Batumelebi

ბსუ-ს აკადემიურ პერსონალს ახალი საბაკალავრო პროგრამისთვის გადაამზადებენ

ბათუმის შოთა რუსთაველის უნივერსიტეტის აკადემიური პერსონალისთვის 6-7 სექტემბერს, ქართველი და უცხოელი სპეციალისტები ვორქშოფებსა და სემინარებს გამართავენ:

6 ოქტომბერი, “ადამიანი და კულტურის სამყარო”:

ლუდვიგ ზიპი, მიუნსტერის უნივერსიტეტის პროფესორი; თემა – „ადამიანი და კულტურის სამყარო”;
გიორგი მაისურაძე, ილიას სახელმწიფო უნივერსიტეტის პროფესორი; თემა – „სამეცნიერო ტექნიკური მოდერნულობა და ფილოსოფიური ეთიკა”.

7 ოქტომბერი, პანელ-დისკუსია “რელიგია და კულტურის სამყარო”:

მამუკა ბერიაშვილი, ილიას სახელმწიფო უნივერსიტეტის პროფესორი; თემა – „კულტურული სამყაროს დაფუძნება რელიგიის მიერ”;
გიორგი მაისურაძე, ილიას სახელმწიფო უნივერსიტეტის პროფესორი; თემა – „რას ნიშნავს კულტურული ნაცია?”;
თათა ცოფურაშვილი, ილიას სახელმწიფო უნივერსიტეტის პროფესორი; თემა – „რეფორმაციის ისტორიული, კულტურული და ფილოსოფიური კონტექსტები”;
მარიამ ხაზარაძე, ილიას სახელმწიფო უნივერსიტეტის მაგისტრანტი; თემა – “კულტურული სამყაროს დაფუძნება კანტის „ადამიანთა ისტორიის სავარაუდო დასაწყისის მიხედვით”“.

ვორქშოფები ახალი საბაკალავრო პროგრამის მოსამზადებლად გაიმართება პროექტის ფარგლებში – „მედია და კულტუროლოგიის მეცნიერების მიმათულების განვითარება“. პროექტმა ხელი უნდა შეუწყოს ახალი საბაკალავრო პროგრამის მომზადებას და შესაბამისი კურიკულიუმების ჩამოყალიბება-განვითარებას.

„მიმართულების ევროპული სტანდარტებით ჩამოყალიბებისთვის დაგეგმილია შესაბამის უცხოურ უნივერსიტეტებთან აქტიური თანამშრომლობა, როგორც საგანმანათლებლო პროგრამის, ასევე საზაფხულო სკოლების, სემინარებისა და ვორქშოფების ფარგლებში“, – ვკითხულობთ ბსუ-ს პრესსამსახურის წერილში. მათივე ინფორმაციით, ამავე პროგრამის ფარგლებში ითარგმნება მედიისა და კულტუროლოგიის მეცნიერების საბაზისო ლიტერატურა, სახელმძღვანელოები, გზამკვლევი, ჩამოყალიბდება სასწავლო პროგრამა და სატელევიზიო სტუდია.

პროექტი მოიცავს მიმდინარე წლის სექტემბერ-დეკემბრის პერიოდს:

„ეს ვორქშოფები და სემინარები, ძირითადად, უნივერსიტეტის აკადემიური პერსონალისთვის პროგრამის მოსამზადებლადაა, თუმცა სტუდენტებსაც ექნებათ საშუალება მსმენელების სახით დაესწრონ“, – უთხრა “ბათუმელებს” ბსუ-ს პრესსამსახურში.

შეხვედრებზე დასწრება შეუძლიათ მედიის წარმომადგენლებსაც.

პროექტი დაფინანსებულია პრეზიდნტის ფონდის მიერ.

უფასო ონლაინკურსები თვითგანვითარებისთვის

დღეს, 22 სექტემბერს ბათუმის დემოკრატიული ჩართულობის ცენტრში, სამოქალაქო საზოგადოების ინსტიტუტმა [CSI] სტუდენტებთან და სამოქალაქო საზოგადოების წარმომადგენლებთან საინფორმაციო შეხვედრა გამართა პროგრამის – „ონლაინ კურსები თვითგანვითარებისათვის“ შესახებ.

პროგრამა 6 სალექციო კურსისგან შედგება: სოციალური კვლევის მეთოდები, საჯარო პოლიტიკის ანალიზი, ადვოკატირება და ლობირება, საჯარო ფინანსები, ეკონომიკის საფუძვლები და საზოგადოებასთან ურთიერთობა. პროგრამა არის დისტანციური და შესაბამისად ნებისმიერი ლექცია დიალოგი ან ტესტის შემოწმება ხდება ონლაინ რეჟიმში, პროგრამაში მონაწილეობა შეუძლიათ სამოქალაქო საზოგადოების წევრებს, სტუდენტებს და თვითმმართველობის წარმომადგენლებს.

ონლაინ სასწავლო პროგრამა 2014 წელს დაიწყო და ეს კურსები უკვე გაიარა 633-მა მსმენელმა.

CSI-ს წარმომადგენლის, თემო ჯალიაშვილის განმარტებით, სტუდენტს რომელიც წარმატებით გაივლის მინიმუმ სამ კურსს, ექნება შესაძლებლობა მიიღოს მონაწილეობა 6-თვიანი ფასიანი სტაჟირების პროგრამაში: „ჩვენ გვაქვს ასევე მცირე გრანტის პროგრამაც, რომელიც ითვალისწინებს 9 პროექტის დაფინანსებას, და თითოეულ პროექტისთვის გამოყოფილია გრანტის სახით „10 ათასი ევრო“.

განაცხადების მიღების ბოლო ვადა 26 სექტემბერია. აპლიკაციის შესავსებად ეწვიეთ ვებგვერდს: www.civilin.org.

ხათუნა სამნიძე: ქალი ამომრჩეველი ხაზს უსვამს იმას, რომ ქალი ვარ და მათ უფლებებს უფრო დავიცავ

რესპუბლიკური პარტიის თავმჯდომარე და მაჟორიტარობის კანდიდატი ხათუნა სამნიძე ცოტა ხნის წინ დაბრუნდა ბათუმში საარჩევნო კამპანიის ჩასატარებლად. ის მაჟორიტარი დეპუტატობის კანდიდატია ბათუმის #69-ე საარჩენო ოლქში.

ხათუნა, რატომ გადაწყვიტეთ, თქვენ, როგორც „რესპუბლიკური პარტიის“ თავმჯდომარეს კენჭი გეყარათ ბათუმში, ეს მხოლოდ იმითი იყო განპირობებული, რომ ბათუმელი ხართ თუ სხვა სტრატეგიაც აქვს პარტიას?

ჩვენ ვიყავით პირველი პარტია, რომელმაც ხაზი გაუსვა უმაღლესი საბჭოს არჩევნებს და გამოაცხადა აჭარა, როგორც მნიშვნელოვანი რეგიონი, სადაც ორი არჩევნები ერთდროულად უნდა გამართულიყო. თავიდანვე გადავწყვიტეთ, რომ უმაღლესი საბჭოს არჩევნებისთვისაც მიგვექცია ისეთივე ყურადღება, როგორც საპარლამენტო არჩევნებისთვის და ამიტომ უმაღლესი საბჭოს სიის პირველ ნომრად დავასახელეთ პარტიის ერთ-ერთი გამოკვეთილი ლიდერი, პარტიის პოლიტიკური მდივანი დათო ბერძენიშვილი. როდესაც საპარლამენტო არჩევნებზე დავიწყეთ ფიქრი, მნიშვნელოვანი იყო ჩვენი კანდიდატი ვინ იქნებოდა ბათუმში, სადაც დაიწყო რესპუბლიკური პარტიის გაძლიერება. ჩემი გადაწყვეტილება გამომდინარეობდა იქედან, რომ დიდი ყურადღება მივაქციეთ აჭარას, რეგიონს, სადაც ორი არჩევნები ერთდროულად ტარდებოდა. გარდა იმისა, რომ ჩემი პირველი ნაბიჯები პოლიტიკაში სწორედ ბათუმიდან დაიწყო, მე როგორც პარტიის თავმჯდომარემ, ბათუმელმა, გადავწყვიტე ბათუმში მეყარა კენჭი და მიუხედავად იმისა, რომ სიაში ვარ მეორე ნომერი, მებრძოლა ასევე მაჟორიტარობისთვის, ანუ ბათუმელების სახელით, ბათუმელების ხმით გავხდე პარლამენტის წევრი.

ხართ თუ არა ამომრჩევლისთვის ბათუმური სახე, თუ აღიქმებით როგორც თბილისიდან გამოგზავნილი. ეს საკითხი ამ არჩევნებზე აქტუალური თავად პოლიტიკურმა პარტიებმა გახადეს…

მე მოლოდინი მქონდა, მაგრამ იმაზე მეტად აქცევენ მაგას ყურადღებას, ვიდრე მეგონა და განსაკუთრებით უსვამენ კიდეც ხაზს. როდესაც კარდაკარ დავდივარ, ხშირად ამბობენ, რომ აი, ჩვენიანი, ჩვენი გოგო მოვიდა [თუ ასაკიანი ადამიანია], ანუ მეტად უსვამენ ხაზს, რომ მე ვარ მათიანი.

თქვენ და თქვენი პარტია აქტიურობს ქალთა უფლებების კუთხით. ამომრჩეველთან შეხვედრის დროს რა ჩანს – სმენიათ ბათუმელ ქალებს თქვენს იდეებზე ქალთა უფლებების შესახებ?

აქტიურმა ადამიანებმა, რომლებიც თვალს ადევნებენ პოლიტიკურ პროცესებს, იციან ჩემს შესახებ, მეუბნებიან, რომ მე და ჩემი კოლეგები – თამუნა კორძაია, თამარ ხიდაშელი, თინა ხიდაშელი ვმუშაობთ ქალთა უფლებებზე. ალბათ იმის გამოც იციან, რომ უფასო საარჩევნო კლიპშიც ქალთა უფლებებზე ვლაპარაკობთ, ამიტომ მათთვის ეს თემა უცხო არ არის.

არასამთავრო ორგანიზაციების კვლევების მიხედვით, საქართველოში ქალების ჩაგვრაში გარკვეულ როლს თავად ქალები ასრულებენ. ქალებს, ვისაც ხვდებით თქვენ, როგორი განწყობა აქვთ, ხედავენ თქვენში, მაგალითად, ტრადიციების საფრთხეს თუ უფრო მათ ხმად განგიხილავენ?

რა თქმა უნდა, ქალი ამომრჩეველ ხაზს უსვამს იმას, რომ ქალი ვარ და მათ უფლებებს უფრო დავიცავ. ნამდვილად აქვთ მსგავსი მოლოდინი, რომ ქალები უფრო დაიცავენ ქალთა უფლებებს. სხვა მხრივ სრულიად შეცვლილი სურათი გვაქვს – დამსხვრეულია ის სტერეოტიპი, რომ მაჟორიტარული ბრძოლა არის კაცების ბრძოლა. რა თქმა უნდა, ეს განწყობა კიდევ არსებობს, თუმცა უფრო პარტიებში, ვიდრე ამომრჩეველში. ისინი ზუსტად ისე განიხილავენ ქალ კანდიდატს, როგორც მამაკაცს. ახლა უფრო გვეკითხებიან პროგრამულ საკითხებზე, ფასეულობებზე, წარსულზე, განვლილ გზაზე. ეს არის მათთვის უფრო მნიშვნელოვანი.

თქვენ როგორ ფიქრობთ, გეყოლებათ ამის გამო უფრო მეტი ქალი ამომრჩეველი?

რთულია ამის თქმა კვლევის გარეშე, მაგრამ განწყობებით თუ ვიმსჯელებთ, ვფიქრობ, ბევრი ქალი ამომრჩეველი დამიჭერს მხარს. შეხვედრებით და განწყობებით ასეთი შთაბეჭდილება მრჩება.

თქვენ დაბრუნდით ბათუმში 5-წლიანი პაუზის შემდეგ. რას ფიქრობთ, არის სამი თვე იმისთვის საკმარისი, რომ სრულყოფილი კამპანია ჩაატაროთ?

მე 2010 წლიდან გადავედი თბილსიში, 2013 წლიდან პარტიის თავმჯდომარე ვარ, მაგრამ ბათუმში ყოფნა, რა თქმა უნდა, ხშირად მიწევდა. კამპანიას რაც შეხება, სამი თვეა უკვე ბათუმში ვარ, ვხვდები ადამიანებს და არ მაქვს განცდა, რომ დრო არის ცოტა, რადგან ეს გარემო ჩემთვის უცხო არ არის. შეიძლება ცოტა მეტი ძალისხმევა დამჭრდეს, რომ ადამიანებს შევახსენო, მაგალითად, უმაღლეს საბჭოში ჩემი აქტიურობის შესახებ – მაშინ ძალიან ახალგაზრდა ვიყავი და დიდი დროც გავიდა, მაგრამ ის, რომ პარტიის თავმჯდომარე ვარ, ის რომ ეთერში ხშირად მიწევს კონკრეტულ საკითხებზე საუბარი და ახლა პირადადაც ვხვდები, ეს ყველაფერი უწყობს ხელს იმას, რომ ეს დრო საკმარისი იყოს.

თქვენს პარტიასთან მიმართებაში პოლიტკური ოპონენტები სალანძღავ სიტყვად ძალიან ხშირად იყენებენ ტერმინს „ლიბერალები“. ამომრჩეველშიც არის ეს განწყობა, ანუ გიწევთ პასუხების გაცემა ლიბერალური ღირებულებების გამო?

შეხვედრები მქონდა ეზოებში, კარდაკარ ვაკაუნებთ და ველაპარაკებით ადამიანებს, მაგრამ დანამდვილებით შემიძლია ვთქვა, რომ მართლა არც ერთ ადამიანს არ დაუსვამს ამ მიმართულებით კითხვა. არის შემთხვევა, როცა პირდაპირ მეუბნებია, რომ არ არის ჩვენი ამომრჩეველი, მაგრამ ნაკლებად მართლმადიდებლური, ნაკლებად ეროვნულები – აი ამ მიმართულებით კითხვა არავის დაუსვამს და ეს არ არის მხოლოდ ბათუმში. ჩვენი სხვა კანდიდატებიც ამბობენ, რომ ზოგიერთ გაზეთში დაწერილი მითები, ლეგენდები თუ ბრალდებები, – მახინჯი სტერეოტიპები, რაც ჩვენზე არსებობს, არასოდეს უკითხავთ.

ანუ შეგიძლიათ თქვათ, რომ საზოგადოება ბოლო ოთხი წლის განმავლობაში იმდენად გაიზარდა, რომ პოლიტიკური პარტიები ამ თემით მანიპულირებას ვეღარ ახერხებენ?

საზოგადოება კარგად ხედავს, რა არის მანიპულაცია და რა არის სინამდვილი. ადამიანები ამის იდენტიფიცირებას ახდენენ. ახლა უფრო იმას გვეკითხებიან, კოალიციაში 4 წლის მანძილზე რა იყო პრობლემა, რას მივაღწიეთ, რა შეიძლება გავაკეთოთ მომავალში, როგორი შანსები გვაქვს. ისინი ხშირად ლაპარაკობენ კომპრომისებზე, რისი გაკეთებაც რესპუბლიკურ პარტიას კოალიციაში ყოფნის დროს მოუხდა. ვლაპარაკობთ იმაზე, რომ მივაღწიეთ თვითმმართველობაში ნაბიჯების წინ გადადგმას, მაგრამ არის შეფერხება. როგორ მივიღეთ ანტიდისკრიმინაციული კანონი, რა მნიშვნელობა აქვს ამას იმისთვის, რომ ვიზალიბერალიზაციისკენ გადავდგათ ნაბიჯები და როგორი წარმატება გვაქვს ამ მიმართულებით, ჯარში სავალდებულო გაწვევაზე ვუხსნით, რატომ მიიღო ეს თინამ [თინა ხიდაშელი, თავდავის ყოფილი მინისტრი] ბრძანებით და არა კანონმდებლობით, რადგან პარტნიორებმა მხარი არ დაგვიჭირეს. ვლაპარაკობთ ფემიციდზე და იმაზე, რატომ არ დაგვიჭირეს მხარი პარტნიორებმა და როგორ ვერ გავაგებინეთ მათ, რომ ეს არის მნიშვნელოვანი პრობლემა ამ ქვეყანაში და გვჭირდება საკანონმდებლო ცვლილებები. და, რა თქმა უნდა, საკითხები ეხება ადგილობრივ პრობლემებს, ისეთს, რაც წესით უნდა მოაგვაროს თვითმმართველობამ. ამაზე ჩვენ ღიად და გულწრფელად ვეუბნებით, რომ ეს არის თვითმმართველობის პრობლემა და ჩვენ როგორც კანონმდებლებმა უნდა უზრუნველვყოთ ის, რომ თვითმმართველობის კოდექსი იყოს მორგებული ადამიანზე, ადამიანი უნდა იყოს ცენტრალური ფიგურა ნებისმიერი პოლიტიკის განსაზღვრის დროს. ანუ ძირითადად გვეკითხებიან თვითმმართველობის პრობლემებზე და მეორე საკითხი არის რესპუბლიკური პარტიის როლი ამ ოთხი წლის მანძილზე და იმაზე თუ ახლა ცალკე რატომ გამოვედით, ან სამომავლოდ რატომ უნდა მოგვცენ ხმა. ეს არის ძირითადი კითხვები და არა ის მითები, რასაც ვკითხულობთ ასავალ-დასავალის ტიპის გაზეთებში, სადაც უამრავი წარმოუდგენელი რამ წერია. მე ამით ბედნიერი ვარ.

ბათუმის, აჭარის მაჟორიტარები, როგორც ამ მოწვევის, ისე წინა მოწვევების პარლამენტში, როგორც წესი, არ გამოირჩეოდენ აქტიურობით, თითქმის არც ერთს არ აქვს არც ერთი საკანონმდებლო ინიციატივა, რომელსაც პარლამენტი განიხილავდა და დაამტკიცებდა. თუმცა ამ ქალაქს, რეგიონს აქვს ისეთი პრობლემები, როგორიცაა მიწის რეფორმა, იგივე ეკომიგრანტების საკითხი, ანუ ის თემები, რაც მართლაც პარლამენტის გადასაწყვეტია. თუ აგირჩიეს, რა იქნება თქვენი პირველი ინიციატივა, რაც დაადასტურებს, რომ ნამდვილად აქ მცხოვრები მოსახლეობის ინტერესებიდან ამოდიხართ?

მე დარწმუნებული ვარ, ამ პრობლემებზე საკანონმდებლო მუშაობა იქნება შესაძლებელი, თუ პარლამენტში იქნება რესპუბლიკელების ძლიერი ფრაქცია და პარლამეტში არ ვიქნები მარტო. მე ბათუმის მაჟორიტარ ვიქნები და, რა თქმა უნდა, აქცენტი მექნება იმაზე, რომ უნდა განვითარდეს რეგიონი, ქალაქი. აქ არსებული ბიურო, რომელიც ყველა მაჟორიტარს აქვს, შესაძლებლობას მომცემს სისტემატურად ვიყო აქ და ვეცნობოდე აქაურ პრობლემებს. ადამიანებთან საუბარს, მათი პრობლემების მიტანას შესაბამის ორგანოებთან აქვს დიდი მნიშვნელობა. ანუ მკაფიოდ ვხედავ შუამავლის როლს, თუ არსებობს ნება, მონდომება დეპუტატის მხრიდან. დარწმუნებული ვარ შევძლებ ამ მიმართულებით მუშაობს, რადგან, როდესაც გვერდში გიდგას პარტია, ზურგს გიმაგრებენ ამ მიმართულებით პროფესიონალები, შენი პრინციპების ერთგული ადამიანები, შეიძლება რეალური იყოს ამა თუ იმ კანონპროექტის შეთავაზება თუ არსებულ კანონებში ცვლილებების შეტანა. აქ არსებული პრობლემები, რაც გვაქვს, მაგალითად, ნაპირგამაგრება, ეს არის სახელმწიფოებრივი მნიშვნელობის საკითხი, ამას სჭირდება საკანონმდებლო დონეზე აქტუალიზება; კულტურული მემკვიდრეობის საკითხი დასახვეწია სახელმწიფო პოლიტიკის დონეზე, რაც პირდაპირ აისახება ბათუმზე. ჩვენ ვერ ვხედავთ პოლიტიკურ ნებას, ვერც თვითმმართველობებიდან, ვერც აჭარის მთავრობიდან, რომ დაცული იყოს კულტურული მემკვიდრეობა და მასთან ერთად ადამიანები, რომლებიც ცხოვრობებ შენობებში – მათი უფლებებიც დასაცავია, აუცილებელია არსებობდეს კულტურული მემკვიდრეობის ჯანსაღი პოლიტიკა. ასევე დასახვეწი და გასაძლიერებელია თვითმმართველობის კოდექსი, რადგან ჩვენ გვაქვს თვითმმართველობა არჩეული მერით, მაგრამ არსებობს ფინანსური დამოკიდებულება და, შესაბამისად, ისინი ანგარიშვალდებულებად არ თვლიან თავს მოქალაქეების მიმართ. ეს არის პრობლემა და ამ მიმართულებითაც, რა თქმა უნდა, სამუშაო იქნება პარლამენტში. მე დარწმუნებული ვარ, ამ მიმართულებით მთელი რესპუბლიკური პარტია იმუშავებს – ეს ყოველთვის იყო ჩვენი პრიორიტეტი.

თქვენი, როგორც პარტიის ლიდერის ხედვა მაინტერესებს, მაგალითად, მიწის რეფორმაზე, ეკონიგრანტების პრობლემაზე. ეს რეგიონისთვის ასევე ერთ-ერთი ყველაზე დიდი გამოწვევაა.

სამწუხაროდ, ეკომიგრანტებისა თუ მიწის რეფორმის თემა ყოველთვის იყო მანიპულაციის საგანი. წინა ხელისუფლება, გვახსოვს გასცემდა ნებართვებს საარჩევნოდ, ანუ ხდებოდა ამ ადამიანების მანიპულირება საარჩევნოდ და მერე ამ უფლებების ჩამორთმევა, რაც მე არაერთხელ გამიპროტესტებია. საკითხის დარეგულირება მოქმედ ხელისუფლებასაც გაუჭირდა. საქმე გვაქვს პოლიტიკურ ნებასთან, მე ამაშიდარწმუნებული ვარ, რადგან ეს იმდენწლიანი პრობლემაა, რომ შეიძლებოდა დასკვნების გაკეთება, სწორი სტატისტიკის მოძიება და ასე მოგვარება მიწის რეფორმის.

რაც შეეხება ეკომიგრანტებს, აქაც გვაქვს იგივე ვითარება, არასდროს არ ყოფილა ეს საკითხი პრიორიტეტული რეგიონული მთავრობისთვის. არ მახსოვს არც ერთი ბიუჯეტი, რომელშიც ეკომიგრანტების საკითხის სისტემურად გადაწყვეტულების შესაძლებლობა გაჩენილიყო. როდესაც პრობლემა წარმოიქმნება, მის ჩაცხრობაზე ვფიქრობთ და არა სისტემურ მიდგომაზე – გამოკვლევაა საჭირო, სტატისტიკის დამუშავება და სწორი სახელმწიფო პოლიტიკა, მათ შორის პრევენციული თვალსაზრისით, რადგან ამ კუთხით არაფერი არ კეთდება. როცა გვყავს ისეთი ადამიანები, ვისზეც ზრუნვა აუცილებელია და გასახლებაზე ვლაპარაკობთ, ამ ადამიანებს უნდა მიყვეს სახელმწიფო, რომ მათი უფლებები იყოს დაცული და მათი ცხოვრება გადაადგილების გამო არ გაუარესდეს.

ის განწყობა, რომ რესპუბლიკურ პარტიას აქვს დაბალი რეიტინგი, რასაც ექსპრემიერიც ხშირად იმეორებს, აზარალებს თუ არა პარტიას და რა შანსები გაქვთ თქვენი გადასახედიდან?

ძალიან დამაზარალებელი და სახიფათოა ქვეყნისთვის, როდესაც კეთდება განცხადებები, რომ მე 100 მანდატს მივიღებ ჩემი პარტიისთვის, ის არის 1-პროცენტიან პარტია… ეს არის დაკვეთები და მოწოდებები, რასაც ისმენენ ის ადამიანები, რომლებიც ჩართული არიან საარჩევნო პროცესში და პასუხისმგებელი არიან პროცესზე. ამიტომაც გვესმის მართველი გუნდისგან, როგორ პროვოკაციას ელიან, როგორ მიიღებენ 100 მანდატს. ეს დამაზარალებელია მთელი ქვეყნისთვის.

წინა მთავრობის დროსაც ვისმენდით მსგავს განცხადებებს, მაგრამ მაშინ ხელისუფლებამ არჩევნები ვერ მოიგო. ამის გათვალისწინებით შეიძლება ვთქვათ, რომ ეს განცხადებები ოპოზიციას აზარალებს?

ჩვენ გვინდა შევქმნათ თავისუფალი გარემო იმისათვის, რომ ყველა პარტიას ჰქონდეს ურთიერთობა საკუთარ ამომრჩეველთან და მივიღოთ მრავალპარტიული პარლამენტი. როდესაც „ქართული ოცნებისგან“ ან რომელი მის მთავარი აგიტატორისგან პერმანენტულად ისმის, რომ ჩვენ 100 მანდატს ავიღებთ, რა თქმა უნდა, ეს ქვეყანას აზარალებს და არა რომელიმე პარტიას. ყველა კვლევა ადასტურებს, რომ პარლამენტი იქნება მრავალპარტიული. სხვა საკითხია ვენდობით თუ არა ამ კვლევებს, მაგრამ მათ ერთი რამ ახასიათებთ, 50-60%-მდე ამომრჩეველი ამბობს, რომ არ აქვთ არჩევანი გაკეთებული და ადევნებენ თვალყურს პოლიტიკოსებს. ასეთ ვითარებაში პროგნოზის გაკეთება შეუძლებელია. მე ვარ დარწმუნებული, რომ პარლამენტი იქნება მრავალპარტიული. ვითარება იცვლება ყოველ დღეს, იცვლება განწყობები, ჯერ დარჩენილია საკმაო დრო და ამ დროში ბევრი რამ შეიძლება შეიცვალოს. ყველაფერი დამოკიდებულია პოლიტიკოსებსა და პოლიტიკური პარტიების აქტივობაზე. იმედი მაქვს, პროცესი იქნება მშვიდი და ყველა პარტია წარმოაჩენს საკუთარ პოზიციას ამომრჩევლისთვის.

წინასაარჩევნო გარემო როგორია თქვენი გადასახედიდან?

2012 წელთან შედარებას თუ გავაკეთებთ, რა თქმა უნდა, შედარება არ არის – გარემო არის თავისუფალი, ადამიანებზე ზეწოლასა თუ დაშინებას მე ვერ ვხედავ. ჩანს მცირე მავნებლობები, მაგალითად პლაკატების დახევა. ამაზე საჩივარი დავწერეთ და ასევე საჩივარი დავწერეთ იმაზე, რომ ბათუმის ცენტრში კულტურულ მემკვიდრეობაზე აკრძალულია პლაკატების გაკვრა და „ქართული ოცნება“ ამ წესს არ ითვალისწინებს – ყველა შენობაზე პლაკატები აქვთ გაკრული. სამწუხაროდ, კანონსაც არღვევენ და არც ქალაქზე ფიქრობენ.

ის თუ, როგორ თანასწორ სიტუაციაში არიან პოლიტიკოსები, ჩანს ბილბორდებზე, რადგან ბილბორდები ასევე, ძირითადად, მართველი გუნდისაა. საკმაოდ ძვირია ბილბორდების განთავსებას, რასაც მხოლოდ ისინი ახერხებენ. აუდიტის სამსახური აქვეყნებს და კარგად ჩანს, რამდენად თანასწორ ვითარებაში არიან ფინანსური თავლსაზრისთი პარტიები, ვხედავთ, რომ ერთ პარტიას თუ 5 მილიონი აქვს თვეში, მეორეს, ჩვენი პარტიის მაგალითზე, რამდენიმე ათასი. ესეც, რა თქმა უნდა, იმაზე მეტყველებს თუ როგორი გარემოა. მე მესმის რამდენიმე ადამიანისგან, რომ საჯაროდ მხარდაჭერის გამოხატვას შიშობენ, ისინი ფიქრობენ, რომ ამის გამო პრობლემები შეექმნებათ. შეექმნებათ თუ არ შეექმნებათ რთულია ამაზე ლაპარაკი, მაგრამ ცალკეულ ადამიანში ასეთი განწყობები არსებობს. ზეწოლას მე ვერ ვხედავ, მაგრამ ის, რომ სპეცსამსახურები ერევა პოლიტიკურ პროცესში, ამაში დარწმუნებული ვარ, რაინოებიდანაც მაქვს ინფორმაცია, რომ არის ჩარევები, მაგრამ, რა თქმა უნდა, იმ ფონზე, რასაც ჩვენ 2012 წელს ვხედავდით, ახლა ასეთი ვითარება არ გვაქვს…

იმედი მაქვს, „ქართული ოცნებ“ შეწყვეტს განცხადებებს, თუ როგორ ელიან პროვოკაციებს, შესაბამისი სამსახურები დაკავდებიან ამის პრევენციით, თუ ასეთი რამ არსებობს და შეეშვებიან მოსახლეობის დაშინება-დაძაბვას, რომ ახლა, სადღაც იარაღიანი ხალხი შემოვარდება.

ოფიციალური მიღება სომხეთის დამოუკიდებლობის დღესთან დაკავშირებით

21 სექტემბერს, ბათუმში სომხეთის რესპუბლიკის კონსულმა, სომხეთის ეროვნულ დღესასწაულთან – დამოუკიდებლობის 25 წლისთავთან დაკავშირებით ოფიციალური მიღება გამართა.

მიღებაზე მიწვეულნი იყვნენ ბათუმის მერი გიორგი ერმაკოვი, აჭარის მთავრობის თავმჯდომარე ზურაბ პატარაძე და სხვა ოფიციალური პირები.

სომხეთის რესპუბლიკამ 1991 წლის 21 სექტემბერს საბჭოთა კავშირისგან დამოუკიდებლობა გამოაცხადა.

სკოლები ყველაზე მეტი პირველკლასელით

ბათუმის თორმეტმა სკოლამ 2016-2017 სასწავლო წლის დაწყებამდე პედაგოგის 33 ვაკანსია გამოაცხადა. ვაკანსიები, ძირითადად, დაწყებითი განათლების საფეხურზეა, რაც პირველკლასელთა განსაკუთრებით დიდი რაოდენობით იყო განპირობებული. რომელ სკოლებს ჰყავთ ყველაზე მეტი პირველკლასელი, ვინ რამდენი მასწავლებელი აიყვანა ახალი სასწავლო წლისთვის და როგორ მიმდინარეობდა პედაგოგთა შესარჩევი კონკურსი?

„პირველკლასელთა ნაკადის ზრდის გამო სკოლებმა დაწყებითი კლასების პედაგოგებზე კონკურსი გამოაცხადეს. სამწუხაროდ, იმდენი სერტიფიცირებული პედაგოგი არ გამოჩნდა, რამდენიც მოთხოვნა იყო, ამიტომ რიგმა სკოლებმა ჩვენთან შეთანხმებით, დროებით ხელშეკრულებით აიყვანეს არასერთიფიცირებული პედაგოგებიც“, – უთხრა „ბათუმელებს“ აჭარის განათლების მინისტრის მოადგილემ სულიკო თებიძემ.

ერთ-ერთი ასეთი ბათუმის 22-ე საჯარო სკოლაა. როგორც სკოლის დირექტორი, გიორგი რუხაძე ამბობს, თავდაპირველად სკოლას 150 ადგილზე ჰქონდა მიღება გამოცხადებული:

„ბოლო რამდენიმე წელია დაწყებით კლასში – 25, განსაკუთრებულ შემთხვევაში კი მაქსიმუმ 29 მოსწავლე უნდა იყოს. ჩვენ ექვსი კლასის გახსნას ვგეგმავდით, მაგრამ ეს 150 ადგილი მალევე შეივსო, მოთხოვნა იყო მაღალი და სამინისტროსთან შეთანხმებით ორჯერ დავამტეთ 25-25 ადგილი. სულ 200 მოსწავლის მიღება შეგვიძლია პირველკლასში. ამ ეტაპზე 190 მოსწავლე გვყავს“, – გიორგი რუხაძე ასევე დასძენს, რომ ამის გამო სკოლა ორცვლიან რეჟიმზე გადავიდა. ასევე გაჩნდა პედაგოგების დამატების საჭიროებაც და დაწყებითი კლასის ოთხ პედაგოგზე გამოცხადდა ვაკანსია, რომელიც www.pedagogi.ge-ზე განთავსდა. როგორც 22-ე სკოლის დირექტორი გვიხსნის, კანონის მოთხოვნაა, რომ პედაგოგი იყოს სერტიფიცირებული ან საგნის გამოცდა ჰქონდეს ჩაბარებული შესაბამის საფეხურზე. განცხადების მიღების ამოწურვის შემდეგ კი აღმოჩნდა, ამ კრიტერიუმებს მხოლოდ ორი პედაგოგი აკმაყოფილებდა.

„ორი პედაგოგის ვაკანსია კვლავ გვქონდა და თავიდან გამოვაქვეყნეთ განცხადება. პირობებიც უფრო შევამსუბუქეთ, უკვე ბაკალავრიც შეიძლებოდა და მოთხოვნებში, 1-6 კლასებში რაც ისწავლება, მათგან ნებისმირი საგნის ჩაბარება დამაკმაყოფილებლად ჩავსვით“, – ყვება 22-ე საჯარო სკოლის დირექტორი. თუმცა, სასწავლო წლის დაწყებამდე სამი დღით ადრეც რომ აღარ გამოჩნდა კანდიდატი, გიორგი რუხაძის თქმით, სამინისტროსთან შეთანხმებით დროებით მოვალეობის შემსრულებლად აიყვანეს ისეთი კადრი, რომელიც არ აკმაყოფილებდა კრიტერიუმებს.

„პრობლემა უფრო დაწყებითის პედაგოგებზეა. აი, ახლა კვლავ გამოვაცხადეთ ვაკანსია მაღალ კლასებში ინგლისური ენის პედაგოგზე. დღეს იყო ბოლო ვადა და შემოსული რვა განცხადებიდან შვიდი სერტიფიცირებულია. ასე რომ, კონკურენცია იქნება მაღალი და კომისია გასაუბრების საფუძველზე შეარჩევს საუკეთესოს“, – ამბობს გიორგი რუხაძე.

კვლავ ორი ცვლის რეჟიმში აგრძელებს სასწავლო პროცესს ბათუმის პირველი საჯარო სკოლა. ბათუმის სხვა სკოლების მსგავსად, კვოტები აქაც გაზარდეს – გამოცხადებული 150-დან 175-მდე. თუმცა, როგორც სკოლის დირექტორი მედეა გვენეტაძე ამბობს, მოთხოვნა გაცილებით მაღალია.

„ყველას აქ უნდა ბავშვის მოყვანა, მაგრამ ფიზიკურად ვერ მივიღებთ ამდენს. ახალი კორპუსის აშენების შემდეგაც ორ ცვლაში გვიწევს მუშაობა“, – ამბობს მედეა გვენეტაძე. ამ სკოლაში მხოლოდ ორი ვაკანსია იყო გამოცხადებული, თუმცა ერთი ვაკანსია ჩავარდა.

„დაწყებითში ავიყვანეთ სერტიფიცირებული, გამოცდილი მასწავლებელი. მეორე ვაკანსია ფიზიკის მასწავლებელზე გვქონდა, მაგრამ ჩაგვივარდა. 13 საათის მიცემა მინდოდა ახალი მასწავლებლისთვის, რადგან მოქმედ მასწავლებელს ძალიან ბევრი ჰქონდა და არ შეეძლო იმდენის ჩატარება, მაგრამ მათ, ვინც სურვილი გამოთქვეს, ამდენი საათის აღება არ უნდოდათ და ჩვენ ორ მასწავლებელს 13 საათზე ვერ ავიყვანდით, ამიტომ ისევ ძველ მასწავლებელს დავუტოვეთ“, – ამბობს პირველი სკოლის დირექტორი, ხოლო კონკურსთან დაკავშირებით გვიხსნის, რომ ჯერ არ ჰქონიათ შემთხვევა, როდესაც გამოცხადებულ ვაკანსიაზე ერთზე მეტი ისეთი კანდიდატის განცხადება მიიღეს, რომლებიც სრულად აკმაყოფილებდნენ პირობებს. მსგავს შემთხვევაში, მედეა გვენეტაძე ამბობს, რომ საკონკურსო მეთოდად საჩვენებელ გაკვეთილს გამოიყენებს, რადგან ყველაზე კარგად გაკვეთილზე ჩანს მასწავლებლის შესაძლებლობები.

ახალი სასწავლო წლისთვის ახალი პედაგოგი არ აუყვანიათ ბათუმის მე-16 საჯარო სკოლაში, აქ თავისუფალი საათები შიდა რესურსით შეავსეს:

„როდესაც მზადდება ხელშეკრულებები შიგნით და დირექტორსა და კათედრებზეა დამოკიდებული [სექტემბერში], ვის რამდენი საათი ექნება, ჩვენ შიდა კონკურსს არ ვატარებთ. ანუ ჯერ კიდევ შემუშავების სტადიაშია სკოლის ტარიფიკაცია და ამიტომ კათედრებზე [პრინციპში კონკურსის გარეშე, მაგრამ კათედრებთან კონსულტაციებით] ვანაწილებთ საათებს. ჩვენს შემთხვევაში ასე იყო. დაწყებითების მასწავლებელი წავიდა სკოლიდან და საათები გამოჩნდა, მაგრამ თანამშრომლებმა კათედრის სხდომაზე გადაინაწილეს ეს საათები და სწორედ ამის საფუძველზე დაიდო ხელშეკრულებები“, – გვიხსნის მე-16 საჯარო სკოლის დირექტორი თამთა კვარაცხელია. სასწავლო პროცესი ამ სკოლაშიც ორ ცვლად მიმდინარეობს. სკოლის დირექტორი მოსწავლეთა რაოდენობის გაზრდით გამოწვეულ შესაძლო პრობლემაზეც საუბრობს:

„თავდაპირველად გამოცხადებული გვქონდა 75 მოსწავლის მიღება, შემდეგ მოგვიწია 25 ადგილის დამატება. ახლა გვყავს 94 პირველკლასელი. მოსწავლეებს, რა თქმა უნდა, მაქსიმალურად თანაბრად გადავინაწილებთ, მაგრამ კარგად რომ აღიქვათ მდგომარეობა, წარმოიდგინეთ, ვთქვათ, სამ კლასში მყავს 25-25 მოსწავლე, მეოთხეს ვხსნი 19 ბავშვისთვის. ამ კლასის პედაგოგს იგივე ხელფასი უნდა გადავუხადო, სკოლას კი 19 მოსწავლის ვაუჩერი დაერიცხება“.

აჭარის განათლების სამინისტროს მონაცემებით, წელს საჯარო სკოლებში – 2 743, ხოლო კერძო სკოლებში – 803, სულ 3 546 პირველკლასელია რეგისტრირებული. ყველაზე მეტი – 200 მოსწავლე მიიღო ბათუმის მე-8 საჯარო სკოლამ, რამაც სამი დამატებითი ვაკანსია გააჩინა სკოლაში. მასწავლებელთა ვაკანსიების სიმრავლით პირველ ადგილზე ბათუმის მე-7 საჯარო სკოლაა, რომელმაც ახალი სასწავლო წლისთვის დაწყებითი საფეხურის ხუთ პედაგოგზე გამოაცხადა ვაკანსია. ამ სკოლაში წელს 142 პირველკლასელი მიიღეს.

შედეგები საბოლოო არ არის და სკოლებს შორის მობილობის პროცესში, შესაძლოა, პირველკლასელთა რაოდენობა შეიცვალოს.

მერია 100-მდე გონიოელს მიწას საიდუმლოდ აძლევს

მერიამ 98 გონიოელს მიწის ნაკვეთებზე საკუთრების უფლება აღუდინა. ამის შესახებ იმ გადაწყვეტილებაში წერია, რომელიც მერიის საკუთრების უფლების აღიარების კომისიამ მიიღო. კომისიის სხდომა 16 სექტემბერს ჩატარდა. მაღალი საზოგადოებრივი ინტერესის მიუხედავად, ამ სხდომის და მიღებული გადაწყვეტილების შესახებ მერიას საზოგადოებისთვის არაფერი უცნობებია. სხდომის ოქმი ასევე არ იძებნება ბათუმის მერიის ოფიციალურ ინტერნეტგვერდზე.

კომისიის გადაწყვეტილებით, მიწის საკუთრება იმ გონიოელებს აღუდგათ, რომლებსაც თვითნებურად ჰქონდათ დაკავებული მიწის ნაკვეთები, მათ შესახებ არ უმსჯელია სასამართლოს და მიწის ნაკვეთი არ მდებარეობს გონიო-აფსაროსის მუზეუმ-ნაკრძალის დაცვის ზონაში.

“ახალი არაფერი მიგვიღია. ცნობილია, რომ კომისიამ მიიღო გადაწყვეტილება 27 ივნისს. ამჯერად უბრალოდ იდენტიფიცირება მოხდა იმ ადამიანების, ვისაც კომისიის წინა გადაწყვეტილებით უნდა აღუდგეს მიწის საკუთრება,” – უთხრა „ბათუმელებს“ მერიის საკუთრების უფლების აღიარების კომისიის თავმჯდომარემ, ირაკლი ბოლქვაძემ. მისი თქმით, სია საჯარო რეესტრს უკვე გადაეგზავნა, თუმცა ჯერ უცნობია, დაურეგისტრირდა თუ არა რომელიმე მათგანს საკუთრება: „შეიძლება ხარვეზით უკან დაგვიბუნდეს რომელიმე შემთხვევა. ჯერ რეესტრისგან არაფერი მიგვიღია“.

კითხვაზე, რატომ არ აღუდგათ საკუთრება იმ მოქალაქეებს, ვისზეც სასამართლომ უკვე იმსჯელა და საკითხის გადაწყვეტა თვითმმართველობის შესაბამის კომისიას დაავალა, ირაკლი ბოლქვაძემ ვერ გვიპასუხა. გვითხრა, რომ ამის შესახებ წინა კომისიამ მიიღო გადაწყვეტილება და კომისიას ამ კუთხით არ უმსჯელია [იგულისხმება საკრებულოს საკუთრების აღიარების კომისია, რომელიც ახალი “თვითმმართველობის კოდექსის” შესაბამისად მიმდინარე წლის აგვისტოში მერიის სტრუქტურის ნაწილი გახდა].

საკრებულოს საკუთრების უფლების აღიარების კომისიის 27 ივნისის გადაწყვეტილების შემდეგაც უცნობი დარჩა, რატომ არ უნდა აღდგენოდა საკუთრება იმ მოქალაქეებს, რომელთა შემთხვევებიც სასამართლომ განიხილა. მაშინ კომისიის თავმჯდომარე, ლევან კინწურაშვილი მედიასთან ამბობდა, რომ კომისიამ ინდივიდუალურად უნდა შეისწავლოს ყველა შემთხვევა. 27 ივნისის გადაწყვეტილებით კომისიამ ბათილად მიიჩნია ხელვაჩაურის კომისიის ის დადგენილება, რომლის მიხედვითაც გონიოში 271 ოჯახს მიწის საკუთრება ჩამოერთვა.

25 ივლისს 61-მა გონიოელმა ბათუმის საკრებულოს საკუთრების უფლების აღიარების კომისიის წინააღმდეგ სასამართლოში სარჩელი შეიტანა. გონიოელების ინტერესს „საერთაშორისო გამჭვირვალობა საქართველო“ იცავს. ამ ორგანიზაციაში გვითხრეს, რომ საკრებულოს 16 სექტემბრის გადაწყვეტილების შესახებ მათთვის ცნობილი გუშინ გახდა.

„მერიას მინიმუმ იმ ადამიანებისთვის უნდა ეცნობებია ამ გადაწყვეტილების შესახებ, ვისაც ეხება იგი უშუალოდ. ჩვენ ვისთანაც გვაქვს კომუნიკაცია, მათ ჩვენგან გაიგეს ამის შესახებ,” – ამბობს ნინო სიორიძე, „საერთაშორისო გამჭვირვალობა საქართველოს“ იურისტი. რა იცვლება კომისიის ახალი გადაწყვეტილებით – ამის შესახებ ამ ორგანიზაციაში საჯარო რეესტრისგან პასუხის მიღებამდე კომენტარს არ აკეთებენ.

ბათუმელი პარასპორტსმენი: მინდა, არავინ ჩაიკეტოს სახლში

27 წლის ზვიად დუმბაძე ბათუმელი პარასპორტსმენია მშვილდოსნობაში. მან ათი წლის ასაკში უბედური შემთხვევის გამო მარჯვენა ფეხი დაკარგა. ამ სპორტს უკვე მეოთხე წელია მისდევს. ყოველდღიურად სამიდან ოთხ საათამდე ვარჯიშობს, რომ მომდევნო პარაოლიმპიადის – „ტოკიო 2020“ საგზური მოიპოვოს. მისი მთავარი მიზანი მსოფლიო ჩემპიონობაა.

„ფეხი 1998 წელს დავკარგე, მანქანაში ვიჯექი, რომელიც აფეთქდა… ახლა პროთეზს ვატარებ… ეს ისეთი ასაკი იყო, რომ კარგად ვერც ვაცნობიერებდი, რა მჭირდა. ალბათ ამიტომაც არ ჩავიკეტე“, – იხსენებს ბათუმელი პარასპორტსმენი და გვიყვება, რომ ბავშვობიდანვე აქტიურად იყო ჩართული სხვადასხვა აქტივობაში, თამაშობდა ქუჩის ფეხბურთს, მოზარდობის ასაკშიც ცდილობდა დახმარებოდა საკუთარ თავს და არ ჩაკეტილიყო.

დაამთავრა ბათუმის მეხუთე საჯარო სკოლა [ყოფილი გოროდოკის გიმნაზია]. ამბობს, რომ ყველაზე მეტად საზოგადოების დამოკიდებულება აწუხებდა: „ყველაზე მეტად სიბრალულით რომ მიყურებდნენ, ეს მთრგუნავდა… როცა შეზღუდული შესაძლებლობის მქონე ადამიანი გამოდის გარეთ და საზოგადოება ამას ფიზიკურად ხედავს, ეცოდება მერე ის…“, – თუმცა სულ ცდილობდა ეს დაეძლია. მოგვიანებით ერთ-ერთ არასამთავრობო ორგანიზაციაშიც მუშაობდა, რის შემდეგაც ოთხი წელი იმუშავა ტელევიზიაში.

„რაღაც ეტაპზე უმნიშვნელო პრობლემები მქონდა, სამსახურიდანაც წამოვედი, სახლში ვიჯექი და არაფერს ვაკეთებდი… მაშინ გამოჩნდა თამაზ ფუტკარაძე, რომელსაც მანამდეც დიდი ხანია ვიცნობდი, მაგრამ მაშინ შემომთავაზა მშვილდოსნობაში ბედი მეცადა და ერთხელ რომ ვცადე, მას შემდეგ ჩემი ცხოვრების ნაწილი გახდა. ახლა არც ვმუშაობ, ყველაფერს მშვილდოსნობაში ვდებ“, – ამბობს ზვიადი. თამაზ ფუტკარაძე მისი ტრენერი და როგორც ზვიადი ამბობს, ყველაზე დიდი გულშემატკივარია.
თითქმის ერთი წელია ზვიადი ფეხბურთს დაუბრუნდა და ამპუტანტთა საფეხბურთო ლიგაში თამაშობს, თუმცა ამბობს, რომ ეს მისთვის ჰობივითაა: „ჩემთვის ყველაზე მნიშვნელოვანი მშვილდოსნობაა. მომავალი წლიდან უკვე ჩემპიონატები და საკვალიფიკაციო შეხვედრები იწყება და მთელი ძალები და დრო ამას უნდა დავუთმო“.

როგორც თავად ყვება, „რიო 2016-ზეც“ ელოდა საგზურის აღებას – „საფრანგეთში საკვალიფიკაციო შეჯიბრებაში მაღალი შედეგი ვაჩვენე, მეცხრე ადგილზე გავედი… თუმცა საქართველოს პარაოლიმპიური კომიტეტის გადაწყვეტილებით, ის სპორტსმენი წავიდა, ვისაც ჩემზე დაბალი მაჩვენებელი ჰქონდა. ის ჩემი მეგობარია და არ გამიპროტესტებია… უბრალოდ, მწვრთნელის გამო გული დამწყდა, ჩვენ დიდი შრომა ჩავდეთ და ახლა კიდევ თავიდან ვცდით“.
წვრთნებს ანგისის სპორტულ ბაზაზე გადის. როგორც ამბობს, პირობები აკმაყოფილებს, მიუხედავად იმისა, რომ წვიმიან ამინდში დარბაზში ვარჯიშობს, სადაც მხოლოდ 18- მეტრიან დისტანციაზეა შესაძლებელი ვარჯიში. მზიან ამინდში კი მოედანზე, 70- მეტრიან დისტანციაზე ემზადება შეჯიბრებებისთვის.
ყველაზე დიდი მოტივატორი და მისაბაძი მაგალითი მშვილდოსნობაში ბათუმელი პარასპორტსმენისთვის საქართველოს მშვილდოსნობის ფედერაციის პრეზიდენტი ხათუნა ნარიმანიძეა. „როცა ასეთი სპორტსმენის გვერდით გიწევს ხოლმე ვარჯიში, მოტივაცია გაქვს, რომ მაქსიმალური გააკეთო. ის ყველა სპორტსმენისთვის მაგალითია“, – ამბობს ზვიადი. ხათუნა ნარიმანიძე საქართველოს წლის საუკეთესო სპორტსმენ ქალად არის დასახელებული.

ზვიადი ამბობს, რომ ყველაზე მნიშვნელოვან დროს, ახლა უკვე მისმა ტრენერმა, თამაზ ფუტკარაძემ აჩვენა გზა, სადაც საკუთარი თავი და საყვარელი საქმე იპოვა. არ დარჩა სახლში და არ დანებდა. დღეს კი უკვე თვითონ ცდილობს სხვებს დაეხმაროს.

„მინდა, არავინ ჩაიკეტოს სახლში რაიმე შეზღუდულობის გამო. ვცდილობთ, რაც შეიძლება მეტმა გაიგოს პარასპორტის შესახებ. აი, თუნდაც ფეხბურთი არის შესანიშნავი, პროფესიონალურად თუ არა, გასართობად მაინც. ძალიან გამიხარდება, თუ ვინმესთვის მაგალითი ვიქნები, ამისთვის თავს არ დავზოგავ“, – ამბობს ზვიად დუმბაძე, საქართველოს ორგზის ჩემპიონი, საერთაშორისო ტურნირების მონაწილე მშვილდოსნობაში.

249 ათასი ლარი ქედის სოფელ ნამლისევის ბაღის მშენებლობისთვის

დღეს, 22 სექტემბერს, ქედის მუნიციპალიტეტის სოფელ ნამლისევში საბავშვო ბაღის შენობა გაიხსნა.

50 აღსაზრდელზე გათვლილ ბაღში ორი ჯგუფი იქნება. საბავშვო ბაღში 11 ადგილობრივი დასაქმდა და ამ დროისთვის 25 აღსაზრდელი დადის.

ნამლისევის ბაღის მშენებლობისთვის ადგილობრივი ბიუჯეტიდან 249 000 ლარი იყო გამოყოფილი. საბავშვო ბაღების მშენებლობა-რეაბილიტაციისთვის კი ქედაში წელს 600 ათასი ლარი დაიხარჯა.

,,ეს ბაღი ნამლისევის, მილისის, უჩხითისა და ქოსოფლის მოსახლეობას მოემსახურება… იმედია, სამომავლოდ დემოგრაფიული მდგომარეობა გაუმჯობესდება და ბაღი ბავშვებით შეივსება“, – ამბობს ქედის გამგებელი დავით დუმბაძე. მისივე თქმით, ბაღი ევროსტანდარტის შესაბამისად მოეწყო და აქვს იატაკქვეშა გათბობის სისტემა.

ამ დროისთვის ქედაში 14 საბავშვო ბაგა-ბაღია. წლის ბოლომდე მათ რიცხვს რიგით მე-15 ბაღი შეემატება [სოფელ ოქტომბრის ბაღი].

კინოფესტივალის აფიშა: „როცა დედამიწა მსუბუქია“ და კრისტიან მუნჯუს ახალი ფილმი

დღეს, 22 სექტემბერს, საავტორო კინოს ბათუმის საერთაშორისო ფესტივალზე შემდეგ ფილმებს ნახავთ:

12:00 საათზე: „ჩიხი“. რეჟისორი არუთინ ხაჩატრიანი. სომხეთი

ფილმი სომხური დიასპორისადმი მიძღვნილი ხუთსერიანი დოკუმენტური ფილმის მეორე ნაწილია. ამერიკული მწვანე ბარათის მოგების შემდეგ ლეონი აშშ-ში მიდის, თუმცა მის ამერიკულ ოცნებას ახდენა არ უწერია.

14:00 საათზე: ბათუმელი რეჟისორების მოკლემენტრაჟიანი ფილმების კოლექცია “ბათუმის ტალღა”

„ბათუმის ტალღა“ შემოქმედებითი ერთობაა, რომელიც ბათუმელმა კინემატოგრაფისტებმა დააფუძნეს. ეს არის მოკლემეტრაჟიანი ფილმების ალმანახი, რომელიც რეჟისორებმა საგანგებოს ბათუმის კინოფესტივალისთვის გადაიღეს.

16:00 საათზე: „როცა დედამიწა მსუბუქია“. რეჟისორი სალომე მაჩაიძე/ თამუნა ქარუმიძე/ დავით მესხი

ეს არის პოეტური დოკუმეტური ფილმი თანამედროვე ახალგაზრდებზე პოსტსაბჭოთა საქართველოში.

18:00 საათზე: „მასწავლებელი“. რეჟისორი იან ჰრებეიკი, სლოვაკეთი/ჩეხეთი

სკოლის დირექტორი მშობელთა კრებას მას შემდეგ იწვევს, როცა ბავშვები ერთ-ერთ მასწავლებელს უჩივიან და მის გათავისუფლებას ითხოვენ. ფილმი ჩეხოსლოვაკიის დაშლისშემდგომ პრობლემებს ეხება.

20:00 საათზე: „აღსარებანი“. რეჟისორი რობერტო ანდო, იტალია/საფრანგეთი

რობერტო ბერია, მას ბალტიის სანაპიროზე მდებარე მდიდრულ სასტუმროში დიდი რვიანის მინისტრთა შეხვედრაზე მიიწვევენ.

22:30 საათზე: “კურსდამთავრებული”, კრისტიან მუნჯუ, რუმინეთი / ბელგია / საფრანგეთი

49 წლის ექიმი ტრანსილვანიის პატარა ქალაქში ცხოვრობს. მას უნდა რომ 18 წლის ქალიშვილი საზღვარგარეთ გაგზავნოს სასწავლებლად, თუმცა გოგონა თავდასხმის მსხვერპლი ხდება.

კინოსეანსებზე დასწრება/ბილეთები – ყველა სეანსზე დასწრება უფასოა. დასწრებისთვის აუცილებელია წინასწარ უფასო ბილეთების (რაც კონტროლის და ადგილების დაჯავშნის მექანიზმია) აღება კინოთეატრ “აპოლოში“.

ინტერნეტით დაჯავშნა – კინოთეატრ “აპოლოს” კინოსეანსებზე შესაძლებელია ადგილების დაჯავშნა ინტერნეტით. ამისათვის საჭიროა კინოფესტივალის საიტზე მოცემული ბმულის გამოყენება – BIAFF RESERVATION.

ფოტოზე: კადრი ფილმიდან „როცა დედამიწა მსუბუქია“

როგორ უნდა ამოვიცნოთ სუიციდის ნიშნები

ჯანდაცვის მსოფლიო ორგანიზაციის ინფორმაციით, ყოველ წელიწადს მსოფლიოს მასშტაბით 800 000 ადამიანი იღუპება სუიციდით. ეს მაჩვენებელი მაღალია ჩვენს ქვეყანაშიც. მიუხედავად ამისა, საქართველოში სუიციდის პრევენციის პროგრამა 2014 წლიდან მხოლოდ სასჯელაღსრულების დაწესებულებებში მუშაობს. ფსიქოლოგ მაია ცირამუას თქმით, წინასაარჩევნოდ ფსიქიკური ჯანმრთელობა ისევ ვერ მოხვდა პრიორიტეტებში. როგორ უნდა ამოვიცნოთ სუიციდის ნიშნები და რა შეიძლება გავაკეთოთ პრევენციისთვის, ამ თემაზე „ბათუმელები“ მაია ცირამუას ესაუბრა.

ზოგჯერ ადამიანებს ყურადღებიდან რჩებათ ის ნიშნები, რაც შესაძლოა ადამიანის სუიციდისკენ მიდრეკილებაზე მიუთითებდეს. რა რისკ-ფაქტორები შეიძლება გამოვყოთ ამ შემთხვევაში, ვინ შეიძლება იყოს რისკ-ჯგუფში, ვის მიმართაც სასურველია, რომ ახლობლებმა მეტი ყურადღება გამოიჩინონ?

შესაძლოა ადამიანს ცხოვრებაში ჰქონდეს ბევრი სირთულე, ფსიქიკური თუ ფიზიკური ჯანმრთელობის სხვადასხვა სახის პრობლემა, მაგრამ, რა თქმა უნდა, ყოველთვის არ მიდის საქმე სუიციდამდე. განსაკუთრებით საყურადღებოა მომენტები, როცა ადამიანი დიდ სულიერ ტრავმას გადაიტანს, კარგავს ახლობელს ან აქვს რაიმე სხვა სერიოზული დანაკარგი ცხოვრებაში, ასეთ დროს ყოველთვის ყურადღებით უნდა ვიყოთ ამ ადამიანების მიმართ. სიფრთხილეა საჭირო, თუ მის საახლობლოში [და განსაკუთრებით თუ ის მოზარდია] იყო სუიციდის შემთხვევა.

რა ქცევებმა შეიძლება მიგვანიშნოს, რომ ადამიანი სუიციდზე ფიქრობს?

ადამიანებთან, რომელთაც დიდი ტრავმა და სტრესი გადაიტანეს, საყურადღებოა ქცევის უეცარი ცვლილება, დაწეული გუნება-განწყობა, ასევე, როცა ადამიანი ინტერესს კარგავს იმ საქმის მიმართ, რაც ადრე სასიამოვნო იყო მისთვის და ხალისით აკეთებდა. ასევე, როცა ადამიანი ნელ-ნელა იკეტება საკუთარ თავში და მისი სამეგობრო თუ საახლობლო წრე სულ უფრო და უფრო პატარავდება. შესაძლოა ეს ყველაფერი თანდათანობით შეამჩნიოთ მის ქცევაში, მაგალითად, ბოლო ორი ან სამი თვის მანძილზე. უპირველეს ყოვლისა, როდესაც ადამიანი ღიად ამბობს, რომ დაკარგა ყველაფრისადმი ინტერესი, როდესაც ვერბალიზებას ახდენს იმისას, რომ ამის გაკეთებას ფიქრობს – ყოველთვის ჯობს მოვუსმინოთ და მივცეთ საშუალება, რომ გაგვიზიაროს ის, რაც აწუხებს. ეს აუცილებელია, მიუხედავად იმისა, რომ ზოგჯერ შესაძლოა არ გვრჩებოდეს შთაბეჭდილება, რომ სერიოზულად ამბობს ამას. პირველი დახმარება ამ შემთხვევაში არის სწორედ ის, რომ კომუნიკაცია შედგეს – ეს არის საშველად გაწვდილი ხელი, ამ ადამიანის გადარჩენის შანსი, რომელიც შეიძლება ხელიდან გავუშვათ, თუ მასთან ყურადღებით არ ვიქნებით.

როგორ უნდა მოვიქცეთ, რისი გაკეთება ღირს და რისი გაკეთება არ ღირს ამ დროს?

არ არის სწორი, როდესაც ადამიანი სუიციდზე ლაპარაკობს და შენ ცდილობ ყველაფერი ხუმრობაში გადაიტანო. ისეთი ფრაზებით, როგორიცაა – „რა სისულელეა, ეს რა მოგიფიქრებია…“ ხდება იმ ყველაფრის გაუბრალოება, რაც ვიღაცისთვის ტრაგედიაა. როცა ადამიანი გიზიარებს თავის ტრაგედიას, ამ ნათქვამისთვის მნიშვნელობის დაკარგვა, მისი იუმორში გადატანა არ არის სწორი სტრატეგია. ამით მას უჩნდება განცდა, რომ მისი არ ესმით, რაც კიდევ უფრო უღრმავებს სევდას. ჩვენი მხრიდან ყოველთვის უნდა იყოს მზაობა, რომ გვერდში დავუდგეთ, რაღაც ალტერნატივები დავანახოთ, ესაა მთავარი და არა განსჯითი დამოკიდებულება. იმ შემთხვევაში თუ ადამიანი დისტანცირდება ოჯახის წევრებისა და მეგობრებისგან, არ არის გახსნილი, მისი ხასიათის ცვლილება უკვე თვალშისაცემია, ნებისმიერ შემთხვევაში საყურადღებოა და საჭიროა დავითანხმოთ ეს ადამიანი სპეციალისტთან მისვლაზე.

იგივე ეხება თუ არა იმ ადამიანებს, რომლებიც თვითმკვლელობაზე სტატუსებს სოციალურ ქსელებში აქვეყნებენ?

არსებობს სუიციდის სხვადასხვა ფორმა, ზოგიერთი შესაძლოა არ იყოს შედეგზე ორიენტირებული, არამედ იყოს მანიპულირების მიზნით, მაგრამ, როცა სასოწარკვეთილი ადამიანი რაღაცას ამბობს, ნებისმიერ შემთხვევაში ჯობს, რომ მას დაველაპარაკოთ. არ დალაპარაკებით შეიძლება საქმე უფრო გავაფუჭოთ. არ აქვს მნიშვნელობა ეს ადამიანი სოციალურ ქსელშია თუ პირადად ველაპარაკებით – ნებისმიერ დროს, როცა ადამიანი გამოხატავს სევდასა და წუხილს და იკითხება ნებისმიერი ნიშანი იმისა, რომ მას აღარ უნდა ჩვენ შორის ყოფნა – თანადგომა შესაძლოა მნიშვნელოვანი აღმოჩნდეს მისთვის.

საზღვარგარეთ არსებობს საინტერესო პრაქტიკა, სოციალურ ქსელებში არსებობს ე.წ. „წითელი ღილაკის“ პროგრამა, როდესაც ადამიანი დააფიქსირებს სუიციდის რისკის შემცველ ტექსტს სოციალურ ქსელში, შენ აკეთებ შეტყობინებას ამ ღილაკის მეშვეობით. შეტყობინება კეთდება ადამიანთა გარკვეულ ჯგუფთან და როცა ეს ჯგუფი იღებს შეტყობინებას, ისინი უმალვე იწყებენ მოქმედებას. აქ შედის შეტყობინებები, როგორც სუიციდის რისკების შესახებ, ისე ძალადობის რისკების შესახებაც. ეს არის კარგად გამართული სტრუქტურა, რაც ეხმარება თვითონ მოქალაქეს, რომ აქტიურად იყოს ამ პროცესში ჩართული.

რა შეიძლება მოვიმოქმედოთ მაშინ, როცა ქუჩაში ან სხვა სივრცეში ვაწყდებით სუიციდის მცდელობას, რა შეიძლება ვუთხრათ იმ წამს უცხო ადამიანს?

ყველა შემთხვევა ინდივიდუალურია და არ არსებობს რაიმე რეცეპტი, თუმცა ყველაფერი ჯობს უმოქმედობას, იქნება ეს ფიზიკურად მისი მოშორება საფრთხისგან [თუ ამის ძალა და შესაძლებლობა გვაქვს], თუ მისთვის იმის თქმა, რომ „ცხოვრება გრძელდება“, რომ „იქნებ კიდევ დაფიქრდეს, სანამ ამ ნაბიჯს გადადგამს“ და ა.შ. თუმცა წინასწარ განსაზღვრა წარმოუდგენელია, ვისთან გაჭრის და ვისთან – არა. აქ მეორე დიდი პრობლემა წარმოიშვება – ვთქვათ მე, როგორც მოქალაქემ, ეს ადამიანი დავიხსენი, დაველაპარაკე და მოვაბრუნე, მაგრამ ამის შემდეგ რას ვაკეთებ, ვის მივმართავ – არ ვიცი. თუ გადახტა, იცი, რომ 112-ში უნდა დარეკო, მაგრამ თუ მცდელობა იყო და გადაარჩინე, რას აკეთებ – მექანიზმი, სისტემა, ვისაც შეიძლება პრევენციისთვის, კრიზისული ჩარევებისთვის და რეაბილიტაციისთვის მიმართო, ქვეყანაში არ არსებობს. მიუხედავად იმისა, რომ ახლა წინასაარჩევნო პერიოდია, არც ერთი პოლიტიკოსის გამოსვლაში ან პარტიის პროგრამაში არ გამიგია, რომ მისთვის პრიორიტეტულია ფსიქიკური ჯანმრთელობა და რაღაცის გაუმჯობესებას აპირებენ ამ მხრივ.

„სუიციდის ტალღა“ რამდენად რეალური მოვლენაა და რა სიფრთხილე უნდა გამოიჩინოს მედიამ თუ საზოგადოებამ თვითმკვლელობის შესახებ ინფორმაციის გავრცელებისას?

არსებობს „ქოფიქათის“ პრინციპი, როცა არა მხოლოდ სუიციდის, არამედ ძალადობის შემთხვევების შესახებ ინფორმაციის მედიით გავრცელების შემდეგ, თითქოს ამ ქცევის კოპირებას ახდენენ ის ადამიანები, რომლებიც გარკვეული ტიპის მოწყვლადობით ხასიათდებიან ამ თვალსაზრისით. ამ ტალღაში განსაკუთრებით აქტიურად ებმებიან ახალგაზრდები. მედიის საშუალებებით სუიციდის შესახებ ინფორმაციის მასიურად გავრცელების შემდეგ სუიციდის შემთხვევები მატულობს. ჩვენს ქვეყანაშიც იყო ასეთი შემთხვევები, თუმცა ეს არ იყო მხოლოდ სუიციდთან მიმართებაში. მაგალითად, ძალიან საინტერესო შემთხვევა იყო, როდესაც თითქოს ტენდენციად იქცა, ახალგაზრდების მიერ ლეღვის ნახარშით დამწვრობის მიღება. როგორც კი დაიწყო მედიამ ამაზე საუბარი, თითქოს გეომეტრიული პროგრესიით იზრდებოდა ამ შემთხვევათა რაოდენობა. ამიტომ მნიშვნელოვანია, რომ სუიციდის შესახებ ინფორმაციის გავრცელებისას არც ერთ შემთხვევაში არ გვქონდეს განსჯითი დამოკიდებულება, არ უნდა შევაფასოთ ეს მოვლენა დრამატულად, მით უმეტეს, არ უნდა მოხდეს მისი რომანტიზება. ეს უნდა იყოს მშრალი ფაქტი, ყოველგვარი მიმანიშნებლების გარეშე, თუ როგორ მოხდა, რა იქნა გამოყენებული ამისთვის და როგორი იყო ახლობლებისა თუ საზოგადოების რეაქცია.

ერთი წლის წინ ერთ-ერთი საინფორმაციო სააგენტო, რომელიც სუიციდის შემთხვევას აშუქებდა, წერდა სუიციდით გარდაცვლილი თინეიჯერის დედის რეაქციაზე და იმას, რომ დედა თავს იდანაშაულებდა შვილის სუიციდში – ძალიან სახიფათოა ასეთი აქცენტი! ისევე, როგორც არასწორი იყო, როცა ერთ-ერთი სკოლის პედაგოგმა ინტერნეტ-სივრცეში გამოსათხოვარი წერილი მისწერა ყოფილ მოსწავლეს, რომელმაც ასევე სუიციდი ჩაიდინა. ეს წერილი ზუსტად რამდენიმე საათში ძალიან პოპულარული გახდა – არ შეიძლება ასეთი მოვლენების ასეთი დრამატიზება, სუიციდის ჩამდენის ჰეროიზაცია და ფაქტის რომანტიზება. ეს შეიძლება ვიღაცისთვის მიმზიდველი აღმოჩნდეს.

სუიციდის შესახებ ინფორმაცია არ უნდა იყოს ტოპ-ნიუსი, უნდა შეიცავდეს მაქსიმალურად მშრალ ინფორმაციას და იყოს ემოციურად ნეიტრალური. ეს, ცხადია არ ნიშნავს, რომ მედიამ გვერდი უნდა აუაროს ამ თემას, პირიქით კარგია თუ ბევრს ვისაუბრებთ სუიციდის პრევენციაზე, ზოგადად ადამიანებზე, მათ პრობლემებზე და გამოსავალზე.

ბათუმის მერია ბინას ყიდის

ბათუმის მერია, რომლისგანაც 2 ათასამდე უბინაო მოქალაქე საცხოვრებელ ფართობს ითხოვს, ახალაშენებულ კორპუსში ბინას ყიდის. მუნიციპალიტეტის საკუთრებაში არსებული 46 კვ/მ ფართობის ბინა ბათუმში, ხიმშიაშვილის ქუჩაზე, კომპლექს „ბათუსის“ მოპირდაპირედ მდებარეობს. ბინა შავი კარკასის მდგომარეობაშია. „ბათუმელები“ შეეცადა გაეგო, თუ რატომ გადაწყვიტა ბათუმის მერიამ საბინაო ფონდიდან ქონების გასხვისება.

„ეს არის ახალი ბინა და ის მერიის საბინაო ფონდში არ ირიცხებოდა. თუ რის საფუძველზე აქვს ეს ბინა მერიას საკუთრებაში, შეგიძლიათ ნახოთ რეესტრის ამონაწერში. რაც შეეხება იმას, თუ რამდენად ხშირად ყიდის მერია საცხოვრებელ ფართობებს – ეს სტატისტიკა მე არ მაქვს, შეგიძლიათ მერიისგან ოფიციალურად გამოითხოვოთ“, – გვითხრა რუსუდან ჟოჟაძემ. ელექტრონული აუქციონის შესაბამის გვერდზე სწორედ მისი საკონტაქტოა მითითებული იმათთვის, ვისაც გასაყიდი ბინის შესახებ დამატებითი ინფორმაცია აინტერესებს.

რეესტრის ამონაწერის მიხედვით, აღნიშნული ბინა 2014 წლიდანაა რეგისტრირებული ბათუმის მუნიციპალიტეტის საკუთრებაში.

არსებული კანონმდებლობით, თუ ვინმე დაინტერესდება მუნიციპალიტეტის ქონების შეძენით [რისი გასხვისებაც კანონითაა დაშვებული], მას შეუძლია მიმართოს მერიას, რომელიც გადაწყვეტს, თუ რა ფორმით გაასხვისოს ქონება ან საერთოდ უარი თქვას გასხვისებაზე.

binaaaaaaa — ბინა, რომელსაც ბათუმის მერია ყიდის / ფოტო ელ.აუქციონის გვერდიდან

ამ შემთხვევაში, ბინის აუქციონზე გატანის საფუძვლად ბათუმის მერია საქართველოს მთავრობის 2014 წლის შესაბამის დადგენილებას უთითებს. ამ დადგენილების მიხედვით, ელექტრონული აუქციონის ჩატარებამდე ინფორმაცია აუქციონში მონაწილეობის მსურველთა შესახებ [მათ შორის მონაწილეობის მსურველთა რაოდენობაზე] კონფიდენციალურია. შესაბამისად, გაურკვეველია თუ ვინ არის დაინტერესებული ამ ბინის შეძენით. „ბათუმელების“ ინფორმაციით, ასეთი დაინტერესება არსებობს.

მერია ასევე უფლებამოსილია, მუნიციპალიტეტის ქონების შეძენით დაინტერესებულ პირს, ამ ქონების ელექტრონულ აუქციონზე გატანის მიზნით, მოსთხოვოს ქონების საწყისი საპრივატიზებო საფასურის არანაკლებ 10%-ის ოდენობის საგარანტიო თანხა ელექტრონულ აუქციონში მონაწილედ დარეგისტრირების უზრუნველსაყოფად.

ბათუმის მერიამ აღნიშნული ბინა აუქციონზე 49 ათას 700 ლარად გაიტანა, ბიჯი 2000 ლარია, ანუ ქონება მინიმუმ 51 700 ლარად მაინც გაიყიდება, თუ აუქციონი შედგა [ანუ დაახლოებით 1124 ლარად 1 კვ/მ. არადა, ამ უბანში 1 კვ/მ სულ ცოტა 700 აშშ დოლარი ღირს]. საგარანტიო თანხა 14 910 ლარია.

ელექტრონული აუქციონი 23 სექტემბერს დასრულდება. თუ ბინის შეძენით დაინტერესებული პირი აუქციონში მონაწილედ არ დარეგისტრირდება, მაგრამ ელექტრონული აუქციონი მაინც შედგება, ამ პირს მის მიერ წარდგენილი საგარანტიო თანხა უკან დაუბრუნდება, მოთხოვნიდან 10 დღის ვადაში.

ბინის გაყიდვით მიღებული თანხა ჩაირიცხება მუნიციპალიტეტის ბიუჯეტში, როგორც შემოსავალი ქონების პრივატიზებიდან.
მერიის ბინებით „ბათუმელები“ გასულ წელსაც დაინტერესდა. მაშინ შერიფ ხიმშიაშვილის ქუჩა #1-ში, „ბათუსის“ მოპირდაპირე კორპუსში, სადაც მერია დღეს ბინას ყიდის, მუნიციპალიტეტს 27 ბინა ჰქონდა საკუთრებაში. მერიის ინფორმაციით, ამ კორპუსში ბინები 2014 წლის ივლისიდან გადავიდა ქალაქის ბალანსზე.

გასული წლის მონაცემებით, ბათუმში 1700-მდე უსახლკარო ოჯახი ცხოვრობდა [2012 წლის არჩევნებამდე მერიისგან ბინას ქალაქში მცხოვრები 1650 ოჯახი ითხოვდა]. რატომ არ იყენებს ბინებს მძიმე მდგომარეობაში მყოფი ოჯახების უზრუნველყოფისთვის მერია? – ამ კითხვის პასუხად მერიიდან გამოგზავნილ წერილში განმარტებული იყო, რომ საცხოვრებელი ფართობები ბათუმის მერიას ესაჭიროება „ცალკეული ფიზიკური პირების ბინებით დაკმაყოფილების თაობაზე საგარანტიო ხელშეკრულებიდან და სასამართლოს გადაწყვეტილებებიდან გამომდინარე დაკისრებული ვალდებულებების შესრულებისათვის“.

საბინაო ფონდი მერიას ასევე ესაჭიროება იმ პირთა ბინებით დაკმაყოფილებისათვის, რომელთა საკუთრებაში არსებული ფართობი საჭიროა საერთაშორისო, შიდასახელმწიფოებრივი ან ადგილობრივი საავტომობილო გზების მშენებლობისა თუ სხვა ინფრასტრუქტურული პროექტების განხორციელებისთვის. ბათუმის მერია ბინებს ასევე გადასცემს ოჯახებს, ვისაც შვიდი და მეტი შვილი ჰყავს.

არის თუ არა მერიაში მონაცემები [სტატისტიკა] იმ ოჯახებისა, რომლებსაც არ გააჩნიათ საცხოვრებელი ბინები? და რას ჰპირდება მერია ასეთ ოჯახებს? – ამ კითხვებზე პასუხი მერიიდან ვერ მივიღეთ.

„კრიტიკული აზროვნება სოციალურ მეცნიერებებში” – ბათუმელი მაგისტრანტებისთვის

„სოციალური კვლევისა და ანალიზის ინსტიტუტი“ აცხადებს მიღებას სეზონურ სკოლაში – „კრიტიკული აზროვნება სოციალურ მეცნიერებებში”.

„რა არის კრიტიკული აზროვნება?“ „რატომ ვიქცევით ისე, როგორც სხვები?“ „სექსუალობა, გენეტიკა და კულტურა“ – ეს იმ თემების არასრული ჩამონათვალია, რაზეც მაგისტრატურის სტუდენტებს ივანე ჯავახიშვილის სახელობის თბილისის სახელმწიფო უნივერსიტეტის სრული პროფესორი, სოციოლოგი იაგო კაჭკაჭიშვილი და ფსიქოლოგი, თავისუფალი უნივერსიტეტის სრული პროფესორი გიორგი ნიჟარაძე ესაუბრებიან.

პროექტის ფარგლებში ლექციები გაიმართება ბათუმის შოთა რუსთაველის სახელობის უნივერისტეტში 2016 წლის 28-31 ოქტომბერს. კურსის სრული ჩამონათვალი შეგიძლიათ იხილოთ აქ.

პროექტის შესარჩევ კონკურსში მონაწილეობის მიღება შეუძლიათ აჭარის რეგიონში მოქმედი უმაღლესი საგანმანათლებლო დაწესებულებების განათლების,ჰუმანიტარულ, სოციალურ და პოლიტიკურ მეცნიერებათა ფაკულტეტის მაგისტრატურის სტუდენტებს.

პროექტში მონაწილეობის მსურველებმა ელექტრონული აპლიკაცია 2016 წლის 13 ოქტომბრის ჩათვლით უნდა გადაგზავნონ შემდეგ მისამართზე: https://form.jotform.me/62553478714463

აპლიკაციას თან უნდა ერთვოდეს ცნობა 2016-2017 სასწავლო წელს მაგისტრატურაზე სწავლის შესახებ და ესე 400-დან – 800 სიტყვამდე.

ასევე, დაინტერესებულმა პირებმა ქვემოთ მოცემული ორი თემიდან უნდა შეარჩიონ ერთ-ერთი:

როგორ გესმით კრიტიკული აზროვნება? რამდენად იყენებთ კრიტიკულ მიდგომებს თქვენს სპეციალობაში?
მაგისტრანტს შეუძლია დაწეროს ესე ნებისმიერ საკითხზე, რომელიც მას აინტერესებს და რომელიც მეტ–ნაკლებად ეხება პროგრამაში მოცემული თემებიდან რომელიმეს.

აპლიკანტის მიერ წარმოდგენილი ესე შეფასდება 100 ქულიან სკალაზე შემდეგი 3 კრიტერიუმის მიხედვით: 1 .ინფორმირებულობა; საკითხის ცოდნა – 40 ქულა; 2. ანალიტიკური აზროვნება – 40 ქულა; 3. წერის აკადემიური სტილი – 20 ქულა.

პროექტის მიზანია სტუდენტებში კრიტიკული აზროვნების განვითარება, რაც გულისხმობს სკეპტიციზმის გამომუშავებას და საკითხის კრიტიკული შეფასებისა და მასზე რეფლექსიის სტიმულირებას. ამავე დროს სალექციო კურსის ორგანიზება „კრიტიკულ აზროვნებაში“, წაახალისებს სტუდენტებს თეორიული ცოდნის პრაქტიკაში გამოყენებისა და სოციალური რეალობის რეფორმირებისკენ.

პროექტი ხორციელდება აჭარის განათლების, კულტურისა და სპორტის სამინისტროს დაფინანსებით და ბათუმის შოთა რუსთაველის სახელობის სახელმწიფო უნივერსიტეტის მხარდაჭერით.

დამატებითი ინფორმაციისთვის დაუკავშირდით:

ოსიკო კონცელიძე – მობ: +995 598 802 108

ელფოსტა: kritikuliazrovneba16@gmail.com

გამჭვირვალობა: მუნიციპალური SMS-ები მმართველი პარტიის სამსახურში

„საერთაშორის გამჭვირავალობა – საქართველო“ [TI] მუნიციპალიტეტების შესრულებული სამუშაოების შესახებ, მოქალაქეებისთვის მოკლე ტექსტური შეტყობინებების გაგზავნას განცხადებით გამოეხმაურა. TI-ს შეფასებით, ვინაიდან არჩევნებამდე სულ ცოტა დროა დარჩენილი, ეს ქმედება შესაძლოა აღქმული იქნას, როგორც მმართველი პარტიის სასარგებლოდ ამომრჩეველზე პირდაპირი გავლენის მცდელობა.

განცხადებაში ასევე აღნიშნულია, რომ მუნიციპალიტეტებს არ განუმარტავთ, რა წყაროებით მოიპოვეს კონკრეტულ მუნიციპალიტეტში დარეგისტრირებული პირების პირადი სატელეფონო ნომრები.

TI მოუწოდებს:

მუნიციპალიტეტებს – არ გამოიყენონ მათ ტერიტორიაზე რეგისტრირებული ამომრჩევლების პირადი მონაცემები იმგვარად, რომ ამან შეიძლება გააჩინოს ეჭვები საარჩევნო მიზნით ადმინისტრაციული რესურსის გამოყენებასა და პერსონალური მონაცემების დაუცველობასთან დაკავშირებით;
პერსონალური მონაცემების დაცვის ინსპექტორს -გამოიკვლიოს, როგორ მოიპოვეს მუნიციპალიტეტებმა, მოქალაქეთა სახელზე რეგისტრირებული სატელეფონო ნომრები.

ბოლო რამდენიმე დღეა ბათუმში, ქუთაისში, თბილისსა და სხვა მუნიციპალიტეტებში მოქალაქეები მოკლე ტექსტური შეტყობინებების სახით იღებენ ინფორმაციას განხორციელებული და მიმდინარე პროექტების შესახებ. ამასთან დაკავშირებით ბათუმის საკრებულოს პრესსამსახურში „ბათუმელებს“ უთხრეს რომ შეტყობინებებს ბათუმის საკრებულო არ აგზვნის. ბათუმის მერიამ კი კომენტარი არ გააკეთა.

მერი ბიუჯეტის ცვლილებებს მოითხოვს, ოპოზიცია – მერის იმპიჩმენტს

“ბათუმის მერი, გიორგი ერმაკოვი ცდილობს ამომრჩევლის მოსყიდვას. ამიტომ ჩვენ ვაპირებთ მისი იმპიჩმენტის საკითხის დაყენებას,” – ამბობს გიორგი კირთაძე. ის ბათუმის საკრებულოს წევრია და ასევე 69-ე საარჩევნო ოლქის მაჟორიტარი კანდიდატი „ერთიანი ნაციონალური მოძრაობიდან“.

მერიამ საკრებულოს უკვე მიმართა ბიუჯეტში ცვლილების შეტანის მოთხოვნით. „ერმაკოვი აცხადებს, რომ ფორსმაჟორული სიტუაცია აქვს და სტიქიის გამო ინფრასტრუქტურული სამუშაოებია გასაკეთებელი. ამისთვის ის 2 მილიონ 225 ათას ლარს ითხოვს. რეალურად წინა წლის სამუშაოებია გაწერილი, რომლის გაკეთების აუცილებლობაც თითქოს ახლა გაჩნდა. ფორსმაჟორობაზე ამოფარებით ცდილობს ხელისუფლება ამომრჩევლის მოსყიდვას,“ – უთხრა გიორგი კირთაძემ „ბათუმელებს“.

გიორგი კირთაძემ დღეს საკრებულოს ბიუროს სხდომა პროტესტის ნიშნად დატოვა, რის შემდეგაც სხდომა კვორუმის არარსებობის გამო ჩაიშალა. კირთაძე საკრებულოს ხვალინდელ სხდომაზე მერის იმპიჩმენტის პროცედურის დაწყებას ითხოვს, რასაც საკრებულოს 9 წევრის ხელმოწერა სჭირდება: „ჩვენ სამნი ვართ, „ნაციონალები“, მაგრამ ოპოზიციური ფრაქცია ბევრია საკრებულოში. ვნახოთ, როგორ მოიქცევიან ისინი ხვალ…”.

კითხვაზე, როგორ მოახერხებს ამ სვლით მმართველი პარტია ამომრჩევლის მოსყიდვას, როცა პროექტების განხორციელებას ტენდერის გამოცხადება და შესაბამისი დრო სჭირდება, გიორგი კირთაძემ გვითხრა, რომ ეჭვი ერმაკოვის კორუფციულ გარიგებებზეც აქვს: „დიდი ალბათობით გამოცხადდება პირდაპირი შესყიდვები, რადგან ფორსმაჟორზე საუბრობს ერმაკოვი და ამით იგი თავისი მეგობარი ბიზნესმენების გულსაც მოიგებს”.

ბათუმის მერიაში ამომრჩევლის მოსყიდვას გამორიცხავენ. აქ გვითხრეს, რომ მერია რუსთაველის ქუჩაზე, სასტუმრო „ჰილტონის“ მიმდებარედ მიწის ნაკვეთის პრივატიზაციის შედეგად შემოსავალს ელიან, რითაც სხვადასხვა მასშტაბური ინფრასტრუქტურული პროექტის განხორციელებას შეძლებენ: “წლის განმავლობაში არაერთი პრობლემა დაგროვდა სტიქიის შედეგად. ჩვენ წერილებით მივმართავდით და ფინანსურ დახმარებას ვთხოვდით საქართველოს ფინანსთა სამინისტროს. მოვითხოვდით დაფინანსებას სახელმწიფო ბიუჯეტიდან, რადგან საკმაოდ სოლიდურ ხარჯებთანაა ეს სამუშაოები დაკავშირებული. რამდენიმე დღის წინ მივიღეთ პასუხი, რომ ბათუმს უკვე ჰქონდა ახალი ფინანსური შემოსავალი და შესაბამისად დაფინანსების გამოყოფის საჭიროება აღარ არსებობდა,” – ამბობს არჩილ ვანაძე, ბათუმის მერიის საფინანსო-ეკონომიკური სამსახურის უფროსის მოადგილე.

არჩილ ვანაძე არ გამორიცხავს, რომ სამუშაოების ნაწილი შესაძლოა პირდაპირი შესყიდვის გზით განხორციელდეს: „ასეთი იქნება სულ რამდენიმე შემთხვევა, სადაც გადაუდებელი სიტუაციაა. ყველა ასეთი პროექტი შეთანხმებული იქნება საკრებულოსთან“.

საკითხის შესწავლას აპირებს „სამართლიანი არჩევნები“. აქ გვითხრეს, რომ ფორსმაჟორს ნამდვილად ცნობს საარჩევნო კანონმდებლობა, მაგრამ გასარკვევია, რამდენად არის ბიუჯეტის ცვლილების მოთხოვნა ამ შემთხვევაში კანონთან შესაბამისი.

მაჟორიტარი კანდიდატი: ჩვენი მთავარი გზავნილია, უკეთესი ცხოვრება

არმაზ ბახტაძე „თავისუფალი დემოკრატების“ მაჟორიტარი კანდიდატია აჭარის უმაღლეს საბჭოში. განათლებით ეკონომისტია. 2007 წლიდან მუშაობდა საბანკო სისტემაში, შემდეგ მომსახურების სფეროში. კითხულობს ლექციებს ბათუმის ნავიგაციის სასწავლო ინსტიტუტში და შოთა რუსთაველის სახელმწიფო უნივერსიტეტში. 2012 წლიდან არის „თავისუფალი დემოკრატების“ და შუახევის საკრებულოს წევრი ამ პარტიიდან.

ბატონო არმაზ, რა არის თქვენი მთავარი გზავნილი ამომრჩეველთან?

ჩვენი მთავარი გზავნილია, უკეთესი ცხოვრება, უკეთესი ეკონომიკა, უკეთესი საპენსიო სისტემა, დასაქმებული ადამიანები და კარგი ანაზღაურება, საათში სამი ლარი, მინიმუმ 500 ლარი ხელფასი თვეში…

ეს დაპირებები დეკლარირებულია თქვენი პარტიის მიერ, ამიტომ როგორც მაჟორიტარი კანდიდატის დაპირებები რა არის?

მე როგორც შუახევის საკრებულოს წევრი, ორი წელი საკრებულოში ვარ და ის რიგი საკითხები, რომლის გადაწყვეტის სურვილი და უნარი გვაქვს, თვითმმართველობას მაინც არ შეუძლია. ახალი კანონით თითქოს გაძლიერდა თვითმმართველობა, მაგრამ მაინც დაბალი დონეა. ქუჩის დაგებაზეც კი ცენტრალურ ხელისუფლებას უნდა შეუთანხმდე. ამიტომ, ჩემი მთავარი მიზანი იქნება უმაღლეს საბჭოში, თუ ჩვენ გვაქვს ავტონომია, ავტონომიას უფრო მეტი სტატუსი მიეცეს, გაძლიერდეს და რიგი საკითხები, რომელიც აჭარაში არის პრობლემატური, თვითონ აჭარაში გადაწყდეს.

შეგიძლიათ ჩამოთვალოთ ის „რიგი პრობლემები“, რაზეც საუბრობთ და უმაღლესი საბჭოს კომპეტენციიდან როგორ წარმოგიდგენიათ მათი მოგვარება?

თუნდაც ის, რომ ქუჩაზე სახელის გადარქმევას, საკრებულოს გადაწყვეტილების შემდეგ ცენტრალური ხელისუფლებიდან დასტური სჭირდება.

როდის იყო მსგავსი შემთხვევა?

ბათუმის და ყველა საკრებულოში თუ შევიდა მოქალაქეების განცხადება რომ კონკრეტულ ქუჩას შეეცვალოს სახელი, კომისიაზე განხილვის შემდეგ, საკრებულოს სხდომაზე გატანამდე, საკრებულოს სახელით განცხადება კომისიაში, რომელიც ფუნქციონირებს რეგიონალური განვითარებისა და ინფრასტქრუქტურის სამინისტრიში და ის რეკომენდაციას აძლევს საკრებულოს, გაიტანოს თუ არა საკითხი სხდომაზე.

ასევე, ბიუჯეტში თანხების განკარგვის დროს მოდის დირექტივა თუ სად უნდა დაიხარჯოს, რას უნდა მოხმარდეს, კონკრეტულად ინფრსტრუქტურულ ღონისძიებებს. სოფლის განვითარების პროგრამის ფარგლებში ტრანსფერები როცა ირიცხება, კონკრეტული მითითებები მოდის, რაში უნდა დაიხარჯოს. მერიასთან დაახლოებული ტიპები ტენდერებში მონაწილეობენ ფარულად, მამიდაშვილები, ბიძაშვილები არიან დარეგისტრირებულები და ტენდერებში მონაწილეობენ.

კონკრეტული ფაქტები შეგიძლიათ თქვათ?

შუახევის, ხელვაჩაურის მაგალითზე შემიძლია გითხრათ, როცა კონკრეტული მითითება იყო, რომ უნდა გაკეთებულიყო გარე განათება. ჯერ გზა უნდა გაკეთდეს და მერე უნდა გაკეთდეს გარე განათება. ორმოები გავანათოთ? არასწორად არის პრიორიტეტები გადანაწილებული.

როცა სამინისტროდან რეკავს ჩვეულებრივი სპეციალისტი და გამგებელი ამბობს, რომ სამინისტროდან დარეკილი ზარია და „რა ვქნა, რა მოვახერხო“, მაშინ რაში გვჭირდება თვითმმართველობის კანონები.

თქვენ საუბრობთ თვითმმართველობის კოდექსზე, საკრებულოების ფუნქციებზე, რომელიც არ არის უმაღლესი საბჭოს კომპეტენცია, თვითმმართველობის ფუნქციებში ჩაერევა უმაღლესი საბჭო?

ამიტომ არის საჭირო ფუნქციების გაზრდა.

რას გულისხმობთ, იქნებ დააკონკრეტოთ?

გამგეობის წარმომადგენლებს, მერიის წარმომადგენლებს, მიკრორაიონები სადაც არის, … ადამიანი, რომელიც სოფელში ცხოვრობს და შეექმნა პრობლემა პირუტყვთან დაკავშირებით, ავად გაუხდა და დასაკლავია, თუ არ მიიყვანე ძროხა ლაბორატორიაში, საბუთს ვერ უწერ… მოსახლეობას ეუბნები, თუ მოიყვანე მოიყვანე, თუ არა მოკვდესო.

უმაღლეს საბჭოსთან რა კავშირშია ეს პრობლემა, ეს საკითხი სურსათის უვნებლობის სამსახურს ხომ ეხება?

ასეთი პრობლემების წინაშეა ზემო აჭარა, რიგი პრობლემები აქვს ბათუმზე შემოერთებულ ტერიტორიებს, მშობელი, რომელიც სწავლის საფასურს უხდის შვილს, 2 400 ლარს, … მე, მაგალითად, ვერ გადავიხადე და ორი წელი შეჩერებული მქონდა სტუდენტის სტატუსი. სტუდენტი ამდენ თანხას იხდის და შემდეგ მამიდაშვილებით და ბიძაშვილებით აკომპლექტებენ სამსახურებს.

ჩვენ უნდა მივცეთ ახალგაზრდებს იმის მოტივაცია, რომ მათი სწავლა და მათი გამოცდილება იყოს გამოყენებული და მივცეთ მათ დასაქმების მეტი საშუალება. თუ ავტონომია გვაქვს, ეს ავტონომია უნდა გამოვიყენოთ ისე, რომ ამ პრობლემების მოგვარება შეგევძლოს. უმაღლესი საბჭო კი დღემდე ნოტარიუსად არის ქცეული.

უმაღლესი საბჭოდან როგორ შეძლებთ დაეხმაროთ, ვთქვათ, სტატუსშეჩერებულ სტუდენტებს?

როცა ჩვენ ხელისუფლებაში მოვალთ „თავისუფალი დემოკრატები“, მეტ ინვესტიციებს მოვიზიდავთ, ასევე წავახალისებთ შიდა ბიზნესს, ეკონომიკის განვითარებაა ძირითადი პრიორიტეტი.

თქვენ საუბრობთ პარტიაზე, თუ მოვა უმრავლესობაში, მაგრამ თუ ვერ მოხვედით უმრავლესობაში, მაგრამ თქვენ ერთი კონკრეტული პირი მოხვდით უმაღლეს საბჭოში, მაშინ რა შეგიძლიათ გააკეთოთ?

დარწმუნებული ვარ, მოვალთ იმ დოზით, რომ პრობლემების მოგვარება შევძლოთ, მაგრამ ერთი დეპუტატიც რომ ვიყო „თავისუფალი დემოკრატებიდან“, შევეცდები ამ პრობლემების წინააღმდეგ ვიბრძოლო.

თქვენ რამდენი წელი იყავით საკრებულოში?

მეორე წელია.

შეგიძლიათ დამისახელოთ თქვენი კონკრეტული ინიციატივა, რომელიც გქონდათ საკრებულოში და რა ინიციატივა იყო?

ფრაქციის სახელით გვქონდა წარდგენილი ინიციატივა, რომელიც ეხებოდა იმას, რომ მაღალმთიანეთში ვინც ცხოვრობს და ჩააბარა მაგისტრატურაში, სწავლის 50 პროცენტი გამგეობის ბიუჯეტს დაეფინანსებინა.

მიიღო საკრებულომ ეს ინიციატივა?

არა, უმრავლესობის ხმები იყო საჭირო და არ მოხერხდა. ამის შესაძლებლობა შუახევის ბიუჯეტში არის, რადგან მილიონ ნახევარი ლარი უკან დააბრუნა გასულ წელს გამგეობამ, რადგან ბიუჯეტი არ შესრულდა. კიდევ მქონდა ინიციატივა, რომელიც სოფელ წაბლანაში საბავშვო ბაღის მშენებლობას ეხებოდა, მაგრამ არ ააშენეს. ამ სოფელში 22 ბავშვი ცხოვრობს და კანონი ითვალისწინებდა, რომ ყოფილიყო საბავშვო ბაღი ამ სოფელში. გამგებელმა მაინც არ მიიღო ეს ინიციატივა და ბაღი ააშენეს სოფელ შუბანში, სადაც 4 ბავშვი იყო. ეს იმიტომ, რომ გამგებელიც შუბნიდან არის.

მიიღეს თუ არა “შეღავათიანი კრედიტი” „იპოთეკით დაზარალებულებმა“

“არაფერიც არ მიგვიღია. ჩვენ ისევ საპროტესტო აქციებზე ვართ,” – გვითხრა ნარგიზ დოლიძემ. ის ერთ-ერთ ე.წ. იპოთეკით დაზარალებულებს შორის, ვინც ხელისუფლებისგან დახმარებას ითხოვს და “შეღავათიანი კრედიტის” მიღებას ცდილობს.

გუშინ, 20 სექტემბერს “ქართული ოცნების” მაჟორიტარმა კანდიდატმა ქობულეთში, “ბათუმელებთან” თქვა, რომ 64 პრობლემური ოჯახიდან 18-მა მიიღო გრძელვადიანი და დაბალპროცენტიანი სესხი: “გეუბნებით ორი-სამი დღის ამბავს. მათ მიეცემათ გრძელვადიანი და დაბალპროცენტიანი სესხი, როგორც ითხოვდნენ. ამ დღეებში ამათთან დაიდება ხელშეკრულებები”. კითხვაზე, როგორ შეარჩიეს ეს ოჯახები, რატომ 18 ოჯახი და რა როლი შეასრულა მთავრობამ, კობა ნაკაიძემ გვიპასუხა, რომ აჭარის მთავრობაში სპეციალური კომისია მუშაობს ამ თემაზე და ის მოგვაწვდიდა ინფორმაციას.

“აჭარის მთავრობაში ასეთი კომისია არ მუშაობს,” – გვითხრეს აჭარის მთავრობის აპარატის პრესცენტრში. განგვიმარტეს, რომ ამ ოჯახებზე მუდმივად მუშაობს მთავრობა და 18 ოჯახსაც რეკომენდაცია ბანკთან აჭარის მთავრობამ ახლახანს გაუწია: “ეს ხორციელდება იმ პროგრამის ფარგლებში, რომელიც მცირე ბიზნესის ხელშეწყობას ითვალისწინებს. ეს 18 ოჯახი თავად მოსახლეობამ შეარჩია და სია მოგვაწოდა,” – ამბობს სოფო გუჯაბიძე, აჭარის მთავრობის პრესსამსახურის უფროსი.

დაპირების მიუხედავად, სოფო გუჯაბიძემ დღის ბოლომდე ვერ გამოგვიგზავნა ინფორმაცია ამ 18 ოჯახის შესახებ. ასევე ვერ დაგვალაპარაკა კონკრეტულ პასუხისმგებელ პირს, ვინც გვეტყოდა, რა კრიტერიუმებით შეირჩა 18 ოჯახი, ვინც მთავრობის და კობა ნაკაიძის ინფორმაციით, დაბალპროცენტიან და გრძელვადიან სესხს მიიღებს.

მოქალაქე ნარგიზ დოლიძემ “ბათუმელებს” უთხრა, რომ მან ასეთი ოჯახების შესახებ არაფერი იცის: “ჩვენ ყველა ერთად ვდგავართ, ვინმეს რომ მიეღო, როგორ ვერ გავიგებდით. მუმდივად გვპირდებიან და არაფერი კონკრეტული. ამ ტყუილით არ ვიცი, რის მიღწევა უნდათ”.

“იპოთეკით დაზარალებულებთან” მუშაობს ორგანიზაცია “ჩვენი უფლებებისთვის”. თამაზ ბაკურიძე ამბობს, რომ მთავრობამ რეკომენდაცია მხოლოდ წინა წლებში გაუწია ოცამდე ოჯახს: “მისცეს კრედიტი ისეთ ოჯახებს, ვისაც ისედაც მისცემდა ნებისმიერი ბანკი სესხს, რადგან მათ საბანკო უზრუნველყოფა ჰქონდათ და არ იყო პრობლემური შემთხვევები. მათ მთავრობის დახმარება ისედაც არ სჭირდებოდათ. სხვა ოჯახებს, ვისაც წლების განმავლობაში აქვთ პრობლემა, არაფერი მიუღიათ ჩემი ინფორმაციით”.

მაჟორიტარი კანდიდატი: ხალხთა მეგობრობა არ არსებობს

მაჟორიტარი კანდიდატების უმეტესობა, როგორც საჯარო სივრცეში ამომრჩეველთან საუბრისას, ასევე ჟურნალისტის კითხვებზე პასუხებისას უმეტესწილად ჯერ იმაზე იწყებს საუბარს, რა ვერ გააკეთა „ოცნების“ ხელისუფლებამ. მხოლოდ ამის შემდეგ გადადიან თემაზე – „რას გავაკეთებთ ჩვენ“. ამ კანდიდატებს შორისაა პაატა ცივაძეც, რომელიც დისკრიმინაციულ ლექსიკას და სიძულვილის ენას იყენებს. ის ბათუმის 68-ე ოლქში მაჟორიტარ კანდიდატად „პაატრიოტთა ალიანსმა“ წარადგინა.

თქვენს ოლქში, იმ პრობლემების გადასაჭრელად, რაც ამომრჩეველს აწუხებს, რა ინიციატივებით შეხვალთ პარლამენტში, სად ხედავთ საკანონმდებლო ხარვეზებს?

ყველაფერს შევძლებთ თუ ბევრნი ვიქნებით და სწორად ვიმოქმედებთ. ყბადაღებული თემაა სამუშაო ადგილები და ა.შ. მაგაზე აღარ ვილაპარაკებ, იცით ისედაც. პირველი, რა დაპირებითაც „პარტიოტთა ალიანსი“ შედის პარლამენტში, ეს არის სამართლიანობის აღდგენა.

2012 წლის არჩევნებზე ყველამ ერთად დავამარცხეთ “ნაციონალური მოძრაობა”, მთავარი მესიჯი იყო დანაშაულებრივი რეჟიმის დასჯა. მაგრამ რა მივიღეთ? – „ოცნებამ“ გააფორმა კოჰაბიტაცია. ამ არჩევნების შემდეგ ჩვენ საშიშროება გვიდგას, რომ მივიღოთ კოჰაბიტაციური თანაცხოვრების ნაყოფი. რას ვგულისხმობ? – ეს ნაყოფი არის ის, რომ ანზორ ბოლქვაძე [„ქართული ოცნების“ ქედა, შუახევი, ხულოს ოლქის მაჟორიტარი კანდიდატი] და მისნაირი კანდიდატები, პორტირებული „ნაციონალები“ დღეს “ოცნების” სახით მოგვევლინენ. უნდა დავამარცხოთ მანკიერი პრაქტიკა, როდესაც მაჟორიტარი დეპუტატი ნდობის მანდატის მიღების შემდეგ ფიქრობს და მოღვაწეობს მხოლოდ თავისი ოჯახის ინტერესებით. ისეთი მაჟოროტარები, რომლებიც მთელი ოთხი წლის განმავლობაში მხოლოდ სამჯერ გამოვლენ პარლამენტის სხდომებზე და თავისი ოჯახის წევრის ინტერესებს დაიცავენ და საერთოდ არც ერთი კანონპროექტის ინიცირებით არ დაგვამახსოვრობენ თავს, აღარ გვინდა.

აჭარის მოსახლეობა დაიღალა იმედგაცრუებით და არაფრის მაქნისი მაჟორიტარი დეპუტატებით, რომელებიც წლების მანძილზე იყვნენ აჭარის წარმომადგენლები საკანონმდებლო ორგანოში. ჩვენი გამარჯვების შემდეგ, პირველი, რასაც დავაყენებთ საკანონმდებლო ორგანოში, არის ის, რომ „ნაციონალური მოძრაობა“ აიკრძალოს როგორც პოლიტიკური ძალა. ამის შემდეგ მოხდება სამართლიანობის აღდგენა კი არა, სამართლიანობის დადგენა, რომელიც “ოცნებამ” ვერ მოახერხა. დადგინდება სამართალი და მერე აღდგება ეს სამართალი. შემდგომ, ყველა კანონპროექტი, რომელიც აწუხებს ჩვენს მოსახლეობას, პირველი და უმთავრესი იქნება მიწის კანონი, რომ აჭარელ გლეხს ჰქონდეს საკუთრების უფლება, ჰქონდეს თავისი მიწა და ამ მიწის ბატონ-პატრონი იყოს თვითონ … ართმევს კაცურ კაცს მის მიწას მთავრობა და თითო-თითო ლარად ურიგებს სხვა ქვეყნის გადამთიელებს. ეს არის კონკრეტული კანონპროექტის ინიცირება, რომ მიწის კანონი იქნება მიღებული და ინიცირებული.

ჩვენ აქცენტს ვაკეთებთ პროფესიონალიზმზე და საქმის ცოდნაზე. ჩვენ შორს ვართ პოპულისტური განცხადებებიდან და ჩვენი დეპუტატობის კანდიდატები არიან კონკრეტული საქმის სპეციალისტიტები.

ასევე აუცილებლად იქნება გადახედილი კანონის დონეზე ხელფასებისა და დანამატების, შავი ჯიპების ყიდვის პოლიტიკა… მინისტრს აკრძალული უნდა ქონდეს 30 ათას ლარზე ძვირიანი მანქანის ყიდვა, რიგით ჩინოვნიკს კი აკრძალული უნდა ჰქონდეს სამსახურეობრივი მანქანის უფლება. ნეპოტიზმი აი აქედან მოდის. ადამიანი მიაღწევს რაღაც თანამდებობას, მერე ის პრივილეგიები, რაც შეუძლია მას თავის ნათესავებს გადაუნაწილოს და დაასაქმოს, ეს უნდა იყოს კანონის დონეზე აკრძალული. იმიტომ რომ, ჩვენს ქართველ ჩინოვნიკებს იმდენი ნამუსი არ აქვთ, რომ ეს ღირსებიდან გამომდინარე არ გააკეთონ.

კონკრეტულად, 68-ე ოლქის ამომრჩეველს სოციალური კუთხით რომ წაადგეს, ამ მიმართულებით რა ინიციატივები გექნებათ?

68-ე ოლქი მოიცავს დიდ ტერიტორიას. მანკიერი კანონი, რომლითაც შემოუერთეს ბათუმის მიმდებარე სოფლები და დაბები, რომ მიწის გაყიდვის დროს ფასი უფრო აეწიათ და მყიდველისთვის ეთქვათ აი, ბათუმის მიწებს ვყიდითო. ამ ოლქში „ბერეგზე“, ბარცხანაში, „გარადოკში“ მოსახლეობას დიამეტრიულად განსხვავებული პრობლემები აქვს, ვიდრე მაგალითად ჩაქვში, ციხისძირში, მახინჯაურში, აჭყვაში… ბათუმში მცხოვრებ ადამიანებს აქვთ დაუსაქმებლობის პრობლემა. ბათუმის პრობლემებია ასევე გზები, წყალი, კანალიზაცია, საცხოვრებელი პირობები, სოციალური დახმარებები. დღევანდელი მთავრობა ეუბნება ამომრჩეველს, ჩვენ თუ არ მოგვცემთ ხმას შეგიწყვეტთ სოციალურ დახმარებასო. ამის არაერთი მაგალითია როცა დაზარალებულები მიდიან ჩვენს აქტივისტებთან და უყვებიან ამის შესახებ. ჩვენ არ ვართ იმაზე ორიენტირებული, როგორც ბურჭულაძემ თქვა ,რომ 500 ათასი კაცის მაგივრად მილიონს გავხდითო. პირიქით, მაქსიმალურად უნდა ვეცადოთ ჩვენი მოსახლეობა სოცილაურ დახმარებაზე კი არ ცხოვრობდეს, არამედ თავისი სამუშაო ადგილები ჰქონდეს. შორს ვართ იმისგან, როცა იძახიან – მილიონი სამუშაო ადგილი, 100 სამრეწველო ქარხანა – ეს არის ტყუილი, პოპულიზმი, არჩევნების წინ მოგონილი.

ჩვენს პროგრამაში გაწერილია, რომ ყველა რაიონულ ცენტრში, დაბაში აშენდება მცირე საწარმოები. მცირე საწარმოები არის ჩვენი ხსნა. შეთანხმებული და შესწავლილია მსოფლიო დონის ეკონომისტების მიერ, რომ ისეთ პატარა ქვეყანაში, როგორიც ვართ ჩვენ, დიდი, ინდუსტრიული ობიექტების მშენებლობა არის ტყუილი, არის პოპულიზმი. წარმოიდგინეთ, მთელი საქართველოს მასშტაბით, რომ 2–3 ათასი მცირე ზომის საწარმო გავაკეთოთ: გადამამუშავებელი, დასაფასოებელი … ჩვენი სოფლის მეურნეობის პროდუქცია არის ხილი, მწვანილები … პრობლემა გვაქვს ამის გადამუშავების და დაფასოების. ასევე, სამაცივრე მეურნეობები, სადაც 5, 10, 15 კაცი იქნება დასაქმებული. საქართველოში მცირე და საშუალო ბიზნესი მცირეა. ჩვენთან არიან მდიდრები და ღარიბები. არ აწყობს ჩვენს მთავრობას, რომ საშუალო ფენა შეიქმნას, ვინაიდან საშუალო ფენის კონტროლი, დამოუკიდებელი ადამიანის კონტროლი არის რთული. ამიტომ, ყველა მთავრობას აწყობს ჰყავდეს გაჭირვებულები, სოცილურად დამოკიდებული მოსახლეობა. ამას ჩვენ დავამთავრებთ. ჩვენი პარტიის მოღვაწეობის პერიოდში მთავარი ამომავალი წერტილი არის ადამიანი, ადამიანის კეთილდღეობა და თითოეული ჩვენი პარტიის წევრი თავისი საქმიანობით, დაუნდობელი საქმიანობით ისეთი წყობილებების წინაშე როგორიც იყო “ნაციონალური მოძრაობა” და თუნდაც, დღეს, “ქართული ოცნება”. ყოველთვის ვიბრძით ადამიანის უფლებების დაცვაზე, ჩვენ ვიბრძვით ღირსების და პატივის აღდგენაზე, რომელიც ფეხქვეშ არის გათელილი. ეს არის ჩვენი უმთავრესი მესიჯი ჩვენი ამომრჩევლის მიმართ.

ქალაქისთვის მნიშვნელოვან საკითხებზე მინდა გკითხოთ…

მე, როგორც ამ საარჩევნო ოლქის მაჟორიტარობის კანდიდატი, გამოვალ ინიციატივით, რომ ყველა ასაშენებელი სახლის პროექტი, რომელსაც ქალაქის მერია გასცემს, იყოს აუცილებად ფართო ფენების განხილვის საკითხი. ჩამოვართვათ მიკერძოებულ ჩინოვნიკებს უფლება, რომლებმაც არ იციან არც ქალაქის ურბანული განვითარება, არც სტრატეგია არ გააჩნიათ და მხოლოდ ნაცნობ–ახლობლობით გასცემენ მშენებლობის ნებართვებს. დღეს, ქუდი რომ გადააგდო, შეიძლება მშენებელს დაეცეს, მაგრამ ისინი მშენებლები არ არიან. როდესაც ქალაქში არ არსებობს ურბანული განვითარების და სტრატეგიული დაგეგმარების არანაირი საბუთი, როდესაც სიფრიფანა ქაღალდებს აფრიალებენ, მაღალსართულიანი სახლის მშენებლობის ნებართვას გასცემენ და არ არის გათვალისწინებული რეკრეაციული ზონის მოწყობა, ავტომანქანების პარკინგის მოწყობა სარდაფებში, არ შეიძლება ამ ნებართვების გაცემა. გარდა ამისა. საერთოდ რაზე უნდა ვილაპარაკოთ, როცა ქალაქის ცენტრალურ ნაწილში, სადაც უამრავი ტურისტი დადის, სურათს იღებს და საათი არ მუშაობს. ქალაქს მერი ჰყვს? ქალაქს პატრონი ჰყვავს?

თვითმმართველი ქალაქის აღმასრულებელი ორგანოების მუშაობის კონტროლის საჭიროებას ხედავთ?

მუშაობით არავინ მუშაობს. ისინი მხოლოდ იღებენ ხელფასს, რომელიც ჩვენს მიერ გადახდილი გადასახადებით არის გაცემული. ნებისმიერ საკითხზე რომ მიმართო თვითმმართველობებს, გამგეობებს, რაიონულ ორგანიზაციებს, ვერავინ გცემს პასუხს ან გპასუხობენ ერთი და იგივეს – მე არავინ არაფერს არ მეკითხება, მე ვერ გადავწყვეტ ამ საკითხსო. თუ ვერ წყვეტენ, რად გვინდა მერია? რად გვინდა აჭარის მინისტრთა საბჭო. უნდა იყვნენ მცოდნეები. უნდა იცოდნენ კანონით რა ევალებათ, რა არ ევალებათ. იციან მარტო თვის ბოლოს ხელფასის აღება, დანამატების დამატება და პრემიების გამოწერა, მაგრამ არანაირი კვალიფიცერებული პასუხი მაგათ არ ხელეწიფებათ.

როგორი იქნება თქვენი გეგმა „ოცნების ქალქში“ მცხოვრები ადამიანების მიმართ და, ზოგადად, როგორი უნდა იყოს „ოცნების“ პოლიტიკა ამ მხვრივ?

ჩვენს პროგრამაში გაწერილია, რომ ქვეყნის ბიუჯეტის ორი პროცენტი იყოს მცირე და საშუალო ბიზნესის განვითარებისთვის, ასევე ოთხი პროცენტი არის გამოყოფილი საყოფაცხოვრებო პროლემების მოსაგვარებლად. ეს ოთხი პროცენტი საკმარისია იმისთვის, რომ ყველა ადამიანს ,ვისაც გააჩნია მინიმალური ანაზაღურების მქონე სამსახური, ასევე ახალგაზრდა წყვილები, რომლებიც დაოჯახდებიან, მთელ მსოფლიოშია ამის პრაქტიკა… ყველა ადამიანს აქვს საშუალება გამოიტანოს გრძელვადიანი სესხები, შეიძინონ უძრავი ქონება და ნელ-ნელა გადაიხადონ – ეს ნიშნავს იმას, რომ ყველა ადამიანს ექნება თავისი კერა. გარდა ამისა, საჭიროა მუნიციპალური მშენებლობების აღდგენა, ყველა ნებართვაში, რომელიც გაცემული იქნება, აუცილებლად ჩადებული იქნება პირობა, რომ საყოფაცხოვრებო ფართი უნდა გადეცეს მუნიციპალიტეტს.

უმცირესობების უფლებებზეც მინდა გკითხოთ.

თვითონ სიტყვა უმცირესობა დამამცირებელია. უმცირესობა ნიშნავს რაღაცა მცირე ოდენობას. ჩვენთან აჭარაში ტრადიციული რელიგიები, ისეთი როგორიც არის მართლმადიდებლობა, როგორიც არის მაჰმადიანობა, კათოლიციზმი და გრიგორიანელობა შეიძლება რაოდენობა მათი იყოს ზოგის მეტი, ზოგის ნაკლები, მაგრამ რელიგიური აღმსარებლობა არ უნდა იყოს დიფერენცირებული უმცირესობებზე და უმრავლესობაზე. ჩვენ კატეგორიული წინააღმდეგები ვართ რამენაირი დისკრიმინაციის, სექტებზე არა მაქვს საუბარი. ტრადიციული რელიგიის მიხედვით ღმერთის გზა ერთია, მასთან მისასვლელი გზები არის სხვადასხვა. დიახ ჩვენ კატეგორიული წინააღმდეგი ვიყავით თურქეთის და მის უკან კიდევ არაბული და არავინ რომ არ იცის და ჩვენი სამართალდამცავი ორგანიები საერთოდ რომ არ მუშაოებენ რა ფულის ექსპანსია უნდა შემოდინებულიყო აჭარაში და აშენებულიყო აზიზიეს და სულთანის სახელობის მეჩეთი. ჩვენ ამის წინააღმდეგ გამოვედით. ჩვენი პარტიის მთელი აქტივი ამის წინააღმდეგი იყო და ჩვენ ვიყავით ერთადერთი პარტია, რომელიც ამას წინ აღუდგა, მაგრამ ეს იმას არ ნიშნავს, რომ აჭარელ მაჰმადიანს თავისი შემოსავლების ნაწილით თუ უნდა რომ ააშენოს მეჩეთი, საქართველოში ჩვენ ამის წინააღმდეგ ნამდვილად არ წავალთ.

ცოტა ხნის წინ „რუსთავი 2“- ს ეთერში თქვა თქვენმა ლიდერმა, რომ თურქეთი არის მტერი…

პოლიტიკაში მეგობრობა და ძმაკაცობა არ არსებობს, იქ იყო საუბარი მოყვრობაზე და მტრობაზე. ლევან ვარშალომიძე გამოვიდა და თქვა თურქები და ჩვენ ერთნი ვართო . გეოპოლიტიკაში არის პარტნიორობა, რომელიც შეიძლება იმ სახელმწიფოს აწყობდეს. ძმაკაცობა არის სახლში, ოჯახში. კომუნისტების პერიოდში იყო ხალხთა მეგობრობა, ხალხთა მეგობრობა არ არსებობს. რაც შეეხება იმას, რომ თურქეთი არის ჩვენ მტერი – ყველა ჩვენი მტერია, მაგრამ ჩვენ ეს უნდა გამოვიყენოთ სწორი თანმიმდევრული პოლიტიკით. საქართველოს ინტერესების პოლიტიკით, თურქეთთანაც, ირანთანაც, სასომხეთთანაც, აზერბაიჯანთანაც და ასე შემდეგ. ყველა ქვეყნის მიმართ საქართველოს პოლიტიკოსები, რომლებსაც მართვა აბარიათ აგრესიული რიტორიკით კი არ უნდა გამოდიოდნენ. გახსოვთ ალბათ 2008 წელს სადამდე მიგვიყვანა აგრესიულმა რიტორიკამ. რაც შეეხება თურქეთს, დღევანდელი ჩვენი დამოკიდებულება თურქეთის მიმართ არ არის ნამდვილად თანაბარი. ჩვენ თურქეთი გვიყურებს, როგორც პატარა ქვეყანას, მათი საგარეო საქმეთა მინისტრის გამოსვლებით არაერთხელ უთქვამთ, რომ ეს არის ჩვენი სამშობლოო. ჩვენ თურქეთი გვიყურებს, როგროც თავისი ქვეყნის ერთ-ერთ ვილაიეთს.

რუსეთი როგორ გვიყურებს?

როგორც თავისი ქვეყნის გუბერნიას. ამიტომ ჩვენი მესიჯი არის ის, რომ თურქეთში, რუსეთში, ვაშინგტონში თუ ტოკიოში, ყველგან საქართველოს ინტერესები უნდა გავატაროთ.

მაჟორიტარი კანდიდატი: ქობულეთს უნდა ჰყავდეს თავისი არჩეული მერი

გიორგი რომანაძე ქობულეთის 71-ე სარჩევნო ოლქში მაჟორიტარი კანდიდატია აჭარის უმაღლეს საბჭოში, პარტიიდან „ქართული ოცნება – დემოკრატიული საქართველო“. საბანკო სფეროში მრავალწლიანი გამოცდილების შემდეგ ის პირდაპირ ქობულეთის გამგებლად დაინიშნა. ამბობს, რომ ეს თანამდებობა მისმა მეგობარმა, არჩილ ხაბაძემ შესთავაზა. 2014 წლიდან გიორგი რომანაძე აჭარის გზების დეპარტამენტს ხელმძღვანელობდა. „გზა ისევ მთავარი პრობლემაა ქობულეთში,“ – ამბობს მმართველი პარტიის კანდიდატი.

პოლიტიკური გამოცდილება არ მაქვს ნამდვილად. ვერ ვიტყვი, რომ ეს პლიუსია. ვერც იმას ვიტყვი, რომ ძალიან დიდი მინუსია. მხოლოდ პოლიტიკა არ არის რეალურად მთავარი. რისი გამკეთებელი ხარ, ეს აინტერესებს ხალხს. მოსახლეობის დიდი ნაწილისთვის ის უფროა მნიშვნელოვანი, როცა პოლიტიკით მოწამლული არ ხარ. ვთვლი, რომ პოლიტიკასაც აქვს თავისი წესები, რომლებსაც თანდათან ვეცნობი და ვსწავლობ.

2013 წელს პარტია „ქართული ოცნების“ წევრიც გახდით და გამგებელიც. აქედან ჩანს, რომ თქვენ პარტიამ მიგიზიდათ თავისი იდეოლოგიით, თუ ასე მოხდა იმიტომ, რომ არჩილ ხაბაძის მეგობარი იყავით?

არჩილ ხაბაძე ახლაც ჩემი მეგობარია… არჩილი მიცნობდა ბანკიდან. იცოდა რეალურად, რის გამკეთებელიც ვიყავი. იმ პერიოდში იყო ვაკანსია ქობულეთში გამგებლის პოზიციაზე და გამიშვა. იმ გუნდის წევრი ვიყავი, წარმადგინეს გამგებლად და სავალდებულოდ ჩავთვალე, რომ გავმხდარიყავი პარტიის წევრიც. არავის დაუვალებია, შემოდი პარტიაშიო. თითქმის ნახევარ წელიწადზე მეტი ხანი ვიყავი გამგებლად, როცა პარტიაში შევედი. ამით დავადასტურე, რომ ვიყავი ამ გუნდის წევრი. ეს რომ არ გამეზიარებია, ვინ მამუშავებდა გამგებლად? გამგებელი როცა ხარ, გამოდის, რომ იზიარებ კიდეც მმართველი პარტიის შეხედულებებს.

ფიქრობთ, რომ გამგბელი აუცილებლად პარტიული უნდა იყოს?

როდესაც გუნდის წევრი ხარ, რაღაც ეტაპზე იზიარებ კიდეც მათ შეხედულებებს, მაქსიმალურად უნდა ეცადო, რომ გაიზიარო…

კონკრეტულად რა პრობლემის გააქტიურებას აპირებთ, თუკი მოხვდებით უმაღლეს საბჭოში?

მაქსიმალური ჩართულობაა საჭირო, მაგალითად, ნაპირსამაგრ სამუშაოებზე, რომელიც ძირითადად აწუხებს ფიჭვნარის დასახლებას… სოფლებში ყველაზე დიდი პრობლემაა გაზი, წყალი და გზა. საუბედუროდ, 21-ე საუკუნეში ეს პრობლემებია ისევ 80 პროცენტი. მხოლოდ რამდენიმე სოფელი იყო ისეთი, სადაც პრობლემად ინტერნეტის არქონა დამისახელეს. საბავშვო ბაღებიც პრობლემაა. ბაღები რომ უფასო გახდა, მოთხოვნა გაიზარდა გეომეტრიული პროგრესიით. მინიმალური იყო გადასახადი – 25 ლარი, მაგრამ, როგორც ჩანს, ესეც პრობლემა ყოფილა.

კონკრეტული ფინანსური გათვლები თუ გაქვთ, რა რესურსით შეიძლება მოგვარდეს ესა თუ ის პრობლემა?

მე ვეუბნები ხალხს, რომ მაქსიმალურად ჩავერთვები ბიუჯეტის შედგენის დროს. ვიცი, როგორ ხდება პრიორიტეტების განსაზღვრა, მედიატორობას ვთავაზობ ხალხს. როცა ადამიანი მეუბნება, რომ არ მაქვს გზა, ვპირდები, რომ მაქსიმალურად ვეცდები პრობლემა უახლოეს პერიოდში მოვუგვარო.

რატომ უნდა დაიჯეროს ამ სახის დაპირება ამომრჩეველმა?

ვეუბნები, რომ არჩევენებამდე საკმაოდ ბევრი დრო არის და მოიკითხე, ვარ თუ არა გამკეთებელი-მეთქი… ამომრჩეველს ვეუბნები იმასაც, რომ 100 პროცენტით ჩემზე არაა დამოკიდებული დაფინანსდება თუ არა, მაგალითად, გზის დაგება. მე უნდა დავარწმუნო საბჭოს სხვა წევრებიც, რომ, მაგალითად, სოფელ ჯიხანჯურში გზის გაკეთება აუცილებელია…

საკანონმდებლო დონეზე რა შეიძლება შეცვალოთ, რაც პოზიტიურად აისახება ქობულეთზე?

ქობულეთს უნდა ჰქონდეს თვითმმართველი ქალაქის სტატუსი. მნიშვნელოვანია ეგ, რომ ქალაქის და სოფლების ბიუჯეტები იყო გამიჯნული. თვითმმართველი ქალაქის სტატუსი აძლევს მუნიციპალიტეტს რეგულაციებს, რაც განავითარებს ქალაქს… ქობულეთს უნდა ჰყავდეს თავისი არჩეული მერი, რომელიც უშუალოდ მიხედავს ქალაქს.

კონკრეტულად საკანონმდებლო სივრცეში რა შეიძლება შეცვალოთ, როგორც კანონმდებელმა?

სიმართლე გითხრა, ამ ეტაპზე მაგაზე არ მიფიქრია. სხვა მიმართულებით ვმუშაობთ. იქნება დრო, რომ მაგაზეც ვიფიქრებთ.

P.S. გიორგი რომანაძეს დამთავრებული აქვს ბათუმის რუსთაველის სახელმწიფო უნივერსიტეტის ფინანსები და ბანკების სპეციალობა. 1997 წლიდან ის საბანკო სექტორში მუშაობდა, იყო რამდენიმე ბანკის მმართველი. 2013 წლის 24 აგვისტოს გიორგი რომანაძე ქობულეთის გამგებლად დაინიშნა. 2014 წლიდან იგი აჭარის გზების სახელმწიფო დეპარტამენტს ხელმძღვანელობდა.

სიმონ ჯანაშია: თურქეთის საელჩოს მიერ სკოლის გახსნა კანონს არ ეწინააღმდეგება

დღეს მედიით გავრცელდა ინფორმაცია იმის შესახებ, რომ თურქეთის საელჩომ ბათუმში გახსნა თურქული სკოლა. ამ ფაქტს, როგორც აჭარის განათლების, ისე საქართველოს განათლების მინისტრისგან მოჰყვა ერთგვარი კრიტიკა. ორივე მინისტრი აქცენტს აკეთებდა იმაზე, რომ სკოლას არ აქვს ავტორიზაცია და სკოლის გახსნა მათთან არ არის შეთანხმებული. ფაქტს ბრიფინგით გამოეხმაურა „რესპუბლიკელი“ ხათუნა სამნიძე და სკოლის დროებით შეჩერება მოითხოვა. დაარღვია თუ არა თურქეთის საელჩომ კანონი განათლების შესახებ? – საკითხზე კომენტარისთვის „ბათუმელებმა“ განათლების ექსპერტს სიმონ ჯანაშიას მიმართა.

ბატონო სიმონ, თურქეთის საელჩომ საქართველოს განათლების სამინისტროს გვერდის ავლით, ანუ აკრედიტაციის გარეშე გახსნა სკოლა. არის თუ არა ეს საქართველოს განათლების შესახებ კანონის დარღვევა?

სახელმწიფოსგან ლიცენზიის მისაღებად ავტორიზაცია არის მინიმალური, ანუ საგანმანათლებლო საქმიანობისთვის არ არის აუცილებელი დაწესებულება იყოს ავტორიზებული. ავტორიზაცია საჭიროა იმისთვის, რომ სახელმწიფომ აღიაროს ამ სკოლის ატესტატი. თბილისში არსებობს ამერიკელების გაკეთებული სკოლა, რომელიც არ არის ავტორიზებული და ჩვენი სახელმწიფო არ აღიარებს ამ სკოლის დიპლომს.

ცხადია, ეს სხვა პრობლემაა, მაგრამ ფაქტია, რომ ეს პრაქტიკა არსებობს საქართველოში. ეს იმას აჩვენებს, რომ სახელმწიფოს არ უნდა და არ შეუძლია, ეს ბავშვები მოახვედროს საკუთარ საგანმანათლებლო სივრცეში. ეს, ცხადია, ცუდია. ასეთ სკოლებში სწავლობენ საქართველოს მოქალაქეებიც. მაგალითად, თბილისის საერთაშორისო სკოლაში შეიძლება ქართველი ბავში ხარისხიან განათლებას იღებდეს, მაგრამ სახელმწიფო არ აღიარებს ამ ხარისხს. სხვა საკითხია, როგორ უნდა გაიხსნას ასეთი სკოლები, ვთქვათ, რაღაცა შეთანხმების საფუძვეზე…

ანუ ის, რომ თურქეთის საელჩომ გახსნა დაწესებულება ბათუმში, რომელსაც თვითონ უწოდებს თურქულ სკოლას, წინააღმდეგობაში მოდის განათლების შესახებ საქართველოს კანონთან თუ არა?

არა. ნებისმიერ ადამიანის შეუძლია გახსნას რაღაც და დაარქვას სკოლა, მაგალითად, ვთქვათ, ჩემი მეზობლის შვილებს საღამოს ხუთი საათიდან ვასწავლი რაღაცას და ამას ვუწოდებ სკოლას… როგორ შეიძლება ამაში სახელმწიფო ჩაერიოს, ვერაფერს ვერ გააკეთებს სახელმწიფო.

საქართველოს საელჩოებს თუ აქვთ ქართული სკოლები უცხოეთში, ქართველი ბავშვებისთვის?

თავის დროზე იყო მოსკოვში, ვითომ საქართველოს სახელმწიფოს დაფინანსებით და აქაურ ატესტატს გასცემდა. ამ წუთას მგონი არსად არ არის. ძირითადად არის საკვირაო სკოლები, რომლებსაც ნაწილობრივ საქართველოს საკონსულოები ეხმარებიან, მაგრამ, ძირითადად, არის კერძო ინიციატივები.

საქართველოში გარდა ამერიკული სკოლისა, სხვა ქვეყნების საელჩოებს თუ აქვთ თავიანთი სკოლები?

ეს სკოლა არ არის ამერიკის სახელმწიფოს მიერ გახსნილი, ეს საერთაშორისო სკოლაა… ადრე სკოლა არსებობდა რუსეთის საელჩოს დაქვემდებარებაში, მაგრამ ეგ აღარ არსებობს. თუ არ ვცდები უნდა იყოს საფრაგეთის საელჩოს მიერ გახსნილი სკოლა თბილისის ცენტრში, მაგრამ მგონი იმათ აქვთ ავტორიზაცია გავლილი, ანუ ფრანგულ ატესტატსაც გასცემენ და ქართულსაც. ასევე უნდა ჰქონდეს გერმანიის საელჩოს სკოლა, მაგრამ ზუსტად არ ვიცი არის თუ არა ეს საელჩოს სკოლა. შეიძლება ეს იყოს გერმანიის სახელმწიფოსთან ერთად კერძო ინიციატივა. მასაც აქვს ავტორიზაცია. ეს სკოლები ატესტატებსაც იქაურს გასცემენ და პროგრამებიც იქაური აქვთ. გერმანულსა და ფრანგულში, თუ ზუსტად მახსოვს, ქართულის და საქართველოს ისტორიის პროგრამებიც უნდა იყოს.

საპროტესტო აქცია ყოფილი 25-ე ბატალიონის ტეროტორიაზე

საპროტესტო აქცია გამართეს დღეს ყოფილი 25-ე ბატალიონის ტერიტორიაზე მცხოვრებლებმა. ეს ტერიტორია ათეულობით ოჯახს თვითნებურად აქვთ დაკავებული. აქციის მონაწილეების თქმით, ორი დღის წინ შევიდა ტერიტორიაზე მძიმე ტექნიკა და დაიწყო არსებული ელექტროგადამცემი ხაზებისა და ანძების დემონტაჟი. „აღნიშნულმა ფაქტმა ჩვენ ეჭვი გაგვიჩინა, რომ ქოხებსაც დაგვინგრევდნენ,” – გვითხრა აქციის მონაწილე მარინა ბერიძემ.

კომპანია “საქრუსენერგოს” დასავლეთ საქართველოს მენეჯერის, ანდრო ცხადაძის განმარტებით, აღნიშნულ ტერიტორიაზე არსებული ქოხების დემონტაჟს არ აპირებენ: “ჩვენ მხოლოდ ვაწარმოებთ აღნიშნულ ტერიტორიაზე არსებული ანძების დემონტაჟს და არანაირი კავშირი არ გვაქვს ქოხების დემონტაჟთან. არც ვგეგმავთ დემონტაჟს, ჩვენი საქმე არის ანძის გატანა, მოვრჩებით და წავალთ.“

აუზში ბავშვისა და მამაკაცის დაშავების ფაქტზე გამოძიება დაიწყო

დღეს, 21 სექტემბერს, საცურაო აუზში დაშავებულების საქმეზე გამოძიება დაიწყო. შემთხვევა თამარის დასახლებაში დღეს დილით მოხდა – საცხოვრებელი კორპუსების ეზოში მდებარე საცურაო აუზში 3 წლის ბავშვსა და 35 წლის მამაკაცს დენმა დაარტყა.

სასწრაფო დახმარების სამსახურში “ბათუმელებს” უთხრეს, რომ მამაკაცი უგონო მდგომარეობაში გადაიყვანეს რეფერალურ საავადმყოფოში, ხოლო ბავშვი, რომელიც ბათუმში სტუმრად იმყოფებოდა, კონტაქტური იყო და ის ბავშვთა საავადმყოფოშია. “ბათუმელების” ინფორმაციით, ბავშვი უცხოეთის მოქალაქეა, ხოლო მამაკაცი მახინჯაურში ცხოვრობს.

შინაგან საქმეთა სამინისტროს პრესსამსახურის ცნობით, გამოძიება დაწყებულია სისხლის სამართლის კოდექსის 229 პრიმა მუხლის მიხედვით, რაც ელექტრორესურსებით სარგებლობის წესის დარღვევას გულისხმობს.

ქონების ჩამორთმევა ელექტროგადამცემი ხაზის მშენებლობის გამო აჭარაში

„საქართველოს სახელმწიფო ელექტროსისტემას“ აუცილებელი საზოგადოებრივი საჭიროებისათვის ექსპროპრიაციის უფლება მიენიჭა. „ახალციხე-ბათუმის” ელექტროგადამცემი ხაზის მშენებლობის პროექტის ფარგლებში, ამჯერად ექსპროპრიაციას დაექვემდებარა შემდეგ მოქალაქეთა კერძო საკუთრება:

სულიკო გვიანიძის უძრავი ქონება, მისამართი: ქ. ბათუმი, ხიხანის №1ა [ყოფილი ქ. ბათუმი, ერგე-კაპანდიბი] [მთლიანი ფართობი 3089 კვ.მ, პროექტისათვის საჭირო საექსპროპრიაციო ფართობი 313 კვ.მ.];

ნაილე კახაბერიძის უძრავი ქონება, მისამართი: ხელვაჩაურის რაიონი, სოფ. ხერთვისი, [მთლიანი ფართობი 3903 კვ.მ, პროექტისათვის საჭირო საექსპროპრიაციო ფართობი 387 კვ.მ];

გელა შველიძისა და თამარ შველიძის უძრავი ქონება, მისამართი: ხელვაჩაურის რაიონი, სოფელი აჭარისწყალი, [მთლიანი ფართობი 2502. კვ.მ პროექტისათვის საჭირო საექსპროპრიაციო ფართობი 7 კვ.მ].

როსტომ, ანნა, ზვიად თავდგირიძეებისა და მაია ქავთარაძის უძრავი ქონება, მისამართი: ქ. ბათუმი, ხელვაჩაურის დასახლება, [მთლიანი ფართობი 2502 კვ.მ პროექტისათვის საჭირო საექსპროპრიაციო ფართობი 38 კვ.მ].

საქართველოს ეკონომიკისა და მდგრადი განვითარების მინისტრის შესაბამის ბრძანებაში აღნიშნულია, რომ „სს „საქართველოს სახელმწიფო ელექტროსისტემა“ და შპს ,,აჭარისწყალი ჯორჯია” აჭარასა და სამცხე-ჯავახეთში, ერთობლივად ახორციელებენ ელექტროენერგეტიკული სისტემის განვითარების პროექტებს, რომლებიც წარმოადგენენ ,,საქართველოს გადამცემი ქსელის განვითარების ათწლიანი გეგმის“ შემადგენელ ნაწილს.

ზემოაღნიშნული პროექტის ფარგლებში, რეკონსტრუქციისა და განვითარების საერთაშორისო ბანკთან (IBRD) 2014 წლის 3 სექტემბერს გაფორმებული ხელშეკრულებით გათვალისწინებული დაფინანსებით ხორციელდება ახალციხე – ბათუმის 220 კვ ელექტროგადამცემი ხაზის მშენებლობა, რათა მოხდეს სამხრეთ-დასავლეთ საქართველოში ახალი ჰესების [„შუახევის“ და „კორომხეთის“ ჰესები] მშენებლობის შედეგად გამომუშავებული ელექტროენერგიის გადაცემა, განაწილება ან/და ექსპორტი“.

ბრძანებაში აღნიშნულია, რომ დასახელებულ პირებს „საქართველოს სახელმწიფო ელექტროსისტემის“ მიერ წერილობით ეცნობათ განსახორციელებელი პროექტის მნიშვნელობის თაობაზე და მიეცათ პროექტისათვის საჭირო მიწის ნაკვეთების ნებაყოფლობით გასხვისების წინადადება, განსახლების გეგმით განსაზღვრული საკომპენსაციო თანხის სანაცვლოდ, რაზედაც მათ უარი განაცხადეს“.

„საკუთრების უფლება არ არის აბსოლუტური უფლება… საქართველოს კონსტიტუციის 21-ე მუხლი ითვალისწინებს საჯარო მიზნებისთვის საკუთრების ჩამორთმევას. კერძოდ, ,,აუცილებელი საზოგადოებრივი საჭიროებისათვის საკუთრების ჩამორთმევა დასაშვებია კანონით პირდაპირ გათვალისწინებულ შემთხვევებში, სასამართლოს გადაწყვეტილების ან ორგანული კანონით დადგენილი გადაუდებელი აუცილებლობისას, წინასწარი, სრული და სამართლიანი ანაზღაურების პირობით. ანაზღაურება თავისუფლდება ყოველგავარი გადასახადისა და მოსაკრებლისგან. აღნიშნული ნორმით გათვალისწინებულ საკუთრების ჩამორთმევაში იგულისხმება ექსპროპრიაცია, რომლის პირობები და წესი დადგენილია საქართველოს კანონით „აუცილებელი საზოგადოებრივი საჭიროებისათვის საკუთრების ჩამორთმევის წესის შესახებ“ – აღნიშნულია ბრძანებაში, რომელსაც ხელს საქართველოს ეკონომიკისა და მდგრადი განვითარების მინისტრი დიმიტრი ქუმსიშვილი აწერს.

“რესპუბლიკელები” ბათუმში თურქული სკოლის გახსნაზე

“მოვითხოვთ, დროებით შეჩერდეს სკოლის ფუნქცინირება, ვიდრე კითხვებს არ გაეცემა პასუხი და საქართველოს კანონმდებლობა არ გავრცელდება ამ სკოლაზე,” – აცხადებს ხათუნა სამნიძე, “რესპუბლიკური პარტიის” თავმჯდომარე და ბათუმის 69-ე საარჩევნო ოლქის მაჟორიტარი კანდიდატი. დღეს, 21 სექტემბერს გამართულ ბრიფინგზე ხათუნა სამნიძე ბათუმში ორი დღის წინ თურქული სკოლის გახსნას გამოეხმაურა.

“თურქეთი არის საქართველოს სტრატეგიული პარტნიორი, მასთან გვაკავშირებს თანამშრომლობა ბევრ სფეროში, მათ შორის, განათლების მიმართულებით, მაგრამ ეს კონკრეტული საკითხი საჭიროებს უსწრაფესად რეაგირებას. საქართველოს და თურქეთის მხარეებს შორის საბოლოო შეთანხმების გარეშე, მოულოდნელად გაიხსნა თურქული სკოლა. საქართველოს კანონმდებლობის იგნორირებით გაიხსნა სკოლა, რაც გამოიხატება იმაში, რომ სკოლას არ გაუვლია აკრედიტაცია, ავტორიზაცია. ამ სკოლის შესახებ სათანადო ინფორმაცია არ ჰქონდათ აჭარის განათლების სამინისტროში. ასევე საქართველოს განათლების მინისტრის განცხადებით გამოჩნდა, რომ ის უპასუხისმგებლოდ მოეკიდა ამ საკითხს. სკოლის გახსნას ესწრებოდნენ ოფიციალური პირები თურქეთის მხრიდან, მაგრამ არცერთი წარმომადგნელი შესაბამისი სამინისტროდან არ ესწრებოდა საქართველოს მხრიდან. ჩვენ ისიც არ ვიცით, რა პროგრამით ასწავლიან იქ ბავშვებს, როგორია სასწავლო გეგმა,” – უთხრა ხათუნა სამნიძემ “ბათუმელებს”.

საქართველოს განათლების სამინისტროს, ხარისხის განვითარების ეროვნული ცენტრის ხელმძღვანელის დათო კერესელიძის განცხადებით, ბათუმში გახსნილ თურქულ სკოლას ავტორიზაცია არ აქვს გავლილი, თუმცა კანონმდებლობით ავტორიზაციის გავლა მაშინაა სავალდებულო, თუკი სკოლის ატესტატი საქართველომ უნდა აღიაროს.

თავის მხრივ, განათლების ექპსერტი, სიმონ ჯანაშია ამბობს, რომ თურქეთის საელჩოს მიერ სკოლის გახსნა საქართველოში კანონს არ ეწინააღმდეგება.

ხათუნა სამნიძე კიდევ ერთ საკითხზე ამახვილებს ყურადღებას: “ბათუმის მერიას არ გაუცია მშენებლობის ნებართვა და არაერთხელ დაჯარიმდა ეს სკოლა. არაა ამ სკოლის შენობა ჩაბარებული საბოლოოდ.”

მედიაში გავრცელებული ინფორმაციის მიხედვით, თურქული სკოლა ბათუმში რამდენჯერმე დააჯარიმა მერიის ზედამხედველობის სამსახურმა. “ამ საკითხზე, სამწუხაროდ, ვერაფერს გეტყვით,” – გვითხრა სამუშაო დღის ბოლოს მერიის პრესსამსახურის უფროსმა, თეკლა ჩიჩუამ. დილით ის დაგვპირდა კომენტარს კითხვებზე: არის თუ არა გაცემული მშენებლობის ნებართვა შენობაზე, სადაც თურქული სკოლაა განთავსებული? რომელი კომპანიაა დაჯარიმებული და ასე შემდეგ.

“დაჯარიმების საკითხი არის ტექნიკური საკითხი, რომელზეც ჩვენ კომენტარს ვერ გავაკეთებთ. ჯობია ამ საკითხზე კომენტარისთვის მიმართოთ დამჯარიმებელს, ანუ ბათუმის მერიას,” – უთხრეს “ბათუმელებს” თურქეთის საელჩოში.

კინოფესტივალის აფიშა: „სიყვარულის შეერთებული შტატები“ და კიმ კი-დუკის ახალი ფილმი

დღეს, 21 სექტემბერს, საავტორო კინოს ბათუმის საერთაშორისო ფესტვალზე შემდეგ ფილმებს ნახავთ:

12:00 საათზე: „წელიწადის დროები ქუინსში: ჯონ ბერგერის ოთხი პორტრეტი“. დოკუმენტური ფილმი. რეჟისორები: კოლინ მაკკეიბი, ტილდა სვინტონი, კრისტოფერ როთი, ბარტეკ დზიადოსცი. დიდი ბრიტანეთი.

ბრიტანელი მწერალი და მხატვარი ჯონ ბერგერი უკვე 40 წელია საფრანგეთის ალპებში ცხოვრობს. მას დროდადრო მეგობრები სტუმრობენ. მათი დიალოგები ხან ხან მდორე და მარტივია, ხან კი ფილოსოფიური.

14:00 საათზე: „მაკბეტი“. მხატვრული ფილმი. რეჟისორი რომან პოლანსკი. დიდი ბრიტანეთი/ ამერიკის შეერთებული შტატები.

რომან პოლანსკის მიერ ეკრანიზებული „მაკბეტი” კინოფესტივალზე შექსპირის გარდაცვალებიდან 400 წლისთავთან დაკავშირებით იქნება ნაჩვენები.

17:00 საათზე: „ქალიშვილი“. მხატვრული ფილმი. რეჟისორი რეზა მირკარიმი, ირანი.

მკაცრი და ტრადიციების მიმდევარი აზიზი ირანში ცხოვრობს. მის ერთ-ერთ ქალიშვილს თეორანში უნდა წასვლა მეგობრის გასაცილებლად სწორედ იმ დღეს, როცა მისი დის ნიშნობა უნდა გაიმართოს. მამის წინააღმდეგობის მიუხედავად გოგონა მეგობრის გასაცილებლად მიდის, რაც ოჯახისთვის უამრავ თავსატეხს აჩენს.

19:00 საათზე: „სიყვარულის შეერთებული შტატები“, რეჟისორი ტომას ვასილევსკი, პოლონეთი/შვედეთი

ტომას ვასილევსკის ფილმი გასული საუკუნის 90-იან წლებში ოთხი სხვადასხვა ასაკის ქალის შესახებ მოგვითხრობს, რომლებიც ცდილობენ ახალ ცხოვრებას აუწყონ ფეხი. ფილმის პრემიერა წელს „ბერლინალეზე“ შედგა, სადაც „სიყვარულის შეერთებულმა შტატებმა“ ვერცხლის დათვი მოიპოვა საუკეთესო სცენარისთვის.

21.30 საათზე: „შეჩერდი!“, რეჟისორი კიმ კი-დუკი, სამხრეთ კორეა / იაპონია

ცნობილი რეჟისორის, კიმ კი-დუკის 2016 წელს გადაღებული ფილმი ახალგაზრდა წყვილზე მოგვითხრობს, რომელიც მათ ქალაქში მომხდარი მიწისძვრის შემდეგ ტოკიოში გადაწყვეტს საცხოვრებლად წასვლას.

ფოტოზე: კადრი კიმ კი-დუკის ფილმიდან „შეჩერდი!”

განათლების ხარისხის ეროვნული ცენტრი: კანონდარღვევად იქნება ის, თუ სკოლა მშობელს ეტყვის, რომ მის ატესტატს აღირებს საქართველო

საქართველოს განათლების სამინისტროს, ხარისხის განვითარების ეროვნული ცენტრის პიარსამსახურის ხელმძღვანელის დათო კერესელიძის განცხადებით, ბათუმში გახსნილ თურქულ სკოლას, ავტორიზაცია არ აქვს გავლილი.

„საქართველოს კანონმდებლობით აღიარებული, რომ იყოს ამ სკოლის ატესტატი, ყველა სკოლამ უნდა გაიაროს სპეციალური პროცედურები, მაგრამ ამ ეტაპისთვის განათლების ხარისხის ეროვნული ცენტრისთვის, ამ სკოლის ხელმძღვანელობას არ მოუმართავს“.

დავით კერესელიძის თქმით, იმ პროცედურებს, რომელიც სკოლის ავტორიზაციის პროცესს შეეხება, ცენტრში არანაირი განცხადება არ შესულა. „რის საფუძველზე მოხდა ამ სკოლის დაარსება საქართველოში, ეს ინფორმაცია ჩვენთან არ არის. რაც შეეხება კანონდარღვევას, კანონდარღვევად ჩაითვლება ის, თუ სკოლის დირექცია შეცდომაში შეიყვანს მშობელს, ან მოსწავლეს და ეტყვის, რომ მის მიერ გაცემული ატესტატი იქნება აღირებული ქართული სახელმწიფოს მიერ.

„ბათუმელების“ კითხვაზე, ქართული კანონმდებლობით შეუძლია თუ არა უცხო ქვეყანას დაარსოს სკოლა საქართველოში ისე, რომ არ გაიაროს ავტორიზაცია? დავით კერესელიძე ამბობს, რომ ამის შესახებ ინფორმაციას არ ფლობს. „მე ვერ გაგცემთ ამაზე პასუხს, რადგან ჩვენთან რეესტრში მხოლოდ ავტორიზებული სასწავლებლებია რეგისტრირებული“.

თურქეთის საკონსულოს კომენტარი ბათუმში თურქულ სკოლასთან დაკავშირებით

„ეს სკოლა არის თბილისში თურქეთის საელჩის დაქვემდებარებაში, თბილისში ჩვენი საელჩო მუშაობდა ამ სკოლის გახსნის პროცესზე, საქართველოს განათლების სამინისტროსთან ერთად, ისინი თვალ-ყურს ადევნებდნენ ამ პროცესს. შესაბამისად, 19 სექტემბერს დაიწყო სწავლა ამ სკოლაში. სკოლა მოემსახურება თურქეთის მოქალაქეების ბავშვებს. უამრავ ქვეყანაშია მსგავსი სკოლები და ასეთივე გაიხსნა აქაც, საქართველოში“, – განაცხადეს საკონსულოში.

„ბათუმელების“ კითხვაზე, აქვს თუ არა სკოლას ავტორიზაცია გავლილი, როგორც ამას საქართველოს კანონმდებლობა მოითხოვს, საკონსულოში აცხადებენ, რომ ამ საკითხზე თურქეთის საელჩოს უნდა მივმართოთ.

„ჩვენ არ ვიყავით ამ პროცესში ჩართულები. ოფიციალური გახსნა არ ყოფილა და ეს იგეგმება უახლოეს მომავალში, რომელშიც მიიღებენ მონაწილეობას, როგორც საქართველოს მთავრობის წარმომადგენლები, ასევე თურქეთის. ნებართვის ნაწილში ჩვენ ჩართულები არ ვყოფილვართ, დღეს გავიგეთ ამის შესახებ. ალბათ, ეს საკითხიც გაირკვევა შესაბამის უწყებებთან“, – აცხადებენ ბათუმში თურქეთის საკონსულოში.

ბათუმში თურქული სკოლის გახსნის შესახებ ინფორმაცია, ბათუმში თურქეთის საკონსულოს ფეისბუქგვერდზე გავრცელდა.

ბათუმში თურქული სკოლის გახსნას წინ უძღოდა თურქეთის გენერალური კონსულის იასინ თემიზქანის განცხადება ბათუმში მდებარე სკოლა-ლიცეუმ „მეგობრობის“ შესახებ. კონსულმა მაშინ განაცხადა, რომ სკოლაში მომავალ ტერორისტებს ზრდიან და საქართველოს ხელისუფლებას მოუწოდა სკოლა დაეხურა. გენერალურმა კონსულმა ეს განცხადება თურქეთში მომხდარი სამხედრო გადატრიალების მცდელობის კომენტირებისას გააკეთა, რომელშიც თურქეთის ხელისუფლება ამერიკაში მცხოვრებ ყოფილ იმამს, მწერალსა და პოლიტიკოსს, ფეტულა გულენს ადანაშაულებს. კონსულის განცხადებით, სკოლა-ლიცეუმი „მეგობრობა“ ბათუმში ფეტულა გულენის მიმდევრებს ეკუთვნით.

კონსულის განცხადებას იმ დღესვე გამოეხმაურა აჭარის განათლების მინისტრი, რომელმაც განაცხადა, რომ სკოლა-ლიცეუმ „მეგობრობას“ გავლილი აქვს ყველა ის პროცედურა, რასაც მოითხოვს საქართველოს განათლების სამინისტრო და სკოლაში სწავლება ქართულ ენაზე, ეროვნული სასწავლო გეგმის შესაბამისად მიმდინარეობს.

მოგვიანებით თურქეთის საელჩომ საქართველოში კონსულის განცხადებასთან დაკავშირებით განმარტა, რომ კონსულის ციტატის არასწორი თარგმანის ინტერპრეტირება მოხდა ჟურნალისტების მიერ, თუმცა კონსულთან ინტერვიუს ვიდეო ჩანაწერი მოწმობს, რომ თარგმანი შეესაბამებოდა ციტატას.

მეგობარ ქალზე ფიზიკური ძალადობის საქმე ბათუმის სასამართლოში

58 წლის გ.გ.-ს გამოძიება „გერლფრენდის“ ცემას ედავება. ოჯახში ძალადობის შემთხვევას მოსამართლე ირაკლი შავაძე განიხილავს. „კი, ბატონო, თავს დამნაშავედ ვგრძნობ,“ – უპასუხა მოსამართლეს ბრალდებულმა. ის საქმეში წარმოდგენილ არც ერთ მტიცებულებას სადავოდ არ მიიჩნევს.

დაზარალებული ქალის ჩვენების გარდა საქმეში ერთ-ერთი მთავარი მტკიცებულება ექსპერტიზის დასკვნაა, რომლის მიხედვითაც ქალს სხეულზე, სხვადასხვა ადგილას დაზიანებები აქვს მიღებული. „საპროცესო შეთანხმება მიღწეული არ არის,“ – უთხრა სასამართლო პროცესზე მოსამართლეს პროკურორმა პაატა ცეცხლაძემ. სასამართლო პროცესს მხოლოდ ბრალდებული ესწრებოდა. მას ადვოკატი არ ჰყავს.

„იმ დღეს მასთან ვიყავი სტუმრად და ისევ ვიჩხუბეთ, ეჭვიანობდა… უკვე ოთხი თვის დაშორებული ვიყავით ერთმანეთთან და ამის გადატანა ვერ შეძლო,“ – მოგვიყვა დაზარალებული ქალი. ის ბრალდებულის თხოვნით მოვიდა სასამართლოსთან და გაგვესაუბრა.

„ვფიქრობ, რომ ეს კაცი არ არის მოძალადე და ამიტომ შემებრალა. არ მინდა, რომ დააპატიმრონ. ინციდენტის დროსაც პოლიციაში მეზობლებმა დარეკეს… ძალიან გამიკვირდა, როცა პოლიციელები რეალურად დაინტერესდნენ მომხდარით. მათთან არაფერი დამიმალავს… ვფიქრობ, რომ არ უნდა გაჩუმდე ასეთ დროს,“ _ მოგვიყვა ა.ფ. რომელსაც თვალზე ისევ აჩნდა ძალადობის კვალი.

„დასასჯელი ვარ, მაგრამ ამ ადამიანის დაკარგვა არ მინდოდა,“ – გვითხრა ბრალდებულმა. მოგვიყვა, რომ ცოლს დაახლოებით ხუთი წლის წინ დაშორდა, რომლის შემდეგაც საცხოვრებელი ბინის გაყიდვაც მოუხდა. ძალადობის შემთხვევამდე, ბრალდებული დაზარალებულ ქალთან ცხოვრობდა, ვისაც წინა ქორწინებიდან შვილი უკვე ჰყავდა.

გ.გ.-ს ბრალი „ოჯახში ძალადობის“ მუხლით აქვს წარდგენილი. კანონი „ოჯახის წევრად“ მიიჩნევს პირებს, რომლებიც „დროის გარკვეულ მონაკვეთში ეწევიან ერთიან საოჯახო მეურნეობას“.

გამამტყუნებელი განაჩენის შემთხვევაში ბრალდებული დაისჯება საზოგადოებისთვის სასარგებლო შრომით 80-დან 150 საათამდე ან ერთწლიანი პატიმრობით.

17 წლის მსოფლიო ჩემპიონი ბერძნულ-რომაულ ჭიდაობაში ხულოდან

17 წლის ლერი აბულაძე გასულ კვირას მსოფლიო ჩემპიონი გახდა ჭაბუკთა შორის ბერძნულ-რომაული სტილით ჭიდაობაში. იგი მეორე სპორტსმენია ხულოდან, რომელმაც ბერძნულ-რომაულ ჭიდაობაში ჭაბუკთა შორის მსოფლიო ჩემპიონატის ოქრო მოიპოვა. პირველად ეს ტიტული შმაგი ბოლქვაძეს ერგო, რომელმაც წელს ოლიმპიური ბრინჯაო მოუტანა საქართველოს ნაკრებს.

ლერი, როდის დაიწყეთ ჭიდაობა და როგორ დაინტერესდით სპორტის ამ სახეობით?

ჭიდაობა დავიწყე 2005 წელს. მამაჩემი, ავთანდილ აბულაძე ადრე ჭიდაობდა, შემდეგ ვარჯიშებზე დავყავდი, ვუყურებდი, სხვას რომ ავარჯიშებდა და თანდათან შემიყვარდა ბერძნულ-რომაული სტილის ჭიდაობა. მერე მეც შემიყვანა და გავყევი ამ სპორტს. ყველა ჭიდაობას მირჩევნია ამ სტილით ჭიდაობა.

ვინ იყო თქვენი პირველი მწვრთნელი, სად და რა პირობებში ვარჯიშობდით?

ჩემი პირველი მწვრთნელი მამა იყო. ის ახლაც ჩემი მწვრთნელია. უბრალოდ მეორე მწვრთნელიც მყავს თბილისში. თავიდან ძველ დარბაზში ვვარჯიშობდით, არ იყო კარგი პირობები, მაგრამ შემდეგ გარემონტდა და უკვე ნორმალური პირობებია, ყველანაირად ხელს გვიწყობენ.

ეს დარბაზი სად მდებარეობს?

ხულოშია, მეც იქ ვცხოვრობ.

რომელი იყო ყველაზე მნიშვნელოვანი გამარჯვებები?

2014 წელს, როდესაც პირველად წავედი მსოფლიო ჩემპიონატზე და საერთოდ, ასეთი დიდი მასშტაბის შეჯიბრზე მეორე ადგილი ავიღე და მომავალ წელს უკვე ევროპის ჩემპიონი გავხდი. მაგრამ ყველაზე დასამახსოვრებელი და მნიშვნელოვანი მაინც მსოფლიო ჩემპიონობაა.

ვინ იყო თქვენი ყველაზე ძლიერი მეტოქე?

ყველაზე ძლიერი მაინც ალბათ წელს იყო, მსოფლიო ჩემპიონატის ფინალში. ფრე ვიჭიდავე სამი ტაიმი და ბოლო ქულით მოვიგე.

რა არის თქვენი მთავარი მიზანი სპორტულ კარიერაში?

მთავარი მიზანია გავხდე ოლიმპიური ჩემპიონი.

უახლოეს პერიოდში რა შეჯიბრისთვის ემზადებით?

აქამდე ვიყავი ჭაბუკთა შორის ეროვნულ ნაკრებში. 18 წლიდან ახალგაზრდულში გადავდივარ, იანვრიდან იწყება ახალი სეზონი და უკვე თავიდან უნდა მივიღო მონაწილეობა საქართველოს ჩემპიონატში, რომ საქართველოს ნაკრებში მოვხვდე. შემდეგ იქნება ევროპის ჩემპიონატები, მსოფლიო და სხვა შეჯიბრებები 2019 წელს საკვალიფიკაციო „ტოკიო 2020“-ის ოლიმპიადისთვის. ასე, რომ ჯერ დიდი დროა და კარგად უნდა მოვემზადო.

წინასწარ თუ გაქვთ რაიმე მოსამზადებელი ტრადიცია მნიშვნელოვანი შეხვედრის წინ?

არა, ასეთი არაფერი მაქვს, უბრალოდ წინა პერიოდში ვცდილობ, მშვიდად ვიყო, განწყობას ვიქმნი, რომ წყნარად გავიდე და ჩემი ჭიდაობა ვაჩვენო.

ვინ გახლავს ხოლმე შეჯიბრებებზე, ვინ არის მთავარი გულშემატკივარი?

მამაჩემი, როგორც ჩემი მწვრთნელი, შიდა ჩემპიონატებსა და შეჯიბრებებზე მახლავს. როდესაც საერთაშორისო ჩემპიონატებია და საქართველოს სახელით გამოვდივარ, იქ ეროვნული ნაკრების მწვრთნელი დამყვება. ჩემი გულშემატკივარი მთელი ოჯახია. ჩემი ძმაც ჭიდაობს, ისიც საქართველოს ჩემპიონია და მისი გვერდში დგომა მეხმარება ძალიან.

ელოდით მსოფლიო ჩემპიონობას?

გულწრფელად რომ გითხრათ, კი. მთელი წელი ვემზადებოდი, 12 შეკრება გავიარე საქართველოს ნაკრებთან ერთად და მზად ვიყავი. თან გამოცდილებაც მქონდა, მსოფლიოს ფინალი რომ წავაგე, იმის შემდეგ ისე ვიყავი მობილიზებული, რომ წელს აუცილებლად უნდა მომეგო. ახლა ასეთივე შემართებით ვემზადები ოლიმპიური ჩემპიონობისთვის.

წელს თქვენმა თანაგუნდელმა შმაგი ბოლქვაძემაც წარმატებით იასპარეზა ოლიმპიადაზე. როგორც ვიცი, ერთი სპორტსკოლიდან მოდიხართ. მისმა ჭიდაობამ რა გავლენა მოახდინა თქვენზე?

ხულოში ერთად ვვარჯიშობდით, სამი-ოთხი წელი. თანაგუნდელი და მეგობარია. ძალიან დიდი ემოციები მქონდა, რომ ვუყურებდი, მომინდა გავმხდარიყავი ოლიმპიური ჩემპიონი.

ამ სპორტსკოლას უკვე ორი მსოფლიო ჩემპიონი ჰყავს ბერძნულ-რომაული სტილით ჭიდაობაში. კიდევ რას უნდა ველოდეთ მისი ახალი თაობისგან?

არიან აქ კარგი მოჭიდავეები, უფრო პატარები, რომლებიც შმაგის და ახლა უკვე ჩემი გამარჯვების შემდეგ უფრო შეხალისდნენ და უფრო მეტი შემართებით ვარჯიშობენ.

რა ინტენსივობით ვარჯიშობ?

დღეში ერთხელ 5 საათზე ვახერხებ სავარჯიშოდ გასვლას, მანამდე სკოლაში დავდივარ. მე-11 კლასში ვარ. ვფიქრობ, რომ ექსტერნის გამოცდები ჩავაბარო და მერე ეროვნულებზეც გავიდე. პროფესია ჯერ არ მაქვს არჩეული.

სწავლას და ჭიდაობას ერთად როგორ ახერხებთ?

სკოლაშიც ცოტა ხელს მიწყობენ, როდესაც წასასვლელი ვარ და გაცდენა მიწევს. კარგადაც ვსწავლობ. თუ ძალიან დაღლილი ვარ და ვერ გავიგე რაღაც, მასწავლებლები მიხსნიან თავიდან და მეხმარებიან. აუცილებლად უნდა ვისწავლო, უნივერსიტეტშიც უნდა ჩავაბარო და თან ვარჯიშიც მოვახერხო.

აჭარის განათლების მინისტრი: თურქული სკოლის გახსნა ჩვენთან არ ყოფილა შეთანხმებული

ბათუმში თურქეთის საკონსულოს ფეისბუკ გვერდზე განთავსებულია ინფორმაცია, რომელიც იტყობინება, რომ ბათუმში ოფიციალური თურქული სკოლა გაიხსნა. „ოფიციალურ სასწავლებელში ბათუმის თურქულ სკოლაში პირველი ზარი დაირეკა. ბედნიერებისა და სიკეთის მომტანი ყოფილიყოს ბათუმში მცხოვრები ჩვენი მოქალაქეების, ჩვენი სამშობლოს, ჩვენი ერისათვის“, – წერია ვებ-გვერდზე. თუქრული სკოლა ბათუმში, ახალი ბულვარის ტერიტორიაზეა განთავსებული.

ოფიციალური ინფორმაციის მიხედვით, სკოლაში სწავლა ბათუმში მცხოვრები თურქი ოჯახების შვილებს შეეძლებათ.

აჭარის განათლებისა და კულტურის მინისტრი, გია თავამაიშვილი „ბათუმელებთან“ საუბარში აცხადებს, რომ თურქული სკოლის გახსნის შესახებ ინფორმირებული არ ყოფილა.

„სკოლის, როგორც სახელის გამოყენება, უკვე წარმოშობს ავტორიზაციის ვალდებულებას. რომ იყოს ტრენინგ ცენტრი, ან სხვა რამ, კიდევ შეიძლება, მაგრამ კანონმდებლობაში წერია, რომ საგანმანათლებლო სახელების – „სკოლა“, „უნივერსიტეტი“, „კოლეჯი“ და ა.შ გამოყენებისას აუცილებელია ავტორიზაცია“, -აცხადებს მინისტრი.

თურქული სკოლის გახსნის ცერემონია ბათუმში. ფოტო: თურქეთის საკონსულო ბათუმში — თურქული სკოლის გახსნის ცერემონია ბათუმში.
ფოტო: თურქეთის საკონსულო ბათუმში

გია თავამაიშვილი ამბობს, რომ სკოლის გახსნაზე სამინისტროს წარმომადგენლები არ დაუპატიჟებიათ.

„სკოლის მიზანი არის ის, რომ მიიღოს მოსწავლემ განათლება და სკოლის ატესტატის საფუძველზე გააგრძელოს სწავლა უმაღლეს სასწავლებელში. ამიტომ, ავტორიზაციის გავლის გარეშე სკოლას ეკრძალება საქმიანობა. ავტორიზაციის შემდეგ არის აკრედიტაცია, რომელიც ასევე აუცილებელია“.

„ბათუმელების“ კითხვაზე, იმ შემთხვევაში თუ სკოლა არ დაექვემდებარება საქართველოს განათლების სისტემას, რა ფორმით მოხდება მისი ფუნქციონირების შეჩერება? მინისტრი ამბობს, რომ თუკი თურქული სასწავლებელი, ხვდება იმ ჩამონათვალში, რომელიც საქართველოს კანონმდებლობით ექვემდებარება ავტორიზაცია-აკრედიტაციას, მაგრამ ის არ გაივლის, პირველ ეტაპზე დაჯარიმდება, შემდეგ კი ფუნქციონირებას შეწყვეტს.

„ეს არის სისხლის სამართლის 193-ე პრიმა მუხლით გათვალისწინებული. თუ არ უნდა სკოლის სტატუსი, მაშინ სამართლებრივად შეთანხმდება ესეც ჩვენთან. ამიტომ, ჩვენ ვარკვევთ დეტალებს და მოგვიანებით დავაზუსტებთ ინფორმაციას“, – განაცხადა მინისტრმა.

ატარებს თუ არა ოფიციალურად სკოლის სტატუსს სასწავლებელი და მოხდა თუ არა მისი გახსნა საქართველოს კანონმდებლობის შესაბამისად? ამ კითხვაზე

საკონსულოს კომენტარი იხილეთ აქ.

მაჟორიტარი კანდიდატი: როგორ ფიქრობთ ახლა, მარტო ერთი კობა ნაკაიძე იმუშავებს ამ გლობალურ პროგრამაზე?

კობა ნაკაიძე ქობულეთის 71-ე საარჩევნო ოლქის მაჟორიტარი კანდიდატია პარლამენტში პარტიიდან „ქართული ოცნება – დემოკრატიული საქართველო“. პროფესიით ექიმია. წლების განმავლობაში ის ქობულეთის რაიონული საავადმყოფოს დირექტორი იყო. არ გამორიცხავს, რომ მასზე არჩევანი მმართველმა პარტიამ მისი პროფესიის გამო გააკეთა. სხვა კანდიდატების მსგავსად, ისიც პირველი რიგის ამოცანად ქობულეთისთვის თვითმმართველი ქალაქის სტატუსის მინიჭებას ასახელებს.

2012 წელს ფატი ხალვაშის წინასაარჩევნო შტაბის ხელმძღვანელი ვიყავი ქობულეთში. მანამდეც ჩართული ვიყავი პოლიტიკაში. ქობულეთის საკრებულოს წევრი ვიყავი სამჯერ. 90-იან წლებში „ტრადიციონალისტებიდან“ გავედი, მერე დამოუკიდებელი დეპუტატი ვიყავი… ცხადია, მოსახლეობას ბევრი პრობლემა აწუხებს, რაც დაკავშირებულია სოციალურ საკითხებთან და ჩემი პროფესიის ადამიანის ყოფნა პარლამენტში მნიშვნელოვანია.

კონკრეტული პრობლემა რომ დაგვისახელოთ, რის გამოც გსურთ პარლამენტში შესვლა?

ქობულეთს უნდა ჰქონდეს თვითმმართველი ქალაქის სტატუსი. ალბათ, გახსოვთ, რომ 2012 წლის მერე იყო საუბარი 18 ქალაქზე, მერე შეიკვეცა 6 ქალაქი და იმ შეკვეცილებს შორის მოხვდა ქობულეთი. ამით ქალაქი ძალიან დაზარალდა. მაშინ ახალი მოსული იყო ხელისუფლება და თავი შეიკავა, თუმცა ითქვა, რომ ამ კუთხით მუშაობა გაგრძელდებოდა.

მიიღეთ მაშინ თქვენივე პოლიტიკური გუნდისგან პასუხი, რატომ აღარ მიანიჭეს ქობულეთს თვითმმართველი ქალაქის სტატუსი და რატომ არის მნიშვნელოვანი ეს სტატუსი?

თვითმმართველ ქალაქს სჭირდება თავისი ბიუჯეტი, იმ ეტაპზე ეს შეჩერდა. პროცესი მიმდინარეობს… კარგია ეს სტატუსი იმიტომ, რომ რაიონი თავის პრობლემებს განსაზღვრავს, ქალაქი – თავის პრობლემაზე იზრუნებს. ახლა ისეა, რომ ბიუჯეტის ძირითადი ნაწილი სოფლის პრობლემებზე იხარჯება. ტურიზმის ხუთი მიმართულება არსებობს საერთო და ხუთივეს განვითარებისთვის საუკეთესო რესურსი აქვს ქობულეთს…

პარლამენტის დონეზე რა პრობლემას გაააქტიურებთ, რაც შესაძლოა პოზიტიურად აისახოს ქობულეთზე?

არის პრობლემები სოციალური, არის იგივე მისახედი იპოთეკარების თემა. აქ საჭიროა საკანონმდებლო კუთხით მუშაობა, რომ დარეგულირდეს ეს თემა.

წინა არჩევნებზეც აქტუალური იყო იპოთეკარების თემა. მაშინ ბიძინა ივანიშვილმა გაუჩინა ქობულეთელებს მოლოდინები ამ კუთხით. ეს ამომრჩეველმა არ შეგახსენათ?

არა. ჩვენ ვხვდებით, ვესაუბრებით იპოთეკით დაზარალებულებს. ისინი აბსოლუტურად თავიანთ უბედურებას აკისრებენ „ნაცინალურ მოძრაობას“… მარტივად გადასაწყვეტი თემა არ არის ეს. მთავრობას მუშაობა ამ მიმართულებით არ გაუჩერებია. სამთავრობო კომისია მუშაობს და შესწავლილია ყველა საკითხი. სახელმწიფოს ხომ არ გაუცია ეს კრედიტები?

სახელმწიფოს არ გაუცია, მაგრამ მოსახლეობამ მაშინ მიიღო დაპირება და არაფერი შეცვლილა. ახლა რატომ ჰპირდებით იმავეს?

თქვენ, ეტყობა, ინფორმაცია არ გაქვთ, რომ ქობულეთში 64 პრობლემური ოჯახიდან 18 შემთხვევაში პრაქტიკულად უკვე გადაწყდა პრობლემა. მე გეუბნებით ორი-სამი დღის ამბავს. მათ მიეცემათ გრძელვადიანი და დაბალპროცენტიანი სესხი, როგორც ითხოვდნენ. ამ დღებში ამათთან დაიდება ხელშეკრულებები.

როგორ შეარჩიეს ეს ოჯახები, რატომ ეს 18 ოჯახი და რა როლი შეასრულა მთავრობამ, თქვენ იყავით შუამავალი ბანკთან?

მე კი არ ვიყავი შუამავალი, მე ვარ კანდიდატი, ხელისუფლება მუშაობს ამაზე, კომისია არსებობს, მთავრობა მუშაობს და იმათ ჰკითხეთ. მე გეუბნებით ფაქტს. მთავრობის წევრი არ ვარ და არ მაქვს ინფორმაცია. გეუბნებით, რომ უნდა შეიცვალოს კანონმდებლობა, რომ მოწესრიგდეს რეგულაციები. დანარჩენს გავწერთ მერე.

ანუ კონკრეტულ ხედვას ამჯერად ვერ სთავაზობთ ამომრჩეველს…

როგორ ფიქრობთ ახლა, მარტო ერთი კობა ნაკაიძე იმუშავებს ამ გლობალურ პროგრამაზე? იქ, პარლამენტში, გუნდურად ვიმუშავებთ ამაზე და გადავწყვეტთ. თქვენ ძალიან მარტივად უყურებთ პრობლემებს… პარლამენტში უნდა ვიმუშაოთ, აბა, რატომ შევდივართ პარლამენტში? იმ კაბალური პირობებით, როგორც ახლა ხდება სესხების გაცემა, არ შეიძლება. არ ვამბობ, რომ ვინმე უნდა შეიზღუდოს, მაგრამ ის, რასაც აკეთებენ დღეს ბანკები, არ ხდება არც ერთ წარმატებულ ქვეყანაში.

დასაწყისში ახსენეთ, რომ როგორც ექიმი სოციალურ და ჯანდაცვის თემებზე იმუშავებთ. ამ კუთხით რას სთავაზობთ ქობულეთელებს?

სოციალურად დაუცველებისთვის ქულების მინიჭების კუთხით არის გასაკეთებელი გარკვეული ცვლილებები, რადგან ბევრი ადამიანი არის დაზარალებული ამ კუთხით, ბევრს მოეხსნა დახმარება. სოციალურ აგენტზე არ უნდა იყოს დამოკიდებილი, ადამიანს მოეხსნება თუ არა სოციალური დახმარება

ხელისუფლება, მათ შორის, მინისტრი დავით სერგეენკო ხშირად ამაყობს და ამბობს, რომ ეს სისტემა შეიცვალა და აგენტზე აღარაა დამოკიდებული, ვის რამდენი ქულა მიენიჭება. გამოდის, არასწორად ამბობდა ამას ხელისუფლება?

ხელისუფლება არასწორად ამბობდა „ნაციონალური მოძრაობის“ დროს. ახლა იხვეწება ეს პროცესი, თქვენ ძალიან ჩქარობთ. სერგეენკო ამბობდა იმასაც, რომ ეს პროცესი საჭიროებს სრულყოფას…

თქვენ იყავით აჭარის დასაქმების სააგენტოს ხელმძღვანელი სამი წლის განმავლობაში. რამდენი ადამიანის დასაქმება შეძელით და კონკრეტულად ქობულეთს სად ჰპირდებით სამუშაო ადგილების შექმნას?

ჩემი დირექტორობის დროს დავასაქმეთ დაახლოებით 4 ათასი ადამიანი და მინდა გითხრათ, რომ კიდევ უფრო მეტი ვაკანსია არსებობდა. მაშინ პოლონური გრანტით შრომის ბაზრის კვლევაც ჩავატარეთ და გამოჩნდა, რომ პრობლემაა კვალიფიციური კადრები. მე მაქვს დაპირება, რომ უნდა გაძლიერდეს პროფესიული განათლება და ამ კუთხით არსებული დეფიციტი აღმოიფხვრას… ქობულეთში დასაქმების ადგილი უნდა იყოს ტურიზმი და სოფლის მეურნეობა. ეს ტრადიციული დარგებია და სათანადო ყურადღების შემთხვევაში, შეიქმნება სამუშაო ადგილები. ის, რაც არის წამყვანი, ციტრუსი, თხილი, ისევ ეს უნდა იყოს. ბოლო ორი წლის განმავლობაში თქვენც ხედავთ, რომ ცუტრუსის გასაღების პრობლემა აღარ არსებობს…

მე იმასაც ვხედავ, რომ ქობულეთის სოფლებიდან ძალიან ბევრი ადამიანი გადადის მეზობელ თურქეთში სეზონური, მძიმე სამუშაოს შესასრულებლად…

თქვენ ფიქრობთ, რომ საქართველოს სხვა რეგიონებში ეს პრობელემები მოგავრებულია?… გითხარით, რომ ტურიზმს აქვს ხუთი მიმართულება, ხუთივე უნდა განვითარდეს ქობულეთში. სამთო ტურიზმი უნდა განვითარდეს და ზღვის სეზონის შემდეგ სეზონმა უნდა გადაინაცვლოს მთაში. გარდა ამისა, ქობულეთში ძალიან ბევრი სამკურნალო წყალია. ტურიზტული სეზონი ქობულეთში 7 თვემდე უნდა გაიზარდოს. ტურიზმის გაძლიერება ავტომატურად გამოიწვევს სოფლის ჩართვას, სოფლის მეურნეობის პროდუქტებზეც მოთხოვნა გაიზრდება.

კობა ნაკაიძეს დამთავრებული აქვს თბილისის სამედიცინო ინსტიტუტის პედიატრიის ფაკულტეტი. მუშაობდა ქობულეთის რაიონული საავადმყოფოს დირექტორად 1995-2005 წლებში. 2012 წლიდან 2015 წლამდე იყო აჭარის დასაქმების სააგენტოს დირექტორი. გასული წლიდან კანდიდატად წარდგენამდე კი ისგი აჭარის საზოგადოებრივი ჯანდაცვის ცენტრს ხელმძღვანელობდა.

მანდარინის ფასი აჭარის პოლიტიკაში

„ერთიანი ნაციონალური მოძრაობის“ ხელვაჩაურის მაჟორიტარი კანდიდატი, მიშა ბოლქვაძე, „ქართულ ოცნებას“ და ზოგადად ხელისუფლებას, უუნარობაში ადანაშაულებს: „ციტრუსის პროგრამა ჩვენ ერთი თვის წინ წარვადგინეთ, რომელიც ითვალისწინებს კორპორაციის შექმნას… ძირითადი საკითხი, რაც მოიპარა „ქართულმა ოცნებამ“, ესაა სტანდარტული მანდარინის ჩაბარების ფასი – 70 თეთრი, არასტანდარტული მანდარინის კი – 20 თეთრი. დღეს იმავე პროგრამის წარდგენა მოხდა „ქართული ოცნების“ მხრიდან“.

აჭარის სოფლის მეურნეობის მინისტრი, ლაშა კომახიძე აღნიშნულ ბრალდებას უარყოფს: „ვერ გავიგე, რაშია იდეის მოპარვა. კალკულაციაში ჩვენ გვიდევს ციტრუსის ფასი 70 თეთრი და ეს ფასი არის ჩვენი ფერმერთათვის ძალიან კარგი და კომფორტული ფასი. აქ არაფერ შუაში არ არის „ნაციონალური მოძრაობის“ იდეის მოპარვა. მე მაქვს ერთი კითხვა – 75 თეთრი რომ გვეთქვა, აღარ იქნებოდა პრეტენზიები ჩვენ მიმართ? წარმომიდენია, 70 თეთრზე ნაკლები რომ გვეთქვა, რას იტყოდნენ.“

„ბათუმელების“ შეკითხვაზე, როგორ დადგინდა მანდარინის ფასი წინასწარ? – სამინისტროში გვიპასუხეს: „სიტუაცია ისე შეიფუთება, რომ 1 კგ. მანდარინი 70 თეთრი ეღირება“.

აჭარის სოფლის მეურნეობის მინისტრი და მთავრობის თავმჯდომარე, დღეს, მეციტრუსეებს აგროსერვისცენტრში შეხვდნენ. აჭარის მთავრობა აცხადებს, რომ „მიღება-გადამუშავება დაფასოებისათვის რეგიონში მოქმედი ციტრუსის საწარმოები და სამაცივრე მეურნეობები სრულ მზადყოფნაში არიან“, ხოლო „2016 წლის სეზონისთვის 1 კილოგრამი ციტრუსის მინიმალური ღირებულება 70 თეთრით განისაღვრა“.

გასულ წელს სოფლის მეურნეობის პროექტების მართვის სააგენტო, სუბსიდიის სახით, 1 კგ-ზე 10 თეთრს გასცემდა იმ კომპანიებზე, რომლებიც 2016 წლის პირველ თებერვლამდე ფიზიკური პირებისგან 1 კგ. არასტანდარტულ მანდარინს 20 თეთრად შეისყიდდა.

„ბათუმელების“ ინფორმაციით, გასულ წელს მოსახლეობა ხარისხიან/სტანდარტულ მანდარინს 60-75 თეთრადაც კი ყიდდა. მანდარინის კრეფის აქტიური სეზონი აჭარაში, ძირითადად, ნოემბრის შუა რიცხვებში იწყება.

2016 წლის პირველი თებერვლის მონაცემებით, საქართველოდან ექსპორტირებული იყო 26 579 ტონა სტანდარტული მანდარინი, ხოლო 9 252 ტონა კი გადამუშავებული.

SMS-ები ბათუმის მუნიციპალიტეტისგან წინასაარჩევნოდ

ბოლო რამდენიმე დღეა ბათუმში მოქალაქეები Batumi info-სგან მოკლე ტექსტურ შეტყობინებებს იღებენ. შეტყობინებები ძირითადად ინფორმაციული ხასიათისაა და ბათუმის მერიის მიერ განხორციელებულ პროექტებს ეხება.

აგზავნიან თუ არა შეტყობინებებს მერიიდან? – ამ კითხვაზე ჯერჯერობით ბათუმის მერიისგან პასუხი ვერ მივიღეთ – „ვარკვევთ და გიპასუხებთ“.

„ერთიანი ნაციონალური მოძრაობის“ წევრი პეტრე ზამბახიძე ამტკიცებს, რომ შეტყობინებები მერიას ეკუთვნის და ის წინასაარჩევნო აგიტაციაა: „არჩევნებამდე დარჩენილ რამდენიმე დღეში ასეთი ტიპის ინფორმაციების გაგზავნა თვითმმართველობის მხრიდან არის პირდაპირი მონაწილეობა საარჩევნო კამპანიაში და პირდაპირი დახმარება სახელისუფლებო პარტიისთვის. ოთხი წლის განმავლობაში ხელისუფლებაში როცა იყვნენ, ასეთი რამ არ ყოფილა. რატომ არ აგზავნიდნენ შეტყობინებებს მაშინ, როდესაც ქალაქის რამდენიმე ქუჩა დაიტბორა? აღნიშნულ საკითხთან დაკავშირებით ჩვენ უახლოეს დღეებში მივმართავთ უწყებათაშორის კომისიას“.

„სამართლიანი არჩევნების“ აჭარის ორგანიზაციის ხელმძღვანელის, მადონა ბერიძის განმარტებით: „თუ კი მერიისგან ხდება აღნიშნული შეტყობინებების გაგზავნა, პირდაპირ აგიტაციის ტექსტს არ შეიცავს, მაგრამ, რამდენადაც ამ საარჩევნო პერიოდს ემთხვევა, გარკვეულწილად, რესურსის გამოყენების ნიშნები არის.“

ბათუმის მუნიციპალიტეტის საკრებულოს პრესსამსახურის ინფორმაციით, შეტყობინებებს საკრებულო არ აგზავნის.

მოკლე ტექსტური შეტყობინებები Batumi info-სგან:

საქველმოქმედო მარათონი ბათუმში [ანონსი]

ბათუმში ძუძუს კიბოთი დაავადებული ქალების დასახმარებლად საქველმოქმედო მარათონი ტარდება. სარბენი მანძილი, საორიენტაციოდ, იქნება ანბანის კოშკიდან აეროპორტამდე. მარათონის დასაწყისი 9 ოქტომბერს, 09:00 საათზე.

სპეციალურად ამ მარათონისთვის ინტერნეტ სივრცეში განთავსებულია ვებ გვერდი: www.marathon.mh.com.ge სადაც ნებისმიერ მსურველს შეუძლია რეგისტრაცია, ხოლო 20–22 სექტემბრიდან შესაძლებელი იქნება თანხის გადახდა მონაწილეობისთვის. ამის შემდეგ პიროვნებას მიენიჭება ნომერი, რითაც იასპარეზებს მარათონზე. მონაწილეობის საფასური 15–20 ლარი გასარბენი მანძილის მიხედვით.

მარათონი იმართება სააქციო საზოგადოება „საზღვაო ჰოსპიტალის“ ინიციატივით და „ევროპა დონას“ მხარდაჭერით. ჰოსპიტალის ინფორმაციით, შემოსული თანხა გადაირიცხება „ევროპა დონას“ ანგარიშზე.

კინოფესტივალის აფიშა: რა ფილმებს ნახავთ დღეს, 20 სექტემბერს

ბათუმში საავტორო კინოს XI საერთაშორისო ფესტივალი მიმდინარეობს. დღეს, 20 სექტემბერს, კინოთეატრ „აპოლოში“ აჩვენებენ:

12.00 საათზე: „განათლებულთა მიწა“, დოკუმენტური ფილმი რეჟისორი პიტერ ჟან დე პუ [ბელგია/ირლანდია/ჰოლანდია/გერმანია. 2015; 87 წთ.]

14: 00 საათზე: „პროსპეროს წიგნები“. რეჟისორი პიტერ გრინევეი [დიდი ბრიტანეთი/ ჰოლანდია/ საფრანგეთი/ იტალია/ იაპონია, 1991; 124 წთ.]

ფილმი ნაჩვენები იქნება სექციის – „შექსპირი კინოში“ – ფარგლებში, რომელიც კინოფესტივალზე შექსპირის გარდაცვალებიდან 400 წლისთავს აღნიშნავს.

16:30 საათზე: „მე – ოლგა ჰერპანოვა“. რეჟისორი პეტრ კაზდა/ტომას ვაინრები [ჩეხეთი/პოლონეთი/სლოვაკეთი/საფრანგეთი, 2016; 106 წთ.]

ოლგა მარტოსული ლესბოსელია, საზოგადოებისა და ოჯახისგან გარიყულს საკუთარი ადგილის პოვნა უჭირს. პეტრ კაზდას და თომას ვაინრების ფილმი წელს რამდენიმე კინოფესტივალზე აჩვენეს, ფილმმა სოფიას საერთაშორისო კინოფესტივალის მთავარი პრიზი მოიპოვა.

19.00 საათზე: „სმოლენკსი“. რეჟისორი ანტონი კრაუზე [პოლონეთი, 2016 წ.]

ფილმი 2010 წელს სმოლენსკში მომხდარ ტრაგედიას ეძღვნება, როცა ავიაკატასტროფის შედეგად პოლონეთის პრეზიდენტი ლეხ კაჩინსკი, მისი მეუღლე და ბორტზე მყოფი 96-ვე ადამიანი გარდაიცვალა. ფილმის მთავარი გმირი ჟურნალისტია, რომელიც სმოლენსკის ტრაგედიის მიზეზებს იძიებს.

21:30 საათზე: „ბედნიერების ღმერთი“, დიტო ცინცაძე [გერმანია, 2015; 90 წთ.]

უმუშევარი მსახიობი მოულოდნელად ხვდება თავის 15 წლის შვილს, რომელიც 10 წელია არ უნახავს. ის ამაოდ ცდილობს აჩვენოს შვილს, რომ წარმატებული და მდიდარი ადამიანია.

მთავარ ფოტოზე: კადრი დიტო ცინცაძის ფილმიდან „ბედნიერების ღმერთი“.

აჭარის მთავრობა: ციტრუსის სეზონისთვის სრული მზადყოფნაა

აჭარის მთავრობის ინფორმაციით, ა(ა)იპ აგროსერვის ცენტრის ჩაქვის ციტრუსოვანთა სანერგე მეურნეობაში ციტრუსის სეზონის სამზადისთან დაკავშირებით, რეგიონის მეციტრუსეებთან შეხვედრა გაიმართა. ფერმერებს აჭარის მთავრობის თავმჯდომარე ზურაბ პატარაძე და სოფლის მეურნეობის მინისტრი, ლაშა კომახიძე შეხვდნენ.

აქვე გაიმართა სპეციალურად ციტრუსის სეზონისთვის ინგლისურ და რუსულ ენებზე შექმნილი ვებ-გვერდის პრეზენტაცია. სოფლის მეურნეობის სამინისტრომ ორენოვანი სარეკლამო რგოლიც წარადგინა. რგოლი შეიქმნა იმ ქვეყნებში გასავრცელებლად, რომლებიც რეგიონის ციტრუსის გასაღების ბაზრებს წარმოადგენენ. აღსანიშნავია, რომ ექსპორტიორი ქვეყნების ჩამონათვალში უკრაინის, ბელარუსიის, უზბეკეთის, ყაზახეთისა და ყირგიზეთის პარალელურად, წელს პირველად მოხვდნენ ბალტიისპირეთის ქვეყნებიც – აღნიშნულია მთავრობის მიერ გავრცელებულ ინფორმაციაში – ციტრუსოვანთა მოსავლის რეალიზაციის მაღალ დონეზე ორგანიზების, საბაჟო ტარიფების ოპტიმიზაციისა და რეგიონში წარმოებული ციტრუსის შესახებ ინფორმაციის მიწოდების მიზნით, აჭარის სოფლის მეურნეობის სამინისტროს ხელმძღვანელობა შეხვედრებს უკვე მართავს უკრაინის, ბელარუსიისა და ყაზახეთის რესპუბლიკების წარმომადგენლებთან. სპეციალურ საინფორმაციო ვებ-გვერდზე https://citrus.moa.ge/ დაინტერესებულ უცხოელ ექსპორტიორებს შეეძლებათ გაიგონ დეტალური ინფორმაცია წარმოებული ციტრუსის და მისი ტრანსპორტირების თავისებურებებთან დაკავშირებით“.

მიმდინარე წლის ციტრუსის სეზონზე რეგიონში 55 – 60 ათასი ტონა ციტრუსის მოსავალს ელოდებიან. მიღება-გადამუშავება დაფასოებისათვის კი რეგიონში მოქმედი ციტრუსის საწარმოები და სამაცივრე მეურნეობები სრულ მზადყოფნაში არიან.

მთავრობისავე ინფორმაციით, „2016 წლის სეზონისთვის 1 კილოგრამი ციტრუსის მინიმალური ღირებულება 70 თეთრით განისაღვრა“.

14352386_287167555003080_4008956973534039382_o — შეხვედრა მეციტრუსეებთან / ფოტო: მთავრობის პრესსამსახური

დღეს – „სმოლენსკის“ პრემიერა ბათუმის კინოფესტივალზე

დღეს, 20 სექტემბერს, საავტორო კინოს ბათუმის საერთაშორისო ფესტივალზე პოლონელი რეჟისორის, ენტონი კრაუზეს ფილმის ჩვენება შედგება. ფილმის პრემიერა სექტემბრის დასაწყისში შედგა ვარშავაში, შესაბამისად, BIAFF-ი პირველი კინოფესტივალია, სადაც ფილმს აჩვენებენ.

„სმოლენსკის“ პრემიერა კინოთეატრ „აპოლოში“ 19:00 საათზე გაიმართება. პრემიერისათვის ბათუმში საგანგებოდ ჩამოვიდნენ ფილმის პროდიუსერი მაციეი პავლიცკი და ლეხ კაჩინსკის როლის შემსრულებელი მსახიობი ლეხ ლოტოცკი.