Batumelebi | 9 აპრილის მემორიალისთვის ბათუმის მერია 100 ათასამდე ლარს დახარჯვას 9 აპრილის მემორიალისთვის ბათუმის მერია 100 ათასამდე ლარს დახარჯვას – Batumelebi
RU | GE  

9 აპრილის მემორიალისთვის ბათუმის მერია 100 ათასამდე ლარს დახარჯვას

ბათუმის ბულვარში, რუსთაველის სახელმწიფო უნივერსიტეტის მიმდებარედ, 9 აპრილის გმირთა მემორიალი უნდა განთავსდეს. მემორიალის საუკეთესო ესკიზის გამოვლენასა და მის საფუძველზე საპროექტო-სახარჯთაღრიცხვო დოკუმენტაციის შედგენაზე ბათუმის მერიამ ტენდერი გამოაცხადა.

ტენდერის პირობების მიხედვით:

  • „ესკიზური პროექტი უნდა ემყარებოდეს ეროვნულ ღირებულებებს და ერთდროულად ითვალისწინებდეს 9 აპრილს, როგორც საქართველოს ეროვნული ერთიანობის, სამოქალაქო თანხმობისა და სამშობლოსათვის დაღუპულთა მოგონების დღეს, ასევე, საქართველოს სახელმწიფოებრივი დამოუკიდებლობის აღდგენის აქტის მიღების დღეს, როგორც ერთიან პროცესს, რომელიც დაიწყო 1989 წლის 9 აპრილს და ქართველი ხალხის გამარჯვებით დასრულდა 1991 წლის 9 აპრილს;
  • ესკიზი უნდა წარმოადგენდეს სივრცით კომპოზიციას, მასშტაბის თვალსაზრისით არ უნდა იყოს კამერული ხასიათის, აღქმის წერტილები უნდა შეირჩეს განთავსების ადგილის გეგმარებითი მდგომარეობის გათვალისწინებით, კომპოზიციის შერჩევისას ანგარიში უნდა გაეწიოს მიმდებარედ არსებულ შენობა-ნაგებობებს;
  • ესკიზი გადაწყვეტილი უნდა იყოს თავისუფალი დიზაინის, სკულპტურულ-არქიტექტურული სინთეზის საშუალებით. გრაფიკული მასალების შესრულების მანერა – თავისუფალი;
  • ესკიზი შესაძლებელია შესრულდეს ნებისმიერი სახვითი საშუალებით [3D ვიზუალიზაცია, ფანქარი, გუაში, შერეული ტექნიკა (სხვადასხვა კომპიუტერულ პროგრამაში აგებული) და სხვა];
  • ავტორმა უნდა წარმოადგინოს ესკიზის კომპიუტერული ვერსია. ამასთან, ყოველ ეგზემპლარზე უნდა იყოს მითითებული ავტორისათვის სასურველი მასალა, რომელშიც მას პროექტის განხორციელება წარმოუდგენია;
  • მემორიალის საპროექტო-სახარჯთაღრიცხვო დოკუმენტაციის ბიუჯეტი არ უნდა აღემატებოდეს 100 000 ლარს“.

დოკუმენტაცია, რომელშიც ბათუმის მერია მაქსიმუმ 6 355 ლარის გადახდას აპირებს, მზად უნდა იყოს ხელშეკრულების გაფორმებიდან ოც დღეში. ტენდერში წინადადებების მიღება მიმდინარე წლის 27 ივლისს დასრულდება.

მთავარი ფოტო: „9 აპრილის ცრემლი“ , ბათუმის ბულვარი / ლელა დუმბაძის ფოტო „ბათუმელების“ არქივიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com