ნეტგაზეთი • RU

სამინისტრო მანდარინის ექსპორტის ბოლო მონაცემებს აქვეყნებს

აჭარის სოფლის მეურნეობის სამინისტროს ინფორმაციით, ციტრუსის საკოორდინაციო შტაბმა მუშაობა დაასრულა. პირველი თებერვლის მონაცემებით, საქართველოდან ექსპორტირებულია 26579 ტონა სტანდარტული მანდარინი, 9252 ტონა კი გადამუშავებულია.  სამინისტროს ინფორმაციით, სამრეწველო მანდარინის გადამუშავების შედეგად მიღებული შემოსავალი 1892 925 ლარს შეადგენს, აქედან სახელმწიფო სუბსიდიის თანხა 925 222 ლარია.

ქვეყნის ტერიტორიაზე მანდარინის გადამუშავებას აწარმოებდა ექვსი ქარხანა: ქობულეთში Georgian Industrial Asset Management Group-ი და შპს TCF Georgia, ამბროლაურის მუნიციპალიტეტში GEO-Flowers-ი, ქედაში შპს ,,კახური ტრადიციული მეღვინეობა-აგრო-ქედა“, ჩოხატაურში შპს ,,კახური ტრადიციული მეღვინეობა-აგრო-ჩოხატაური“ და გორში შპს ,, გსქ კულა“.

საექსპორტო ბაზრებზე კონკურენტუნარიანი და მაღალხარისხიანი ციტრუსის მიწოდების უზრუნველსაყოფად, აჭარასა და გურიაში მანდარინის ჩაბარება შესაძლებელია 40-მდე დამახარისხებელ (შემფუთავ) პავილიონში.

სამინისტროს ინფორმაციით, სტანდარტული მანდარინის ექსპორტი ძირითადად ხორციელდება რუსეთში -78.05%, 20744 ტ, უკრაინაში – 14. 94%, 3969ტ, სომხეთში – 3.01%, 799ტ, აზერბაიჯანში – 1.14%, 304 ტ, ყაზახეთში – 1.68%, 447ტ და ბელორუსიაში – 0.91 % 242ტ. სხვა ქვეყნები – 0.28 % 74ტ.

ციტრუსის მოსავლის რეალიზაციის ხელშეწყობის საკოორდინაციო შტაბი ბათუმში 2015 წლის ნოემბრიდან ფუნქციონირებს.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.