15 ივლისს, 11:00 საათზე, ბათუმის დემოკრატიული ჩართულობის ცენტრში (მის: ფარნავაზ მეფის ქუჩა, N. 62/64/66) ეროვნულ-დემოკრატიული ინსტიტუტისა (NDI) და საქართველოს პარლამენტის საგარეო ურთიერთობათა კომიტეტის თანაორგანიზებით გაიმართება საჯარო შეხვედრა თემაზე – “საქართველოს საგარეო კურსი და უსაფრთხოების საკითხები: გამოწვევები და შესაძლებლობები”.
შეხვედრაზე, საგარეო ურთიერთობათა კომიტეტის თავმჯდომარე სოფიო ქაცარავა ისაუბრებს საქართველოს საგარეო კურსზე და ყურადღებას გაამახვილებს ქვეყნის უსაფრთხოებასთან დაკავშირებულ საკითხებზე.
დისკუსიაში მონაწილეობას მიიღებენ საგარეო ურთიერთობათა კომიტეტის თავმჯდომარის პირველი მოადგილე ნინო გოგუაძე, იმავე კომიტეტის თავმჯდომარის მოადგილე დიმიტრი ცქიტიშვილი და კომიტეტის წევრი გიორგი წერეთელი. აგრეთვე, ღონისძიებას დაესწრება და შეხვედრაში მონაწილეობას მიიღებს ქ. ბათუმის 68-ე ოლქის მაჟორიტარი დეპუტატი ფატი ხალვაში.
შეხვედრას მოქალაქეების გარდა, ადგილობრივ არასამთავრობო ორგანიზაციების, მედიისა და ადგილობრივი ხელისუფლების წარმომადგენლები დაესწრებიან. დამსწრე საზოგადოებას საშუალება ექნება დასვას კითხვები და საგარეო ურთიერთობათა კომიტეტის წარმომადგენლებთან ერთად დისკუსიაში მიიღოს მონაწილეობა.
აღნიშნული ღონისძიება ეროვნულ-დემოკრატიული ინსტიტუტის (NDI) მხარდაჭერითა და დიდი ბრიტანეთის მთავრობის UK aid-ის ფინანსური ხელშეწყობით ხორციელდება.
