მთავარი,რეკლამა

თაფლი “ჰილტონ ბათუმის” მეოთხე სართულიდან

23.05.2016 • 2472
თაფლი “ჰილტონ ბათუმის” მეოთხე სართულიდან

სასტუმრო „ჰილტონ ბათუმის“ მეოთხე სართულზე ფუტკრის ოთხი ოჯახი ცხოვრობს. ფუტკრებზე, რომლებიც ბულვარისა და ექვსი მაისის პარკში არსებული ყვავილების ნექტრით იკვებებიან, მეფუტკრე ზრუნავს. მას შემდეგ, რაც თაფლს პირველად მიიღებენ, „ჰილტონ ბათუმის“ სტუმრებს შეეძლებათ უშუალოდ სასტუმროში მომზადებული, ნატურალური, ქართული თაფლი დააგემოვნონ. თაფლის რეალიზაციისგან მიღებული თანხა კი მთლიანად საქველმოქმედო მიზნებს, რეგიონში მზრუნველობამოკლებული ბავშვების დახმარებას მოხმარდება.

„ჩვენი ფუტკრები მეგობრულები არიან, არავის ერჩიან“, – ამბობს „ჰილტონ ბათუმის“ გენერალური მენეჯერი სტიუარტ ნელსონი და სასტუმროს მეოთხე სართულის ტერასაზე სკებს გვაჩვენებს, სადაც „ჰილტონის“ ფუტკრები ცხოვრობენ. ეს ტერიტორია მთლიანად მათ განკარგულებაშია, ტერასა 6 მაისის პარკსა და ბათუმის ძველ ბულვარს გადაჰყურებს, სადაც ფუტკრები მაისის ყვავილების ნექტარს აგროვებენ.

ხუთვარსკვლავიან სასტუმროში თაფლის წარმოების იდეა ეკუთვნით „ჰილტონ ბათუმსა“ და მცირე კავკასიის ალიანსების პროგრამას, რომელსაც ახორციელებს საერთაშორისო არასამთავრობო ორგანიზაცია „მერსი ქორფსი“, შვეიცარიის განვითარებისა და თანამშრომლობის სააგენტოს დაფინანსებით.

„საქართველოში თაფლის წარმოების უძველესი ტრადიცია არსებობს და ამის წარმოჩენასა და რეკლამირებაში გვინდა მივიღოთ მონაწილეობა.

„ჰილტონ ბათუმმა“ ფუტკრები მიიღო, როგორც ადგილობრივი კულტურისა და წარმოების ნაწილი და გადაწყვიტა რამდენიმე ოჯახი განეთავსებინა სასტუმროს ღია ტერასაზე. ჩვენს სასტუმროში გვაქვს თაფლის კუთხე, სადაც აჭარის ცხრა ხეობაში წარმოებული თაფლია წარმოდგენილი, მაგრამ გადავწყვიტეთ, სასტუმროშიც გვეწარმოებინა თაფლი, რადგან ეს პროდუქტი სასტუმროს საუზმის შემადგენელი მნიშვნელოვანი ნაწილია. ასევე გვინდა თაფლის თემა გამოვიყენოთ ქართული პროდუქტის რეკლამირებისთვის. ეს ნაწილობრივ სოციალური პროექტია, რადგან სასტუმროში წარმოებული თაფლით მიღებული შემოსავალი ქველმოქმედებაში დაიხარჯება – რეგიონში მცხოვრები მზრუნველობამოკლებული ბავშვებისათვის. ხანდახან მარტივი ყოველდღიურობა შეიძლება იქცეს კარგ ისტორიად, „ჰილტონის“ თაფლის ისტორია ამის მაგალითია“, – ამბობს სტიუარტ ნელსონი.

თაფლის კუთხე ჰილტონ ბათუმში

თაფლის კუთხე ჰილტონ ბათუმში


„ჰილტონ ბათუმში“ ამბობენ, რომ მათი ფუტკრები უწყინარნი და უვნებელნი არიან ყველასთვის.

„საოცარი სანახავია, როგორ შრომობენ ისინი. მეფუტკრემ ხელიც კი მოკიდა რამდენიმე მათგანს და გადაიყვანა, რომ დედა ფუტკარი ეჩვენებინა~, – ამბობს „ჰილტონ ბათუმის“ გენერალური მენეჯერი.

„ჰილტონ ბათუმში“ თაფლის წარმოების იდეა მოკლევადიანი არ არის. იდეის წარმატებით განხორციელების შემთხვევაში სასტუმრო გეგმავს ქართული თაფლი, რომლის ეტიკეტზე მითითებული იქნება, რომ თაფლი სასტუმრო „ჰილტონშია“ დამზადებული, სტუმრებს შესთავაზოს შემოწირულობის სანაცვლოდ, რომელიც ქველმოქმედებაში დაიხარჯება.

ჰილტონ ბათუმის მეფუტკრე

ჰილტონ ბათუმის მეფუტკრე

„ეს ჩანაფიქრი გვეხმარება პატარა ბავშვები უკეთესი ცხოვრებით უზრუნველვყოთ. „ჰილტონ ბათუმის“ გუნდი და მისი პარტნიორები ცდილობენ მცირედი მაინც გააკეთონ საქართველოსათვის. ამ და უამრავი სხვა იდეით „ჰილტონ ბათუმი” იწყებს ქართული სტუმარ-მასპინძლობის სითბოს გავრცელებას მთელი მსოფლიოს მასშტაბით“ – ამბობს სტიუარტ ნელსონი.

სასტუმრო „ჰილტონ ბათუმი“

სასტუმრო „ჰილტონ ბათუმი“

გადაბეჭდვის წესი


ასევე: