სახალხო დამცველის ანგარიშის საფუძველზე, საპარლამენტო კონტროლის ფარგლებში, პარლამენტი კონკრეტული რეკომენდაციებით სხვადასხვა სახელმწიფო უწყებას მიმართავს. პარლამენტის დადგენილებას ხელს ირაკლი კობახიძე აწერს და იგი 14 ივლისიდან ამოქმედდა.

დადგენილების დასაწყისში ვკითხულობთ, რომ პარლამენტის წინა წლის რეკომენდაციები, რომელიც ასევე ომბუდსმენის ანგარიშის საფუძველზე მომზადდა, დადებითად შეასრულა მთავრობამ.  კონკრეტულად 203 რეკომენდაციიდან 110 შესრულდა, 36 ნაწილობრივ შესრულდა, 96 შესრულების პროცესშია, ხოლო 11 რეკომენდაცია შეუსრულებელია. დადგენილებაში მითითებული არ არის, პარლამენტის რეკომენდაციებიდან რა არ შეასრულა მთავრობამ.

მთავრობასთან მიმართებით პარლამენტი ძირითადად გენდერული საკითხების მოგვარებაზე, ასევე ქალთა მიმართ ძალადობის აღმოფხვრაზე აკეთებს აქცენტს. ამ ჩამონათვალში ვკითხულობთ:

„უზრუნველყოს პასუხისმგებელი სახელმწიფო უწყებების მიერ ქალთა მიმართ ძალადობისა და ოჯახში ძალადობის შემთხვევების შესახებ სრულყოფილი, დეტალური სტატისტიკის წარმოებისა და ანალიზის განხორციელება, მათ შორის, ქალთა მკვლელობისა და თვითმკვლელობამდე მიყვანის შემთხვევების შესახებ სტატისტიკური მონაცემების შეგროვება და შესაბამის შემთხვევასთან დაკავშირებული საჭირო მონაცემების გაანალიზება“

პარლამენტს რეკომენდაციით მიმართავს სასამართლოს, დროულად მოხერხდეს საქმის განხილვა. კიდევ ერთი რეკომენდაცია აღკვეთი ღონისძიების შეფარდებას ეხება:

„აღკვეთის ღონისძიების სახით გირაოს გამოყენებისას განიხილონ ბრალდებულის ან/და სხვა პირის ქონებრივი შესაძლებლობის საკითხი, რათა გირაოს გადაუხდელობის გამო ბრალდებულის მიმართ უფრო მკაცრი აღკვეთის ღონისძიება − პატიმრობა არ იქნეს გამოყენებული“

პროკურატურის და შინაგან საქმეთა სამინისტროს პარლამენტი ვიდეო სათვალთვალო კამერებზე აძლევს მითითებას.

რეკომენდაცია პროკურატურას: „უმოკლეს ვადებში ამოიღოს სრული ვიდეომასალა, რომელიც შესაძლებელია ასახავდეს სავარაუდო დანაშაულთან დაკავშირებულ ფაქტებს, მათ შორის, პენიტენციური დაწესებულების ვიდეოკამერების ჩანაწერები“

რეკომენდაცია შინაგა საქმეთა სამინისტროს: „მიიღოს ყველა საჭირო ზომა პოლიციის თანამშრომელთა მიერ წამების, არაადამიანური ან დამამცირებელი მოპყრობის, აგრეთვე ადამიანის უფლებათა დარღვევის თავიდან ასაცილებლად, მათ შორის, სათანადო სწავლების, ანგარიშვალდებულების გაზრდის და მკაცრი ზედამხედველობის მეშვეობით“, „შინაგან საქმეთა სამინისტროს პოლიციის ყველა სამმართველოს შენობაში დაამონტაჟოს სათვალთვალო კამერები“.

გენდერული საკითხებზე ამახვილებს ყურადღებას პარლამენტი მუნიციპალიტეტებთან მიმართებით:

„მუნიციპალიტეტის ბიუჯეტის შედგენისას განსაკუთრებული ყურადღება მიაქციონ გენდერული თანასწორობის საკითხების გათვალისწინებას და ქალთა უფლებრივი მდგომარეობის გაუმჯობესებაზე ორიენტირებული მიზნობრივი პროგრამების განხორციელებას, მათ შორის, მარტოხელა მშობლებისთვის, მრავალშვილიანი ოჯახებისთვის და ოჯახში ძალადობის მსხვერპლთათვის“.

პარლამენტი რეკომენდაციას აძლევს საზოგადოებრივ მაუწყებელსაც:

„გაიაზროს ქალთა უფლებების და გენდერული თანასწორობის საკითხების მნიშვნელობა და გადაცემების დაგეგმვისას თავიდან აიცილოს სექსისტური და დისკრიმინაციული შინაარსის შემცველი კონტექსტები.“

ზღვის პირას, აკვაპარკის მიმდებარედ მიწა კომპანია „დარ ბილდინგმა“ შეიძინა. წინასწარ განსაზღვრული პირობების მიხედვით, კომპანიამ აქ მრავალპროფილიანი შენობა უნდა ააგოს.

აუქციონი 12 971 კვადრატული მეტრის გასხვისებაზე აჭარის ფინანსთა და ეკონომიკის სამინისტროს ჰქონდა გამოცხადებული. აუქციონის დასრულებამდე „ერთიანი ნაციონალური მოძრაობა“ აცხადებდა, რომ მიწა შეუსაბამოდ დაბალ ფასად იყიდებოდა და საქმე კორუფციასთან გვაქვს. პარტიაში ეჭვობდნენ, რომ ამ მიწას აჭარის მთავრობის თავმჯდომარის მეგობარი ბიზნესმენი შეიძენდა.

აკვაპარკთან მდებარე მიწის ნაკვეთის საწყისი ფასი 4 მილიონ 100 ათასი ლარი იყო. ქონება კომპანია „დარ ბილდინგმა“ 5 მილიონ 822 ათას ლარად შეიძინა.

კომპანია „დარ ბილდინგის“ მიმართ ინტერესი საზოგადოებაში მას შემდეგ გაიზარდა, როცა ამ კომპანიამ ბარათაშვილის 24-ში მდებარე ისტორიული სახლი უნებართვოდ დაანგრია. ბათუმის მერიასა და კომპანიას შორის სასამართლო დავა ამ დრომდე გრძელდება.

საჯარო რეესტრის მონაცემებით, კომპანია „დარ ბილდინგი“ ბიზნესმენ რევაზ დარჩიძეს ეკუთვნის.

რატომ ვერ წარმოადგინა თურქეთის მხარემ მტკიცებულებები, რაც დაარწმუნებდა საზოგადოებას, რომ მუსტაფა ემრე ჩაბუქი ტერორისტული ორგანიზაციის წევრია? – შეკითხვა „ბათუმელებმა“ თურქეთის კონსულს ბათუმში, იასინ თემიზქანს დაუსვა. ჩაბუქი დემირელის სახელობის კოლეჯის დირექტორი იყო. ის 24 მაისს დააკავეს. ზუსტად ერთი დღით ადრე კი საქართველოში თურქეთის მთავრობის ვიზიტი შედგა.

„არანაირი საშიშროება არ არსებობს, ჩაბუქი წარსდგეს თურქეთში სასამართლოს წინაშე, ამაში არაფერი საშიში არ არის. თუკი ის თვლის, რომ უდანაშაულოა, უნდა წარსდგეს თურქეთის სასამართლოს წინაშე და დაამტკიცოს საკუთარი უდანაშაულობა. საერთაშორისო ორგანიზაციები თვალყურს ადევნებენ ამ პროცესს. ყველაფერი ღია და გამჭვირვალეა“.

თურქეთის კოსულს შევახსენეთ, რომ მტკიცების ტვირთი აქვს ბრალდების მხარეს, ანუ სახელმწიფოს და არა ბრალდებულს. სახელმწიფომ კი ვერ წარმოადგინა მტკიცებულებები, რაც დაარწმუნებდა საზოგადოებას ჩაბუქის ბრალეულობაში. საზოგადოებამ საპროტესტო აქციები ჩაბუქის გასათავისუფლებლად თბილისშიც გამართა.

თურქეთის კონსულმა იასინ თემიზქანმა ამ კითხვაზე პრაქტიკულად ნათქვამი გაიმეორა: „როგორც გითხარით, ჩვენ გვსურს, რომ ეს ადამიანი გასამართლდეს თურქეთში, წარსდგეს სასამართლოს წინაშე და წარმოადგინოს მტკიცებულება, რაც დაადასტურებს მის უდანაშაულობას. თურქეთის საელჩო მართვას კონსულტაციებს შესაბამის უწყებებთან.“

ამავე თემაზე:

“ეს არის სპეკულაციური შეკითხვა”, – თურქეთის ელჩი მუსტაფა ჩაბუქის შესაძლო არგადაცემის შედეგებზე

კურორტ ბეშუმში დღეს, 15 ივლისს, სეზონი ოფიციალურად გაიხსნა. ბეშუმის ადმინისტრაციის დირექტორის, ვაჟა ბოლქვაძის ინფორმაციით, ამ დროისთვის ადგილზე მობილიზებულია როგორც სასწრაფო-სამაშველო ბრიგადები, ასევე სამედიცინო მომსახურების ცენტრები.

„გაიხსნა სუპერმარკეტები, ასევე კვების სხვა ობიექტებიც. 43 სახლში დამსვენებელი უკვე ამოვიდა. კოტეჯებში დამსვენებელთა რაოდენობა ჯერჯერობით ნაკლებია. ვფიქრობთ, 20 ივლისიდან მოიმატებს დამსვენებელთა რიცხვი. მოქალაქეები აქტიურად გვიკავშირდებიან, კითხულობენ რა მდგომარეობაა კურორტზე, გამართულია თუ არა ინფრასტრუქტურა, არის თუ არა წყალი და შუქი, წყლის და ელექტროენერგიის მიწოდებაში პრობლემა არ არის,“ – ამბობს ვაჟა ბოლქვაძე.

14 ივლისს აჭარის ჯანმრთელობისა და სოციალური დაცვის სამინისტროში პერინატალური სამსახურების რეგიონალიზაციის პროცესში ჩართული სამშობიაროების მუშაობის ანალიტიკური მიმოხილვის პრეზენტაცია შედგა.

როგორც აღინიშნა, პერინატალური სამსახურების რეგიონალიზაცია სამედიცინო მომსახურების ხარისხის გაუმჯობესებაზე ორიენტირებული სისტემური რეფორმაა, რომლის მიზანი დედათა და ბავშვთა ჯანმრთელობის გაუმჯობესება და შესაბამისად, ავადობისა და სიკვდილიანობის მაჩვენებლის შემცირებაა. პროექტის ფარგლებში სამედიცინო დაწესებულებებს, რომლებიც დედათა და ჩვილ ბავშვთა ჯანმრთელობასთან დაკავშირებულ სამედიცინო სერვისებს სთავაზობენ პაციენტებს, დონეები ენიჭებათ. ყველაზე მაღალია, მესამე დონე.

პრეზენტაციას საქართველოს შრომის, ჯანმრთელობისა და სოციალური დაცვის მინისტრის მოადგილის მრჩეველი ეკა ფესტვენიძე წარმართავდა.

ყველაზე მაღალი, მესამე დონის დამადასტურებელი სერტიფიკატი გადაეცა – ირის ბორჩაშვილის სახელობის ჯანმრთელობის ცენტრ „მედინას“ და ბათუმის საერთაშორისო ჰოსპიტალს.

მეორე დონის კლინიკის დამადასტურებელი სერტიფიკატი მიიღეს შემდეგმა კლინიკებმა: ბათუმის სამშობიარო სახლი, საზღვაო ჰოსპიტალი, შპს მედალფა ოზურგეთი. ხოლო ბათუმის დედათა და ბავშვთა ცენტრმა, შერეული, მეორე-მესამე დონის სერტიფიკატი.

პირველი დონის სერტიფიკატი გადასცეს: ქობულეთის, შუახევის, დაბა ხულოს და ქედის „უნიმედი აჭარას“ ფილიალებს.

ანალიტიკური მიმოხილვა 2017 წლის 1 იანვრიდან 2017 წლის 30 მაისის ჩათვლით, სამშობიაროებიდან მოპოვებულ ინფორმაციაზე დაყრდნობით განხორციელდა.

„დღეს წარვადგენთ აჭარისა და გურიის მონიტორინგის შედეგებს. ჯამურად ამ ორ რეგიონში არის ათი დაწესებულება, აჭარის  რეგიონში წარმოდგენილია მთელი სპექტრი დონეების, ასევე შერეული დონეების დაწესებულებაც, გურიის პერინატალური სერვისის მიმწოდებელი მხოლოდ ერთი დაწესებულებაა, რომელსაც მეორე დონე მიენიჭა“  – განაცხადა ეკა ფესტვენიძემ.

მან ასევე აღნიშნა, რომ  რეგიონალიზაციის პროცესი არ სრულდება დონის მინიჭებით და სამინისტრო მონიტორიგს გაუწევს, რამდენად შესაბამისად მუშაობენ დაწესებულებები დონის მინიჭების შემდეგ და რამდენად ინარჩუნებენ სამედიცინო მომსახურების ხარისხს.

მისივე თქმით, მშობიარობის დიდი წილი მოდის მეორე დონის დაწესებულებაზე, ეს არის საერთო მაჩვენებლის 53 %, რაც ლოგიკურია:

„წესით, მეორე დონის კლინიკები არიან წამყვანი სერვისების მიმწოდებლები“ – განაცხადა მან.

ეკა ფესტვენიძე საკეისრო კვეთების თემასაც შეეხო:

„საქართველოში ძალიან მაღალია საკეისრო კვეთის მაჩვენებელი და ჯანდაცვის სამინისტროს სტრატეგია არის მიმართული იმისკენ რომ მნიშვნელოვნად შემცირდეს საკეისრო კვეთის მაჩვენებელი. ამ მხრივ გურიას ნორმალური მაჩვენებელი აქვს, რასაც ვერ ვიტყვით აჭარის რეგიონზე, იმიტომ რომ საკეისრო კვეთები შეინიშნება პირველი დონის კლინკებში, რომლებსაც გეგმიური საკეისრო კვეთა საერთოდაც არ უნდა ჰქონდეთ, დანარჩენ კლინიკებს კი ძალიან მაღალი მაჩვენებელი აქვს. ყველა კლინიკა ფაქტიურად მნიშვნელოვნად სცილდება რეკომენდრებულ ნორმებს. პირველი დონის კლინიკებში მონაცემებზე დაყრდნობით ყველა საკეისრო კვეთა იყო ურგენტული, ბათუმის საზღვაო ჰოსპიტალში – 79%, ანუ 333  მშობიარობა ურგენტული იყო, რაც ცოტა არარეალისტურია და გარკვეულ კითხვებს ბადებს, ანალოგიურად ბათუმის  სამშობიარო სახლშიც და მედინაშიც, თუმცა „მედინა“ მესამე დონის კლინიკა არის და შესაძლებელია ამით აიხსნებოდეს“.

პრეზენტაციაზე სიტყვით ჯანმრთელობის დაცვის დეპარტამენტის უფროსი მარინა დარეხველიძეც გამოვიდა:

„2018 წლის 1 იანვრიდან იწყება, თუმცა სრულიად ძალაში შევა 2018 წლის პირველი მაისიდან სანებართო პირობების ახალი სისტემა, რაც იმას ნიშნავს, რომ დაწესებულება რომელსაც არ ექნება რომელიმე დონე, ვერ იფუნქციონირებს და ვერ განახორციელებს ვერც სამეანო და ვერც ნეონატალურ საქმიანობას. შემდგომში ჩვენ ვგეგმავთ ანალოგიურად განავითაროთ სხვა სერვისების პირობებიც“.

პერინატალური სამსახურების რეგიონალიზაციის პროექტის განხორციელება პილოტის სახით 2015 წელს დაიწყო იმერეთის და რაჭა-ლეჩხუმ-ქვემო სვანეთის რეგიონების პერინატალურ დაწესებულებებში, აშშ-ის მთავრობის მხარდაჭერით. 2015 წლის ოქტომბრიდან პროექტი გავრცელდა „Rotary Clubs“-ის, გაეროს ბავშვთა ფონდის, გაეროს მოსახლეობის ფონდის და „World Visoin“- საქართველოს მხარდაჭერით და პროექტში ჩაერთო თბილისი, ქვემო ქართლის, აჭარის, გურიის, სამეგრელო-ზემო სვანეთის, მცხეთა-მთიანეთის, შიდა ქართლის, კახეთისა და სამცხე-ჯავახეთის რეგიონები.

აღნიშნული პროექტის ფარგლებში ქვეყნის მასშტაბით სულ შეფასდა 107 სამეანო სერვისის მიმწოდებელი დაწესებულება, მათ შორის აჭარაში, გურიასა და სამეგრელო-ზემო სვანეთის რეგიონში – 25.

პრეზენტაციას აჭარის ჯანმრთელობისა და სოციალური დაცვის მინისტრი ზაალ მიქელაძე, საქართველოს შრომის, ჯანმრთელობისა და სოციალური დაცვის მინისტრის მოადგილე ნინო ბერძული, გაეროს ბავშვთა ფონდის ჯანდაცვის სპეციალისტი თამარ უგულავა და აჭარის რეგიონის მასშტაბით სხვადასხვა სამედიცინო დაწესებულებების წარმომადგენლები ესწრებოდნენ.

___________________

ამავე თემაზე:

 საავადმყოფოები დონეების მიხედვით – რა უნდა იცოდეს ორსულმა

დღეს, 14 ივლისს, სრულდება განაცხადების მიღება „მასწავლებლის ეროვნულ ჯილდოზე“, რომელიც წელს პირველად გამოცხადდა საქართველოში. მასწავლებლის ეროვნული ჯილდოს სამუშაო ჯგუფის ინფორმაციით, ამ დროისთვის უკვე 700-ზე მეტმა  პედაგოგმა გააკეთა განაცხადი.

კონკურსის მეორე ეტაპი ითვალისწინებს ათი საუკეთესო კანდიდატის შერჩევას და მათ ინტერვიურებას, რომელიც პირველი ეტაპის დასრულების შემდეგ დაიწყება.

მესამე ეტაპზე კი 5 საუკეთესო ფინალისტი შეირჩევა, ხოლო აქედან ერთი მასწავლებლის საერთაშორისო კონკურსში მიიღებს მონაწილეობას.

მასწავლებლის საერთაშორისო ჯილდოთი ის  პედაგოგები დაჯილდოვდებიან,  ვინც კრეატიულობით, განსხვავებული, წარმატებული სწავლის მეთოდებით გამოირჩევიან.

ფინალისტს გადაეცემა ფულადი პრიზი 10 ათასი ლარის ოდენობით.

მასწავლებლის ეროვნული ჯილდო კოალიცია „განათლება ყველასათვის – საქართველო“ და მასწავლებლის პროფესიული განვითარების ეროვნული ცენტრის მიერ დაწესდა, რომელიც წარმატებულ პედაგოგს წელიწადში ერთხელ გადაეცემა.

საქართველოში ევროკავშირის ელჩის იანოშ ჰერმანის განცხადებით, საქართველო გრანტის სახით ევროკავშირისგან 25 მილიონს მიიღებს. „300 მილიონი ლარი გამოდის ყოველწლიურად და 35 ევრო ერთ სულ მოსახლეზე. რაც ბევრად ნაკლებია რასაც ევროკავშირი ბალკანეთის რეგიონის ქვეყნებისთვის გამოყოფს.

„რა არის ჩვენი მიზანი? მიზანია ამით მხარი დავუჭიროთ ასოცირების ხელშეკრულების რეალიზაციას. დავეხმაროთ საქართველოს თავისუფალი ვაჭრობის რეალურ წარმატებაში, შევიტანოთ წვლილი ტრანსფორმაციის საკითხებში ტრანსოირმაფის საკითხებში“-ამბობს ის.

საქართველოში ევროკავშირის ელჩის თქმით, ევროკავშირი საქრთველოში ახალი სფეროებს განვთარებას უწყობს ხელს, ასევე ენერგოეფექტურობას.

„უნდა განვსაზღვროთ პრიორიტეტები. ჩვენთვის მნიშვნეოვანია სასამართლო რეფორმა, საჯარო ადმინისტრირება, სოფლის მეურნეობა და გვინდა რომ ეს ყველაფერი დავუახლოვოთ სამოქალაქო ინტერესებს. მოსახლეობამ უნდა იცოდეს ამ ხელშეწყობის შესახებ რომ გაიზარდოს მისი ზეგავლენა.

ასევე მნიშვნელოვანია გარემოს დაცვის თემა და საკანონმდებლო საკითხების მოგვარება ამ მიმართულებით“.

აღმოსავლეთ პარტნიორობის საკითხებზე მოსაზრება გამოთქვა საქართველოს სახელმწიფო მინისტრმა ევროინტეგრაციის საკითხებში ვიქტორ დოლიძემ. მისი თქმით, დღეს საქართველო ფოკუსირებას ახდენს იმ გამოწვევებზე, რომელიც რომელიც საქართველოს წინაშე დგას.

„ასოცირების ნაწილში ჩვენთვის მნიშვნელოვანია თავისუფალი ვაჭრობის ხელშეკრულება, რომლის საბოლოო პროექტი ძალიან მალე დაიდება.  ენერგო ეფექტურობის მიმართულებით საქართველო 400-450 მილიონი ევროს დახმარებას მიიღებს ევროკავშირისგან სამი წლის განმავლობაში რაც ძალიან მნიშვნელოვანია“.

ვიქტორ დოლიძის თქმით, აქცენტი კეთდება სამ ძირითად საკითხზე, ეს არის ევროკავშირის პოლიტიკური მხარდაჭერა, უფრო მეტი ინსტრუმენტის გამოყენება თანამშრომლობის სფეროების გასაღრმავებლად და თანამშრომლობის გაღრმავება უსაფრთხოების სფეროში.

„ჩვენ ვემზადებით აღმოსავლეთ პარტნიორობის სამიტისთვის, რომელიც გაიმართება ნოემბერში და ვფიქრობ რომ სამიტის შედეგები იქნება იმედის მომცემი საქართველოსთვის“-ამბობს ვიქტორ დოლიძე.

საერთაშორისო კონფერენციაზე „საქართველოს ევროპული გზა“ მიგრაციის გამოწვევებზე საუბრობენ.  შეხვედრას ესწრება საქართველოს იუსტიციის მინისტრი თეა წულუკიანიც. მისი განცხადებით საქართველომ მიგრაციასთან დაკავშირებით ახალი სტრატეგია შეიმუშავა, რომელიც მისცემს ქვეყანას შესაძლებლობას, ეფექტურად მართოს ეს პროცესები.

მიგრაციის საკითხებზე მოსაზრება გამოთქვა თურქეთის წარმომადგენელმა. მისი თქმით, თურქეთში ასევე მწვავედ დგას მიგრანტების თემა და ჯერ კიდევ არსებობს პროლემები ამ მიმართულებით, რადგან ადამიანებს ეშინიათ სხვა კულტურების.

„სირიის ომის შემდეგ თურქეთმა სამი მილიონი დევნილი მიიღო. ძირითადად ეს მიგრანტები მუსლიმები არიან, მაგრამ მიიღებდა კი თურქეთი ამდენ მიგრანტს, ისინი ქრისტიანები რომ ყოფილიყვნენ? ჩვენ უნდა დავძლიოთ აღნიშნული გამოწვევები,“-განაცხადა მან.

მისი აზრით, მიგრანტების უმრავლესობას სურს თავის ქვეყანაში დაბრუნება, მაგრამ  სხვა საკითხია მათი უსაფრთხოება. „რადგან ეს საკითხი არ არის ნათელი, ამიტომ მიგრანტები ალბათ დიდი ხნით დარჩებიან თურქეთში, მაგრამ მეორე საკითხია დარჩებიან კი ისინი სირიელებად, არაბებად თუ მოხდება მათი თურქიზაცია?“

მომხსენებელმა ასევე ისაუბრა თურქეთსა და ევროკავშირს შორის ურთიერთობაზე. მისი თქმით, სირიის ომის შემდეგ, თურქეთმა შეაჩერა მიგრანტთა გადინება ევროკავშირის ქვეყნებში, „ამ პროცესმა გარკველწილად აღადგინა ნდობა ჩვენ შორის“.

მან ასევე ისაუბრა იმაზე, რომ მიგრაციასაც აქვს თავსი დადებითი მხარეები და ამ პროცესისგანაც შეიძლება სარგებლის მიღება.  „ჩვენ ჯერ კიდევ ოტომანთა პერიოდიდან დაგვიგროვდა გამოცდილება, თუ როგორ შეიძლება ქვეყნის კულტურის გამდიდრება მიგრანტებით,“-განაცხადა მან.

ელიზაბეთ ფილესბერგერი, ავსტრიის საგარეო ინტეგრაციისა და ევროპის ფედერალური სამინისტროს იურიდიული და საკონსულო დეპარტამენტის გენერალური დირექტორის თქმით, დღეს ავსტრიის გავლით მილიარდი ადამიანი გადაადგილდება ევროპაში. მიგრაციის მიზეზები სხვადასხვაა, არის როგორც რელიგიური, ასევე კონფლიქტები, ომები და ა.შ.

„მზარდი მიგრაცია აისახება გადასახადების გადამხდელებზეც, რადგან გადასახადების დიდი ნაწილი მიგრანტების შენახვაზე იხარჯება. ბოლო წლებში ავსტრიაში თავშესაფარი ასი ათასზე მეტმა ადამიანმა ითხოვა“.

მისი განცხადებით, დღეს მიგრაციის თემა ბევრისთვის შემოსავლის წყარო გახდა, რადგან ძალიან ბევრი ადამიანი სწორედ კონტრაბანდისტების მეშვეობით ხვდება ევროპაში.

„აღნიშნული სქემები იხვეწება, მათ გააჩნიათ დრონები, იციან პოლიციის გადააგილების სქემა, იყენებენ მზაკვრულ სქემებს. როცა ძალიან ბევრი მიგრანტი აღმოჩნდება ევროპაში, ქვეყნები ვერ უმკლავდებიან ამ პროცესს და მიგრანტებს ეუფლებათ იმედგაცრუება,“-ამბობს ის. მისი თქმით, წარმომშობი ქვეყნები არაფერს აკეთებენ მიგრანტების უკან დასაბრუნებლად, რადგან ეს მათთვი არის ერთგვარი ფულის წყარო, – მიგრანტები ფულად გადარიცხვებს ზრდიან მათ ქვეყნებში.

„ეს ხელს უწყობს ასევე იმას, რომ დიქტატორული რეჟიმები დარჩნენ ხელისუფლებაში. ამიტომ გლობალური შეთანხმებაა საჭირო ამ პრობლემების დასაძლევად. ასევე საჭიროა ქსენოფობიასთან ბრძოლა და პასუხისმგებლობის გაზრდა ამ საკითხებზე ისეთი ქვეყნების მხრიდან, როგორიცაა რუსეთი და ჩინეთი“.

მარტაინ პლაიმი, მიგრაციის პოლიტიკის განვითარების საერთაშორისო ცენტრის მიგრაციის დიალოგებისა და თანამშრომლობის დირექტორი, საუბრობს საქართველოს პერსპექტივებზე.

„საქართველო პატარა ქვეყანაა, 4 მილიონი მოსახლეობით და თუ გაეროს მონაცემებს დავეყრდნობით, 20 წლის შემდეგ კიდევ უფრო შემცირდება მოსახლეობა.  ამიტომ ამ ქვეყანასთან უნდა ვიმუშაოთ განათლების მიმართულებით, რომ მათ შეძლონ კონკურენციის გაწევა და ისწავლონ კრიზისებთან გამკლავება.  ასევე, კლიმატის პრობლემების დაძლევაზე, რადგან ამ ქვეყანაში არსებობს ამ მხრივ გამოწვევები“.

დღევანდელ კონფერენციაზე ასევე ისაუბრებენ  ევროკავშირის მხრიდან საქართველოს დახმარებასა და თანამშრომლობაზე.

დღეს, 14 ივლისს, პედაგოგები და პედაგოგობის მსურველები, საგნობრივ გამოცდებს აბარებენ  მათემატიკაში [I-VI], ქართულ ენასა და ლიტერატურაში [VII-XII], სამოქალაქო განათლებასა და ფიზიკაში.

შეფასებისა და გამოცდების ეროვნული ცენტრის მონაცემებით, პედაგოგთა კომპეტენციის განმსაზღვრელ გამოცდებზე ქვეყნის მასშტაბით დარეგისტრირებული აპლიკანტების თითქმის 28% არ გამოცხადებულა.

პედაგოგთა გამოცდები აჭარაში ორ – ბათუმისა და ხულოს საგამოცდო ცენტრში ტარდება.

ხულოს საგამოცდო ცენტრის უფროსის, დავით  კუპატაძის ინფორმაციით, „პედაგოგთა გამოცდები ხულოში მშვიდ ვითარებაში მიმდინარეობს. რაც შეეხება გამოცხადებას, დღეს 83 აპლიკანტიდან 58 გამოცხადდა, ხოლო გუშინ 121 აპლიკანტიდან – 73“.

გამოცდების ეროვნული ცენტრის მონაცემებით, პედაგოგთა გამოცდაზე ბათუმის საგამოცდო ცენტრში დარეგისტრირებული 520 აპლიკანტიდან 73% – ზე მეტი გამოცხადდა.

პედაგოგთა კომპეტენციის განმსაზღვრელი გამოცდები გუშინ, 13 ივლისს დაიწყო და 24 ივლისს დასრულდება.

საერთაშორისო კონფერენციაზე – „საქართველოს ევროპული გზა“ პირველ პანელზე განსახილველი თემა იყო აღმოსავლეთ პარტნიორებს შორის ახალი პერსპექტივები და შესაძლებლობები. ასევე, 2017 წლის სამიტი ევროკავშირსა და ასოცირებულ პარტნიორებს შორის თანამშრომლობის გაუმჯობესება. შეხვედრაზე დაისვა კითხვები, როგორც აღმოსავლეთ პარტნიორობის პერსპექტივებზე, ასევე ევროკავშირთან დაახლოებაზეც.

ლორ დელკურმა, რომელიც პროექტ EU-STRAT-ის მკვლევარია და ჰუმანიტარულ მეცნიერებათა ფონდს წარმოადგენს,  ისაუბრა აღმოსავლეთ პარტნიორობის ქვეყნებისა და ევროკავშირს შორის დაახლოებაზე.

მისი თქმით,  ევროკავშირი აღმოსავლეთ პარტნიორობის სამ ქვეყანას დაახლოების ხანგრძლივ პროცესს სთავაზობს, რომელიც გრძელ დისტანციაზე სირბილს ჰგავს.

„ამჟამად არ არსებობს დამატებითი შეთავაზების საჭიროება, მეორე მხრივ კი, ვერ იქნება მდგრადი რეფორმების პროცესი განხორციელდეს, თუ არ ჩანს ჰორიზონტზე პერსპექტივა.  სწორედ ეს პერსპექტივა დაგვეხმარება დაახლოებაში,“ – ამბობს ის.

ლორ დელკურის აზრით, დღეს ევროკავშირი გზაგასაყარზე დგას.

„კრიტიკულმა მოვლენებმა – ემიგრანტთა კრიზისი, ბრექსიტი, კანონის უზენაესობის დარღვევის შემთხვევები, რაც მანამდე არ ხდებოდა ევროკავშირის ქვენებში და ა.შ. შესაძლოა ევროკავშირის მიმართ სოლიდარობა შეასუსტოს.

ევროკავშირმა  თვითონ უნდა გადაწყვიტოს, სად მიდის.  ევროკავშირის კარები უახლოეს მომავალში არ გაიღება, მაგრამ ის არ უნდა დარჩეს სამუდაოდ დახურული,“ – ამბობს ლორ დელკური.

„ნაციონალური მოძრაობის“ წევრმა გია ბარამიძემ გამოთქვა მოსაზრება, რომ ევროკავშირის მხრიდან სწრაფად უნდა მოხდეს აღმოსავლეთ პარტნიორობის ხელშეკრულების რეალიზაცია.

„ჩვენ ვთხოვთ ევროკავშირს, რომ მოხდეს ჩვენი სრულუფლებიან წევრად მიღება“, – ამბობს ის.

„რას გულისხმობს პარტნიორობა და რას არა? პასუხი არის განზრახ სიბნელეში შეფუთული“, – ნათქვამი იყო დისკუსიის დროს.

შეხვედრს დროს კითხვები იყო დასმული სომხეთის წარმომადგენლის მხრიდან, რომელიც ამბობდა, თუ რა შანსები აქვს სომხეთს, აზერბაიჯანსა და მოლდოვას ევროკავშირთან დაახლოების მხრივ.

ესტონეთის საგარეო საქმეთა სამინისტროს ელჩის აღმოსავლეთ პარტნიორობის ქვეყნებში იან რეინჰოლდის განმარტებით,  სომხეთის ხელისუფლების მხრიდან არსებობდა დადებითი სიგნალები სამიტთან დაკავშირებით: „ჩემი აზრით, დიალოგი კარგად შედგება, ბელორუსს რაც შეეხება, მისნკიდანაც მივიღეთ გზავნილები, რომ გავაღრმავოთ პარტნიორობა და ველით ნაბიჯებს აზერბაიჯანის მხრიდანაც“.

საერთაშორისო კონფერენციაზე „საქართველოს ევროპული გზა“, შეხვედრის მეორე ნაწილი დაეთმობა მიგრაციის საკითხებს, რომელიც ამ წუთებში მიმდინარეობს სასტუმრო „ჰილტონში“.

დღეს, 14 ივლისს, ბათუმში საერთაშორისო კონფერენცია „საქართველოს ევროპული გზა“ გრძელდება. დღეს განსახილველი თემებია სავიზო რეჟიმის ლიბერალიზაცია და ახალი პოლიტიკა-მიგრაციის მართვის მექანიზმები, მიგრაციის თანამედროვე გამოწვევები.

ვიქტორ დოლიძის განცხადებით, საქართველო აღმოსავლეთ პარტნიორობის სამიტზე საკუთარი პაკეტით წარსდგება. „იმ შეთანაზებებით, რომელიც გათვალისწინებული იქნა დოკუმენტში და საქართველოს წინადადებებიც მაქსიმალურად არის ასახული.

დღესაც ვისაუბრებთ კონკრეტულ პროგრამებზე, დახმარების ინსტრუმენტებზე და სააგენტოებთან ჩვენი უწყებების თანამშრომლობაზე. მე მექნება გამოსვლა დახმარებების პანელზე“.

ვიქტორ დოლიძის თქმით, მთავარია უფრო მეტი სიკეთე წამოვიღოთ ევროკავშირიდან. „მხედველობაში მაქვს განათლების პროგრამების დაფინანსება, ასევე, ინფრასტრუქტურული პროექტების განხორციელებაში ევროკავშირის დახმარება“.

მიგრაციის საკითხებზე დღეს მიგრაციის პოლიტიკის განვითარების საერთაშორისო ცენტრის მიგრაციის დიალოგებისა და თანამშრომლობის დირექტორი მარტაინ პლაიმი ისაუბრებს.

დღეს, 13 ივლისს, ბათუმში, სასტუმრო „ჰილტონში“ გამართულ კონფერენციაზე – „საქართველოს ევროპული გზა“,  საქართველო-ევროკავშირს შორის  თავისუფალი სავაჭრო ხელშეკრულების თაობაზე იმსჯელეს. ისაუბრეს იმაზე, თუ  რა მიღწევები აქვს საქართველოს ევროპასთან ასოცირების ხელშეკრულების ფარგლებში და რა გამოწვევების წინაშე დგას თავისუფალი სავაჭრო ურთიერთობების გზაზე.

საქართველოს პარლამენტის ევროპასთან ინტეგრაციის კომიტეტის თავმჯდომარის, თამარ ხულორდავას შეფასებით, საქართველო ცდილობს ეფექტურად და დროულად შეასრულოს ასოცირების შეთანხმებით გათვალისწინებული ვალდებულებები.

ეკონომიკის მინისტრის მოადგილის, გენადი არველაძის შეფასებით, ევროპის ბაზრის გახსნასთან არის დაკავშირებული ფიტოსანიტარულ სფეროში არსებული მიღწევები და ევროპული სტანდარტების დამკვიდრება.

„წარმატების მაჩვენებელია სამი მეტროლოგიური ინსტიტუტის აღიარება და ლაბორატორიები და აკრედიტაციის სფეროში მიღწეული წარმატებები. აუცილებლად აღსანიშნია ის, რომ ევროპული ბაზარი გაიხსნა ქართული თევზისა და ფათლისთვის,“-განაცხადა მან.

ევროპარლამენტის ევროპის სახალხო პარტიის ჯგუფის წევრის, ევროპა-სერბეთის სტაბილიზაციის დელეგაციისა და ასოციაციის კომიტეტის ხელმძღვანელის, ედუარდ კუკანის თქმით, სწორედ საქართველოს მონდომებაზეა დამოკიდებული, რომ მან მტრულად განწყობილი მეზობლების გარემოცვაში შეძლოს თავისი მიზნების მიღწევა და ამაში ევროპის პარლამენტი მზად არის, დაეხმაროს საქართველოს.

„ევროკავშირის გაფართოების საკითხი მნიშვნელოვანია, მაგრამ ჩვენი პარტნიორები უნდა იყვნენ სტაბილურები და ადექვატურები რჩევის მიცემის საკითხებში.

ჩვენ დიდ მნიშვნელობას ვანიჭებთ ეკონომიკურ განვითარებას, ენერგოუსაფრთხოებას, მობილურობას და ადამიანურ ურთიერთობებს. თუმცა, არ უნდა არსებობდეს ყალბი მოლოდინები, რომ ყველაფერი რბილად ჩაივლის, რეფორმებს, რომლებმა ეს ურთიერთობები უნდა გაამყაროს, დიდი დრო სჭირდება,“-განაცხადა ედუარდ კუკანმა.

მან ასევე ისაუბრა იმაზე,  რომ  არსებობს ევროკავშირის  272 დირექტივა, რომელიც ჯერ კიდევ საჭიროებს ჰარმონიზაციას. „მთავარია დავინახოთ  მეტი სარგებელი, ბიუროკრატია მცირე და საშუალო ბიზნესის დიდი მტერია. თავისუფალ სავაჭრო სივრცეს  ნათელი ენა, ნათელი წესები სჭირდება, ამ საკითხზე კი დებატები არ უნდა შეწყდეს,“-ამბობს ის.

ევროპის საგარეო ქმედებათა სამსახურის რუსეთის, აღმოსავლეთ პარტნიორობის, ცენტრალური აზიის, რეგიონალური თანამშრომლობის და ცენტრალური აზიის მმართველის დირექტორის მოადგილე ლუკ დევინის თქმით, ევროკავშირის ქვეყნები  პარტნიორი ქვეყნებისგან არ მოითხოვენ იმას, რაც მათ არ გაუკეთებიათ.

„ეს უნდა იყოს ნათლად გაცხადებული. ჩვენ დადებითად შევაფასეთ ოქტომბრის საპარლამენტო არჩევნები და ყურადღებით დავაკვირდებით თვითმმართველობის არჩევნებსაც, ასევე, კონსტიტუციის რეფორმას და ვენეციის კომისიის მითითებებსაც გავაანალიზებთ. პარტნიორობა უნდა იყოს ყოვლისმომცველი,“-ამბობს ის.

ლუკ დევინის თქმით, საქართველოს პროგრესი ევროპასთან სავაჭრო ურთიერთობებში პროგრესულია: „ 40 პროცენტით იყო გაზრდილი ვაჭრობა, ოქტომბრის შემდეგ, კი ეს მაჩვენებელი 80 პროცენტამდეა გაზრდილი. თუმცა საქართველოს მეტი აქვს გასაკეთებელი საკვების უსაფრთხოების მხრივ. სამიტი რომელიც მალე გაიმართება საქართველოში, ჩვენ ამ დეტალებზეც იქაც ვისაუბრებთ. ერთ ფრანგულ ციტატას მოვიყვან: „ ჩვენ არ ვქმნით კოალიციებს, ჩვენ ვაერთიანებთ ადამიანებს.“

კიდევ ერთი გამომსვლელის, ჩეხეთის რესპუბლიკის საგარეო საქმეთა მინისტრის მოადგილის,  იაკუბ დურის შეფასებით, გამოწვევების დაძლევის უნივერსალური გზები არსებობს და საქართველოს შეუძლია გამოიყენოს აღმოსავლეთ ევროპის ქვეყნების გამოცდილება მსგავსი გამოწვევების დასაძლევად. თავისუფალი სავაჭრო ურთიერთობა ეს არ არის ვარდისფერი გზა, ეს არის შრომა და დახმარება გამოწვევებზე“.

მისი თქმით, საქართველომ ასევე უნდა გაითვალისწინოს რუსეთის ბაზარი და აფხაზეთსა და სამხრეთ ოსეთში არსებული გამოწვევები, ასევე  ევროკავშირის კანონმდებლობასთან დაახლოება.

საერთაშორისო კონფერენცია „საქართველოს ევროპული გზა“, ხვვალ, 14 ივლისს დასრულდება.

„თუ არ აწვდი საზოგადოებას ინფორმაციას, რჩება სივრცე, რომელსაც სხვა აითვისებს აუცილებლად… მსოფლიოს ნებისმიერ ქვეყანაში შეიძლება განახორციელოს რუსეთმა პროპაგანდისტული ჩარევა,” – განაცხადა საქართველოს განათლების მინისტრმა, ალექსანდრე ჯეჯელავამ ბათუმის საერთაშორისო კონფერენციაზე, სადაც დღეს პროპაგანდის საფრთხეებზეც ისაუბრეს. ალექსანდრე ჯეჯელავა ამ პანელის ერთ-ერთი მომხსენებელია.

მისი განმარტებით, ხელისუფლებამ კარგად უნდა გაიაზროს საინფორმაციო საჭიროებები და ამის შესაბამისად განისაზღვროს სტრატეგიები. „ეს არა მხოლოდ დაუპირისპირდება დეზინფორმაციას, არამედ შეიქმნება ხარისხიანი ინფორმაცია”, – დასძინა ვიცე-პრემიერმა.

„აღიქვამთ, რომ ეს არის ომი მთავრობებს შორის? შესაძლოა რაღაცის წინააღმდეგ წასვლა არ იყოს ეფექტური,” –  მიმართა ალექსანდრე ჯეჯელავას პანელის მოდერატორმა, ნიკ გოუინგმა, საერთაშორისო მიმომხილველმა.

ვიცე-პრემიერმა აღნიშნა, რომ მსოფლიო ომს ამ პროცესში ვერ ხედავს, თუმცა მისი აზრით, ბრძოლა გავლენისთვის ნამდვილად არის.

რატომ არ იქმნება სპეციალური სტრუქტურა საქართველოს მთავრობაში, რომელიც რუსული პროპაგანდის წინააღმდეგ იმუშავებს? – ეს საკითხი სალომე სამადაშვილმა დასვა. ის პარლამენტის წევრია „ერთიანი ნაციონალური მოძრაობიდან”. „ასეთი სტრუქტურები ევროპის ქვეყნებში არსებობს. რუსეთმა უკვე მიაღწია წარმატებას, რადგან ჩვენ ვერ აღვიქვით საფრთხე”, – დაამატა სალომე სამადაშვილმა.

„ვერ მოვისმენ რჩევებს ადამიანისგან, ვისი ლიდერიც თავისუფალ ჟურნალისტიკას კლავდა ქვეყანაში,”- განაცხადა პასუხად ალექსანდრე ჯეჯელავამ.

მან ანალოგიური პათოსით უპასუხა პარლამენტარ სერგი კაპანაძესაც, რომელმაც ვიცე-პრემიერს შეახსენა სხვადასხვა სახელმწიფო ფონდიდან პროპაგანდისტული მედია საშუალებების წახალისება.

ქორწინება და მიწის უცხოელებზე გასხვისების აკრძალვა – კონსტიტუციაში ამ საკითხების შეტანაზე ყურადღება გაამახვილა თამარ კინწურაშვილმა, „მედიის განვითარების ფონდის” ხელმძღვანელმა. მისი თქმით, მთავრობა ერთის მხრივ, რუსული პროპაგანის მხარდაჭერას უარყოფს და მეორეს მხრივ, პრორუსული პროპაგანდის გათვალისწინებას ახდენს ქვეყნის მთავარ კანონში.

თამარ კინწურაშვილს ალექსანდრე ჯეჯელავამ უპასუხა, რომ „ეს საკითხები მიიღო საქართველოს მოსახლეობამ და არა რუსეთის მოსახლეობამ”.

„ჩვენ ინფორმაციული მართვის ფაზაში ვართ ახლა. რუსეთს სჯერა, რომ დასავლეთიც ახორციელებს მასზე საინფორმაციო შეტევას,” – აღნიშნა პანელის მონაწილე ბრაიან ვითმორიმ. იგი რადიო „თავისუფლების” უფროსი ანალიტიკოსია რუსეთის საკითხებში. მან ისაუბრა ტრადიციული ჟურნალისტიკის სირთულეებზეც ისაუბრა:

„ბალანსის ფეტიშიზაცია ხდება და ამას სჭირდება დაფიქრება. ძალიან ბევრი ნაგავია დღეს საინფორმაციო ველზე. რა უნდა ქნას ჟურნალისტმა, ნახევარი სიმართლე თქვას?!”

პანელის მონაწილეებმა თქვეს ისიც, რომ ევროპამ აქამდე ცალსახად საფრთხედ ვერ აღიქვა რუსული პროპაგანდის გავლენა და ის, რომ ეს არ ეხება მხოლოდ საქართველოს, ან უკრაინას.

მეათე დღეა სამაშველო სამსახური ზღვაში დაკარგულ კობა ბაკურიძეს ეძებს. თვითმხილველებისა და ოჯახის წევრების თქმით, ის 3 ივლისს ბათუმში, ანბანის კოშკის მიმდებარე ტერიტორიაზე შენიშნეს, თუმცა საღამოს შვიდი საათის შემდეგ მისი კვალი დაიკარგა.

დღეს, 13 ივლისს, სამაშველო სამსახურის ინფორმაციით, ზღვაში მიმდინარე სამაშველო-საძებრო სამუშაოებს საზღვაო ადმინისტრაციის კატარღა და სასაზღვრო პოლიციის ვერტმფრენიც დაემატა, რომელიც ზედაპირულ დათვალიერებას აწარმოებს.

„როგორც ექსპერტები ამბობენ, ზღვაში დაღუპვის შემთხვევაში მე-9-10 დღეს ზღვამ დაღუპულის სხეული უნდა გამორიყოს. დღეს მე-10 დღე ემთხვევა. თუ ამან არ მოგვცა შედეგი, საჭირო იქნება სხვა დამატებითი ღონისძიებების ჩატარება, რაც გამოიხატება იმაში, რომ სპეციაულური აღჭურვილობით გემს მოვიწვევთ,“ – ამბობს კობა ბაკურიძის ძმა, თამაზ ბაკურიძე.

თამაზ ბაკურიძემ ძმის გაუჩინარების თაობაზე აჭარისა და ცენტრალურ მთავრობასაც მიმართა თურქეთიდან ან უკრაინიდან სპეციალური მცურავი საშუალების გამოგზავნასთან დაკავშირებით:

„ვინაიდან საქართველოს შინაგან საქმეთა სამინისტროს სამაშველო სამსახურებს არ აქვს შესაბამისი ტექნიკური აღჭურვილობა, რათა ზღვის სიღრმეში 15 მეტრზე ტექნიკური დათვალიერება მოხდეს, ამიტომ საჭიროა ამ ზომებს მივმართოთ. გუშინ საღამოს თურქეთის სახელმწიფოს წარმომადგენელი დამიკავშირდა, მან მზადყოფნა განაცხადა საჭიროების შემთხვევაში შესაბამისი დახმარების გასაწევად, თუმცა ჩვენ ჯერ არ გვაქვს გადაწყვეტილი პასუხი, ველოდებით დღევანდელ დღეს. თუ არ იქნება შედეგი, ამ კუთხითაც ვიმუშავებთ,“ – ამბობს თამაზ ბაკურიძე.

ბათუმში მე-14 საერთაშორისო კონფერენცია – „ევროპული გზა” მიმდინარეობს.  დისკუსიის ნაწილში შეკითხვა გიორგი ბარამიძემ დასვა, ევროინტეგრაციის ყოფილმა მინისტრმა. მან რუსეთის ოკუპაციის მიმართ ერთიანი ხედვის არარსებობაზე გააკეთა აქცენტი და იკითხა: „უკრაინის ოკუპაცია ოკუპაციაა და საქართველოს არა?”

„რუსეთი საქართველოს ოკუპაციას ახორციელებს 2008 წლიდან… სამწუხაროდ, იმ პერიოდში საერთაშორისო საზოგადოებას არ დაუწესებია სანქციები რუსეთისთვის მისი ქმედებების გამო, ასევე, სამწუხაროდ, ჩვენმა მთავრობამ იმ მომენტში ვერ შეძლო საერთაშორისო მხარდაჭერის მობილიზება, რათა ასეთი გამოხმაურება მიეღო,” –  უპასუხა შეკითხვას მიხეილ ჯანელიძემ, საქართველოს საგარეო საქმეთა მინისტრმა. მან ასევე აღნიშნა, რომ ძალისხმევას არ დაიშურებს, რომ საერთაშორისო დღის წესრიგში საქართველის ოკუპაციის საკითხს ჰქონდეს მაღალი ინტერესი. „ჩვენ გვაქვს უპრეცედენტო მხარდაჭერა ევროკავშირთან თანამშრომლობის ფორმატის ფარგლებში,” –  დასძინა მან.

„რატომ ხდება ისე, რომ მას შემდეგ, რაც საქართველოს ელექტროენერგიის ექსპორტიორი გახდა,  ელექტროენერგიის იმპორტირება ისევ გვიწევს?”- ეს შეკითხვა გიორგი ბარამიძემ უშუალოდ საქართველოს ენერგეტიკის მინისტრს დაუსვა.

„მარტივად აგიხსნით,“ – უპასუხა ოპოზიციონერ პოლიტიკოსს ილია ელოშვილმა, ენერგეტიკის მინისტრმა.  „ელექტროენერგია უნიკალური პროდუქტია, მისი შენახვა და დასაწყობება შეუძლებელია. როცა გაქვს ჭარბი ენერგია, ის უნდა გაიტანო. ზამთარში ისევ დეფიციტია, რაც ნომერ პირველი პრობლემაა ჩვენთვის. ეს უფრო მეტად საშიშია, ვიდრე გაზის მიწოდებაზე დამოკიდებულება. ელექტროენერგიის მცირე დეფიციტმაც კი შესაძლოა მოსახლეობას გაახსენოს 90-იანი წლები,” – აღნიშნა ილია ელოშვილმა.

ამჟამად კონფერენციაზე აგრესიული პროპაგანდის საკითხები განიხილება. ერთ-ერთი მომხსენებელი ალექსანდრე ჯეჯელავაა, რომელიც მთავრობაში საზოგადოებასთან ურთიერთობის საკითხს კურირებს.

შესწორება: თავდაპირველად მასალაში გამოქვეყნებული იყო მინისტრ ჯანელიძის ციტატა შემდეგი ფორმულირებით – „ამ ეტაპზე ჩვენმა მთავრობამ ვერ მოახერხა საერთაშორისო მხარდაჭერის ორგანიზება“. „ბათუმელებმა“ მინისტრის ინგლისურენოვანი გამოსვლა კონფერენციაზე სინქრონულ თარგმანში, ქართულ ენაზე მოისმინა, რომლის მიხედვითაც, მინისტრის ფრაზაში ნახსენები „ეტაპი“ დღევანდელობას მიემართებოდა, თუმცა მასალის გამოქვეყნების შემდეგ „ბათუმელებს“ საგარეო საქმეთა სამინისტროს პრესსამსახური დაუკავშირდა და გვითხრა, რომ მიხეილ ჯანელიძე საუბრობდა 2008 წელზე და იმ დროს მოქმედ მთავრობაზე. საგარეო საქმეთა სამინისტროს ინფორმაციით, უცნობია, ზუსტად რა ინფორმაცია გადასცა თარჯიმანმა მინისტრის გამოსვლის დროს ქართულ ენაზე. სამინისტრომ მინისტრის ინგლისურენოვანი გამოსვლის აუდიო ჩანაწერი მოგვაწოდა, სადაც მინისტრი მიხეილ ჯანელიძე 2008 წელზე საუბრობს.

„დრო დადგა, საქართველოს ხელისუფლებამ შექმნას შესაბამისი კანონმდებლობა განახლებადი ენერგორესურსების შესახებ,” –  ასე მიმართა საქართველოს ხელისუფლების წარმომადგენლებს ევროპარლამენტის მწვანეთა ალიანსის ჯგუფის წევრმა რებეკა ჰარმსმა ბათუმის მე-14 საერთაშორისო კონფერენციაზე – „საქართველოს ევროპული გზა“. კონფერენცია დღეს გაიხსნა ბათუმში და მასზე სხვადასხვა აქტუალური საკითხი განიხილება, მათ შორის, ენერგოუსაფრთხოება.

„ჩვენ წინ მივიწევთ განახლებადი ენერგიის გამოყენების კუთხით. ჩემს ქვეყანას, გერმანიასაც, მნიშვნელოვანი მიღწევები აქვს ამ კუთხით. მაკრონმაც დაასახელა თარიღი, როცა ის დაინახავს მხოლოდ ელექტრო ავტომობილებს, 2030 წელი შორს არ არის,” –  აღნიშნა რებეკა ჰარმსმა.

მისივე თქმით, ჰესების მშენებლობის დროს, ხელისუფლებას არ უნდა დაავიწყდეს, რომ არსებობს კლიმატის ცვლილებების ამოცანები.

მან ყურადღება გაამახვილა იმ საკითხზეც, რომ საქართველო ტრანზიტული ქვეყანაა, „რაც გვაძლევს საფუძველს, რომ გავცდეთ მილსადენებს,” – აღნიშნა ევროპარლამენტის წევრმა.

ენერგოუსაფრთხოების პოლიტიკასთან კავშირზე ისაუბრა გეორგიოს კატრუგალოსმაც. ის საბერძნეთის საგარეო საქმეთა ალტერნატიული მინისტრია ევროპის საკითხებში:

„ეკონომიკური პოლიტიკის ტრაექტორია სხვადასხვაგვარად ვითარდება. ჩვენ ვერ მივაღწიეთ მტკიცე გადაწყვეტილებაზე კონსენსუსს. სტაბილიზაციის მიღწევა შეუძლებელია დაყოფილ საზოგადიებაში,” – აღნიშნა მან.

ბათუმში, აკვაპარკის მიმდებარედ მიწის ნაკვეთის გასხვისებას აჭარის ფინანსთა და ეკონომიკის მინისტრი, რამაზ ბოლქვაძე გამოეხმაურა.

„ეს არის ღია და გამჭვირვალე აუქციონი, რომელშიც მონაწილეობა ყველა დაინტერესებულ პირს, მათ შორის კონკრეტული პარტიის წარმომადგენლებსაც შეუძლიათ.

აუქციონი არათუ უპირობოა, არამედ მასში ძალიან მნიშვნელოვანი პირობებია განსაზღვრული. ერთ-ერთი პირობის თანახმად, ინვესტორმა პროექტში არანაკლებ 25 მილიონი ლარის ინვესტიცია უნდა განახორციელოს.

პროექტის მიხედვით აღნიშნულ მიწის ნაკვეთზე მრავალფუნქციური შენობა-ნაგებობი, კერძოდ, თანამედროვე სტანდარტების სავაჭრო ცენტრი, საერთაშორისო ბრენდის სავაჭრო ობიექტები, სპორტულ-გამაჯანსაღებელი კომპლექსი, კინოთეატრები, ბავშვთა გასართობი ცენტრი, ბოულინგ ცენტრი, ბილიარდკლუბი, საზოგადოებრივი კვების ობიექტები, საზოგადოებრივი და კომერციული ფართობები, მიწისქვეშა და მიწისზედა პარკინგი და სხვა ობიექტები განთავსდება.

ქონების საპრივატიზაციო ფასი ბათუმის საკრებულოს მიერ დამტკიცებული ნორმატიული ღირებულებით განისაზღვრა. ეს არის საწყისი საპრივატიზაციო ფასი, რაც ელექტრონულ აუქციონში ვაჭრობის შედეგად შესაძლოა გაიზარდოს,“ – აცხადებს აჭარის ფინანსთა და ეკონომიკის მინისტრი, რამაზ ბოლქვაძე.

დღეს, 12 ივლისს, „ერთიანი ნაციონალური მოძრაობის“ წევრმა, რევაზ ხარაზმა განაცხადა, რომ მიწა შეუსაბამოდ დაბალ ფასად სხვისდება და საქმე გვაქვს კორუფციულ გარიგებასთან.

აუქციონზე გატანილი 12 971 კვადრატული მეტრი მიწის ნაკვეთის საწყისი ფასი 4 მილიონ 100 ათასი ლარია. ანუ, 1კვ/მ – 316 ლარი.