აჭარის ტურიზმისა და კურორტების დეპარტამენტის ინფორმაციით, სტატისტიკის მიხედვით, გასული წლის ანალოგიურ პერიოდთან შედარებით მაისში აჭარაში ტურისტების 18,69 %-იანი ზრდა დაფიქსირდა. მაისის განმავლობაში რეგიონს 44, 567 ტურისტი, მათ შორის 28 884 უცხოელი და 15 683 შიდა ტურისტი სტუმრობდა.
დეპარტამენტის ინფორმაციით, 5 თვის განმავლობაში [იანვარი-მაისი] აჭარაში შემოსულ ტურისტთა რაოდენობა წინა წლის ანალოგიურ პერიოდთან შედარებით 18,50 % -თაა გაზრდილი, რაც 79 431 უცხოელ, ხოლო 42 837 შიდა ტურისტს გულისხმობს.
აჭარის ტურიზმისა და კურორტების დეპარტამენტის სტატისტიკა მხოლოდ აჭარაში რეგისტრირებული განთავსების ობიექტების მიერ მოწოდებულ ინფორმაციას ეყრდნობა.
საზღვრის მონაცემების მიხედვით კი ვიზიტორთა ზრდის დადებითი ტენდენცია შეინიშნება ბათუმის საერთაშორისო აეროპორტში. ორი კვარტლის მონაცემებით (იანვარ-ივნისი) საჰაერო ტრანსპორტით აჭარაში 42 268 მგზავრი ჩამოფრინდა, რაც გასული წლის ანალოგიურ პერიოდთან შედარებით 74,29%-იან ზრდას გულისხმობს. ქვეყნების მხრივ ვიზიტორების განსაკუთრებული ზრდა კი ისრაელიდან, ყაზახეთიდან, რუსეთიდან, ბელარუსიიდან და ლიტვადან შეინიშნება. ბათუმის საერთაშორისო აეროპორტიდან აჭარაში 2015 წლის ანალოგიურ პერიოდთან შედარებით 14-ჯერ გაიზარდა ისრაელის მოქალაქეების და 5,5-ჯერ ყაზახი ვიზიტორების, ხოლო 78,4%-ით ბელარუსი, 57,56%-ით რუსი და 13,56% -ით ლიტველი ვიზიტორების რაოდენობა.
რაც შეეხება სარფის საბაჟო-გამშვებ პუნქტს, აქ პირველი ორი კვარტლის მონაცემებით ვიზიტორთა 17,82 %-იანი მატება შეინიშნება. განსაკუთრებული ზრდა კი ირანიდან და ყაზახეთიდან შემოსულ ვიზიტორებზე ფიქსირდება. სარფის საბაჟო-გამშვები პუნქტიდან რეგიონში შემოსული ირანელი ვიზიტორების რაოდენობა 7-ჯერ, ყაზახი ვიზიტორებისა კი 30,43% -ით გაიზარდა.
აჭარის ტურიზმის დეპარტამენტის მიერ წარმოებული სტატისტიკის წყარო არის რეგიონში არსებული რეგისტრირებული განთავსების ობიექტებია.
ბათუმის მერიის პრესსამსახურის მიერ გავრცელებული ინფორმაციით, დღეს, 13 ივლისს, 12:00 სთ-ზე წყლის მიწოდება შეუწყდება თამარის დასახლებას. წყალმომარაგება 16:00 სთ-ზე აღდგება. გავრცელებული ინფორმაციით, წყლის მიწოდების შეწყვეტა გეგმურ სარემონტო სამუშაოებს უკავშირდება.
საპროტესტო აქციას აჭარის პროკურატურასთან ცეცხლსასროლი ირაღის და ნარკოტიკების შეძენა-შენახვაში ბრალდებულების ახლობლებმა გამართეს. ბრალდებულები გიორგი პაპიძე და კარლო სურგულაძე არიან. აქციის მონაწილეების თქმით, ბრალდებულებს ნარკოტიკი და ცეცხლსასროლი იაღარი ჩაუდეს ლერმონტოვისა და ჭავჭავაძის ქუჩების კვეთაში.
„ეს დაფიქსირებული აქვს იქვე მდებარე „VTB ბანკის“, ასევე „პოლიგრაფ სერვისის“ ვიდეოკამერებს, მაგრამ ჩანაწერები პოლიციელებმა ამოიღეს და წაშალეს. ჩვენ ეს ორგანიზაციები გვპასუხობენ, რომ ჩანაწერს არ ინახავენ, რაც დაუჯერებელია,“ – ამბობს ადვოკატი პაატა ბოლქვაძე.
აქციის მონაწილეებს დღეს აჭარის მთავარი პროკურორის მოადგილე ანზორ უსტიაძე შეხვდა. იგი შეკრებილებს მთავარ პროკურორთან შეხვედრას ხვალისთვის დაპირდა. აქციის მონაწილეები ფართომასშტაბიან აქციებს გეგმავენ, თუკი მათ ხვალ პროკურორი არ შეხვდებათ.
პროკურატურასთან მისვლამდე, ბათუმის საქალაქო სასამართლოს დიდ დარბაზში ბრალდებულმა გიორგი პაპიძემ უვადო შიმშილობა გამოაცხადა. „მოვითხოვ იმ პოლიციელების დასჯას, ვინც იარაღი ჩამიდო. ვიდრე საქმის განხილვა არ დასრულდება, შიმშილობას არ შევწყვეტ“, – მიმართა მოსამართლე გიორგი გრატიაშვილს ბრალდებულმა გიორგი პაპიძემ. მას წინასწარი პატიმრობა აქვს შეფარდებული.
ამ საქმეში კიდევ ერთი ბრალდებული კარლო სურგულაძეა. მას გამოძიება ნარკოტიკების უკანონოდ შეძენა-შენახვას ედავება. კარლო სურგულაძე სასამართლომ გირაოთი გაათავისუფლა. ადვოკატის ინფორმაციით, ბრალდებული დღევანდელ პროცესს ჯანმრთელობის მდგომარეობის გამო ვერ დაესწრო. ამ მიზეზით დღეს საქმის არსებითი განხილვა 20 ივლისისთვის გადაიდო. კარლო სურგულაძე დაკავებიდან, ანუ 27 მაისიდან გასული თვის ბოლომდე შიმშილობდა, როცა მას სასამართლომ წინასწარი პატიმრობა გირაოთი შეუცვალა.
ბრალდებულ გიორგი პაპიძეს მოსამართლე გიორგი გრატიაშვილმა დღევანდელ პროცესზე ბრალი გააცნო, რომლის დადასტურების შემთხვევაშიც, მას თავისუფლების აღკვეთა ემუქრება 4-დან 6 წლამდე. მოსამართლემ ასევე განმრტა, რომ იარაღის უკანონო შეძენა-შენახვის მუხლი ალტერნატიულ სასჯელს არ ითვალისწინებს.
სასამართლო პროცესის დასრულებამდე ბრალდებულმა მოსამართლის შეკითხვაზე – სცნობთ თუ არა თავს დამნაშავედ, უარყოფითი პასუხი გასცა.
დატოვებს თუ არა აჭარის განათლებისა და კულტურის „რესპუბლიკელი“ მინისტრი პოსტს, ან რის სანაცვლოდ შეძლებს გიორგი თავამაიშვილი პოსტის შენარჩუნებას? – ამ თემაზე „ბათუმელებთან“ კომენტარი საქართველოს პარლამენტის წევრმა „რესპუბლიკელმა“ დავით ბერძენიშვილმა გააკეთა.
„თუ გიორგი კვირიკაშვილი კოალიციურობას შესაძლებლად მიიჩნევს აჭარაში და იერარქიულად, რასაც ზემოდან ერტყვიან ისე არ მოიქცევა, ამაზე იქნება დამოკიდებული ჩვენი პოზიციები. ჩვენ ძალიან ჩამოკიდებული რომ ვიყოთ მაგ პოსტს, გვაქვს ინსტრუმენტები, რომ ეს პოსტი დავიცვათ, იმიტომ რომ გია მასალკინის ხმის გარეშე ვერავინ ვერ გახდება აჭარის მთავრობის თავმჯდომარე. ამიტომ, ჩვენ აჭარაში გვაქვს „ოქროს ხმა“. ამის მიუხედავად, ჩვენ არ ვვაჭრობთ ამ ხმით.“
დავით ბერძენიშვილის თქმით, ჯერ ნაადრევია იმაზე საუბარი, თუ რა გადაწყვეტილებას მიიღებს საბოლოოდ „რესპუბლიკური პარტია“ აჭარის განათლების მინისტრის პოსტთან დაკავშირებით:
„ერთი რამ შემიძლია მკაფიოდ გითხრათ, რომ გია თავამაიშვილი 25 წელია „რესპუბლიკური პარტიის“ წევრია, ჩემი მეგობარია და მოიქცევა რესპუბლიკური პარტიის შესაბამისად. ამიტომ, პარტია და მისი მინისტრი აჭარაში, ერთობლივად მივიღებთ გადაწყვეტილებას. თუ ცენტრისგან განსხვავებით, აჭარაში შესაძლებელი იქნება „ქართული ოცნების“ და „რესპუბლიკელების“ კოალიციური მთავრობა, თუ გია თავამაიშვილზე შეთავაზებული იქნება კვლავ მინისტრობა, ამაზე რესპუბლიკური პარტია თავამაიშვილთან ერთად იმსჯელებს. ოთხიდან ერთი მინისტრია მხოლოდ პარტიული და თუ აჭარაშიც მინისტრს თანამდებობის გამო პარტიის დატოვებას მოსთხოვენ, მაშინ მთავრობის ახალ თავმჯდომარეს შეიძლება დავუყენოთ პირობა ან არ დავუყენოთ, რადგან ზურაბ პატარაძე ვერ გახდება მთავრობის თავმჯდომარე თუ ჩვენ ხმას არ მივცემთ. გია თავამაიშვილი პარტიას და მთელ მის სამეგობროოს მინისტრობის გამო არ დატოვებს“ – ამბობს დავით ბერძენიშვილი.
მისი თქმით, აჭარის უმაღლესი საბჭოს წევრი, „რესპუბლიკელი“ გიორგი მასალკინი აწარმოებს მოლაპარაკებებს აჭარის მთავრობის თავმჯდომარეობის კანდიდატთან, ზურაბ პატარაძესთან.
„ჯერ ეს არის პროცესი. ვნახოთ როგორი იქნება მათი დამოკიდებულება. პატარაძე არ არის მთავრობის თავმჯდომარე და როდის იქნება, ესეც არ ვიცით. სანამ მთავრობის თავმჯომარე არ გაჩნდება, მანამდე ეს საკითხი არც კი განიხილება. მე ვაპირებ საარჩევნო კამპანიის ხელმძღვანელობას აჭარის უმაღლეს საბჭოში. ვარშალომიძე ჩამობრძანებულა, ხაბაძეც მანდ არის, ძალიანაც მინდა [ისინი] ვიხილო „ქართული ოცნების“ და „ნაციონალური მოძრაობის“ სიაში და კონკურენტებად აჭარის უმაღლეს საბჭოში. ასე, რომ ქალაქის ცენტრში კენჭს თუ იყრიან ჩემთან ერთად, მე მგონი ეს ძალიან გაახალისებს პოლიტიკურ ცხოვრებას ბათუმში და მთელ ქვეყანაში“ – ამბობს დავით ბერძენიშვილი.
სოფელ უჩამბაში მდინარის ადიდების შედეგად წყალმა 320 ოჯახთან დამაკავშირებელი ხიდი წაიღო. ალტერნატიული გზის გაწმენდა სტიქიის შემდეგ დროულად მოხერხდა, დღეს კი უკვე ხიდის აღდგენითი სამუშაოები მიმდინარეობს. მთავრობის პრესსამსახურის ინფორმაციით, „აღნიშნულ ადგილებში ინტენსიურად მიმდინარეობს დაზიანებული წყლის მილების აღდგენა-გაყვანა. სამუშაოების დასრულებისთანავე სოფლებს აღუდგებათ სასმელი წყლის მიწოდება, ასევე შუახევის დაბაში აღდგება 24 საათიანი წყლის მიწოდების გრაფიკი. შუახევის მუნიციპალიტეტში ხელმეორედ გააქტიურებული მეწყრული შემთხვევებით მიყენებული ზარალი სპეციალურმა კომისიამ შეისწავლა. ამ დროისათვის ივნისი-ივლისის სტიქიური მოვლენების შედეგად ზარალი დაახლოებით 108 ათას ლარს შეადგენს“.
აჭარის მთავრობის მონაცემებით, სულ აჭარაში ივნისი-ივლისის სტიქიური მოვლენების შედეგად ზარალი დაახლოებით 2 მილიონ 772 ათას ლარს შეადგენს. დღეს აჭარის მთავრობის წარმომადგენლები შუახევშიც ჩავიდნენ.
უჩამბის ხიდი / ფოტო: აჭარის მთავრობის პრესსამსახური
დღეს 12 ივლისს, „რესპუბლიკურმა პარტიამ“ განცხადება გააკეთა, რომ „რესპუბლიკელი“ მინისტრები თანამდებობას დატოვებენ. ეს გადაწყვეტილება მინისტრებმა „ქართული ოცნების“ მოთხოვნით მიიღეს.
აჭარაში მინისტრის პოსტი მხოლოდ ერთ „რესპუბლიკელს“, გიორგი თავამაიშვილს უკავია. აჭარის განათლების, კულტურისა და სპორტის მინისტრის მოვალეობის შემსრულებელმა „ბათუმელებთან“ საუბარში განაცხადა, რომ თანამდებობას იმ შემთხვევაში დატოვებს, თუ ეს პარტიული მოთხოვნა იქნება.
„ყოველ შემთხვევაში, თვითგვემას ვერ მივეცემი. მინისტრად მე „რესპუბლიკური პარტიის“ წარდგინებით ვიყავი და როგორც გადაწყვეტს პარტია, ისე მოვიქცევი“- გვეუბნება ის.
გიორგი თავამაიშვილი ამბობს, რომ თანამდებობის დატოვების მოთხოვნით ჯერ პარტიიდან არავინ დაკავშირებია: „მე მაქვს არჩევანის უფლება, რომ გავაგრძელო საარჩევნო პერიოდამდე მუშაობა, მაგრამ რასაკვირველია, პარტიის დატოვებას და ამის კვალობაზე რაღაცის მიღება, ჩემთვის მიუღებელია“.
აჭარის ფინანსთა და ეკონომიკის სამინისტროსთან დღეს, ბათუმში, თამარის დასახლებაში [ტბეთის ქუჩა 12-ში] უნებართვოდ შესახლებული ოჯახების წევრები შეიკრიბნენ. ისინი სამინისტროსგან ითხოვენ თანხმობას, რათა შეძლონ დარეგისტრირდნენ „ენერგო-პრო ჯორჯიას“ აბონენტებად.
აღნიშნულ მისამართზე უძრავი ქონება – მიწის ნაკვეთი და შენობა-ნაგებობები, სადაც ეს ოჯახები ცხოვრობენ, აჭარის ავტონომიური რესპუბლიკის საკუთრებაა. ამ დროისთვის აქ 20-მდე ოჯახი, ელექტროენერგიის გარეშე ცხოვრობს.
აქცია სამინისტროსთან / როინ გუნდაძის ფოტო
2014 წლის დეკემბერში სამინისტრო თანახმა იყო უნებართვოდ შესახლებული ოჯახები დარეგისტრირებულიყვნენ ზემოაღნიშნულ მისამართზე ელექტროენერგიის მომხმარებლებად. ამის შესახებ იმ წერილშია აღნიშნული, რომელიც სამინისტრომ დღევანდელი აქციის ერთ-ერთ მონაწილეს გაუგზავნა. თუმცა, მიმდინარე წლის 27 ივნისის წერილში აღნიშნულია, რომ სამინისტრო, ამჯერად ამ ოჯახების აბონენტად დარეგისტრირების წინააღმდეგია.
რამაზ ბოლქვაძე
მოსახლეობა ამბობს, რომ ამ დრომდე აბონენტებად დარეგისტრირება იმიტომ ვერ შეძლეს, რომ შესაბამისი ფინანსები არ გააჩნდათ. მათი თქმით, „ენერგო-პრო ჯორჯია“ მთლიანობაში 7 ათას ლარს ითხოვს.
როგორც აქციის მონაწილეებმა „ბათუმელებს“ აცნობეს, აჭარის ფინანსთა და ეკონომიკის მინისტრის მოადგილე, რამაზ ბოლქვაძე, მათ დაპირდა, რომ ამჯერად თანხმობის წერილს სამინისტროსგან უახლოეს დღეებში მიიღებენ.
აჭარის მთავრობის პრესსამსახიურის ინფორმაციით, აჭარაში, სტიქიით დაზარალებულ ზონებში აღდგენითი სამუშაოები მიმდინარეობს.
„ამ ეტაპზე ქედის მუნიციპალიტეტის სოფელ ჯალაბაშვილებში დამეწყირილი გზა გაწმენდილია. დამატებით ჩატარდება ფერდსამაგრი სამუშაოები, რომელიც საბოლოოდ გაამაგრებს გზის მეწყერსაშიშ მონაკვეთს. აღდგენითი სამუშაოების პარალელურად, დღესვე ქედის მუნიციპალიტეტის ხარაულა-ჯალაბაშვილების მონაკვეთზე დაიგო ასფალტის საფარი და მიმდინარეობს სასმელი წყლის გაყვანის სამუშაოები. უახლოეს პერიოდში ჩატარდება გეოლოგიური კვლევა მეწყერსაშიშ ზონებში მცხოვრები ოჯახებისთვის. საბოლოო მონაცემებით, სტიქიის შედეგად ქედის მუნიციპალიტეტი 86 ათას ლარით დაზარალდა.“ – აღნიშნულია მთავრობის პრესსამსახურის მიერ გავრცელებულ ინფორმაციაში. დღეს ქედაში, სოფელ ჯალაბაშვილებში, აჭარის ჯანდაცვის მინისტრის მოვალეობის შემსრულებელი, ნუგზარ სურმანიძე იმყოფებოდა.
ამ წუთებში ბათუმის დემოკრატიული ჩართულობის ცენტრში ორდღიანი საინფორმაციო კონფერენცია – „რელიგიის თავისუფლება“ მიმდინარეობს.
ადამიანის უფლებების სწავლების და მონიტორინგის ცენტრის [EMC] სამოქალაქო-პოლიტიკური უფლებების პროგრამის დირექტორის, თამთა მიქელაძის თქმით, შეხვედრები განკუთვნილია რელიგიური ორგანიზაციებისა და დაინტერესებული პირებისათვის და შეეხება რელიგიის თავისუფლების, სეკულარიზმის საკითხებს, მუსლიმი თემის უფლებრივ მდგომარეობას და იმ პოლიტიკურ, სოციალურ და კულტურულ კონტექსტებს, რომლებიც აჭარაში მუსლიმ თემთან დაკავშირებით არსებობს.
„დღეს მოხსენებებს წაიკითხავენ მალხაზ სონღულაშვილი [ევანგელურ-ბაპტისტური ეკლესიის წინამძღოლი, რომელიც მუსლიმი თემის აქტიური მხარდამჭერი და გულშემატკივარია] და მკვლევარები: თამთა ხალვაში და სოფიო ზვიადაძე. ხვალინდელი შეხვედრა მთლიანად ადამიანის უფლებებს და იმ გამოწვევებს დაეთმობა, რომლებიც სხვადასხვა რელიგიურ ორგანიზაციებს აქვთ“, – ამბობს თამთა მიქელაძე და აღნიშნავს, რომ რელიგიურ ორგანიზაციებს შორის დამსწრეები არიან, არამარტო მუსლიმი თემის წარმომადგენლები, არამედ კათოლიკური ეკლესიის, სომხური ეკლესიის და პროტესტანტული დენომინაციები.
შეხვედრის ერთ-ერთი მონაწილე, საქართველოს ევანგელურ-ბაპტისტური ეკლესიის ეპისკოპოსი რუსუდან გოცირიძე აღნიშნავს, რომ შეხვედრები ხელს შეუწყობს მუსლიმ და ქრისტიანულ თემებს შორის ურთიერთობების პოზიტიურ და ნეგატიურ ელემენტებზე მსჯელობას და „დაეხმარება როგორც ქრისტიან, ასევე მუსლიმ საზოგადოებას, გაიაზროს თუ რა მდგომარეობაში ვართ, რატომ ვაწყდებით პრობლემებს ამ ურთიერთობებში, საიდან არის ნასაზრდოვები ის შიშები, სტერეოტიპები თუ შეთქმულების თეორიები, რომლებიც ასე უხვად გვაწევს თავზე“.
როგორც თამთა მიქელაძე ამბობს, შესაძლოა ის პრობელმები რაც ამ შეხვედრების ფარგლებში გამოიკვეთება, კიდევ ერთხელ გახდეს EMC-ის მხრიდან სამართლებრივი რეაგირების ან ადვოკატირების საკითხი და დაიგეგმოს, თუ როგორ შეიძლება ორგანიზაციამ მხარი დაუჭიროს კონკრეტული პრობლეების გადაწყვეტას.
კონფერენცია ხვალ, 13 ივლისს ბათუმის დემოკრატიული ჩართულობის დასრულდება.
ბათუმში, „მეზღვაურთა სამედიცინო ცენტრში“, ტაბიძის ქუჩა #2-ში, თბილისიდან მოწვეული მანუალური თერაპევტი ნიკა თაბუნიძე რამდენიმე თვეა იღებს პაციენტებს. იგი ოპერაციის გარეშე, საგვარეულო მალამოს და საჭიროების შემთხვევაში ტრადიციული მედიცინის გამოყენებით მკურნალობს.
ნიკა თაბუნიძე
ბატონი ნიკა თაბუნიძე საგვარეულო მეთოდების უბადლო მცოდნეა. თაბუნიძე ძველი, მესხური გვარია, თაბუნიძის საგვარეულო მეთოდით მკურნალობა კი რამდენიმე საუკუნეს ითვლის. ნიკა თაბუნიძე წარმატებით კურნავს იმ ადამიანებს, რომელთაც წელის ტკივილი და ქრონიკული დაავადებები ტანჯავს: რადიკულიტი, დისკოზი, პროლაპსი, პროთრუზია, დისკოპათია, ართროზი, იშიაზი, მარილების დაგროვება, ნერვის ანთება. იგი იყენებს საგვარეულო რეცეპტით დამზადებულ წამლებს, რომლებიც რამდენიმე ასეული ბალახისგან მზადდება. ყველა ეს წამალი სერტიფიცირებული და ლიცენზირებულია.
ნიკა თაბუნიძემ საგვარეულო წამლებსა და მათ უნიკალურობაზე რამდენიმე შეკითხვას უპასუხა.
ბატონო ნიკა, ჩვენი საუკუნის დაავადებებია ნივთიერებათა ცვლის დარღვევა, ნერვოზის სხვადასხვა ფორმა, სულიერი და ფიზიკური ტრავმები, გაციება… ამას ემატება ექიმთან დროულად არ მისვლა… რა მოსდევს ყოველივე ამას?
ძირითადად, გვხვდება სახსრების ანთება, ამ დროს სინოვიალური სითხე ნელ-ნელა შრება, დამცავი შემაერთებელი რბილი ქსოვილი, რომლითაც დაფარულია მალები და სახსრის ზედაპირი, იწყებს გარქოვანებას. დროთა განმავლობაში მალებს შორის არსებული ნაპრალი და სივრცე ამოივსება ძვლოვანი წანაზარდებით _ ოსტეოპიტებით. ეს ყველაფერი იწვევს სახსრების დეფორმაციას და ინვალიდობას. ვწუხვარ, რომ ძალიან გავრცელდა სახსრებისა და ხერხემლის დაავადება. ამ სნეულებას ხშირად მიაწერენ მარილების დაგროვებას, ართრიტებს, ართროზებს და სხვა დაავადებებს, შესაბამისად, არასწორი მკურნალობა უკუშედეგს იძლევა.
თქვენს საგვარეულო წამალს აქვს გავლილი ფარმაკოლოგიური შემოწმება, თუ გქონიათ პრაქტიკაში უკუჩვენება?
ჩვენი სამკურნალწამლო საშუალებები 90-95% ბალახოვანი მცენარეებისგანაა დამზადებული, თუმცა ნაწილობრივ მესხეთში არსებულ სამკურნალო ქანებსაც შეიცავს. ამ ყველაფერს ემატება ირმის რქა და სხვა ცხოველური კომპონენტები. ნაყენი, ძირითადად, სახსრების დაავადებას კურნავს: ოსტეოქონდროზს, მარილების დაგროვებას, წელის, გულ-მკერდის, კისრის და დისკოგენურ რადიკულიტს. ასევე, მკურნალობას ექვემდებარება ყველანაირი ნერვის ანთება, გარდა სახის ნერვის ანთებისა, ასევე იკურნება ინფექციური და რევმატული ართრიტი და ართროზები, იშიაზი, სქოლიოზი, პლექსიტი, კუჭის, თირკმლის, ღვიძლის, ნაღვლის ბუშტის დაავადებები.
მკურნალობას კომპლექსური და კომბინირებული მეთოდით ვატარებ: წამლის შინაგანი მიღებით ორგანიზმი მდიდრდება და მარაგდება ბუნებრივი მინერალებით, ცილებით, ცხიმებით, ნახშირწყლებით და პარალელურად ვატარებ მანუალურ თერაპიას, იგივე წამლის შეზელვას. თუ საჭიროა, ტრადიციულ მედიცინასაც მივმართავ.
ჩემი წამლები სამი სახისაა: დასალევი, ანუ შინაგანი, სხეულზე წასასმელი სითხე და ასევე წასასმელი მალამო. ყველა წამალი სერტიფიცირებული და ლიცენზირებულია. ოპერაციის გარეშე ვმკურნალობ დისკოზს, პროლაპსს, პროთრუზიას, დისკოპათიას. მამაჩემი ნუგზარ თაბუნიძე 42 წელია ამ საქმეს ემსახურება და უკუჩვენება ჩვენ წამლებს არასდროს არ ჰქონია.
დღეს საქართველოში, სხვადასხვა ადგილას შეხვდებით ადამიანებს, რომლებიც ვითომ მკურნალობენ ნუგზარ თაბუნიძის სამკურნალო საშუალებებით, იყენებენ გამახურებელ, შხამიან მცენარეებსა და ძირებს, ატყუებენ ადამიანებს – აი, ეს არის თაბუნიძის მალომოო, მაგრამ შხამიანი მცენარე სხვაა და სამკურნალო სხვა.
სწორედ ნუგზარ თაბუნიძის და მისი შვილის, ნიკა თაბუნიძის მალამოა ერთადერთი „თაბუნიძის მალამო“, რომელსაც უკვე 26 საუკუნეა იყენებენ და რომლის მომზადების რეცეპტი მამიდან შვილზე გადადის. თვითმარქვიები ვერასდროს შეძლებენ მსგავსი მალამოს დამზადებას.
ექიმ ნიკა თაბუნიძეს შეგიძლიათ მიმართოთ შემდეგ მისამართზე:
ბათუმი, ტაბიძის ქუჩა #2.
ჩასაწერად დარეკეთ წინასწარ მობილურზე: 568 03 11 03
ექიმ ნუგზარ თაბუნიძეს შეგიძლიათ მიმართოთ შემდეგ მისამართზე:
თბილისი, ვაკე, წყნეთის ქუჩა, მესამე კორპუსი. მობილური: 599 22 11 66
გონიოში იყიდება აგარაკი (ორი სართული), 3 ოთახი (2 საძინებელი), საცხოვრებელი ფართობი: 78 კვ/მ, ეზო: 200 კვ/მ, უზრუნველყოფილი ევრორემონტით, ავეჯით, სველი წერტილით, პარკინგის ადგილით, საუკეთესო ხედებით.სახლი აშენებულია 4 წლის წინ, მდებარეობს ფერდობზე, ტყესთან ახლოს, ზღვიდან 700 მეტრში.
საქართველოში უმსხვილესი საინვესტიციო პროექტის – „შუახევიჰესის“ სამუშაოების 80 პროცენტზე მეტი უკვე დასრულებულია. განხორციელებული ინვესტიციის მოცულობა 416 მილიონი დოლარია. მსგავსი მასშტაბის პროექტი საქართველოში, ენგურის შემდგომ, ბოლო 35 წელია არ განხორციელებულა. მშენებლობას კომპანია „აჭარისწყალი ჯორჯია“ ახორციელებს, რომელიც აჭარისწყლისა და მისი შენაკადების ჰიდრორესურსების ათვისების მიზნით შეიქმნა.
„შუახევიჰესზე“ ამჟამად ორივე დამბის მშენებლობა გეგმის მიხედვით მიმდინარეობს და დათქმულ ვადებში სრულდება. უკვე დასრულებულია მიმყვანი გვირაბის ექსკავაცია, ხოლო გვირაბების მშენებლობა სხალთიდან დიდაჭარამდე და ჩირუხისწყლიდან სხალთამდე – დასასრულს უახლოვდება.
ეს გვირაბები პროექტის უმნიშვნელოვანესი ნაწილია. მათი სიგრძე, ჯამში, 37,2 კილომეტრია. შენდება სამი ძირითადი გვირაბი: მიმყვანი გვირაბი ჩირუხისწყლიდან სხალთამდე – სხალთის ელექტროსადგურის ელექტრომომმარაგებელი, გადამყვანი გვირაბი – სხალთიდან დიდაჭარამდე და მთავარი მიმყვანი გვირაბი – შუახევის ელექტროსადგურის ელექტრომომმარაგებელი.
გვირაბების გაყვანა ბურღვა-აფეთქებითი მეთოდით ხორციელდება, ვიბრაციის მზომავი სპეციალური ხელსაწყოს მეშვეობით. „შუახევიჰესზე“ აღნიშნავენ, რომ გვირაბის გაყვანისას ყოველდღიურ რეჟიმში მოწმდება ვიბრაციის სიმძლავრე.
„შუახევიჰესი“„შუახევიჰესი“
„შუახევიჰესი“ ელექტროენერგიის წარმოებას განახორციელებს წყლის ბუნებრივი დინებით. წყალი ჩირუხისწყლიდან სხალთის დამბაზე ჩამოედინება, დაემატება მდინარე სხალთის წყალი და სხლათა-დიდაჭარის გვირაბის გავლით ჩაედინება დიდაჭარის რეზერვუარში, სადაც დაემატება წყალი მდინარე აჭარისწყლიდან და ღორჯომიდან. დაგროვილი მასა მიმყვანი გვირაბის საშუალებით მიეწოდება შუახევის ელექტროსადგურს.
ელექტროსადგურში წყალი აამოქმედებს ტურბინებს (თითოეულზე 2), რომლებიც დააბრუნებენ ელექტროენერგიის გენერატორების როტორებს.
წყლის მაქსიმალური ოდენობა მოსალოდნელია გაზაფხულზე, თოვლის დნობისას, მარტში, აპრილსა და მაისში. რეზერვუარში წყლის ჭარბი რაოდენობით დაგროვების დროს წყალი, რომელიც ვერ იქნება გამოყენებული ელექტროენერგიის წარმოებისთვის, გაივლის დამბის ავლით, თითოეულ დამბაზე არსებული წყალსაგდების გზით. ელექტროსადგურის ოპერირებისთვის წყლის მინიმალური დონე სავარაუდოდ მოსალოდნელია ზაფხულის თვეებში. რეზერვუარის ავსებას მეტი დრო დასჭირდება და ენერგიის წარმოება შემცირდება. მაგალითისთვის, ოპერირების მინიმალური დონე დიდაჭარის დამბისთვის არის 770 El.
რაც შეეხება რეზერვუარებს, სხალთის რეზერვუარის ზედაპირის მოცულობა დაახლოებით 12 ჰექტარია მაქსიმალური მიწოდების დონეზე, 0,75 მმ3 ტევადობით. დიდაჭარის რეზერვუარის ზედაპირის მოცულობა დაახლოებით 15 ჰექტარია მაქსიმალური მიწოდების დონეზე – 1.2 მმ3 ტევადობით.
შუახევიჰესის მშენებლობა უახლესი ტექნოლოგიების გამოყენებით მიმდინარეობს. მდგრადობისთვის გამოიყენება ბეტონის თანამედროვე დანამატები და უახლესი მოდელის ტურბინები დამცავი საფარით, რათა შემცირდეს ცვეთა და დაცული იყოს უსაფრთხოების ზომების თანამედროვე სტანდარტი. უსაფრთხოება პროექტის ყველა ნაწილში მშენებლობის მთავარი პრიორიტეტია.
„შუახევიჰესის“ მშენებლობას „აჭარისწყალი ჯორჯიას“ კონტრაქტორი კომპანია „აგე ბათუმი“ ახორციელებს. მათ მიერ განხორციელებული ყოველდღიური სამუშაოს მეთვალყურეობისთვის ადგილზე მუშაობს კომპანია „აჭარისწყალი ჯორჯიას“ მფლობელების მიერ დაქირავებული ბრიტანული საინჟინრო კომპანია Mott MacDonald-ი, რომლის თანამშრომლებიც მონიტორინგს უწევენ სამშენებლო სამუშაოებს. ასევე პროექტის დამფინანსებლები და დამოუკიდებელი ინჟინერი კვარტალურად ამოწმებს პროექტის სათანადო ხარისხს, ღირებულებას და გრაფიკს. ამავდროულად კომპანია „აჭარისწყალი ჯორჯიას“ თანამშრომლები უზრუნველყოფენ პროექტის დაგეგმარებასა და სპეციფიკასთან შესაბამისობას.
პროექტის განხორციელებას სხვადასხვა სახელმწიფო ორგანოც უწევს ზედამხედველობას, მათ შორის საქართველოს ენერგეტიკის სამინისტრო და საქართველოს სახელმწიფო ტექნიკური ზედამხედველობის სააგენტო.
„შუახევიჰესის“ მშენებლობა 2016 წელს დასრულდება, ხოლო ჰესის ექსპლუატაციაში გაშვება იგეგმება 2017 წლიდან.
ამჟამად „შუახევიჰესში“ უკვე მიმდინარეობს თანამშრომლების შერჩევა. კომპანია „აჭარისწყალი ჯორჯია“ ცდილობს გამოავლინოს და ტრენინგი ჩაუტაროს რაც შეიძლება ბევრ ქართველ თანამშრომელს. ექსპლუატაციისა და ტექნიკური უზრუნველყოფის გუნდი იქნება ქართველი და უცხოელი სპეციალისტებისგან შემდგარი.
„შუახევიჰესში“ ამბობენ, რომ პროექტი მნიშვნელოვან როლს ასრულებს და განსაკუთრებით დიდ როლს შეასრულებს მომავალში რეგიონის ეკონომიკური განვითარების პროცესში. მეტიც, შესაძლოა ეს უნიკალური მშენებლობა, რომლის მსგავსი მასშტაბის პროექტი საქართველოში 35-ზე მეტი წელი არ განხორციელებულა, ტურიზმის განვითარების მნიშვნელოვან კერადაც იქცეს მაღალმთიან აჭარაში.
სასწრაფოდ იყიდება ან გირავდება ბინა იტალიურ ეზოში. იზოლირებული, კეთილმოწყობილი, ავეჯით, ტექნიკითა და ბუნებრივი აირით უზრუნველყოფილი. აქვს დაშენების პერსპექტივა. იყიდება 21 000 დოლარად ან გირავდება 2 წლით – 15 000 დოლარად.
მისამართი: ბათუმი, დ. თავდადებულის (ყოფილი შაუმიანის) და პუშკინის კვეთა. მობ.: 577 02 44 10
მოსამართლე ირაკლი შავაძემ, საკუთარი დედისა და ბებიის ცემაში ბრალდებული 29 წლის მინდია ქ. სასამართლო დარბაზიდან გაათავისუფლა. ბრალდებულის დაკავებიდან 60 დღე გავიდა. ამ დროში მას შეფარდებული გირაო – 10 ათასი ლარი უნდა გადაეხადა, რაც ოჯახურ ძალადობაში ბრალდებულმა ვერ შეძლო.
მოსამართლემ, მინდია ქ.-ს გირაოს ოდენობა 3 ათას ლარამდე შეუმცირა, რაც ბრალდებულმა ორი თვის განმავლობაში უნდა გადაიხადოს. ირაკლი შავაძის გადაწყვეტილებით, ბრალდებულს ასევე მოეხსნა პატიმრობა, როგორც გირაოს უზრუნველყოფის საშუალება.
„დავუშვათ შევცვალეთ გადაწყვეტილება, სად უნდა იცხოვროთ? თქვენ ხომ საკუთარ დედასა და ბებიაზე ძალადობაში გედებათ ბრალი? როგორც ცნობილია, თქვენ ცალკე ქონება არ გაქვთ” – მიმართა მოსამართლე ირაკლი შავაძემ ბრალდებულს, ვიდრე ის აღმკვეთ ღონისძიებაზე გადაწყვეტილებას მიიღებდა. მინდია ქ.-მ მოსამართლეს უთხრა, რომ სოფელში იცხოვრებს, ცოლის მშობლებთან, ვიდრე სასამართლო საბოლოო გადაწყვეტილებას მიიღებს.
მინდია ქ.-ს ბებიისა და დედის ცემის გარდა, საბრძოლო მასალის მართლსაწინააღმდეგო შენახვასა და სასამართლოს გადაწყვეტილების შეუსრულებლობაშიც ედება ბრალი. გამოძიების მასალების მიხედვით, მან 16 აპრილს იძალადა ბებიზე, 21 აპრილს სასამართლომ მას შემაკავებელი ორდერი დაუმტკიცა, ხოლო 8 მაისს ბრალდებულმა შეურაცხყოფა დედას მიაყენა. ჩხრეკის დროს, მინდია ქ.-ს საძინებლიდან საბრძოლო ვაზნა ამოიღეს.
„არაფერში არ ვცნობ თავს დამნაშავედ,“ – უპასუხა ბრალდებულმა მოსამართლე ინდირა მაშანეიშვილს წინა სხდომაზე. საქმის განხილვას მოსამართლე ირაკლი შავაძე განაგრძობს.
დიპლომატი ზურაბ პატარაძე ერთადერთი კანდიდატია, რომელიც არჩილ ხაბაძის შემცვლელად სახელდება. კანონის თანახმად, მთავრობის მომავალი თავმჯდომარე საქართველოს პრეზიდენტმა უნდა წარუდგინოს აჭარის უმაღლეს საბჭოს. იმ შემთხვევაში, თუ უმაღლესი საბჭოს წევრების ნახევარზე მეტი ანუ მინიმუმ 11 წევრი მას მხარს დაუჭერს, აჭარის მთავრობის თავმჯდომარე არჩეულად ჩაითვლება. როგორია აჭარის უმაღლესი საბჭოს წევრების განწყობები მის მიმართ, ვინ აპირებს მისი კანდიდატურის მხარდაჭერას, რომელმა მინისტრმა უნდა დატოვოს პოსტი არჩევნებამდე? „ბათუმელებთან“ თავიანთი პოზიციები დააფიქსირეს უმაღლესი საბჭოს ფრაქციის თავმჯდომარეებმა და წევრებმა.
ფრაქცია „ქართული ოცნების“ თავმჯდომარე, ალექსანდრე ჩიტიშვილი ამბობს, რომ ის კარგად იცნობს ზურაბ პატარაძეს და კანდიდატურის წარდგენის შემთხვევაში მას სრული მხარდაჭერა ექნება. ჩიტიშვილის მთავარი არგუმენტი არის ის, რომ „ზურაბ პატარაძე ჩამოყალიბებული დიპლომატია“.
„მას ძალიან დიდი კავშირები აქვს ყაზახეთში, სადაც ის მუშაობდა, ბევრ ინვესტორს იცნობს, რაც ძალიან სჭირდება ჩვენს რეგიონს,“ – ამბობს დეპუტატი.
„ბათუმელების“ კითხვაზე – უნდა შეიცვალოს თუ არა რომელიმე მინისტრი და კონკრეტულად ვინ? ალექსანდრე ჩიტიშვილს კითხვა მხოლოდ ფინანსთა და ეკონომიკის მინისტრზე უჩნდება:
„ფინანსთა მინისტრი უშუალოდ მიბმულია მთავრობაზე, ამიტომ უნდა შეიცვალოს“. რაც შეეხება დანარჩენ სამ მინისტრს, ჩიტიშვილის აზრით, „ეს არის სამთვიანი მთავრობა“ და ზურაბ პატარაძე ვისაც წარუდგენს საბჭოს, იმას დაუჭერს მხარს.
აჭარის მთავრობის თავმჯდომარის პოსტზე ზურაბ პატარაძის კანდიდატურის მიმართ პოზიტიურად არის განწყობილი ფრაქცია „ქართული ოცნება – თავისუფლების“ თავმჯდომარე, აკაკი ძნელაძეც: „ვიცნობ ამ ადამიანს და თუ დასახელდა კანდიდატად, აუცილებლად დავუჭერ მხარს“. აკაკი ძნელაძის აზრით, პატარაძის მთავარი ღირსება აქტიურობა, კომუნიკაბელურობა და ინტელექტია. „პროფესიონალი დიპლომატია და ყველა მიმართულებით ჩანს მისი პიროვნული კარგი თვისებები. რაც შეეხება მინისტრებს, ცალსახაა, რომ დავით ბალაძე არ უნდა დარჩეს, დანარჩენი სალაპარაკო თემაა.“
ასმათ დიასამიძე, ფრაქცია „თანასწორობის“ თავმჯდომარეა. ამბობს, რომ მას პატარაძისგან დიდი მოლოდინები არ აქვს, რადგან არჩევნებამდე ცოტა დროა დარჩენლი და რეგიონს არ აქვს იმის ფუფუნება, მინისტრები და მთავრობის თავმჯდომარე სამ-სამი თვით აირჩიოს: „მინისტრებს რაც შეეხება, ვფიქრობ, ნაწილმა ამოწურა თავისი თავი, მათ შორის ფინანსთა მინისტრმა, რომელსაც საკმაოდ დიდი პრობლემები ჰქონდა უმაღლეს საბჭოსთან, მაგრამ როცა მოვისმინე მისი კომენტარი, სადაც ამბობს, რომ, მეგობრობს პატარაძესთან, ალბათ თანამდებობაზე დარჩება“.
აჭარის უმაღლესი საბჭო
ასმათ დიასამიძე ამბობს, რომ ის პატარაძის არგუმენტებს დაელოდება და შემდეგ გადაწყვეტს, ხმა მისცეს თუ არა.
როგორც თავად ამბობს, ზურაბ პატარაძეს, „როგორც კარგ დიპლომატს“, კარგად იცნობს ფრაქცია „დემოკრატიული აჭარის“ თავმჯდომარე სულხან ღლონტიც. მისი აზრით, არჩევნებამდე მთავრობის თავმჯდომარის არჩევას სახელმწიფოებრივი მნიშვნელობა აქვს: „ეს იქნება დროებითი ხელისუფლება, მაგრამ თუ არ იქნება მისი კანდიდატურა მხარდაჭერილი, ბევრი მიმართულებით შეექმნება პრობლემა რეგიონს. ზურაბ პატარაძეს კონკრეტული პროგრამები აქვს აჭარასთან დაკავშირებით. გადაწყვეტილების მიმღების პრობლემა გვაქვს მთელი ქვეყნის მასშტაბით და წარმოიდგინეთ, მთავრობის თავმჯდომარე თუ არ გვეყოლება, რა მდგომარეობაში იქნება მთელი ბიუროკრატია“.
რაც შეეხება მინისტრების ცვლილებას, სულხან ღლონტი ამბობს, რომ ამ საკითხზე არ უფიქრია: „მთავარია, არჩევნების პერიოდში რეგიონს ჰყავდეს ხელისუფლება და მე არ ვაპირებ მონაწილეობას კრიზისის შექმნაში“.
უმაღლესი საბჭოს დამოუკიდებელი დეპუტატის, მედეა ვასაძის აზრით, კრიზისზე საუბარი არარეალურია: „კრიზისი ცალსახად არ იქნება, თუნდაც იმიტომ, რომ ახალი შემადგენლობის არჩევამდე მოვალეობას ასრულებს ძველი შემადგენლობა“. დეპუტატი ზურაბ პატარაძის კანდიდატურას მხარს არ დაუჭერს, რადგან როგორც გვეუბნება, ის „ალაგ-ალაგ ოპოზიციონერობას“ არ აპირებს: „კენჭისყრაში მონაწილეობას არ მივიღებ. იმდენად, რამდენადაც გახლავართ ოპოზიცია და ოპოზიცია არასდროს არ იღებს პასუხისმგებლობას მთავრობისთვის ნდობის გამოცხადებაზე“.
მედეა ვასაძე ამბობს, რომ ის ესაუბრა მთავრობის თავმჯდომარეობის კანდიდატს, თუმცა მისი პასუხები გარკვეულ საკითხებზე სიახლე არ ყოფილა: „თუმცა, ჩემთან შეხვედრის ინიციატივას ვაფასებ, რაც არ ემსახურებოდა იმას, რომ მე მისთვის მხარი დამეჭირა“.
მედეა ვასაძეს მიაჩნია, რომ ახალი მთავრობის შემადგენლობაში არ უნდა იყოს აჭარის ფინანსთა და ეკონომიკის მინისტრი წარდგენილი, სხვა მინისტრებს რაც შეეხება, არჩევნებამდე ცოტა დროა დარჩენილი და პატარაძემ „ამ ძველი რესურსით უნდა მიიტანოს ხელისუფლება“.
ზურაბ პატარაძის კანდიდატურის მხარდაჭერას არ აპირებს ფრაქცია „ნაციონალური მოძრაობა – მაჟორიტარების“ თავმჯდომარე ირაკლი ბარამიძეც, რადგან მისი აზრით, სამ თვეში ის ვერაფერს შეცვლის: „ისევ დაიწყება „ჯერ არ იცის“, „ჯერ შეისწავლის“, „კომისიას შექმნის“- ასეთი ტექსტები. ეს იქნება ამომრჩევლის შეცდომაში შეყვანა, რადგან არჩილ ხაბაძეს არაფერი ჰქონდა მოსახლეობისთვის სათქმელი, ეს შეეცდება ყველაფერი ძველს დააბრალოს და იტყვის, რომ ყველაფერს მომავალში გამოასწორებს“.
რაც შეეხება მინისტრებს, ირაკლი ბარამიძის აზრით, პატარაძის გადასაწყვეტია გააგრძელებს თუ არა ის მოქმედ მინისტრებთან ერთად მუშაობას: „არჩილ ხაბაძის წარუმატებელი მოღვაწეობა პირდაპირ კავშირშია ჩვენი მინისტრების მოღვაწეობასთან“. თუმცა იმაში დარწმუნებულია, რომ ფინანსთა და ეკონომიკის მინისტრმა თანამდებობა აუცილებლად უნდა დატოვოს.
ფრაქცია „ერთიანი ნაციონალური მოძრაობის“ თავმჯდომარე, რობერტ ჩხაიძე ამბობს, რომ ზურაბ პატარაძეს მხარს იმიტომ არ დაუჭერს, რომ ბათუმელი არ არის. „ბათუმელი არ არის და აქედან იქნება ჩემი ამოსავალი გადაწყვეტილების მიღების დროს“. მისი აზრით, უკეთესი იქნება, თუკი ხელისუფლება მთავრობის თავმჯდომარის პოსტზე ადგილობრივ კადრს შეარჩევს.
რაც შეეხება მინისტრების ცვლილებას, რობერტ ჩხაიძის აზრით, ისინი ისედაც დროებით მოვალეობას ასრულებენ. „რაც ხდება, ის არ არის მხოლოდ ერთი კაცის ბრალი, არამედ მთელი გუნდის, ცუდად გაკეთებული საქმისთვის მთავრობის თავმჯდომარე მიდის, ვფიქრობ, გუნდიც თან უნდა წაყვეს“.
გიორგი მარგველაშვილს პატარაძის კანდიდატურა ჯერ არ წარუდგენია უმაღლესი საბჭოსთვის. პრეზიდენტს ამისთვის კიდევ რამდენიმე დღე აქვს. თუ უმაღლესი საბჭო არ დაამტკიცებს საქართველოს პრეზიდენტის მიერ წარდგენილ კანდიდატურას, პრეზიდენტი უფლებამოსილია 10 დღის ვადაში უმაღლეს საბჭოს დასამტკიცებლად წარუდგინოს იგივე ან სხვა კანდიდატურა. იმ შემთხვევაში, თუ აჭარის უმაღლესმა საბჭომ ზედიზედ ორჯერ არ დაამტკიცა აჭარის მთავრობის თავმჯდომარის კანდიდატურა, საქართველოს პრეზიდენტს აქვს უმაღლესი საბჭოს დათხოვნის უფლება
აჭარის მთავრობის ინფორმაციით, აჭარაში განვითარებული სტიქიური მოვლენების გამო, მიმდინარეობს სტიქიის შედეგად დაზიანებული სახლების გეოლოგიური შესწავლა. მთავრობის ინფორმაციით, ქობულეთის მუნიციპალიტეტში სტიქიის შედეგად დაზარალებულმა შვიდმა ოჯახმა გამგეობაში შეიტანა განაცხადი, რის შემდეგაც კომისიის წევრები იმსჯელებენ მათი საცხოვრებლის ქირის ანაზღაურების საკითხზე.
„ხელვაჩაურის მუნიციპალიტეტში დაზიანება აღინიშნა 27 ლოკაციაზე. ძირითადად დაზიანებულია გზები და საკარმიდამო ნაკვეთები. კაპრეშუმში მცხოვრები სტიქიის შედეგად დაზარალებული ერთი ოჯახის ბინის ქირა გამგეობამ უზრუნველყო“-ნათქვამია ოფიციალურ განცხადებაში.
ამავე ინფორმაციით, შუახევში დაზარალებული სამი ოჯახი, სახელმწიფო სასწრაფო დახმარების პროგრამაში ჩაერთვება.
მთავრობის ინფორმაციით, ამ დროისთვის არცერთი სოფელი გარესამყაროს მოწყვეტილი არ არის. „არც უშუქობა და უგაზობაა სადმე. მხოლოდ შუახევში მიეწოდება მოსახლეობას გრაფიკით წყალი“- ნათქვამია მთავრობის განცხადებაში.
„ადგილებზე გასულია და მუშაობენ გეოლოგები, საგზაო სამსახურის ტექნიკა და ადგილობრივი კეთილმოწყობის სამსახურები ითვლიან ზარალს“.
მოკლული ჯარისკაცის – როინ შავაძის მეუღლეს, ციცინო შავაძეს დაზარალებულის უფლებამონაცვლის სტატუსი მიანიჭა პროკურატურამ. ადვოკატ რამინ პაპიძის შეფასებით, ხელისუფლებამ ეს სტრასბურგის სასამართლოს თვალის ასახვევად გააკეთა, რადგან მკვლელობიდან ზუსტად 8 წელი გავიდა და გამოძიება ჯერ კიდევ არ დასრულებულა. როინ შავაძის მკვლელობა საქართველოს საერთო სასამართლოებს არ განუხილავთ.
როინ შავაძის ქვრივმა გამოძიების დაუსრულებლობის გამო მიმართა ევროპის ადამიანის უფლებთა დაცვის სასამართლოს. საქმის განხილვა ჯერ არ დასრულებულა. “ივანიშვილის ხელისუფლებამ სტრასბურგის სასამართლოს ჩვენი საჩივრის პასუხად მისწერა, რომ როინ შავაძის მკვლელობით როინ შავაძის ოჯახს არანაირი მატერიალური და მორალური ზიანი არ მისდგომია”, – აცხადებს ადვოკატი რამინ პაპიძე.
23-ე ბატალიონის სერჟანტი, როინ შავაძე ცხინვალის ბრძოლებიდან დაბრუნების მეორე დღეს, 16 აგვისტოს, ბათუმში ნიღბიანმა სპეცრაზმელებმა დააკავეს. თვითმხილველების თქმით, სპეცოპერაციის დროს ნიღბიანები იძახდნენ, რომ სამშობლოს მოღალატეს აკავებდნენ. საღამოს როინ შავაძე ოჯახის წევრებმა მორგში მკვდარი იპოვეს. ოფიციალური ინფორმაციით, სერჟანტი ნარკოტიკული საშუალების შენახვა-რეალიზაციისთვის დააკავეს, ხოლო მისი ლიკვიდაცია გაქცევის მცდელობის გამო მოხდა. ციცინო შავაძის თქმით, ის სასტიკად იყო ნაწამები: „მისი სხეული ტყვიებით იყო დაცხრილული. თითქმის ყველა თითი, მკლავები და ფეხები დამტვრეული, ხორცები დაგლეჯილი ჰქონდა“.
ამ წუთებში, აჭარის მთავრობის სახლთან, საპატრულო პოლიციაა მობილიზებული. პოლიციამ საპროტესტო აქციის მონაწილეებს რუსთაველის ქუჩის გადაკეტვის უფლება არ მისცა.
მთავრობის სახლის წინ იპოთეკით დაზარალებული პირები უკვე მერვე დღეა შიმშილობენ. აქციის მონაწილეები მთავრობას გამოსახლების შეჩერებას და გრძელვადიანი კრედიტების გაცემას სთხოვენ.
იპოთეკით დაზარალებულთა აქცია აჭარის მთავრობის სახლთან. ფოტო: როინ გუნდაძე
მას შემდეგ რაც ბათუმში მდებარე ტბამ დაჭაობება დაიწყო, ტბაზე ნავით სეირნობა და თევზჭერა აიკრძალა. ბათუმის მერიის ტურისტული ობიექტების მართვის სააგენტოს ხელმძღვანელის, ალექსანდრე თევზაძის განცხადებით, სანამ ტბა მომწამვლელი წყალმცენარეებისგან არ გაიწმინდება, მასზე ნავით სეირნობა აკრძალულია.
„ტბაში დაფიქსირებულია ტოქსიკური წყალმცენარეების არსებობა, ამიტომ, თავი რომ დავიზღვიოთ, ნავით სეირნობა შევზღუდეთ“.
ალექსანდრე თევზაძის თქმით, ტბის გაწმენდაზე სპეციალისტების ჯგუფი მუშაობს, „დასკვნები მზადაა და მალე გადმოგვიგზავნიან. ტბის დაჭაობების მიზეზი ნაპოვნია და იგეგმება სამუშაოები, მათ შორის თევზის ჩაყრის, სპეციალური ბაქტერიების მომრავლება, დელფინარიუმიდან ტბაში ჩამდინარე წყლის გადასროლა უნდა მოხდეს კოლექტორისკენ და ა.შ“.
ნურიგელის ტბაში გაჩენილი მომწამვლელი წყალმცენარეების გამო, ტბაზე ნავით საირნობა აიკრძალა
რა დრო დასჭირდება მომწამვლელი წყალმცენარეებისგან ტბის გაწმენდას და ტბაში ბალანსის აღდგენას, ზუსტი დრო ვერ სახელდება: „დიდი დრო არ დასჭირდება, შეიძლება მალე აღდგეს. მთავარია რომ მომწამვლელი მცენარეების ყვავილობა აღარ იქნება“-გვეუბნება ალექსანდრე თევზაძე.
ბათუმის ტბამ დაჭაობება რამდენიმე თვის წინ დაიწყო, ტბაში გაჩენილი პრობლემა კი ცოტა ხნის წინ გახდა ცნობილი, როცა ქვირითობისას ტბაში უჟანგბადოს გამო თევზები დაიღუპნენ.
შპს „ცენტრ პოინტი აჭარას“ ხელმძღვანელების დაკავებასთან დაკავშირებით, საქართველოს პროკურატურა ინფორმაციას ავრცელებს. უწყების ინფორმაციით, საქართველოს პროკურატურამ შუამდგომლობით მიმართა თბილისის საქალაქო სასამართლოს შპს „ცენტრ პოინტ ჯგუფი“-ს დამფუძნებელი მაია რჩეულიშვილის, ამავე ჯგუფის სამეთვალყურეო საბჭოს თავმჯდომარე გურამ რჩეულიშვილის, შპს ,,ცენტრ პოინტი აჭარა“-ს დირექტორების ირაკლი მინდელის და სალომე ჩარკვიანის დაკავების შესახებ.
„ბრალდების მხარემ შუამდგომლობა კანონით გათვალისწინებულ სხვა საფუძვლებთან ერთად დაასაბუთა იმ გარემოებების გათვალისწინებით, რომ ბრალდებული მაია რჩეულიშვილი, და მასთან დაკავშირებული პირები მენაშენეებს მოუწოდებენ, რომ საგამოძიებო ორგანოს მიაწოდონ ცრუ ინფორმაცია, რომ თითქოსდა მათი კანონიერი ინტერესები დაკმაყოფილებულია და არანაირი სახის პრეტენზია არ გააჩნიათ, რითაც ცდილობენ გამოძიების შეცდომაში შეყვანას.
ასევე მოწმეთა ჩვენებით დგინდება, რომ მაია რჩეულიშვილი და შპს „ცენტრ პოინტ ჯგუფის“ სხვა წარმომადგენლები კვლავაც დამატებით ითხოვენ თანხებს მენაშენეებისაგან, რამაც კვლავაც შეიძლება დააზარალოს ისინი; ამავდროულად, მენაშენეებისაგან დამატებით მოზიდულ თანხებს ასევე ეუფლებიან შპს „ცენტრ პოინტ ჯგუფი“-ს დამფუძნებლები და მათთან დაკავშირებული პირები. თბილისის საქალაქო სასამართლომ ნაწილობრივ დააკმაყოფილა ბრალდების მხარის შუამდგომლობა და სასამართლოს მიერ გაცემული განჩინების საფუძველზე დიდი ოდენობით, ჯგუფურად სხვისი ქონების გაფლანგვის ბრალდებით 2016 წლის 10 ივლისს ბრალდებულად დაკავებული იქნა სალომე ჩარკვიანი და ირაკლი მინდელი, ხოლო გურამ რჩეულიშვილის დაკავება ამ დრომდე ვერ მოხდა, რადგან იგი ემალება გამოძიებას. რაც შეეხება მაია რჩეულიშვილს, სასამართლომ მისი დაკავების შუამდგომლობა არ დააკმაყოფილა, რის გამოც მის მიმართ დაკავების გარეშე დაიწყო სისხლისსამართლებრივი დევნა“-ნათქვამია პროკურატურის განცხადებაში, რომელიც დღეს 11 ივლისს, პროკუტარურის ოფიციალურ ვებგვერდზე გავრცელდა.
ამავე ინფორმაციაში პროკურატურა წერს: „ვინაიდან გურამ რჩეულიშვილი თავს არიდებს საგამოძიებო ორგანოში გამოცხადებას, მის მიმართ დაუსწრებლად გამოტანილია დადგენილება ბრალდებულად პასუხისგებაში მიცემის შესახებ. კანონმდებლობით გათვალისწინებული პროცედურების დაცვით მის მიმართ გამოცხადდება ძებნა“.
პროკურატურის ინფორმაციით, შპს „ცენტრ პოინტ ჯგუფი“ -სგან სარეკლამო კამპანიით 2005 წლის 2 მაისიდან – 2010 წლის 8 სექტემბრამდე პერიოდში მოქალაქეებისგან მოზიდულ იქნა ფულადი სახსრები 64 219 606 ლარის ოდენობით. „მიუხედავად იმისა, რომ აღნიშნული თანხები უნდა მიმართულიყო მშენებლობისთვის, 2004 წლის 23 ივლისიდან – 2006 წლის 28 ნოემბრამდე პერიოდში სალომე ჩარკვიანმა სალაროდან, მენაშენეთა მიერ შეტანილი თანხა 3 756 017.41 ლარის ოდენობით არამიზნობრივად გაფლანგა და თანხა არ მოხმარდა კონკრეტული ობიექტის მშენებლობას.
გამოძიებით ასევე დადგინდა, რომ ფილიალის დირექტორად ირაკლი მინდელის დანიშვნის შემდეგ, მან 2006 წლის 28 ნოემბრიდან – 2010 წლის ოქტომბრამდე პერიოდში არამიზნობრივად გაფლანგა შპს „ცენტრ პოინტ აჭარას“-ს მენაშენეთა მიერ საცხოვრებელი კომპლექსის მშენებლობისთვის შეტანილი თანხა 15 984 828.9 ლარის ოდენობით. ამდენად, ერთობლიობაში მაია რჩეულიშვილმა ირაკლი მინდელთან და სალომე ჩარკვიანთან ერთად გაფლანგა მენაშენეთა კუთვნილი ფულადი თანხა 19 740 845 ლარი“-ნათქვამია პროკურატურის განცხადებაში.
პროკურატურის ინფორმაციით, დევნა დაწყებულია საქართველოს სსკ-ის 182-ე მუხლის მეორე ნაწილის „ა“ და მესამე ნაწილის „ბ“ ქვეპუნქტებით გათვალისწინებული დანაშაულის ნიშნებით, რაც სასჯელის სახედ და ზომად თავისუფლების აღკვეთას შვიდიდან თერთმეტ წლამდე ვადით ითვალისწინებს.
კვარიათიდან მწვანე კონცხამდე არსებულ სანაპირო ზოლიდან და პლაჟიდან, რომელიც ბათუმის საკუთრებაშია, ქალაქის ბიუჯეტში ყოველწლიურად მხოლოდ 480 ათასი ლარი შედის. ქალაქის სანაპირო ზოლი, თითქმის მთლიანად, ბათუმის მერიას „ბათუმის ბულვარისთვის“ აქვს გადაცემული მართვაში. გადაცემული ქონების განკარგვიდან შემოსული თანხა კი „ბულვარის“ ბიუჯეტში ირიცხება. „ბათუმელები“ შეეცადა დაედგინა, რა შემოსავლები მოაქვს სანაპირო ზოლს მთლიანობაში. მერიაში ეს მონაცემები დათვლილი არ აქვთ.
შემოსავლები ბათუმის ბიუჯეტში
ზღვის სანაპირო ზოლში ბათუმის მერიას გრძელვადიან სარგებლობაში [იჯარით, აღნაგობის უფლებით] ამ დროისთვის საერთო ჯამში 80 ათას კვ/მ-დე არასასოფლო-სამეურნეო დანიშნულების მიწის ნაკვეთები და 1416 კვ/მ შენობა-ნაგებობა აქვს გაცემული. აქედან, ზოგი 9-10, 29 და 49 წლის ვადითაც კი.
იჯარით გაცემულ ნაკვეთებზე ძირითადად, კაფე-ბარები და რესტორნები ფუნქციონირებს. ამ ობიექტებიდან ქალაქის ბიუჯეტში შემოსავალი ძირითადად საიჯარო ქირაა, რაც მერიის მიერ მოწოდებული მონაცემებით, ყოველწლიურად ჯამში მხოლოდ 481 585 ლარია.
მოიჯარეები იხდიან სხვა გადასახადებსაც, თუმცა ბათუმის ბიუჯეტში, ფაქტობრივად, მხოლოდ ქონების გადასახადი შედის, რაც ქონების საშუალო საბალანსო ღირებულების 1%-ია წელიწადში. მერიაში არ აქვთ კონკრეტული ინფორმაცია, თუ რამდენია უშუალოდ სანაპირო ზოლიდან ქონების გადასახადით მიღებული შემოსავალი: „ქონების გადასახადის გამიჯვნა შპს-ს შემთხვევაში რთულია, ვინაიდან შესაძლოა ქალაქის სხვა ნაწილშიც ჰქონდეს კომპანიას ქონება და გადასახადს ერთიანად იხდიდეს“.
რაც შეეხება სხვა გადასახადებს, შპს-ს შემთხვევაში საშემოსავლო გადასახადი ირიცხება აჭარის ავტონომიური რესპუბლიკის ბიუჯეტში, მოგების გადასახადი და დღგ კი სახელმწიფო ბიუჯეტში. რაც შეეხება ქალაქის ბიუჯეტს, აქ მხოლოდ ინდმეწარმე იხდის საშემოსავლო გადასახადს.
მერიას სულ 33 ნაკვეთი და ერთი შენობა-ნაგებობა [სანრემო] აქვს იჯარით გაცემული და აქედან 20 მათგანი სწორედ შპს-ზეა გაცემული.
მერიაში გვითხრეს, რომ ზოგადად, სანაპირო ზოლს რამდენი შემოსავალი მოაქვს, ამის დათვლა შესაძლებელია, თუმცა დათვლილი არ არის: „თუ გვეცოდინება ქონების შეფასება აუდიტის მიერ, დათვლილი ქონების გადასახადი; დასაქმებულთა რაოდენობას და მათ საშუალო ხელფასს ვიანგარიშებთ, გვეცოდინება რამდენია საშემოსავლო გადასახადი და ა.შ. … ამ კუთხით ღრმა ანალიზია საჭირო, რაც მერიაში ჯერჯერობით არავის გაუკეთებია“.
მერიის მიერ უსასყიდლოდ გადაცემული ქონება
სანაპირო ზოლში მდებარე და ბათუმის მუნიციპალიტეტის საკუთრებაში არსებული უძრავი ქონება [ძველი და ახალი ბულვარი, ასევე პლაჟი – კვარიათიდან მწვანე კონცხის ჩათვლით] მერიას, საკრებულოს თანხმობით, უსასყიდლო უზუფრუქტით, ძირითადად, სსიპ „ბათუმის ბულვარზე“ აქვს გადაცემული.
კვარიათი
უსასყიდლო უზუფრუქტითა თუ აღნაგობის უფლებით მერიის მიერ გაცემულია 385 367 კვ/მ ფართობის ნაკვეთი და 182 კვ/მ შენობა-ნაგებობა [აქედან 3 596 კვ/მ მიწის ნაკვეთი შს სამინისტროს საქართველოს სასაზღვრო პოლიციისთვის [თამარის დასახლებაში] დანარჩენი კი „ბათუმის ბულვარზე“.
მერიის ინფორმაციით, სანაპირო ზოლში უძრავი ქონების გასხვისებას ან/და სარგებლობაში გადაცემას ბათუმის მუნიციპალიტეტის მერია ამ ეტაპზე არ გეგმავს. ამასთან, უშუალოდ „ბათუმის ბულვარიდან“ ქალაქის ბიუჯეტში თანხა არ შედის.
ბულვარის შემოსავლები და ხარჯი
„ბათუმის ბულვარისგან“ მიღებული ინფორმაციით ირკვევა, რომ ბულვარში 2014-2015 წლებში აჭარის ბიუჯეტიდან 10 208 122 ლარი დაიხარჯა. ამ ორი წლის განმავლობაში კი ბულვარის შემოსავლებმა 2 მილიონიც კი ვერ შეადგინა [ბულვარის 2014 წლის მთლიანი შემოსავალი შეადგენდა 769 460 ლარს, ხოლო 2015 წლის – 1 178 979 ლარს].
ამ შემოსავლებში შედის მთელი იმ ქონების განკარგვით მიღებული შემოსავალი, რა ქონებაც მართვის უფლებით ბულვარზეა გადაცემული – ეს იქნება სეზონურად მიწის ნაკვეთების, ასევე პლაჟების აუქციონით გაცემა, გრძელვადიანი იჯარა თუ სხვა ეკონომიკური აქტივობები.
ბულვარის ადმინისტრაციაში აცხადებენ, რომ არავის აქვს უფლება მასზე იჯარით ან აუქციონით გადაცემული პლაჟი შემოსაზღვროს ან სხვა დამსვენებელი არ შეუშვას: „ასეთ ფაქტებს ჩვენ გავაკონტროლებთ… პლაჟები გაიცემა შეზლონგების, ქოლგებისა და საშხაპეების განსათავსებლად, ხოლო ჩვენ ვაძლევთ მიწას [ბუნგალოებისთვის], რომ ააშენოს დროებითი, მსუბუქი კონსტრუქცია 3-4 თვით და სეზონი რომ დასრულდება, დაშალოს და გაიტანოს“.
მწვანე კონცხი
ბულვარის ადმინისტრაციის მიერ „ბათუმელებისთვის“ მოწოდებული მონაცემებით, დღეის მდგომარეობით, ბულვარს გრძელვადიანი იჯარით გაცემული აქვს ბულვარის ტერიტორიაზე არსებული 16 სავაჭრო ჯიხური – 3 წლით, კაფე-ბარი თავდადებულის ქუჩის გასწვრივ – 10 წლით, ორი საპირფარეშო – 3 წლით და კაფე-ბარი სასტუმრო „ინტურისტის“ გასწვრივ. აქედან კი წლიური შემოსავალი, საიჯარო თანხა, შეადგენს 154 676 ლარს. სხვა მსხვილი თუ მცირე ობიექტები, როგორც ზემოთ აღვნიშნეთ, ბულვარში და სანაპირო ზოლში იმ ნაკვეთებზე ფუნქციონირებენ, რომლებიც გრძელვადიანი იჯარით ბათუმის მერიის მიერაა სხვადასხვა დროს გაცემული.
ბულვარი, რომელიც ბათუმის ქონებას განკარგავს, ქალაქის ბიუჯეტში თანხას არ იხდის, თუმცა გადასახადებს საკუთარი შემოსავლებიდან იხდის სახელმწიფო ბიუჯეტში. ადმინისტრაციის მიერ მოწოდებული ინფორმაციით 2014 წელს სახელმწიფო ბიუჯეტში გადახდილი იქნა დღგ და მოგების გადასახადი – 244 212 ლარი, ხოლო 2015 წელს – 317 214 ლარი.
ბულვარის ადმინისტრაციაში აცხადებენ, რომ მიმდინარე წელს უკვე შემოსულია 1 141 241 ლარი, მაშინ როცა დაგეგმილი იყო 900 000 ლარი შემოსავლის მიღება. ბულვარი აუქციონის გამოცხადებას განაგრძობს. წელს, როგორც შარშან, კვარიათიდან მწვანე კონცხამდე 30 ბუნგალო იქნება ბულვარის მიერ გაცემულ ნაკვეთებზე. აქედან მხოლოდ სამი იქნება ბათუმში.
„ბათუმის ბულვარი“ აუდიტის დასკვნაში
სსიპ „ბათუმის ბულვარი“ აჭარის ფინანსთა და ეკონომიკის სამინისტროს დაქვემდებარებაშია. სამინისტროს 2015 წლის ფინანსური აუდიტის ანგარიშში აღნიშნულია, რომ გასულ წელს სსიპ „ბათუმის ბულვარში“ სრულად არ ხდებოდა ეკონომიკურ საქმიანობაში გამოყენებული აქტივების, ქონების გადასახადით დაბეგვრა და შესაბამისი ბუღალტრული აღრიცხვა.
მაგალითად, ქონების გადასახადით დასაბეგრ ბაზაში არ არის შეყვანილი ბულვარის ადმინისტრაციული შენობა, რომელიც ბულვარზე უსასყიდლო უზუფრუქტით გადაცემულია ბათუმის მერიის მიერ და რომელიც გამოიყენებოდა ეკონომიკურ საქმიანობაში.
ბულვარი / თორნიკე თავაძის ფოტო
სახელმწიფო აუდიტი ასევე მიუთითებს, რომ „ბათუმის ბულვარში“ სრულად არ ხდებოდა საიჯარო ხელშეკრულებით გათვალისწინებული საიჯარო ქირისა და პირგასამტეხლოს დარიცხვა: „2015 წელს საიჯარო ქირის გადაუხდელობის გამო შეწყვეტილი იქნა სამი ხელშეკრულება, თუმცა მოიჯარეებს არ დაკისრებიათ ხელშეკრულებებით გათვალისწინებული პირგასამტეხლო და ასევე შეწყვეტამდე საიჯარო საგნით სარგებლობის ქირა. მოიჯარესათვის თანხის დაკისრების შემთხვევაში, შესაძლებელი იყო 4 396 ლარის შემოსავლის მიღება. აღსანიშნავია, რომ ხელშეკრულების შეწყვეტამდე, იმ დროს, როდესაც ქონება არ იყო უფლებრივად თავისუფალი, იმავე ქონებაზე გამოცხადებულია ახალი აუქციონი“.
აუდიტის დასკვნაში ასევე აღნიშნულია, რომ „ბათუმის ბულვარსა“ და შპს „დიზაინს“ შორის გამარტივებული შესყიდვის საშუალებით გაფორმებული ხელშეკრულების ფარგლებში, ბულვარის ტერიტორიის მოპირკეთებითი სამუშაოების ღირებულების სახით ანაზღაურებულია 18 227 ლარი. ანგარიშსწორება ამ შემთხვევაშიც განხორციელებულია ფაქტობრივი დანახარჯების შესახებ ინფორმაციის წარმოუდგენლობის პირობებში, რაც დარღვევაა“.
გასულ წელს შპს „ვლს“-მა აიღო ვალდებულება ბათუმის ბულვარში არსებული 7 შადრევნის მოვლა-ექსპლუატაციასთან დაკავშირებით. ხელშეკრულების ღირებულება 199 904 ლარით განისაზღვრა და ითვალისწინებდა მთელ რიგ სამუშაოებს. „მიუხედავად ამისა, მიღება-ჩაბარების აქტებში არ არის აღნიშნული შესრულებული სამუშაოების სახეობები და მოცულობები და მითითებულია მხოლოდ „ვლს“-ის თანამშრომლის შრომის ანაზღაურების თანხა“.
ბულვარის ადმინისტრაცია
გასულ წელსვე შპს „მარეთი 777“-თან გაფორმდა ხელშეკრულებები ბულვარის ტერიტორიაზე სხვადასხვა სამუშაოს შესასრულებლად სპეციალური ავტოტექნიკის საშუალებით. ხელშეკრულებების ღირებულება 39 999 ლარით და 18 776 ლარით განისაზღვრა. „ამ შემთხვევაშიც, შესრულებული სამუშაოების მიღება-ჩაბარების აქტებში არ არის აღნიშნული შესრულებული სამუშაოების სახეობები და მოცულობები და მითითებულია მხოლოდ დაქირავებული ტექნიკის საათობრივი და რაოდენობრივი დატვირთვა – აღნიშნულია აუდიტის დასკვნაში – რის შედეგად, სსიპ „ბათუმის ბულვარში“, ზემოთ აღნიშნული გარემოებების გათვალისწინებით, არასათანადო დოკუმენტაციის საფუძველზე გახარჯულია 258 679 ლარი“.
„ბათუმის ბულვარში“ ტექნიკური ზედამხედველობის სამსახურის უფროსზე, პირად მფლობელობაში არსებული ავტომობილის სამსახურებრივი დანიშნულებით გამოყენებისათვის, 2015 წლის განმავლობაში გაცემულია 276 ლიტრი საწვავი. „აუდიტის პერიოდში ვერ იქნა წარმოდგენილი ავტოტრანსპორტის სამსახურებრივი დანიშნულებით გამოყენების დამადასტურებელი დოკუმენტები… ზოგადად, სსიპ „ბათუმის ბულვარში“ ტრანსპორტის, ტექნიკისა და იარაღის ექსპლუატაციისა და მოვლა-შენახვის ხარჯმა 51 800 ლარი შეადგინა. ცალკეულ შემთხვევებში საავტომობილო და მექანიკური ტექნიკის შეკეთებაზე შედგენილ მიღება-ჩაბარების აქტებში არ არის მითითებული, თუ რომელი ტექნიკური საშუალება შეკეთდა“.
ბულვარისა და მისი კონცეფციის ბედი
აუდიტის დასკვნაში „ბულვარის კონცეფციაზე“ გაფორმებული ხელშეკრულებაც მოხვდა. აჭარის მთავრობის განკარგულებით, „ბათუმის ბულვარს“ მიეცა უფლება ბულვარის განვითარების კონცეფციის შემუშავება-დაგეგმარებისა და ტოპოგრაფიული გეგმის შედგენის მომსახურების სახელმწიფო შესყიდვა განეხორციელებინა გამარტივებული ფორმით. აღნიშნულის საფუძველზე, შპს „სასტუმრო სანატორიუმ ოაზისთან“ გაფორმდა ხელშეკრულება 240 ათას ლარზე და გადახდილი იქნა ბულვარის საკუთარი შემოსავლებიდან.
„არგუმენტები იმისა, თუ რაში მდგომარეობდა აღნიშნული ღონისძიების შესყიდვის გადაუდებელი აუცილებლობა, აუდიტის პერიოდში ვერ იქნა წარმოდგენილი… აღსანიშნავია, რომ ბათუმის ბულვარში მიმდინარე სარემონტო სამუშაოებისა და ბულვარის განვითარების კონცეფციის ურთიერთკავშირი დოკუმენტურად არ დასტურდება,“ – აღნიშნულია აუდიტის დასკვნაში.
ბულვარში მიმდინარე სამუშაოებს [შუა ბილიკის გაუქმების მცდელობას] ასევე „ოაზისის“ მიერ წარმოდგენილი „კონცეფციის“ სამუშაო ვერსიას დიდი ვნებათაღელვა მოჰყვა ბათუმის მოსახლეობის მხრიდან. აჭარის მთავრობა აქციებით აიძულეს დაეტოვებინა შუა ალეა, რითაც შენარჩუნებული იქნა ძველი ბულვარის, როგორც კულტურული მემკვიდრეობის ძეგლის ავთენტურობა. რაც შეეხება კონცეფციას, „ჯერ მიღება-ჩაბარება არ მომხდარა, „ოაზისის“ მიერ წარმოდგენილ კონცეფციას განიხილავს ინსპექტირების ჯგუფი და შემდეგ გადაწყდება, მივიღებთ თუ არა მას. ალბათ, მთავრობაც გააკეთებს შესაბამის განცხადებას,“ – გვითხრეს „ბათუმის ბულვარის“ პრესსამსახურში. ფაქტობრივად იგივე განაცხადეს აჭარის ფინანსთა და ეკონომიკის სამინისტროშიც. უშუალოდ აჭარის მთავრობიდან კი „კონცეფციასთან“ დაკავშირებით კომენტარი ვერ მივიღეთ.
როგორ უნდა განვითარდეს ზღვისპირა ზოლი ისე, რომ არ მოხდეს ჩარევა ძველ ბულვარში და ამასთან, მეტი შემოსავალი მიიღოს ქალაქმა – ამ საკითხზე მუშაობა ბათუმის მერიასა და საკრებულოს მოუწევს. ბათუმის საკრებულოს გადაწყვეტილებით, არაუგვიანეს 2017 წლის პირველი იანვრისა ბათუმის მერიამ სსიპ „ბათუმის ბულვარზე“ გადაცემული ქონება უკან უნდა დაიბრუნოს და თავად განკარგოს.
თუ მნიშვნელოვანი ცვლილებები არ განხორციელდება, ბულვარის შემოსავლები მომავალში მთლიანობაში 1 მილიონ 700 ათასზე მეტი ლარი არ იქნება, ბულვარის მოვლა-შენახვის ხარჯი კი – მინიმუმ 5 მილიონი. დღეს ბათუმის საკრებულოში ბულვართან დაკავშირებით რაიმე კუთხით არავინ მუშაობს და შესაბამის წინადადებებს ბათუმის მერიისგან ელოდებიან.
ბათუმის მერიაში კი „ამ ეტაპზე მუშაობა მიმდინარეობს ქალაქის მომავალი წლის ბიუჯეტის პროექტის მომზადებაზე, რომელშიც გათვალისწინებული იქნება ასიგნებები, ახალი, ა[ა]იპ „ბათუმის ბულვარისთვის“, რომელიც მერიამ უნდა დააფუძნოს და რომელიც 2017 წლიდან დაიწყებს ფუნქციონირებას. მიმდინარე ტურისტული სეზონი როცა დასრულდება ბულვარში, ამის შემდეგ მოხდება ოფიციალურად უზუფრუქტის ხელშეკრულებების შეწყვეტა სსიპ „ბათუმის ბულვართან“ და ვალდებულებების განსაზღვრა ბათუმის მერიასა და აჭარის ფინანსთა და ეკონომიკის სამინისტროს შორის,“ – ასე გვიპასუხეს მერიის პრესსამსახურში.
ბათუმის მერიის მიერ ზღვის სანაპირო ზოლში იჯარით გაცემული ზოგიერთი ნაკვეთი და შემოსავლები ქალაქის ბიუჯეტში:
კობალაძის ქუჩის დასაწყისიდან ჟილინის არხამდე 19 000 კვ/მ ტერიტორია [აკვაპარკი] 49 წლით გადაცემული აქვს შპს „ევროპარკს“, რომელიც იჯარის ქირას – წელიწადში 19 950 ლარს იხდის;
შერიფ ხიმშიაშვილის #13-ის მოპირდაპირედ [ზღვისპირა პარკის ტერიტორიაზე] 853 კვ/მ მიწის ნაკვეთში, სს „საქართველოს ბანკი“ 22 000 ლარს იხდის. ბანკს ეს ნაკვეთი 28 წლით აქვს აღებული იჯარით [კვების ობიექტისთვის]. იქვე მდებარე 714 კვ/მ ნაკვეთში კი – 17 850 ლარს წელიწადში. „საქართველოს ბანკს“ ეს ნაკვეთი 29-წლიანი იჯარით აქვს აღებული;
შერიფ ხიმშიაშვილის #9-11 სახლების მოპირდაპირედ, 500 კვ/მ 29 წლითაა გადაცემული შპს „კოშკზე“, რომელიც ყოველწლიურად ქალაქის ბიუჯეტში 12 500 ლარს იხდის [საზოგადოებრივი კვების ობიექტი/დეკორატიული კოშკი];
25 წლითაა გადაცემული 1416,7 კვ/მ შენობა [სანრემო] შპს „ხიდზე“, რომელიც საიჯარო ქირას – 8 100 ლარს იხდის წელიწადში;
ვაჟა-ფშაველასა და 26 მაისის ქუჩებს შორის ზღვისპირა პარკში [ყოფილი „სალხინოს“ ტერიტორია] და პლაჟის სექტორი #29, მთლიანობაში 13 700 კვ/მ ნაკვეთი წელიწადში 15 755 ლარად აქვს აღებული ფირმა „ნუროლ ინშაათ ვე თიჯარეთ ა.შ.“-ს [შერატონ ბათუმი]. ფირმას ეს ტერიტორია 49-წლიანი იჯარით აქვს გადაცემული;
29 წლითაა გადაცემული ბულვარში 7 391 კვ/მ ნაკვეთი შპს „BATTUN“-ზე [რესტორანი „პირსი“], რომელიც წელიწადში 15 000 ლარს იხდის ბათუმის ბიუჯეტში;
80-80 კვ/მ ფართობის სამი ნაკვეთია გადაცემული 49-წლიანი იჯარით მოქალაქეებზე, რომლებიც ბულვარში საზოგადოებრივ საპირფარეშოებს ამუშავებენ. თითოეული მათგანი კი ქალაქის ბიუჯეტში წელიწადში 2 000 ლარს იხდის.
ბათუმის მაჟორიტარი საქართველოს პარლამენტში მურმან დუმბაძე საკუთარი პარტიის შექმნას გეგმავს. ის აპირებს პარტია მის მიერვე შექმნილი ორგანიზაციის „ემსახურე საქართველოს“ ბაზაზე დააფუძნოს. პარლამენტარის თქმით, მას პარტიის შექმნის სურვილი არ ჰქონდა, თუმცა მისი გეგმები აჭარის მთავრობის ყოფილი თავმჯდომარის, ლევან ვარშალომიძის აჭარაში დაბრუნებამ შეცვალა. მურმან დუმბაძე „ქართულ ოცნებას“ და „ნაციონალურ მოძრაობას“ გარიგებაში ადანაშაულებს და ახლა მისი მთავარი მიზანი, მისივე თქმით, ამ გარიგების ჩაშლაა.
ბატონო მურმან, არჩევნები მოახლოვდა, რა გეგმები გაქვთ, საკუთარი პარტიის შექმნას მართლა აპირებთ?
დიახ, ლევან ვარშალომიძის ჩამოსვლის შემდეგ ჩემი გეგმები შეიცვალა. მგონია რომ ჩვენ კონკურენცია უნდა გავუწიოთ „ნაციონალურ მოძრაობას“, სამწუხაროდ, ასე მოაქცია „ქართულმა ოცნებამ“ საქმე. ვფიქრობდი, რომ პოლიტიკური პარტიებიდან შემოთავზებას მივიღებდი. არის ასეთი შემოთავაზება, როგორც მაჟორიტარული წესით, ასევე პარტიულ სიებში. ახლა მივიღე გადაწყვეტილება და პრაქტიკულად ალბათ საბოლოოა, რომ შევქმნა საკუთარი პარტია და კონკურენციაში შევიდეთ ვარშალომიძესთან და მის „ნაციონალურ მოძრაობასთან“. პირდაპირ გეტყვით, რომ ნაკლებად პერსპექტიულად მეჩვენება „ქართული ოცნების“ წინააღმდეგობა პირადად ჩემს მიმართ. მე მგონია, რომ კონკურენტი იქნება „ნაციონალური მოძრაობა“ და პირადად ვარშალომიძე. სადაც ვარშალომიძე იყრის კენჭს მაჟორიტარად, მეც იქ ვაპირებ კენჭისყრას. შევხედავ რა მიმართულებით წავა ვარშალომიძე. თუ ის პარტიულ სიას ჩაუდეგება სათავეში და დააანონსებს ამას, მეც მივიღებ გადაწყვეტილებას, რომ პარტიულ სიას ჩავუდგე სათავეში და მოსახლეობამ გადაწყვიტოს ვინ ურჩევნია. ის, რომ „ქართული ოცნება“ „ნაციონალურ მოძრაობასთან“ უკვე აგებს, ეს არის აშკარა. არ მაგონდება არცერთი შემთხვევა, როცა არჩილ ხაბაძე დადიოდა რაიონებში და ტაშით ხვდებოდნენ. ხაბაძემ და ივანიშვილმა მოახერხეს იმდენი, რომ ლევან ვარშალომიძის შემოსვლას აჭარაში ტაშის დაკვრა მოყვა. ამიტომ მეჩვენება ისიც , რომ „ნაციონალურ მოძრაობასა“ და „ქართულ ოცნებას“ შორის არის გარიგება და ეს გარიგება უნდა ჩაიშალოს. ეს არის უახლოესი დღის წესრიგი. ვნახოთ როგორ განვითარდება მოვლენები.
თქვენ ახლა საუბრობთ იმაზე, რომ ლევან ვარშალომიძეს უფრო მეტი გავლენა აქვს აჭარაში?
რა თქმა უნდა. 2012 წლის 1 ოქტომბერს ლევან ვარშალომიძე პირადად მე გამოვიყვანე კაბინეტიდან და ქართული ოცნება შევიყვანე. ლევან ვარშალომიძესთან ოპონირება მომიხდა არა ერთი და ორი დღით, როგორც სხვებს, არამედ, მე მათთან ოპონიერების რეჟიმში ვიყავი 2004 წლის მაისიდან, როცა აბაშიძე წავიდა ხელისუფლებიდან. ცხრა წელი უწყვეტი ბრძოლა გაგრძელდა „ნაციონალური მოძრაობა“- სააკაშვილი-ვარშალომიძის ხელისუფლებასთან და ეს მოძრაობა დასრულდა 2012 წლის 1 ოქტომბრით. ჩვენი დანაპირები პირველი ოქტომბრისა უნდა შესრულდეს. ეს არის შრომისმოყვარე პატიოსანი მთავრობის მოსვლა. მოსახლეობას ვეუბნებოდით, რომ ყველა იმ საკუთრებას აღვადგენდით, რომელიც უკანონოდ ჩამოართვა სააკაშვილმა. ჯერჯერობით არცერთი საკუთრება უკან დაბრუნებული არ არის. გონიოს მიწები, რომელზეც ხშირად აპელირებენ არის პოლიტიკური საკითხი და თუ საზოგადოება მხარს დამიჭერს, ამ პრობლემას გადავწყვეტ 15 წუთში. ამას არ ჭირდება არავითარი აღიარების კომისია და სამართლებრივი ნორმები. მიწის გადაცემა არის პოლიტიკური საკითხი და მთავრობამ უნდა იღონოს ყველაფერი იმისათვის, რომ დედაქალაქს წაართვას კომპეტენციები და ფუნქციები. თუ თვითმმართველობები არ განვითარდა, ჩვენი ქვეყანა მუდმივად სიღარიბის ჭაობში იქნება. და თუ გვინდა, რომ სიღარიბიდან ამოვძვრეთ, ცენტრალურ ხელისუფლებას უნდა დავუტოვოთ ის ფუნქციები, რაც მისი გასაკეთებლია, ხოლო დანარჩენი კი ის, რაც შეგვიძლია ადგილზე გავაკეთოთ, უნდა გაკეთდეს ადგილზე.
ვაპირებდი კენჭისყრას საქართველოს პარლამენტში, თუმცა მაინც მგონია რომ ეს არ არის საბოლოო გადაწყვეტილება. ვფიქრობ კონკურენციაში უნდა შევიდეთ იმ ხელისუფალთან, იმ პოლიტიკურ ძალასთან, რომელიც 2012 წელს დავამარცხეთ. სამწუხაროდ, 2 ოქტომბრიდან ბიძინა ივანიშვილმა დაიწყო იმ ადამიანების განდევნა მისი გუნდიდან, რომლებმაც მასთან ერთად დაამარცხა „ნაციონალური მოძრაობა“. დღეს თქვენ ვერ დაასახლებთ ძალიან მაღალი თანამდებობის პირებს, რომლებიც „ნაციონალური მოძრაობის“ წევრები ან მხარდამჭერები არ იყვნენ. მაგალითად გიორგი ერმაკოვი იყო „ნაციონალური მოძრაობის“ წევრი, ირაკლი ჭეიშვილი იყო „ნაციონალური მოძრაობის“ წევრი, ზურაბ პატარაძე, რომელიც მოდის ახლა ხელისუფლებაში, არის ლევან ვარშალომიძის ახლობელი და „ნაციონალური მოძრაობის“ მხარდამჭერი. ასე რომ, ბიძინა ივანიშვილისა და „ქართული ოცნების“ გარიგება, რომ „ნაციონალურ მოძრაობას“ ჩააბაროს ხელისუფლება „ქართული ოცნების“ სახელით, ეს არ გამოუვა. ჩვენ შევეცდებით მაქსიმალურად, რომ ეს გავუშიფროთ. გაიშიფრება არამარტო ეს პოლიტიკური ძალა – „ქართული ოცნება“, არამედ გაიშიფრება ყველა ის პოლიტიკური ძალა, რომელიც დღეს არის საქართველოში და სინამდვილეში ემსახურება ბიძინა ივანიშვილს. ერთ-ერთი ასეთი მგონია „პატრიოტთა ალიანსი“ და სხვა პოლიტიკური პარტიებიც. მაგალითად, „თავისუფალი დემოკრატები“ აჭარაში. მე ვფირობ, რომ ისინი ასრულებენ „ქართული ოცნების“ დაკვეთებს.
თქვენ არცერთი არჩევნების წინ, მაშინაც კი, როცა ის იყო მთავრობის მოქმედი თავმჯდომარე, ლევან ვარშალომიძე არ მოგიხსენიებიათ როგორც გავლენიანი ფიგურა
სრულიად გეთანხმებით, ლევან ვარშალომიძე და გადაკეთებული ლევან ვარშალომიძე, ანუ „ქართული ოცნება“ არიან გაერთიანებული ამ ბრძოლაში. ამიტომ, ჩვენ სწორედ ამ გაერთიანებულ ძალას უნდა ვებრძოლოთ. ახლა, როცა მე ვახსენებ ლევან ვარშალომიძეს, ბუნებრივია ვგულისხმობ „ქართულ ოცნებასაც“. ლევან ვარშალომიძე ვერ ჩამოვიდოდა აჭარაში ასე პომპეზურად, თუ არ იქნებოდა „ქართული ოცნების“ დასტური. ჩემი კონკურეტი „ქართული ოცნება“ არ იქნება. დამისახელეთ ვის უნდა ვებრძოლო – ავთანდილ ბერიძეს? – მას საკუთარ სადარბაზოშიც კი მოვუგებ არჩევნებს. კაკო ძნელაძეს? – რომელსაც ოთხი წელია ხმა არ ამოუღია იმ დაპირებებზე, რაც ჩვენ მოსახლეობას მივეცით. ან ვის უნდა ვებრძოლო – არჩილ ხაბაძეს? – რომელიც ოთხი წელია პოლიტიკაშია და წარმოადგენა არ აქვს რა თანამდებობაზე იქნება… ამ კვალობაზე ყველაზე უფრო გავლენიანი ფიგურა მაინც გამოჩნდა ლევან ვარშალომიძე. მე ვამბობ, რომ ჩვენ არ დავუშვებთ „ნაციონალური მოძრაობის“ რეანიმაციას, როგორც რეგიონში, ისე დანარჩენი მასშტაბით ქვეყანაში. სადაც ჩვენი გავლენებია, ყველაგან მივწვდებით და ვეტყვით მოასახლეობას, რომ ეს არის დიდი ფარული გარიგება.
ვინ იქნება თქვენთან ერთად პარტიაში?
ქალბატნი მედეა ვასაძე და მე ვიქნებით თანადამფუძნებლები. ბუნებრივია, არსებობენ ადამიანები, რომლებიც ჩვენთან მოიზარებიან, თუმცა ახლა მათი სახელების დასახელებისგან თავს შევიკავებ, ვნახოთ როგორ იქნება ტექნიკური საკითხები მოგვარებული. მე ამ დრომდე ამის გაკეთებას არ ვაპირებდი და საერთოდ არაა ჩემთვის მიმზიდეველი პოლიტიკური პარტიის შექმნა, იმიტომ რომ საქართველოში ორ ასეულზე მეტი პარტიაა ერთანარი ხედვებით. დღეს ჩანს, რომ არის „ნაციონალური მოძრაობა“ ერთ მხარეს და აჭარაში, ეკონომიკურად ყველაზე მიმზიდველ რეგიონში, ყველა პარტია არის „ქართული ოცნების“ სატელიტი. მათ შორის ისეთი პარტია, რომელიც ცენტრალურ დონეზე მართლაც ოპონირების რეჟიმშია. მაგალითად „თავისუფალი დემოკრატები“, რომლებიც პირდაპირ „ქართული ოცნების“ ზემოქმედების ქვეშ იმყოფებიან აჭარის რეგიონში. მე შეგნებულად არ ვსაუბრობ იმ პარტიებზე, რომლებსაც აქვთ შანსი გადალახონ ბარიერი, მაგრამ ისინი არიან „ქართული ოცნება“. ჩვენ ხელისუფლებასთან არ გავრიგებულვართ იმისთვის, რომ ხელისუფლებაში ყოფნით დავმტკბარიყავით. ჩვენ გვქონდა შანსები და პრაქტიკულად გადაწყვეტილი იყო ასეთი მძლავრი ფინანსური პოლიტიკური ორგანიზაციის შექმნა, რომელიც ბიძინა ივანიშვილმა ჩაშალა იმიტომ, რომ იცის რა ხიფათები ელის ჩვენგან. მიუხედავად ამისა, მგონია, რომ ახლა ფინანსებმა უნდა გადაინაცვლოს მეორე მხარეს და არ უნდა იყოს ეს გადამწყვეტი. ჩვენ უნდა შევქმნათ სერიოზული პოლიტიკური მოძრაობა – „ემსახურე საქართველოს“ და უნდა ვიბრძოლოთ იმისათვის, რომ ეს დიდი გარიგება ჩავშალოთ.
„თავისუფალ დემოკრატებთან“ დაკავშირებით თქვენ ამბობთ, რომ ისინი გარიგდნენ მმართველ პარტიასთან მხოლოდ აჭარაში?
დიახ, ცენტრალურ დონეზე ბუნებრივია არის დაპირისპირება, მაგრამ თქვენ ვერ დაასახელებთ ვერცერთ მაღალი თანამდებობის პირს, რომლებიც ოპოზიციაში წასვლის შემდეგ გადააყენეს. მაშინ როცა ჩვენი გუნდის წევრები, სკოლის დარაჯებიც კი გაუშვეს. მაგალითად ლევან ლორთქიფანიძე, ყოფილი გამგებელი ლამის დაიჭირეს და ვერაფერი დაუმტკიცეს. „თავისუფალი დემოკრატია“ განათლების მინისტრის მოადგილე, არქივის უფროსის მოადგილე, რომელიც ამავე დროს არის საკრებულოს წევრი. როგორ ახერხებს თანამდებობაზე ყოფნას? ბევრი სხვა მაგალითების მოყვანა შემიძლია. უმაღლეს საბჭოში რაც ხდება „თავისუფალი დემოკრატების“ მხრიდან, ხელის აწევა იმ ბიუჯეტებზე იმ პროცესებზე, იმ თაღლითურ გარიგეგებზე, მაგალითად, სტადიონის 17 მილიონ ლარზე რომ ხელია აწეული, ბიუჯეტზე რომ ხელია აწეული და ახლა რომ აპირებენ ხელის აწევას მთავრობის დამტკიცებაზე აჭარაში. ეს ხომ ნონსესია? – როდის იყო ოპოზიცია მთავრობის ფორმირებაზე პასუხიმგებლობას იღებდა. არცერთ ცივილურ ქვეყანაში ოპოზიციური პარტია მთავრობას ხმას არ აძლევს. მაშინ რატომ არ მისცეს „თავისუფალმა დემოკრატებმა“ ხმა კვირიკაშვილს, 2015 წლის დეკემბერში? ჩვენ მოსახლეობას ეს ყველაფერი უნდა გავუშიფროთ. საერთოდაც, ფრაქცია „თავსუფალი დემოკრატები“ არის დაშლილი უმაღლეს საბჭოში, სამი შევიდა და ახლა დარჩენილია ერთი. კახიძემაც დატოვა პარტია.
თქვენთან ხომ არ მოდის?
არა. ასეთი მოლაპარაკებები არ გავქვს. ის ჩემი უახლოესი ადამიანი იყო და თითქმის ათეული წლების წინ, ის მე მოვიყვანე პოლიტიკაში. ის არც მალავს ამის შესახებ.
თქვენ თქვით, რომ ფული ერთ მხარეს გადანაწილდა, თქვენს პარტიას ვინ დააფინანსებს?
ჩემი მცდელობა, რომ შექმნილიყო დაფინანსებული პოლიტიკური ორგანიზაცია, ბუნებრივია კანონის ფარგლებში, ჩაიშალა. მე პოლიტიკაში ფული არ მიკეთებია და არც ვაპირებ. მე ფული არ მაქვს, ფიზიკური ძალა და უნარი რამდენსაც შეწვდება, იმდენს შევძლებ.
ბათუმის მუნიციპალიტეტის საკრებულო 12 ივლისის სხდომაზე კენჭს უყრის მერიის მიერ წარდგენილ პროექტს, რომლის მიხედვითაც ბათუმის 2016 წლის ბიუჯეტის შემოსავლები 1 063 513 ლარით იზრდება. იმავე კანონპროექტით, ზუსტად ამდენივე ლარით გაიზრდება ბიუჯეტის ხარჯებიც.
ბათუმის მერიის ინფორმაციით, წარმოდგენილი პროექტის მიხედვით ბათუმის მუნიციპალიტეტის 2016 წლის ბიუჯეტის შემოსულობები იზრდება: საქართველოს სახელმწიფო ბიუჯეტიდან გამოყოფილი სახსრების ხარჯზე – 97 413 ლარით; სხვა შემოსავლების ზრდის ხარჯზე კი – 966 100 ლარით.
„სხვა შემოსავლებში“ მერია გულისხმობს ბიუჯეტის შემოსულობების ზრდას, გარკვეულ ეკონომიებს ტენდერებიდან და ასევე ზოგიერთი ღონისძიების საერთოდ ამოღებას წელს განსახორციელებელ საქმიანობათა ნუსხიდან.
როგორც პროექტიდან ჩანს, ერთ მილიონზე მეტი ლარით, ძირითადად, სოციალური და ინფრასტრუქტურული პროექტების დაფინანსება გაიზრდება. რა თქმა უნდა, თუ საკრებულო მერიის პროექტს დაამტკიცებს.
ქობულეთის გამგეობამ გეოლოგების მოთხოვნის საფუძველზე საცხოვრებელი სახლიდან ხუთი ოჯახი უსაფრთხო ადგილზე გადაიყვანა. მუნიციპალიტეტის გამგებლის მოადგილის, ირაკლი ცეცხლაძის ინფორმაციით, საშიშროება გუშინ, 9 ივლისს, განვითარებულმა მცირე მეწყერებმა გამოიწვია.
გამგებლის მოადგილის ინფორმაციით, გუშინ მცირე მეწყერები განვითარდა შემდეგ სოფლებში: ხალა, აჭყვისთავი, ჩაისუბანი, ჭახათი, ზედა აჭყვა. ხოლო გეოლოგების მოთხოვნით სახლის დატოვება მოუწია ერთ ოჯახს სოფელ ლეღვაში, ერთ ოჯახს – ხალაში, ერთს – ჭახათში, ხოლო ორ ოჯახს – სოფელ ზედა აჭყვაში.
მეწყრული პროცესების შედეგად მუნიციპალიტეტის რამდენიმე სოფელში დაზიანდა შიდა სასოფლო გზები. ამ დროისთვის დაზიანებულ გზებზე მუშაობს მძიმე ტექნიკა, მიმდინარეობს გაწმენდითი სამუშაოები.
ქობულეთის გამგეობის ინფრომაციით საგანგებო რეჟიმში განაგრძობს მუშაობას სტიქიასთან ბრძოლის შტაბი. გამგეობაში მოქმედებს ცხელი ხაზი: 0 800 100 107. ზარი უფასოა.
გამგეობის ინფორმაციით, ასევე საგანგებო რეჟიმში მუშაობს ა(ა)იპ „ქობულეთის სოფლის წყალი“. მობილური ბრიგადები აწარმოებენ სოფლის წყალსადენი სისტემების სათავე ნაგებობების გაწმენდით და დაზიანებული მაგისტრალების აღდგენით სამუშაოებს.
სტიქიის შემსწავლელი კომისია კი ზარალს ითვლის და შედეგები რამდენიმე დღეში გახდება ცნობილი. პარალელურ რეჟიმში მიმდინარეობს სტიქიით დაზიანებული საცხოვრებელი სახლების გეოლოგიური კვლევა.
ბათუმის სასპორტო სკოლაში ბათუმელი მოჭიდავის გიგა ფარტენაძის ხსოვნისადმი მიძღვნილი ტურნირი თავისუფალ ჭიდაობაში დღეს დასრულდა.
ტურნირში საქართველოს რეგიონებიდან და საზღვარგარეთიდან მოჭიდავეთა ნაკრები გუნდები მონაწილეობდნენ. შეჯიბრება ორ ასაკობრივ ჯგუფში ათ წონით კატეგორიაში გაიმართა.
გამარჯვებულები და საპრიზო ადგილზე გასული სპორტსმენები დაჯილდოვდნენ მედლებითა და ფასიანი საჩუქრებით. ტურნირს ესწრებოდა და ორგანიზატორებთან ერთად გამარჯვებულებს საჩუქრები გადასცა გიგა ფარტენაძის ძმამ კობა ფარტენაძემ:
„ჩემი ძმის გაწვდილი ხელი, რომელიც ყოველთვის ყველას დასახმარებლად იყო მზად დღეს დაფასდა, იმ დარბაზში ვარ სადაც მთელი ბავშვობა ჭიდაობდა მეცადინეობდა, შეჯიბრებებზე გადიოდა, იზრდებოდა და უცებ ეს ყველაფერი შეწყდა… ამიტომ ემოციურად ძალიან მძიმე და ამასთანავე ბედნიერი დღეა ჩემთვის, ჩემპიონები მართლაც არ კვდებიან! და მე ამაყი ვარ ამით. ჩემი ძმა ბავშვობიდან ვარჯიშობდა ბერძნულ რომაულ ჭიდაობაში, როგორც ბათუმში ასევე თბილისში ფალავანთა კლუბში მას არაერთი მედალი თუ თასი აქვს მოპოვებული და ეს ყველაფერი იარსებებს მანამ სანამ მისი სახელის გამხსენებელი ერთი ადამიანიც იარსებებს ამ სამყაროში… ასეთები კი ბევრნი ვართ. ძალიან დიდი მადლობა სპორტის ფედერაციას, მუხრან ვახტანგაძეს ყველა სპორცმენსა და მონაწილეს. ჩვენ ერთობრივი ძალით შესანიშნავი ტურნირი გამოგვივიდა…“
ღონისძიების ორგანიზატორია აჭარის სპორტისა და ახალგაზრდობის დეპარტამენტი და აჭარის რეგიონალური მასობრივი ფედერაცია . დეპარტამენტის ინფორმაციით ტურნირი მიზნად ისახავს აჭარაში თავისუფალი ჭიდაობის განვითარებას და პოპულარიზაციას, ასევე საქართველოს ჭაბუკთა ნაკრები გუნდის პოტენციური და უახლესი რეზერვების გამოვლენას.
ხელვაჩაურის რამდენიმე სოფლიდან „ბათუმელებს“ დაუკავშირდნენ: „რამდენიმე კვირის წინ გზებზე ასფალტის დაზიანებული ადგილები ამოტეხეს. გვითხრეს საგზაო დეპარტამენტიდან ვართ, ახალი უნდა ჩავასხათო, თუმცა მას შემდეგ თვეზე მეტი გავიდა და ჯერ არ გამოჩენილან“.
მოსახლეობა ამბობს, რომ მას შემდეგ რაც საგზაო დეპარტამენტის თამამშრომლებმა სამუშაოები დაიწყეს, ხოლო შემდეგ მიატოვეს, გზებზე უფრო რთული ვითარება შეიქმნა, ვიდრე მანამდე იყო.
„ბათუმელები“ აჭარის საგზაო დეპარტამენტს დაუკავშირდა. დეპარტამენტის თანამშრომლის, თეიმურაზ ბასილაძის ინფორმაციით დაწყებული სამუშაოები უამინდობამ შეაფერხა. მისივე თქმით აჭარის საგზაო დეპარტამენტი ხელვაჩაურის რამდენიმე სოფელში გზების ორმული შეკეთების პროგრამას ახალორციელებს, რისთვისაც აჭარის რესპუბლიკური ბიუჯეტიდან 6 მილიონი ლარი დაიხარჯება.
პროგრამის ფარგლებში დაწყებულია სამუშაოები და გზები უნდა შეკეთდეს სოფელ ზანაქიზეებში, კაპანდიებში, მაჭახლის ხეობაში თხილნარში, ახალშენში და მახინჯაურში.
პროკურატურის პრესსამსახური ადასტურებს ინფორმაცას სამშენებლო კომპანია „ცენტრ პოინტის“ ორი თანამშრომლის დაკავებასთან დაკავშირებით. პროკურატურის ინფორმაციით დაკავებულია კომპანია „ცენტრ-პოინტი აჭარას“ ხელმძღვანელი ირაკლი მინდელი და გაყიდვების მენეჯერი სალომე ჩარკვიანი.
პროკურატურა ჯერ-ჯერობით არ ავრცელებს ინფრომაციას დაკავების მიზეზებზე. უწყებაში ასევე არ ადასტურებენ გავრცელებულ ინფორმაციას გუკა რჩეულიშვილის დაკავებასთან დაკავშირებით.
დათო რ. სარფის საბაჟოზე მაშინ დააკავეს, როცა ის სხვისი პირადობის მოწმობით საზღვრის გადაკვეთას ცდილობდა. წინა ზაფხულს დეპორტირებული ამ გზით შეეცადა თურქეთში ჩაის კრეფის სეზონისთვის ჩასულიყო, სადაც მის მსგავსად ასეულობით საქართველოს მოქალაქე შრომობს, როგორც არალეგალი. ხელისუფლება „სეზონურ მიგრანტების“ არსებობას არ იმჩნევს.
სარფის საბაჟოზე დათო რ.-მ საქართველოს საზღვარი უპრობლემოდ გადაკვეთა. სხვისი პასპორტი მას თურქეთის საბაჟომ დაუფიქსირა. რამდენიმე დღის შემდეგ, როცა თურქეთის პოლიციამ დათო საქართველოს გადმოსცა, ბათუმში დააკავეს კიდევ ერთი პირი – ბადრი გ. გამოძიების ვერსიით, ის დეპორტირებულ ადამიანებს კონკრეტული თანხის მიღების სანაცვლოდ საზღვრის გადაკვეთას ჰპირდებოდა. მისთვის დათო რ.-საც მიუცია 950 ლარი იმ პირობით, რომ სხვის პასპორტს მიიღებდა და ამ ფორმით მოახერხებდა თურქეთში სამუშაოდ ჩასვლას. დათო რ.-ს ახლობლების თქმით, ეს არაა პირველი შემთხვევა, როცა დეპორტირებული ადამიანების საზღვარზე გადაყვანაზე სხვადასხვა ჯგუფი მუშაობს. ამ თემაზე ჩვენთან საუბარი შინაგან საქმეთა სამინისტრომ არ ისურვა. სასაზღვრო პოლიციის პრესსამსახურში მხოლოდ ის გვითხრეს, რომ ყველა შემთხვევა ინდივიდუალურია და პოლიცია თაღლითობის თითოეულ შემთხვევაზე რეაგირებს.
სეზონური მიგრანტები ძირითადად ხელვაჩაურისა და ქობულეთის სოფლებიდან მიდიან სამუშაოდ თურქეთის მოსაზღვრე პროვინციებში. მიგრანტები სხვადასხვა პრობლემაზე საუბრობენ: მძიმე სამუშაო დღე, ნამუშევარი ხელფასის აუღებლობა, დეპორტი… არალეგალი მიგრანტები თურქეთში ვერავის უკავშირდებიან, როცა სირთულეს აწყდებიან.
„ერთ-ერთი პრობლემა, რაც გამოიკვეთა, ჯანმრთელობის დაცვაა. როცა ადამიანი ცუდად ხდება მუშაობის დროს, ის ვერ მიდის საავადმყოფოში, რადგან არალეგალია. ჩვენი ინფორმაციით, ხშირია ასეთი შემთხვევები,“ – ამბობს „ბათუმელებთან“ მარინა პაპუნიძე, ახალგაზრდა მეცნიერთა კავშირ „ინტელექტის“ მკვლევარი. ამ ორგანიზაციამ თურქეთის რამდენიმე სოფელში 65 დამსაქმებელი გამოკითხა. „ჩვენ ვუწევთ მათ კონსულტაციას, რომ არ წავიდნენ არალეგალის სტატუსით და შეგვიძლია დავეხმაროთ შრომითი ვიზის მიღებაში, რაც გარკვეულ პროცედურებთანაა დაკავშირებული, მაგალითად, დამსაქმებელთან წინასწარ შეთანხმებაზე, საკონსულოში მისვლაა საჭირო და ასე შემდეგ. არ მახსენდება არც ერთი შემთხვევა, ვინმე ამ პირობას დათანხმებოდა. ეს ყველაფერი მძიმე სოციალურ ფონზე მიუთითებს. ადამიანებს აღარ უნდათ დამატებითი პროცედურების გავლა, ოღონდ წავიდნენ და იმუშაონ,“ – გვიყვება „ინტელექტის“ პროექტის – „მიგრანტთა მდგომარეობის გაუმჯობესება აჭარის რეგიონში“ იურისტი რამინ გვარიშვილი.
ეს ორგანიზაცია ერთადერთია აჭარაში, რომელიც სეზონურ შრომით მიგრანტებს მინიმუმ კონსულტაციას უწევს. არც ერთი სახელმწიფო უწყება ეროვნულ დონეზეც კი, სეზონურ მიგრანტებს ვერაფერს სთავაზობს. საქართველოს ჯანმრთელობისა და სოციალური დაცვის სამინისტრო მომავალი წლისთვის აპირებს კვლევის ჩატარებას, რამაც სეზონური მიგრანტების პრობლემები და საჭიროებები უნდა გამოკვეთოს: „მომავალი წლის ერთ-ერთი სამიზნე ჯგუფი სწორედ სეზონური მიგრანტები არიან. ჩვენი დეპარტამენტი 2013 წელს შეიქმნა და ერთბაშად ყველაფრის მოგვარება შეუძლებელია. ჯერ კიდევ ვფიქრობთ, როგორი უნდა იყოს კვლევის მეთოდოლოგია, რომ კვლევამ ზუსტად ასახოს რეალობა. შემდეგ ერთიანი სისტემა შევქმნათ, რომელშიც სხვადასხვა უწყება იქნება წარმოდგენილი. ამ ეტაპზე, რაც შეგვიძლია მიგრატებს შევთავაზოთ, არის დასაქმების საიტზე დარეგისტრირება. მათ შეეძლებათ მომზადება-გადამზადების პროგრამებში მონაწილეობა და სამთვიანი სტიპენდიით, 150 ლარით სარგებლობა. ეს არაა ფორმალური პროგრამა. ვალდებულება ექნებათ კომპანიებს, რომ ერთ ვაკანსიაზე მაინც დაასაქმონ პროგრამის მონაწილე. არსებობს პროფესიული გადამზადების მოკლევადიანი პროგრამებიც,“ – გვიყვება ელზა ჯგერენაია, საქართველოს ჯანდაცვის სამინისტროს შრომისა და დასაქმების პოლიტიკის დეპარტამენტის უფროსი.
ელზა ჯგერენაია არ ეთანხმება შეფასებს, რომ სეზონური მიგრაცია ამჟამად სახელმწიფო რეგულაციის გარეშეა დარჩენილი. მან ამის დასტურად გასულ წელს მიგრაციის შესახებ მიღებული ახალი კანონი დაგვისახელა, რომელიც სანქციებს ითვალისწინებს იმ შემთხვევაში, თუკი ადამიანი შრომითი ვიზის გარეშე მიდის სხვა ქვეყანაში სამუშაოდ: „კარგი იქნება, თუ მოგვაწვდით ინფორმაციას, ვინ გადადის, როგორც ტურისტი და მუშაობს არალეგალად. ამის შესახებ ჩვენ ინფორმაცია არ გვაქვს“.
სეზონური მიგრანტებს ხედავენ „მიგრაციის საერთაშორისო ცენტრშიც“, თუმცა აქ პროგრამის პირობების გამო ვერ მუშაობენ იმ მიგრანტებზე, რომლებიც ერთ წელზე ნაკლებს რჩება უცხო ქვეყანაში: „ყოველი მესამე მიგრანტი აჭარის რეგიონიდან, ვინც სამშობლოში ბრუნდება, დეპორტირებულია, მაგალითად, თბილისში ყოველი მეხუთეა ასეთი. შესაბამისად ყველაზე მაღალი მაჩვენებელი დეპორტირებულების კუთხით აჭარაშია,“ – ამბობს ნანა პაპიაშვილი, მიგრაციის საერთაშორისო ცენტრის ბათუმის მობილურობის ცენტრის კოორდინატორი.
კიდევ ერთი პრობლემა, რომელსაც სეზონური მიგრანტები აფიქსირებენ, სოციალური შემწეობაა, რომელიც უწყდებათ, თუკი საზღვარს რამდენიმე დღით დატოვებენ. სოციალური მომსახურების სააგენტოს აჭარის ფილიალის პრესსამსახურის, თემურ ჭანტურიშვილის თქმით, სოციალური დახმარება მიგრანტის ოჯახს არ შეუწყდება, თუკი ის წინასწარ გააფრთხილებს სააგენტოს წერილობითი ფორმით: „ამ შემთხვევაში, უშუალოდ მიგრანტს შეუწყდება შემწეობა, ოჯახს – არა“.
ჩაის კრეფის სეზონი თურქეთში რამდენიმე დღეა დაიწყო. დათო რ. სასამართლო განაჩენს ელოდება. მის ნაცვლად თურქეთში მისი სიმამრი წავიდა, რომელიც ამბობს, რომ იქაურ შრომის ბირჟაზე კონკურენცია გაიზარდა და შესაძლოა უკან დაბრუნებაც მოუწიოს.
მაღაზია „წიგნები ბათუმში“ მკითხველს ახალ წიგნებს „მხედვარის“ მესამე ნაწილს და ეკა ქევანიშვილს კრებულს სთავაზობს.
გამომცემლობის „წიგნების ბათუმში“ – გამოცემები საიუბილეო თარიღთან დაკავშირებით ფასდაკლებებით გაიყიდება. „მაღაზია წიგნები“ ბათუმში სამი წლის გახდა.
გამომცემლობის დირექტორის ინფორმაციით კვირეულის ფარგლებში გამოვა ასევე ახალი ფენტეზის საგა ტერი გუტკაინდის „ჯადოქრის პირველი წესი“ და „ჭიანჭველების“ ტრილოგიის მესამე წიგნი.
„წიგნები ბათუმში“ – ს ისტორია ასე დაიწყო:
„საშინლად მინდოდა საკუთარი წიგნის მაღაზია, მაგრამ ხმამაღლა ვერც ვბედავდი ამის გაფიქრებას და ჩემს ოცნებას გამწარებული ვუკეთებდი ალიკაპს პირზე. ვფიქრობდი, მერე, ასაკში… მერე, ოქტომბრის ერთ საღამოს ირაკლი შევიყვარე და აღმოჩნდა, რომ ის ოცნებობდა ზღვისპირას დასახლებასა და წიგნების მაღაზიაზე, ოღონდ მერე, ასაკში… მერე ერთ დღეს ჩვენ ვთქვით, რატომ ასაკში, რატომ არა ახლა, სანამ ახალგაზრდები, ლამაზები, ჯანმრთელები და ენერგიულები ვართ, სანამ ყველაფერი აღგვაფრთოვანებს, სანამ გვაქვს დაუოკებელი ცნობისმოყვარეობა, სანამ შეგვიძლია, რამე ლამაზის დანახვაზე ცრემლი მოგვადგეს… დიახაც, რატომაც არა, ზუსტად აქ და ახლაო – ვთქვით ჩვენ და ავისრულეთ ის, რაც აუსრულებელი და მიუღწეველი ჩანდა,“ – ამბობდა მარი კორინთელი, მეაღაზიის ერთერთი მფლობელი „ბათუმელებთან“ საუბარში.
დაარსების შემდეგ მაღაზიამ „წიგნები ბათუმში“ ბევრი პროექტი წამოიწყო, ბევრი მკითხველი შემოიკრიბა და გამომცემლობის გაკეთების იდეაც გაჩნდა, რაც მალევე რეალობად იქცა. 2014 წელს მაღაზიამ „წიგნები ბათუმში“ ამავე სახელწოდების გამომცემლობა გახსნა.
2015 წლის თებერვალში გამომცემლობამ ერთდროულად შვიდი წიგნი ფილიპ დიკის „კაცი მაღალ კოშკში“, დენიელ კიზის „ყვავილები ელჯერნონისათვის“, ბორის და არკადი სტრუგაცკების „ძნელია ღმერთობა“, როალდ დალის „არაჩვეულებრივი ბატონი ფოქსი“, მორის დრიუონის „მწვანეთითება ტისტუ“ და კეტრინ პეტერსონის „ხიდი ტერაბითიაში“ გამოსცა.
სამომავლო გეგმებსა და მკითხველთან ურთიერთობაზე „ბათუმელებს“ გამომცემლობის დირეტორი ირაკლი ბაკურიძე ესაუბრა:
„ქალაქში ჩვენთან არის რამდენიმე კატეგორიის მკითხველი, ყველაზე მრავალრიცხოვანი ახალგაზრდების ჯგუფია, სადღაც 10 წლის ასაკიდან 25-26 წლამდე ახალგაზრდები ერთიანდებიან. რომლებიც კითხულობენ როგორც კლასიკას ასევე ძალიან მაგრად კითხულობენ თანამედროვე პროზას. მუდამ საქმის კურსში არიან სად რა გამოდის , ვთქვათ რა გამოდის ევროპაში, ამერიკაში. მუდამ პულსზე უჭირავთ ხელი. კიდევ არის ჯგუფი, რომლებიც ყიდულობენ შვილებისთვის წიგნებს ან წიგნებს რომლებიც ოჯახში უნდა ჰქონდეთ და არის კიდევ მცირე ჯგუფი, რომელებიც კითხულობენ ყველაფერს რაც გამოდის.
ჩვენ ვართ ძალიან ამაყები, რომ ბათუმში შიქმნა ძალიან დიდი წრე, რომლებთან ერთადაც ვმუშაობთ. დაწყებიდან წელიწადნახევრის შემდეგ გადავწყვიტეთ გამომცემლობის გახსნა გამომდინარე იქედან, რომ ამ ადამიანებმა უკვე მოთხოვნები წამოგვიყენეს თუ რა ჭირდებოდათ მათ ქართულ ენაზე. ჩვენ ყველამ ერთად გადავწყვიტეთ, რომ ეს წიგნები ქართულადაც გვინდოდა.
დაფუძნების დღიდან ველოდებით უკუკავშირს, ე.წ ფიდბექებს. რაც მაღაზია გაიხსნა მას შემდეგ ადაამიანებს ვთავაზობთ რაღაც პროდუქტს და ველოდებით როგორი იქნება მათგან რეაქცია და ამის მიხედვით ვვითარდებით, ბათუმის გარეთაც უამრავი მკითხველი ჰყავს ჩვენს მაღაზიას, თბილისიდან ჩამოდიან, რომ წიგნები ჩვენს მაღაზიაში იყიდონ, გვყავს ადამიანები, რომლებიც მთელ დღეს აქ ატარებენ, ცხოვრობენ ჩვენთან. ჩვენთან ერთად მუშაობენ , ჩვენ რაც შეგვიძლია არის ის, რომ შევქმნათ გარემო და გამოვცეთ წიგნები”.
