ქვეყნისთვის, სამაგალითოა ყველა ჩვენგანისთვის, სამაგალითოა სამხედრო მოსამსახურეებისთვის და დანარჩენი საქართველოსთვის“ – აღნიშნა თინათინ ხიდაშელმა.

ნაკრების კაპიტანი მაიორი ბესარიონ ღუდუშაური აღნიშნავს, რომ „ძლიერთა თამაშებზე“ ასპარეზობა დიდი წარმატებაა, როგორც თითოეული სპორტსმენისთვის, აგრეთვე საქართველოსთვის. „ჩამოვიტანეთ 14 მედალი, მათ შორის 13 მჯდომარე ფრენბურთში ბრინჯაოს მედლები და ერთი ვერცხლი 100-მეტრიან დისტანციაზე სირბილში. აგრეთვე დაგვაჯილდოეს  LAND ROVER-ის დაწესებული პრიზით, რომელიც გადმოგვეცა საბრძოლო სულისკვეთებისთვის. ჩვენთვის წარმატებული შეჯიბრება იყო, საქართველო ვასახელეთ და შევეცდებით, მომავალში ოქროც ჩამოვიტანოთ.“

მედალოსან 14 სამხედრო მოსამსახურეს აეროპორტში საქართველოს თავდაცვის მინისტრის მოადგილეები – ანა დოლიძე, ბესიკ ლოლაძე და შეიარაღებული ძალების გენერალური შტაბის უფროსის მოადგილე, პოლკოვნიკი ნიკოლოზ აგლაძე, ასევე სტუდენტები და ოჯახის წევრები დახვდნენ. “ჩვენი დაჭრილი სამხედროების გამარჯვება არის უდიდესი მნიშვნელობის, ისინი არიან მაგალითები ჩვენი დაჭრილი სამხედროებისთვის, მაგალითები არიან ყველასთვის, ვინც შეიძლება ერთი წამით დაფიქრდეს საკუთარ შესაძლებლობებზე, ჩვენ ვაჩვენეთ არაჩვეულებრივი შედეგი, ინდივიდუალურადაც, სხვადასხვა სპორტის სახეობაში და როგორც გუნდმა, ჩვენ ვართ თანაბარ საფეხურზე ამერიკის შეერთებულ შტატებთან, დიდ ბრიტანეთთან, უდიდეს ქვეყნებთან. ყველაზე მნიშვნელოვანი ის არის, რომ ყველა ადამიანს მიუხედავად თავისი მდგომარეობისა, დაჭრილს, მათ შორის დაშავებულ სამხედროებს, შეუძლიათ, საკუთარი შესაძლებლობებით მიაღწიონ უდიდეს შედეგს და მოგვცენ საფუძველი, ვიამაყოთ ყველამ მათი წარმატებით. _ განაცხადა თავდაცვის მინისტრის მოადგილე ანა დოლიძემ. სპორტსმენთა დელეგაციის შემადგენლობაში შედიოდა ჯგუფის ხელმძღვანელი, თავდაცვის სამინისტროს დაჭრილ და დაშავებულ სამხედრო მოსამსახურეთა მხარდაჭერის დეპარტამენტის უფროსი პაატა პატიაშვილი, რომელმაც ჩვენს შეკითხვებს უპასუხა.

დაჭრილ და დაშავებულ სამხედრო მოსამსახურეთა სპორტულ ღონისძიებებში ჩართულობისა და მონაწილეობის დაგეგმვა/ორგანიზება ხდება თავდაცვის სამინისტროს შესაბამის სამსახურებთან კოორდინაციით.“

როგორ შეაფასებდით `ძლიერთა თამაშებში~ ქართველ სამხედროთა ასპარეზობას?

პაატა პატიაშვილი: იმის გათვალისწინებით, რომ ქართველმა სამხედროებმა მოიპოვეს ბრინჯაოს მედალი გუნდურ ასპარეზობაში, კერძოდ, მჯდომარე ფრენბურთში, ვერცხლის მედალი 100 მეტრზე სირბილში და რაც მთავარია სპეციალური ჯილდო, რომელიც გადაეცა ჩვენს სამხედროებს, როგორც ყველაზე მებრძოლ და უძლეველთა თამაშების სულისკვეთების მატარებელ გუნდს, შევაფასებდი ძალიან დადებითად, რადგან გაუმჯობესდა შედეგი წინა ასპარეზობასთან შედარებით და სახეზეა ნაკრების განვითარების პოზიტიური დინამიკა. რასაკვირველია იყო ხარვეზები, რომლებიც უახლოეს პერიოდში გამოსწორდება და შემდგომ თამაშებზე თავდაცვის სამინისტრო წარდგება ბევრად უფრო მომზადებული, კიდევ უფრო მოტივირებული, რაც თავის მხრივ კიდევ უფრო გაზრდის წარმატების შანსებს.

დაჭრილ-დაშავებულ სამხედრო მოსამსახურეთა  სარეაბილიტაციო პროცესებში რა როლი აქვს დეპარტამენტს?       

პაატა პატიაშვილი: ამ ეტაპზე მიმდინარეობს პროექტი „კარდაკარ, რომლის ფარგლებშიც ხდება დაჭრილი/დაშავებული სამხედრო მოსამსახურეებისა და მათი ოჯახის წევრების გამოკითხვა, რომელიც ხელს უწყობს საჭიროებების გამოვლენას და სამომავლო სამოქმედო გეგმისთვის პრიორიტეტების განსაზღვრას, რაც ითვალისწინებს სარეაბილიტაციო პროცესის უკეთ წარმართვას სხვა სტრუქტურულ ქვედანაყოფებთან კოორდინაციით. მიმდინარეობს დაჭრილ/დაშავებულ სამხედრო მოსამსახურეებზე მორგებული/ორიენტირებული საგანმანათლებლო და სამსახურებრივი რეინტეგრაციის პროგრამების მოძიება სამხედროს მოთხოვნების, კვალიფიკაციის, უნარების და ფიზიკური შესაძლებლობების გათვალისწინებით. დაინტერესებული პირების ამა თუ იმ საგანმანათლებლო პროგრამაში ჩართვა და პროცესის მონიტორინგი; აგრეთვე რესოციალიზაციის მიზნით აქტივობების და ღონისძიებების დაგეგმვა/ორგანიზება, დაჭრილი/დაშვებული სამხედრო მოსამსახურეების და მათი სამსახურის პოპულარიზაციის მიზნით სხვადასხვა ღონისძიების დაგეგმვა, სასწავლო დაწესებულებებში ვიზიტები, ამასთან ერთად დაჭრილი/დაშავებული სამხედრო მოსამსახურეების ოჯახის წევრების კვალიფიკაციისა და განათლების გათვალისწინებით სამუშაო ადგილების მოძიება.

რა და რა სპორტის სახეობას კურირებს დეპარტამენტი დაჭრილი/დაშავებული სამხედრო მოსამსახურეთა ფიზიკური რეაბილიტაციის მიზნით?

პაატა პატიაშვილი: დაჭრილ და დაშავებულ სამხედრო მოსამსახურეთა სპორტულ ღონისძიებებში ჩართულობისა და მონაწილეობის დაგეგმვა/ორგანიზება ხდება სამინისტროს შესაბამის სამსახურებთან კოორდინაციით. ამ ეტაპზე დაჭრილი/დაშავებული სამხედრო მოსამსახურეები  ჩართულები არიან მჯდომარე ფრენბურთში, ეტლით ფარიკაობაში, კანოე-კაიაკში, მკლავჭიდში. მიმდინარეობს მოლაპარაკებები სხვადასხვა სპორტულ ფედერაციებთან სპორტის ახალი სახეობების მოზიდვის მიზნით.

დეპარტამენტის უახლოესი გეგმები როგორია?

პაატა პატიაშვილი: იგეგმება დაჭრილი/დაშავებული სამხედრო მოსამსახურეთა მხარდაჭერის ფონდის დაკომპლექტება, რომლის გამგეობის წევრების 1/3 იქნება დაჭრილი/დაშავებული სამხედრო მოსამსახურეების მიერ შერჩეული პირები; დაჭრილი/დაშავებული სამხედრო მოსამსახურეების დამატებით სპორტულ ღონისძიებებში ჩართვა ჯანმრთელობის მდგომარეობის გათვალისწინებით; დაჭრილი/დაშავებული სამხედრო მოსამსახურეების რეინტეგრაციის პროცესის უკეთ წარმართვის მიზნით ბრძანება 360-ზე მუშაობა და საერთაშორისო პარტნიორებთან აქტიური მუშაობა, როგორც დაფინანსების, ასევე სხვადასხვა სახის მხარდაჭერის მოპოვების მიზნით.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ-ფოსტა: stratcom@mod.gov.ge;
ვებ-გვერდი: mod.gov.ge

11 მაისს ვაზიანის სამხედრო აეროდრომზე ქართულ-ამერიკული სწავლების – „ღირსეული პარტნიორი 2016“-ის გახსნის ოფიციალური ცერემონიალი გაიმართა. ღონისძიება ეროვნული გვარდიის სამხედრო-საჩვენებლი ორკესტრის მიერ აშშ-ის, დიდი ბრიტანეთისა და საქართველოს სახელმწიფო ჰიმნების შესრულებით დაიწყო.

ქართველ, ამერიკელ და ბრიტანელ სამხედროებს სიტყვით მიმართა საქართველოს პრეზიდენტმა გიორგი მარგველაშვილმა, თავდაცვის მინისტრმა თინათინ ხიდაშელმა, გენერალური შტაბის უფროსმა, გენერალ-მაიორმა ვახტანგ კაპანაძემ, აშშ-ის ელჩის მოვალეობის შემსრულებელმა ნიკოლას ბერლინერმა და დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩმა საქართველოში ალექსანდრა ჰოლ ჰოლმა. მათ ერთობლივი წვრთნების საქართველოში ჩატარების მნიშვნელობაზე გაამახვილეს ყურადღება და სამხედროებს წარმატებები უსურვეს. ცერემონიალს საქართველოს პრემიერ-მინისტრი გიორგი კვირიკაშვილი, აღმასრულებელი და საკანონმდებლო ხელისუფლების წარმომადგენლები და საქართველოში აკრედიტებული დიპლომატიური კორპუსი დაესწრნენ.

_ ბატონო პრეზიდენტო, ბატონო პრემიერ-მინისტრო, გენერლებო, ოფიცრებო, კაპრალებო, რიგითებო, პატივცემულო ელჩებო, კოლეგებო, ქალბატონებო და ბატონებო! ჩემთვის დიდი პატივია, მოგესალმოთ დღეს ვაზიანში, თანამედროვე საქართველოს ისტორიაში, ყველაზე მასშტაბური და ისტორიული სწავლების გახსნის ცერემონიალიდან განაცხადა საქართველოს თავდაცვის მინისტრმა  თინა ხიდაშელმა.

„დღეს ძალიან მნიშვნელოვანი დღეა, სწორედ ასეთ დღეებში იქმნება ისტორიის საინტერესო ფურცლები. ასეთ დროს იბადება რწმენა, ჭეშმარიტი თანამშრომლობის, პარტნიორობის, ერთად დგომის და ამისთვის ძალიან დიდი მადლობა ჩვენს პარტნიორებს – ამერიკელ და ბრიტანელ სამხედრო მოსამსახურეებს და მათ ხელმძღვანელებს, ვინც მიიღო გადაწყვეტილება, დღეს ეს სწავლება საქართველოში ჩატარებულიყო.

ბატონებო, დღეს, 11 მაისს 2 კონტინენტზე გაისმა საქართველოს, ამერიკის შეერთებული შტატების და ბრიტანეთის სახელმწიფო ჰიმნები. სიმბოლურია, რომ დღეს აქ, ვაზიანში, „ღირსეული პარტნიორის“ ფარგლებში, წვრთნების გახსნაზე ჩვენ სამი ქვეყნის შეიარაღებული ძალების მებრძოლებს სწორება აქვთ ამ სამი ძალის დროშებზე და აქედან შორს, ამერიკის შეერთებულ შტატებში „ძლიერთა თამაშებზე, ასევე, სწორედ, ამ სამი სახელმწიფოს, საქართველოს ამერიკის შეერთებული შტატების და დიდი ბრიტანეთის სახელმწიფო ჰიმნები ისმოდა, სახელმწიფო დროშები ფრიალებდა გამარჯვებულების კვარცხლბეკებთან. მინდა, ამ ტრიბუნიდან და, სწორედ, ამ დღეს მივულოცო ჩვენს ბიჭებს ძალიან დიდი წარმატება „ძლიერთა თამაშებში. მინდა, მადლობა გადაუხადო მათ გამძლეობისთვის, მინდა, მადლობა ვუთხრა იმ ძალიან მნიშვნელოვანი საქმისთვის, რომელსაც ისინი ემსახურებიან, სიძლიერის დემონსტრირებისთვის, ჩვენებისთვის, რომ არაფერია შეუძლებელი, თუ ძალიან მოინდომებ; არ არსებობს წინაღობა, რომელსაც ვერ გადალახავ. საქართველო პატარა ქვეყანაა, პატარა ქვეყანა დიდი მონდომებით და კიდევ უფრო მეტი შემართებით. საქართველო ქვეყანაა, რომელიც მზად არის ყველა გამოწვევის მისაღებად და ღირსეულად გასამკლავებლად. და „ძლიერთა თამაშებზე“ ჩვენმა გუნდმა, ეს დაამტკიცა. სწორედ, ეს აჩვენა საუკეთესოდ.

ქალბატონებო და ბატონებო, თქვენი ნებართვით, განსაკუთრებით მინდა მივესალმო ჩვენს ახალგაზრდებს, რომლებიც აქ, ჩვენ მარცხნივ დგანან, რომლებიც დღეს შემოუერთდნენ ამ ღონისძიებას და რომლებიც ჩვენთან ერთად, მთელ საქართველოსთან ერთად მონაწილეობენ ამ ძალიან მნიშვნელოვან დღესასწაულში.

ორი ძალიან კარგი ამბავი მინდა გითხრათ, ერთზე პრეზიდენტმა უკვე ისაუბრა – საქართველო აუცილებლად გახდება ნატოს წევრი, აუცილებლად გახდება ამ ერთობის, დემოკრატიული ქვეყნების ოჯახის წევრი. ზუსტად ისე, როგორც ლიტვა და ლატვია, ზუსტად ისე, როგორც ალბანეთი და მონტენეგრო და ზუსტად ისე, როგორც ორად გაყოფილი გერმანია, თავის დროზე – ერთიანი, თავისუფალი, დემოკრატიული საქართველო, თავის შეიარაღებული ძალებით.

რატომ არის ეს წვრთნები ასეთი მნიშვნელოვანი და განსაკუთრებული? – ძალიან ბევრი მიზეზია ამისთვის, მაგრამ მათ შორის, ერთ-ერთი მთავარი მიზეზი ისიც არის, რომ, სწორედ, ამ სწავლების დასრულების შემდეგ საქართველოს პირველად ეყოლება სერტიფიცირებული ნატოს რეაგირების ძალების შენაერთი. პირველი ნატოს ოფიციალური შენაერთი ნატოს სამკლავურებით და ესეც არის ერთ-ერთი მნიშვნელოვანი მომენტი, რომელიც ამ სწავლებას თან გასდევს და რომელიც მის მნიშვნელობას კიდევ უფრო მაღლა სწევს.

მეორე კარგი ამბავი კი ის არის, რომ ეს ახალგაზრდები, რომელებიც დღეს შემოუერთდნენ სწავლებას, არიან საუკეთესო გზავნილნი მტრისთვის და მოყვრისთვის, აგრესორისთვის და პარტნიორისთვის, რომ აქ, ამ მიწაზე, არასოდეს იქნება ხელისუფლება, რომელიც ოკუპაციას შეეგუება. აქ, ჩვენს სამშობლოში არასდროს დახვდებიან აგრესორს გაშლილი დროშებით. აქ, საქართველოში, სწორედ, ეს თაობა უზრუნველყოფს, რომ ჩვენი არჩევანი, ჩვენი ევრო-ატლანტიკური არჩევანი ურყევი და შეუცვლელი იყოს. თაობებს გაჰყვება ეს მიმართება, ეს შემართება, თაობებს გაჰყვება ეს მცდელობა და საქართველო აუცილებლად გახდება ამ ოჯახის წევრი, – განაცხადა თინა ხიდაშელმა.

თავდაცვის მინისტრ თინათინ ხიდაშელის ინიციატივით ქართულ-ამერიკული სამხედრო სწავლება Noble Partner 2016-ის გახსნის ცერემონიალს საქართველოში აკრედიტებული უმაღლესი სასწავლო დაწესებულებების სტუდენტებიც დაესწრნენ. წვრთნების ოფიციალურად დაწყების ცერემონიალს უმაღლესი სასწავლო დაწესებულების 400-ზე მეტი სტუდენტი დაესწრო.

ქართულ-ამერიკული სწავლება „ღირსეული პარტნიორი 2016-ის გახსნის ცერემონიალი საჩვენებელი სწავლებით გაგრძელდა. საქართველოში წელს მეორედ ტარდება და ქართული ასეულის ნატოს სწრაფი რეაგირების ძალებში (NRF) მონაწილეობისთვის მზადყოფნის ამაღლებასა და თანამშრომლობის გაღრმავებას, სტაბილურობის, თავდაცვა/შეტევით ოპერაციებში უნარ-ჩვევების გაუმჯობესებას, ასევე აშშ-ის, დიდი ბრიტანეთისა და საქართველოს შეიარაღებული ძალების ურთიერთთავსებადობის გაძლიერებას ისახავს მიზნად.

სწავლების სცენარი სტაბილურობის, შეტევა/თავდაცვის ოპერაციებს ემყარება. ქართულ-ამერიკულ სწავლებაში 1300 სამხედრო მოსამსახურე მონაწილეობს – მათ შორის 500 ქართველი, აშშ-ის არმიის ევროპული სარდლობის 650 და 150 ბრიტანელი.

აღნიშნულ სწავლებაში, პირველად საქართველოს შეიარაღებული ძალების ისტორიაში, M1A2 ტიპის ამერიკულ ტანკ „აბრამსებს“ გამოიყენებენ. წვრთნაში ჩართული იქნება ასევე ქვეითთა საბრძოლო მანქანა „ბრედლი“, სამედიცინო საევაკუაციო და სამეთაურო-საშტაბო ჯავშანმანქანები, ჰამერის ტიპის ჯიპები, C-130 ტიპის ამერიკული სამხედრო თვითმფრინავი და სხვა აღჭურვილობა. აშშ-ის არმიის ეროვნული გვარდიის ტანკები და ქვეითთა საბრძოლო მანქანები ბულგარეთში, ვარნას პორტში ბორანზე დაიტვირთა და შავი ზღვით საქართველოსკენ 2 მაისს წამოვიდა. ფოთის პორტიდან კი ტექნიკა ეშელონებით ვაზიანში 5 მაისს შემოვიდა.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ-ფოსტა: stratcom@mod.gov.ge;
ვებ-გვერდი: mod.gov.ge

ტელეკომპანია GDS-ის გადაცემა 20/30-ში  საქართველოს თავდაცვის მინისტრმა თინათინ ხიდაშელმა ქვეყნის დასავლურ პერსპექტივებზე, ქართულ შეიარაღებულ ძალებსა და თავდაცვის სამინისტროში მიმდინარე პროექტებზე ისაუბრა

შეიარაღებული ძალები ქართველი საზოგადოების საუკეთესო ნაწილია

– საქართველოს შეიარაღებული ძალები ყველაზე საუკეთესოა. საუკეთესო ნაწილია ქართველი საზოგადოების. ესენი არიან ადამიანები, რომლებსაც შეგიძლია ბოლომდე ენდო, ბოლომდე გაჰყვე, რომლებთან ერთადაც შეგიძლია, იამაყო. თავდაცვის მინისტრის განცხადებით, ქართული ჯარი ქვეყანას მის გარეთაც ღირსეულად წარმოაჩენს და ქართველი სამხედროები სახელმწიფო დროშას ამაყად მსოფლიოს ბევრ ქვეყანაში ატარებენ.

ქართული ჯარი ზუსტად ისეთია, როგორიც ქართული სახელმწიფო. ქართული სახელმწიფო, რომელიც ქართულ ჯარს, მის მიერ განვლილ ისტორიას ეფუძნება, ეს ორი ამბავი იმდენად არის ერთმანეთთან დაკავშირებული, რომ ძალიან რთულია თქვა, სად იწყება ერთი და სად გრძელდება მეორე. ქართულ ჯარს დღეს აქვს იგივე პრობლემები, რაც აქვს ნებისმიერ ჩვენგანს, ჩვენს მოქალაქეს. ქართულ ჯარს აქვს იგივე გამოწვევები, რაც აქვს ქართულ სახელმწიფოს… ხაზგასმით მინდა ვთქვა, რომ ისინი ქმნიან თანამედროვე ქართული ისტორიის, სწორედ, იმ სასახელო ფურცლებს, რომელსაც ჩვენი წინაპრები ქმნიდნენ და შემდეგ ჩვენ ვსწავლობდით, რომლითაც ვიზრდებოდით, რომლითაც ვამაყობთ. დღეს, ჩვენ თვალწინ, სწორედ, ის ბიჭები და გოგონები ქართულ სამხედრო ფორმაში ქმნიან ამგვარი ისტორიის ფურცლებს, რომლებსაც ქართული სამხედრო ფორმა აცვიათ, ამიტომ ძალიან მნიშვნელოვანია, რომ რაც შეიძლება მეტი მხარდაჭერა, რაც შეიძლება მეტი გვერდით დგომა გამოვიჩინოთ ქართველი სამხედროების მიმართ. არასოდეს, არსად ჯარს მარტოს არ მოუგია არც ერთი ომი, არასოდეს არსად ჯარი არ ყოფილა ერთადერთი გარანტი თავისუფლების, თუ ყველა მისი მოქმედება, ყველა მისი ნაბიჯი არ იყო მხარდაჭერილი საზოგადოების მიერ. ჩემი ამოცანა და თავდაცვის სამინისტროს ამოცანაა, რომ უზრუნველვყოთ ამ ორის ერთობა – ჯარის და საზოგადოების ერთობა, – აღნიშნა თინათინ ხიდაშელმა.

„რეზერვის კონცეფცია, რომელიც დაფუძნებულია ნებაყოფლობითობაზე, პროფესიონალიზმსა და ადამიანის თავისუფალ არჩევანზე“

„მობილიზაციისა და რეზერვის კონცეფციის წარმატება და ხიბლი, რომელიც ჩვენს საზოგადოებას შევთავაზეთ, არის ის, რომ ადამიანები აკეთებენ ნებაყოფლობით არჩევანს, რომ იმსახურონ იქ, სადაც ყველაზე კარგად გამოსდით, ისე, როგორც უნდათ და იმ ფარგლებში, როგორც წარმოუდგენიათ; ისე, რომ არავის შეექმნას პრობლემა და ამასობაში იყვნენ საკუთარი ქვეყნის ჯარისკაცები ნებისმიერ დროს, როდესაც ქვეყანას ეს დასჭირდება, – განაცხადა თავდაცვის მინისტრმა რეზერვის კონცეფციაზე საუბრისას.

თინათინ ხიდაშელის განცხადებით, კამპანია, რომელიც თავდაცვის სამინისტრომ რეზერვის და მობილიზაციის საკითხზე წამოიწყო, დაფუძნებულია ნებაყოფლობითობაზე, პროფესიონალიზმსა და ადამიანის თავისუფალ არჩევანზე.

„ეს ნიშნავს, რომ ჩვენ გამოვიტანეთ საჯარო განხილვებისთვის კონცეფცია, სადაც წერია, რომ ვქმნით პროფესიულ რეზერვს. რას ნიშნავს პროფესიული რეზერვი? – დღეს ჩვენ ვცხოვრობთ ჰიბრიდული ომის პირობებში, რაც ნიშნავს მედიაომს, ანუ პროპაგანდისტულ ომს, კიბერომს, ანუ ინტერნეტსივრცეში ომს. პროფესიული რეზერვი ამ შემთხვევაში, ნიშნავს იმას, რომ თქვენ თუ გადაწყვეტთ, იყოთ თქვენი ქვეყნის რეზერვისტი ჟურნალისტი, ამის გაკეთება სტუდიიდან გაუსვლელად შეგიძლიათ ზუსტად იქედან, სადაც მუშაობთ, სადაც ყველაზე კარგად გამოგდით თქვენი საქმე და საიდანაც ემსახურებით თქვენს ქვეყანას, – განმარტა გადაცემის წამყვანთან საუბრისას თავდაცვის მინისტრმა და აღნიშნა, რომ სამინისტრო ივნისში მედიარეზერვის პროექტს ყველა ჟურნალისტს შესთავაზებს.

„ვისაც სურვილი და ინტერესი ექნება, შეუძლია მიიღოს მონაწილეობა ამ პროექტში. ჩვენ შევეცდებით, როგორც ჩვენ გვესმის, როგორც ამას თანამედროვე დოქტრინები ამბობს, გასწავლოთ, გაჩვენოთ, თუ როგორ განვასხვავოთ ერთმანეთისგან პროპაგანდა და სიმართლე, მოწინააღმდეგის ინტერესი და საკუთარი ქვეყნის ინტერესი. ეს არის ამოცანა, რომელიც ყველაზე მნიშვნელოვანია პროპაგანდისტული ომის პირობებში და რაც ყველაზე მნიშვნელოვანი იყო 2008 წელს. იგივე ეხება კიბერუსაფრთხოების მიმართულებას. თუ თქვენ მუშაობთ ბანკში, ხართ წარმატებული ინფორმაციული ტექნოლოგიების სპეციალისტი, გექნებათ სპეციალური კოდები და თუ ქვეყანაზე ხორციელდება კიბერშეტევა, შეგიძლიათ დაეხმაროთ საკუთარ ქვეყანას საკუთარი სამუშაო სივრციდან ან სახლის კომპიუტერიდან, რითაც თქვენ უცბად, ერთ წუთში აღმოჩნდებით თქვენი ქვეყნის ჯარისკაცი… ბუნებრივია, ეს არ გამორიცხავს სამხედრო რეზერვს. სამხედრო პროფესიონალებიც ძალიან ბევრნი არიან ჩვენს ქვეყანაში, რომლებსაც რამდენიმე კონტრაქტით აქვთ შეიარაღებულ ძალებში ნამსახურები, დღეს აღარ არიან შეიარაღებულ ძალებში, მაგრამ ხვალ და ზეგ თუ ამის სურვილი ექნებათ, იქნებიან არმიის რეზერვი, რომელიც საბრძოლო მოქმედებების დროს ჩაანაცვლებს დანაკარგებს, – განაცხადა თინათინ ხიდაშელმა.

„მე ვიცი, რომ საქართველო აუცილებლად გახდება ნატოს წევრი“

„მე ვიცი ზუსტად, ის, რაც წერია დოკუმენტებში, ის, რაზეც საუბრობენ ნატოს წევრი ქვეყნების ლიდერები, ის, რაც ხდება ნატოს მინისტერიალებზე… მე ვიცი, რომ საქართველო აუცილებლად გახდება ნატოს წევრი. მონტენეგროს მიწვევა დეკემბერში ნატოს წევრობისთვის არის საუკეთესო დასტური იმისა, რომ ღია კარის პოლიტიკა მოქმედებს და არავის ნატოს კარი არ ჩაუკეტავს“. თინათინ ხიდაშელის განცხადებით, დეკემბრის მინისტერიალის ტექსტი, სრულიად ცალსახად ამბობს, რომ მაპი არის პოლიტიკური გადაწყვეტილების პროცესის ნაწილი.

საქართველოს აქვს ყველა ინსტრუმენტი ნატოს წევრობისთვის მოსამზადებლად. მე ძალიან ხშირად ვამბობ, რომ მაპი არის საქართველოს წარსული და ამას თავის დაზღვევის მიზნით არ ვამბობ… სრული პასუხისმგებლობით ვაცხადებ, არც ერთ ქვეყანას, რომელიც სოციალისტური ბანაკის გაქრობის შემდეგ ნატოს წევრი გახდა, არ ჰქონია არაფერი იმის მსგავსიც კი, რაც 19 მაისს იქნება საქართველოში. 19 მაისს ჩვენ გვექნება ნატო-საქართველოს წვრთნისა და შეფასების ერთობლივი ცენტრის პირველი გამოშვების ღონისძიება. ველოდები, რომ წინადადებების პაკეტი, რომელიც თებერვლის თავდაცვის მინისტერიალზე წარვადგინე და, რომელიც ერთადერთი ამოცანის მატარებელია, რომ საქართველოს თავდაცვისუნარიანობა იყოს გაცილებით ფართო, მეტი ინსტრუმენტით დატვირთული, მეტი შესაძლებლობების მატარებელი შეჩერების პოლიტიკის ეფექტიანობისთვის, იყოს რეალიზებული ვარშავაში. ამ წინადადებებზე მიმდინარეობს მუშაობა, ამ წუთას თითქმის 90%-ზე მწვანე შუქი გვაქვს და დასტური გვაქვს ნატოდან“ – განაცხადა თავდაცვის მინისტრმა.

ARMY CARD-ის პროექტი სხვადასხვა ბიზნესკომპანიების მხრიდან ქართული შეიარაღებული ძალების მხარდაჭერას გულისხმობს

საქართველოს თავდაცვის მინისტრმა ტელეკომპანია GDS-ის გადაცემა 20:30-ში სტუმრობისას ARMY CARD-ის პროექტის შესახებაც ისაუბრა. თინათინ ხიდაშელის განცხადებით, ეს პროექტი სხვადასხვა ბიზნესკომპანიის მხრიდან ქართული შეიარაღებული ძალების მხარდაჭერას გულისხმობს და მნიშვნელოვანია, რომ ინიციატივას უკვე 25 კომპანია გამოეხმაურა.

„მომავალი კვირიდან დავიწყებთ ამ კომპანიების დასახელებას და დახმარებისთვის მადლობის თქმას. ეს არის, მაგალითად, სხვადასხვა ტიპის სავაჭრო ქსელში ფასდაკლებები, ეს არის ყოველდღიური საყოფაცხოვრებო პრობლემების მოგვარებაში მხარდაჭერა. მთავარი ამოცანა ამ პროექტის არის ის, რომ, როდესაც სამხედრო მოსამსახურე არის ქვეყნის სამსახურში, როდესაც ის არის ბრძოლის ველზე, უნდა იცოდეს, რომ მისი ოჯახი არის დაცული. ამას მხოლოდ სახელმწიფო, მხოლოდ სახელმწიფო ბიუჯეტი ვერ გააკეთებს ისეთი ტიპის ქვეყანაში, როგორიც საქართველოა, – განაცხადა თავდაცვის მინისტრმა და აღნიშნა, რომ საქართველოს ახლო წარსულსა და აწმყოს შორის ის განსხვავებაა, რომ ბიზნესმენები პროექტში საკუთარი ინიციატივით ერთვებიან და სამთავრობო უწყებები მათ თანამშრომლობას არ აიძულებენ.

„მე პირადად, როგორც თავდაცვის მინისტრს, პრაქტიკულად არც ერთ ბიზნესმენთან ამ თემაზე საუბარი არ მქონია, ზუსტად იმ მძიმე გამოცდილებით, რომ თეორიულადაც კი არავის გასჩენოდა რამე ვალდებულების გრძნობა. ეს ვალდებულება ადამიანს ან აქვს, ან – არა. ამას ვერ გაუჩენ, ამას ვერავის დააძალებ. პირველივე დაძახილზე მივიღეთ საკმაოდ საინტერესო შემოთავაზებები, მომავალი კვირიდან ჩვენ ყველა მათგანს მადლობას გადავუხდით და მათ შესახებ საზოგადოებას ვაცნობებთ“, – განაცხადა თინათინ ხიდაშელმა ARMY CARD-ის პროექტზე.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

ბოლო ხანებში ხშირად ვრცელდება მიზანმიმართული მითი იმის შესახებ, რომ რუსეთი ისეთივე „ოკუპანტია, როგორიც თურქეთი. ამ მითის თანახმად, თუ რუსეთს ვამკობთ არასასიამოვნო ეპითეტებით, იგივე უნდა მიეზღოს თურქეთსაც“ – ანუ მასაც ოკუპანტი უნდა ვუწოდოთ იმის გამო რომ „საქართველოს ძირძველი მიწები აქვს მიტაცებული.

რომ გავიაზროთ ის, თუ რითია ეს მოსაზრება მცდარი, დავფიქრდეთ იმაზე, თუ როგორ და რამდენჯერ შეიცვალა მსოფლიო რუკა საუკუნეების განმავლობაში; როგორ ენაცვლებოდნენ ერთმანეთს ერთი და იგივე ტერიტორიაზე მმართველები და იმპერიები; როგორ გადადიოდა მიწები ერთი სახელმწიფოსა თუ მმართველის კონტროლიდან მეორეს ხელში. ისტორიულ წარსულში ყველა ქვეყანა ბრძოლითა და ძალადობით იფართოებდა ტერიტორიებს, და ახლა, რომ მსოფლიო რუკის „სამართლიანობის პრინციპით“ გადაკეთებას შევუდგეთ იმდენი ურთიერთსაწინააღმდეგო პრეტენზია იჩენს თავს, რომ მესამე მსოფლიო ომს ვერ ავცდებით.

საერთაშორისო წესრიგი მეორე მსოფლიო ომამდე პრაქტიკულად არ ავალდებულებდა ქვეყნებს პატივი ეცათ ერთმანეთის სუვერენული უფლებებისთვის (მცირედ უტრირებას ვახდენ), და საერთაშორისო ხელშეკრულებები ირღვეოდა ნებისმიერი საბაბით,  რასაც მოსდევდა ომების შედეგად ტერიტორიების გადანაწილება და ახალი ხელშეკრულებების დადება. ასევე ხშირი იყო შემთხვევები, როდესაც დიდი სახელმწიფოები ან, სულაც იმპერიები, ერთმანეთის სუვერენიტეტს ცნობდნენ ისეთ ტერიტორიებზე, რომლებიც რეალურად სულ სხვა, უფრო მცირე სახელმწიფოებს ეკუთვნოდათ. ამ მუდმივ ქაოსს საერთაშორისო ურთიერთობებში მხოლოდ მეორე მსოფლიო ომის შემდგომ დამკვიდრებულმა საერთაშორისო წესრიგმა მოუღო ბოლო.  გაეროსა და მოგვიანებით ეუთოს შექმნამ (ევროპაში), მათგან გამომდინარე უამრავი საერთაშორისო შეთანხმებებისა და კონვენციების საშუალებით გაამყარა ქვეყნებს შორის მშვიდობა, ტერიტორიული მთლიანობისა და სუვერენიტეტის პატივისცემის პრინციპების საერთაშორისო საზოგადოებაში დამკვიდრებით.

1992 წელს საქართველო საბჭოთა კავშირისგან გათავისუფლდა, კვლავ მოიპოვა დამოუკიდებლობა და შეუერთდა საერთაშორისო თანამეგობრობას. ახალმა დამოუკიდებელმა საქართველომ ცნო საერთაშორისო თანამეგობრობაში იმ დროისთვის დამკვიდრებული პრინციპები და ორმხრივი და მრავალმხრივი ხელშეკრულებებით აღიარა თავისი მეზობელი სახელმწიფოები იმ დროისთვის არსებულ საზღვრებში, მისცა ამ საზღვრების ხელშეუხებლობის პირობა. იგივე გააკეთეს ჩვენ მიმართაც პრაქტიკულად ყველა მეზობელმა სახელმწიფომ და არავის არ დაურღვევია ეს ვალდებულება, გარდა რუსეთისა. რუსეთმა სწორედ ის ხელშეკრულებები დაარღვია ჩვენი ტერიტორიული მთლიანობის შელახვით, რომლებიც ჩვენ მიერ დამოუკიდებლობის მოპოვების შემდგომ დაიდო, ან რომლებსაც ამის შემდგომ შეუერთდა თავად (გაეროს ქარტია, ჰელსინკის კონფერენციის 1975 წელის დასკვნითი აქტი, პარიზის ქარტია). მსოფლიოსა და ჩვენი ქვეყნის თვალში სწორედ ამიტომ წარმოადგენს რუსეთი „ოკუპანტ“ ქვეყანას და არა იმიტომ, რომ რაღაც ტერიტორიები მიითვისა ოდესღაც ისტორიულ წარსულში.

რუსეთის პოლიტიკა უკრაინის მიმართ, მაგალითად ყირიმის ნახევარკუნძულის მიტაცება, ამ კონტექსტში სწორედ ისტორიულ პრეტენზიებზეა აგებული. ასეთ პოლიტიკას „რედენტიზმს“ უწოდებენ საერთაშორისო ურთიერთობებში. რუსული რედენტიზმი ამ შემთხვევაში განსაკურებულად საშიში ფორმაა, რადგანაც ადრე მის მიერვე აღიარებულ შეთანხმებებს (რომლებსაც ნებაყოფლობით და დაძალების გარეშე მოაწერა ხელი) უბრალოდ აღარ ცნობს ცალმხრივად და ახალ პრეტენზიებს აცხადებს ისტორიული ან სხვა მოსაზრებებით, რაც სრულად ეწინააღმდეგება თანამედროვე საერთაშორისო სამართლის პრინციპებს.

სწორედ ამის გამო არ შეიძლება მოვიხსენიოთ თურქეთი ოკუპანტად, ისე, როგორც ამას რუსეთის მიმართ ვაკეთებთ, რადგან პირველი იცავს ყველა საერთაშორისო შეთანხმებას საქართველოსთან მიმართებაში და მეორე კი უხეშად არღვევს მათ.

კახა გოგოლაშვილი
სტრატეგიული და საერთაშორისო ურთიერთობების
კვლევის ფონდის უფროსი მეცნიერ-თანამშრომელი;
ევროპული კვლევების ცენტრის ხელმძღვანელი

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge

გთავაზობთ მითების სერიას, რომელიც საზოგადოებაში ანტიდასავლური პროპაგანდის შედეგად გაჩენილი მითებისა და კითხვების საპასუხოდ მომზადდა

მოსაზრება, რომ გერმანიის გაერთიანების დროს, NATO-ს ლიდერებმა პირობა დადეს, რომ NATO აღმოსავლეთით არ გაფართოვდებოდა, მცდარია

რეალურად, ასეთი პირობა არასოდეს დადებულა და რუსეთს თავად არასოდეს მოუყვანია ამის დამადასტურებელი არგუმენტი. ყველა გადაწყვეტილება, რომელიც მიიღება NATO-ში, დაფუძნებულია კონსენსუსის პრინციპზე და ყველა გადაწყვეტილება ინახება წერილობითი ფორმით. ასეთი ჩანაწერი არქივებში არ არსებობს. უფრო მეტიც, გერმანიის გაერთიანების პერიოდში (1989 წელი) ვარშავის პაქტი ჯერ კიდევ ფუნქციონირებდა. მისი დაშლის გადაწყვეტილება 1991 წელს მიიღეს. ამის გათვალისწინებით, აზრს არის მოკლებული იმის მტკიცება, რომ ვარშავის პაქტის ქვეყნების NATO-ში გაწევრების თემა ვარშავის პაქტის არსებობის პერიოდში დადგა დღის წესრიგში.

თავად საბჭოთა კავშირის პრეზიდენტმა მიხეილ გორბაჩოვმა დაადასტურა ეს, როცა 2014 წლის 15 ოქტომბერს „როსიისკაია გაზეტაში“ თქვა: NATO-ს გაფართოების საკითხი საერთოდ არ განიხილებოდა და ეს თემა დღის წესრიგში იმ პერიოდში არ იდგა. ამას მე ვამბობ სრული პასუხისმგებლობით. აღმოსავლეთ ევროპის არც ერთ ქვეყანას არ დაუყენებია ეს საკითხი იმ წლებში, არც ვარშავის პაქტის დაშლის შემდეგ. დასავლეთის ლიდერებს ეს საკითხი საერთოდ არ წამოუწევიათ.

მომზადებულია საქართველოს თავდაცვის სამინისტროს
სტრატეგიული კომუნიკაციების დეპარტამენტის მიერ
ტელ: +995(32) 2 72 35 35;
ელ–ფოსტა: stratcom@mod.gov.ge;
ვებ–გვერდი: mod.gov.ge